མཐོང་དཀོན་པའི་ཨ་ལགས་དུང་དཀར་མཆོག་གི་སྐུ་པར་དང་ངོ་སྤྲོད་བསྡུས་པ།

དུང་དཀར་བློ་བཟང་འཕྲིན་ལས་མཆོག 

༡༩༢༧—༡༩༩༧.༧.༢༢

     སྙན་གྲགས་ཀྱི་བ་དན་ཕྱོགས་བཅུར་གཡོ་བའི་ངེས་དོན་གྱི་མཁས་པའི་དབང་བོ་ཨ་ལགས་དུང་དཀར་བློ་བཟང་འཕྲིན་ལས་མཆོག་ནི་སྤྱི་ལོ1931ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོས་ཇོ་མོ་རྫོང་བཀྲ་ཤིས་ཆོས་གླིང་དགོན་གྱི་དུང་དཀར་སྤྲུལ་སྐུ་སྐུ་ཕྲེང་བདུན་པའི་ཡང་སྲིད་དུ་ངོས་འཛིན་མཛད། སྤྱི་ལོ1936ལོ་ནས་སེར་སྨད་གྲྭ་ཚང་ནས་གཞུང་བཀའ་པོད་ལྔ་ལ་སློབ་གཉེར་གནང་། སྤྱི་ལོ1947ལོའི་ཟླ2པར་ལྷ་ལྡན་སྨོན་ལམ་ཆེན་མོའི་ཐོག་ལྷ་རམས་དགེ་བཤེས་ཀྱི་མཚན་བཏགས་ཨང་བཞི་པ་ཐོབ།

