བཙན་པོ་སྲོང་བཙན་འཁྲུངས་ས་ཕོ་བྲང་བྱམས་པ་མི་འགྱུར་གླིང་ཡིན་ནམ།

རྩོམ་པ་པོ། མཁས་དབང་ར་སེ་དཀོན་རྒྱམ།

དེ་ཡང་ཉེ་དུས་དུས་རབས་ཉི་ཤུའི་སྨད་དུ་བརྩམས་པར་མཛད་པའི་ཡིག་ཚངས་གྲགས་ཆེན་བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་ཅེས་པའི་སྟོད་ཆའི་ངོས་ ༨༡ ལས། བཙན་པོ་སྲོང་བཙན་སྒམ་པོ་ནི་སྤུ་རྒྱལ་གྱི་གདུང་རབས་ཡབ་གནམ་རི་སྲོང་བཙན་དང་། ཡུམ་ཚེ་སྤོང་བཟའ་འབྲི་མ་ཐོད་དཀར་བྱ་བ་གཉིས་ཀྱི་སྲས་སུ་སྤྱི་ལོ་ ༦༡༧ བོད་མེ་གླང་ལོར་(དབུ་རུ་སྟོད་སྣོན་)རྒྱ་མ་ནང་གི་ཕོ་བྲང་བྱམས་པ་མི་འགྱུར་གླིང་དུ་སྐུ་བལྟམས།

ཞེས་གསལ་བར་བཀོད་འདུག དེ་ནི་རང་རེའི་ལོ་རྒྱུས་ཡིག་ཚངས་མང་པོའི་སྙིང་བཅུད་ཡིན་པས་ཕལ་མོ་ཆེས་ཀྱང་དེ་ཀ་རང་ཡིན་པའི་ངོས་འཛིན་བྱེད་རྒྱུའང་ཐེ་ཚོམ་མེད་དེ། ཡིག་ཚངས་སྔ་མ་མང་པོར་དེ་སྐད་དུ་བཀོད་ཡོད་པའི་ཕྱིར་རོ། །

ཁོ་བོས་གནའ་བོའི་ཡིག་ཚངས་ལ་དཔེ་ཀློག་ཅུང་ཟད་བྱས་པའི་ཚེ་ན། བཙན་པོ་སྲོང་བཙན་སྒམ་པོ་དེ་ཉིད་སྐུ་འཁྲུངས་སའི་ས་གནས་མི་འདྲ་བ་གཉིས་ཡོད་པའི་མཐོང་ཚུལ་བྱུང་སྟེ། གཅིག་ནི་ཡར་ལུང་ཁུལ་དུ་གཏོགས་པའི་ཕོ་བྲང་བྱམས་སྙོམས་མི་འགྱུར་ཞེས་པ་དང་། གཅིག་ནི་དབུར་སྟོད་ཁུལ་དུ་གཏོགས་པའི་ཕོ་བྲང་སྦྲ་སྟོད་ཚལ་ཞེས་སོ་སོར་འབྱུང་ལ། སྔ་མ་ཡར་ལུང་གི་དེ་ཉིད་ཀྱང་རིམ་པས་ཕོ་བྲང་བྱམས་པ་མི་འགྱུར་གླིང་ཞེས་པར་འགྱུར་ལྡོག་བྱུང་ཡོད། དཔའ་བོ་གཙུག་ལག་ཕྲེང་བས་ནི་གོང་གསལ་ས་གནས་མི་འདྲ་བ་དེ་གཉིས་ཀྱང་གཅིག་ཏུ་བརྩི་གནང་བར་མཛད་ཡོད་དེ། ཆོས་བྱུང་མཁས་པའི་དགའ་སྟོན་ལས། ཐུགས་ཀའི་འོད་ཟེར་ཡར་སྣྲོན་སྦྲ་སྟོད་ཚལ།།ཕོ་བྲང་བྱམས་པ་མི་འགྱུར་གླིང་ཞེས་པར།།་་་བཙུན་མོ་འབྲི་བཟའ་ཐོད་དཀར་ལྷུམས་སུ་ཞུགས།།ཞེེས་སོགས་ཞིབ་ཆ་དང་བཅས་ཏེ་གནས་དེར་འཁྲུངས་ཚུལ་བཀོད་ཡོད་པ་དང་། དེ་བཞིན་དུ་ཡིག་ཚངས་གྲགས་ཅན་རྒྱལ་རབས་གསལ་མེར་ཡང་དེ་མཚུངས་སུ་ས་གནས་གཉིས་གཅིག་ཡིན་ཚུལ་འཁོད་ཡོད་དེ། ཡང་བསྣོན་སྦྲ་སྟོད་ཚལ་ཡང་འོད་ཟེར་གྱིས་ཁྱབ་པར་མཛད། ཕོ་བྲང་བྱམས་པ་མི་འགྱུར་གླིང་ཡང་འོད་ཟེར་གྱིས་ཁྱབ་པར་མཛད། ཅེས་སོགས་འཁོད་འདུག་པས་སོ། །

