འབའ་ར་དཀར་བརྒྱུད་དང་དེའི་སྲོལ་འབྱེད་སུ་ཡིན་མཁྱེན་ནམ།

འབའ་ར་དཀར་བརྒྱུད་དང་དེའི་སྲོལ་འབྱེད་སུ་ཡིན་མཁྱེན་ནམ།

སྤོས་ཁང་སྒྲོལ་བཟང་།

འབའ་ར་བ་རྒྱལ་མཚན་དཔལ་བཟང་།

སྟོད་འབྲུག་བསྟན་པའི་རྒྱུད་འཛིན་འབའ་ར་བ་རྒྱལ་མཚན་དཔལ་བཟང་མཆོག་ནི་འབའ་ར་དཀར་བརྒྱུད་ཀྱི་སྲོལ་འབྱེད་ཡིན། ཁོང་ནི་གཙང་གཡས་རུ་ཤངས་ཀྱི་ཆབ་ལུང་པར་དཔོན་འབུམ་ཞེས་པའི་མི་ཆེན་དེ་དང་ཡུམ་བསོད་ནམས་འབུམ་གྱི་སྲས་སུ་རབ་བྱུང་ལྔ་པའི་ལྕགས་ཁྱི་སྤྱི་ལོ་ 1310 ལོར་བལྟམས། དེང་ཤངས་རྣམ་གླིང་རྫོང་མཁར་རྩེ་ཡུལ་ཤོག་ཆབ་གྲོང་ཚོ་ཡིན། རུས་རྒྱ། བྱིས་པའི་དུས་ནས་བྱམས་དང་སྙིང་རྗེ་ཆེན་པོ་མངའ།

དགུང་ལོ་བཅོ་ལྔར་ཆོས་གྲྭ་ཆེན་པོ་བོ་དོང་ཨེར་བླ་མ་དཔལ་ལྡན་སེང་གེ་པས་མཁན་པོ་མཛད། བླ་མ་བཟང་པོ་པས་སློབ་དཔོན་མཛད་ནས་རབ་ཏུ་བྱུང་། མཚན་རྒྱལ་མཚན་དཔལ་བཟང་པོར་གསོལ། བླ་མ་བྱང་ཆུབ་བཟང་པོའི་དྲུང་དུ་བྲོས་ནས། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་ཞུས་ཏེ་བསྒོམས་པས། བླ་མ་མཉེས། བླ་མ་རིན་ཆེན་དཔལ་བཟང་དྲུང་དུ་བསྙེན་པར་རྫོགས། བདེ་མཆོག་རིམ་ལྔ་དང་སྦྱོར་དྲུག་གི་ཁྲིད་རྣམས་ཞུས། སྐུ་མཚམས་དམ་པོ་བཅད་ནས་བསྒོམས་པས། ཏིང་ངེ་འཛིན་གྱི་སྒོ་དུ་མ་ཐུགས་ལ་འཁྲུངས་ཤིང་། གདམས་ངག་གི་མཐའ་ཆོད་པར་མཛད། ཟུར་ཕུག་（1263-1330）པའི་སྙན་པ་གསན་པས་བ་སྤུ་གཡོ་བའི་མོས་གུས་ཚད་མེད་པས་ཉེར་གཅིག་ལ་ལ་སྟོད་ཤྲཱིར་འབད་པ་ཆེན་པོས་བྱོན། རི་ཆོས་གསུང་བ་དང་ཁེལ་བས། རྟེན་འབྲེལ་འགྲིགས་གསུངས་ནས། རྒྱལ་བ་ཡང་དགོན་པའི་རི་ཆོས་སྐོར་གསུམ་དང་། ཕྱག་ཆེན་དང་། ནཱ་རོའི་ཆོས་དྲུག་གི་ཁྲིད་གེགས་སེལ། མན་ངག ཞལ་གདམས་དང་བཅས་པ་ཐམས་ཅད་ཟླ་བ་བདུན་གྱི་རིང་ལ་གནང་། ཆོས་དྲི་གཏུགས་ལ་བླ་མ་ཤིན་ཏུ་མཉེས། སྲས་ཀྱི་དམ་པར་མཛད་ནས། སྔར་གཞན་ལ་མ་གནང་བའི་གདམས་ངག་ཟབ་ལ་མང་བ་བསྩལ། ཀརྨ་པ་རང་བྱུང་རྡོ་རྗེ་དང་བུ་སྟོན་ཆོས་རྗེ། སྒྲོ་མོན་པ་ཅན་ལ་སོགས་པའི་བླ་མ་རྣམས་ལས་ཁྲིད་ཞུས་པ་ཙམ་གྱིས་དེ་དག་དོན་ཇི་ལྟ་བ་བཞིན་ཐུགས་ལ་འཁྲུངས་བཀའ་དྲིན་ཆེ་བ་ནི་ཟུར་ཕུག་པ་ཁོ་ན་ལ་མཛད། ལོ་ཉི་ཤུ་ཙམ་དབུ་སྔས་ལ་མ་བཞག་པར། སྒོམ་སྒྲུབ་དོས་དྲག་ལ་སྙུགས་རིང་བ་མཛད་པས། ཉམས་རྟོགས་མཐར་ཕྱིན་ཅིང་། ལྷག་ལྷའི་ཞལ་གཟིགས། མངོན་མཁྱེན། བསམ་གྱིས་མི་ཁྱབ་པ་མངའ། དབུས་གཙང་དང་ལྷོ་མོན་སོགས་རི་ཁྲོད་ཕྱོགས་མེད་དུ་བྱོན་བཞུགས་མཛད་དུས་མྱང་ཡུལ་སྤོས་ཁང་རྟ་ལམ་ཕུག་པར་ཡང་བཞུགས་པ་འདྲ།

