ཁྲ་འབྲུག་གཙུག་ལག་ཁང་གི་ངོ་སྤྲོད་སྙིང་བསྡུས།

ཁྲ་འབྲུག་གཙུག་ལག་ཁང་གི་ངོ་སྤྲོད་སྙིང་བསྡུས།

༡༽ ཁྲ་འབྲུག་གཙུག་ལག་ཁང་ཡུལ་གང་དུ་སུས་ནམ་ཞིག་དགོས་པ་གང་གི་ཆེད་དུ་བཞེངས་པ་ནི། དེང་སང་བོད་རང་སྐྱོང་ལྗོངས་ལྷོ་ཁ་ས་ཁུལ་སྣེ་གདོང་རྫོང་གི་ཁོངས་ཀྱི་རྩེད་ཐང་གོང་པོ་རིའི་ལྷོ་ནུབ་མཚམས་སུ་ཆགས་པའི་རྩེད་ཐང་གྲོང་ཚོའི་ཤར་ལྷོའི་མཚམས་སུ་རྐང་ཐང་ལ་ཆུ་ཚོད་གཉིས་མ་ཟིན་ཙམ་སོང་བའི་ཐང་དཀྱིལ་དུ་ (རྩེད་ཐང་ནས་ཡར་ཀླུངས་ཕྱོགས་སུ་འཁོར་ལམ་དེད་སྤྱི་ལེ་བཞི་ཙམ་སར།) ཁྲ་འབྲུག་གྲོང་དབུས་སུ་གཙུག་ལག་ཁང་དེ་ཆགས་ཡོད།

ཕྱི་ལོའི་དུས་རབས་བདུན་པའི་དུས་དཀྱིལ་དུ་ཆོས་རྒྱལ་སྲོང་བཙན་སྒམ་པོས་ར་ས་འཕྲུལ་སྣང་གི་གཙུག་ལག་ཁང་བཞེངས་རྒྱུའི་དགོངས་བཞེས་བཞིན་སྐབས་སུ། རྒྱ་བཟའ་ཀོང་ཇོའི་སྤོར་ཐང་གི་རྩིས་ཀྱི་ས་དཔྱད་བརྟག་པ་ལྟར། བོད་ཀྱི་ཡུལ་འདི་སྲིན་མོ་གན་རྐྱལ་དུ་ཉལ་བའི་གཟུགས་ཀྱི་སྟེང་གནས་ཤིང་། དེའི་བགེགས་སེལ་དང་རྐྱེན་བཟློག་གི་སླད་དུ་ཚིགས་ཆེན་བརྒྱད་དང་། མཐིལ་བཞི་བཅས་གནོན་ཕྱིར་སྔོན་འགྲོར་བཞེངས་པའི་ལྷ་ཁང་སྟེ། མཐའ་འདུལ་གྱི་གཙུག་ལག་བཞི། ཡང་འདུལ་གྱི་གཙུག་ལག་ཁང་བཞི། རུ་གནོན་གྱི་གཙུག་ལག་ཁང་བཞི་བཅས་གཙུག་ལག་ཁང་བཅུ་གཉིས་བཞེངས་དགོས་པ་རྩིས་འབྲས་སུ་བབས་པ་ལྟར། གཡོ་རུ་མཐའ་འདུལ་གྱི་གཙུག་ལག་ཁང་བཞིའི་ཡ་གྱལ་དང་། ཆོས་རྒྱལ་སྲོང་བཙན་སྒམ་པོའི་ཐུགས་དམ་གྱི་སྙིང་པོ་ལྷ་ཁང་བཅུ་གཉིས་ཀྱི་ནང་ནས་ཀྱང་ཐོག་མའི་གཙུག་ལག་ཁང་དེ་ཡིན་པས། ལོ་ངོ་ ༡༣༠༠ ལྷག་གི་ལོ་རྒྱུས་ཡོད་པར་མ་ཟད། ཡར་ཀླུང་རྟེན་གསུམ་གནས་ཡུལ་གྱི་ཡ་གྱལ་ཞིག་ཀྱང་ཆགས་ཡོད།

གཙུག་ལག་ཁང་འདི་ནི་བོད་དུ་ནང་པ་སངས་རྒྱལ་ཆོས་ལུགས་ཀྱི་ལྷ་ཁང་ཡོངས་ནས་རྩ་ཆེར་བརྩི་བཞིན་ཡོད་ལ། ཆོས་འབྱུང་མཁས་པའི་དགའ་སྟོན་ལས། བོད་ཀྱི་ལྷ་ཁང་བརྩིགས་པ་ལ་སྔ་ཞིང་། འཇིག་པ་ལ་འཕྱི་བ་ཡིན་ལ། རྒྱལ་པོའི་ཐུགས་དམ་གྱི་སྙིང་པོ་གཙུག་ལག་ཁང་ཐམས་ཅད་ཀྱི་རྩ་བ་ཡིན། ཞེས་གསལ་ལ། ཆོས་རྒྱལ་སྲོང་བཙན་སྒམ་པོ་རང་ཉིད་ནས་ཀྱང་། ངའི་ཐུགས་དམ་གྱི་ལྷ་ཁང་འདི་འཛམ་གླིང་ན་བྱིན་ཆེ་བ་ཡིན། འདི་ལ་དད་ཅན་གྱིས་མཆོད་པ་ཕུལ་ཏེ་གསོལ་བ་བཏབ་ན་ཅི་འདོད་ཀྱང་མི་འགྲུབ་པ་མི་སྲིད། ཅེས་ཞལ་བཞེས་ཀྱང་གནང་ཡོད་པའི་གཙུག་ལག་ཁང་གྲགས་ཅན་ཞིག་ཀྱང་ཡིན།

