དབུས་གཙང་ལོ་རྒྱུས་ཆེན་མོ་ལས། མེ་ཏོག་རྫོང་གི་ཐོན་སྐྱེད་དང་། དགོན་སྡེ་དང་། གྲགས་ཅན་མི་སྣ། གནའ་ཤུལ། དམངས་སྲོལ།

ས་བཅད་བཞི་པ། ཞིང་ནགས་ཐོན་སྐྱེད་དང་ཐུན་མིན་ཐོན་ལས།

པདྨ་བཀོད་དམ་མེ་ཏོག་རྫོང་ནི་ཞིང་ལས་དང་ནགས་ལས་གཉིས་གཙོ་བོ་གཉེར་བའི་ཁུལ་ཞིག་ཡིན་ཞིང་། ཞིང་ལས་ཐད་རྨོ་ཞིང་མུའུ་ཁྲི་ ༡.༦ ཡོད་པ་ནང་ལོ་ཏོག་གཙོ་བོ་འབྲས་ཆེན། འབྲས་ཆུང་། མ་རྨོས་ལོ་ཏོག གྲོ ནས། སྲན་མ། སྲན་ཆུང་། སྲན་སེར། ཁྲེ། ཙེ་ཙེ། མོན་རྒྱགས། བྲ་མོ། པད་ཁ། སི་པན། བ་དམ། ཏིལ། བུར་ཤིང་། ཞོག་ཁོག་མངར་མོ། ལ་ཕུག ཉུང་མ་སོགས་ཚལ་རིགས་ཀྱང་ཐོན་སྐྱེད་འདེབས་ལས་བྱེད།

ནགས་ཚལ་རྒྱ་ཁྱོན་མུའུ་ཁྲི་ ༣༩༤.༨ དང་ནགས་ཚལ་ཟིན་ཚད་བརྒྱ་ཆ་བདུན་བཅུ་ཡོད་པར།[1] ཤིང་སྣ་གཙོ་བོ་གསོམ་ཤིང་དང་། ཐང་ཤིང་། སྟག་པ་དཀར་པོ། ཙན་དན་དཀར་མ། སྦ་ཤིང་། སྨྱུག་ཤིང་། ཟངས་ཤིང་། བེ་ཤིང་། ལྕང་རིགས་སོགས་སྐྱེ་ལ། རང་བྱུང་བཟའ་ཆ་དང་ཤིང་འབྲས་ལའང་སེ་ཤ དཀར་ཤ།འདམ་ཤ ཆོ་ལོ། གྲོ་མ། གཡའ་སྒོག འཛིམ་བུ། སྒོག་སྐྱ། སླེ། ཨ་ལོ། ཟྭ་ཚོད། ལྕང་། སྙ་ལོ། བསིལ་འབྲུམ། སིལ་རིལ། ཀུ་ཤུ། རྒུན་འབྲུམ། ཁམ་བུ། སྟར་ག ལི། ཤིང་དམར་སོགས་ཐོན། དེ་བཞིན་ཞིང་ནགས་ཀྱི་ཐོན་སྐྱེད་འདེབས་ལས་ཀྱི་ལག་ཆའང་ས་གནས་རང་ནས་ཤིང་ལྕགས་གཉིས་ལས་གྲུབ་པའི་ས་ཞིང་རྨོ་བྱེད་དུ་ཐོང་གཤོལ་དང་། གཉའ་ཤིང། རི་བཅས་དང་། ཞིང་ཆུ་གཏོང་སྐབས་ལྕགས་ཁྱེམ་དང་། ཏོག་རྩེ། ཡུར་མ་རྒྱག་བྱེད། བཙས་མ་བརྔ་བྱེད་ཟོ་ར། གཡུལ་ཁའི་སྐབས་སུ་རྒྱག་འཕེན་དབྱུག་པ། རྒྱབ་ར། སྦར་མོ། ཁྲོལ་མ་སོགས་ཤིང་ལས་ལག་ཆ་བཟོ་སྐྲུན་བྱེད་པ་ཡིན།  