འོ་ན་གནས་དེ་གཉིས་ཐ་དད་ཡིན་པའི་གསལ་བྱེད་དམ་ཁུངས་ཅི་འདྲ་ཡོད་དམ། གནའ་དཔེ་གང་ལ་གསལ་ཡོད་དམ་ཅེ་ན། བཀའ་ཆེམས་ཀ་ཁོལ་མ་ཀན་སུའུ་པར་མའི་དེབ་ངོས་ ༩༧ ལས། རྒྱལ་པོ་གནམ་རི་སྲོང་བཙན་དེའི་སྐུ་དྲིན་ལ། ཡར་ལུང་ཤར་སྟོད་ཀྱི་ཕོ་བྲང་བུག་པ་ཅན་དུ་བཞུགས་ནས་ཕོ་བྲང་བྱམས་སྙོམས་མི་འགྱུར་ཞེས་བྱ་བ་བརྩིགས། ཞེས་དང་། ཡར་ལུང་ཚེ་སྤོང་གི་ཡུལ་ནས་ཚེ་སྤོང་བཟའ་དང་མཇལ་ཏེ་ཁབ་ཏུ་བཞེས་པར་བཤད་དེ། རྒྱལ་པོ་གནམ་རི་སྲོང་བཙན་དེ་ཕོ་བྲང་བྱམས་སྙོམས་མི་འགྱུར་ན་བཞུགས་ཙ་ན། བཙུན་མོ་ཚེ་སྲོང་བཟའ་འབྲི་མོ་ཐོད་དཀར་དེ་འབྱལ་དང་ཁབ་ཏུ་བཞེས་སོ། །ཞེས་སོགས་གནས་དེར་འཁྲུངས་པར་གསལ་པོར་བསྟན་ཡོད་ལ། དེབ་ངོས་ ༡༠༠ ལས། རྒྱལ་བུ་ལོ་བཞི་ལོན་པའི་དུས་སུ་ཡབ་རྒྱལ་པོས་བྱང་དུ་ཕོ་བྲང་མཛད་ནས། རྟ་ཅང་ཤེས་རྨ་བྱ་ཀྱུངས་བྱ་བ་དེ་ཆིབས་ནས་ཁྱུང་པོ་སྤ་ཏ་སྤུ་ཏེ་དང་། སྤུ་ཁྱུང་རིང་པོ་དང་འགྲོགས་ཏེ་བྱང་འདམ་པ་རྒྱབ་ཏུ་བྱོན་ནས། ཞེས་སོགས་ཀྱིས་ཡར་ལུང་གི་བྱང་ངོས་སུ་དབུར་སྟོད་སྦྲ་སྟོད་ཚལ་གྱི་ཕོ་བྲང་ནི་སྲོང་བཙན་དགུང་ལོ་བཞིའི་སྐབས་བཞེངས་པ་དང་། དེ་ནས་བྱང་ཕྱོགས་འདམ་གཞུང་སོགས་སུ་རྔོན་དུ་ཕེབས་པར་བཤད་པ་དང་། དེབ་ངོས་ ༡༢༢ ལས། བོད་ཁ་བ་ཅན་གྱི་ཡར་སྣོན་སྦྲང་བྲག་སྟོད་ཚལ་ན་ཡབ་རྒྱལ་པོ་སྲོང་བཙན་སྒམ་པོ་བཞུགས་སའི་དྲུང་དུ་འོངས་ཏེ། ཞེས་གསལ་བས། ནར་སོན་ནས་ཕོ་བྲང་སྦྲ་སྟོད་ཚལ་དུ་བཞུགས་པར་བསྟན་ཏེ། དེབ་ངོས་ ༡༢༤ ལས། དབུ་རུ་བྲག་སྟོད་ཚལ་ན་ཡབ་རྒྱལ་པོ་གནམ་རི་སྲོང་བཙན་གྱི་བཞུགས་པའི་སར་ནུབ་མོ་གྲོ་བཏེག་ནས། ཞེས་གསལ་བས་ན། ས་གནས་ཐ་དད་ཡིན་པར་ཧ་ཅང་གསལ་པོར་འཁོད་་འདུག་གོ །