༢༽ ཁྲ་འབྲུག་ཅེས་པའི་མཚན་ཐོགས་ཚུལ། ཁྲ་འབྲུག་ཅེས་པ་སྲོག་ཆགས་གཉིས་ཀྱི་མིང་ཡིན་ཞིང་། དེ་ཡང་གཙུག་ལག་ཁང་བཞེངས་ཆེད་ཆོས་རྒྱལ་སྲོང་བཙན་སྒམ་པོ་ཐོག་མར་ཡར་ཀླུང་དུ་ཕེབས་ཏེ། ད་ལྟ་ཁྲ་འབྲུག་གཙུག་ལག་ཁང་ཆགས་ས་དེར་མཚོ་ཞིག་ཡོད་ཅིང་། མཚོ་དེར་ཀླུ་གདུག་པ་ཅན་ཞིག་གནས་ཡོད་པ་དེ་སུས་འདུལ་ནུས་པ་དེ་ལ་བྱ་དགའ་སྦྱིན་པའི་ཞལ་ལྕེ་བཅད་པས། སྔགས་པ་ཅོག་ལ་གཙུག་སྒྲ་གཙུག་སྣང་དང་། བོན་པོ་ཚེ་མི་སྣང་གྲགས་གཉིས་ཀྱིས་འདུལ་བར་ཞུས། དང་པོ་བོན་པོ་ཚེ་མི་ཡིས་འདུལ་བར་བརྩམས་ཀྱང་མ་ནུས། དེ་ནས་སྔགས་པ་ཅོག་ལ་གཙུག་སྒྲ་གཙུག་སྣང་གིས་རྩེད་ཐང་གོང་པོ་རིར་སྦྲུལ་གྱི་ཁ་གནོན་དུ་ཁྱུང་བསྒྲུབས་ནས་གྲུབ་རྟགས་ཐོན་པ་དང་། ལ་ལར་ཀླུ་གདུག་པ་ཅན་ཞིག་ཡོད་པ་མཁྱེན་ནས། རྩེད་ཐང་གོང་པོ་རིའི་རྩེར་སྲོང་བཙན་བྲག་ཕུག་ནང་རྟ་མགྲིན་བསྒྲུབས་ནས་གྲུབ་རྟགས་ཐོན་ནས་ས་འགུལ་བས་འདབས་ཆགས་བྱ་བྱིའུ་ཐམས་ཅད་ཀྱང་འཕུར། ནམ་མཁའ་ནས་བྱ་ཁྲ་འདྲ་བ་ལ་སྐད་འབྲུག་ལྟར་སྒྲོག་པ་ཞིག་བྱུང་སྟེ། མཚོའི་ནང་ནས་དུག་སྦྲུལ་མགོ་ལྔ་པ་ཞིག་ཐོན་པས་བྱ་ཁྲ་དེའི་གཤོག་པ་སྤུ་གྲི་འདྲ་བས་སྦྲུལ་མགོ་ལྔ་སྐད་ཅིག་གིས་བཅད་དེ་མཚོ་དེ་ཁྲག་ཏུ་གྱུར་ནས་རིམ་བཞིན་སྐམ་པའི་སྟེང་དུ་གཙུག་ལག་ཁང་དེ་ཉིད་དཔལ་གསང་བ་འདུས་པའི་ལྷ་བཅུ་དགུ་པའི་ལུགས་སུ་བཞེངས་པས་ན། ཀླུ་བཏུལ་བའི་བྱའི་མིང་གི་ཆ་ནས་ཡོངས་གྲགས་ཁྲ་འབྲུག་ཅེས་པའི་མཚན་དེ་ནས་བྱུང་ཞིང་། ཕྱིས་སུ་གྲོང་གི་མིང་ལའང་ཁྲ་འབྲུག་གྲོང་ཞེས་མིང་ཐོགས། མཚན་དངོས་ལ་བྱམས་པ་མི་འགྱུར་བའི་ལྷ་ཁང་དང་། མཚན་རྒྱས་པར་བྱམས་པ་མི་འགྱུར་ལྷུན་གྱིས་གྲུབ་པའི་གཡོ་རུ་གཙུག་ལག་ཁང་ཞེས་གྲགས་སོ།།

༣༽ གཙུག་ལག་ཁང་འདིའི་གྲུབ་ཆ་གཙོ་བོ། མཆོད་ཁང་ཆེན་མོའམ་སྒྲོལ་མ་ལྷ་ཁང་ཡིན་ཞིང་། དེའིི་རྒྱ་ཁྱོན་ཀ་བ་བཞི་ལྡན་གྱི་ནང་རྟེན་གཙོ་བོ་ནི། ཆོས་རྒྱལ་སྲོང་བཙན་སྒམ་པོའི་སྐུ་དུས་ལ་རྩེད་ཐང་གོང་པོ་རི་ནས་སྤྱན་དྲངས་པའི་རྒྱལ་བ་རིགས་ལྔའི་རྡོ་སྐུ་རང་བྱོན་རྣམ་སྣང། འོད་དཔག་མེད། རིན་ཆེན་འབྱུང་གནས་བཅས་བོད་ཀྱི་རྡོ་བརྐོས་སྐུ་བརྙན་དང་པོར་གྲགས་པ་རྣམས་དང་། འཁོར་དུ་རྒྱུ་ལི་མ་ལས་གྲུབ་པའི་ཉེ་བའི་སྲས་ཆེན་བརྒྱད་དང་། ལྷག་པར་རྟེན་གཙོ་སྒྲོལ་མ་གསུང་བྱོན་མའམ་ཞལ་ཟས་མ་དང་། ཁྲོ་བོ་གཉིས་བཅས་བཞུགས།

གཞན་ཡང་དགའ་ལྡན་ལྷ་ཁང་དང་། བཅུ་གཅིག་ལྷ་ཁང་། རབ་སྟོན་ལྷ་ཁང་། འོད་དཔག་ལྷ་ཁང་། ཆོས་རྒྱལ་ལྷ་ཁང་། ཐུགས་རྗེ་ལྷ་ཁང་། ཚེ་དཔག་ལྷ་ཁང་། བདེ་གཤེགས་ལྷ་ཁང་། ཨོ་རྒྱན་ལྷ་ཁང་། མཐོང་གྲོལ་ལྷ་ཁང་། མགོན་ཁང་སོགས་ལྷ་ཁང་བཅུ་དྲུག་ལས་གྲུབ་པའི་གཙུག་ལག་ཁང་ཞིག་ཡིན་པ་དང་། གཙུག་ལག་ཁང་འདིའི་ནང་ཆོས་རྒྱལ་སྲོང་བཙན་སྒམ་པོ་དང་། རྒྱ་བཟའ་ཀོང་ཇོ་རྣམ་གཉིས་ཡུན་རིང་བཞུགས་མྱོང་ཡོད་པས། ཁོང་རྣམ་གཉིས་ཀྱི་གཟིིམ་ཁང་དང་། རྒྱ་བཟའ་ཀོང་ཇོའི་གསོལ་ཐབ་སོགས་དུས་ད་ལྟའང་མཇལ་རྒྱུ་ཡོད་ཅིང་། ཁོང་རྣམ་གཉིས་དབྱར་ཁ་ཡུམ་བུ་བརླ་མཁར་དུ་བཞུགས་པ་དང་། དགུན་ཁ་ཁྲ་འབྲུག་གཙུག་ལག་ཁང་དུ་བཞུགས་སྲོལ་ཡོད་པས་ངག་རྒྱུན་དུ་ཕོ་བྲང་དབྱར་ས་དགུན་ས་གཉིས་ཞེས་ཞུ།

