དེ་ཡང་རྡོ་རྗེ་བྲག་གི་མཚན་རྒྱས་པར་“ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་”ཞེས་ཞུ། སྐྱིད་གཤོངས་རྭ་སྨད་ནས་ཤར་དུ་སྣུམ་ནག་འཁོར་ལམ་དེད་དེ་སྤྱི་ལེ་ལྔ་ཙམ་ཕྱིན་ན་རྡོར་བྲག་གྲུ་ཁར་འབྱོར། དེ་ནས་འཕྲུལ་གྲུར་བསྡད་དེ་ཆུ་ཚོད་གཅིག་མིན་ཙམ་སོང་ན་གྲུ་ལས་ཐོན་མ་ཐག་དགོན་དེར་འབྱོར། རྡོར་བྲག་ཅེས་པ་ནི་དགོན་དེའི་རྒྱབ་རིར་གཡུ་ཡི་རྡོ་རྗེའི་རང་བྱོན་ཡོད་པས་རྡོ་རྗེ་བྲག་དང་། ཨེ་ཝཾ་ལྕོག་སྒར་ཞེས་པ་ནི་ཐོག་མར་ལྕོག་གུར་ཕུབ་པའི་འདུས་སྡེ་ཡིན་པས་མཚན་དེ་ལྟར་ཐོགས། དེའང་ཐོག་མར་མངའ་རིས་པཎྜི་ཏ་པདྨ་དབང་གི་རྒྱལ་པོས་གུར་བཀྱོན་པའི་གསང་ཆེན་གྱི་འདུས་སྡེ་ཆུང་ངུ་ཞིག་འཛུགས་གནང་མཛད་པ་ལ། དེ་ནས་སྐུ་ཕྲེང་གསུམ་པ་རིག་འཛིན་ངག་གི་དབང་པོས་དུས་རབས་བཅུ་བདུན་ཙམ་ལ་དགོན་དེ་བརྩིགས་པར་མཛད། རིག་འཛིན་སྐུ་ཕྲེང་བཞི་པ་ཀུན་བཟང་པད་མ་འཕྲིན་ལས་གདན་ཁྲིར་འཁོད་རྗེས། རྒྱལ་མཆོག་ལྔ་པ་ཆེན་པོ་དང་ཆོས་ཡོན་གྱི་ཐུགས་རྗེའི་བདག་རྐྱེན་དང་བཅས་སྟོབས་རྒྱས་པར་གྱུར། བདེ་ཡངས་ཤར་ནུབ་གཉིས་ཞེས་མདོ་སྔགས་གྲྭ་ཚང་ཤར་ནུབ་གཉིས་ཆཁོས། དགེ་འདུན་ཞལ་གྲངས་ལྔ་སྟོང་ཙམ་བྱུང་གསུངས། སྔ་འགྱུར་རྙིང་མའི་བྱང་གཏེར་ གྱི་གདན་ས་ཆེན་པོར་གྲགས།
དེ་ནས་དུས་རབས་བཅོ་བརྒྱད་པའི་དུས་འགོར་ཇུན་གར་དམག་གིས་དགོན་དེ་རྨེག་མེད་དུ་བཟོ་བཞིན་མགོན་ཁང་སྲིད་གསུམ་རྣམ་རྒྱལ་བཤིག་པར་བརྩམ་པའི་དུས། ཇུན་གར་བའི་དམག་དཔོན་ཁྲག་སྐྱུག་སྟེ་ཤི་བའི་སྐྱེན་བྱས་མགོན་ཁང་དེ་ཁོ་ན་མ་གཏོར་བར་བཞག གསེར་ཟངས་ཀྱི་ཐུབ་པའི་སྐུ་བརྙན་ཆུ་ལ་བསྐྱུར། གསེར་བྲིས་ཀྱི་བཀའ་འགྱུར་སོགས་ནང་རྟེན་མང་པོ་དགེ་ལུགས་པའི་དགོན་སྡེ་ཁག་ལ་ཕུལ། དགུང་གྲངས་དོན་བདུན་ལ་ཕེབས་པ་རིག་འཛིན་པད་མ་འཕྲིན་ལས་ཀྱང་བཀྲོངས། དེ་རྗེས་ཇུན་གར་དམག་ཐག་ཆོད་རྗེས་རྒྱལ་བ་སྐུ་ཕྲེང་བདུན་པ་སྐལ་བཟང་རྒྱ་མཚོས་རྡོར་བྲག་གི་ཆོས་གཞིས་འབྲས་སྤུངས་སུ་སྦྱར་བ་རྣམས་རང་སློག་ཏུ་གནང་སྟེ་རང་གདན་བསྐྱར་གསོ་ཆོག་པའི་བཀའ་དྲིན་བསྐྱངས་པས་རྗེ་གོང་མའི་གསོལ་དཔོན་དགེ་དབང་སོགས་བླ་སློབ་དང་སྦྱིན་བདག་སོགས་པས་སླར་གསོ་གནང་། སྐལ་བཟང་པད་མ་དབང་ཕྱུག་དགུང་གྲངས་བརྒྱད་ལ་ཕེབས་པ་རིག་འཛིན་སྐུ་ཕྲེང་ལྔ་པའི་ཡང་སྲིད་དུ་གདན་ཁྲིར་མངའ་གསོལ། རྗེས་ཇུན་གར་བས་ཁྱེར་བའི་གསེར་བྲིས་བཀའ་འགྱུར་སོགས་སྐུ་གསུངས་ཐུགས་རྟེན་ཁག་གཅིག་སླར་ཡང་རང་སློག་ཏུ་བྱུང་སྟབས་ད་ལྟའི་དགོན་དེ་ཉམས་ཆགས་མ་བྱུང་གོང་འདུ་ཁང་ཀ་བ་ཉི་ཤུ་ལ་རྩ་གསུམ་རྒྱལ་བ་སྲས་བཅས་ཀྱི་སྣང་བརྙན་དུ་མའི་ལྡེབས་རིས་ཀྱིས་མཛེས་པའི་དབུས་གུ་རུའི་སྐུ་ཐོག་ཚད་མ་དང་བྱང་གཏེར་བཀའ་བརྒྱད། གཙང་ཁང་ནང་གྲང་གསེར་གྱིས་བྲིས་པའི་ཚེ་དཔག་མེད་ཀྱི་ལྡེབས་རིས་ཀྱིས་སྐོར་བའི་དབུས་སྨན་འདམ་གྱི་སྟོན་སྐུ་ཐོག་སོ་གཉིས་ལྡན་མཛོད་སྤུར་ཕ་ལམ་སྲན་རྡོག་ཙམ་གྱིས་བརྒྱན་པ་ཉེ་སྲས་བརྒྱད་ཀྱིས་བསྐོར་བ་དང་། ཡངས་སྟེང་ཆོས་དབྱིངས་ཕོ་བྲང་ནང་ཛྷེེ་ཀྵིམ་དང་རྒྱ་གར་ཤར་ནུབ་བལ་བོད་སོགས་ཀྱི་ལི་སྐུ་བརྒྱ་ཕྲག དངུལ་གདུང་ལྷ་ཁང་ནང་རིན་ཆེན་ཁྲ་ཚོམ་གྱིས་བཏབ་པའི་རིག་འཛིན་སྐུ་ཕྲེང་རིམ་བྱོན་གྱི་དངུལ་གདུང་དང་དེའི་མཐའ་འཁོར་དུ་གསེར་ཟངས་ཀྱི་སྐུ་བརྙན་མང་པོ། བཀའ་གདམས་མཆོད་རྟེན་ཇི་སྙེད། གསུང་རྟེན་དུ་རྒྱལ་བའི་བཀའ་འགྱུར་རིན་པོ་ཆེ་དང་། རྙིང་མ་རྒྱུད་འབུམ་ནག་བྲིས་སྤུས་ལྡན། སྡེ་དགེ་དང་སྣར་ཐང་དཔར་མའི་བཀའ་འགྱུར། གཞན་ཡང་གཟིམ་ཆུང་སྟེང་འོག