འཛམ་གླིང་གི་ཆོས་ལུགས་ཆེན་པོ་བཞི་ཡི་ལོ་རྒྱུས་མདོར་བསྡུས།

འཛམ་གླིང་གི་ཆོས་ལུགས་ཆེན་པོ་བཞི་ཡི་ལོ་རྒྱུས་མདོར་བསྡུས།
འཛམ་གླིང་གི་ཆོས་ལུགས་ཆེན་པོ་བཞི་ཡི་ལོ་རྒྱུས་མདོར་བསྡུས།
ཧིན་དྷུའི་ཆོས་ལུགས།
ཧིན་དྷུའི་ཆོས་ལུགས་ནི་དུས་རབས ༨ པའི་ནང་རྒྱ་གར་རང་ས་ནས་དར་ཁྱབ་ཏུ་སོང་བའི་ཆོས་ལུགས་ཤིག་ཡིན། རྒྱ་གར་དུ་ཕོ་ལོ་མུན་ཟེར་བའི་ཆེས་གནའ་བོའི་ཆོས་ལུགས་དེ་དང་སངས་རྒྱས་ཆོས་ལུགས་གཉིས་ལས་ཧིན་དྷུའི་ཆོས་ལུགས་བྱུང་བར་འདོད། ཆོས་ལུགས་འདི་ལའང་ལས་རྒྱུ་འབྲས་དང་སྐྱེ་བ་སྔ་ཕྱི་ཡོད་པར་འཛིན་པ་མ་ཟད། བྱ་བ་བཟང་སྒྲུབ་ངན་སྤང་གི་སྲོལ་ཡང་དག་ཀྱང་ཡོད། ད་དུང་མི་རྣམས་ཀྱིས་ལྷ་ཆེན་པོ་གསུམ་སྟེ་ཧྥན་ཐེན་དང་ཧྲི་ཕོ། ཕེས་ཧྲི་ནེ་ཟེར་བ་གསུམ་སྐྱབས་གནས་ཀྱི་ལྷ་ཡིན་པར་འདོད།

དེའི་ཕྱིར་རྒྱ་གར་དུ་བྲམ་ཟེའི་རིགས་སོགས་ནི་ལྷ་དེ་དག་གི་རིགས་ཡིན་པས་དེ་ལས་སྐྱེས་པའི་མི་རྣམས་ཤིན་ཏུ་བཟང་པོར་འདོད་པ་དང་། གདོལ་བ་ཤན་པའི་རིགས་སོགས་དེ་ལས་ལྡོག་སྟེ་དམན་པར་བརྩི་བ་སོགས་མིའི་གྲལ་རིམ་མཆོག་དམན་འཛིན་པའི་ལྟ་བ་ཧ་ཅང་ཛ་དྲག་ཆེ། ཡ་མཚན་པ་ཞིག་ལ་བ་ལང་དཀར་པོ་སོགས་ནི་ལྷ་གང་དེའི་བཞོན་པ་ཡིན་པས་དད་གུས་ཚད་མེད་ངང་མཆོད་འབུལ་ཡང་ཡང་གནང་བ་དང་། ར་ལུག་ནག་པོ་སོགས་སྲོག་ཆགས་གཞན་པ་འགའ་རེ་ནི་ལྷ་མོའི་དུས་ཚིགས་ལ་བསླེབས་པ་ན་གྲངས་མང་པོ་དམར་གསོད་དུ་བཏང་ནས་ལྷ་མོར་ཤ་ཁྲག་གི་མཆོད་འབུལ་བྱེད་པའི་ལུགས་སྲོལ་ཡོད། དེང༌སྐབས་ཡང་ས་ཁུལ་མི་ཉུང་བ་ཞིག་ན་ར་ལུག་དང་རྔ་མོང་ཆུ་གླང་ནག་པོ་སོགས་གསོད་པའི་བྱ་འགུལ་རྒྱ་ཆེན་པོ་སྤེལ་ཏེ། མི་རྣམས་ཀྱིས་ཉིན་དེར་ར་ལུག་གསོན་པོའི་སྐེ་བཅད་དེ་ལྷ་མོ་ལ་མཆོད་འབུལ་བྱེད་པ་སོགས་ནི་ཁོ་ཚོའི་འཚོ་བའི་ནང་མེད་ཐབས་མེད་པའི་བག་ཆགས་མཐུག་པོ་ཞིག་ཏུ་ཆགས་ཡོད། རྒྱ་གར་རང་གནས་ཀྱི་མི་བརྒྱ་ཆའི ༨༠ ཆོས་ལུགས་འདིར་དད་གུས་ཡོད་པ་དང༌། ད་ཆའི་འཛམ་གླིང་མི་གྲངས་ལ་གཞིགས་ན་དད་གུས་བྱེད་མཁན་དུང་ཕྱུར ༨ ཙམ་དང་མིའི་རིགས་ཀྱི་བརྒྱ་ཆའི་༡༣ ཟིན་ཡོད་པས་མི་གྲངས་ཀྱི་ཆ་ནས་འཛམ་གླིང་སྟེང་གི་ཆོས་ལུགས་ཨང་གསུམ་པར་རང་བཞིན་གྱིས་འཕགས་ཡོད།