༤༽ ཁྱད་དུ་འཕགས་པའི་ནང་རྟེན་བྱིན་ཅན། གཙུག་ལག་ཁང་འདི་གསར་བཞེངས་ལེགས་གྲུབ་ཟིན་རྗེས། ནང་རྟེན་གང་ཞིག་བཞུགས་སུ་གསོལ་ན་ལེགས་མིན་དགོངས་བཞེས་གནང་བཞིན་པའི་སྐབས་སུ། ནུབ་གཅིག་གཟིགས་སྣང་དུ་རྩེད་ཐང་གོང་པོ་རིར་རྒྱལ་བ་རིགས་ལྔ་བཞུགས་པ་རྨིས། སང་ཞོགས་གཟིགས་ཞིབ་གནང་སྐབས་ཚང་མ་འོད་ཟེར་འཕྲོ་བཞིན་བཞུགས་པ་མཇལ་བས་དེ་རྣམས་སྤྱན་དྲངས་ས་བཞུགས་སུ་གསོལ་ཞིང་། དེ་ཡང་རྡོ་རྐུ་རྣམས་ཐོག་མར་རང་བྱོན་ཡིན་པས་བཟོ་བཀོད་ཡག་པོ་མེད་པ་ལ་བཟོ་ཡི་རྒྱལ་པོ་བི་ཤུ་ཀརྨས་སྤྱན་ཕྱེས་སྐབས་སྐུ་ལ་ཐོར་བའི་རྡོ་ཕྱེ་ལས་འོད་འཕྲོ་བ་དེ་དག་རིང་སྲེལ་དུ་གྱུར་པ་དང་། བཟོ་བོའི་ལག་རྩག་ལས་འདས་པ་ཞིག་ཆགས་པར་གྲགས། ཡང་ཛྷེེ་ཀྵིམ་གྱི་སྒྲོལ་མ་གསུང་འབྱོན་མ་དང་། ཉེ་སྲས་བརྒྱད་སོགས་བལ་ཡུལ་ནས་གདན་དྲངས། ཐོག་མར་ཁྲུ་གང་ལས་མེད་པ་ཚང་མ་བལ་ཡུལ་ནས་འཕུར་ཕེབས། དེ་ནས་ད་ལྟ་ལུག་གདོང་ཞེས་པའི་ས་དེར་མི་ཚད་མ་རེ་ལུག་བཀྱོན་ནས་དེ་དག་གི་ཐུགས་ཀར་ཕུལ་ནས་བཞེངས་པར་གྲགས།

ལྷག་པར་དུ་སྒྲོལ་མ་གསུང་འབྱོན་མ་ནི། གོང་གསལ་སྐུ་རྟེན་དེ་དག་ལྷ་ཁང་དུ་གདན་འདྲེན་པའི་ཚེ་སྒྲོལ་མས། ཡར་ཕེབས། ཡར་ཕེབས། ཞེས་གསུངས་ནས་མཐར་ཁོང་རང་བཞུགས་ས་མེད་པར་སྒོ་རྒྱབ་ཏུ་བཞུགས་དགོས་བྱུང་། ཕྱག་གཉིས་ཀྱང་ཡར་ཕེབས་ཞེས་པའི་ཕྱག་རྒྱའི་ཚུལ་ལྟར་ཡོད།

ལྷ་ཁང་འདིའི་དབུས་ཀྱི་གཙང་ཁང་དབུས་མ་ཀ་བཞི་མའི་ནང་དུ་སྔོན་དུས་སུ་རྟེན་གཙོ་གསང་འདུས་འཇམ་དཔལ་རྡོ་རྗེ་དང་། གཡས་སུ་རྣམ་སྣང་དང་། འོད་དཔག་མེད། གཡོན་དུ་མི་བསྐྱོད་པ་སོགས་བཅུ་གསུམ། རིན་འབྱུང་དང་དོན་གྲུབ་གཉིས་རྩེ་ཐང་གོང་པོ་རི་ནང་བཞུགས་པའི་ཚབ་ཏུ་༸རྒྱལ་དབང་ལྔ་པ་ཆེན་པོ་ངག་དབང་བློ་བཟང་རྒྱ་མཚོ་མཆོག་ནས་སྐུ་རྒྱུ་ལི་མ་ལས་བཞེངས་གནང་མཛད་པ་རིན་འབྱུང་དང་དོན་གྲུབ་གཉིས། ལི་ཡུལ་ནས་གདན་དྲངས་ཤིང་སྲོང་བཙན་སྒམ་པོར་གསུང་བྱོན་པར་གྲགས་པའི་སྒྲོལ་མ་ཞལ་ཟས་མ་བཅས་བཞུགས་ཡོད།

ཁྲ་འབྲུག་ལྷ་ཁང་གི་རྟེན་གཙོ་རྡོ་རྐུ་རང་བྱོན་རྒྱལ་བ་རིགས་ལྔ་དེ་དག་ནི། རྩེད་ཐང་གོང་པོ་རི་ནས་གདན་དྲངས་པ་ཞིག་ཡིན་ལ། དེ་ནི་བོད་ཀྱི་རྡོ་བརྐོས་སྐུ་བརྙན་དང་པོ་དེ་ཡིན། དེ་ཡང་ཤོད་རྒྱུན་དུ་ཆོས་རྒྱལ་སྲོང་བཙན་སྒམ་པོའི་བཀའ་བཀོད་འོག་མང་ཚོགས་ཧ་ཅང་པོས་རི་རྩེ་ནས་རྡོ་སྐུ་རྣམས་འགྱོགས་ཁྲིའི་སྟེང་དུ་གདན་དྲངས་ནས་རི་སྐེད་ཙམ་ལ་སླེབས་དུས། ཚང་མ་དཀའ་སྡུག་གི་མནར་ཏེ་རི་སུལ་ཞིག་ཏུ་ངལ་གསོ་རྒྱག་སྐབས་སྲོང་བཙན་སྒམ་པོ་སྐུ་ངོ་མས་ཕྱག་ཏུ་གྲོ་སོ་ཕྱེ་མར་བསྣམས་ནས་ས་ཆ་དེར་རྟེན་གཙོ་ཕེབས་བསུར་བྱོན་པས། ཕྱིས་སུ་ས་ཆ་དེར་དགོན་ཞིག་ཕྱག་བཏབ་པའི་མིང་ལའང་གྲོ་སོ་དགོན་ཞེས་མཚན་ཐོགས་པར་གྲགས། ད་ལྟ་དགོན་པ་དེ་བསྡད་ཀྱང་གྱང་རོ་དེར་གྲོ་སོ་དགོན་པ་ཞེས་བརྗོད་མུས་ཡིན།

དེ་ནས་མི་རྣམས་ཀྱིས་ས་ཆ་དེ་ནས་རྟེ་གཙོ་མུ་མཐུད་གདན་འདྲེན་ཞུ་རྩིས་བྱེད་སྐབས་གློ་བུར་དུ་གསུང་བྱོན་ཏེ། ད་འཁུར་མི་དགོས། ང་ཚོས་འཕུར་ནས་ཕྱིན་ཆོག ཅེས་གསུང་བྱོན་པ་དང་གནམ་ལ་འཕུར་ནས་ཡར་ཀླུང་ལ་བསྐོར་བ་གཅིག་བསྐྱོན་ནས་ཁྲ་འབྲུག་གི་ཕྱོགས་སུ་བྱོན་པའི་སྐབས་སུ་བུད་མེད་དར་མ་གཅིག་གིས་མཇལ་བས། རྡོ་ཆེན་གནམ་ལ་འཕུར་བ་ཡ་མཚན་ལ། ཞེས་སྨྲས་པས། རྡོ་སྐུ་གཅིག་གནས་དེ་རང་ལ་འཁར་བས། ཕྱིས་སུ་གྲོང་ཚོ་དེའི་མིང་ལའང་ལྷའི་གདོང་བཀག་པས་འཁར་བ་སྟེ། གདོང་འཁར་ཞེས་ཟེར་གྱི་ཡོད།