མྱང་ཆོས་འབྱུང་ལས། སྤོས་ཁང་གི་མདའ་ན་འབའ་ར་བ་རྒྱལ་མཚན་དཔལ་བཟང་གི་སྒྲུབ་པ་མཛད་པའི་ཕུག་པ་རྟ་ལམ་ཞེས་པ་གསལ་བ་འདིར་སྐྱེས་མཆོག་དམ་པ་འབའ་ར་བ་རྒྱལ་མཚན་དཔལ་བཟང་གི་སྒྲུབ་པ་མཛད་པའི་སྒྲུབ་ཕུག་རྟ་ལམ་ཞེས་ལྷ་སའི་ཤར་ངོས་ཀེའུ་ཚང་རི་ཁྲོད་དང་འདྲ་བར་བྲག་རི་གཡང་ཟར་ཅན་གྱི་སྟེང་ངོ་མཚར་ཅན་གྱི་རྟ་ལམ་དགོན་པ་ཡོད།  དགོན་པའི་གཤམ་དང་གཡས་གཡོན་ལྕོངས་བྲག་བྲག་ལ་སྒོམ་ཁང་མང་པོ་ཡོད།  སྤོས་ཁང་སྒང་ལྷོའི་གཤམ་ནས་བལྟས་ཚེ་སྨོན་སྐྱིད་དགོན་པའི་རྒྱབ་རིའམ་རྟ་ལམ་དགོན་པའི་རི་དབྱིབས་ནི་སེང་གེའི་དབྱིབས་ཅན་ཞིག་འདྲ་པོ་ཡོད།དེང་པ་སྣམ་རྫོང་བྱང་སྟོད་ཡུལ་ཤོག་དགེ་འཕེལ་གྲོང་ཚོ་དང་པོར་ཡོད། འབྲུག་པ་དཀར་བརྒྱུད་ཀྱི་སྐྱེས་མཆོག་དྲིན་ཆེན་རྩ་བའི་བླ་མ་གཙང་ཤར་ཕྱོགས་དགའ་ལྡན་རིན་པོ་ཆེ་སྤོས་ཁང་དགོན་པས་གདན་འདྲེན་སྐབས་རྟ་ལམ་ཕུག་པ་འདི་ནི་ཤིན་ཏུ་རྩ་ཆེན་རེད་ཅེས་ཡར་ལམ་ཁྲུས་གསོལ་རབ་གནས་ཀྱང་ལན་མང་མཛད། རྟ་ལམ་གྱི་གཤམ་དུ་ཡོད་པའི་སྨིན་དགོན་དུ་ཡང་སྐྱེས་མཆོག་འབའ་ར་བའི་གསུང་གསར་བསྒྲིགས་པོད་ཆེན་བཅུ་བཞི་བཞུགས་ཡོད།

