གཞུང་ལུགས་རབ་འབྱམས་ལ་སྦྱངས་པ་མཐར་ཕྱིན་ཅིང་མཁས་བཙུན་བཟང་གསུམ་གྱི་ཡོན་ཏན་ལྷུན་གྱིས་གྲུབ་པའི་བདག་ཉིད་ཆེན་པོ་ལྕང་སྐྱ་རོལ་པའི་རྡོ་རྗེའམ་ཡེ་ཤེས་བསྟན་པའི་སྒྲོན་མེ་མཆོག་ནི།
བོད་ཆོལ་ཁ་གསུམ་ལས་མདོ་སྨད་རྟའི་ཆོལ་ཁའི་ཡུལ་གྱི་བྱེ་བྲག་ཙོང་ཁའི་བྱང་ཕྱོགས་ཏེ། ལང་གྲུ་སྡེ་བཞིར་གྲགས་པའི་ནང་ཚན་ནུབ་པདྨོ་སྡེའི་ཆར་གཏོགས་པའི་འབྲོག་གནས་བྲག་དཀར་ཞེས་པའི་ལུང་པར། ཡབ་ཆི་ཀྱྭ་ཚངས་པ་གུ་རུ་བསྟན་འཛིན་དང་ཡུམ་བུ་སྐྱིད་གཉིས་ཀྱི་སྲས་སུ་བོད་རབ་བྱུང་བཅུ་གཉིས་པའི་མེ་བྱ་སྟེ་ཕྱི་ལོ་༡༧༡༧ ལོར་སྐུ་བལྟམས། མཚན་གྲགས་པ་བསོད་ནམས་ཞེས་གསོལ། ཀུན་མཁྱེན་འཇམ་དབྱངས་བཞད་པའི་རྡོ་རྗེ་སྐུ་ཕྲེང་དང་པོ་དབལ་ཤུལ་ངག་དབང་བརྩོན་འགྲུས་དཔལ་བཟང་པོའི་ཞལ་སྔ་ནས་ལྕང་སྐྱ་ངག་དབང་ཆོས་ལྡན་གྱི་སྤྲུལ་སྐུར་ངོས་འཛིན་གནང། དགུང་ལོ་བཞི་པ་ལྕགས་བྱི་སྟེ། ཕྱི་ལོ་༡༧༢༠ ལོར་ཆོས་སྡེ་ཆེན་པོ་དགོན་ལུང་བྱམས་པ་གླིང་གི་ལྕང་སྐྱ་བླ་བྲང་དུ་ཕེབས། སྐབས་དེར་སོག་པོའི་ཝང་སྟོབས་ཆེན་ཞིག་གི་བུ་ལྕང་སྐྱའི་སྤྲུལ་སྐུ་ཡིན་པར་བསྒྲགས་སྟབས། རེ་ཞིག་གོང་མར་ཞུ་རྒྱུ་འགྱངས་དགོས་བྱུང༌། དེ་ནས་ཐུའུ་བཀྭན་ཆོས་ཀྱི་རྒྱ་མཚོས་ཐུགས་འཁུར་གནང་བཞེས་ཀྱིས་གོང་མར་ཞུས་པས་གདན་སར་འགོད་ཆོག་པའི་ཆོག་མཆན་གནང༌།
ཆུ་བཟང་རིན་པོ་ཆེ་བློ་བཟང་བསྟན་པའི་རྒྱལ་མཚན་གྱི་དྲུང་དུ་གཙུག་ཕུད་བྲེགས་ཏེ་མཚན་ལ་ངག་དབང་ཆོས་ཀྱི་གྲགས་པ་བསྟན་པའི་རྒྱལ་མཚན་དཔལ་བཟང་པོར་གསོལ། སྐུ་གོང་མའི་སློབ་མ་ཨ་རྩེ་ཆོས་རྗེ་བློ་བཟང་ཆོས་འཛིན་གྱི་དྲུང་དུ་གཟབ་གཤར་གྱི་ཡི་གེ་འབྲི་ཀློག་ལ་སྦྱངས་པས་རིང་པོ་མ་ཐོགས་པར་ཚེགས་མེད་དུ་ཐུགས་སུ་ཆུད། གཞན་ཡང་ཆོས་སྤྱོད་གསོལ་འདེབས་ཀྱི་རིམ་པ། བདེ་གསང་འཇིགས་གསུམ་གྱི་སྒྲུབ་ཐབས་སོགས་འཕྲལ་དུ་ཉེར་མཁོའི་ཆོས་ཚན་ཕལ་ཆེར་ཐུགས་འཛིན་མཛད། དགུང་ལོ་བདུན་པ་ཆུ་ཡོས་ཏེ་ཕྱི་ལོ་༡༧༢༣ ལོར་རྗེ་བློ་བཟང་བསྟན་པའི་རྒྱལ་མཚན་གྱི་དྲུང་ནས་ཡོངས་རྫོགས་དགེ་བསྙེན་གྱི་སྡོམ་པ་དང་བར་མའི་ཚུལ་ཁྲིམས་ལེགས་པར་བཞེས། དགུང་ལོ་བརྒྱད་པ་ཤིང་འབྲུག་སྟེ་ཕྱི་ལོ་༡༧༢༤ ལོར་གོང་མ་ཡུང་ཊིང་གིས་གདན་དྲངས་ཏེ་ཟུང་གྲུ་ཟི་དགོན་པར་སྐུ་གོང་མའི་ཆོས་ཀྱི་རྒྱལ་སྲིད་ཀྱི་ཁྲིར་བཀོད། དེ་ནས་རྗེ་ཁྲི་ཆེན་མཆོག་སྤྲུལ་བློ་བཟང་བསྟན་པའི་ཉི་མ་དང༌། དཀའ་ཆེན་ཤེས་རབ་དར་རྒྱས། ཨ་རྩེ་ཆོས་རྗེ་བློ་བཟང་ཆོས་འཛིན་བཅས་སློབ་དཔོན་དུ་བསྟེན་ནས་རྒྱན་དྲུག་མཆོག་གཉིས་ཀྱི་གཞུང་ཆེན་པོ་རྣམས་ཀྱིས་གཙོས་མདོ་སྔགས་རིག་གནས་དང་བཅས་པ་ཀུན་ལ་གསན་སྦྱོང་ལེགས་པར་མཛད་དེ། གཞན་དྲིང་མི་འཇོག་པའི་སྤོབས་པ་ཡོངས་སུ་བརྙེས། དགུང་ལོ་དགུ་པར་བྱང་ཆུབ་ལམ་གྱི་རིམ་པའི་དམིགས་རྣམ་གསོལ་འདེབས་ཚིགས་བཅད་མ་ལྗགས་རྩོམ་གྱི་ཐོག་མར་མཛད། དགུང་ལོ་བཅུ་གཅིག་པར་སྐྱབས་འགྲོའི་ཁྲིད་དང༌། དབང་ཆེན་གྱི་རིགས་མ་གཏོགས་དད་ལྡན་དོན་གཉེར་ཅན་རྣམས་ཀྱིས་གང་ཞུས་འདོད་ཆོས་ཅི་དགར་བསྩལ། དགུང་ལོ་བཅུ་བདུན་པ་ནས་བཟུང་གཞུང་ལུགས་རབ་འབྱམས་ལ་སྦྱངས་པའི་རྩོད་པའི་གྲྭར་ཞུགས་ནས་མ་རྟོགས་ལོག་རྟོག་ཐེ་ཚོམ་གྱི་ཆ་ཕྲ་མོ་ནས་འཇོམས་པར་མཛད། རྒྱ་དང་སོག་པོ་མན་ཇུ་སོགས་ཀྱི་སྐད་ཡིག་ཀྱང་ཐུགས་སུ་ཆུད།
གོང་མས་རྗེ་འདི་ལ་བསྔགས་བརྗོད་གསེར་གྱི་བཀའ་ལུང་དང་བཅས་སྐུ་གོང་མའི་དུས་བཞིན་བཀྭན་ཏིང་ཕུའུ་ཤན་བཀྭང་ཆི་ཏཱ་གཽ་ཤྲི་ཞེས་པའི་རྒྱ་སྐད་ཀྱིས་ཆེད་བརྗོད་གནང་བ་སྟེ། བོད་སྐད་དུ། བྱམས་བརྩེས་འགྲོ་བ་ཡོངས་ཀྱི་སྤྱི་བོ་ནས་དབང་བསྐུར་བའི་ཀུན་མཁྱེན་བླ་མ་ཆེན་པོ་ཞེས་པའི་མཚན་གྱིས་གཟེངས་བསྟོད་དང་གསེར་སྲང་བརྒྱད་ཅུ་ལས་གྲུབ་པའི་ཐམ་ག བསྔགས་བརྗོད་ཀྱི་གསེར་ཡིག་དང་བཅས་ཕུལ།
