ཐང་སང་བླ་མ་ཞེས་གྲགས་པ་སྟེ།ཧྭན་གྱི་བློན་ཆེན་ཊུང་ཀུང་གི་གདུང་བརྒྱུད་ཡིན་ལ།ཆུང་ངུ་ནས་རབ་ཏུ་བྱུང༌།སྐྱེས་ཐོབ་ཀྱི་ཤེས་རབ་དང་སྤོབས་པ་ཟླ་དང་བྲལ་བ་སྟེ།དགུང་ལོ་བཅུ་གཅིག་ནས་དྲི་མེད་གྲགས་པར་བསྟན་པའི་མདོ་དང༌།དམ་ཆོས་པད་དཀར་རྒྱུན་གྱི་ཞལ་འདོན་གནང༌། ཐོག་མར་མངོན་པའི་སྐོར་མཁས་པར་བསླབས།དེ་ནས་འགྱུར་རོ་ཅོག་གི་བཀའ་བསྟན་ལ་འདི་མ་གཟིགས་བྱ་བ་མེད།དགུང་ལོ་ཉེར་དགུའི་དུས་རྒྱ་གར་དུ་བགྲོད་པའི་ཐུགས་འདུན་གྱིས་ཕལ་སྐད་ལ་སྦྱངས་ནས་རྒྱལ་པོ་ལ་ཐབས་མཁས་ཀྱིས་ཞུས་པས་ལམ་ཡིག་གནང༌།དེ་ནས་རིམ་གྱིས་ཡུལ་གྲུ་དུ་མ་བརྒྱུད་དེ་རྒྱ་གར་དུ་བྱོན།
རྒྱ་གར་གྱི་ཡུལ་མཐའ་དབུས་ཐམས་ཅད་དང༌།ཁ་ཆེ་སོགས་ཡུལ་ཐ་དད་པ་མང་པོར་བྱོན་ནས་བྱིན་རླབས་ཅན་གྱི་གནས་རྟེན་དུ་མ་ལ་མཇལ་ཞིང༌།ཛེ་ཏཱ་རི་དགྲ་ལས་རྣམ་རྒྱལ་སོགས་པཎྜི་ཏ་དུ་མ་ལས་ཐེག་པ་གོང་འོག་གི་ཆོས་མང་དུ་གསན།གཙོ་བོར་ཤྲཱི་ན་ལེནྡྲ་ན་མཁན་ཆེན་དུལ་བ་བཟང་པོ་ཞེས་བྱ་བ་དགུང་ལོ་བརྒྱ་དང་དྲུག་ལོན་པ་སེམས་ཙམ་པའི་གྲུབ་མཐའ་འཛིན་པ་ཞིག་བཞུགས་པ་མཇལ།
འདིའི་མཚན་ལ་དུལ་བ་ལྷ་ཡང་ཟེར་ཏེ།མཆོག་སྡེའི་སློབ་མ་སློབ་དཔོན་དུལ་བའི་སྡེ་ཡིན་ནམ་ཡང་ཟེར།འོན་ཀྱང་ཐང་ཟན་ཙང་གིས་ཇོ་བོའི་བླ་མ་ཛེ་ཏཱ་རི་དང་ཡང་མཇལ་འདུག་ཅིང༌།འདི་དང་དུལ་སྡེའི་བར་དུ་བླ་མ་མང་ཙམ་སྣང་བས་དུས་ཐོག་འགྲིགས་མིན་དཔྱད།
གང་ལྟར་ཡང་དེ་ཉིད་ལ་བྱམས་ཆོས་སྡེ་ལྔའི་སྐོར་ལོ་གཅིག་དང་ཟླ་བ་གསུམ་གྱི་རིང་གསན་ཅིང༌།སླར་ཡང་ཟླ་བ་དགུ་ལ་ཚད་མ་དང་མཛོད་ཞིབ་ཏུ་གསན།དེ་ནས་བཟུང་ལོ་གསུམ་གྱི་བར་དུ་ཆོས་མང་དུ་གསན།མུ་སྟེགས་ཀྱི་རྒོལ་བ་ཞིག་རྩོད་པས་ཕམ་པར་མཛད་དེ།ཐེག་པ་ཆེན་པོའི་སྒོ་ནས་ལྟ་བ་ངན་པ་ཚར་གཅོད་པའི་བསྟན་བཅོས་ཤོ་ལོ་ཀ་དྲུག་སྟོང་དྲུག་བརྒྱ་ཡོད་པ་ཞིག་མཛད་པས་མཁས་པ་ཐམས་ཅད་ཀྱི་ཐུགས་འཕྲོགགཞན་ཡང་པཎྜི་ཏ་འཕྲོག་བྱེད་འོད་ཀྱིས་སེམས་ཙམ་སུན་འབྱིན་པའི་བསྟན་བཅོས་བརྩམས་པར།སློབ་དཔོན་འདིས་གཅིག་ཏུ་གྲུབ་པ་ཞེས་བྱ་བའི་བསྟན་བཅོས་ཤོ་ལོ་ཀ་སུམ་སྟོང་ཡོད་པ་བརྩམས་ནས་སློབ་དཔོན་དུལ་བཟང་ལ་ཕུལ་བས་ཐུགས་མཉེས།
དེ་དག་ལ་བརྟེན་ནས་མཁས་པའི་གྲགས་པ་ཤིན་ཏུ་རྒྱས་ཏེ།འཕགས་ཡུལ་བ་རྣམས་མཧཱ་ཡཱ་ན་དེ་ཝ་སྟེ་ཐེག་ཆེན་ལྟར་འབོད་ཅིང༌།རྒྱ་གར་གྱི་སློབ་དཔོན་ཚུར་ཆོས་གསན་པའང་འགའ་ཞིག་བྱུང༌།རྒྱལ་པོ་ཚུལ་ཁྲིམས་ཉི་མ་དང༌།ཀུམཱ་ར་དང༌།རྒྱ་གར་ལྷོ་ཕྱོགས་ཀྱི་རྒྱལ་པོ་དྷ་ཏུ་བྷ་དྲ་སོགས་ས་སྐྱོང་མང་པོས་ཀྱང་བཀུར་སྟི་ཆེན་པོ་བྱས།སྔ་ཕྱིར་རྒྱ་གར་དུ་བྱོན་པའི་ཧྭ་ཤང་གི་སློབ་དཔོན་མང་ཡང༌།དེར་སློབ་དཔོན་གྱི་གོ་ས་ཐོབ་པ་དང༌།རྒྱལ་པོ་རྣམས་ཀྱི་མཆོད་ཡུལ་དུ་གྱུར་པ་སློབ་དཔོན་འདི་ཁོ་ནར་ངེས་སོ།།
ལམ་བར་དུ་ལོ་གསུམ་བཅས་ལོ་བཅུ་བདུན་འགོར་ཞིང༌།དེ་ནས་རྒྱ་ཡུལ་དུ་ཕེབས།ཅེན་ཀུའན་རྒྱལ་པོས་བསྙེན་བཀུར་རྒྱ་ཆེར་བགྱིས་ཤིང༌།ཏ་ལའི་ལོ་མར་བྲིས་པའི་རྒྱ་དཔེ་པོ་ཏི་དྲུག་བརྒྱ་ལྷག་དང༌།རིང་བསྲེལ་དང་སྐུ་བརྙན་མང་པོ།ཀ་ཅ་སྣ་ཚོགས་བཅས་རྒྱལ་པོ་ལ་ཕུལ།རྒྱལ་པོས་ཧུང་ཧྥ་ཟིའི་དགོན་སྡེར་བཞུགས་སུ་བཅུག་ནས་ཧྭ་ཤང་མཁས་པ་བཅུ་གཉིས་དང་བཅས་པས་ཤེར་ཕྱིན་སྟོང་ཕྲག་བརྒྱ་པ་དང་བྱམས་ཆོས་ཀྱིས་གཙོ་བའི་བཀའ་བསྟན་རྒྱ་དཔེ་གླེགས་བམ་དྲུག་བརྒྱ་དང་ང་བདུན་བསྒྱུར།འགྱུར་རྙིང་མང་པོ་ལ་འགྱུར་བཅོས་ཀྱང་མཛད།
