ལྷ་ས་ནས་གནའ་མིའི་རྗེས་ཤུལ་ཞིག་རྙེད་འདུག

西藏日报藏文媒体 2022-01-20 16:08

2022 ལོ་ཤར་བའི་མཚམས་འདིར། ལྷ་ས་གྲོང་ཁྱེར་ཆུ་བཟང་གྲོང་ཚོར་གཏམ་བཟང་ཞིག་འབྱོར་བ་སྟེ། རང་རྒྱལ་གྱི་གནའ་རྫས་རྟོག་ཞིབ་རུ་ཁག་གིས་ཆུ་བཟང་གྲོང་ཚོ་ནས་རྙེད་པའི་གནའ་མིའི་རྐང་རྗེས་ལག་རྗེས་ 2021 ལོའི་འཛམ་གླིང་གི་གནའ་རྫས་རྟོག་ཞིབ་ཆེན་པོ་བཅུའི་གྲས་སུ་བདམས་པ་དེ་ནི། ད་བར་འཛམ་གླིང་ནས་རྙེད་པའི་གནའ་མིའི་སྒྱུ་རྩལ་གྱི་རྗེས་ཤུལ་སྔ་ཤོས་དེ་ཡིན་པས། གནའ་མི་ཡུན་རིང་ངམ་ཡང་ན་དུས་ཚིགས་རང་བཞིན་གྱི་སྒོ་ནས་ས་མཐོར་གཞིས་ཆགས་པའི་དུས་ཚོད་སྔ་ཤོས་ཤེས་རྟོགས་ལ་དེ་བས་སྔ་བའི་དཔང་རྟགས་མཁོ་འདོན་བྱས་ཡོད།

གནའ་རྫས་རྟོག་ཞིབ་ཀྱི་གྲུབ་འབྲས་ལས། ལྷ་སར་གནའ་བོའི་རྗེས་ཤུལ་ལོ་རྒྱུས་ཀྱི་གནས་རྟགས་ཤིག་མང་དུ་ཕྱིན་པ་དེས། ས་གནས་དེ་གའི་རིག་གནས་ཡུལ་སྐོར་ཐོན་ལས་འཕེལ་རྒྱས་ལ་གོ་སྐབས་གསར་པ་གཏོད་ཐུབ་ངེས་རེད། མིག་སྔར་གནའ་མིའི་རྐང་རྗེས་ལག་རྗེས་ཆ་ 5 རྙེད་པ་དེ་དག་ནི་ད་བར་འཛམ་གླིང་ནས་རྙེད་པའི་གནའ་མིའི་སྒྱུ་རྩལ་གྱི་རྗེས་ཤུལ་སྔ་ཤོས་ཡིན་པར་མ་ཟད། ད་བར་གྱི་བྲག་ངོས་ཀྱི་སྒྱུ་རྩལ་དག་ལས་སྔ་བ་ཡོད། གསར་འགོད་པར་ཤེས་རྟོགས་བྱུང་བར། གནའ་རྫས་རྟོག་ཞིབ་རུ་ཁག་མ་སླེབས་གོང་ནས་ས་གནས་དེ་གའི་མི་སེར་གྱིས་རྐང་རྗེས་ལག་རྗེས་དེ་དག་མེས་པོས་བཞག་པའི་རྗེས་ཤུལ་ལ་བརྩིས་ནས། གྲོང་ཚོའི་རྒན་རྒོན་ཚོས་ཆུང་དུས་ནས་འདི་དག་ལ་སྲུང་སྐྱོབ་བྱས་ཡོད།