འཕན་པོ་ལྷུན་གྲུབ་རྫོང་ནི་གྲོང་ཁྱེར་ལྷ་སའི་ལྷུན་གྲུབ་རྫོང་གསུམ་ཕྲེང་ཤང་རྫོང་ཞོལ་གྲོང་ཚོའི་བྱང་ངོས་རི་སྟེང་དུ་ཡོད།       ལྷུན་གྲུབ་ཅེས་པ་ནི། མ་བསྒྲུབ་ལྷུན་གྱིས་གྲུབ་པའི་དོན་དུ་གོ་ཞིང༌། སྔོན་གྱི་ལྷུན་གྲུབ་རྫོང་ནི་ད་ལྟའི་རྫོང་གནས་ཡུལ་ནས་བྱང་ངོས་ཆག་ལའི་ཕྱོགས་སུ་སོང་ན་སྤྱི་ལེ་བཞི་ལྔ་ཙམ་གྱི་ས་ན་རྫོང་ཞོལ་ཞེས་པར་ཡོད།

དབུས་སྟོད་བྱེ་རི་སྟག་རྩེ་རྫོང་ནི། ད་ལྟ་ལྷ་ས་ས་ཁུལ་གྱི་སྟག་རྩེ་རྫོང་ཞོགས་ཤང་སྟག་རྩེའི་རི་སྣའི་སྟེང་དུ་གྱང་གོག་ཆེན་པོ་ཞིག་ཡོད་པ་དེ་ཡིན་ལ། དེང་སྐབས་དེར་ཞོགས་སྟག་རྩེ་ཞེས་འབོད་ཅིང་། སྔར་སྡེ་སྲིད་ཕག་གྲུའི་སྐབས་དབུས་གཙང་གཉིས་ཀྱི་ས་དགག་ཏུ་རྫོང་ཆེན་བཅུ་གསུམ་བརྩིགས་པར་གྲགས་པའི་གྲས་ཀྱི་བྱེ་རི་སྟག་རྩེ་རྫོང་ཞེས་པ་དེ་ཡིན་ཞིང༌། སྟག་རྩེ་ཞེས་པ་ནི། རི་བོ་སྟག་ལྟ་བུའི་རྩེ་མོར་གནས་པའི་རྫོང་ངམ། རྫོང་བཙན་པོ་སྟག་ལྟ་བུའི་དོན་སོགས་གསུང་སྲོལ་མི་འདྲ་བ་མཆིས། སྔོན་གྱི་སྟག་རྩེ་རྫོང་ནི། ད་ལྟའི་སྟག་རྩེ་རྫོང་གི་ཆུ་ཕར་ཕྱོགས་ཕུན་ཚོགས་གླིང་ཞེས་པར་རྫོང་ཤུལ་ཙམ་ལས་རིག་གསར་སྐབས་གཏོར་བཤིག་གིས་གྱང་གོག་ཙམ་ལས་མིང་གི་ལྷག་མར་གྱུར་ཟིན་ཏོ།།

         བྲག་དཀར་གསང་སྔགས་བདེ་ཆེན་རྫོང་ནི། ད་ལྟ་གྲོང་ཁྱེར་ལྷ་སའི་སྟག་རྩེ་རྫོང་གནས་ཡུལ་བདེ་ཆེན་གྲོང་རྡལ་གྱི་གཞུང་ལམ་བྱང་ངོས་རི་སྟེང་དུ་ཡོད། སྐྱིད་ཤོད་བདེ་ཆེན་རྫོང་དང༌། བྲག་དཀར་བདེ་ཆེན་རྫོང༌། གསང་སྔགས་བདེ་ཆེན་རྫོང་སོགས་མིང་གི་རྣམ་གྲངས་སུ་འབོད་ཅིང༌། བདེ་ཆེན་གསང་སྔགས་མཁར་ནི། ད་ལྟའི་སྟག་རྩེ་རྫོང་གི་ཉེ་འགྲམ་དང༌། སྔོན་བདེ་ཆེན་རྫོང་ཤུལ་གྱི་རི་འདབས་སུ་དགོན་དེ་མཇལ་རྒྱུ་ཡོད།