ཕོ་བྲང་བྱམས་པ་མི་འགྱུར་གླིང་ཞེས་པ་ནི་རྒྱལ་པོ་བཀའ་ཆེམས་སམ། མཚན་གཞན་མ་ཎི་བཀའ་འབུམ་ཏུ་གྲགས་པའི་ནང་ཐོག་མར་གསལ་བ་ཡིན་ལ། དེ་ནི་བཀའ་ཆེམས་ཀ་ཁོལ་མའི་ནང་གསལ་བྱམས་སྙོམས་མི་འགྱུར་ཞེས་པ་ལ་འགྱུར་བ་ཅུང་ཟད་དང་བཅས་གླིང་ཞེས་པས་ཟུར་བརྒྱན་གནང་བའི་ངང་ཚུལ་གསལ་འདུག དེ་ནས་སྣོན་མདའ་སྦྲ་སྟོད་ཚལ་ནས་བཏེག་སྟེ། ཞེས་སོགས་དེ་ནས་སྐྱི་ཤོད་ར་སའམ་ལྷ་སར་ཕེབས་ཚུལ་སོགས་ནི་ཀ་ཁོལ་མ་དང་དོན་གཅིག་ཏུ་བབས་པར་སྣང་ལ། ཕྱིས་སུ་ལོ་རྒྱུས་སྨྲ་བ་དག་གིས་བཙན་པོ་འཁྲུངས་གནས་མ་ཎི་བཀའ་འབུམ་ལྟར་བཀོད་པ་གང་ཞིག་ལ། བྱམས་པ་མི་འགྱུར་གླིང་ཞེས་པའི་ཕོ་བྲང་དེ་ཉིད་ནི་ཡར་ལུང་གི་ཤར་སྟོད་ན་ཡོད་པར་བཤད་པའི་ཚུལ་ལ་མཉམ་པར་མ་བཞག་པར། ད་ཆའི་དབུར་སྟོད་མལ་དྲོ་གུང་མཁར་རྫོང་ཁོངས་ཀྱི་རྒྱ་མ་ཞེས་པའི་ལུང་པའི་ནང་དུ་ཡིན་ཤག་མཛད་སྣང་ངོ་། །

དབུར་སྟོད་ཀྱི་སྣོན་གྱི་མདའ་དང་ཉེ་བའི་ལུང་པའི་ནང་གི་སྦྲ་སྟོད་ཚལ་དུ་བཙན་པོ་དེ་ཉིད་འཁྲུངས་པར་བཞེད་པ་ནི། མར་པ་ལོ་ཙཱ་བ་ཆོས་ཀྱི་བློ་གྲོས་དང་དུས་མཚུངས་པའི་ལོ་ཙཱ་བ་ཆེན་པོ་འགོས་ཁུག་པ་ལྷས་བཙས་ཀྱི་སློབ་བརྒྱུད་དུ་བྱུང་བའི་རྡོག་གིས་བརྩམས་པའི་བསྟན་བཅོས་གྲགས་ཅན་རྡོག་གི་ཟེ་མ་ར་མགོ་ཞེས་པར་གཟིགས་ན། བོད་ཀྱི་རྒྱལ་རབས་སྐབས་སུ། གནམ་རི་སྲོང་བཙན་དང་། ཁབ་འབྲེ་ཚ་ཐོད་དཀར་ཤོས་པ་ལས། གནོན་མདའ་སྒྲ་སྟོད་ཚལ་དུ་སྐུ་བལྟམས་པ་ནི་བྱང་ཆུབ་སེམས་དཔའ་སྲོང་བཙན་སྒམ་པོ་སྟེ། ཞེས་གསལ་བར་བཀོད་འདུག་ལ། ལོ་རྒྱུས་མཁས་པ་ས་ཆེན་གྲགས་པ་རྒྱལ་མཚན་དང་ནེའུ་པ་སྨོན་ལམ་བློ་གྲོས་གཉིས་ཀ་ཞལ་མཐུན་པར་ནེའུ་ཆོས་འབྱུང་ལས། སྲོང་བཙན་སྒམ་པོ་མེ་མོ་གླང་ལ་༼སྦྲ་སྟོད་ཚལ་དུ་༽འཁྲུངས།།ཞེས་མཆན་བུ་གསལ་བར་བཀོད་འདུག་པས། གཉིས་ཀས་དབུར་སྟོད་སྦྲ་སྟོད་ཚལ་དུ་འཁྲུངས་པར་བཞེད་པར་གསལ་ཡོད་ལ། དཔའ་བོ་གཙུག་ཕྲེང་ཡང་དོན་ལ་སྦྲ་སྟོད་ཚལ་དུ་འཁྲུངས་པར་བཞེད་པ་ཡིན་ནོ། །