རྫོང་དེའི་ཐུན་མིན་གྲགས་ཅན་ཐོན་རྫས་གཙོ་བོ་རི་སྐྱེས་འབྲས་ལྡན་རིགས་དང་། སྡོང་ཕུང་། ཡུ་གུ་ཤིང་། ཤྭ་བའི་ཁྲག་རྭ། གླ་རྩི། ཤ་མོ་སྤྲེལ་མགོ་མ། དབྱར་རྩྭ་དགུན་འབུ་སོགས་ཡིན། རྫོང་དེ་ནས་སྨྱུག་མ་དང་ཤིང་ལས་གྲུབ་པའི་ཉེར་མཁོའི་ཐོན་རྫས་ཀྱི་རིགས་སྣ་ཚོགས་ཤིག་བཟོ་སྐྲུན་བྱེད་ཅིང་། ལྷག་པར་རྫོང་དེ་ཁོ་ནར་ཐུན་མིན་ལག་ཤེས་ཀྱི་བཟོ་སྐྲུན་ལྡན་པའི་རྡོ་ཁོག་ཅེས། ས་ཆ་དེ་རང་ནས་ཐོན་པའི་རྡོ་རིགས་ལས་བྱས་པའི་ཁ་ཟས་གཡོ་སྦྱོར་བྱ་སའི་སྣོད་ཆས་དམིགས་བསལ་ཅན་ཞིག་ཡིན། དེ་ཡང་། རྡོ་རིགས་དེའི་རང་བཞིན་སོབ་སོབ་ཡིན་པས་སེན་མོས་བྲད་ཀྱང་གོག་ནུས། འོན་ཏེ་ཐབ་ལ་བཀལ་རྗེས་རྡོའི་ངོ་བོ་མཁྲེགས་པོར་གྱུར་བས། དེའི་ནང་འབྲས་དང་། ཤ་དེ་བཞིན་ཚལ་རིགས་འདྲ་མིན་བཙོ་ཆོག་ཅིང་བྲོ་བ་ཤིན་ཏུ་ཞིམ་ལ། རྒྱུན་དུ་རྡོ་ཁོག་ནང་བཙོས་པའི་ཟས་རིགས་བཟས་ཚེ། ཁྲག་ཤེད་མཐོ་བ་དང་། སྙིང་གི་ན་ཚ་སོགས་ལ་བདེ་སྲུང་གི་ནུས་པ་ཐོན་གྱི་ཡོད་པའི་སྐོར་ཤོད་སྲོལ་འདུག[2]