དཔེ་མཛོད་སྟེང་ཤོད། དགོན་དེའི་གཡོན་ཕྱོགས་སུ་རྡོར་བྲག་ཆུ་བཟང་བླ་བྲང་། ཤར་ངོས་སུ་དབང་དྲག་རོལ་པའི་ལྕོག་འདུ་བཅས་པར་རྟེན་གསུམ་ཁྱད་པར་ཅན་དང་ནང་རྟེན་དུ་ཧོར་སྐུ་ཐུབ་དབང་དོན་ལྡན་དང་། ཁྱབ་འཇུག་གི་ཞལ་ཐང་ཁྲག་འཛགས་མ་སོགས་ཇི་སྙེད་ཡོད། ད་ལྟ་གསར་བཞེངས་འདུ་ཁང་ནང་ཐུབ་དབང་དགེ་འདུན་སྤྲིན་ཕུང་གི་གཡས་སུ་རིག་འཛིན་དུང་འགྲུབ་དང་། གཡོན་དུ་རིག་འཛིན་པད་མ་འཕྲིན་ལས་ཉེ་སྲས་བརྒྱད་ཀྱིས་བསྐོར་བ་སོགས་གསར་བཞེངས་གནང་བ་མཇལ་རྒྱུ་ཡོད།
དེ་ལྟར་ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་ནི། གདན་ས་ཆེན་མོ་འདིའི་ཐོག་མའི་ཆོས་ཀྱི་འབྱུང་ཁུངས་ནི་གཏེར་སྟོན་རིག་འཛིན་རྒོད་ཀྱི་ལྡེམ་འཕྲུ་ཅན་དངོས་གྲུབ་རྒྱལ་མཚན་དང༌། དེ་ཉིད་ཀྱི་སྲས་རྣམ་རྒྱལ་མགོན་པོ། སྔགས་འཆང་རྡོ་རྗེ་དཔལ། རྡོ་རྗེ་མགོན་པོ། མཚན་ལྡན་བྱམས་པ་བཤེས་གཉེན། མཚན་ལྡན་ངག་དབང་གྲགས་པ། ཆོས་རྗེ་སངས་རྒྱས་དཔལ་བཟང༌། སྔགས་འཆང་ཆོས་རྒྱལ་བསོད་ནམས། ཐུགས་སྲས་ནམ་མཁའ་རྒྱལ་མཚན། རིག་འཛིན་ཡོལ་མོ་བ་གཏེར་སྟོན་ཤཱཀྱ་བཟང་པོ། དེའི་སློབ་མ་མངའ་རིས་པཎ་ཆེན་པདྨ་དབང་རྒྱལ་དང༌། གཅུང་རྒོད་ལྡེམ་པའི་སྐུ་སྐྱེ་གཉིས་པ་རིག་འཛིན་ལེགས་ལྡན་རྡོ་རྗེ། དེའི་ཐུགས་སྲས་བྱང་བདག་བཀྲ་ཤིས་སྟོབས་རྒྱལ། དེའི་སྐུ་སྲས་རྒོད་ལྡེམ་གསུམ་པ་རིག་འཛིན་ངག་གི་དབང་པོ་བཅས་བྱོན་ཞིང༌། ཆེས་ཐོག་མའི་དུས་སུ་གནས་འདིར་ཨོ་རྒྱན་ཆེན་པོས་ཞབས་ཀྱིས་བཅགས་ཏེ་སྒྲུབ་པ་མཛད་པའི་ཕུག་པ་བྱིན་ཅན་བཞུགས་པ་དང༌། དེ་ནས་རིམ་པར་ཨེ་ཝཾ་ལྕོག་སྒར་ཞེས་པའི་ཆོས་སྒར་བྱུང་ཤིང་། བྱང་གཏེར་གཙོ་བོར་གྱུར་པའི་སྔ་འགྱུར་བཀའ་གཏེར་གྱི་བསྟན་པ་དར། ཁྱད་པར་རིག་འཛིན་ངག་གི་དབང་པོས་སྤྱི་ལོ་ ༡༦༡༠ ལོ་སྟེ་རབ་བྱུང་བཅུ་གཅིག་པའི་ལྕགས་ཁྱི་ལོར་སྔར་གྱི་གདན་ས་དེ་ཉིད་དུ་ཐུབ་བསྟན་རྡོ་རྗེ་བྲག་གི་ཆོས་སྡེ་དངོས་སུ་ཕྱག་བཏབ། དེའི་རྗེས་སུ་ཐུགས་སྲས་ཐུ་བོ་ཡོལ་མོ་སྤྲུལ་པའི་སྐུ་བསྟན་འཛིན་ནོར་བུས་གདན་ཚབ་མཛད་ཅིང་རིམ་པར་རྒོད་ལྡེམ་རིམ་བྱོན་གྱིས་བསྟན་པ་བསྐྱངས་པ་སྟེ། རྒོད་ལྡེམ་བཞི་པ་རིག་འཛིན་ཀུན་བཟང་པདྨ་འཕྲིན་ལས་ནི། བསམ་ཡས་ཀྱི་ཐད་མོན་མཁར་རྣམ་སྲས་གླིང་དུ་སྐུ་འཁྲུངས། ཟུར་ཆེན་ཆོས་དབྱིངས་རང་གྲོལ་དང་༸རྒྱལ་མཆོག་ལྔ་པ་རིན་པོ་ཆེ་བླ་མར་བསྟེན་ཅིང་། མཁས་བཙུན་གྲུབ་པའི་ཡོན་ཏན་བསམ་གྱིས་མི་ཁྱབ། དམ་པ་འདིའི་སྐུ་རིང་ལ་ཆོས་བརྒྱུད་བུ་དགོན་སྔར་བས་མང་དུ་འཕེལ་བ་དང་གདན་ས་རང་དུ་གཉུག་མར་གནས་པའི་དགེ་འདུན་ཉིས་སྟོང་ལོངས་པ་བྱུང༌། སྐུ་ཚེའང་རིང་པོར་བཞུགས་ཤིང་མཐར་ཡིད་སྲུབས་ཀྱི་བདག་པོ་ཇུན་གར་བའི་དཔུང་ཆེན་ལྷགས་པའི་རྐྱེན་གྱིས་གཤེགས་ཚུལ་བསྟན།
རྒོད་ལྡེམ་ལྔ་པ་རིག་འཛིན་སྐལ་བཟང་པདྨ་དབང་ཕྱུག་ནི། སྤོ་འབོར་སྒང་གི་ནང་ཚན་ཉག་རོང་ལྕགས་མདུད་ཅེས་པར་སྐུ་འཁྲུངས། ཐུབ་བསྟན་རྡོ་རྗེ་བྲག་གི་ཆོས་སྡེ་ཉམས་གསོ་ཕུལ་དུ་བྱུང་བ་མཛད་པས་བཀའ་དྲིན་ཤིན་ཏུ་ཆེ། སྔ་འགྱུར་བསྟན་པའི་གསལ་བྱེད་ཆེན་པོར་གྱུར་ཅིང་དགོངས་གཏེར་དག་སྣང་གི་ཆོས་སྐོར་དུ་མ་བྱོན། རྒོད་ལྡེམ་དྲུག་པ་རིག་འཛིན་ཀུན་བཟང་འགྱུར་མེད་ལྷུན་གྲུབ་རྡོ་རྗེ་ནི། དར་མདོ་ལྕགས་ལའི་རྒྱལ་ཁབ་དང་ཉེ་བའི་གསེར་ཏོག་ཞེས་པར་སྐུ་འཁྲུངས། འཁོར་ལོ་གསུམ་གྱི་མཛད་བཟང་རྨད་དུ་བྱུང་བས་བསྟན་པ་རིན་པོ་ཆེ་ཕྱོགས་དུས་ཀུན་ཏུ་རྒྱས་པར་སྤེལ། དག་སྣང་ལུང་བསྟན་གྱི་ཆོས་ཚན་དུ་མ་བཞུགས་ཤིང་སྐུ་ཚེ་མཐར་མ་ཕྱིན་པར་ཞི་བར་གཤེགས། རྒོད་ལྡེམ་བདུན་པ་ངག་དབང་འཇམ་དཔལ་མི་འགྱུར་ལྷུན་གྲུབ་རྡོ་རྗེ་ནི། མོན་མཁར་རྣམ་སྲས་གླིང་དུ་སྐུ་འཁྲུངས། འཁོར་ལོ་གསུམ་གྱི་འཕྲིན་ལས་རྒྱ་ཆེ་བའི་ངང་དགོངས་པ་གཞན་དོན་དུ་གཤེགས།
