ཁོར་ཡུག་དང་རླུང་རྟ།
མཁས་གྲུབ།
ཆད་མེད་དུས་ཚོད་ཀྱི་འཁོར་ལོ།།
མྱུར་བར་མདུན་ཕྱོགས་སུ་འཁོར་བས།།
ལང་ཚོ་དར་བ་དང་ལྷན་ཅིག།།
འཚོ་བའི་ཁོར་ཡུག་ཀྱང་འགྱུར་སོང་།།
རྡོར་དྲིལ་ཕྱག་རྒྱ་དང་བྲལ་ཞིང་།།
སུམ་རྟགས་དཔེར་བརྗོད་ཀྱང་བཞག་ནས།།
ཆེད་ལས་གསར་རྩོམ་གྱི་གོ་སར།།
ངོ་ཚར་རྨི་ལམ་བཞིན་སླེབས་བྱུང་།།
དགོས་པའི་རིག་གནས་ལ་ཡར་འགྲོ།།
ཤིག་གི་གོམ་པ་ལས་དལ་བ།།
མི་དགོས་རྒྱས་སྤྲོས་ལ་མར་འགྲོ།།
གླ་བའི་མཆོངས་རྒྱགས་ལས་མགྱོགས་པ།།
ཆུང་ནས་བྲལ་མེད་ཀྱི་རྩེ་གྲོགས།།
ལུ་གུ་ལག་སྐྱེས་ཀྱི་མཆོད་ཆང་།།
དལ་བུས་ཕར་ཕར་ལ་འབུད་དེ།།
ཟུར་མིག་སྦི་རག་ལ་འཕངས་བྱུང་།།
མ་བཅོས་ལྦུ་དཀར་གྱི་ཟེགས་མ།།
སྣ་དང་དཔྲལ་བ་ལ་ཐོར་བཞིན།།
འཁྱགས་གྲང་མཉེས་དག་ཅིག་བརྒྱབ་པས།།
སྙིང་གི་རུས་པ་ཡང་འདར་བྱུང་།།
ཤེལ་བུམ་ཇ་ཁུའི་ནང་བཞུགས་པའི།།
བདུད་རྩི་མགྲིན་བཟང་གྱི་ཆབ་མདོག།།
ཁྱེད་ལ་དེ་འདྲ་ཡི་རོ་བཅུད།།
ཡོད་འགྲོ་བསམ་པ་རང་མ་བྱུང་།།
ཐོག་མར་རྨ་ཆུ་ཡི་ཉིང་ཁུ།།
བར་དུ་ཨ་རི་རིའི་ལན་ཏད།།
མཐའ་བར་གངས་ལྗོངས་ཀྱི་ལྷ་ཆུ།།
བཀྲ་ཤིས་རྣམ་པ་གསུམ་འཛོམས་སོང་།།
ལྷག་དོན་བང་སེལ་དང་འཁྲུངས་སྐར།།
འགྲན་བསྡུར་འཁྲུག་ཤོས་ཀྱི་དུས་འདིར།།
སྦི་རག་འཐུང་ཤེད་ཅིག་མེད་ན།།
རྔོ་ལོ་འཕྱར་རྒྱུ་ལས་ཅི་ཡོད།།
ཕར་ལ་མཉེས་དག་ཅིག་བཀྱག་ཀྱང་།།
ཚུར་ལ་ཤོག་སྒམ་གང་འཐུང་བའི།།
ངལ་མེད་ངོ་སོ་ཡི་ཚོང་དེར།།
གྱོང་གུན་རྩ་བ་ནས་མི་འདུག།།
སྡུག་ན་ནམ་རྒྱུན་རང་སྡུག་པ།།
དངུལ་ཁུག་བསྔོག་རྒྱུ་ལས་མི་འདུག།།
ཆང་གྲོགས་མང་དུ་ནས་མང་དུ།།
ཉོ་མཁན་ཉུང་དུ་ནས་ཉུང་དུ།།
འཆར་ཅན་ལས་ཀ་ཡི་དུས་ཀྱང་།།
ཤེལ་དམ་གཉིས་གསུམ་ཞིག་འཐུང་བ།།
རྒྱུན་ལྡན་བྱ་བ་རུ་གྱུར་ཀྱང་།།
བཀའ་སྐྱོན་གནང་མཁན་ནི་མ་བྱུང་།།
དབྱིབས་ལེགས་དཀར་འཇམ་གྱི་གྲོད་ཁོག།།
རིམ་བཞིན་ལྷུག་ལྷུག་ཏུ་གྱུར་ཀྱང་།།
རིག་པ་འོད་འབུམ་གྱི་ཉི་གཞོན།།
གཟའ་ཡིས་མ་བཟུང་ཙམ་བྱུང་ངོ་།།
སྦི་རག་འཐུང་གིན་དང་འཐུང་གིན།།
སྣ་མང་ཆེད་ལས་ཀྱི་བྱ་བར།།
བརྩོན་འགྲུས་རླབས་ཆེན་ཞིག་བརྩམས་པས།།
གྲུབ་འབྲས་ཡུངས་དཀར་ཙམ་ཐོབ་བྱུང་།།
ཁྱད་པར་ལྷ་ས་ཡི་སྦི་རག།།
ལོ་ངོ་གཉིས་གསུམ་དྲུག་བཏུངས་ཏེ།།
ཇོ་མོ་གླང་མ་ཡི་རྩེ་མོར།།
ལུས་པོ་ཁྱར་ཁྱོར་ངང་འཛེགས་ཡོད།།
དེ་ཚེ་གནའ་བོ་ཡི་གྲོང་རྡལ།།
རྩེད་ཐང་སྲང་ལམ་གྱི་ཁྲོད་དུ།།
ར་བཟི་དོན་གྲུབ་ཀྱི་མིང་གསར།།
སླར་ཡང་ལྷང་ལྷང་དུ་ཁྱབ་སོང་།།
