༄༅། །དབུ་རུ་ཀ་ཚལ་གཙུག་ལག་ཁང་གི་གནས་ཡིག་མདོར་བསྡུས།

དེ་རྗེས་རིག་གསར་དུས་གཟིངས་ཀྱིས་རྐྱེན་པས་གནས་འདི་ཉིད་ཀྱང་མི་རྟག་སྒྱུ་མའི་བརྡ་ཆོས་སུ་སྟོན་པར་མཛད་དོ། དེ་ནས་རིམ་བཞིན་རབ་བྱུང་བདུན་པའི་ཆུ་ཁྱི་ལོ་སྤྱི་ལོ་༡༩༨༣ལོར་ཀ་ཚལ་མཆོག་སྤྲུལ་གཉའ་ལྟག་རིན་པོ་ཆེས་བསྟན་འགྲོ་སྤྱི་དང་ཡང་སྒོས་བོད་ཁམས་ཡོངས་ལ་ཕན་བདེའི་ཆེད་དུ་ཕྱི་ནང་གསང་གསུམ་གྱི་འགལ་རྐྱེན་དང་དུ་བླངས་ནས་ཐོར་གཤིགས་སོང་བའི་དགོན་འདི་ཉིད་གཞིགས་གསོ་མཛད་པ་དང་། ལེགས་གྲུབ་བྱུང་བའི་གཙང་ཁང་ཀ་རིང་གཉིས་ཀྱི་ནང་དུ་དུས་གསུམ་སངས་རྒྱས་ཐོག་བརྩེགས་མ། རྒྱལ་དབང་རིན་ཆེན་ཕུན་ཚོགས་ཀྱི་སྲིན་ལག རྗེ་ཀུན་དགའ་རིན་ཆེན་གྱི་ཞབས་རྐང་། གུ་རུ་ཨོ་རྒྱན་པད་མའི་སྐུ་ཚབ་གཏེར་ལྔའི་ཡ་གྱལ་སྐུ་གཅིག་བཅས་རྟེན་མང་དག་བཞུགས་པའི་གདུང་རྟེན་བཀྲ་ཤིས་འོད་འབར་རྒྱུ་དངུལ་ལས་གྲུབ་པ་མི་ཚད་མ། སྔར་གྱི་ལུང་བསྟན་སྤྲུལ་པའི་ཤྭ་བ་ཡུ་མོའི་རྭ་ཅོ། ཆོས་རྒྱལ་སྲོང་བཙན་ཉིད་ཀྱི་མ་ཎིའི་རྟིང་ལྕགས་སོགས། སྐུ་གསུང་ཐུགས་རྟེན་གྲངས་ལས་འདས་པ་ཞིག་བཞུགས་སུ་གསོལ། དེ་རྗེས་སླར་ཡང་སྤྱི་ལོ་༢༠༡༢ལོར་དགོན་དེའི་བླ་ཁག་བཞིའི་ཡ་གྱལ་དུ་གྱུར་པ་མཆོག་སྤྲུལ་གཉའ་ལྟག་རིན་པོ་ཆེས་ཐུགས་འགན་ཆེར་བཞེས་ཐོག་ཀ་ཚལ་དགོན་འདི་ཉིད་ཉམས་གསོ་རྒྱ་ཆེར་མཛད་ནས་ད་ལྟ་དད་ལྡན་རྣམས་པའི་མིག་ལམ་དུ་མངོན་བཞིན་པ་མ་ཟད་བླ་ན་མེད་པའི་མཛད་འཕྲིན་དང་ཐུགས་རྗེའི་གཟིགས་སྐྱོང་འོག་ད་ལྟའི་བར་དུ་དགེ་འདུན་ལྔ་བཅུར་ཉེ་བ་ཞིག་གིས་ལུང་རྟོགས་ཀྱི་འཆད་ཉན་སྐྱང་བཞིན་ཡོད་པ་ནི་དད་ལྡན་རྣམས་པའི་མཐོང་ཆོས་སུ་འགྱུར་དང་གྱུར་བཞིན་ལགས་སོ།།