རྒོད་ལྡེམ་བརྒྱད་པ་རིག་འཛིན་པདྨ་དབང་རྒྱལ་ནི། རབ་བྱུང་བཅུ་བཞི་པའི་ནང་ལྷོ་བྲག་ལ་ཡག་སྟོད་དུ་སྐུ་འཁྲུངས་ཏེ་གདན་སར་མངའ་གསོལ། ཡོངས་འཛིན་དུ་མ་ལས་མདོ་སྔགས་བཀའ་གཏེར་གྱི་ཟབ་ཆོས་མང་དུ་གསན། ཐུགས་དམ་ཉམས་བཞེས་ཀྱི་སྒོ་ནས་སྤང་རྟོགས་ཀྱི་རྩལ་རྫོགས། འཁོར་ལོ་གསུམ་གྱི་མཛད་འཕྲིན་རྒྱས། ལྷག་པར་དྲག་པོ་མངོན་སྤྱོད་ཀྱི་ལས་ལ་ནུས་མཐུ་འགྲན་ཟླ་བྲལ་བསབསྟན་འགྲོའི་དོན་དུ་མཐའ་དམག་ཟློག་པ་སོགས་ཀྱི་ལས་སྦྱོར་ཅི་རིགས་མཛད། རྟགས་མཚན་མངོན་དུ་གྱུར་པ་ཇི་སྙེད་བྱུང་བས་སྙན་གྲགས་རྒྱས་ཤིང་གཞུང་ས་མཆོག་ནས་ཧོ་ཐོག་ཐུའི་གདན་ཐོབ་ཀྱང་སྩལ། དེ་ལྟར་རྒྱལ་བསྟན་འཛིན་སྐྱོང་སྤེལ་བའི་འཕྲིན་ལས་རྒྱས་བཞིན་རབ་བྱུང་བཅོ་ལྔ་པའི་ནང་ཞི་དབྱིངས་སུ་གཤེགས་སོ།།
རྒོད་ལྡེམ་དགུ་པ་ཐུབ་བསྟན་ཆོས་དབང་མཉམ་ཉིད་རྡོ་རྗེ་ནི། རབ་བྱུང་བཅོ་ལྔ་པའི་ཤིང་སྤྲེལ་སྤྱི་ལོ་ ༡༨༨༤ ལོར་ལྷ་སར་སྐུ་འཁྲུངས། གདན་སར་གོང་མའི་གསེར་ཁྲིར་མངའ་གསོལ། གསན་བསམ་མཐར་ཕྱིན་ཏེ་འགྲོ་དོན་དུས་བབ་ཀྱིས་ཁམས་ཕྱོགས་སུ་ཕེབས་པས་སྐལ་ལྡན་གྱི་སློབ་ཚོགས་བསྐྱངས། འཁོར་ལོ་གསུམ་གྱི་མཛད་འཕྲིན་རྒྱས་བཞིན་དགུང་གྲངས་ཞེ་དགུར་ཕེབས་པ་ན་རབ་བྱུང་བཅུ་དྲུག་པའི་ཆུ་སྤྲེལ་ལོར་ཞི་དབྱིངས་སུ་གཤེགས་སོ། །
རྒོད་ལྡེམ་བཅུ་པ་ད་ལྟ་འཚོ་བཞིན་བཞུགས་པའི་རིག་འཛིན་ཆེན་མོ་ཐུབ་བསྟན་འཇིགས་མེད་རྣམ་གྲོལ་རྒྱ་མཚོ་ནི། རབ་བྱུང་བཅུ་དྲུག་པའི་མེ་བྱི་སྤྱི་ལོ་ ༡༩༣༦ ལོར་ལྷ་ས་སྤྲ་ནག་ཞོལ་དུ་སྐུ་བལྟམས། རྭ་སྒྲེང་རྒྱལ་ཚབ་རིན་པོ་ཆེར་དབུ་སྐྲ་གཙུག་ཕུད་ཕུལ། གདན་སར་མངའ་གསོལ། གོང་མའི་ཞལ་སློབ་འགོ་ཚ་མཁན་ཆེན་ཐེག་མཆོག་བསྟན་འཛིན་གྱི་ཞལ་སྔ་ནས་བྱང་གཏེར་གྱི་དབང་ལུང་ཕལ་ཆེ་བ་གསན། གཞན་ཡང་སྨིན་གླིང་མཁན་རིན་པོ་ཆེ། སྐྱབས་རྗེ་བདུད་འཇོམས་རིན་པོ་ཆེ་སོགས་མཁས་གྲུབ་ཀྱི་ཡོངས་འཛིན་མང་པོའི་ཞབས་པད་བསྙེན་ཏེ་ཐུན་མོང་རིག་གནས་དང༌། མདོ་སྔགས་གཞུང་ལུགས། བཀའ་གཏེར་སྨིན་གྲོལ་སོགས་ལ་གསན་བསམ་རྒྱ་ཆེར་མཛད་ཅིང་མཁྱེན་རབ་བླ་ན་མེད་པར་བཞུགས་བཞིན་པ་བཅས།
དེ་ལྟར་རིག་འཛིན་ཆེན་པོ་སྐུ་རབས་རིམ་བྱོན་གྱིས་འཁོར་ལོ་གསུམ་གྱི་མཛད་པ་བརྒྱུད་མར་སྤེལ་བས་ཆོས་བརྒྱུད་འཛིན་པའི་དགོན་ལག་གིས་གངས་ལྗོངས་མངའ་རིས་ཀྱི་ཡུལ་གྲུ་ནས་སྨད་མདོ་ཁམས་དར་མདོ་ཡན་ལ་འཕེལ་ཏེ་བཤད་སྒྲུབ་ཀྱི་འཕྲིན་ལས་རྒྱ་ཆེ་བ་བྱུང༌། རྒྱལ་བསྟན་ཡང་དར་གྱི་ཕྱི་མའི་དུས་འདིར་རིག་འཛིན་ཆེ་པོ་སྐུ་རབས་བཅུ་པ་རིག་འཛིན་རྣམ་གྲོལ་རྒྱ་མཚོ་མཆོག་བསྟན་འགྲོའི་དཔལ་མགོན་དུ་སྐུ་འཚོ་ཞིང་གཞེས་པའི་ཐུགས་བསྐྱེད་འོག་ལྷག་བསམ་ཐུགས་སྟོབས་ཕུལ་དུ་བྱུང་བའི་དབུ་ཆེན་རྒན་ཆོས་འབྱོར་སོགས་བླ་གྲྭ་ཡོངས་ནས་དུས་དབང་གིས་ཉམས་རྒུད་དུ་གྱུར་པའི་ཕྱི་ནང་གི་རྟེན་གསུམ་དང་མཐོང་བརྒྱུད་ཀྱི་ཕྱག་བཞེས་རྣམས་སླར་གསོ་གནང་བཞིན་པ་དང༌། ད་ལྟའི་དུས་སུ་བཤད་སྒྲུབ་ལས་གསུམ་གྱི་མཛད་པས་སྤྱི་དང་བྱེ་བྲག་གི་བསྟན་པ་རིན་པོ་ཆེ་གོང་ནས་གོང་དུ་རྒྱས་བཞིན་པ་དང༌། དེ་བཞིན་ཆོས་སྡེ་འདིའི་བུ་དགོན་ཡར་འབྲོག་སྟག་ལུང་དགོན་གྱི་རྩེ་སྤྲུལ་རིན་པོ་ཆེ་འཕགས་ཡུལ་དུ་༸ཞབས་སོར་བཀོད་ནས། སྤྱི་ལོ་ ༡༩༨༤ ལོར་རྒྱ་གར་ཧི་མ་ཅལ་མངའ་ཁོངས་སིམ་ལར་ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་ཆོས་འཁོར་རྣམ་རྒྱལ་གླིང་དང༌། རྒྱ་གར་ལྷོ་ཕྱོགས་མོན་གྷོར་བོད་མིའི་གཞིས་ཁོངས་སུ་སྔ་འགྱུར་རྡོ་བྲག་གསང་སྔགས་ཆོས་འཁོར་གླིང་ཞེས་པའི་གཙུག་ལག་ཁང་རྟེན་དང་བརྟེན་པ་གསར་དུ་བཞེངས་གནང་མཛད་དེ་བཤད་སྒྲུབ་ཀྱི་བསྟན་པ་ཕྱོགས་མཐར་རྒྱས་བཞིན་པའོ།། །།
