དབུས་གཙང་ལོ་རྒྱུས་ཆེན་མོ་ལས། ཀོང་པོ་ཞོ་ཁ་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། དམངས་སྲོལ།

ས་བཅད་བདུན་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན། དགོན་སྡེ།

ལེ་ཚན། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བརྒྱད་པ། དམངས་སྲོལ།

༡ བྲག་གསུམ་མཚོའི་དར་ཆེན་སྐུ་བཞེངས།

རྫོང་དེར་དམངས་སྲོལ་དུས་སྟོན་དུ་བུ་གྲོགས་པོ་ཞེས་པ་ཉིན་ལྔའི་རིང་ལ་ཡུལ་སྡེ་ཆབ་འབངས་ཡོད་ཚད་དགའ་སྟོན་ཐུགས་སྤྲོ་གཏོང་སྲོལ་ཡོད་ཅིང་། སྤྲོ་སྐྱིད་དེའི་ཐོག་མར་ཆོས་ཕྱོགས་དང་འབྲེལ་བའི་བྱེད་སྒོར་ལྷ་གསོལ་དང་། དེ་རྗེས་གར་འཆམ་གྱི་སྟོན་མོ་འཁྲབ་སྟོན་དང་བྲག་གསུམ་མཚོ་འཇལ་གྱིས་དར་ལྕོག་བསྒྲེངས་བཙུགས་བྱེད། སྤྱིར་བྲག་གསུམ་མཚོའི་དར་ཆེན་དེ་བཞིན་ལོ་གསུམ་རེར་ཐེངས་རེར་གསར་རྙིང་བརྗེ་ལེན་བྱེད་ཅིང་། དེ་ཡང་། ཀོང་པོའི་ལོ་གསར་ཚེས་གསུམ་ནས་ཚེས་བཅོ་ལྔ་བར་སྐུ་བཞེངས་བྱེད། དེ་སྔ་མཚོ་མགོའི་དར་ཤིང་རིང་དྲགས་པས་དབུས་གཞུང་ནས་གྲྭ་བཞི་དམག་མི་བཏང་མྱོང་བའི་ལོ་རྒྱུས་ཡོད་པར་བཤད། དར་ཆེན་སྐུ་བཞེངས་ཀྱི་བྱེད་སྒོ་དེ་བཞིན་ཞོ་ཁ་རྫོང་ཙམ་མ་ཟད་ཀོང་པོ་སྤྱི་ཡོངས་སུ་སྲུང་བརྩི་བྱེད་པའི་དུས་ཆེན་སྐད་གྲགས་ཆེ་ཤོས་བརྩི་ལམ་ལྟར། ཀོང་ཡུལ་སྟོད་སྨད་བར་གསུམ་ནས་བྲག་གསུམ་དར་ཆེན་སྐུ་བཞེངས་ལ་ཡོང་སྲོལ་ཡོད་འདུག[1]

༢ མཚོ་རྫོང་དགོན་གྱི་གིང་འཆམ།

བྲག་གསུམ་མཚོ་རྫོང་འདི་ཨོ་རྒྱན་པདྨ་འབྱུང་གནས་ཀྱི་སྒྲུབ་གནས་དང་། དེར་གུ་རུ་ཉིད་ཀྱིས་བཞེངས་པའི་བུམ་པ་དང་ཞབས་རྗེས་མཇལ་རྒྱུ་ཡོད།[2] རྫོང་དེའི་མཚོ་རྫོང་གི་གིང་འཆམ་ཞེས་པ་ཡང་གནས་དེར་བཏབ་པའི་མཚོ་རྫོང་དགོན་པ་ནས་རིམ་བཞིན་དམངས་ཁྲོད་དུ་དར་ཁྱབ་བྱུང་བས་རྒྱ་ཁྱབ་འཁྲབ་སྲོལ་ཡོད་པའི་ཞབས་བྲོའི་རིགས་ཤིག་ཡིན། དེ་ཡང་། དེ་སྔའི་ཞོ་ཁ་རྫོང་འོག་མཚོ་རྫོང་དགོན་དུ་དར་བའི་གིང་འཆམ་གྱི་རྩ་བའི་སྟངས་སྟབས་ནི་ཕོ་མོ་ཟུང་གྲལ་གཉིས་ཁ་གཏད་དུ་བསྒྲེངས་ནས་འཆམ་འགྲོས་གར་སྟབས་དང་བསྟུན་ཕན་ཚུན་འཆམ་གྲལ་སྤེལ་རེས་དང་།  དེ་བཞིན་མི་གཉིས་ཁ་གཏད།  མི་བཞི་རྐྱང་འཁྲབ།  བརྐྱངས་གཅིག་རྒྱ་ནག་ལྕགས་རི་སོགས་འཁྲབ་ཚུལ་མི་འདྲ་བ་འགའ་ཤས་ཤིག་མཆིས། གར་འཆམ་དེ་རིགས་ནི་ཡུལ་མི་ཚོས་ས་གནས་རང་ཁོངས་ཀྱི་རྒྱུན་སྲོལ་གྱི་ཆོས་ཀྱི་བྱེད་སྒོ་དང་བསྟུན་ནས། ཞིང་ལ་ཆར་ཆུ་བཟང་ཞིང་ལོ་ཕྱུགས་ལེགས་པ། ཡུལ་ལ་ནད་ཡམས་མུ་གེ་མེད་པར་འཆམ་མཐུན་བཀྲ་ཤིས་ཕུན་ཚོགས་ཡོང་སླད་འཁྲབ་སྲོལ་ཡོད།[3]

