ཀུན་དགའ་རིན་ཆེན། ས་སྐྱའི་ཁྲི་པ་བཅོ་ལྔ་པ་འདི་ཉིད་རབ་བྱུང་བཅུ་དྲུག་པའི་ས་ཡོས་ (༡༣༣༩) ལོར་ཡབ་མཁས་བཙུན་ནམ་མཁའ་ལེགས་པ་དང་། ཡུམ་དགེ་འདུན་འབུམ་གཉིས་ཀྱི་སྲས་སུ་འཁྲུངས། གཅེན་པོ་བླ་མ་དམ་པ་དང་བླ་མ་མཉམ་མེད་པ་ཆེན་པོ་གཉིས་ལས་རབ་ཏུ་བྱུང་། ལུག་ལོ་ཞིག་ལ་ཏཱའི་སི་ཏུ་བྱང་ཆུབ་རྒྱལ་མཚན་གྱི་ཕྱག་ཕྱི་མཛད་ནས་ཆུ་མིག་ཏུ་ཕེབས། དེ་ནས་བཟུང་བཞི་ཐོག་པའི་གདུང་རྒྱུད་རྣམས་ཀྱིས་ཆུ་མིག་ཏུ་ཆོས་འཁོར་མང་དུ་བསྐོར། འགའ་ཞིག་གནས་དེར་གདན་ཆགས་པས་ཕྱིས་སུ་བཞི་ཐོག་པ་རྣམས་ལ་ཆུ་མིག་བླ་བྲང་པ་ཞེས་གྲགས། གོང་མ་མཆོད་ཡོན་གྱིས་ཀུན་ཏིང་གུ་ཤྲིའི་མཚན་དང་ཤེལ་དམ་ཆེ་བ། དངུལ་དམ་ཆེ་བ་སོགས་གནང་། དགུང་ལོ་སོ་དྲུག་བཞེས་པ་རབ་བྱུང་དྲུག་པའི་ཤིང་སྟག་ (༡༣༧༤) ལོར་བཞི་ཐོག་གི་ཁྲིར་ཕེབས། གོང་ཐི་ལིང་ཀྱ་ཧོ་སི་ཏཱ་དབེན་གུ་ཤྲིའི་མཚན་གསོལ། དམ་ག་ཆེན་མོ་ཐོ་ཤུ་དང་བཅས་པ་ཕུལ། དགུང་ལོ་རེ་གཅིག་པ་རབ་བྱུང་བདུན་པའི་ས་ཡོས་ (༡༣༩༩) ལོར་སྐུ་གཤེགས།
(དུང་དཀར་ཚིག་མཛོད་ཆེན་མོ་) ནས་བཏུས།