འོལ་དགའ་སྟག་རྩེ་རྫོང་ནི་ད་ལྟ་ལྷོ་ཁ་ས་གནས་ཟངས་རི་རྫོང་འོལ་དགའ་ཤང་འོལ་དགའ་གྲོང་ཚོའི་རི་ཆུང་སྟེང་ཡོད། རྫོང་འདི་ཡང་ཏཱའི་སི་ཏུ་བྱང་ཆུབ་རྒྱལ་མཚན་གྱིས་རབ་བྱུང་ ༦ པའི་ས་གླང་སྤྱི་ལོ་ ༡༣༤༩ ལོར་བོད་ཆོལ་ཁ་གསུམ་ཡོངས་རྫོགས་མངའ་དབང་བསྡུས་རྗེས་དབུས་གཙང་གཉིས་ཀྱི་ས་འགག་ཏུ་རྫོང་ཆེན་བཅུ་གསུམ་དུ་གྲགས་པ་བརྩིགས་པའི་ནང་གི་གཅིག་ཡིན་ལ། རྫོང་འདིའི་ལོ་རྒྱུས་བྱུང་རིམ་སྐོར་ཀྱི་དཔྱད་གཞིའི་ཡིག་ཆ་ལག་སོན་མ་བྱུང་བས་ཀློག་པ་པོ་རྣམས་ནས་ཁ་སྐོང་དག་བཅོས་ཡོད་པ་ཞུ།

འཕྱོངས་རྒྱས་འཕྱིང་བར་སྟག་རྩེ་རྫོང་ནི། སྔོན་བཙན་པོའི་སྐབས་སུ་ཕྱིང་བའི་ཡུལ་དུ་གྲགས་ཤིང་ད་ལྟ་འཕྱོངས་རྒྱས་རྫོང་ཞེས་འབོད། ཕྱིང་བ་སྟག་རྩེ་ནི་ལྷོ་ཁ་རྩེད་ཐང་གི་ལྷོ་ནུབ་ཕྱོགས་སུ་གནས་པའི་འཕྱོངས་རྒྱས་རྫོང་གནས་ཡུལ་འདི་ཡིན་ལ། སྔར་གནས་འདིར་ཡར་ལུངས་ཕྱིང་ལུངས་ཞེས་བཙན་པོའི་བཞུགས་གནས་དང༌། བཙན་པོའི་སྐབས་སུ་ཚེས་སྤོང་གི་རུས་རྒྱུད་ཀྱིས་དབང་བསྒྱུར་བའི་སྟོང་ཞིག་དང༌། ས་སྐྱའི་དུས་རབས་སུ་བོད་ཁྲི་སྐོར་བཅུ་གསུམ་གྱི་ནང་ཚན་ཐང་པོ་ཆེའི་ཁྲི་སྐོར། ཕག་གྲུའི་སྐབས་རྫོང་ཆེན་བཅུ་གསུམ་གྱི་ནང་ཚན་འཕྱོངས་རྒྱས་འཕྱིང་བར་སྟག་རྩེ་རྫོང༌།

སྣེ་གདོང་རྫོང་ནི། ད་ལྟ་ལྷོ་ཁ་ས་གནས་སྣེ་གདོང་རྫོང་སྣེ་གདོང་གྲོང་ཚོའི་བྱང་ངོས་རྒྱབ་རི་གླང་ཆེན་འགྱིང་པ་འདྲ་བའི་རི་སྟེང་དུ་གནས་ཤིང༌། སྣེ་གདོང་རྫོང་ནི་རི་གླང་ཆེན་འགྱིང་འདྲའི་སྣ་སྟེང་དུ་ཆགས་སྟབས་སྣེ་གདོང་ཞེས་མིང་ཐོགས་ཚུལ་དང༌། གཞན་ཡང༌། སྣེ་གདོང་ཞེས་པའི་གོ་དོན་དངོས་ནི། ཏཱ་སི་ཏུ་བྱང་ཆུབ་རྒྱལ་མཚན་གྱིས་སྣེ་གདོང་དང༌། གོང་དཀར། འོལ་ཁ། སྟག་རྩེ། བསམ་གྲུབ་རྩེ་སོགས་རྫོང་ཆེན་བཅུ་གསུམ་བཙུགས་པའི་ནང་ནས་ཐོག་མ་སྟེ། སྣེའམ་སྔ་ཤོས་སུ་བཙུགས་པའི་རྫོང་ཡིན་པས་ན་སྣེ་གདོང་ཞེས་གྲགས།