དབུས་གཙང་ལོ་རྒྱུས་ཆེན་མོ་ལས། སྣེ་གདོང་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། དམངས་སྲོལ།

ས་བཅད་བདུན་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན་དང་པོ། དགོན་སྡེ།

ལེ་ཚན་གཉིས་པ། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བརྒྱད་པ། དམངས་སྲོལ།

དང་པོ། ཡར་ལུང་བཀྲིས་ཞོལ་པ།

ཡར་ལུང་བཀྲིས་ཞོལ་པ་ཞེས་པའི་ཟློས་གར་དེའི་མིང་ནི་ཡུལ་མིང་ལ་བརྟེན་ནས་ཐོགས་པ་ཞིག་སྟེ། དང་ཐོག་ཟློས་གར་དེ་འཁྲབ་སྟོན་བྱ་ཡུལ་ད་ལྟའི་ལྷོ་ཁ་ཡར་ལུང་སྣེ་གདོང་རྫོང་ཁྲ་འབྲུག་གྲོང་རྡལ་བཀྲ་ཤིས་མཆོད་རྟེན་དུ་ཡིན་ལ། དུས་རབས་བཅོ་ལྔ་པའི་སྐབས་ནས་ཀྱང་ཡར་ལུང་བཀྲིས་ཞོལ་པ་ཞེས་པའི་ཟློས་གར་འཁྲབ་སྟོན་རུ་ཁག་འཛུགས་མྱོང་། ཟློས་གར་དེ་བོད་ཀྱི་ཟློས་གར་གྱི་སྲོལ་འབྱེད་གྲུབ་ཐོབ་ཐང་སྟོང་རྒྱལ་པོའི་སྐབས་སུ་ཁུངས་དེད་བྱས་ཆོག་ཅིང་། སྐབས་དེར་ཚོགས་པ་དེར་ཁྱོོན་བསྡོམས་མི་གྲངས་ ༡༧ ཙམ་ཡོད་པ་ཚང་མ་སྐྱེས་པ་ཡིན།[1] ཞེས་བཤད་ཀྱང་། ཡར་ཀླུངས་བཀྲིས་ཞོལ་པའི་གླུ་གར་དེ་ནི་༸རྒྱལ་མཆོག་ལྔ་པ་ཆེན་པོའི་དུས་སྐབས་ནས་བྱུང་ཚུལ་ཡང་འདུག དེ་ཡང་། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་སྲིད་དབང་དབུ་བརྙེས་མཛད་པ་ནས། དུས་སྐབས་དེར་༸གོང་ས་ལྔ་པ་ཆེན་པོས་འབྲས་སྤུངས་དགོན་དུ་ཞོ་སྟོན་ཞེས་གཞུང་འབྲེལ་མཛད་སྒོའི་དུས་སྟོན་ཞིག་སྤེལ་གནང་མཛད་པར། ལྷོ་ཁ་ཡར་ཀླུངས་ཁུལ་གྱི་མི་སེར་ནས་བཀྲ་ཤིས་ཞོལ་པོའི་འཁྲབ་སྟོན་བྱས་པ་ནས། ལོ་ལྟར་ཞོ་སྟོན་གྱི་དུས་ཆེན་དེར་འཁྲབ་པ་ནས་རྒྱ་ཆེར་དར་སྲོལ་བྱུང་བར་བཤད་ཅིང་། གླུ་གར་དེར་བཀྲ་ཤིས་ལྔ་བརྩེགས་ཀྱི་རྟེན་འབྲེལ་བཤད་པ་རྒྱག་རྒྱུ་མཆིས་པའང་། བཀྲིས་མཐོང་སྨོན། བཀྲིས་ཟམ་པ། བཀྲིས་ཆོས་སྡེ། བཀྲིས་རྩེ་ཟེར། བཀྲིས་ཞོལ་པ་བཅས་ཡོད། གླུ་གར་དེའི་མིང་དེ་ལྟར་ཐོགས་དོན་ཡང་བཀྲིས་ལྔ་བརྩེགས་ལས་བཀྲིས་ཞོལ་པ་ཞེས་པ། གླུ་གར་འཁྲབ་སྟོན་མི་སྣ་རྣམས་རྫོང་ཞོལ་གྱི་བཀྲིས་རྩེ་དང་བཀྲིས་ཆོས་སྡེའི་ཆོས་གཞིས་ནས་བསྡུ་རུབ་བྱས་པས་དེ་ལྟར་ཐོགས་པར་གསལ།[2]

ཡར་ལུང་བཀྲིས་ཞོལ་པ་ནི་བོད་ཀྱི་འཁྲབ་སྲོལ་དེར་ཐུན་མིན་གྱི་ཁྱད་ཆོས་མངའ་ཞིང་། དེར་བཀྲིས་ལྔ་འཛོམས་ཞེས་ཀྱང་འབོད། ཡར་ཀླུང་བཀྲིས་ཞོལ་པའི་ངག་གི་དབྱངས་རྟ་དང་གྱེར་ཚིག་ཟློས་གར་གཞན་དང་མི་འདྲ་ཞིང་། འཁྲབ་སྟོན་པའི་གདོང་འབག་ཚང་མ་འབག་དཀར་པོར་ཁ་མདོག་གསེར་པོའི་མཐའ་རྒྱན་དང་། འཁྲབ་སྟོན་བྱེད་སྐབས་འཁྲབ་སྟོན་པས་གདོང་ལ་འབག་གྱོན་ཞིང་། གདོང་ལ་མཛེས་བཟོ་ཅུང་ཟད་བྱས་རྗེས་རྔ་སྒྲའི་དབྱངས་རྟ་དང་མཉམ་དུ་བྲོ་གར་འཁྲབ་པར་བྱེད་ལ། གླུ་གྱེར་བའི་སྐབས་འཁྲབ་སྟོན་པ་གཞན་དག་ཀྱིས་ཀྱང་རམ་འདེགསབྱེད་ཀྱི་ཡོད། སྔ་མོ་ལོ་རེར་བོད་ཀྱི་ལོ་གསར་དང་འོང་སྐོར་རྫོང་གི་མཛད་སྒོ་ཆེ་གྲས། དེ་མིན་ལྷ་ཞོ་སྟོན་སྐབས་ཀྱི་བོད་ཟླ་དྲུག་པའི་ཚེས་ཉེར་དགུ་ཉིན་འཕྱོངས་རྒྱས་སྤུན་བདུན་པ་དང་ཡར་ཀླུང་བཀྲ་ཤིས་ཞོལ་པ་གཉིས་གཟིགས་འབུལ་ཞུ་སྲོལ་ཡོད་དོ།[3]