གཙང་ཁང་གི་གཡས་སུ་ཡོད་པའི་དཀོར་མཛོད་དམ་ཆོས་རྒྱལ་ལྷ་ཁང་ནང་བཙན་པོའི་སྐབས་བཞེངས་པར་གྲགས་པའི་ཆོས་རྒྱལ་སྲོང་བཙན་སྒམ་པོ་དང་། རྒྱ་བཟའ་ཝུན་ཤིང་ཀོང་ཇོ། བལ་བཟའ་ཁྲི་བཙུན། བློན་ཆེན་མགར་སྟོང་བཙན། སློབ་དཔོན་ཐུ་མི་སམ་བྷོ་ཊ་བཅས་རྒྱལ་བློན་རྣམས་ཀྱི་འཇིམ་སྐུ་མི་ཚད་ཙམ་རེ་བཞུགས་སུ་གསོལ་ཡོད་པ་དང་། ཕྱིས་སུ་གསར་བཞེངས་ལྷ་སྐུ་ཁ་ཤས་བཞུགས་སུ་གསོལ་ཡོད།

དཀོར་མཛོད་གཡོན་ཆོས་རྒྱལ་སྲོང་བཙན་གྱི་གསོལ་ཐབ་ཏུ་གྲགས་པར། སྤྱན་རས་གཟིགས་འགྲོ་འདུལ་དང༌། ཛམ་བྷ་ལ། ཡུམ་ཡི་གེ་དྲུག་མ། སྲས་དང་སྲས་མོའི་སྐུ་བརྙན། ཕྱི་ཁྱམས་སུ་ཐུ་མི་སམ་བྷོ་ཊས་གསེར་བྲེ་བདུན་གྱིས་བྲིས་གནང་མཛད་པའི་མ་ཎི་ཡིག་དྲུག་ཨོཾ་ལ་རིང་ཆ་ཡོད་ཅིང༌། ཡིག་འབྲུ་རེར་རིང་ཚད་མཐོ་གང་ཙམ་ཡོད་པ་སོགས་གནའ་རབས་ཀྱི་རིག་དངོས་རྩ་ཆེན་ཤིན་ཏུ་མང༌དུ་ཡོད། དེང་སྐབས་གཙུག་ལག་ཁང་འདིའི་སྟེང་ཐོག་གི་ལྷ་ཁང་ནང་སྐུ་རྒྱུ་ཤིང་ཏ་ལའི་ལོ་མ་ལས་གྲུབ་པའི་ཁ་ཆེ་པཎ་ཆེན་ཤཱཀྱ་ཤྲཱིའི་ཡི་དམ་རྩོད་རྒྱལ་མར་གྲགས་པ་དེ་དང་། མུ་ཏིག་གི་ཞལ་ཐང་ལ་སོགས་པའི་རྟེན་བྱིན་ཅན་མང་པོ་དང་། གཞན་ཡང་མ་ཎི་ཡིག་དྲུག་རང་བྱོན་བཅས་བཞུགས་ཡོད།

༥༽ རྒྱ་སྐྱེད་དང་ཉམས་གསོའི་རིམ་པ་ཇི་བྱུང་། ཆོས་རྒྱལ་སྲོང་བཙན་སྒམ་པོ་ནས་བཟུང་སྟེ་བོད་ཀྱི་རྒྱལ་རབས་རིམ་བྱོན་རྣམས་ཀྱིས་སྲི་ཞུ་བཀུར་སྟི་རྒྱ་ཆེར་གནང་བ་དང་། ལྷག་པར་༸རྒྱལ་མཆོག་ལྔ་པ་ཆེན་པོ་མཆོག་ནས་གསེར་ཟངས་ཀྱི་རྒྱ་ཕིབས་གསར་བཞེངས་གནང་བ་དང་། ༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་དང་། རྒྱལ་ཚབ་རྭ་སྒྲེང་རིན་པོ་ཆེ་མཆོག་བཅས་ནས་གསེར་གྱི་དབུ་རྒྱན་དང་། སྙན་རྒྱན། མགུལ་རྒྱན་གསེར་གྱི་ཚེ་བུམ་སོགས་འབུལ་གནང་སྦྱོར་འཇགས་མཛད་ཡོད།

ཁྲ་འབྲུག་གཙུག་ལག་ཁང་འདི་ལོ་རྒྱུས་ཤིན་ཏུ་རིང་བའི་རིག་དངོས་ཤུལ་བཞག་རྩ་ཆེན་ཞིག་ཡིན་སྟབས། ཕྱི་ལོ་ ༡༩༦༡ ལོ་ནས་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོབ་སྡེ་ཚན་ཁོངས་སུ་ཚུད་ཡོད། འོན་ཀྱང་རིག་གནས་གསར་བརྗེའི་ནང་གཏོར་བཤིག་ཚབས་ཆེན་ཕོགས་ནས་རྟེན་དང་བརྟེན་པར་བཅས་པ་རྩ་མེད་ལྟ་བུར་གྱུར་ཀྱང་། བོད་རིགས་དད་ལྡན་མང་ཚོགས་དང་། འབྲེལ་ཡོད་རྣམས་ནས་སྔར་གྱི་བཟོ་བཀོད་གཞིར་བཟུང་ཉམས་གསོ་གནང་དང་གནང་བཞིན་པ་ཆགས་ཡོད།

ཉམས་གསོ་གནང་བའི་རྒྱལ་བ་རིགས་ལྔའི་ལྷ་ཁང་ནང་སྔོན་གྱི་རྡོ་སྐུར་ཉམས་གསོ་ཞུས་པ་རྣམས་དང་། གསར་བཞེངས་སྒྲོལ་མ་གསུང་འབྱོན་དང་། ཉེ་བའི་སྲས་ཆེན་བརྒྱད། རྩེ་ཚོགས་པའི་མུ་ཏིག་གི་ཞལ་ཐང་། ཡར་ཀླུང་ཤེལ་བྲག་གི་གུ་རུ། རྒྱ་བཟའི་ཕྱག་བཟོ་ཐུབ་དབང་འཐག་གྲུམ་མ། མཁའ་འགྲོ་འབུམ་གྱི་དབུ་སྐྲས་བཞེངས་པའི་སྤྱན་རས་གཟིགས་སེམས་ཉིད་ངལ་གསོའི་སྐུ་ཐང་སོགས་མཇལ་རྒྱུ་ཡོད། གཙུག་ལག་ཁང་འདི་སྔར་རྩེད་ཐང་རྩེ་ཚོགས་པའི་དགོན་ལག་ཡིན་ཡང་། ཕྱོགས་མཐའ་ཁག་ནས་བཞུགས་མཁན་ཡང་མང་པོ་ཡོད།