སྤྱི་ལོ1947ལོའི་ཟླ་གསུམ་པ་ནས་ལྷ་ལྡན་རྒྱུད་སྨད་གྲྭ་ཚང་དུ་སྔགས་རམས་པའི་མཚན་བཏགས་བཞེས་ཏེ་ཨང་གཉིས་པ་ཐོབ། སྤྱི་ལོ1951ལོ་ནས་སྤྱི་ལོ1955ལོའི་བར་འཕྱོངས་རྒྱས་འབུམ་ཐང་དུ་སྙན་ངག་དང་སུམ་རྟགས་ལ་སློབ་གཉེར་མཛད། སྐབས་དེར་ཀོང་པོ་སྒར་བ་གྲྭ་ཚང་ནས་ལམ་རིམ་བཤད་ཁྲིད་གནང་། སྤྱི་ལོ1956ལོར་བོད་ལྗོངས་ཉིང་ཁྲི་ཀྲོན་ཆུས་ཀྱི་ཨུ་ཡོན་དང་ནང་བསྟན་མཐུན་ཚོགས་དྭགས་ཀོང་ཡན་ལག་མཐུན་ཚོགས་ཀྱི་ཚོགས་གཙོ་གཞོན་པའི་མཚན་གནས་བཞེས། སྤྱི་ལོ1959ལོར་གོང་ས་བཅུ་བཞི་བ་ལྷ་རམས་དགེ་བཤེས་མཚན་བཏགས་བཞེས་སྐབས་བླ་སྤྲུལ་གྲགས་ཆེ་བ་བཅུ་དྲུག་འདེབས་བསྐོས་གནང་བ་ལྟར་མངོན་པ་མཛོད་ཀྱི་བགྲོ་གླེང་འབུལ་གནང་མཛད། སྤྱི་ལོ1959ལོར་བོད་ལྗོངས་ཆབ་སྲིད་སློབ་སྦྱོངས་ཚོགས་ཆུང་གི་ཅུའུ་ཀྲང་གི་ཐུགས་འགན་ཁུར། སྤྱི་ལོ1960ལོའི་ཟླ4པར་ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་རྒྱུན་ལས་ལས་འཛིན་གྱི་ཐུགས་འགན་བཞེས། སྤྱི་ལོ1960ལོའི་ཟླ9པ་ནས་སྤྱི་ལོ1965ལོའི་བར་པེ་ཅིང་ཀྲུང་དབྱངས་མི་རིགས་སློབ་གྲྭ་ཆེན་མོའི་མི་རིགས་སྐད་ཡིག་ཚན་ཁག་གི་བོད་ཡིག་ཞིབ་འཇུག་འཇིན་གྲྭའི་དགེ་རྒན་གྱི་འགན་བཞེས།《སྙན་ངག་ལ་འཇུག་ཚུལ་ཚིག་རྒྱན་རིག་པའི་སྒོ་འབྱེད》གསར་དུ་བརྩམས། སྤྱི་ལོ1962ལོར་ཀྲུང་གོ་ནང་བསྟན་མཐུན་ཚོགས་ཀྱི་ལས་འཛིན་གྱི་འགན་ཁུར། སྤྱི་ལོ1964ལོར《དུང་དཀར་ཚིག་མཛོད་ཆེན་མོ》ཐོག་མའི་ཐ་སྙད་བསྡུ་རུབ་དང་ཚིག་འགྲེལ་རྩོམ་འགོ་ཚུགས། སྤྱི་ལོ1966ལོ་ནས་སྤྱི་ལོ1977ལོའི་བར་དུ་བོད་ལྗོངས་ནས་ཕྱག་ལས་རབ་དང་རིམ་པ་གནང་། སྤྱི་ལོ1978ལོའི་ཟླ་ལྔ་བར་བསྐྱར་དུ་པེ་ཅིན་དུ་ཕེབས་ཏེ་སྤྱི་ལོ1984ལོའི་བར་ཀྲུང་དབྱང་མི་རིགས་སློབ་གྲྭ་ཆེན་མོའི་མི་རིགས་སྐད་ཡིག་ཚན་ཁག་དང་བོད་ཡིག་སློབ་དཔྱོད་ཁང་དུ་དགེ་རྒན་གནང་། སྤྱི་ལོ1980ལོར་དེ་གར་དགེ་རྒན་ཆེན་མོ་གཞོན་པའི་མཚན་ཐོབ་བཞེས། སྤྱི་ལོ1985ལོ་ནས་དགེ་རྒན་ཆེན་མོའི་མཚན་ཐོབ་དང་འཇར་མན་མནའ་སྦྲེལ་གྱི་མོ་ནེ་ཧེ་རུ་སྐོང་འཚོགས་བྱས་པའི་རྒྱལ་སྤྱིའི་བོད་རིག་པའི་དཔྱད་གླེང་ཚོགས་འདུར་ཕེབས། སྤྱི་ལོ1986ལོར་ལྷ་ས་བོད་རིག་པའི་གྲོས་མོལ་ཚོགས་འདུར་དབུ་བཞུགས་དང་། སྔ་རྗེས་སུ་བོད་རང་སྐྱོང་ལྗོངས་སྲིད་གྲས་གྱི་རྒྱུན་ལས་ཨུ་ཡོན་དང་བོད་ལྗོངས་སྤྱི་ཚོགས་ཚན་རིག་ཁང་གི་མཚན་འཛིན་ཡོན་ཀྲུང་དུ་བསྐོས། སྤྱི་ལོ1990ལོར་རྒྱལ་ཁབ་སློབ་ཨུད་ནས་ཕུལ་བྱུང་ཆེད་རྩོམ་རིམ་པ་གཉིས་པའི་བྱ་དགའ་ཐོབ་པ་དང་ཀན་སུའུ་བོད་རིག་པའི་ཞིབ་འཇུག་ཁང་གི་དབུ་འཛིན་གྱི་འགན་བཞེས། སྤྱི་ལོ1992ལོའི་ཟླ8པར་ནོར་ཝེའི་རྒྱལ་ས་ཨ་སི་ལོར་རྒྱལ་སྤྱིའི་བོད་རིག་པ་དཔྱད་གླེང་ཚོགས་འདུ་ཐེངས་དྲུག་པར་ཕེབས་ཏེ་རྒྱལ་སྤྱིའི་བོད་རིག་པའི་ཞིབ་དཔྱད་ལྷན་ཚོགས་ཀྱི་ལས་འཛིན་དུ་བསྐོས། སྤྱི་ལོ1993ལོར་ཀུན་གཟིགས་པན་ཆེན་བཅུ་བ་མཆོག་འཚོ་བཞུགས་སྐབས་བཀའ་མངགས་མཛད་པ་ལྟར་པེ་ཅིང་བོད་རྒྱུད་ནང་བསྟན་མཐོ་རིམ་སློབ་གླིང་དུ་སློབ་ཁྲིད་དང་། ནོར་ཝེའི་ཨ་སི་ལོ་སློབ་གྲྭ་ཆེན་མོར་ནང་བའི་ཆོས་ཀྱི་མཚན་ཉིད་རིག་པའི་སྐོར་སློབ་ཁྲིད་ཟླ་གཉིས་རིང་མཛད། སྤྱི་ལོ1997ལོའི་ཟླ7ཚེས22ཉིན་ཨ་རིའི་གྲོང་ཁྱེར་ལོ་ཧྲན་ཅི་རུ་དགོངས་པ་ཆོས་དབྱིངས་སུ་བསྡུས།

