ཉང་སྟོད་རྒྱལ་མཁར་རྩེ་རྫོང་ནི། ད་ལྟ་གཞིས་ཀ་རྩེ་ས་གནས་རྒྱལ་རྩེ་རྫོང་གནས་ཡུལ་རྒྱལ་རྩེ་གྲོང་རྡལ་གྱི་རྫོང་རིའི་སྟེང་དུ་ཡོད། རྫོང་འདི་ཐོག་མའི་འབྱུང་ཁུངས་ནི་བཙན་པོ་རྒྱལ་པོ་གླང་དར་གྱི་གདུང་སྲས་དྲི་མ་མེད་པ་གནམ་ལྡེ་འོད་སྲུང་དང༌། སྲས་གཞན་མངའ་བདག་ཡུམ་བརྟན་གཉིས་རྒྱལ་སྲིད་ལ་མ་འཆམ་པས་ཡུམ་བརྟན་གྱིས་དབུ་རུ་དང༌། འོད་སྲུང་གིས་གཡོ་རུ་ཞེས་ལྷོ་བྱང་བཅད་བཟུང་གིས་དབུ་གཡོར་འཁྲུག་པ་བྱུང་སྟེ་བོད་ཁམས་སིལ་བུའི་དུས་འོད་སྲུང་ཕྱོགས་ཁག་སྟོབས་ཞན་ཕམ་ཁ་བྱུང་ནས་དབུས་གཙང་གྱེས་ཤུགས་ཇེ་ཆེར་སྟེ་མཐར་འོད་སྲུང་གི་སྐུ་ཚེའི་མཇུག་གཡོ་རུར་གནས་པའི་སྟོབས་ཤུགས་བརྟན་གནས་མ་ཐུབ་པར་གཙང་ཕྱོགས་སུ་འཕོ་སྐྱས་གནང་དགོས་བྱུང་རྐྱེན་འོད་སྲུང་གི་སྲས་མངའ་བདག་དཔལ་འཁོར་བཙན་གྱིས་དང་ཐོག་རྒྱལ་རྩེར་གནས་གཞི་བཅའ་སྟེ་མྱང་སྟོད་ཤར་ཁ་བ་ཞེས་པའི་ཡུལ་གྲུའི་རི་བོའི་རྩེར་ཕོ་བྲང་རྒྱལ་མཁར་རྩེ་ཟེར་བ་བསྐྲུན་པར་བརྟེན་བསྡུས་མིང་རྒྱལ་རྩེ་ཞེས་གྲགས་པ་བྱུང༌།

       རོང་རིན་སྤུངས་རྫོང་ནི་གཞིས་རྩེ་ས་གནས་རིན་སྤུངས་རྫོང་རིན་སྤུངས་ཤང༌། རིན་སྤུངས་གྲོང་ཚོའི་རི་སྣའི་སྟེང་དུ་ཡོད། དེ་ཡང༌། རིན་སྤུངས་རྫོང་ངམ་ཕོ་བྲང་རིན་ཆེན་སྤུངས་པ་ཞེས་པ་ནི། ཕག་གྲུ་བྱང་ཆུབ་རྒྱལ་མཚན་གྱིས་བོད་ཁམས་ལ་མངའ་དབང་བསྒྱུར་སྐབས་དབུས་གཙང་གཉིས་ཀྱི་ས་འགག་ལ་རྫོང་ཆེན་བཅུ་གསུམ་བརྩིགས་པར་གྲགས་པའི་ཁོངས་རིན་སྤུངས་འདི་ཉིད་རྫོང་འགོ་ཆེ་གྲས་ཤིག་ཡིན་ལ། རྫོང་འདི་རབ་བྱུང་དྲུག་པའི་འགོ་ཙམ་ལ་བརྩིགས་པར་གྲགས་ཤིང༌།

  ཡར་འབྲོག་དཔལ་སྡེ་རྫོང་ནི། དེང་ལྷོ་ཁ་ས་གནས་གོང་དཀར་རྫོང་ཁོངས་དང༌། སྔར་སྣ་དཀར་རྩེ་རྫོང་དཔལ་སྡེ་གྲོང་ཚོའི་རི་ལྡེབས་སུ་ཡོད། དཔལ་ལྡེ་རྫོང་ནི་སྣ་དཀར་རྫོང་གི་བྱང་རྒྱུད་དུ་གནས་ལ། ཡིག་སྡེབ་ཐད་དཔལ་སྡེ་དང༌། དཔལ་དི་ཞེས་འབྲི་སྲོལ་མི་འདྲ་བ་གཉིས་སུ་མཆིས། འདི་སྐོར་ལོ་རྒྱུས་ཞིབ་གསལ་མ་བརྙེད་པས་འོལ་ཚོད་ཀྱི་བརྗོད་པར་མ་སྤོབས། ཡར་འབྲོག་སྣ་དཀར་རྩེ་རྫོང་ནི། དུས་སྐབས་གང་གི་སྐབས་སུ་བྱུང་མིན་གསལ་བར་མ་མཐོང་ཡང་རིགས་པས་དཔྱད་ན་ཏཱའི་སི་ཏུ་བྱང་ཆུབ་རྒྱལ་མཚན་གྱིས་རབ་བྱུང་དྲུག་པའི་འགོར་ས་སྐྱ་པའི་སྲིད་དབང་ཕྲོགས་རྗེས་དབུས་གཙང་གཉིས་སུ་རྫོང་ཆེན་བཅུ་གསུམ་བརྩིགས་པར་བཤད་པའི་ནང་གི་གཅིག་ཡིན་ནམ་སྙམ་སྟེ་དཔྱད་པར་འཚལ་ལ། འདིའི་སྐོར་ཞིབ་པར་དེབ་དམར་གསར་མའི་ནང་གསལ་ལོ།།