༣ འབྲུག་ལ་བཀྲིས་བདེ་ཆེན་དགོན་གྱི་འཆམ།

ཞོ་ཁ་རྫོང་གི་འབྲུག་ལ་བཀྲིས་བདེ་ཆེན་གྱི་གར་འཆམ་ལ་སྔ་འཆམ་དང་ཕྱི་འཆམ་ཞེས་རིགས་གཉིས་འཁྲབ་སྲོལ་ཡོད་ཅིང་། དང་ཐོག་འཆམ་སྣ་ཡོངས་རྫོགས་སྡེབ་ཐོན་གྱིས་གཟིགས་མོ་བར་ངོ་སྤྲོད་རེ་བྱེད་པ་དང་། དེ་རྗེས་འཆམ་ཚན་རེ་རེ་བཞིན་སརྒ་འཆོལ་མེད་དུ་འཁྲབ་རྗེས་སླར་ལོག་འཆམ་སྐབས་སྡེབ་གཅིག་ཏུ་འཁྲབ་སྲོལ་ཡོད། གར་འཆམ་དེར་ཁྱོན་ལེ་ཚན་ཁག་སུམ་ཅུ་སོ་གཉིས་དང་ལྷན་རོལ་མོའི་རྣམ་གྲངས་ལ། རྔ་བརྒྱད། སྦུབ་གཉིས། དུང་ཆེན་ཆ་གཉིས་བཅས་ལས་གྲུབ་པ་ཡིན།[4]

དཔྱད་གཞིའི་ལུང་ཁུངས་ཡིག་ཆ།

[1] ཀོང་པོ་དབུ་ལ་ཚེ་དབང་ལ་བཅར་འདྲི་ཞུས་པའི་ཟིན་ཐོ། ཕྱི་ལོ་ ༢༠༡༦ ཟླ་ ༥ ཚེས་ ༡༧ ཉིན། རྡ་རམ་ཤཱ་ལ།

[2] བཀའ་བརྒྱུད་གསེར་ཕྲེང་རྣམ་ཐར་ཟླ་བ་ཆུ་ཤེལ་གྱི་ཕྲེང་བ། སྟོད་ཆ། ཝཱ་ཎ་བཛྲ་བིདྱཱ་དཔེ་མཛོད་ཁང་། ཕྱི་ལོ་ ༢༠༠༤། ཤོག ༥༠༦།

[3] བསོད་ནམས་བཀྲིས། ཀོང་པོའི་ལོ་རྒྱུས་དང་གནས་བཤད་གྱེན་དུ་འཕྱུར་བའི་ལྷག་བསམ་གངས་ལྷ་མེ་ཏོག བོད་གཞུང་ཤེས་རི་དཔར་ཁང། ཕྱི་ལོ་ ༢༠༡༡ ། ཤོག ༣༩༥ །

[4] ངག་དབང་གསུང་རབ། བོད་ལྗོངས་སྒྱུ་རྩལ་ཞིབ་འཇུག ཕྱི་ལོ་ ༡༩༩༠།༡ བོད་ལྗོངས་ཤིན་ཧྭ་པར་འདེབས་བཟོ་གྲྭ། ཤོག ༤༢ །

དབུས་གཙང་ལོ་རྒྱུས་ཆེན་མོ་ལས་བཏུས།