དག་ཡིག་བློ་གསར་གཞོན་ནུ་དགའ་བྱེད་ཅེས་བྱ་བ་བཞུགས་སོ།།
༄༅། །དག་ཡིག་བློ་གསར་གཞོན་ནུ་དགའ་བྱེད་ཅེས་བྱ་བ་བཞུགས་སོ།། ཅོ་ནེ་གྲགས་པ་བཤད་སྒྲུབ། (༡༦༧༥-༡༧༤༩) ༄༅། །ན་མོ་མཉྫུ་ཤྲཱི་ཡེ། དངོས་གྲུབ་འབྱུང་གནས་རྗེ་བཙུན་འཕགས་མ་སྒྲོལ། །འཆི་མེད་ཚེ་ཡི་དཔལ་སྟེར་རྣམ་པར་རྒྱལ། །ཚིག་གི་མཆོག་སྦྱིན་དབྱངས་ཅན་ལྷ་མོའི་ཞབས། །དུས་གནས་བྱང་ཆུབ་བར་དུ་གཙུག་གིས་བསྟེན། །ཡིག་སྡེབ་རྒྱས་པ་གཞན་དུ་བཤད་ཟིན་ཀྱང༌། །འདིར་ཡང་དོན་གཉེར་ཅན་གྱིས་བསྐུལ་བའི་ངོར། །གསར་བུ་དག་ལ་གོ་སླའི་ཚུལ་གྱིས་དང༌། །ཅུང་ཟད་རྟོགས་དཀའ་ཐོར་བུ་བསྡུས་ཏེ་བཤད། །བ་བཀར་ལོགས་བཀར་ད་དཀར་ཁ་དོག་དཀར། །ར་རྐ་ཆུའི་རྐ་ད་དཀའ་མི་ནུས་དཀའ། །བ་བཀའ་བཀའ་ལུང་རོ་བསྐ་བ་སའི་བསྐ། །བ་བཀལ་ཁལ་བཀལ་ཁྲལ་བཀལ་སྐུད་པ་བཀལ། ། ས་སྐལ་ཐོབ་སྐལ་བསྐལ་པ་བ་སའི་བསྐལ། །ར་རྐན་རྐན་ཕུག་བ་བཀན་གྱེན་དུ་བཀན། །བ་སའི་བསྐོས་ནི་དཔོན་དུ་བསྐོས་པ་སྟེ། །བ་རའི་བརྐོས་ནི་ས་སོགས་བརྐོས་པའི་མིང༌། །ས་སྐུར་སྐུར་འདེབས་ནོར་བསྐུར་བ་སའི་བསྐུར། །བ་སའི་བསྐུས་ནི་ཚོན་སོགས་བསྐུས་པའི་མིང༌། །བ་འོག་ར་བརྐུ་མ་བྱིན་ལེན་པའོ། །ད་དཀྲོལ་རོལ་མོ་བརྡུང་བའི་མིང་ཡིན་ཏེ། །བ་བཀྲོལ་བཅིངས་པ་བཀྲོལ་བའི་མིང་དུ་འདོད། །ས་སྐུག་གབ་པ་ལ་ལྐུག་སྨྲ་མི་ཤེས། །ད་དཀུ་སྟ་ཟུར་ས་སྐུ་བླ་མའི་སྐུ། །ར་རྐུ་རྐུན་པོ་བརྐུས་ཟིན་བ་རའི་བརྐུས། །བ་བཀུམ་བསད་པ་ལག་བསྐུམ་བ་སའི་བསྐུམ། །བ་བཀང་སྣོད་བཀང་ཐུགས་བསྐང་བ་སའི་བསྐང༌། །བ་རའི་བརྐྱངས་ནི་རྐང་པ་སོགས་བརྐྱང་བ། །བ་སའི་བསྐྱངས་ནི་དྲིན་གྱིས་བསྐྱངས་པའོ། །བ་བཀོན་གནོད་ལན་ད་དཀོན་རྙེད་དཀའ་དཀོན། །བ་སའི་བསྐོན་ནི་གོས་སོགས་བསྐོན་པའི་མིང༌། །བ་བཀྲ་མདོག་སོགས་བཀྲ་དང་བཀྲ་ཤིས་ཏེ། །ས་བཏགས་སྐྲ་ནི་མགོ་ཡི་སྐྲ་ཡིན་ནོ། །བ་བཀྲག་འོད་ཆེ་ས་སྐྲག་འཇིགས་པའི་མིང༌།…