《དུང་དཀར་ཚིག་མཛོད་ཆེན་མོ》དང《སྙན་ངག་ཚིག་རྒྱན་རིག་པའི་སྒོ་འབྱེད》《བོད་ཀྱི་དཀར་ཆག་རིག་པ》 《གྲུབ་མཐའི་སྐོར་གྱི་རྣམ་བཤད》《བོད་ཀྱི་ཆོས་སྲིད་ཟུང་འབྲེལ་ལམ་ལུགས་སྐོར་བཤད་པ》《དཔྱད་རྩོམ་ཕྱོགས་བསྒྲིགས》《དེབ་ཐེར་དམར་པོའི་གལ་ཆེའི་ཚིག་འགྲེལ་གནད་བསྡུས》《སྐད་རིག་དང་སློབ་གསོ》《གླེང་གཞི་དང་གསུང་བཤད》རྣམས་སོ། །

 དཔལ་ལྡན་རྒྱལ་དང་ཨ་ལགས་དུང་དཀར་རིན་པོ་ཆེ་རྣམ་གཉིས། 

གེ་སར་སྒྲུང་གི་མཁས་པ་འཇམ་དཔལ་རྒྱ་མཚོ་དང་། ཨ་ལག་དུང་དཀར་རིན་པོ་ཆེ། སྐུ་ཞབས་ཚེ་རིང་ཤཱཀྱ་བཅས།

༼གོང་གི་པར་རིས་དག་དབྱིན་ཇིའི་རྒྱལ་ས་ལོན་ཌོན་དུ་བསྒྲོན་པ་ཤ་སྟག་རེད།༽

འདི་ནི་ཨ་ལགས་དུང་དཀར་རིན་པོ་ཆེ་སྐུ་ཚེའི་འཕེན་པ་རྫོགས་ལ་ཉེ་བའི་སྐབས་ཏེ། ཨ་རིའི་སྨན་ཁང་ལོ་སི་ཨན་ཇིལ་སི་རུ་བཞུགས་འདུག་པའི་སྐབས་རེད། སྙུན་བབ་ལྕི་བའི་སྐབས་ལ་ཡང་།
རིན་པོ་ཆེ་ནས་ཚིག་མཛོད་དང་གཞན་པའི་རྩོམ་བྲིས་གནང་ཡོད། ཁོང་གི་གཡས་ཀྱི་ཨ་ཇག་དེ་ནི་ཀུན་ཕན་ཐེབས་རྩ་ཚོགས་པའི་འགན་འཛིན་གཞོན་པ་ལྕམ་ཁེམ་མཱོ་རེས་སི་ལགས་དང་། གཡོན་གྱི་དེ་རྒན་བསྟན་འཛིན་དགེ་ལེགས་ལགས་རེད། ནད་ཁྲིའི་སྟེང་དུ་བཞུགས་པ་དེ་ཨ་ལགས་དུང་དཀར་བློ་བཟང་འཕྲིན་ལས་མཆོག་རེད།

ལོ་རབས་ལྔ་བཅུའི་སྟོད་ལ་དུང་དཀར་རིན་པོ་ཆེ་ལྷ་སའི་རྒྱུད་སྟོད་གྲྭ་ཚང་དུ་བཞུགས་སྐབས་ཀྱི་པར་ཞིག ཆོས་ཁྲིར་བཞུགས་པའི་ཨ་ལགས་དུང་དཀར་རིན་པོ་ཆེ།

 དུང་དཀར་ཚིག་མཛོད་ཆེན་མོའི་མ་ཡིག་ཕྱག་བྲིས་མ།

དུང་དཀར་རིན་པོ་ཆེའི་ཟིན་ཐོ་དང་ཡིག་ཆས། ཞ་སྨྱུག་ཟད་པོ་དག ཁོང་གི་སྐུ་ཟླ་པདྨ་གཡུ་སྒྲོན་ལགས་ནས་གསུངས་གསལ། རིན་པོ་ཆེ་ནས་ཞ་སྨྱུག་ཅིག་ཟད་ནས་ཕྱག་གིས་འཛིན་ཐབས་མེད་པའི་བར་དུ་བེད་སྤྱོད་གནང་བར་འགྱུར་ཞེས་གསུངས་བྱུང་།

ཡོང་ཁུངས། བཙན་པོའི་རིག་གནས།