མཛད་པ་པོ། ཡོངས་འཛིན་ཡེ་ཤེས་རྒྱལ་མཚན།
གྲོ་ལུང་པ་ཆེན་པོ་བློ་གྲོས་འབྱུང་གནས་ནི། གཞོན་ནུའི་དུས་ན་ཇོ་བོ་ཡབ་སྲས་ཀྱི་ཞབས་ལ་གཏུགས་སྣང་སྟེ་ཁོང་རང་གི་བསྟན་རིམ་ལས། བདག་གིས་ཇོ་བོ་རྗེ་ལ་ཆོས་ལན་ཅིག་འཁུམས་པ་ན། འཕགས་པ་རྟག་ཏུ་ངུའི་བརྩོན་འགྲུས་ལྟ་བུ་བྱའོ་ཞེས་གསུང་ལ། དགེ་བཤེས་པའང་མདོར་ན་གཞན་ཅི་ཡང་མི་བསམ་པར་རྫོགས་པའི་བྱང་ཆུབ་དོན་དུ་གཉེར་བར་བྱའོ་ཞེས་གསུང་། ཡང་སྐྱབས་འགྲོའི་སྐབས་སུ། འདི་ལ་བདག་གི་བླ་མ་ནི་མཆོད་པ་དང་བཅས་པའི་མཎྜལ་གསུམ་བྱེད་དུ་བཅུག་སྟེ། ཞེས་གསུངས་པའི་དགེ་བཤེས་དང་བླ་མ་ནི་འབྲོམ་ཉིད་ཡིན་པར་གནའ་མཆན་གྱིས་བཤད་སྣང་ངོ་། །སྤྱན་སྔ་ལ་ནི་རྡོ་རྗེ་ནམ་མཁའི་གོས་ཅན་མ་གསན་ཞིང་། ཁམ་པ་ལུང་པ་དང་། པོ་ཏོ་བ་ལ་ཡང་ཆོས་གསན་ཞིང་སློབ་དཔོན་ཞེས་འབོད་པ་མཛད།
གཞན་ཡང་ཇོ་བོ་ནས་བརྒྱུད་པའི་ཆོས་དང་། གཞན་མདོ་སྔགས་ཀྱི་གཞུང་ཕལ་ཆེ་བ་རྔོག་ཁུ་དབོན་གཉིས་ལ་གསན་ཏེ་སྦྱངས་པས། སྔགས་མཚན་ཉིད་ལ་ཤིན་ཏུ་མཁས་ཤིང་བརྒྱད་སྟོང་པའི་འགྲེལ་པ་དང་། བྱམས་ཆོས་སྡེ་ལྔའི་འགྲེལ་པ་སོགས་ཡིག་ཆའང་མང་དུ་མཛད། ཁྱད་པར་དུ་བསྟན་པའི་རིམ་པ་ཆེ་ཆུང་གཉིས་དང་། ཇོ་བོའི་གཞུང་ཆུང་རྣམས་གཙོ་བོར་གྱུར་པའི་ཆོས་ཆུང་བརྒྱ་རྩ་ལ་དོན་གྱི་ཁོག་འཆིང་བའི་ཊཱིཀྐ་བསྡུས་པ་ཅིག་ཀྱང་མཛད་དོ། །སྐུ་ཚེའི་སྟོད་ལ་ལོངས་སྤྱོད་ཀྱིས་ཕོངས་སེ་བྱུང་བས། གུན་པ་ལྷ་རྗེས་ཛམྦྷ་ལ་དཀར་པོའི་སྒྲུབ་སྐོར་བྱིན་པས་ལན་ཅིག་གྲོ་ལུང་པའི་དཀར་ཡོལ་གྱི་ནང་དུ་ཛམྦྷ་ལ་གཙོ་འཁོར་ལྔ་དངོས་སུ་བྱོན་པ་མི་གཞན་གྱི་མཐོང་གི་དོགས་ནས་ཕྱག་གིས་སྐྱོར་བས། གུན་པའི་ཞལ་ནས་དེ་ཙུག་མཛད་མི་དགོས་གཞན་གྱི་མཐོང་དོགས་མེད་གསུང་། དེ་ནས་བརྩམས་ཏེ་གྲོ་ལུང་པ་ལ་གྲྭ་ཚོགས་མང་དུ་འདུས། སྐུ་བསོད་སྐྱེས་ཏེ་བྲིན་ལྷས་ཀྱི་གཙུག་ལག་ཁང་བཏབ། དེར་རྔོག་ལོའི་ཆོས་ཁྲི་སྙིང་པོར་གྱུར་པའི་མཆོད་རྟེན་བརྩིགས། དེའི་བུམ་པར་ཟངས་ཆེན་སྟོང་པ་ཅིག་གི་ཁར་ཙན་དན་གྱི་དྲབས་བཀབ། དེའི་སྟེང་དུ་རྔོག་ལོའི་ཐུགས་ཟ་མ་ཏོག་ཏུ་བཞུགས། ཟངས་དེའི་ཁར་ལྷོ་ཕྱོགས་ཀྱི་བུ་ག་ནས་ཤིང་གི་ཝ་གཏད་ནས་བཞག །ཕྱིས་གྲོ་ལུང་པ་དགུང་ལོ་བརྒྱད་ཅུ་པ་ལ་གཤེགས་དུས་ངའི་རིང་བསྲེལ་གང་བྱུང་མ་ཟགས་བར་མཆོད་རྟེན་གྱི་ལྷོའི་བུ་ག་ལ་སྐྱུར་ཅིག་ཅེས་ཞལ་ཆེམས་བཞག་གོ །སྐུ་གདུང་ཞུ་དུས་ཕྱག་རིན་ཚུལ་གྱི་པང་དུ་ཕྱག་གཡས་པ་དང་། ཟམ་ཁ་པའི་པང་དུ་ཐུགས་སྦུར་ཁང་ནས་ཡར་ཏེ་བྱོན། དེ་ནས་ཞལ་ཆེམས་བཞིན་རིང་བསྲེལ་རྣམས་མཆོད་རྟེན་གྱི་བུ་གར་བསྐྱུར་བས་ཟངས་གང་བ་དང་འགྲིག་པ་ཞིག་བྱུང་ཞེས་གྲགས་སོ། །བདག་ཉིད་ཆེན་པོ་འདིས་མཛད་པའི་བསྟན་རིམ་ཆེན་མོ་ནི་བྱང་ཆུབ་ལམ་གྱི་སྒྲོན་མའི་དགོངས་པ་འགྲེལ་བ་ལ་ཟླ་དང་བྲལ་བ་ཞིག་སྟེ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་ཀྱང་གྲོ་ལུང་པ་ཆེན་པོའི་བསྟན་རིམ་འདི་དང་མཇལ་བའི་ཚེ་མཆོད་པའི་བྱེ་བྲག་སྣ་ཚོགས་པས་བསུ་བ་མཛད་ཅིང་། སྐྱེས་བུ་གསུམ་གྱི་ལམ་སོ་སོའི་ངོ་བོ། གྲངས་ངེས། གོ་རིམ། སོ་སོའི་དམིགས་རྣམ་ཡིད་ལ་བྱེད་ཚུལ། བསྒོམས་པ་ལས་ཉམས་མྱོང་ཇི་ལྟར་སྐྱེ་བའི་རིམ་པ་སོགས་བྱང་ཆུབ་ལམ་གྱི་རིམ་པའི་དོན་སྟོན་པ་ལ་འགྲན་ཟླ་མེད་པའི་བསྟན་བཅོས་སུ་བསྔགས་པ་མཛད་དོ། །འབྲོམ་རིན་པོ་ཆེའི་རྣམ་ཐར་ནི་ད་ལྟ་ཉིད་དུ་འཆད་པར་འགྱུར་རོ།། །།
ལམ་རིམ་བླ་མ་བརྒྱུད་པའི་རྣམ་ཐར་ལས་དྲངས།