དབྱི་སི་ལན་གྱི་ཆོས་ལུགས།
དབྱི་སི་ལན་གྱི་ཆོས་ལུགས་ནི་སྟོན་པ་མ་ཧཱ་མད་ཏིས་གསར་སྤེལ་གནང་བ་ཡིན། ཁོང་ནི་ཡ་གླིང་ས་དི་ཨ་རབ་ཏུ་ཕྱི་ལོ ༥༧༠ལོར་སྐུ་འཁྲུངས། ལོ ༢༥ སོན་པ་ན་ཡུལ་དེའི་ཡུགས་མོ་ལོ་༤༠ སོན་ཡོད་པ་ཞིག་དང་གཉེན་སྟོན་བྱས། དེ་རྗེས་སུ་ཁོས་བཤད་རྒྱུར་ཨན་ལཱ་ཟེར་བའི་ལྷ་ཆེན་པོ་ཞིག་གིས་ཁོ་རྗེས་སུ་བཟུང་ཡོད་པར་མ་ཟད། ཟབ་ཆོས་འདི་དག་མི་ཡུལ་ལ་སྤེལ་དགོས་པའི་བཀའ་ནན་ཡང་ཁོ་བོ་ལ་བསྩལ་སོང་ཞེས་མི་རྣམས་ལ་བསྒྲགས། ཁོང་གི་ཆོས་ལུགས་ཀྱི་རྩ་དོན་ནི་ཚེ་སྔ་ཕྱི་དང་། རྣམ་སྨིན་ཡོད་པ། འཇིག་རྟེན་ན་ཨན་ལཱ་མ་གཏོགས་ལྷ་མེད་པ།ཨན་ལཱ་ལ་བློ་གཅིག་གིས་དད་གུས་བྱས་ན་བདེ་བའི་ཞིང་དུ་ཁྲིད་པ་དང་། ཨན་ལཱ་མ་གཏོགས་ལྷ་གཞན་ལ་དད་གུས་བྱས་ན་རྣམ་སྨིན་ངན་པ་འཁོར་བ། ཨན་ལཱས་ཆད་པ་ནན་མོ་གཅོད་པ་སོགས་ཀྱི་དམ་ཚིག་མང་དུ་བསྒྲགས་ཏེ་མང་ཚོགས་ནང་ཁྱབ་སྤེལ་དུ་བཏང་། སྐབས་དེའི་སྐུ་དྲག་མང་ཆེ་བར་རང་རང་གི་དམིགས་བསྟེན་གྱི་ལྷ་རེ་དད་ཡུལ་དུ་བཟུང་ཡོད་ཕྱིར་ལྷ་མང་སྨྲ་བས་ལྷ་གཅིག་སྨྲ་བའི་ལུགས་འདི་ལ་མཐའ་གཅིག་ཏུ་ངོ་རྒོལ་དང་གཉའ་གནོན་དྲག་པོ་བྱས། ཁོས་གཡུལ་བཤམས་ན་ཡང་རྒོལ་ལན་དཀའ་བའི་གནས་སུ་ལྷུང་སྟེ་སྲོག་ལ་ཉེན་པའི་སྐབས། ཁོས་བྱ་ཐབས་གཞན་ཟད་དེ་རང་གི་གྲུབ་མཐའ་ལ་སྡང་བ་དང་ལྷ་ཆེན་པོ་ཨན་ལཱའི་ཆེད་དུ་གཞན་གསོད་པའམ་གཡུལ་ངོར་ཤི་ན་བདེ་བའི་ཞིང་ཁམས་སུ་འགྲོ་ངེས་ཡིན་ཞེས་སྙིང་སྟོབས་བསྐྱེད་དེ་ཁྲོམ་བསྒྲགས་ནན་གྱིས་བྱས། མི་རྣམས་ཀྱིས་དེ་བཞིན་ཡིན་པར་སེམས་ནས་བདེ་བའི་ཞིང་ཁམས་ལ་འགྲོ་བའི་ཆེད་དུ་ལུས་སྲོག་ལ་འཛེམ་བག་མེད་པར་གཡུལ་འཐབ་དྲག་ཏུ་བྱས་ནས་དགྲ་ཕྱོགས་ཀྱི་མི་རྣམས་དམར་གསོད་དུ་བཏང་སྟེ་མཐར་རྒྱལ་ཁ་བླངས། དེ་ནས་བཟུང་བྲན་དུ་བཀོལ་བའི་མི་རྣམས་ལ་ལྷ་གཞན་ལ་དད་པ་མི་ཆོག་པའི་དམ་ཚིག་བསྒྲགས། དེ་རྗེས་རིམ་བཞིན་ཨ་ཧྥེ་རི་ཁ་སོགས་གཙོ་ཆེ་བ་ཧྥེ་གླིང་གི་རྒྱལ་ཁབ་མང་ཆེ་བ་དང་འཛམ་གླིང་གི་ཡུལ་གྲུ་མང་ཆེ་བ་ཞིག་ལ་ཆེས་ཆེར་དར་ཁྱབ་དུ་གྱུར་སོང་། ཁོང་དགོང་གྲངས ༦༣ སོན་པ་ན་འཇིག་རྟེན་གཞན་ཞིག་ཏུ་སྐུ་གཤེགས། མིག་སྔར་འཛམ་གླིང་གི་མི་གྲངས་ལ་གཞིགས་ན་དད་གུས་བྱེད་མཁན་དུང་ཕྱུར ༡༢ ཙམ་དང་མིའི་རིགས་ཀྱི་བརྒྱ་ཆའི ༢༠ ཟིན་ཡོད་པས་མི་གྲངས་ཀྱི་ཆ་ནས་འཛམ་གླིང་སྟེང་གི་ཆོས་ལུགས་ཨང་གཉིས་པར་རང་བཞིན་གྱིས་འཕགས་ཡོད།
ཡེ་ཤུའི་ཆོས་ལུགས།
ཡེ་ཤུའི་ཆོས་ལུགས་ནི་སྟོན་པ་ཡེ་ཤུ་མ་ཤི་ཀས་སྤེལ་བ་ཡིན། །ཁོང་ནི་ཡ་གླིང་ཕ་ལི་སི་ཐན་གྱི་ཡེ་ཤུའི་མི་རིགས་སུ་ཕྱི་ལོ་མགོ་ ཚུགས་པ་དང་དུས་མཚུངས་སུ་འཁྲུངས། དེ་གའི་ཡུལ་མི་ཚོས་ཚེ་སྔ་ཕྱི་ཡོད་པ། ལོ་རེའི་དཔྱིད་ཚུགས་ཉིན་ཨཱ་ཐི་སི་ཟེར་བ་ཕྱིར་གསོན་པའི་ཉིན་མོ་ཡིན་ཟེར་ནས་དད་གུས་བྱེད་པ་དང་། ཟླ ༡༢.༢༥ ཉིན་ཉི་མའི་ལྷ་ཆེན་པོ་འཁྲུངས་སྐར་དུ་ངོས་བཟུང་ནས་མཆོད་འབུལ་སྣ་ཚོགས་བྱེད་པ་གསུམ་ནི་སྐབས་དེའི་མི་རྣམས་ཀྱི་སེམས་གཏིང་ན་འཇགས་པའི་ཆོས་ལུགས་ཀྱི་བྱེད་སྒོའམ། ཡང་ན་ཡུལ་སྲོལ་གོམས་གཤིས་སྒྱུར་མི་བཏུབ་པ་ཞིག་ཏུ་གྱུར་ཡོད། ཡེ་ཤུ་མ་ཤི་ཀས་ཡུལ་དེ་གའི་ཆོས་ལུགས་ཀྱི་བྱེད་སྒོ་གསུམ་པོ་གཞིར་བཞག་སྟེ་ཁོ་རང་གིས་ལྟ་ཚུལ་གསར་བ་མང་དུ་བརྗོད་དེ་རང་ལུགས་ཀྱི་ལྟ་བ་སྤེལ་མགོ་བརྩམས། ཡིན་ནའང་ཡུལ་དེའི་སྲོལ་རྒྱུན་དུ་ཡུགས་མོ་ནི་ངན་དགུ་ཚང་བ་ཞིག་ཡིན་པར་འདོད་པ་སོགས་ལྟ་བ་མང་པོ་ཞིག་ལ་ཁོང་གིས་ཐད་ཀར་ངོ་ལོག་བྱས་ནས་ཡུགས་མོ ༡༦ ཙམ་ཁོང་རང་ ཉིད་ཀྱིས་བག་མར་བསུས་པ་སོགས་ཡུལ་དེའི་མི་གང་མང་ཞིག་གིས་འཛིན་ཚུལ་དང་མི་མཐུན་པར་གྱུར། ལྷག་ཏུ་སྲིད་གཞུང་དང་རྒྱབ་འགལ་བྱུང་ནས་ཁོང་དགུང་གྲངས ༣༠ སྟེང་ཡེ་ཤུའི་སྲིད་གཞུང་དམག་གི་བཙོན་རར་ཚུད་དེ་མཇུག་འབྲས་རྒྱ་གྲམ་གྱི་ཁྲིམས་ཤིང་རྩེར་བསྐྱོན་ནས་དམར་གསོད་དུ་བཏང་། དེ་ནས་ལོ་གང་མང་ ཞིག་ལ་ཁོའི་ལྟ་བ་རུལ་སུངས་སུ་གྱུར་ཏེ་སྤེལ་མཁན་མ་བྱུང་། ལོ་རབས་མང་པོ་ཞིག་འདས་རྗེས་སུ་པོ་ལོ་ཟེར་བ་ཞིག་གིས་ལྟ་བ་དེ་ཆོས་ལུགས་ཤིག་ཏུ་ངོས་བཟུང་ནས་སླར་ཡང་ཁྱབ་བསྒྲགས་མང་དུ་བྱས་པས་རིམ་གྱིས་ཆོས་ལུགས་ངོ་མ་ཞིག་ཏུ་ཆགས་པ་མ་ཟད་གནམ་བདག་དང་། དངོས་བརྒྱུད། གསར་མའི་ལུགས་ཏེ་གྲུབ་མཐའི་རྐང་མི་འདྲ་བ་གསུམ་དུ་གྱེས། རོ་མ་རྒྱལ་ཁབ་ནས་རིམ་བཞིན་འཛམ་གླིང་གི་ཡུལ་གྲུ་མང་ཆེ་བར་ཧ་ཅང་ས་དར་གནམ་དར་དུ་གྱུར་སོང་། མིག་སྔར་འཛམ་གླིང་མི་གྲངས་ལ་གཞིགས་ན་དད་གུས་བྱེད་མཁན་དུང་ཕྱུར ༡༩ ཙམ་དང་། མིའི་རིགས་ཀྱི་བརྒྱ་ཆའི ༣༣ ཟིན་ཡོད་པས་མི་གྲངས་ཀྱི་ཆ་ནས་འཛམ་གླིང་སྟེང་གི་ཆོས་ལུགས་ ཨང་དང་པོར་རང་བཞིན་གྱིས་འཕགས་ཡོད།
སངས་རྒྱས་ཆོས་ལུགས།
སངས་རྒྱས་ཆོས་ལུགས་ནི་སྟོན་པ་ཤཱཀྱ་ཐུབ་པས་གསར་སྤེལ་མཛད་པ་ཡིན་ལ། སངས་རྒྱས་ཆོས་ལུགས་ཀྱི་སྟོན་པ་གཞོན་ནུ་དོན་གྲུབ་ནི་ཡ་གླིང་གི་སྔོན་ཆད་རྒྱ་གར་དང་། ད་ལྟ་བལ་བོའི་མངའ་ཁོངས་མདོ་ལས་གསུངས་པའི་གནས་ཆེན་བཞིའི་ཡ་གྱལ་ལུམྦི་ནིའི་ཚལ་དུ་ཕྱི་ལོ་སྔོན་གྱི་ལོ ༦༢༥ པར་སྐུ་བལྟམས། དགུང་གྲངས་ ༢༩ བར་ཡུམ་གྲགས་འཛིན་མ་སོགས་བག་མ་བསུས་ནས་རྒྱལ་སྲིད་བསྐྱངས། དེའི་སྐབས་སུ་རྒྱ་གར་གྱི་སྤྱི་ཚོགས་ནི་གྲལ་རིམ་བར་གྱི་འགལ་བ་ཧ་ཅང་རྙོག་འཛིང་ཆེ་ཞིང་རྒྱལ་ཕྲན་ཕན་ཚུན་བར་འཁྲུག་རྩོད་རྒྱུན་མི་ཆད་པ་དང་། ཆོས་ལུགས་ཀྱི་བསམ་བློ་སྣ་ཚོགས་དར་ཁྱབ་ཆེ་ཡང་ཁོང་གིས་འདོད་བློ་ཁེངས་པའི་ཆོས་རྣལ་མ་ཞིག་མ་རྙེད་པ་དང་། གྲོང་ཁྱེར་དག་ན། མི་རྣམས་སྐྱེ་བ་དང་། རྒ་བ་དང་། ན་བ་དང་། ཤི་བར་གྱུར་པའི་རོ་དང་། ད་དུང་རབ་ཏུ་བྱུང་བའི་ གཟུགས་རྣམས་རིམ་པ་བཞིན་དུ་གཟིགས་པས་ཁོང་གནས་ཚུལ་དེ་ལ་ཐུགས་རབ་ཏུ་སྐྱོ་སྟེ། རྒ་དང་ན་དང་འཆི་འགྱུར་བ། །གལ་ཏེ་འདི་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་བྱེད། །ཅེས་སོགས་གསུངས་ཏེ་ལོ་དྲུག་ཏུ་ཆོས་ཕྱིར་དཀའ་བ་སྤྱད་དེ་མཐར་སངས་རྒྱས་ཞེས་པའི་རང་འབྲས་ མངོན་དུ་བྱས་ནས་ཆོས་འཁོར་གང་ལ་གང་འཚམ་བསྐོར། ཁོང་གིས་བསྟན་པའི་ཆོས་ཏེ་སྐབས་དེའི་སྤྱི་ཚོགས་ཀྱི་བློ་དང་ཧ་ཅང་འཚམས་ནས་ཁོང་ལ་གདུལ་བྱ་བགྲང་ཡས་པ་བྱུང་། ཁོང་དགུང་གྲངས ༨༡ པར་ཕྱི་ལོ་སྔོན་གྱི་ལོ་ ༥༤༤ པ་ན་རྩྭ་མཆོག་གྲོང་དུ་ མྱ་ངན་ལས་འདས། ཁོང་གི་བཀའ་ཆོས་ལ་ང་ཚོས་ད་ལྟ་དངོས་སུ་མཐོང་ཐུབ་པའི་པོད ༡༠༨ དང་། དེའི་འགྲེལ་བ་བསྟན་འགྱུར་ལ་ པོད ༢༡༢ ཡོད། ཁོང་སྐུ་མྱ་ངན་ལས་འདས་རྗེས་ལྷོ་བརྒྱུད་ནང་བསྟན་དང་བྱང་བརྒྱུད་ནང་བསྟན་གཉིས་སུ་གྱེས་ཏེ་འཛམ་གླིང་གི་ ཡུལ་གྲུ་མང་ཆེ་བར་དར་ཁྱབ་བྱུང་། དེ་ཡང་ལྷོ་ཕྱོགས་ཀྱི་སིང་ག་ལའི་ གླིང་དང་། ཐེ་ལན་ཊ། འབར་མ་སོགས་རྒྱལ་ཁབ་མང་དུ་གཙོ་ཆེ་བ་ཐེག་པ་ཆུང་ངུའི་བསྟན་པ་དར། དེ་བཞིན་བྱང་ཕྱོགས་ཀྱི་མ་ཧཱ་ཙི་ནའི་ཡུལ་གྲུ་ཁ་ཤས་དང་། ཁོ་རེ་ཡ། ཉི་ཧོང་། སོག་བོད་ཧོར་གསུམ་སོགས་རྒྱལ་ཁབ་མང་དུ་གཙོ་ཆེ་བ་ཐེག་དམན་དང་ཐེག་ཆེན་གྱི་བསྟན་པ་ཡང་དར། ད་སྐབས་མི་ཚོགས་དུང་ཕྱུར ༦ མ་ཟིན་ཙམ་གྱི་དད་ཡུལ་དུ་གྱུར་ཡོད་པས་མི་གྲངས་ཀྱི་ཆ་ནས་འཛམ་གླིང་སྟེང་གི་ཆོས་ལུགས་ཨང་བཞི་བ་ཡིན། འཛམ་གླིང་མི་གྲངས་ཀྱི་བརྒྱ་ཆའི་ ༡༠ ཡིན། ཡིན་ནའང་ཉེ་ལམ་འཛམ་གླིང་སྟེང་ལ་ཧ་ཅང་དར་རྒྱས་ འགྲོ་བཞིན་པའི་ཆོས་ལུགས་ཉག་ཅིག་གི་གྲས་ཡིན། དེ་ཕྱིར་ཁོང་ནི་འཇིག་རྟེན་གྱི་གནས་ལུགས་ལྟར་བཤད་ན་འཛམ་གླིང་སྟེང་མཚན་ཉིད་རིག་པའམ་ནང་སེམས་ཀྱི་དཔལ་ཡོན་ལ་ཆེས་བྱས་རྗེས་མཐོ་བའི་མི་སྣ་ཞིག་ཡིན།

བརྒྱུད་སྐུལ།

མཆན་སྤེལ།