       ཆུ་ཤུར་ཡར་གསུམ་ལྷུན་པོ་རྩེ་རྫོང་ནི། ད་ལྟ་གྲོང་ཁྱེར་ལྷ་སའི་ཆུ་ཤུར་རྫོང་གནས་ཡུལ་ཆུ་ཤུར་གྲོང་རྡལ་གྱི་ནུབ་ངོས་རི་སྟེང་ཡོད། ཆུ་ཤུར་ཞེས་པ་ནི། ཆུ་བོའི་རྒྱུགས་ཤུལ་དུ་ཆགས་པའི་ཡུལ་ལ་ཆུ་ཤུར་ཞེས་མིང་ཐོགས་པར་གྲགས་ལ། སྔོན་གྱི་ཡར་གསུམ་ལྷུན་པོ་རྩེ་རྫོང་ཡང་དེང་རྗེས་ཤུལ་ཙམ་མེད། ད་ལྟའི་ཆུ་ཤུར་རྫོང་ཆགས་ཡུལ་ནི་ཞོལ་གྲོང་ཚོར་གནས་ཡོད་ལ། རྫོང་དེའི་སྤྱིའི་རྒྱ་ཁྱོན་སྤྱི་ལེ་ངོས་སྙོམས་གྲུ་བཞི་མ་ ༡༦༢༤ དང༌། མི་འབོར་ཁྲི་ ༢ཿ༩ ས་བབས་དམའ་ཤོས་ལ་རྒྱ་མཚོའི་ངོས་ནས་སྤྱི་ཁྲེ་ ༣༥༠༠ དང༌། མཐོ་ཤོས་ལ་རྒྱ་མཚོའི་ངོས་ལས་སྤྱི་ཁྲེ་ ༥༨༩༤ ཙམ་གྱི་ས་བབས་ཅན་གྱི་ས་མ་འབྲོག་གི་རྫོང་ཞིག་ཡིན།

       ཡར་རྒྱབ་གོང་དཀར་རྫོང་ནི་ད་ལྟ་ལྷོ་ཁ་ས་གནས་གོང་དཀར་རྫོང་སྐྱིད་སྣ་ཤང་གོང་དཀར་ཞོལ་གྱི་རྒྱབ་རིའི་སྟེང་དུ་ཡོད་ཅིང༌། གོང་དཀར་ཞེས་པ་ནི་སྔོན་སྣེ་གདོང་རྒྱལ་པོའི་ཕོ་བྲང་གོང་རི་དཀར་པོ་ལ་གོང་དཀར་ཞེས་འབོད་པ་དེ་ཡིན་ལ། གོང་དཀར་རྫོང་ངམ་གོང་དཀར་གཞིས་ཀ་སྟེ་དེ་སྔོན་ཏཱའི་སི་ཏུ་བྱང་ཆུབ་རྒྱལ་མཚན་གྱིས་བོད་ཁམས་ཀྱི་དབང་ཆ་བཟུང་སྐབས། གོང་དཀར་གཞིས་ཀ་དེ་ལྷོ་ཁ་དང༌། དབུས་གཙང་གསུམ་གྱི་ས་ཆའི་འདུས་མདོ་གལ་ཆེར་བརྟེན།

གཞིས་ཀ་སྣེའུ་རྫོང་ནི་ད་ལྟ་སྟོད་ལུང་བདེ་རྫོང་སྣེའུ་ཤང་ར་མ་སྒང་གྲོང་ཚོའི་ཁོངས་སུ་ཡོད། སྣེའུ་རྫོང་ནི་སྔར་ཏཱའི་སི་ཏུ་བྱང་ཆུབ་རྒྱལ་མཚན་གྱིས་རབ་བྱུང་ ༦ པའི་ས་གླང་ ༡༣༤༩ ལོ་ནས་ལོ་ ༡༦ རིང་སྲིད་དབང་བཟུང་སྐབས་དབུས་གཙང་གཉིས་ཀྱི་ས་དགག་ཏུ་རྫོང་ཆེན་བཅུ་གསུམ་བརྩིགས་པར་གྲགས་པའི་གྲས་ཀྱི་གཅིག་འདི་ཡིན་པ་དང༌།