འོལ་ཁ་སྟག་རྩེ་རྫོང་གི་གནའ་ཤུལ་མཇལ་བ།

འོལ་ཁ་སྟག་རྩེ་རྫོང་གི་གནའ་ཤུལ་མཇལ་བ།
འོལ་ཁ་སྟག་རྩེ་རྫོང་གི་གནའ་ཤུལ་མཇལ་བ།
མཁས་དབང་ར་སེ་དཀོན་རྒྱམ།
འོལ་ཁ་སྟག་རྩེ་རྫོང་ཞེས་པ་འདི་ནི་བོད་ཀྱི་ལོ་རྒྱུས་ཐོག་སྙན་གྲགས་འབར་མྱོང་བའི་རྫོང་ཆེན་ཅིག་ཡིན་འདུག་སྟེ། དེ་ཉིད་གནས་ཡུལ་འོལ་ཁ་ཞེས་པ་འདི་ནི་བོད་ཀྱི་ཆེས་གནའ་བོའི་ས་མིང་ཁོངས་སུ་གཏོགས་པ་མ་ཟད། དེ་འབྲེལ་གྱི་བོད་ཀྱི་ལོ་རྒྱུས་རིང་མོའི་མགོ་ཁུངས་སུ་གྱུར་པ་ཅིག་ཀྱང་ཡིན་ལ། ད་ལྟ་ལྷོ་ཁ་གྲོང་ཁྱེར་ཟངས་རི་རྫོང་ཞོལ་པ་སྡེ་ཤོག་གི་ཞོལ་བ་གྲོང་ཚོའི་འགྲམ་དུ་གནས་ཡོད་ལ། ཞོལ་པ་ཞེས་པ་ནི་འོལ་ཁ་སྟག་རྩེ་རྫོང་གི་ཞོལ་དུ་གནས་པའི་ཆ་ནས་ཐོགས་པ་ཅིག་ཡིན་འདུག་གོ།
བོད་ཀྱི་གནའ་བོའི་ལོ་རྒྱུས་འཆད་སྐབས་ས་བཅད་དང་པོར། སྟོད་ཀྱི་ལྷ་རབས་ཞེས་པ་དེ་ཉིད་ཡིན་ལ། སྟོད་ལྷ་རབས་བཤད་དུས་བོད་ཀྱི་སྲིད་པ་ཆགས་པའི་ལྷ་དགུ་དང་། རྗེ་ཡི་མགུར་ལྷ་བཅུ་གསུམ་སོགས་ཀྱི་རྣམ་གཞག་གླེང་དུས། སྲིད་པ་ཆགས་པའི་ལྷ་དགུ་ཞེས་པའི་སྲིད་པའི་ལྷ་རྒན་དེ་དག་གི་ཡབ་ཆེན་འོལ་དེ་གུང་རྒྱལ་ཞེས་པ་དེ་ཉིད་དང་ངོ་བོ་གཅིག་ཏུ་གྱུར་བའི་སྲིད་པའི་གངས་རི་ཆེན་པོ་འོལ་དེ་གུང་རྒྱལ་ཞེས་པ་སྙན་པ་ཕྱོགས་ཀུན་ཏུ་འཕུར་བ་དེ་ཉིད་ཀྱང་འོལ་ཀའི་ལྗོངས་ཏེ། འོལ་ཁ་སྟག་རྩེ་རྫོང་གི་ལྷོ་ངོས་ཀྱི་ས་འཛིན་ཕྲེང་བ་གངས་ཀྱིས་ལ་ཐོད་སྤྲས་པ་འདི་ཉིད་ཡིན་པས། དེ་འབྲེལ་ཡ་ཐོག་སྲིད་པའི་ལོ་རྒྱུས་མང་པོ་གཏམ་རྒྱུད་ཀྱི་ཚུལ་དུ་མེས་པོ་ཚོའི་བྱུང་རབས་བསྙད་དུ་ཡོད་ལ། དེ་བཞིན་སྤུར་རྒྱལ་གོང་གི་རྒྱལ་ཕྲན་སིལ་མའི་སྐབས་སུ་ཡུལ་འདི་ཉིད་ཀྱང་རྒྱལ་ཕྲན་ཅིག་ཡིན་པས། ཏུན་ཧོང་ཡིག་ཚངས་ན་ས་ཁོངས་དང་རྒྱལ་བློན་སོགས་གསལ་པོར་འཁོད་ཡོད་པས་ཤེས་ཐུབ་པ་ཡིན་ཞིང་། དེར་འོལ་ཕུ་སྤང་མཁར་ན།ཞེས་མཁར་གྱི་མིང་བཀོད་འདུག་པས། ཕྱིས་ཀྱི་སྟག་རྩེ་རྫོང་ཡང་གནའ་བོའི་མཁར་ཤུལ་ཐོག་བསྐྲུན་པའི་ངང་ཚུལ་མངོན་པར་གསལ་ཡོད་དོ། །
