༄༅། །སྟོན་པའི་བསྟན་པ་ལ་བྱི་དོར་བྱ་བའི་ཚིགས་སུ་བཅད་པ་ལྔ་བཅུ་པ།།
༼གཙང་ནག་པ་བརྩོན་འགྲུས་སེངྒེ་།༽
༄༅། །བཅོམ་ལྡན་འདས་ཤག་ཀྱའི་(ཤཱཀྱ་)སེངྒེ་ལ་ཕྱག་འཚལ་ལོ། །ཀྱེ་མ་ད་ནི་བདེ་ལེགས་ཀུན་གྱི་གཞི། །ཐུབ་པའི་བསྟན་པ་བྱ་བས་རྗེས་བསྒྲུབ་པ། །ཉན་བཤད་མཁས་དང་ལྟ་སྤྱོད་བསྒོམ་པ་ཡི། །སྣང་གྲགས་ཀུན་ལ་ཆོས་བལྟར་(ལྟར་)སྣང་བ་འབྱུང་། །རྩེ་བས་(རྩ་བའི་)དོན་གཞུང་སྤྱོད་པ་གཉིས་གཉིས་ཀྱིས། །བསྟན་བཤད་ངེས་པའི་དབྱངས་དང་མི་ལྡན་པར། །ཀླུ་སྒྲུང་གླ་བརྡོལ་སྣོད་མྱེད་མཆིག་འདྲ་བའི། །བཤད་པ་རྣམས་ནི་འཐོ་འཚམ་ངག་རྐྱལ་(ཀྱལ་)ཡིན། །
བསྒྲུབ་ཕྱིར་གུས་པས་ཉན་དང་ཐོས་པའི་དོན། །སེམས་(བསམ་)དང་འདྲི་བའི་ཆོས་གསུམ་མི་ལྡན་པར། །གཟུགས་སྒྲ་ཟས་ལ་ཆགས་པས་ཆོས་ཉན་པའང་། །ཐོས་པའི་དོན་མྱེད་ཆགས་པས་ཚེ་ཟད་འགྱུར། །འདི་ན་ཁ་ཅིག་རྒྱལ་བའི་བསྟན་པ་ལ། །ཞུགས་ཀྱང་དེ་དོན་བསྒྲུབ་པའི་མཐུའ་མྱེད་པར། །ཚིག་བློ་མྱེད་ཁྱེར་འོད་ཀྱིས་གདོང་(འདོམ་)གང་གི །དོན་རྩམ་མཐོང་མཁས་སྙམ་ང་རྒྱལ་བྱེད། །སྐྱེས་བུ་ཤེས་རབ་སྙིང་རྗེ་ཏིང་འཛིན་དང་། །བསྒྲུབ་པའི་ནན་ཏན་ལྡན་ཡང་ཐུབ་པའི་(པ་ཡི་)། །བསྟན་ལ་མང་དུ་ཐོས་པའི་ནོར་མྱེད་ན། །ཀུན་མཁྱེན་ལམ་གྱི་ཡན་ལག་མ་ཚང་འགྱུར། །སྒྲ་དང་ཚད་མས་མ་བསལ་(གསལ)ཕྱི་ནང་གི། །རྩོད་པ་ཟློག་པའི་གཞུང་བརྒྱའ་འབྱེད་པས་ཀྱང་། །དགེ་དང་མི་དགེ་ཟག་བཅས་ཟག་མྱེད་ཀྱི། །སྲིད་ཞིའི་ལས་ལམ་རྣམ་དབྱེའ་མི་ཤེས་སོ། །ཕུང་པོ་སྐྱེ་མཆེད་ཁམས་ཀྱི་མཚན་ཉིད་དང་། །གྲངས་ཚད་རྣམ་པའི་རབ་དབྱེའ་མཁས་པས་ཀྱང། །གང་གཞིག་(ཞིག་)མ་རྟོགས་རྟོགས་ནས་འཆིང་བ་དང་། །གྲོལ་འགྱུར་དངོས་པོའི་རང་བཞིན་མི་ཤེས་སོ། །ཚུལ་ཁྲིམས་མིག་གི་འབྲས་བཞིན་བསྲུང་བྱེད་པའི། །དགེ་སློང་ལུང་བཞིའི་འདུལ་བ་འཛིན་པས་ཀྱང་། །སྲིད་དང་ཞི་བའི