༄༅། །དཔལ་ཁང་ལོ་ཙཱ་བ་ངག་དབང་ཆོས་ཀྱི་རྒྱ་མཚོ་ནི། རབ་བྱུང་བརྒྱད་པའི་མེ་ཕོ་བྱི་ལོ་སྟེ་ཕྱི་ལོ་ ༡༤༥༦ ལོར་བོད་ཡུལ་གཙང་གི་བཞད་མཐོང་སྨོན་རྫོང་གི་ཤར་ཕྱོགས་དཔལ་ཁང་ཞེས་པའི་ཁྱིམ་དུ་སྐུ་འཁྲུངས་ཤིང་། དཔལ་ཁང་ཟེར་བ་བོད་ཀྱི་རིགས་རུས་ཤིག་དང་ཁྱིམ་མིང་ཡིན་པར་གྲགས། ཁོང་གི་མཚན་གཞན་ལ་དཔལ་ཁང་ལོ་ཙཱ་བ་དང༌། དཔལ་ཁང་ཆོས་མཛད། དབྱངས་ཅན་སྙེམས་པའི་སྡེ། ཀརྨ་འཕྲིན་ལས་ཕྱོགས་ལས་རྣམ་རྒྱལ་བཅས་ཞུ་ཞིང་། འདས་ལོ་མི་གསལ་ཡང༌། ཁོང་ནི་སྐྱོགས་སྟོན་ཀརྨ་ལོ་ཙཱ་བ་རིན་ཆེན་བཀྲ་ཤིས་བློ་གྲོས་ངོ་མཚར་བྱེ་བའི་གཏེར་མཛོད་ཀྱི་དངོས་སློབ་ཡིན་ཞིང་། ཀརྨ་མི་བསྐྱོད་རྡོ་རྗེ་ (༡༥༠༧-༡༥༥༤) དང་དུས་མཉམ་དུ་བྱུང་། ཁོང་གིས་ཞ་ལུ་ལོ་ཙཱ་བ་ཆོས་སྐྱོང་བཟང་པོ་དང༌། སྐྱོགས་སྟོན་ལོ་ཙཱ་བ་ངག་དབང་རིན་ཆེན་བཀྲ་ཤིས་སོགས་དགེ་བའི་བཤེས་གཉེན་མང་པོའི་ཞབས་ལ་གཏུགས་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པར་མཛད་ཅིང་། ཕྱིས་སུ་མཁས་པའི་ཕུལ་དུ་ཕྱིན་ནས་མཚན་གྱི་སྙན་པ་རིང་དུ་གྲགས།སྐུ་ཚེ་གང་པོའི་རིང་རྩོམ་པ་གནང་བའི་གྲགས་ཅན་བསྟན་བཅོས་མང་དུ་ཡོད་པ་ལས། རབ་བྱུང་དགུ་པའི་ས་ཕོ་ཁྱི་ཕྱི་ལོ་ ༡༥༣༨ ལོར་ [བོད་ཀྱི་བརྡའི་བྱེ་བྲག་གསལ་བར་བྱེད་པའི་བསྟན་བཅོས་ཚིག་ལེའུར་བྱས་པ་མཁས་པའི་ངག་གི་སྒྲོན་མ་] དང༌། རབ་བྱུང་དགུ་པའི་ཆུ་ཡོས་ཕྱི་ལོ་ ༡༥༤༣ ལོར་ [ཚིག་རྒྱན་སྙན་ངག་གི་བསྟན་བཅོས་མེ་ལོང་རྒྱན་གྱི་དཔེར་བརྗོད་བཀླགས་པས་ཀུན་ཤེས་] བརྩམས་ཤིང་། གཞན་ཡང་ [སྙན་ངག་མེ་ལོང་གི་རྒྱན་གྱི་དཔེར་བརྗོད་རབ་གསལ་བཀླགས་པས་ཀུན་ཤེས་ལས་སྒྲ་རྒྱན་གབ་ཚིག་གི་རྟགས་སྐྱོན་སེལ་བ་དང་བཅས་པའི་རྣམ་བཤད་] དང༌། [མིང་གི་མངོན་བརྗོད་པདྨ་དཀར་པོའི་ཕྲེང་བ་] བཅས་བཞུགས་ལ། དག་ཡིག་ངག་སྒྲོན་གྱི་རྩ་བ་ནི་དཔལ་ཁང་ལོ་ཙཱ་བས་རྣམ་འཕྱང་ཞེས་པ། བོད་རབ་བྱུང་དགུ་པའི་ས་ཁྱི། ཕྱི་ལོ་ ༡༥༣༨ ཐ་སྐར་ཉ་བ་སྟོན་ཟླ་འབྲིང་པོའི་གྲལ་གྱི་ཚེས་བཅོ་ལྔ་ལ་མཛད། ཕྱི་ལོ་ ༡༩༣༧ ལོར་རྒྱལ་སྲས་ཞི་བ་ལྷ་གཉིས་པར་གྲགས་པའི་ཁུ་ནུ་བླ་མ་བསྟན་འཛིན་རྒྱལ་མཚན་མཆོག་ནས་ངག་སྒྲོན་གྱི་འགྲེལ་པ་ [བོད་ཀྱི་བརྡ་སྤྲོད་པའི་བསྟན་བཅོས་ངག་སྒྲོན་གྱི་འགྲེལ་པ་ཚིག་གསལ་] བརྩམས་གནང་བ་དང་། བོད་ལྗོངས་སློབ་གྲྭ་ཆེན་མོའི་དགེ་རྒན་ཀུན་བཟང་རྣམ་རྒྱལ་ལགས་ནས་ [ངག་སྒྲོན་གྱི་ཡང་འགྲེལ་] བརྩམས་གནང་མཛད་པ་བཅས་སོ།།
Post Views: 6,745