བོད་ཀྱི་སྲིད་རབས་སུ་གསལ་བའི་ཕག་གྲུའི་སྲིད་རབས་ཀྱི་ཏའི་སི་ཏུ་བྱང་ཆུབ་རྒྱལ་མཚན་གྱི་སྐུ་རིང་ལ་བརྩིགས་པའི་རྫོང་ཆེན་བཅུ་གསུམ་གྱི་གྲས་ཡིན་པར་སྣང་། དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ལས། ཕག་གྲུའི་སྐབས། གོང་དཀར། བྲག་དཀར། སྣེའུ། འོལ་ཁ་སྟག་རྩེ། བསམ་འགྲུབ་རྩེ། ལྷུན་གྲུབ་རྩེ། རིན་སྤུངས་སོགས་དབུས་གཙང་འཛིན་མའི་ལྟེ་བའི་ས་མདུད་རྣམས་ལ་རྫོང་ཆེན་བཅུ་གསུམ་བརྩིགས། ཞེས་གསལ་བའི་ཕྱིར། རྫོང་འདི་ཉིད་ལ་ལོ་རྒྱུས་ཡུན་རིང་ལྡན་པས། རྫོང་དང་འབྲེལ་བའི་ལོ་རྒྱུས་མཚར་དུ་དངར་བ་ཅིག་དང་། བརྗོད་པས་མི་ལང་བ་ཅིག་ཡོད་པར་ངེས་པས། ཞིབ་ཆ་ནི་ལོ་རྒྱུས་ཞིབ་ཆ་སྨྲ་བ་རྣམས་ཀྱི་སྤྱོད་ཡུལ་ཉག་གཅིག་གོ །
ད་ལྟ་རང་རེའི་མིག་ལམ་དུ་སྣང་བའི་འོལ་ཀ་སྟག་རྩེ་རྫོང་སྟེ། གནའ་བོའི་མིང་མ་ཉམས་པར་གནས་པའི་སྤང་མཁར་ཆུ་ཚན་སོགས་ནད་ཀྱི་གདུང་བ་སེལ་བའི་འོལ་ཀའི་ཆུ་ཚན་ཁག་གི་སྙན་པ་རྣ་ལམ་དུ་ཐོས་པས་ཡིད་རབ་ཏུ་བསྐུལ་ཏེ། བྱང་ངོས་མལ་དྲོ་གུང་དཀར་རྫོང་གི་མལ་དྲོའི་ཕུ་ཡི་མལ་དྲོ་གཟི་ཆེན་ནམ་གཟི་བྱིན་བླ་མཚོ་དང་དེ་ལས་འབབས་པའི་མལ་དྲོའི་མ་ཆུ་དལ་གྱིས་རྒྱུ་བའི་ཡུལ་གྱི་ལྷོ་ངོས། ཟངས་རི་རྫོང་ཁོངས་འོལ་ཁ་ལུང་པ་སྟེ། ཞོལ་པ་སྡེ་ཤོག་གི་གཞུང་དུ་མཆིས་པའི་ཆུ་ཚན་གྱི་འཕྲོད་བསྟེན་ལ་རོལ་བའི་ཚེ་ན། ལོ་ངོས་དེར་ཀུན་གྱི་འདྲེན་བྱེད་ལམ་དུ་ཞོལ་བ་གྲོང་ཚོའི་ནུབ་སྣེ། བྲག་རྡོག་གི་རྩེར་བརྩིགས་པའི་གནའ་ཤུལ་མཁར་རོ་འདི་ནི་འོལ་ཁ་སྟག་རྩེ་རྫོང་ཞེས་པ་དེ་ཉིད་ཡིན་འདུག་གོ །