དེས་ན་ཡིག་ཆའི་ལོ་དུས་ཀྱི་ཆ་དང་ནང་དོན་གྱི་ཆ་སོགས་ལ་གཞིགས་ན། ད་ཆ་བཀའ་ཆེམས་དང་མ་ཎི་བཀའ་འབུམ་གཉིས་ལོ་རྒྱུས་རིན་ཐང་ཅུང་ཟད་མར་ཆག་ཡོད་མོད་ཀྱང་། བཙན་པོ་མཆོག་ཡར་ལུང་གི་ཕོ་བྲང་བྱམས་སྙོམས་གླིང་དུ་ལྷུམས་སུ་ཞུགས་པ་དང་། དབུས་སྟོད་སྦྲ་སྟོད་ཚལ་དུ་སྐུ་བལྟམས་པར་སྙམ་མོ།།ལྷ་སའི་ཇོ་ཁང་མདུན་གྱི་བཙན་པོའི་རྡོ་རིང་ལས། ལྷ་སའི་ཤར་ཕྱོགས་སྦྲ་སྟོད་ཚལ་ཞེས་པ་དེ་ཉིད་ར་ས་འཕྲུལ་སྣང་གི་ཤར་ཕྱོགས་སྦྲ་ནག་ཞོལ་གྱི་གནའ་མིང་དུ་འདོད་སྲིད་ནའང་། ཡིག་རྙིང་ན་གནོན་མདའ་ཞེས་གསལ་བ་དང་། ད་ལྟའང་དབུར་སྟོད་ན་སྣོན་མདའ་ཞེས་ས་མིང་མ་འགྱུར་བར་གནས་ཡོད་ཅིང་། ཏུན་ཧོང་ཡིག་ཆར་མྱང་དབས་མནོན་དང་གསུམ་དབུ་རུ་སྟོད་ན་ཡོད་པར་གསལ་བས་ཀྱང་ཤེས་ནུས་སོ། །

འདི་ཙམ་སྨྲས་པར་ཞུགས་པ་ལ་ཅི་ཅིག་ཡོངས་གྲགས་ཡིན། ཉི་ཉིག་ཡོངས་གྲགས་ཡིན། ཐེ་ཚོམ་དང་དོགས་སློང་གི་དགོས་པ་གང་ཡང་མེད་དོ་ཟེར་ནས་ལོག་རྟོག་ཏུ་བརྩི་ཞིང་། དེའི་རྩོམ་ཡིག་བལྟ་མི་ཉན། རྩོམ་དེབ་ཉར་མི་རུང་ཟེར་བ་མང་མོད་ཀྱང་། ལོ་རྒྱུས་ཀྱི་བཞེད་སྲོལ་ཁག་ལ་མཐའ་དཔྱོད་ནི་མེད་དུ་མི་རུང་ཞིང་། མཐའ་དཔྱོད་ལ་ཡང་མཐའ་དཔྱད་གལ་ཆེར་གྱུར་བ་མ་ཟད། ཡོད་ཚད་བར་སྣང་གི་འཇའ་དང་ལྷན་དུ་མ་ལྡིང་བར་ས་ངོས་སུ་བབས་དགོས་པའི་དུས་རབས་ཡིན་ལ། བཙན་པོ་སྲོང་བཙན་དབུ་གཉིས་ཅན་དང་བཙན་པོ་དར་མ་གླང་རྭ་ཅན་ནི་ཕྱིས་བྱུང་གི་གཏམ་ལས་བྱུང་བ་ལས། གནའ་བོའི་ལོ་རྒྱུས་དངོས་མིན་པའི་གནས་ལུགས་ནི་མཐའ་དཔྱོད་ཀྱི་འབྲས་བུ་ཡིན་ལ། དེ་ནི་མི་རབས་རྗེས་མར་འགན་འཁུར་བའང་ཡིན་འདུག་པས། འདིར་ཡང་དོགས་པ་བཀོད་པ་ནི་མཁས་པ་གཟུ་གནས་དག་གིས་མཐའ་དཔྱོད་གནང་བའི་གཞིར་དམིགས་པ་ཁོ་ན་ཉིད་དོ། །