༦༽ གཙུག་ལག་ཁང་འདིའི་ལྡེབས་དང་མཆོད་རྟེན་སྐོར། གཙུག་ལག་ཁང་ཁང་འདིར་འཁོར་ས་ཕྱི་ནང་གཉིས་ཡོད་པ་ལས། འཁོར་ས་ནང་མའི་སྐྱ་ལྡེབས་སུ་མདོ་སྡེ་ལས་བྱུང་བའི་རྟོགས་བརྗོད་ཁག་དང་། ༸རྒྱལ་དབང་ལྔ་པ་ཆེན་པོ། གུ་ཤྲཱི་བསྟན་འཛིན་ཆོས་རྒྱལ། ༸མི་དབང་སྡེ་སྲིད་སངས་རྒྱས་རྒྱ་མཚོ་བཅས་ཀྱི་སྐུ་བརྙན་ཡང་འབྲི་བཞེངས་གནང་ཡོད། དེ་བཞིན་བཅུ་གཅིག་ལྷ་ཁང་དང་། རབ་སྟོན་ལྷ་ཁང་སོ་སོའི་འགྲམ་དུ་མཆོད་རྟེན་རེ་ཡོད་པ་དེ་ནི་ཆོས་རྒྱལ་སྲོང་བཙན་སྒམ་པོ་སྐུ་མཚམས་ལ་བཞུགས་སྐབས་ཀྱི་མཚམས་རྡོ་ཡིན་པར་གྲགས།

༧༽ ཁྲ་འབྲུག་མུ་ཏིག་ཞལ་ཐང་། དེ་ཡང་ལྷོ་ཁ་ཁྲ་འབྲུག་གཙུག་ལག་ཁང་གི་ནང་རྟེན་སྙན་གྲགས་ཅན་མུ་ཏིག་གི་ཞལ་ཐང་ནི། འཛམ་གླིང་ཐོག་གི་མུ་ཏིག་ཐང་ག་ཆེ་ཤོས་དེ་ཡིན། མུ་ཏིག་གི་ཞལ་ཐང་འདི་ཉིད་ཐོག་མར་རྩེད་ཐང་རྩེ་ཚོགས་པའི་དགོན་པའི་ནང་རྟེན་གཙོ་བོའི་གྲས་སུ་བཞུགས་ཤིང་། སྐུ་རྒྱུ་མུ་ཏིག་ལས་བཞེངས་པའི་སྤྱན་རས་གཟིགས་སེམས་ཉིད་ངལ་གསོའི་ཞལ་ཐང་ཞིག་ཡིན་ལ། ཞལ་ཐང་འདིའི་མཐོ་ཚད་ལ་མི་ཏྲར་ ༢ དང་། ཞེང་ཚད་ལ་མི་ཏྲ་ ༡.༢ ཡོད། ཞལ་ཐང་འདིའི་སྐུ་ལུས་ཚང་མ་མུ་ཏིག་ལས་གྲུབ་ཡོད་པ་དང་། བཟོ་རྩལ་དང་བྱུང་རབས་སོགས་ཀྱི་ཐད་ནས་རིན་ཐང་གཞལ་དུ་མེད་པའི་རིག་དངོས་རྩ་ཆེན་ཞིག་ཆགས་ཡོད།

འོན་ཀྱང་རྒྱལ་ཕུང་དམངས་གནོད་ཀྱི་རྙིང་བཞི་རྩ་གཏོར་ཞེས་པའི་རིག་གནས་གསར་བརྗེའི་དུས་ཟིང་ནང་ཞལ་ཐང་འདི་ལ་ཉམས་ཆག་ཆེན་པོ་བྱུང་ཡོད་ཀྱང་། སྔར་ཡོད་ཞལ་ཐང་གི་གཡས་གཡོན་གོས་ཆེན་དང་། སྲོག་ཤིང་གསེར་གྱི་རལ་གྲི་བཞུགས་པ་དེ་དག་རྨང་གཞིར་བྱས་ཏེ་ཕྱི་ལོ་ ༡༩༨༢ ལོར་སྐབས་དེའི་ལྷོ་རྒྱུད་དུ་སྙན་གྲགས་ཆེ་བའི་བྲིས་འབུར་གཉིས་ལ་མཁས་པ་རྒན་ཚེ་དབང་རྡོ་རྗེ་ལགས་ནས་ཉམས་གསོའི་ཐུགས་འགན་བཞེས་ནས་མུ་ཏིག་རྡོག་ ༢༩༩༢༩ དང་། དེ་བཞིན་རྡོ་རྗེ་ཕ་ལམ་དང་། པདྨ་རཱ་ག །མུ་མེན། གཡུ་བྱུར་གསེར་ལ་སོགས་པ་རིན་ཆེན་དུ་མ་ལས་གྲུབ་པའི་སྔར་ཡོད་བཞིན་འདྲ་བཞེངས་མཛད་པ་དེང་སྐབས་ང་ཚོའི་མིག་ལམ་དུ་མཇལ་རྒྱུ་ཡོད་པ་དེ་ཡིན་ལ། སྔོན་རྩེ་ཚོགས་པའི་ནང་རྟེན་ཡིན་པ་ལ། ད་ལྟ་ཁྲ་འབྲུག་དགོན་ནས་བདག་སྐྱོང་གནང་བཞིན་ཡོད།