་མཆོག་སྨན་ཐམས་ཅད་ཀྱི། །བྱེད་པོའི་སེམས་ཉིད་ཡིན་པར་མི་ཤེས་སོ། །མི་རྟག་ལས་འབྲས་འཁོར་བའི་ཉེས་པ་དང་། །བྱམས་པ་བསྒོམ་ཞིང་སྐྱབས་གསུམ་མཆོད་པས་ཀྱང་། །མྱུར་དུ་མི་བཟད་སྲིད་པའི་རྒྱའ་མཚོ་ལས། །རྒལ་(བརྒལ་)བ་ཤེས་རབ་རྩལ་དུ་མི་ཤེས་སོ། །རྒྱུད་མ་འཆད་དང་དབང་དང་དཀྱིལ་འཁོར་དང། །སྔགས་དང་ཕྱག་རྒྱ་སྦྱིན་སྲེག་སྟོང་བྱེད་ཅིང་། །ཉིན་རེ་ལུས་ལ་ལྷ་བརྒྱའ་འགོད་པས་ཀྱང་། །གང་གིས་འཁོར་བའི་རྒྱུ་ཉིད་མི་ཤེས་སོ། །ལུང་དང་རིགས་པས་གཞུང་བརྒྱའ་འབྱེད་པ་ཡི། །ཤེས་རབ་དད་དང་ལྡན་ཡང་བླ་མའི་(བླ་མ་ཡི་)། །མན་ངག་མྱེད་ན་བདེ་ལེགས་དོན་གཉེར་བས། །གང་དུ་ཅི་ལྟར་ཅི་བྱ་མི་ཤེས་སོ། །
གཞན་ཡང་ཐོས་ཉུང་དེ་དག་ཉེ་ཚེའི་བློས། །རང་ལུགས་ཆགས་ཤིང་མི་ཤེས་མ་མཐོང་བའི། །ཆོས་སྒོ་གཞན་ལ་སྡང་བས་སྐུར་འདེབས་པས། །ཆགས་སྡང་རྨོངས་པས་དགེ་མེད་སྡིག་པར་འགྱུར། །དེ་དག་མཁས་པའི་མཚན་ཉིད་བྱ་བ་དང་། །འབྲས་བུ་མྱེད་བཞིན་འཁྲུལ་པས་དེར་བརློམ་སྟེ། །གནས་ལ་རྨོངས་དང་བྱ་བ་མི་སྤྱོད་པས། །མི་ཁོམ་དག་ཏུ་ཡུན་རིངས་(རིང་)དུཿཁ་འགྱུར། །གང་གྱིས་(གིས་)སྒྲུབ་བྱེད་ལུང་དང་རིགས་པ་ཡིས། །བསྒྲུབ་བྱ་བདེན་གཉིས་བསྒྲུབ་པའི་ཚོགས་གཉིས་ཀྱི། །འབྲས་བུ་དོན་གཉིས་རྣམ་གསུམ་རྗེས་འབྲེལ་དང་། །མཐའ་བྲལ་དབུའ་མར་ཤེས་དེ་མཁས་པ་ཡིན། །གང་གི་དངོས་པོ་རྣམས་ཀྱི་ཡང་དག་མཐའ། །དུས་གསུམ་རྒྱལ་བ་ཀུན་ཀྱིས་བསྟན་པ་དང་། །བསྒོམ་བྱ་ལམ་གི་(གྱི་)དམིགས་པ་དོན་གཅིག་དུ་(ཏུ)། །དངོས་སྟོབས་རིགས་པས་ཤེས་དེ་མཁས་པ་ཡིན། །གང་གི་དུཿཁ་མི་བཟད་མཐའ་ཡས་པ། །ཐོག་མྱེད་འཁོར་བ་ནས་འོངས་ཕུང་པོའི་རྒྱུན། །ཀུན་གྱིས་ཐབས་བརྒྱས་སྤང་བར་མ་ནུས་པའི། །ཀུན་འབྱུང་ཟད་པར་ཤེས་དེ་མཁས་པ་ཡིན། །ཡེ་ཤེས་ཐུགས་རྗེ་ལྡན་པའི་བསྟན་པ་རྣམས། །བདེན་ཕན་འགལ་ཟླས་མྱེད་