༄༅། །ལྟ་བ་ངན་སེལ་གྱི་དཀའ་འགྲེལ་བཞུགས་སོ། །
༄༅། །རྒྱ་གར་སྐད་དུ། ཀུ་དྲྀཥྚི་ནི་ར་ག་ཏ་ཊཱི་ཀཱ། བོད་སྐད་དུ། ལྟ་བ་ངན་སེལ་གྱི་དཀའ་འགྲེལ། རྡོ་རྗེ་འཛིན་པ་ལ་ཕྱག་འཚལ་ལོ། །དེ་ལ་གནས་སྐབས་ནི་རྣམ་པ་གསུམ་སྟེ། རྒྱུའི་གནས་སྐབས་དང་། འབྲས་བུའི་གནས་སྐབས་དང་། སེམས་ཅན་གྱི་དོན་བྱེད་པའི་གནས་སྐབས་སོ། །དེ་ལ་སློབ་པ་ནི་རྒྱུའི་གནས་སྐབས་སོ། །
འབྲས་བུའི་གནས་སྐབས་དང་། སེམས་ཅན་གྱི་དོན་བྱེད་པའི་གནས་སྐབས་ནི་དེ་བཞིན་གཤེགས་པའོ། །དེ་ལའང་རྒྱུའི་གནས་སྐབས་ཞེས་བྱ་བ་ནི་བྱང་ཆུབ་མཆོག་ཏུ་སེམས་བསྐྱེད་པ་ནས་བཟུང་སྟེ། བྱང་ཆུབ་ཀྱི་སྙིང་པོ་ལ་མཆིས་ཀྱི་བར་རོ། །འབྲས་བུའི་གནས་སྐབས་ཞེས་བྱ་བ་ནི་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་སྐྱེས་པ་དང་། ཉོན་མོངས་པ་ཐམས་ཅད་སྤངས་པ། ཡོན་ཏན་ཐོབ་པའི་གནས་སྐབས་སོ། །སེམས་ཅན་གྱི་དོན་བྱེད་པའི་གནས་སྐབས་ཞེས་བྱ་བ་ནི་དང་པོ་ཆོས་ཀྱི་འཁོར་ལོ་བསྐོར་བ་ནས་བཟུང་སྟེ། བསྟན་པ་མ་ནུབ་ཀྱི་བར་དུའོ། །
དེ་ལ་རྒྱུའི་གནས་སྐབས་ལ་གསུམ་སྟེ། བསམ་པའི་གནས་སྐབས་དང་། སྦྱོར་བའི་གནས་སྐབས་དང་། དབང་གི་གནས་སྐབས་སོ། །དེ་ལ་བསམ་པའི་གནས་སྐབས་ནི་སེམས་ཅན་ཐམས་ཅད་ངེས་པར་ཐར་བའི་སྨོན་ལམ་མོ། །དེའི་ཉེ་བའི་དཀའ་བ་བཞི་ནི་འདི་ལྟ་སྟེ། གཞན་གྱི་སྡུག་བསྔལ་ཉེ་བར་བསལ་བ་ལ་སོ་སོར་རྟོག་པ་དང་། དགོས་པ་ལ་སོ་སོར་རྟོག་པ་དང་། གྲོགས་ལ་སོ་སོར་རྟོག་པ་དང་། ལོངས་སྤྱོད་ལ་སོ་སོར་རྟོག་པའོ། །དེ་ལ་ཐབས་སུ་འགྲོ་བས་བྱང་ཆུབ་ཏུ་སྨོན་པ་སྟེ། དེའི་རྗེས་སུ་འཚོལ་བ་བཞི་ནི་འདི་ལྟ་སྟེ། རིགས་དང་། བཤེས་གཉེན་དམ་པ་དང་། སྙིང་རྗེ་དང་། སྡུག་བསྔལ་ལ་ཇི་མི་སྙམ་པའི་བཟོད་པ་དང་བཞི་ནི་རྒྱུ་བཞིའོ། །རྐྱེན་བཞི་པོ་འདི་དག་གིས་ནི་བྱང་ཆུབ་ཀྱི་སེམས་སྐྱེ་བར་འགྱུར་རོ། །ཞེས་བྱ་བ་ཚིག་བཅུ་པོ་དག་གི་དོན་སྟོན་ཏེ། ལྷག་པའི་བསམ་པའི་གནས་སྐབས་སོ། །
དེ་ལ་སྦྱོར་བའི་གནས་སྐབས་ནི་གཉིས་ཏེ། ལྷག་པར་མོས་པའི་སྦྱོར་བས་སྦྱོར་ལམ་ཕ་རོལ་ཏུ་ཕྱིན་པ་བཅུ་དང་། ས་ཐོབ་པའི་ཕ་རོལ་ཏུ་ཕྱིན་པ་བདུན་ནོ། །དེ་ལ་ལྷག་པར་མོས་པའི་ཕ་རོལ་ཏུ་ཕྱིན་པ་བཅུ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཏེ། དེ་དག་ནི་ཕ་རོལ་ཏུ་ཕྱིན་པ་བཅུའོ། །ས་ཐོབ་པའི་སྦྱིན་པ་ནི་ཕུན་སུམ་ཚོགས་པ་སྟེ། བསམ་པ་དང་། སྦྱོར་བ་དང་། གྲོགས་གྱི་ཁྱད་པར་དང་། ཡོངས་སུ་འཛིན་པ་དང་། སྦྱིན་པ་ཕུན་སུམ་ཚོགས་པ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་ཏེ། དེ་དག་ནི་ཕ་རོལ་ཏུ་ཕྱིན་པ་བདུན་ནོ། །ལྷག་པར་མོས་པའི་སྦྱོར་བ་དག་པ་ལས་ཕ་རོལ་ཏུ་ཕྱིན་པ་དག་བྱེ་བྲག་ཏུ་གྱུར་པའོ། །རྣམ་པ་གཉིས་པོ་འདི་དག་ནི་སྦྱོར་བའི་གནས་སྐབས་སོ། །
དེ་ལ་དབང་ལྔ་ནི་འདི་ལྟ་སྟེ། ཉོན་མོངས་པ་དང་། སྐྱེ་བ་དང་། ལས་དང་། ཐབས་དང་། སེམས་ཅན་ཡོངས་སུ་སྨིན་པ་ལ་དབང་བ་རྣམས་སོ། །དེ་ལ་རྒྱུའི་གནས་སྐབས་ལ་གནས་པ་ལས་དང་པོ་པ་རྣམས་ཀྱིས་ཐམས་ཅད་བྱའོ། །དེ་ལས་འབྲས་བུའི་གནས་སྐབས་དང་། སེམས་ཅན་གྱི་དོན་བྱེད་པའི་གནས་སྐབས་ལ་གནས་པ་རྣམས་ཀྱིས་ཤཱཀྱ་ཐུབ་པ་ལྟར་འབད་པ་མེད་པར་ལས་དང་པོ་ལ་རབ་ཏུ་འཇུག་གོ །འདི་དག་གིས་ནི་ལྟ་བ་ངན་པ་སེལ་བ་རྒྱས་པར་ཤེས་པར་བྱའོ། །ལྟ་བ་ངན་པ་སེལ་བའི་དཀའ་འགྲེལ་ལམ། དྲན་པ་ཞེས་བྱ་བ་དཔལ་ལྡན་ལེགས་པར་སྦྱངས་པ་གཉིས་སུ་མེད་པའི་རྡོ་རྗེས་མཛད་པ་རྫོགས་སོ། །རྒྱ་གར་གྱི་མཁན་པོ་བཛྭ་པ་ཎི་དང་། བོད་ཀྱི་ལོ་ཙཱ་བ་མཚུར་སྟོན་ཛྙྱཱ་ནཱ་ཀ་རས་བསྒྱུར་ཞིང་ཞུས་ཏེ་གཏན་ལ་ཕབ་པའོ།། །།