ཤིང་ཡོས་ཏེ་ཕྱི་ལོ་༡༧༣༥ ལོར་རྒྱལ་བའི་དབང་པོ་བདུན་པ་ཆེན་པོ་ངག་དབང་བློ་བཟང་བསྐལ་བཟང་རྒྱ་མཚོ་མགར་ཐར་ནས་དབུས་སུ་གདན་འདྲེན་པར་ཕེབས། སྐྱབས་མཆོག་དེ་དང་ཁྲི་ཆེན་ངག་དབང་མཆོག་ལྡན་ཡབ་སྲས་ལས་རི་བོ་དགེ་ལྡན་པའི་སྙན་བརྒྱུད་ཀྱི་གདམས་པ་ཡོངས་རྫོགས་གསན། མེ་འབྲུག་སྟེ་ཕྱི་ལོ་༡༧༣༦ ལོར་གཙང་དུ་པཎ་ཆེན་བློ་བཟང་ཡེ་ཤེས་ལས་བསྙེན་རྫོགས་ཀྱི་སྡོམ་པ་མནོས། མཚན་ལ་ཡེ་ཤེས་བསྟན་པའི་སྒྲོན་མེ་དཔལ་བཟང་པོ་ཞེས་གསོལ།
ལོ་དེར་རྒྱ་ནག་པེ་ཅིན་དུ་ཕེབས་ཏེ་གོང་མ་ཆན་ལུང་དང་མཇལ། གོང་མར་སྐྱབས་འགྲོའི་ཁྲིད་མདོར་བསྡུས་དང༌། བོད་ཡིག་གཟབ་གཤར་གྱི་འབྲི་ཀློག དག་ཡིག བྱང་ཆུབ་ལམ་རིམ། བདེ་མཆོག་དྲིལ་བུ་ལྷ་ལྔའི་དབང་བཅས་རིམ་པར་གནང༌།
དགུང་ལོ་ཉེར་ལྔ་པ་ལྕགས་བྱ་སྟེ་ཕྱི་ལོ་༡༧༤༡ ལོའི་ཟླ་བཅུ་པའི་ཡར་ཚེས་ནས་རྒྱལ་བའི་བཀའི་དགོངས་འགྲེལ་གྱི་བསྟན་བཅོས་འགྱུར་རོ་ཅོག་ལོ་ཙཱ་བ་དུ་མ་དང་མཉམ་དུ་སོག་སྐད་དུ་བསྒྱུར་འགོ་ཚུགས། རིང་པོར་མ་ཐོགས་པར་ཡོངས་སུ་གྲུབ་སྟེ། པར་ཕུད་རྒྱལ་བའི་དབང་པོ་བདུན་པ་ཆེན་པོ་ངག་དབང་བློ་བཟང་བསྐལ་བཟང་རྒྱ་མཚོར་ཕུལ། རབ་བྱུང་བཅུ་གསུམ་པའི་ས་སྦྲུལ་ཏེ་ཕྱི་ལོ་༡༧༤༩ ལོར་རང་ཡུལ་མདོ་སྨད་དུ་ཕེབས། སྐུ་འབུམ་དང་དགོན་ལུང༌། གསེར་ཁོག་གསུམ་ལ་གོང་མས་ཕུལ་བའི་རྩི་པེན་བསྩལ་ཞིང༌། ཟབ་ཆོས་བདུད་རྩིའི་གྲུ་ཆར་ཕབ་སྟེ་འགྲོ་དོན་རྒྱ་ཆེར་མཛད། ཀུན་མཁྱེན་འཇམ་དབྱངས་བཞད་པའི་རྡོ་རྗེའི་སྤྲུལ་སྐུར་བསྙེན་རྫོགས་དགེ་སློང་གི་དངོས་པོ་བསྒྲུབས་ཏེ་མཚན་དཀོན་མཆོག་འཇིགས་མེད་དབང་པོ་ཡེ་ཤེས་བརྩོན་འགྲུས་གྲགས་པའི་སྡེ་ཞེས་བསྩལ། ལོ་དེའི་ཟླ་བརྒྱད་པར་པེ་ཅིན་དུ་བྱོན་ནས་བོད་ལུགས་ཀྱི་དགོན་སྡེ་མང་པོ་གསར་དུ་བཞེངས། དགུང་ལོ་ཞེ་གཅིག་པར་སླར་དབུས་སུ་ཕེབས། གོང་ས་རྒྱལ་བའི་དབང་པོ་བརྒྱད་པ་ངག་དབང་བློ་བཟང་འཇམ་དཔལ་རྒྱ་མཚོ་རྒྱལ་བའི་སྤྲུལ་སྐུར་ངོས་འཛིན་གྱི་མཛད་སྒོ་གཙོ་སྐྱོང་གནང་ཞིང༌། རྒྱལ་བའི་དབང་པོ་ངག་དབང་བློ་བཟང་བསྐལ་བཟང་རྒྱ་མཚོའི་རྣམ་ཐར་བརྩམས།