༨༽ མུ་ཏིག་ཞལ་ཐང་འབྱུང་ཁུངས། ཞལ་ཐང་དེའི་འབྱུང་ཁུངས་ཐད་ད་ཕན་ཡིག་ཐོག་གི་དཔྱད་གཞི་མ་མཐོང་ཡང་། དམངས་ཁྲོད་ཀྱི་བཤད་སྲོལ་ཞིག་ལ། སྣེ་གདོང་རྩེ་ཚོགས་པའམ། མཚན་རྒྱས་པར་རྩེ་ཚོགས་དགའ་ལྡན་བྱང་གྲོལ་བདེ་ཆེན་གླིང་གི་རྩ་ཆེའི་ནང་རྟེན་གྲགས་ཅན་སྒྲོལ་མ་ཕྱག་བཞི་མའམ་སྒྲོལ་མ་གསུང་བྱོན་མ་ཞིག་ཡོད། དེ་ནི་སྔོན་རྒྱ་གར་དུ་ཁ་ཆེ་པཎ་ཆེན་ཤཱཀྱ་ཤྲཱི་མཆོག་དང་མུ་སྟེགས་པ་གཉིས་རྩོད་པ་ཉིན་བདུན་བསྐྱོན་དུས་ཉིན་ལྔ་རིང་ཁ་ཆེ་པཎ་ཆེན་རྩོད་པ་ཕམ་པས། ཐུགས་ཡིད་མུག་སྟེ་ཤིང་ཏ་ལའི་སྡོང་པོ་ཞིག་ལ་སྐུ་བསྙེས་ནས་བཞུགས་པའི་དུས་སུ་སྡོང་པོ་དེའི་ལོ་མ་ཞིག་ས་ལ་ལྷུང་བ་ཡར་བསྒྲུགས་ནས་གཟིགས་སྐབས་ལོ་མ་དེའི་ངོས་ལ་སྒྲོལ་མ་ཕྱག་བཞི་མ་རང་བྱོན་ཞིག་ཡོད་པ་དེས། པཎ་ཆེན། པཎ་ཆེན། ཁྱོད་ཀྱིས་སྔར་བཞིན་རྩོད་ཅིག །ཅེས་གསུང་བྱོན་པ་ལྟར། རྩོད་པ་བསྐྱོན་པས་པཎ་ཆེན་རྒྱལ། སྒྲོལ་མ་དེའི་མཚན་ལའང་སྒྲོལ་མ་རྩོད་རྒྱལ་ཞེས་གསོལ། ཕྱིས་སུ་གནས་སྐབས་ཐམས་ཅད་ལ་པཎ་ཆེན་གྱི་བྱ་དཀའ་བའི་བླང་དོར་ཐམས་ཅད་སྒྲོལ་མ་དེ་རང་གིས་སྟོན་པར་གནང་གི་ཡོད། ཁ་ཆེ་པཎ་ཆེན་བོད་དུ་ཕེབས་སྐབས་ལྷན་དུ་བསྣམས་ཕེབས་ཤིང་། མཐར་པཎ་ཆེན་ཤཱཀྱ་ཤྲཱི་བོད་ནས་ཁོང་གི་འཁྲུངས་ཡུལ་ཁ་ཆེར་ཕེབས་པར་ཉེ་བའི་ཚེ་སྲས་ཀྱི་ཐུ་བོ་མཁན་ཆེན་རྡོ་རྗེ་དཔལ་ལ་སྒྲོལ་མ་རང་བྱོན་མ་དེ་རྟེན་སྐལ་དུ་གནང་། དེ་ནས་བཟུང་སྣེ་གདོང་རྩེ་ཚོགས་པའི་དགོན་པར་ཉིན་ལྟར་སྒྲོལ་མ་ཉེར་གཅིག་ཚར་གཅིག་མ་ཆག་པ་འདོན་སྲོལ་ཆགས་པ་རེད། སྣེ་གདོང་གི་མི་སེར་མང་པོས་ཀྱང་སྒྲོལ་མ་སྐྱོར་བར་ཡོང་གི་ཡོད་ཅིང་། སྒྲོལ་མ་ཉེར་གཅིག་རྫོགས་མཚམས་སུ་ཕྱག་འཚལ་བ་ནི། ཞེས་བཏོན་ནས་ཁ་ཁུ་སིམ་མེར་བསྡད་ན། ཉི་ཤུ་རྩ་གཅིག་ཅེས་སྒྲོལ་མ་དེས་གསུང་བྱོན་གྱི་ཡོད་པས། སྣེ་གདོང་རྒྱལ་པོའི་བཙུན་མོ་རབ་ཏུ་དད་དེ་ཞལ་གསེར་སྤུས་ལེགས་མཐུག་པོ་ཞིག་བསྒྲོན་པས། དེ་ནས་བཟུང་སྒྲོལ་མས་གསུང་མ་བྱོན་སྟབས། མཐོལ་བཤགས་ཀྱི་ཚུལ་དུ་རང་གི་རྒྱན་ཆ་བཤིག་སྟེ་གཙོ་བོ་མུ་ཏིག་ལས་གྲུབ་པའི་སྤྱན་རས་གཟིགས་སེམས་ཉིད་ངལ་གསོའི་ཞལ་ཐང་འགྲན་ཟླ་མེད་པ་ཞིག་བཞེངས་པ་ད་ལྟ་ཁྲ་འབྲུག་མུ་ཏིག་ཞལ་ཐང་ཞེས་པ་དེ་ཡིན་ནོ།།  །།