དེ་ནས་ཚི་ཨེན་ཟི་སྟེ་བྱམས་པ་གླིང་གསེར་གསོ་མཛད་དེ།དེ་དུས་དགོན་སྡེ་ཁག་སུམ་སྟོང་བདུན་བརྒྱ་བཅུ་དྲུག་ཡོད་པ་ལས་གྲྭ་པ་བསྡུས་པ་དང༌།གསར་དུ་རབ་བྱུང་བྱས་པ་སྡོམ་པས་ཆིག་ཁྲི་བརྒྱད་སྟོང་དྲུག་བརྒྱ་སུམ་ཅུ་འདུས་པའི་དགེ་འདུན་གྱི་སྡེ་བཙུགས་ཏེ་སློ་བདཔོན་དེར་གཏན་བཞུགས་མཛད།རྒྱལ་པོ་འདས་ནས་སྲས་ཀའུ་ཙུང་རྒྱལ་པོས་བི་མིང་ཟི་བྱ་བའི་དགོན་པ་དགེ་སློང་ལྔ་བཅུ་རེ་རེ་ལ་དགེ་ཚུལ་རེ་དང་བར་མ་གསུམ་རེ་འཚོ་བ་རྒྱལ་པོས་སྦྱར་བ་བྱས་ཏེ་སློབ་དཔོན་ལ་ཕུལ།དེ་ནས་སློབ་དཔོན་གྱིས་དགོན་སྡེ་གསུམ་ཀའི་མཁན་པོ་མཛད།
ལམ་གྱི་རིམ་པ་གསུམ་པ་དང༌།བསྒོམ་ཚུལ་ལྔའི་སྲོལ་བཙུགས།འབུམ་འགྲེལ་སེམས་ལུགས་མ།རྒྱ་ཆེན་སྤྱོད་པའི་དོན་བསྡུས་སྐབས་བརྒྱད་མ།ལང་གཤེགས་དགོངས་འགྲེལ་སོགས་མདོ་སྡེ་འགའི་ཊིཀྐ་དང༌།སྡོམ་ཚིགསེམས་འགྲེལ།མཛོད་འགྲེལ།ཚད་མ་བསྡུས་པ་ལ་སོགས་པའི་བསྟན་བཅོས་མང་པོ་མཛད།བསྟན་པ་སྤྱི་དང་ཁྱད་པར་དུ་ཐེག་པ་ཆེན་པོ།སྒོས་སུ་སེམས་ཙམ་ལུགས་ཤིན་ཏུ་དར་བར་མཛད། ཆི་ཨེན་ཟིའི་ལྷོ་ངོས་སུ་མཆོད་རྟེན་འཕགས་ལུགས་མ་ཤིན་ཏུ་ཆེ་བ་ཞིག་བཞེངས་ནས།རྒྱ་དཔེ་དང་རིང་བསྲེལ་རྣམས་ནང་གཞུག་ཏུ་ཕུལ།གཞན་ཡང་རྒྱུ་སྣ་ཚོགས་ལས་གྲུབ་པའི་སྐུ་རྟེན་བྱེ་བ་གཅིག་སོགས་རྟེན་མང་པོ་བཞེངས།འཆི་ངེས་ཀྱི་སྲོག་བླུ་ཁྲི།མི་ཁྲི་ཕྲག་ལ་མཆོད་སྦྱིན།མར་མེ་དུང་འབུལ་སོགས་མཛད།ལོ་བཞི་བཅུ་ཉེ་བར་འགྲོ་དོན་མཛད་ནས་དགུང་ལོ་དྲུག་ཅུ་རེ་ལྔའི་ཐོག་མྱ་ངན་ལས་འདས་སོ།།
ཡོང་ཁུངས། ཤེས་རབ་གཡང་དཔེ་མཛོད་ཁང་།