ཁོ་བོས་འོལ་ཁ་ཆུ་ཚན་དུ་འདུ་བ་སྙོམས་པར་ཕྱིན་པའི་ཚེ་ན། རིང་པོ་རྣ་ལམ་དུ་ཐོས་པའི་འོལ་ཁ་སྟག་རྩེ་རྫོང་ཞེས་པ་དེ་ཉིད་ཐུང་ངུ་མིག་ལམ་དུ་མཇལ་བའི་ཚེ་ན། ཆེད་དུ་འགྲམ་དུ་བཅར་བའི་ཚེ་ན་གནའ་བོའི་བོད་ཀྱི་རྫོང་མཁར་གྱི་ཨར་ལས་ལག་རྩལ་གྱི་ཐུན་མིན་གྱི་རྩིག་རྩལ་ཁྱད་ཆོས་ངོ་མཚར་བ་མཐོང་བས། འཐོར་ཞིག་ཏུ་སོང་བའི་རྫོང་མཁར་གྱི་ལྷག་རོ་སྟེ། ཤར་ལྷོའི་ཕྱོགས་ཀྱི་རྩིག་པའི་གྲུ་ཟུར་འདི་ཉིད་ཁོ་ནས་ཀྱང་འདས་དོན་སྤྱི་དང་ཨར་ལས་ཀྱི་ལག་རྩལ་དང་འཆར་འགོད་སོགས་ཕྱོགས་མང་པོ་ནས་མེས་པོ་ཚོའི་དུས་བསྟུན་གྱི་རྣམ་དཔྱོད་ཀྱི་རྩལ་བདེ་བླག་ཏུ་མཇལ་ཐུབ་པས། དུས་རབས་སོ་སོའི་མང་ཚོགས་ཀྱི་ལག་ཤེས་ཀྱིས་ཡིད་དབང་འཕྲོག་པའི་དཔལ་ཡོན་མངའ་བར་རྟོགས་པར་ནུས་པར་སྣང་ངོ་། །
རང་རྒྱལ་གྱི་གནའ་དཔྱད་རིག་པར་མཐོང་ཆེན་གནང་སྟེ་མི་སྣ་མང་པོ་གསོ་སྐྱོང་དང་གནའ་རྫས་དང་གནའ་ཤུལ་ལ་སྲུང་སྐྱོབ་རབ་དང་རིམ་པ་གནང་ཞིང་། བོད་ལྗོངས་སུ་སྒུལ་བའི་རིག་དངོས་དང་། སྒུལ་མི་རུང་བའི་རིག་དངོས་ཡོངས་བཤེར་ཐེངས་གསུམ་གནང་སྟེ། སྲུང་སྐྱོབ་ཐད་ལ་མ་དངུལ་འབོར་ཆེན་གནང་བ་སོགས་བཀའ་དྲིན་བསྐྱངས་ཡོད་པ་ལ། གནའ་མཁར་གྱི་ཤུལ་འདི་དང་རྩིག་པ་འདི་དག་ནི་སྒུལ་མི་རུང་བའི་རིག་དངོས་འཁྲུལ་མེད་ཡིན་འདུག་པས། གནའ་ཤུལ་འདིར་ལྗོངས་གྲོང་རྫོང་རིམ་པ་གང་རུ་ཡིན་དགོས་པ་དང་། སྲུང་སྐྱོབ་ཀྱི་རིམ་པ་གང་ཡིན་དང་། ཚན་པ་གང་གིས་དུས་ཚོད་ག་དུས་གསལ་བསྒྲགས་བྱས་ཚུལ་གསལ་བའི་རྡོ་བྱང་བཙུགས་པ་ཅིག་ཡོད་ཐང་བ་ལ། གནའ་ཤུལ་ལ་བསྐོར་བ་བརྒྱབ་ཀྱང་མིག་ལམ་དུ་མ་འཁེལ་བ་ཡིན་ནམ་གང་ལྟར་མ་མཇལ་བས། གང་ཡིན་ནམ་སྙམ་པའི་ཡ་མཚན་ཀྱང་སྐྱེས་བྱུང་ངོ་། །༢༠༢༢ ༧ ༡༢

བརྒྱུད་སྐུལ།

མཆན་སྤེལ།