རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
དགོན་པ་བའི་སློབ་མ་ཁ་རག་སྒོམ་ཆུང་ཞེས་གྲགས་པ་དེ་ནི། གཙང་སྟོད་ཀྱི་དུང་ཞུར་བྱ་བར། ཡབ་དགོན་པ་དཀོན་མཆོག་རྟེན་གྱི་སྲས་སུ་འཁྲུངས། མཚན་དབང་ཕྱུག་བློ་གྲོས་ཞེས་བཏགས། སྐུ་གཞོན་ནུ་ནས་བམ་པོ་གནས་སུ་མཁན་པོ་མར་སྒོམ་ལ་རབ་ཏུ་བྱུང་། སྦས་སྒོམ་དང་དཔོན་སློབ་གཉིས་པོས་ར་སྒྲེང་དུ་བྱོན་པས། དགེ་བཤེས་སྟོན་པ་གཤེགས་རྟིང་། རྣལ་འབྱོར་པས་ཚོགས་པ་སྐྱོང་གིན་འདུག །དེར་གཙང་བུ་ར་སྒྲེང་གི་སྒོམ་ཆེན་རྣམས་ལ་མོས་པ་བྱུང་པས་རྣལ་འབྱོར་པ་དང་། དགོན་པ་བ་ལོ་བདུན་བསྟེན། ཇོ་བོའི་གདམས་པ་རྣམས་ཚང་བར་ཞུས། དེ་ནས་ཐུགས་དགོངས་ལ་ད་ནི་རང་གིས་ཀྱང་ཆིག་སྐྱ་ཐུབ་སྟེ་འོང་སྙམ་སྟེ། ཉུང་མའི་ས་བོན་ཕུལ་གང་འཁྱེར་ནས་སྤྲགས་ཀྱི་ཀེ་རུ་རུ་བྱོན།
དབྱར་ལོ་ཐུག་གསོལ། དགུན་ཉུང་ཐུག་ལ་ཕྱེ་ཐུན་རེ་བཏབ་ནས་གསོལ་ཏེ། སྒྲུབ་པ་ལོ་བཅུ་གཅིག་རྩེ་གཅིག་ཏུ་མཛད། དེ་ནས་ཕན་ཡུལ་དུ་གཅིག་པུར་རི་ལ་བསྒོམས་པ་ན། མདུན་དུ་མི་ནག་པོ་ཞིག་བྱུང་ནས་ཁྱོད་ཀྱི་མགོ་འདོད་དོ་ཞེས་ཟེར་རོ། །རེ་ཞིག་སྡོད་ཅིག་སྦྱིན་ནོ་གསུངས་ནས། རང་གི་མན་ངག་བཞིན་མཛད་ནས་ཁྱེར་ཅིག་ཅེས་གསུངས་ཏེ། བལྟས་པས་དེ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པར་གྱུར་ནས་དེའི་ཞལ་གཟིགས་སོ། །དེ་ལ་དགའ་མི་དགའི་རྟོག་པ་མ་བྱུང་གི །དོན་རང་གི་ངོ་བོས་གྲུབ་པ་མེད་མོད་ཀྱི། འོན་ཀྱང་སེམས་འཁྲུལ་པའི་སྣང་བའོ་ཞེས་མཁྱེན་ནོ། །ནམ་ཞིག་ན་དགེ་བཤེས་པོ་ཏོ་བ་ཆེན་པོ་དེའི་ཕྱོགས་སུ་འཆག་པ་ན། དེས་པོ་ཏོ་བ་ལ་ཕྱག་མཛད་ཅིང་། ཕན་ཚུན་ཆོས་ཀྱི་གཏམ་འདྲི་བ་དང་། པོ་ཏོ་བའི་ཞལ་ནས། གཅིག་པུར་རི་ལ་བསྒོམ་པ་ན་བར་ཆད་མ་བྱུང་ངམ་གསུང་། དེས་རང་གི་སྒྲུབ་ལུགས་དང་ཉམས་ཕུལ་ཞིང་མི་ནག་པོ་ཇི་ལྟར་བྱུང་ཚུལ་ཞུས་པས། དགེ་བཤེས་པོ་ཏོ་བས་དེ་ལ་ཐབས་ཇི་ལྟར་བྱས་གསུངས་པས། སྔ་མ་ལྟར་ཇི་ལྟར་གྱུར་ལུགས་དང་རྟོགས་པ་བརྗོད་པས། པོ་ཏོ་བ་ཐུགས་དགྱེས་ནས། སྐྱེས་བུ་དེ་ཁོ་ན་བཞིན་དུ་སྒྲུབས་ཤིག །སུ་ལ་ཡང་དེ་ལས་ལྷག་པར་ཐབས་མེད་དོ་གསུངས་ནས་གཤེགས། ཐུགས་ཤིན་ཏུ་མཉེས་པས་ཉིན་རེ་བཞིན་པོ་ཏོ་བས་ཆོས་ཀྱི་གཏམ་རེ་ཆེད་དུ་སྐྱེལ་བར་མཛད་དོ། །དགེ་བཤེས་ཁ་རག་སྒོམ་ཆུང་པ་འདིས་རག་མའི་ཕུར་སྒོམ་ཞིང་བཞུགས་པ་ན་ནགས་ལ་མེ་མཆེད་པས་སྲོག་ཆགས་གྲིབ་སོ་ལྟར་བྲོས་ཀྱང་མ་ཐར་བར་ཚིག་པ་ལ། མི་བཟོད་པའི་བརྩེ་བས་རྗེ་བཙུན་སྒྲོལ་མ་ལ་འཕྲལ་དུ་རང་གིས་བརྩམས་པའི་བསྟོད་པས་བསྟོད་ནས་མེར་མཆོངས་པས། མེ་རང་ཞིར་གྱུར་ཏེ། ངེས་པར་དྲོད་རྟགས་དང་ལྡན་ཞིང་། བྱམས་སྙིང་རྗེ་བྱང་ཆུབ་ཀྱི་སེམས་འབྱོངས་པས་བྱ་རི་དྭགས་རྣམས་ལ་ཟས་བསྟབས་པ་ཕྱག་ནས་ལེན་ནོ། །ཡང་ལན་ཅིག་པོ་ཏོ་བའི་སྤྱན་སྔར་བྱོན། ལམ་རིམ་བློ་ལྡོག་བཞིའི་རྟོགས་པ་ཕུལ་བས་མཉེས་ཏེ། སྐྱེས་བུ་སྨྲ་བའི་སེང་གེར་སོང་གསུང་ངོ་། །དེ་ནས་དགེ་བཤེས་སྒོམ་ཆུང་པ་ཁ་རག་ཏུ་སྒོམ་དུ་འབྱོན་པར་བཞེད་ནས་དགེ་བཤེས་པོ་ཏོ་བ་ལ་ཕྱག་འཚལ་དུ་བྱོན། འབྲལ་མི་ཕོད་པར་གཉིས་ཀ་སྤྱན་ཆབ་བྱུང་། ཕན་ཡུལ་རྒྱལ་དུ་ཕེབས་པ་ན། ཆོས་ཞུ་བ་དང་འབུལ་བ་ཆེན་པོ་ཡང་བྱུང་། དེ་ནས་ཁ་རག་ཏུ་བྱོན་ནས་ཁ་རག་ཕུག་པ་ནག་པོར་ཐུགས་དམ་མཛད། ཁ་རག་སྒོམ་ཆུང་ཞེས་གྲགས་སྙན་པས་ཕྱོགས་ཐམས་ཅད་དུ་ཁྱབ། དེར་ཚོགས་པ་སྟོང་ཙམ་འདུས་པ་ལ་བྱང་ཆུབ་ལམ་གྱི་རིམ་པ་རྒྱ་ཆེར་སྤེལ་ལོ། །ཁ་རག་སྒོམ་ཆུང་པའི་ཞལ་ནས། དད་པ་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། དགེ་བའི་བཤེས་གཉེན་བསྟེན་ཅིང་མདོ་སྡེ་བལྟ། བརྩོན་འགྲུས་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། འཆི་བ་མི་རྟག་པ་སྒོམ་ཞིང་ལེ་ལོ་སྤོང་། ང་རྒྱལ་ཅན་གྱི་གང་ཟག་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། རང་མགོ་སྨད་ལ་དམན་ས་བཟུང་། ཆོས་དེ་གསུམ་དང་ལྡན་ན་ཉན་ཐོས་ཀྱི་རྟེན་དུའང་རུང་། བྱང་ཆུབ་སེམས་དཔའི་རྟེན་དུའང་རུང་། གསང་སྔགས་ཀྱི་རྟེན་དུའང་རུང་། མདོར་ན་ཡོན་ཏན་ཐམས་ཅད་ཀྱི་རྟེན་དུ་རུང་བ་ཡིན་གསུང་ངོ་། །གཤེགས་ཁར་ཡང་ལྷོ་པ་ལ། སྐྱེ་སའི་ཡུལ་སྤོངས། ཉེ་དུ་དང་ཐག་བསྲིངས། བཤེས་གཉེན་རྟག་ཏུ་བསྟེན། ཧྲུལ་བོའི་གོས་གྱོན། དམན་པའི་ས་བཟུང་། ངན་པའི་ཟས་ཟོ། །རྒྱ་སྐད་ཆུ་བཞིན་འཐུང་ལ་སྒྲུབ་པ་གྱིས་གསུང་བའི་གདམས་ངག་གནང་། དེ་ནས་སྟོན་མོ་བཟང་པོ་ཞིག་མཛད་དེ་འདི་ཐ་མའི་ཟས་ཡིན་ནོ་གསུང་། ངའི་རུས་བུ་ལྷག་རོལ་བསྡུས་ལ། བྱང་ར་སྒྲེང་ན་དཔལ་ལྡན་དགོན་པ་བའི་སྐུ་འབུམ་ཡོད་པས། དེའི་གྲིབ་མ་དང་བསེར་བུ་ཕོག་སར་སྐྱོལ་ཅིག་གསུང་ནས་མྱ་ངན་ལས་འདས་སོ།།
ལམ་རིམ་བླ་མ་བརྒྱུད་པའི་རྣམ་ཐར་ལས་བཏུས།