ཤིང་སྤྲེལ་ཏེ་ཕྱི་ལོ་༡༧༦༤ ལོར་དགོན་ལུང་གི་ཁྲི་པ་མཛད་ནས་ཚད་མ་རྣམ་འགྲེལ་གྱི་འཛིན་གྲྭ་གསར་དུ་བཙུགས། མེ་ཕག་སྟེ་ཕྱི་ལོ་༡༧༦༧ ལོར་རི་བོ་རྩེ་ལྔར་ཕེབས་ནས་ཨེ་ཝཾ་དགའ་འཁྱིལ་ཞེས་པའི་སྒྲུབ་ཁང་བཏབ། དགུང་ལོ་ང་ལྔ་པ་ལྕགས་ཡོས་ཏེ་ཕྱི་ལོ་༡༧༧༡ ལོར་གོང་མའི་ངོ་སྐུལ་ལྟར་བཀའ་འགྱུར་ཆེན་མོ་མན་ཇུའི་སྐད་དུ་བསྒྱུར་བའི་དབུ་ཚུགས་ཏེ་བླ་མ་མཁས་པ་དང་ཡོན་ཏན་ཧ་ཅང་བཟང་བའི་ལོ་ཙཱ་བ་བསྡུས་ཏེ་བསྒྱུར།
དགུང་གྲངས་བདུན་ཅུ་ལ་ཕེབས་པ་རབ་བྱུང་བཅུ་གསུམ་པའི་མེ་རྟ་སྟེ་ཕྱི་ལོ་༡༧༨༦ ལོའི་བོད་ཟླ་བཞི་པའི་ཚེས་གཉིས་ཉིན་གནས་མཆོག་རི་བོ་རྩེ་ལྔའི་ཨེ་ཝཾ་དགའ་འཁྱིལ་གླིང་དུ་རེ་ཞིག་གཟུགས་སྐུའི་བཀོད་པ་ཆོས་དབྱིངས་སུ་བསྡུ་བའི་ཚུལ་མཛད་དོ། །
བདག་ཉིད་ཆེན་པོ་འདིའི་གསུང་ལས་སྐྱེས་པའི་སློབ་མ་ལ་ཡང༌། དམ་པའི་སྐྱེས་རབས་འཛིན་པའི་སྤྲུལ་སྐུ་དང༌། ཆོས་ཀྱི་གདན་ཁྲིར་བཞུགས་པའི་བླ་ཆེན། བཀའ་པོད་གཞུང་ལུགས་སྦྱངས་པའི་དགེ་བཤེས། སྒྲུབ་པ་སྙིང་པོར་མཛད་པའི་རྣལ་འབྱོར་བ། བརྡ་སྤྲོད་སྐད་གཉིས་སྨྲ་བའི་ལོ་ཙཱ་བ། མདོ་སྡེའི་གཞུང་ལ་མཁས་པའི་ཧྭ་ཤང༌། དད་པའི་ནོར་གྱིས་ཕྱུག་པའི་སྦྱིན་བདག་སོགས་མཐའ་དབུས་ནོར་འཛིན་གྱི་རྒྱ་ཁྱོན་གང་སར་ཁྱབ་བོ། །
གསུང་རྩོམ་ལ་ཡང༌། འདིར་བཀོད་པའི་དག་ཡིག་མཁས་པའི་འབྱུང་གནས་དང༌། ནང་དོན་རིག་པའི་སྐབས་སུ་བཀོད་པའི་ལྟ་མགུར་སོགས་ཀྱིས་མཚོན་པའི་གསུང་རྩོམ་ལ། གྲུབ་མཐའི་རྣམ་གཞག་ཐུབ་བསྟན་ལྷུན་པོའི་མཛེས་རྒྱན། བྱང་ཆུབ་ལམ་གྱི་སྒྲོན་མའི་ས་བཅད། བྱང་ཆུབ་ཀྱི་སེམས་བསྐྱེད་ཚུལ་བཤད་པ་ཐེག་ཆེན་འཇུག་སྒོ། གསང་འདུས་བསྙེན་ཡིག་དངོས་གྲུབ་བདུད་རྩིའི་བུམ་བཟང༌། ༸རྒྱལ་དབང་ཐམས་ཅད་མཁྱེན་པ་བསྐལ་བཟང་རྒྱ་མཚོའི་རྣམ་ཐར་དཔག་བསམ་རིན་པོ་ཆེའི་སྙེ་མ་སོགས་ཚད་ལྡན་གྱི་བསྟན་བཅོས་གླེགས་བམ་ཆེ་བ་པོད་དགུར་ལོངས་པའི་ཕྱག་རྗེས་བསམ་མི་ཁྱབ་པ་མཛད་དོ།། །།