པར་ངེས་བྱས་ནས། །རྫོགས་པའི་བྱང་ཆུབ་ལམ་གི་(གྱི་)ཡན་ལག་དུ(ཏུ)། །ཡོངས་སུ་བསྡུའ་བ་ཤེས་དེ་མཁས་པ་ཡིན། །གང་གི་འཁོར་འདབས་སྤྲིན་ཚོགས་ལྟ་བུ་དང་། །ལུས་དང་ལོངས་སྤྱོད་ལྦུ་བ་ལྟ་བུ་ལ། །ཚེ་རབས་ཀུན་དུ་བདེ་བ་ཕུན་ཚོགས་པའི། །སྙིང་པོ་ལེན་པར་ཤེས་དེ་མཁས་པ་ཡིན། །བདག་གཞན་དོན་ལ་རྣམ་སྤྱོད་(དཔྱོད་)དགེ་བའི་བློ། །བཏང་སྟེ་དགེས་ནུས་སྟོབས་ཆེན་ལ་འཇུག་པས། །རྟག་ཏུ་སྒོ་གསུམ་ཀུན་ནས་ཅི་བྱས་པ། །རྫོགས་སངས་ལམ་དུ་ཤེས་དེ་མཁས་པ་ཡིན། །
མཁས་པས་ཐུབ་པའི་བསྟན་ལ་ལེགས་བལྟས་ནས། །གདུལ་བྱ་སྐྱེས་བུ་གསུམ་གིས་(གྱིས་)གཉེར་བའི་དོན། །བསྒྲུབ་(སྒྲུབ་)བྱེད་དད་དང་ཤེས་རབ་སྙིང་རྗེ་ལས། །བྱུང་བའི་ཐབས་དང་ཤེས་རབ་ཟུང་འཇུག་ཡིན། །ཤེས་རབ་དབུའ་མར་འཇུག་སྟེ་བདེན་གཉིས་ལས། །མཐའ་གཉིས་འགོག་པའི་བློ་ནི་ཚད་མ་ཡིན། །ཐབས་ནི་སྐྱབས་འགྲོ་སེམས་སྐྱེད་(བསྐྱེད་)སྡོམ་པ་དེའི། །སྟོན་བྱེད་སྡེ་སྣོད་གཉིས་ཀྱི་འདུལ་བ་ཡིན། །གང་ལས་རིགས་ལྡན་བླང་དོར་བློ་འབྱུང་བའི། །སྲིད་དང་ཞི་བའི་སྐྱོན་དང་ཡོན་ཏན་དང་། །དེ་རྒྱུ་སྤང་བར་སྒྲུུབ་(བསྒྲུབ་)བྱའི་དགེ་སྡིག་དང་། །ལམ་གྱི་རྣམ་དབྱེའ་སྟོན་པ་ཆོས་མངོན་ཡིན། །དེ་ཕྱིར་མཁས་པའི་དབང་པོའི་རིམ་པ་ལས། །བསྟན་པ་ཐམས་ཅད་དངོས་དང་རྒྱུད་པ་ཡིས། །བྱང་ཆུབ་མཆོག་ཉིད་བསྒྲུབ་པའི་ཡན་ལག་ན། །མཁས་པའི་བསྟན་ཆོས་(བཅོས་)དགོས་མྱེད་གང་ཞིག་ཡིན། །སྐྱབས་གསུམ་ཉེས་སྤྱོད་སྤོང་བའི་ཚུལ་ལྡན་པས། །གང་ཟག་དོན་དང་དུས་གསུམ་རྫས་སྨྲ་དང་། །འཛིན་པའི་བློ་དང་གཞན་དབང་རང་བཞིན་པར། །རྟོགས་པ་རྣམས་ནི་ནང་གི་མུ་སྟེགས་ཡིན། །གང་དག་སྟོང་པ་དངོས་ལས་དོན་གཞན་དང་། །དབྱེར་མྱེད་མ་ཡིན་དགག་དང་མེད་དགག་གི། །ཤེས་བརྗོད་གཞལ་བྱར་བརྗོད་པ་དོན་དམ་དུ། །ལྟ་བ་རྣམས་ཀྱང་ཤེས་རབ་གཟུགས་རྙན་(བརྙན་)ཡིན། །གཞན་ལ་རྣམ་པར་གཙེས་པའི་མཆོད་སྦྱིན་དང་། །ཚེ་འདིའི་འཇིགས་དང་འདུན་སྡང་རྨོངས་པ་ཡིས། །སྦྱིན་དང་ཚུལ་ཁྲིམས་བསྒོམ་པའི་བསོད་ནམས་ལ། །འཇུག་པའི་སྒོ་གསུམ་ཆོས་ལྟར་སྣང་བ་ཡིན། །མི་མཁས་རྣམས་ཀྱིས་སྐབས་སུ་མི་འཚམ་པའི། །ཉམས་ཀྱིས་མི་བཟད་བརྟུལ་ཞུགས་ལེན་པ་དང་། །གདུལ་མིན་འདུལ་དང་གོང་མ་ལ་གནོད་པའི། །དགེ་བ་སྤྱོད་པའང་ཆོས་ལྟར་སྣང་བ་ཡིན། །སྲིད་པའི་བདེ་བ་ཀུན་ལ་མ་ཆགས་པར། །འགྲོ་བ་བསྒྲལ་ཕྱིར་བྷུ་དྷ་(བུདྡྷ་)བསྒྲུབ་པའི་བློས། །དཀའ་བ་སྟོང་ཕྲག་ཡུན་རིངས་(རིང་)གུས་སྤྱད་ཀྱང་། །འཁོར་གསུམ་དམིགས་པས་སྲིད་ལས་ཐར་མི་འགྱུར། །ཆོ་ག་དམ་ཚིག་ཚུལ་དང་མི་ལྡན་པར། །ཚིག་དང་བླ་མ་ངན་པའི་རྗེས་ཞུགས་ནས། །གསང་སྔགས་ཟབ་མོ་ཚུལ་བཞིན་སྤྱོད་པ་ཡང་། །འདི་དང་གཞན་དུ་བདག་གཞན་ཕུང་བྱེད་ཡིན། །ཕུང་པོ་མི་གཙང་དུཿཁ་མི་བསྟན་དང་། །ལུས་སེམས་ལྷ་དང་ཡེ་ཤེས་ཉིད་བསྒོམ་མདའ་(འདའ)། །གཏུམ་མོ་རྩ་རླུང་ཐིག་ལེ་བསྒོམ་པ་ཡང་། །སྲིད་པའི་ས་བོན་སྲེག་པའི་ལམ་མ་ཡིན། །སྟོང་པ་ཉིད་ཀྱི་ཏིང་འཛིན་བསྟན་གོམས་ཀྱང་། །ཐབས་ལ་མཁས་པའི་བསམ་སྦྱོར་དང་བྲལ་ན། །ཕུང་པོ་ཟད་ཀྱང་ནོར་བུ་རིན་ཆེན་ལྟའི། །ཡོན་ཏན་རྒྱ་མཚོའི་བྷུ་དྷ་(བུདྡྷ་)འབྱུང་མི་འགྱུར། །
མདོར་ན་བྱང་ཆུབ་སེམས་གཉིས་དང་བྲལ་བའི། །བསམ་གཏན་རྣམ་ཐར་གཟུགས་དང་གཟུགས་མྱེད་ཀྱི། །ཏིང་འཛིན་སྙོམས་འཇུག་ཀུན་གྱི་ཡངས་(ཡོངས)ཐོབ་པའི། །ཡོན་ཏན་གཉིད་(གཉིས་)དང་སྨོན་ལམ་འདྲ་བ་ཡིན། །སྐྱོབ་པས་ཕྱི་མའི་དོན་དུ་ཉེར་བསྟན་པའི། །འཆད་ཉན་སྦྱིན་དང་ཚུལ་ཁྲིམས་ལ་སོགས་ཀྱང་། །དེ་ཡང་འགྲོ་བ་བཞི་ལྡན་མི་རྣམས་ཀྱིས། །ཕལ་ཆེར་ཚེ་འདིའི་དོན་དུ་སྤྱོད་པར་སྣང་། །ཐུབ་པའི་གསུང་རབ་རིན་ཆེན་སྒྲོན་མ་ཡང་། །དད་བློས་མྱེད་པ་རྣམས་ལ་དོན་མྱེད་དེ། །སྐྱེ་བོ་དམིག་(མིག་)དང་སྣང་བ་མྱེད་རྣམས་ལ། །ནོར་བུ་རིན་ཆེན་རྡོ་དང་མཚུངས་བཞིན་ནོ། །དུས་གསུམ་བྷུ་དྷ་(བུདྡྷ་)གང་གི་བསྟན་པ་ལའང་། །ཉེས་སྤྱོད་ཉོན་མོངས་ཀུན་ཡོངས་ཁྱབ་པའི་(པ་ཡི)། །དད་དང་ཤེས་རབ་སྙིང་རྗེ་མྱེད་པར་ཡང་། །བདེ་ལེགས་ཆོས་ཀྱི་རྒྱལ་པོར་འགྱུར་བ་མྱེད། །དེ་བས་དངོས་པོ་རྣམས་ཀྱི་ཡང་དག་མཐའ། །འགར་ཡང་མྱེད་ལ་ཅིར་ཡང་མི་བསྒོམ་པས། །འདི་ནི་ངེས་དོན་བསྒོམ་བྱ་ལམ་མཆོག་སྟེ། །འཁྲུལ་པ་ཐམས་ཅད་ཀུན་ནས་སྤོང་ཕྱིར་རོ། །གཞན་གྱི་དོན་མཛད་གཟུགས་སྐུའི་སངས་རྒྱས་ནི། །བྱང་ཆུབ་མཆོག་སེམས་ཤེས་རབ་མཚུངས་ལྡན་གྱིས། །སྦྱིན་སོགས་བསོད་ནམས་རྒྱའི་(བརྒྱ་ཡི་)དགེ་ཚོགས་དང་། །སྨོན་ལམ་གདུལ་བྱའི་དབང་ལས་བྱུང་པ་ཡིན། །གང་ཞིག་ཆོས་དེ་སེམས་ཅན་སངས་རྒྱས་ལ། །ཆགས་མྱེད་ཤེས་རབ་སྙིང་རྗེ་དད་ཡོད་པ། །དེ་ནི་ཐབས་དང་ལྡན་པའི་བརྩོན་འགྲུས་ཀྱིས། །རྫོགས་པའི་སངས་རྒྱས་གནས་སུ་བདེ་བླག་འགྲོ། །
དེ་ལྟར་ལུང་རིགས་ལྡན་པའི་མན་ངག་གིས། །སྙིང་རྗེ་སྤྱོད་དང་ལྟ་བ་ངེས་བསྒོམ་དང་། །བསམས་པར་བསྔོས་པའི་ཆོས་བཞིས་སངས་རྒྱས་ཀྱི། །ལམ་གི་(གྱི་)ཡན་ལག་བསྡུས་པ་ཡིན་ཤེས་གྱིས། །ཕྱོགས་བློ་དོར་ནས་ཤེས་བྱའི་གནས་རྣམས་ལས། །ཡོངས་སུ་བརྟགས་ནས་དངོས་དོན་འདིའོ་ཞེས། །རྣམ་གཞག་དོན་དང་ལུང་རིགས་གསུམ་སྦྱོར་ཏེ། །ཚུལ་འདི་ང་ཡི་ཀུན་སྤྱོད་ཁྱད་པར་ཡིན། །ཕྱོགས་རྣམས་དགག་བསྒྲུབ་ཉེས་སྤོང་གསུམ་བྱས་ཏེ། །སྐབས་དོན་ངོས་གཟུང་དེ་ཡི་རྣམ་དབྱེའ་དང་། །དེ་དག་འགལ་འབྲེལ་རྒྱུ་ཡིས་རྣམ་འཇོག་པའི། །ཚུལ་འདི་ང་ཡི་ཀུན་སྤྱོད་ཁྱད་པར་ཡིན། །ཚད་མས་རང་ལུགས་བསྒྲུབ་ལ་ལྟོས་མྱེད་པར། །གཞན་ཉིད་འདོད་པའི་ལྟ་བ་ངོས་གཟུང་(བཟུང་)ནས། །ཁྱད་པར་བརྟགས་པས་ནང་རྟོག་ཀུན་བཟློག་པའི། །ཚུལ་འདི་ང་ཡི་ཀུན་རྟོག་ཁྱད་པར་ཡིན། །ཆགས་སྡང་རྨོངས་པས་ཆོས་ལ་འདིའོ་ཞེས། །ཆོས་དང་གང་ཟག་གཞན་ལ་མི་སྨྲ་བར། །རང་གི་ཡིད་ཆེས་ཆོས་ལ་འབད་བྱེད་པའི། །ཚུལ་འདི་ང་ཡི་ཀུན་སྤྱོད་ཁྱད་པར་ཡིན། །