ཕྱིས་སུ་ཤངས་འབའ་རའི་བྲག་དཀར་དགོན་ཞེས་བྱ་བའི་རི་ཁྲོད་ཕྱག་བཏབ་སྟེ་བཞུགས་པས་མཚན་ཡང་འབའ་ར་བ་ཞེས་གྲགས། འབའ་རའི་རི་རྩེར་ཡང་དབེན་དོན་གྲུབ་སྡིངས་དང་ལ་དྭགས་འབར་ལྡན་དགོན་ཕྱག་བཏབ། རྗེ་བླ་མ་ཙོང་ཁ་པས་ཀྱང་འབའ་ར་བ་དེ་སྐྱོ་ཤས་ཅན་ཞིག་འདུག་པས་དེའི་སྟོབས་ཀྱིས་ངེས་འབྱུང་དང་སྐྱོ་ཤས་དྲག་པོ་འཁྲུངས་པ་མ་ཟད་ཚེ་འདིའི་སྣང་ཞེན་ཆུང་དུ་སོང་ཞེས་གསུངས།  སྟོན་སྒོམ་གངས་ཀྱི་འདྲ་བ་ཞེས་བསྔགས་བརྗོད་ཚད་མེད་གནང་བ་མ་ཟད་ཕྱག་ཆེན་ཡང་ཞུས་འདུག  ཀུན་མཁྱེན་པདྨ་དཀར་པོས། སྟོད་འབྲུག་གི་མ་རྐང་འབའ་ར་བ་ལ་ཐུག་ཅེས་བསྔགས་བརྗོད་མཛད། མཐར་ལྷོ་སྤ་གྲོ་འབྲང་རྒྱས་སྟེང་དུ། གྱ་གསུམ་པ་རབ་བྱུང་བདུན་པའི་ལྕགས་ལུག་སྤྱི་ལོ 1391 ལོའི་ཆོ་འཕྲུལ་ཆེན་པོ་རྟའི་ཟླ་བའི་ཚེས་བཅོ་ལྔའི་ཐོ་རངས་སུ་ངོ་མཚར་བའི་རྟགས་དང་བཅས་ཞི་བར་གཤེགས། འབའ་ར་བའི་གསུང་འབུམ་ད་ལྟའི་ཆར་བཞུགས་པ་ནི།  འཇིག་རྟེན་ཁམས་ཀྱི་རྣམ་བཤད་ཀྱི་དཀའ་འགྲེལ་དང་།   ཀུན་མཁྱེན་དོལ་བུའི་བུ་ཆེན་བརྒྱད་ལ་ལན་ཕྱོགས་ཏུ་བཏབ་པ་ངེས་དོན་གསལ་བྱེད་སོགས་གསུང་པོད་ཆེན་བཅུ་བཞི་བཞུགས།  དེང་ཡང་ཀུན་མཁྱེན་བསྟན་པ་རབ་རྒྱས་མཆོག་ནས་འཆད་ཁྲིད་གནང་བས་འཕྲིན་ལས་ཆེ། སློབ་མ་ཡང་སྟོད་ན་གྲགས་ཆེ་བ་ཤཱཀྱ་དཔལ་བཟང་། སྨད་ན་གྲགས་ཆེ་བ་ཆོས་རྗེ་ནམ་ལེགས་པ། དབུས་གཙང་ན་གྲགས་ཆེ་བ་ཐུགས་སྲས་ནམ་མཁའ་སེང་གེ་དང་གཙང་པ་བློ་གྲོས་བཟང་པོ་སོགས། སློབ་བརྒྱུད་ཀྱིས་བོད་ཡུལ་ཀུན་བཀང་། གདན་ས་ནི་གཙོ་བོ་དབོན་རྒྱུད་ཀྱིས་བཟུང་ཤངས་ཀྱི་འབའ་ར་དགོན་བཏབ་རྗེས་གྲོ་མོ་བཀའ་བརྒྱུད་དགོན་པར་ཡང་མཛད་རྗེས་མང་དུ་མཛད།  ཡུལ་འདིའི་བཤད་སྲོལ་ལ། ཤངས་ཀྱི་འབའ་ར་དགོན་པར།། རྟོགས་ཕོ་བརྒྱ་དང་རྟོགས་མོ་བརྒྱ། །ཟེར་བ་ལྟར་དགོན་དེ་ནས་གྲུབ་པ་ཐོབ་པའི་རྟོགས་ལྡན་ཕོ་མོ་ཁྱད་པར་ཅན་མང་པོ་བྱུང་།   ཡང་དར་དུས་བསྐྱར་བཞེངས་མེད་པར་ལུས་པ་ལས་དེའི་གོང་ལ་དགོན་སྡེ་ཡོད་འདུག དགོན་ལག་ནི་གྲོ་མོ་བཀའ་བརྒྱུད་དགོན་དང་གདོང་དཀར་ཆོས་ལུང་དགོན་ཡིན། ད་ལྟའི་ཆར་དགོན་ཤུལ་དེར་ཆུ་མིག་ཁྱད་པར་ཅན་ཞིག་ཡོད་པ་དང་བྲག་རི་གཡང་གཟར་ཅན་གྱི་སྟེང་ན་གྱང་རོའི་ཤུལ་རྒྱ་ཆེ་ཙམ་ཞིག་མཇལ་རྒྱུ་ཡོད།  འབའ་ར་དགོན་གནས་ཡུལ་ནི་རྣམ་གླིང་རྫོང་མཁར་རྩེ་ཡུལ་ཚོའི་རྩེ་ལྷ་གྲོང་ཚོར་ཡོད། ཕྱིས་སུ་འབའ་རའི་སྤྲུལ་སྐུ་ནམ་མཁའ་རྒྱལ་མཚན་（1475-1530）སྤྲུལ་སྐུ་ཀརྨ་གསལ་བྱེད། སྤྲུལ་སྐུ་རིན་ཆེན་བསྟན་པའི་གསལ་བྱེད་（1658-1696）སོགས་བྱོན་མྱོང་ཡོད་ཏོ། །

