གཞི་རྒྱུད་རང་བཞིན་དག་པའི་གཉུག་མ་ཡི་འོད་གསལ།། ལམ་རྒྱུད་ལྷན་ཅིག་སྐྱེས་པའི་ཟུང་འཇུག་གི་གར་མཁན།། འབྲས་རྒྱུད་མངོན་སུམ་བྱེད་པའི་གསང་ཆེན་གྱི་མངའ་བདག། གཙང་སྨྱོན་ཧེ་རུ་ཀ་དཔལ་སྙིང་དབུས་ནས་དྲན་བྱུང་།།   ཀ་དག་གཉུག་མའི་ངོ་བོ་ཀུན་ཁྱབ་ཀྱི་ཆོས་སྐུ།། ཁ་སྦྱོར་ཡན་ལག་བདུན་ལྡན་རང་བཞིན་གྱི་ལོངས་སྐུ།། ག་ལའི་མོས་ངོར་འགྲོ་འདུལ་མཚན་ཉིད་ཀྱི་སྤྲུལ་སྐུ།། ང་ཅག་འདྲེན་མཆོག་ཀུན་འདུས་གཙང་སྨྱོན་པ་དྲན་བྱུང་།།

 གཙང་གི་མཁན་ཆེན་ཧའོ་རིན་པོ་ཆེས་བརྩམས།   དོན་ཆེན་ཐུག་དུས་སྒྱིད་པ་འདར།   ། དོན་ཆུང་བྱེད་ལ་ངར་ཤ་བསྐྱེད།   ། དེ་ཡང་ལྐུགས་པའི་བློ་ཁོག་ཡིན།  །   མ་གྲུབ་གོང་ལ་ཁ་ནས་ལུད།  ། གྲུབ་པའི་འབྲས་བུ་ཤིན་ཏུ་རིང་།   ། དེ་ཡང་ལྐུག་པའི་སྤྱང་རྟགས་ཡིན།  །   སྐྱོན་ཆུང་མཐོང་ན་འུར་སྒྲོགས་བྱེད།   ། ཡག་ཆུང་མཐོང་ན་ཆེན་པོར་བརྗོད།   ། དེ་ཡང་ལྐུག་པའི་མཁས་རྟགས་ཡིན།   །

《1》རང་གཞན་གཉིས་ལ་གདམས་པ། ཆོས་རབ། བསྐལ་བའི་ཐོག་མ་མི་རྙེད་ཅིང་།། ཕ་མའི་ཕ་མ་མི་དྲན་ཡང་།། ཆོས་དང་མཇལ་བའི་དུས་བཟང་ལ།། འཛམ་གླིང་ཉི་མའི་འོད་དུ་བྱས།། ཕལ་བའི་གོམ་ཁ་བསྒྱུར་ན་ཡང་།། ཐར་པའི་མན་ངག་ཐོས་པའི་ཚེ།། འཇིག་རྟེན་མི་དང་མི་འདྲ་བའི།། སྙིང་པོའི་ཆོས་ཤིག་བྱས་ན་བསམ།། སྙིང་ལ་སྡུག་པའི་འཇིག་རྟེན་གྱི།། གྲོགས་སམ་ཡང་ན་མེ་ཏོག་ཀྱེ།།

མགྲིན་སྔོན་གསེར་མངལ་ཅན་དང་པད་དཀར་མིག །ལྷ་དང་བློ་ལྡན་ལ་སོགས་ལེགས་བྲིས་ཀྱི། །བགྲང་ཡས་དྲེགས་ལྡན་ཀུན་གྱི་ཅོད་པན་དུ། །དྲི་བྲལ་ཞབས་ཟུང་འགོད་ལ་གུས་པས་འདུད། །འཕགས་ཡུལ་ཀུན་གསལ་མཛེས་མའི་འགྲམ་པ་ལ། །ཟ་ཧོར་རྒྱལ་རིགས་ཟླ་ཤེལ་ཞུན་མའི་ངོས། །འོད་དཔག་མེད་མགོན་སྤྲུལ་པའི་རི་དྭགས་གཟུགས། །འགོག་མེད་གསལ་བར་ཤར་ལ་གསོལ་བ་འདེབས། །དཔལ་སྟུག་ཉི་མའི་གཉེན་དང་དབྱེར་མེད་པའི། །བླ་མེད་ཆོས་ཀུན་གཟིགས་པའི་མར་མེ་ཡིས། །འགྲོ་རྣམས་བླང་དོར་ལ་རྨོངས་མུན་པའི་དཔུང་། །སེལ་མཛད་གྲངས་མེད་ཡོན་ཏན་ཕུལ་འབྱུང་གཏེར། །