ཀ་མ་བ་ཤེས་རབ་འོད་ཟེར་གྱི་རྣམ་ཐར།

བཀའ་གདམས་པའི་དགེ་བཤེས་ཀ་མ་བ་ཤེས་རབ་འོད་ཅེས་བྱ་བ་དེ་ཡིན་ཞིང་། དམ་པ་འདི་ཉིད་ནི་རྣལ་འབྱོར་གྱི་དབང་ཕྱུག་དགོན་པ་བའི་དངོས་སློབ་གྲགས་ཅན་བཞི་སྟེ། ཞང་སྣེའུ་ཟུར་པ་ཡེ་ཤེས་འབར་དང་། དགེ་བཤེས་ཀ་མ་བ་ཤེས་རབ་འོད། མཉན་སྣ་མོ་བ། དགེ་བཤེས་འབན་གུང་རྒྱལ་དང་བཞིའི་ཡ་གྱལ་ཞིག་ཡིན་ལ།
ཇོ་བོ་རྗེ་ལན་པ་སྤྱིལ་བུར་ཕེབས་དུས། ཡུམ་དེས་ཇོ་བོ་ལ་བྱིན་རླབས་ཞུས་པས། འདི་ལ་བུ་བཟང་པོ་ཞིག་འོང་གསུངས་ནས་ལུང་བསྟན་པ་བཞིན་ལན་པ་མདར་མེ་མོ་བྱ་ལ་སྐུ་འཁྲུངས། རབ་ཏུ་བྱུང་བའི་མཚན་ཤེས་རབ་འོད། ཕྱིས་དགོན་པ་བ་དང་མཇལ་དུ་བྱོན་པས་དགོན་པ་བས་ཆོས་དང་ཟང་ཟིང་གཉིས་ཀས་བསྐྱངས། མངོན་པ་རྟོགས་པའི་ཡོན་ཏན་ཡང་ཚད་མེད་པ་དང་ལྡན་པ་ཡིན། ཐུགས་རབ་ཀྱང་ཤིན་ཏུ་ཆེ། རྟོག་གེ་འབར་བ་ནག་ཚོས་བསྒྱུར་བ་ལས་རྣལ་འབྱོར་སྤྱོད་པ་བའི་དེ་ཁོ་ན་ཉིད་གཏན་ལ་དབབ་པའི་ལེའུ་ལ་འགྱུར་བཅོས་མཛད་པ་པོའི་མཁས་བཙུན་ཤེས་རབ་འོད་གསལ་གཉིས་ཀྱིས་བསྒྱུར་ཞེས་པའི་ཡ་གཅིག་ཀྱང་ཁོང་ཡིན་པ་འདྲའོ།།