གཞན་དག་སྨྲ་བ་མྱུང་(ཉུང་)དང་འཐུན་(མཐུན་)འཇུག་དང་། །མཆོད་སྦྱིན་འདོན་ཟླས་རེམ་ལ་དགེར་འཛིན་དང་། །ངོ་ཚ་ཤེས་རབ་སྙིང་རྗེ་མཆོག་འདོད་པའི། །ཚུལ་དེས་འཇིག་རྟེན་གཞན་དང་བདག་མི་མཐུན། །བསྟན་ལ་ཞུགས་དང་ཉེ་བར་གནས་རྣམས་ཀྱི། །ཉེས་སྤྱོད་གཞན་པ་རྣམས་ཀྱིས་མ་ཡིན་དང་། །ཉེས་ཆུང་ལ་ལྟ་གནོད་ཚེ་བཟོད་པའི་(པ་ཡི)། །ཚུལ་དེས་འཇིག་རྟེན་པ་དང་བདག་མི་མཐུན། །གང་ཟག་ཆོས་དང་ཕན་ཡོན་ཉེས་དམིགས་དང་། །དགེ་དང་མི་དགེ་ལས་ཀྱི་ཕྲ་རགས་དང་། །འདི་དང་གཞན་ལས་ཕྱི་མའི་ངོར་ལྟ་བའི། །ཚུལ་དེས་འཇིག་རྟེན་པ་དང་བདག་མི་མཐུན། །འདུ་བར་མི་འདོད་འགྱེད་ལ་མི་དགའ་དང་། །ཡུལ་དང་གནས་དང་གཡོག་ལ་ངེས་མྱེད་དང་། །སྐྱེ་བོ་ཀུན་དང་འཛའ་ཎ་(མཛའ་ན)མཁོན་ཎ་(འཁོན་ན་)ཡིས། །ཚུལ་དེས་འཇིག་རྟེན་པ་དང་བདག་མི་མཐུན། །
དེ་ལྟར་སངས་རྒྱས་བསྟན་པ་རིན་ཆེན་སྒྲོན། །ཆོས་འཇིག་ཆོས་ལྟར་སྣང་བ་མང་པོ་ཡིས། །ཞིང་འདིར་རིང་པོར་མི་ཐོགས་ནུབ་འགྱུར་བས། །སྐྱེས་བུ་སྤྱོད་(དཔྱོད་)ལྡན་རྣམས་ཀྱི་བརྩོན་འགྲུས་ཀྱིས། །གཞུང་འདི་ཆོས་ཀྱི་སྙིང་པོ་ལ་སྤྱོད་ཀྱང་། །འཇིག་རྟེན་ཀུན་གྱིས་བིད་(ངེས་པར་)མི་ཤེས་པའི། །དགེ་སློང་སེང་གེས་སྙིགས་མའི་མི་རྣམས་ལ། །རང་གི་རྣམ་ཐར་གཏམ་དུ་བསྙད་པ་ཡིན། །བསྟན་པའི་གཞི་དང་རྒྱས་དབྱེ་བསྒྲུབ་པ་ལ། །ཡང་དག་ཡང་དག་མ་ཡིན་རྣམ་དབྱེའ་དང་། །རང་གྱི་(གི་)ཀུན་སྤྱོད་གཏམ་པ་རྣམ་ལྔ་འདི། །ཤག་ཀྱའི་(ཤཱཀྱའི་)བསྟན་ལ་རྣམ་དག་བྱི་དོར་ཡིན།། །།བསྟོན་(སྟོན་)པའི་བསྟན་པ་ལ་བྱི་དོར་བྱ་བའི་ཚིགས་སུ་བཅད་པ་ལྔ་བཅུ་པ། ཤག་ཀྱའི་(ཤཱཀྱའི་)དགེ་སློང་བརྩོན་འགྲུས་སེང་གེས་སྦྱར་བ།། །།ཨོཏི།།
