ཁ) ཡིག་སྒྱུར་གྱི་རྨང་གཞི་དང་། ལོ་པཎ་བསྐོ་གཞག ཞང་བོད་ཡིག་སྒྱུར།
༡) ཡིག་སྒྱུར་གྱི་བྱེད་སྒོ་བོད་གངས་ཅན་གྱི་ལྗོངས་སུ་ཐོག་མར་དར་ཚུལ་ནི། རྡོ་ཡི་དུས་རབས་སྔ་ཕྱི་གཉིས་ལས། ཕྱི་མའི་དུས་མཇུག་ཙམ་ནས་ཡི་གེའི་སྲོལ་དར་བ་དང་ཆབས་ཅིག་ཏུ་ཡིག་སྒྱུར་གྱི་བྱེད་སྒོ་ཡང་རིམ་བཞིན་དར་འཕེལ་བྱུང་ཚུལ་དེབ་ཐེར་ཁག་ཏུ་གསལ་ཡོད། དེ་ཡང་བན་བོན་གྱི་ལུགས་གཉིས་ལས། དང་པོ། གཡུང་དྲུང་བོན་ལུགས་སུ་བོད་ཀྱི་ལོ་རྒྱུས་ཐོག་ཡིག་སྒྱུར་གྱི་ལས་དོན་སྔ་ཤོས་ནི། དེབ་ཐེར་ <<རྒྱལ་རབས་བོན་གྱི་འབྱུང་ཁུངས་>> ལས། གཉའ་ཁྲི་བཙན་པོའི་རིང་ལ། རྒྱུའི་བོན་ཤེས་པ་ཅན་བཅུ་གཉིས་ཀྱི་བོན་དར་ཏེ། སྲས་མུ་ཁྲི་བཙན་པོའི་རིང་དུ་བསླབ་པའི་དོན་གོ །བསྒྲུབ་པའི་དོན་གྲུབ། བསྒོམ་པའི་དོན་རྟོགས་ནས་སྟག་གཟིག་ལ་སོགས་འཛམ་གླིང་གི་ལོ་ཙཱ་བསྒྱུར།” ཞེས་པ་ལྟར། བོད་ཀྱི་བཙན་པོའི་ཐོག་མ་གཉའ་ཁྲིའི་སྐུ་དུས་ནས་བོད་གངས་ཅན་གྱི་ལྗོངས་སུ་ཡིག་སྒྱུར་བྱེད་སྒོ་ཐོག་མར་དབུ་ཚུགས་པར་གསུངས།
༢) ལོ་པཎ་བསྐོ་གཞག་གནང་སྲོལ་ཐད་གཡུང་དྲུང་བོན་པོའི་གཞུང་། <<རྣམ་འབྱེད་འཕྲུལ་ལྡེ་>> ལས།
རྗེ་གཅིག་གཉའ་ཁྲི་བཙན་པོ་མན་ཆད་དུ། །ཆབ་སྲིད་འཛིན་པའི་རྒྱལ་པོ་རེ། །
ཐར་ལམ་འདྲེན་པའི་སྐུ་གཤེན་རེ། །སྐད་ཡིག་བསྒྱུར་བའི་ལོ་པཎ་རེ། །
བྱ་ཐབས་གསུང་རབ་རེ་རེ་བཞག །