གཞན་ཡང་རིན་སྤུངས་རྫོང་ཁུལ་དུ་རྗེ་འབའ་ར་བའི་དགོན་པ་འབྲང་རྒྱས་དགོན་ཞུ་བ་ཞིག་ཀྱང་ཕྱག་བཏབ་པ་འདྲ་སྟེ་དེ་ཡང་ཇོ་ནང་ཏཱ་ར་ནཱ་ཐ་དང་དུས་མཉམ་པའི་བླ་མ་གྲགས་པ་རྒྱ་མཚོའི་རྣམ་ཐར་ལས། རིན་ཆེན་སྤུངས་སུ་བྱོན་དེར་ཡང་ཆོས་མཛད་མགྲོན་གཉེར་ཕྱག་མཛོད་སོགས་སྐྱ་སེར་མང་པོར་འདོད་ཆོས་ཀྱི་ཚིམས་པར་མཛད་ནས་རིན་སྤུངས་དགོན་པའི་གདན་ས་རང་དུ་ཕེབས་ཤིང་བཞུགས་པ་ལ། ཡང་དཔོན་སློབ་རྡོར་འཛིན་པས་གདན་འདྲེན་ཞུས་པར་བསྟེན་རྗེ་འབའ་ར་བ་རྒྱལ་མཚན་དཔལ་བཟང་པོའི་གདན་ས་འབྲང་རྒྱས་དགོན་པར་བྱོན། དེར་ཞི་ཁྲོ་དགོངས་པ་རང་གྲོལ་གྱི་དབང་ལུང་དང་ཕྱག་རྡོར་དྲེགས་འདུལ་གྱི་དབང་ལུང་། དུས་འཁོར་གྱི་དབང་ལུང་ཚེ་ཁྲིད་སོགས་གནང་ནས་དེའི་དབྱར་ཁ་ཆོས་སྐྱོང་རྩེར་བཞུགས་བཀའ་བརྒྱད་བདེ་གཤེགས་འདུས་པའི་དབང་ལུང་ཡོངས་རྫོགས་དང་བདེ་དགྱེས་དུས་འཁོར་སོགས་ཀྱི་རྒྱུད་སྡེའི་ལུང་གནང་། དེ་ནས་ཡང་མཚམས་བྲག་ཆོས་རྗེ་བའི་གདན་ཞུས་ལྟར་ཕེབས། དེར་ཀུན་མཁྱེན་ཆེན་པོ་ཏཱ་ར་ནཱ་ཐས་མཛད་པའི་བདེ་བར་གཤེགས་པའི་རྣམ་ཐར་དང་། གཙང་མཁན་ཆེན་ནམ་སྤོས་ཁང་མཁན་ཆེན་འཇམ་དབྱངས་དཔལ་ལྡན་རྒྱ་མཚོས་མཛད་པའི་སྟོན་པའི་རྣམ་ཐར་དང་མགུར་འབུམ་སོགས་དང་བཀའ་གདམས་ཕ་ཆོས་བུ་ཆོས་ཀྱི་ལུང་སོགས་བསྩལ་ཞེས་གསུངས་འདུག  དེས་ན་སྐྱེས་བུ་དམ་པ་འབར་ར་བའི་རྣམ་ཐར་མཇལ་རྒྱུ་དེ་གལ་ཆེན་དུ་མཐོང་ནས་ཕུག་པ་རྟ་ལམ་གྱི་མདའ་སྨིན་དགོན་དུ་སྐྱེས་པའི་སྤོས་ཁང་སྒྲོལ་བཟང་གིས་ ༢༠༢༢/༩/༢༨ གུས་པས་ཕུལ།