གཉིས་པ། ཉི་ཆོས་བཟང་པོ།

གནའ་སྔ་མོ་སྣེ་གདོང་ཁུལ་དུ་སྣེ་གདོང་རྒྱལ་པོར་གྲགས་པ་ཞིག་བྱུང་ཡོད་ཅིང་། རྒྱལ་པོ་དེ་ནི་མི་སེར་གྱི་བདེ་སྡུག་ལ་གཟིགས་རྟོག་མེད་པར་དབང་ཤེད་དཔོན་ངམ་དང་འདོད་རྔམ་གཡོ་སྒྱུ་ཤིན་ཏུ་ཚ་བ་ཞིག་ཡོད་པར། བློན་པོ་ཉི་ཆོས་བཟང་པོ་ཞེས་འབོད་པ་བློ་རིག་སྤྱང་གྲུང་འཛོམས་ལ་དམངས་ཀྱི་བདེ་སྡུག་ཐད་དོ་ཁུར་ཆེ་བའི་སྐྱེ་བུ་ཡ་རབས་ཤིག་མཆིས། ཁོང་གིས་ཐབས་དང་རིག་པ་གང་མང་ལ་བརྟེན་ནས་མི་སེར་ལ་དབུལ་སྐྱོབ་དང་རོགས་རམ་གྱི་བྱ་བ་མང་པོ་སྒྲུབ་ཞོར། འདོད་རྔམ་ཅན་གྱི་རྒྱལ་པོ་དེའི་ཚུལ་མིན་གྱི་ཁྲིམས་དང་ཁྲལ་འུ་ལག་ལས་ཐར་ཐབས་བྱས་པ་དང་ཆབས་ཅིག  གླགས་དང་བསྟུན་ནས་རྒྱལ་པོར་མང་ཚོགས་ཀྱིས་ཡིད་སེམས་ཚིམ་པའི་ཚ་སྐྱིན་ནན་མོའི་ཡ་ལན་རེ་སྤྲོད་པའི་གཏམ་རྒྱུད་མཆིས་པས། དུས་ཡུན་རིང་པོའི་ནང་བོད་ཁུལ་སྤྱི་དང་ལྷག་པར་དབུས་གཙང་ཁུལ་དུ་ཁོང་གི་གཏམ་རྒྱུད་མཚོན་པའི་སྒྲུང་གཏམ་འབོར་ཆེན་ཞིག་མཆིས་པ། དཔེར་ན། 《ནོར་གཅིན་གཏོང་བ།》ཞེས་པ་དང།《མར་ཁྲལ་ཆག་ཡང་གཏོང་བ།》《བཀའ་བཀྱོན་འབེབས་པ།》《གནམ་སྐྱག་དཀར་པོ།》《ཕག་ཤ་ཚོང་བ།》སོགས། དངོས་བྱུང་དང་བཅོས་སྒྲུང་མཉམ་སྤྱོད་ཀྱིས་རང་བཞིན་ལྡན་ཞིང་། བློ་རིག་དང་མཚར་གཏམ་གྱིས་སྒོ་ནས་སྤྱི་ཚོགས་ཀྱི་སྐྱོན་མཚང་ཐེར་འདོན་གྱི་ནང་དང་ལྡན་པའི་གཏམ་རྒྱུད་དེས། དབུས་གཙང་སྤྱི་ཚོགས་ཁྱོན་ཀུན་ལ་བག་ཆགས་ཟབ་མོ་བཞག་ཡོད།

དཔྱད་གཞིའི་ལུང་ཁུངས་ཡིག་ཆ།

[1] ཡར་ཀླུང་བཀྲིས་ཞོལ་པ་ཟློས་གར་ཚོགས་པའི་སྒྱུ་རྩལ་འཁྲབ་སྟོན་གྱི་འཚོ་བ། ཀྲུང་གོའི་བོད་ལྗོངས་དྲ་བ། ཕྱི་ལོ་ ༢༠༡༥ ཟླ་ ༨ ཚེས་ ༢༣།

[2] བོད་ཀྱི་དམངས་སྲོལ་གཅེས་བསྡུས། མི་རིགས་དཔེ་སྐྲུན་ཁང་། ཕྱི་ལོ་ ༡༩༩༩། ཤོག ༦༡༥།

[3] ཡར་ཀླུང་བཀྲ་ཤིས་ཞོལ་པའི་ལྷ་མོའི་འཁྲབ་གཞུང་། བོད་ལྗོངས་མི་དམངས་དཔེ་སྐྲུན་ཁང་། ལྷ་ས། ༡༩༨༧། ཟློས་གར་གྱི་འཁྲབ་གཞུང་ཧྲིལ་པོ་མཆིས་པས་དེར་གཟིགས་འཚལ།

དབུས་གཙང་ལོ་རྒྱུས་ཆེན་མོ་ལས་བཏུས་པའོ།།