བྱམས་པ་མི་འགྱུར་བའི་ལྷ་ཁང༌།

དེ་ཡང་དཔའ་བོ་གཙུག་ལག་ཕྲེང་བས་མཛད་པའི་ཆོས་འབྱུང་མཁས་པའི་དགའ་སྟོན་ལས[1]། ནུབ་ཕྱོགས་སུ་མཆོད་རྟེན་ཀྲེ་རུ་བརྩིགས་ནས་ནུབ་ཀྱི་ས་དགྲ་གནོན་པ་སོགས་ས་དགྲ་བཞི་མནན། དེ་རྗེས་ལྷ་ཁང་གི་རྨང་བཏིང་པས་ཡང་ཞིག་ནས་སྲིན་མོའི་དཔུང་པ་གཡོན་གནོན་པའི་ཕྱིར་ཡར་ལུངས་སུ་བྱོན་ཏེ་མཚོ་སོགས་ཁ་མི་ཆེ་བ་ཞིག་ལ་ཀླུ་གདུག་པ་ཅན་གནས་པ་དེ་སྐམ་པའི་ཤུལ་དུ་རྩིག་དགོས་པར་དགོངས་ཏེ་བོད་འབངས་བསགས་ནས་ཀླུ་འདི་སུས་འདུལ་ནུས་པ་ལ་བྱ་དགའ་ཆ་ཐང་དུ་སྟེར་རོ། །ཞེས་བཀའ་སྩལ་བས་སྔགས་པ་ཅོག་ལ་ཙུག་སྒྲ་ཙུག་སྣང་དང་། བོན་པོ་ཚེ་མི་སྣང་གྲགས་འབྱུང་གྲགས་བྱ་བ་གཉིས་ཀྱིས་འདུལ་བར་ཞུས། ཟོ་དང་གོང་པོ་རི་ལ་དགྲ་བཅོམ་པ་འགོག་པ་ལ་ཞུགས་པ་བརྒྱ་རྩ་བརྒྱད་ཡོད་པས། དེར་ཁོང་གཉིས་ཀྱིས་ནམ་མཁའ་ལྡིང་བསྒྲུབས་ནས་རྒྱལ་པོ་ལ་ཞུས་ཏེ་མི་ཀུན་ཀྱང་ཀླུ་འདུལ་བའི་ཐབས་ལྟ་ཟེར་ནས་ཚོགས་པའི་ཚེ། བོན་པོ་ན་རེ་སྔོན་ལ་ངས་བཏུལ་གྱི་གལ་སྟེ་མ་ཐུལ་ན་ཁྱོད་ཀྱིས་བརྩོན་པ་སྐྱེད་ཅིག་ཟེར་ཏེ་ཆོ་ག་བྱས་མཉམ་པར་བཞག་པ་དང་དེ་མ་ཐག་བྱ་ཁྱུང་ཆེན་པོ་ཞིག་བྱུང་སྟེ་མཚོ་སྟེང་དུ་ལྡིང་བ་དང་། མཚོ་འཁོལ་ཀླུ་སྦྲུལ་མགོ་ལྔ་པ་གཅིག་རོང་བྱུང་བས། བོན་པོ་ན་རེ་ངས་ནི་མ་འཐུལ་ལོ་ཅོག་ལ་ཁྱོད་ཀྱིས་བརྩོན་འགྲུས་སྐྱེད་ཅིག་ཟེར་ཏེ་སྔགས་པས་ཆོ་ག་བྱས་མཉམ་པར་བཞག་པ་དང་། གནམ་རལ་པ་སྐད་ས་གྲུམ་པ་སྐད་དུ་སྒྲ་ཆེན་པོ་གྲགས། སྐྱེ་བོ་ཐམས་ཅད་བྲེད་ས་གཞི་འགུལ། འདབ་ཆགས་ཐམས་ཅད་ཀྱང་འཕུར་ཏེ་ན་མཁའ་ནས་བྱ་ཁྲ་འདྲ་བ་ལ་སྐད་འབྲུག་ལྟར་འདོན་པ་ཞིག་བྱུང་ནས་བྱ་དེའི་གཤོག་པ་སྤུ་གྲི་ལྟ་བུས་སྦྲུལ་མགོ་ལྔ་སྐད་ཅིག་གིས་བཅད་དེ་མཚོ་ཁྲག་ཏུ་ཉོག་སོང་ནས། བྱེ་མ་ལ་ཆུ་ཕོ་བ་ལྟར་སྐམ་པའི་ཤུལ་ན་རིན་པོ་ཆེའི་ཁྲོན་པ་འདུག་པའི་དབུས་སུ་རིན་པོ་ཆེ་དབང་གི་རྒྱལ་པོ་སྦས། བཅོམ་ལྡན་འདས་འོད་དཔག་ཏུ་མེད་པ་ལ་མཆོད་པ་ཕུལ། གཙང་ཁང་ཁྲོ་ཆུའི་ཕ་གུས་ཕུབ། ཕྱོགས་བཞིར་གསང་ཁུང་བཞི་སྒྲོམ་དུ་བྱས་པའི་སྒྲོམ་ཁར་མཆོད་རྟེན་བརྩིགས། གནོད་སྦྱིན་ཕོ་མོ་བྲན་དུ་བཀོལ་ཏེ་དེའི་སྟེང་དུ་བརྩིགས་ཏེ་གསང་བ་འདུས་པའི་ལྷ་བཅུ་དགུ་པའི་ལུགས་སུ་བཞེངས། གཙོ་བོ་གསུམ་ནི་རྡོ་སྐུ་རང་བྱུང་ཟོ་དང་གོང་པོ་རི་ནས་སྤྱན་དྲངས་པ་སླར་བཟོ་བོས་རྣམ་པ་དོད་པར་བརྐོས་པས་རྡོ་ཕྱེ་རྣམས་རིང་སྲེལ་དུ་སོང་སྐད། འཁོར་སེམས་དཔའ་རྣམས་ལི་ཡུལ་གྱི་སྤྲུལ་པའི་བཟོ་བོས་ལི་ལས་ལུགས་སུ་བླུགས་པ་རིན་པོ་ཆེའི་ཕྲ་ཅན་བལ་ཡུལ་ནས་ཞབས་ཀྱིས་བོན། འཇམ་དཔལ་ཆོས་དབྱིངས་གསུང་དབང་བལ་ཡུལ་དུ་བཞུགས་པའི་ཚབ་རྡོ་སྐུ་རང་བྱུང་ཞིག་བྱོན། གསེར་བྱེ་བརྒྱད། བདུན། དྲུག་ལྔ། བཞི་རྣམས་ལ་གནོད་སྦྱིན་གྱི་བཟོ་བོས་བླུགས་ཏེ་རིམ་པར་རྣམ་སྣང༌། རྡོར་སེམས། རིན་འབྱུང༌། སྣང་མཐའ། དོན་གྲུབ་རྣམས་ཆ་ལུགས་མི་འདྲ་བར་བཞེངས་ཏེ་འོད་དཔག་མེད་རིན་པོ་ཆེའི་གཏེར་ཁང་ན་བཞུགས། གཞན་བཞི་དང་རྒྱལ་པོའི་སྐུ་འབག་གཙང་ཁང་ན་བཞུགས། བོད་འབངས་ཀྱི་དུས་མ་ཡིན་པའི་འཆི་བ་ཟློག་པའི་ཕྱིར་ལྷ་མོ་ཡིད་བཞིན་འཁོར་ལོ་དང༌། རིན་པོ་ཆེའི་གཏེར་ཁ་དབྱེ་བ་དང་ལས་སྒོ་རྣམས་འདུ་བའི་ཕྱིར་གནོད་སྦྱིན་ཆུ་དབང་གི་སྐུ་བྱས། རྒྱལ་པོའི་དཀོར་མཛོད་ཆེན་པོ་གཅིག་ཀྱང་གཏེར་ཁང་དུ་སྦས། ཚངས་པ་དུང་གི་ཐོར་ཚུགས་ཅན་ལ་གཉེར་དུ་གཏད། སྔགས་པའི་སྒྲིབ་པ་སྦྱོང་བ་དང་། ཀླུ་དེའི་དོན་དུ་མཆོད་རྟེན་རྩེ་ལྔ་པ་བཞེངས་ཏེ་ཀླུ་དེ་ལྷར་སྐྱེས། བྱམས་པ་མི་འགྱུར་བའི་ལྷ་ཁང་ཞེས་མཚན་བཏགས་ལ། ཀླུ་བཏུལ་བའི་བྱའི་མིང་གིས་སྤྱིར་ཁྲ་འབྲུག་ཏུ་གྲགས་ཏེ་བོད་ཀྱི་ལྷ་ཁང་བརྩིགས་པ་ལ་སྔ་ཞིང་། འཇིག་པ་ལ་འཕྱི་བ་ཡིན་ལ་རྒྱལ་པོའི་ཐུགས་དམ་གྱི་སྙིང་པོ་གཙུག་ལག་ཁང་ཐམས་ཅད་ཀྱི་རྩ་བ་ཡིན་ནོ།། ཚེ་སྤོང་བཙན་འདྲ་དོང་ཆུང་བྱ་བ་བློན་པོ་གཅིག་གིས་ཀྱང་ལྷ་ཁང་གློ་འབུར་ཞིག་བྱས་སོ། །དེར་རྒྱལ་པོའི་ཞལ་ནས་ངའི་ཐུགས་དམ་གྱི་ལྷ་ཁང་འདི་འཛམ་གླིང་ན་བྱིན་ཆེ་བ་ཡིན། འདི་ལ་དད་ཅན་གྱིས་མཆོད་པ་ཕུལ་ཏེ་གསོལ་བ་བཏབ་ན་ཅི་འདོད་ཀྱང་མི་འགྲུབ་པ་མི་སྲིད། ལྷ་ཁང་ཐམས་ཅད་ཀྱི་ཡང་སྙིང་ཡིན་ཡང་འདི་ལ་རྒྱན་སྲུང་བ་ཞིག་མེད་ཅེས་བཀའ་སྩལ་བས་བལ་པོའི་བཟོ་བོ་ན་རེ་ངེད་ཀྱི་ལྷོ་བལ་ན་བྷ་དནྟ་ཞེས་བྱ་བ་དབུ་རེག་ཞབས་རྗེན་ངུར་སྨྲིག་གི་ན་བཟའ་ཅན་དེ་བཞིན་གཤེགས་པའི་ཆ་ལུགས་སུ་བཞུགས་པ་ལྷ་མིའི་མཆོད་གནས་མང་པོ་ཡོད། དེ་ལྟ་བུ་ཡོད་ན་རྒྱན་སྲུང་བ་འོང་པ་ལ་ཟེར་བས་རྒྱལ་པོ་ཕྱག་ཐལ་མོ་སྦྱར་ཏེ་རབ་ཏུ་བྱུང་བ་དེ་ལྟ་བུའི་གཟུགས་འཆང་བ་ཙམ་ལ་ཡང་ང་སྤྱི་བོས་བཏུད་དེ་བྱའོ། །ཞེས་ཕྱག་འཚལ་བར་མཛད་དོ་ཞེས་དམ་བཅའ་མཛད་དོ། །སང་ཉིན་རྒྱལ་པོ་འཁོར་བཅས་ཕྱི་རོལ་ཏུ་བྱོན་པ་དང་མཆོད་རྟེན་རྩེ་ལྔའི་འགྲམ་ན་དགེ་སློང་གི་ཆ་བྱད་ཅན་མགོ་བོ་ཆེ་བ་དཔྲལ་བ་འབུར་བ་སྣ་ཉག་ཅིང་མིག་ཚག་པ་སྟོད་ཆུང་ཞིང་སྨད་ཆེ་ལ་ཚང་ར་འབུར་བ་ཞིག་ཚེམ་བུ་འཚེམ་ཞིང་འདུག་པ་གཟིགས་པས་ངས་རབ་བྱུང་གི་རྟགས་ཙམ་འཛིན་པ་ལ་ཡང་ཕྱག་འཚལ་བར་དམ་བཅས་ན་འདི་རབ་ཏུ་བྱུང་བ་དངོས་ལ་ཅིའི་ཕྱིར་མི་བྱ་དགོངས་ལ། འོན་ཀྱང་འདི་གཟུགས་བྱད་ངན་པས་བློན་པོ་རྣམས་དད་པ་ལྡོག་སྟེ་འོང་དགོངས་ནས་མཆོད་རྟེན་གྱི་ཕག་ཏུ་དེའི་ཞབས་ལ་བཏུགས་ཏེ་ཕྱག་མཛད་ནས་བཞེངས་ཏེ། ང་ས་བདག་གི་རྒྱལ་པོས་ཁྱེད་དགེ་སློང་གི་ཞབས་ལ་མགོས་བཏུགས་ནས་ཕྱག་བྱས་པ་འདི་ངོ་མཚར་མི་ཆེའམ་གསུངས་པས་དགེ་སློང་དེ་ན་རེ། དེ་ངོ་མཚར་ཆེ་སྟེ། ངའི་རྫུ་འཕྲུལ་འདི་ཡང་ངོ་མཚར་མི་ཆེའམ་ཟེར་ནས་མཆོད་རྟེན་རྩེ་ལྔ་ལག་པ་གཡས་པས་ནམ་མཁའ་ལ་ཡེར་གྱིས་བཏེགས། རྒྱལ་པོས་དེ་ཡང་ངོ་མཚར་ཆེ་སྟེ་ང་སྐྱེ་བོ་ཐ་མལ་པའི་མགོ་ལ་སངས་རྒྱས་བཞུགས་པ་འདི་ངོ་མཚར་མི་ཆེའམ་ཞེས་ལ་ཐོད་ཕུད་དེ་ཨ་མི་ཏཱ་བྷའི་ཞལ་བསྟན་པས། དེ་ན་རེ་རྒྱལ་པོ་ལ་ལྷ་གཅིག་ལས་མི་འདུག་ང་ལ་འདི་ཙམ་ཡོད་ཟེར་ནས་ལྷན་པ་འདྲ་བའི་གྲི་གུས་བྲང་ཁ་ཕྱེ་སྟེ་འདུས་པའི་ལྷ་ཚོགས་བཅུ་དགུ་ལམ་གྱིས་བསྟན་པས་རྒྱལ་པོ་རབ་ཏུ་དགྱེས་ཏེ་རབ་ཏུ་བྱུང་བ་རྣམས་ལ་ཡོན་ཏན་འདི་ལྟ་བུ་ཡོད་ཀྱིས་ངའི་འབངས་ཐམས་ཅད་ཀྱིས་རབ་བྱུང་གི་རྟགས་འཛིན་ཙམ་མཐོང་ནའང་ཞབས་སྤྱི་བོར་ལོང་ཞིག་ཅེས་དྲིལ་བསྒྲགས་སོ། །འདིས་ནི་དགེ་སྦྱོང་གཟུགས་བྱད་ངན་ཡང་ཡོན་ཏན་བསམ་གྱིས་མི་ཁྱབ་པས་བརྙས་པ་སྤང་དགོས་པ་དང་། རྒྱལ་པོས་ཀྱང་སྤྱན་རས་གཟིགས་སུ་དོན་གྱིས་ཞལ་བཞེས་པ་དང་སྤྲུལ་པའི་དགེ་སློང་དེས་ཀྱང་རྒྱལ་པོའི་ལྷ་ཁང་དང་ང་མཉམ་བྱ་བར་བསྟན་པ་ཡིན་ནོ། །ཞེས་བྱུང་ངོ་།།  །།

རྩོམ་པ་པོ། ཆུ་དབར་བུ།

[1] ཆོས་འབྱུང་མཁས་པའི་དགའ་སྟོན། སྟོད་ཆ། མི་རིགས་དཔེ་སྐྲུན་ཁང་། ཤོག་གྲངས་ ༢༢༧ ནས་ ༢༣༠ བར་གསལ་ལོ།།

https://foursquare.com/v/%E6%98%8C%E7%8F%A0%E5%AF%BA%E0%BD%81%E0%BD%A0%E0%BD%96%E0%BD%82%E0%BD%91%E0%BD%82%E0%BD%93%E0%BD%94/4e34ff8d45dd1c42bf1a9824?openPhotoId=4f3cc400e4b0c0ca464fb205 འདི་ནས་སྐུ་པར་སྣ་ཚོགས་གཟིགས་ཐུབ།