ས་བཅད་དྲུག་པ། སྲོག་ཆགས་དང་། སྐྱེས་དངོས། གཏེར་ཁ།

གཅན་གཟན་རི་དྭགས་ལ་སྟག་དང་། གཟིག དོམ། གླ་བ། དྲེད། མི་རྒོད། གསའ་གཟིག གཡི། ཨོག་དཀར། རྒྱ་གོར། ར་རྒོད། ཙི་ཉག གླ་བ་དཀར་ནག ཝ་མོ། སྲམ། སྤྱང་ཀི སྤྲེའུ་མཇུག་རིང་། ཤྭ་བ་མཆུ་དཀར་སོགས་མང་དུ་ཡོད། སྐྱེ་དངོས་སྨན་རྫས་སུ་གངས་ལྷ་མེ་ཏོག སྡོང་ཐུང་རྩི་ཤིང་། ངག་ལག ཚ་ལུ་མ། རྡོ་ཐ། ཇ་ཤིང་། དེ་མིན་གླ་རྩི་དང་། ཤྭ་བའི་ཁྲག་རྭ། སྡོང་ཕུང་། ཡུ་གུ་ཤིང་། ཨ་རུ། སྐྱུ་རུ། བ་རུ། ཛ་ཏི། ཐིང་ལེབ། ཡང་ཙམ་ཏ། སྤྲེའུ་མགོ་ཞེས་པའི་སྨན་རྫས་དང་རི་ཟས་སོགས་སྨན་རྩྭ་སྣ་ཚོགས་དང་། བསང་གི་རིགས་ལ་ཤུག་པ། བ་ལུ། སུ་ལུ། གཡའ་ཚན། གངས་དཀར། ཤ་ཕྲུག འཁན་པ། ཆུ་ཤིང་འོམ་བུ་སོགས་དང་། ཤིང་སྣར་ཡང་ཐང་ཤིང་དང་། སྟག་པ། བླ་མ་ཤིང་། ཤུག་པ་ལྷ་ཤུག་དང་། འདྲེ་ཤུག མཛོ་མོ་ཤིང་། ཚར་མ་ཤིང་། གདུང་ཤིང་། གླང་མ་དང་། ལོ་སྐྱུར་ཐང་ཤིང་། སྡོང་རིང་ཐང་ཤིང་། སྦྱར་དཀར། མྱང་རྩི་སྤྲས། སྡོང་ཕུང་། སྒ་སེར། ཤིང་ཚོས་རམ་སོགས་སྐྱེ་ཞིང་། རང་བྱུང་མེ་ཏོག་གི་རིགས་ལ་བ་ལུའི་མེ་ཏོག སུ་ལུའི་མེ་ཏོག ཚར་མའི་མེ་ཏོག ཁྲག་ཤ་མེ་ཏོག སེར་ཆེན་མེ་ཏོག ཧ་ལོའི་མེ་ཏོག སྤང་རྒྱན་མེ་ཏོག ཁྱུང་ལུང་མེ་ཏོག སྐལ་བཟང་མེ་ཏོག ཞོ་སྟོན་མེ་ཏོག འབྲས་སིལ་མེ་ཏོག གོས་ཆེན་མེ་ཏོག གང་ཟང་མེ་ཏོག དཀར་ཡོལ་མེ་ཏོག་དང་། རང་བྱུང་ཟ་ཆའི་རིགས་ཟྭ་ཚོད། སྔོ་ཚལ་གླེས། འཛིམ་བུ། ཆུ་དཀར། སྒོག་པ་བླ་མ། སྐྱ་སྒོག རི་སྒོག གྲོ་མ། སེར་ཤ།སྤང་ཤ དབྱར་རྩྭ་དགུན་འབུ། རྩི་དཀར། སྨུག་རྩི། སྤང་སྤོས། ཆུ་ཤ ཆོ་ལོ་སོགས་སྐྱེ་བ་ཡིན་ནོ།།

ས་བཅད་བདུན་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན། དགོན་སྡེ།

ལེ་ཚན་གཉིས་པ། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བརྒྱད་པ། དམངས་སྲོལ།

བོད་སྐད་ཀྱིས་ལྷོ་པ་རིགས་དང་མོན་རིགས་ཀྱི་སྐད་ལ་ཤུགས་རྐྱེན་ཤིན་ཏུ་ཆེ། ལྷག་པར་དུ་ཆབ་སྲིད། ཆོས་ལུགས། གནམ་དཔྱད། ལག་རྩལ་སོགས་ཀྱི་ཐ་སྙད་ཕལ་ཆེ་བ་བོད་སྐད་གཡར་སྤྱོད་བྱེད། རིགས་གཉིས་ཀར་རང་ཉིད་ཀྱི་སྐད་ཡོད་ཅིང་། རང་ངོས་ཀྱི་ཡུལ་སྐད་དང་ལུང་སྐད་ཚུད། འོན་ཀྱང་གཉིས་ཀར་རང་ངོས་ཀྱི་ཡི་གེ་མེད།

དཔྱད་གཞིའི་ལུང་ཁུངས་ཡིག་ཆ།

[1] 西藏自治区土地册，西藏自治区测绘局，中国地图出版社出版.1996.Pg 155.

[2] ཀྲུང་གོའི་བོད་ལྗོངས། ཕྱི་ལོ་ ༢༠༡༣།༣ སྤྱི་དེབ་གྲངས་ ༡༢༠། ཟླ་ ༣། ཤོག ༥༨།

དབུས་གཙང་ལོ་རྒྱུས་ཆེན་མོ་ལས་བཏུས་པའོ།།

འདི་ནས་ཀོང་པོའི་ལོ་རྒྱུས་སྐོར་ཆ་ཚང་སྡེ་ཚན་སོ་སོར་ཕྱེ་ནས་འཇུག་འགོད་ཞུས་ཟིན་ལགས།