ཅེས་གསུངས་པ་ལྟར། རྗེ་ལ་སྔ་བ་གཉའ་ཁྲི་བཙན་པོ་ནས་ཆོས་རྒྱལ་སྲོང་བཙན་སྒམ་པོའི་བར་བཙན་པོ་སོ་སོར་སྐད་ཡིག་བསྒྱུར་བའི་ལོ་པཎ་རེ་བསྐོ་གཞག་གནང་བའི་ལམ་སྲོལ་བྱུང་བ་མ་ཟད། སྐབས་དེར་ལོ་ཙཱ་བ་མང་དུ་བྱོན་ཏེ་ཏ་གཟིག་གི་ཡུལ་ནས་གཡུང་དྲུང་བོན་གྱི་གཞུང་ལུགས་མང་པོ་སྔ་རྗེས་སུ་བོད་བསྒྱུར་གནང་སྟེ། ཡིག་སྒྱུར་གྱི་བྱེད་སྒོ་སྤེལ་བའི་ཐོག་མའི་རྨང་གཞི་ཚུགས་པར་གྲག །
དེ་བཞིན་ <<ལེགས་བཤད་རིན་པོ་ཆེའི་གཏེར་མཛོད་>> ལས། མཁས་པའི་ཕུལ་དུ་ཕྱིན་པའི་ལོ་ཙཱ་བ། རྫུ་འཕྲུལ་གྱི་ཞབས་དང་ལྡན་པ། སྟག་གཟིག་གི་ལོ་ཙཱ་བ་དམུ་ཙ་ཏྲ་ཧེར་པེ། ཞང་ཞུང་ལ་ཁྲི་ཐོག་སྤ་ཙ། སུམ་པ་ལ་གུ་ཧུ་ལི་སྤར་ལེགས། རྒྱ་གར་ལ་ལྷ་བདག་སྔགས་དྲོ། རྒྱ་ནག་ལ་ལེགས་ཏང་སྨང་པོ། ཕྲོམ་ལ་གསེར་ཐོག་ལྕེ་འབྱམས་དྲུག་གོ །ཞེས་གསུངས་པ་ལྟར། གཡུང་དྲུང་བོན་གྱི་དཔེ་རྙིང་གཞན་དག་ལས་གཉའ་ཁྲི་བཙན་པོའི་དུས་ནས་བོད་ལ་ཡི་གེ་ཡོད་པར་མ་ཟད། ཡིག་སྒྱུར་གྱི་སྲོལ་དར་ཟིན་ཚུལ་གསུངས།
༣) ཞང་ཞུང་གི་སྐད་ནས་བོད་དུ་བསྒྱུར་བའི་རིམ་པ་ཡང་། <<གཡུང་དྲུང་བོན་གྱི་བསྟན་འབྱུང་ཉུང་བསྡུས་>> ལས། སྟག་གཟིག་དང་ཞང་ཞུང་རྒྱ་གར་བྲུ་ཤ་སོགས་ཀྱི་མཁས་པ་ཆེན་པོ་རྣམས་ཀྱི་དྲུང་དུ་བློ་གྲོས་ཀྱི་རྩལ་རྫོགས་པའི་ཞང་ཞུང་གི་བོན་བསམ་གྱིས་མི་ཁྱབ་པ་ཞིག་ཞང་ཞུང་སྨར་གྱི་སྐད་ལས་སྤུར་རྒྱལ་བོད་ཀྱི་སྐད་དུ་བསྒྱུར་ཏེ་སངས་རྒྱས་ཀྱི་བསྟན་པ་རིན་པོ་ཆེ་ལ་འཆད་རྩོད་རྩོམ་གསུམ་གྱི་སྒོ་ནས་བོན་གྱི་འཁོར་ལོ་བསྐོར་རོ། །ཞེས་དང་། ཇི་ལྟར་བསྒྱུར་བའི་ཚུལ་ནི། <<སྲིད་པའི་མཛོད་ཕུགས་ཀྱི་འགྲེལ་པ་འཕྲུལ་གྱི་སྒྲོན་མེ་>> ལས། ཅི་ལྟར་བསྒྱུར་ན། བོད་དང་ཞང་ཞུང་གི་ཚིག་གི་ཚོམ་བསྡེབས་ནས་ཏེ། མདོ་རྒྱས་འདྲེས་མ་དང་། ཟུར་སྡོང་ཡ་བྲལ་དང་། ཐད་ལོག་ཐད་ཀམ་དང་། དོན་འགྱུར་དང་། ཚིག་འགྱུར་ལ་སོགས་སུ་བསྡེབས་ནས་སོ། །ཞེས་གསུངས། འོན་ཀྱང་གོང་སྨྲས་འདི་དག་ནི་ལོ་རྒྱུས་ཀྱི་ཐོ་བཀོད་ཙམ་ལས་སྒྱུར་ཡིག་འདི་དང་འདིའོ་ཞེས་བསྟན་རྒྱུ་ཤིན་ཏུ་དཀའ་ལ། ད་ལྟ་ང་ཚོས་མིག་མཐོང་ལག་ཟིན་དང་། དངོས་སུ་མཇལ་རྒྱུ་ཡོད་པ་ནི། ལོ་རྒྱུས་ཐོག་བོད་ཀྱི་སྒྲ་སྒྱུར་ཀུན་ལས་དཔེ་མཚོན་རང་བཞིན་ནི། <<བཀའ་འགྱུར་>> དང་། <<བསྟན་འགྱུར་>> རྣམས་ཡིན་ནོ།།
གཞན་ཡང་གཡུང་དྲུང་བོན་གྱི་ལོ་རྒྱུས་ <<མདོ་འདུས་>> ལས། སྟག་གཟིགས་འོལ་མོ་གླིང་གི་བཀའ་དང་བོན་རྣམས་ལོ་ཙཱ་བ་ ༡ ཞང་ཞུང་ཁྲི་ཐོག་སྤ་ཙ། ༢ བོན་པོ་མུ་ཕོད། ༣ རྒྱ་གར་གྱི་གཤེན་པོ་ལི་ཤ །༤ ཁ་ཆེའི་གཤེན་པོ་བྲ་བ་མེད་རེ་ཅན། ༥ ཐོ་གར་གྱི་གཤེན་པོ་ལ་ཝང་ཤང་། ༦ བྲུ་ཤ་གེ་ཏེ་ནི་ལོ་ཙཱ་རྣམས་ཀྱིས་བོན་བསྒྱུར་ཅིང་བཤད། ཅེས་དང་། <<རྒྱུ་ཉི་སྒྲོན་>> ལས། ཁྱུང་ཕོ་སྟག་སྒྲ་དོན་གཙུག བླ་ཆེན་ལི་ཤོ་སྟག་རིང་། བྷེ་ཤོ་ཁྲམ། གཙོ་ཁྲི་གཙུག་བཅས་བཞིས་ཞང་ཞུང་གི་མཁས་པ་མི་བཞི་ལ་གཏུགས་ཏེ་བོན་ཞུས་པས་བོན་གྱི་གསང་སྡེ་ཆེན་པོ་བཞི། འབུམ་སྡེ་ཆེན་པོ་ལྔ། ཕྱི་ནང་རྒྱས་བསྡུས་ཀྱི་བོན་ལ་སོགས་པ་བོད་སྐད་དུ་བསྒྱུར་ནས་རྒྱལ་པོ་ལ་ཕུལ་བས་རྗེ་ཡང་ཐུགས་དགྱེས་སོ། །ཞེས་གསལ་བ་ལྟར་ན། སྐབས་དེར་བོད་ཀྱི་མངའ་ཁོངས་གཅིག་གྱུར་མ་བྱས་གོང་གི་བོད་ཀྱི་ལོ་ཙཱ་བ་ཡིན་པ་གསལ་པོ་ཡིན་པར་མ་ཟད། རྒྱལ་པོ་གྲི་གུམ་བཙན་པོས་བོན་མ་བསྣུབས་གོང་གི་བོད་ཀྱི་ལོ་ཙཱ་བ་རེད[1]།
[1] དུང་དཀར་རིན་པོ་ཆེའི་གསུང་འབུམ། (ཇ) ༢༠༠༤ ཤོག་གྲངས། ༣༠༦
