༄༅། །འཛམ་གླིང་ཧྲིལ་པོ་འཕྲལ་དུ་སྲུང་སྐྱོབ་བྱེད་པའི་ཤིན་ཏུ་ཛ་དྲག་ཆེ་བའི་གདུང་འབོད་འདི་ལ་གསོན་དང་། ང་ཚོས་མཐོང་བཞིན་པའི་མཁའ་དབྱིངས་རྒྱུ་སྐར་མང་པོའི་ཁྲོད་ང་ཚོ་འཚོ་གནས་བྱེད་ཡུལ་སྔོ་ལྗང་མཛེས་སྡུག་ཅན་གྱི་འཛམ་གླིང་ཧྲིལ་པོ་འདི་ཉིད། ལོ་ན་དྲུག་ཅུ་བདུན་ཅུ་ཡན་གྱི་དཔོན་ངན་འདི་ཚོའི་སྟོབས་དང་དབང་ཤུགས་ངོམ་སླད།

འཛམ་གླིང་ཧྲིལ་པོ་མཚོན་ངན་མི་ཟད་པས་བཀང་ཞིང་ཡུད་ཙམ་ལ་ནུས་མེད་ཕན་མེད་དུ་བཟོ་བའི་སྤྱོད་ངན་གྱི་འདི་རིགས་ང་ཚོས་ཅི་ཕྱིར་མི་འགོག ལྷག་ཏུ་མ་འོངས་འཛམ་གླིང་གི་བདག་པོ་སློབ་གྲྭ་འགྲིམས་བཞིན་པའི་བརྩེ་ལྡན་གཞོན་ནུ་ཕོ་མོ་ཚོས་ཅི་ཕྱིར་མི་འགོག ལོངས་ཤོག་ལོངས་ཤོག མ་འོངས་འཛམ་གླིང་གི་བདག་པོ་གཞོན་ནུ་ཕོ་མོ་ཡོངས་རྫོགས་ད་ལྟ་རང་ལོངས་ཤོག ཞི་བདེར་དགའ་ཞིང་རྗེས་ཡོང་སྔོན་དྲན་ཐུབ་པའི་སྐྱེ་བོ་རྣམ་དཔྱོད་ཅན་མཐའ་དག་ལོངས་ཤོག མི་ལོ་ས་ཡ་ནས་ས་ཡའི་བར་རང་རེ་འགྲོ་བ་མིས་མཚོན་པའི་སྐྱེ་འགྲོ་མཐའ་དག་གནས་ཡུལ་སྔོ་ལྗང་མཛེས་སྡུག་ཅན་གྱི་ཁྱིམ་ཚང་འཛམ་གླིང་ཧྲིལ་པོ་འཕྲལ་དུ་སྲུང་སྐྱོབ་ཀྱི་སླད་རིས་མེད་པའི་རྒྱལ་ཁབ་དང་ལྗོངས་ཡོངས་ཀྱི་གཞོན་ནུས་མཚོན་པའི་རྗེས་ཡོང་སྔོན་དྲན་ཐུབ་པའི་རྣམ་དཔྱོད་དང་ལྷག་བསམ་འགན་ཁུར་ཅན་མཐའ་དག་ལོངས་ཤོག ལྷག་ཏུ་མཚོན་ངན་མི་ཟད་པའི་ནང་མི་འདོད་བཞིན་དུ་བསྐྱོད་དགོས་པའི་དམག་ཞབས་རྣམས་ཀྱང་འཕྲལ་དུ་འཛམ་གླིང་སྲུང་སྐྱོབ་སླད་ལྷན་ཅིག་ཏུ་ལོངས་ཤོག རང་གཞན་གཉིས་ཀར་གནོད་པའི་དམག་འཁྲུག་མཐའ་དག་འཕྲལ་དུ་མཚམས་འཇོག་བྱེད་དགོས། འགྲོ་གྲོན་ཆེ་ལ་རང་གཞན་སྣོད་བཅུད་གཉིས་ཀར་འཕྲལ་ཕུགས་སུ་གནོད་འཚེ་ཆེ་བའི་མཚོན་ཆའི་འགྲན་བསྡུར་མཐའ་དག་འཕྲལ་དུ་མཚམས་འཇོག་བྱེད་དགོས། སྲུང་དགོས་སྲུང་དགོས་འགྲོ་གྲོན་མེད་ལ། འཚེ་མེད་སྟབས་བདེའི་དྲྭ་རྒྱའི་ཐབས་ལམ་འདི་འདྲའི་སྒོ་ནས་འཛམ་གླིང་སྣོད་བཅུད་གཉིས་ཀ་འཕྲལ་དུ་སྲུང་དགོས། །