ཡིག་སྒྱུར་གྱི་རྣམ་གཞག་དང་། ལོ་ཙཱའི་བྱུང་འཕེལ། (4)

ང) རྒྱ་གར་སྐད་དུ་དང་། འགྱུར་ཕྱག་གི་ལམ་སྲོལ།

དེ་ཡང་རྗེ་བདག་ཉིད་ཆེན་པོས་མཛད་པའི་ལེགས་བཤད་གསེར་ཕྲེང་ལས། གསུམ་པ་ནི། ཆོས་ལ་ཡིད་ཆེས་སྐྱེ། སྐད་ལ་བག་ཆགས་འཇོག རྒྱུད་ལ་བྱིན་རླབས་འབྱུང་ཞེས་སྔ་མ་རྣམས་འཆད་ཅིང༌། ཕྱི་མ་རྣམས་དེ་འགོག་མོད། འོན་ཀྱང་དང་པོ་བླ་ནས་བཀའ་སྩལ་པ་མ་གཏོགས་བསྒྱུར་ཏུ་མེད་པ་དང༌། བོད་ཀྱི་བསྟན་བཅོས་ཀྱི་མགོར་ཡང་རང་གང་འདོད་ཀྱི་རྒྱ་གར་སྐད་བྱ་ས་མེད་པའི་དུས་སུ། ཆོས་ཁུངས་མར་མཚོན་བྱེད་དུ་མཛད་པ་འདྲའོ། །ཞེས་གསུངས་པ་ལྟར་བརྡ་སྤྲོད་གཞུང་གི་དབུར། རྒྱ་གར་སྐད་དུ། ཞེས་པ་ལེགས་སྦྱར་སྐད་ལ་བག་ཆགས་འཇོག་པ་དང་། རང་རྒྱུད་ལ་བྱིན་རླབས་འཇུག་པ། བསྟན་བཅོས་ཁུངས་བཙུན་པ་བཅས་ཀྱི་དགོས་པ་རྒྱུ་མཚན་ལ་བརྟེན་ནས་རྒྱ་གར་སྐད་དུ་སྨོས་ཤིང་། ལྷག་པར་འགྱུར་ཕྱག་སློབ་དཔོན་རང་ཉིད་ཀྱི་གསུང་ཡིན་པའི་དགོངས་པ་འགྲེལ་སྟངས་ལྟར་ནའང་། བཀའ་བསྟན་གྱིས་མཚོན་བཅུ་ཕྲག་རིག་གནས་ཀྱི་གཞུང་ལུགས་གང་ཞིག་བོད་ཀྱི་སྐད་ཡིག་ཏུ་བསྒྱུར་བར་དཀའ་ཚེགས་མེད་པར་བསྒྱུར་ཐུབ་པའི་ཁྱད་ཡོན་ལྡན་པའི་བོད་ཀྱི་སྐད་ཡིག་གི་རང་བཞིན་དང་། ཁྱད་ཆོས་སོགས་མཁྱེན་པའི་ཐོག་ནས་མ་འོངས་པའི་ལོ་ཙཱ་བ་རྣམས་ཀྱིས་དེང་དུས་ཀྱི་རིག་པའི་གཞུང་ལུགས་བོད་ཀྱི་སྐད་ཡིག་ཐོག་བསྒྱུར་རྒྱུར་ཤུགས་སྣོན་གནང་གལ་གནད་ཤིན་ཏུ་ཆེ།

སུམ་རྟགས་རྩ་ཚིག་གི་དཀའ་གནད་གསལ་བྱེད་ཉི་ཟླ་ཟུང་འཇུག་ལས[1]། སློབ་དཔོན་འདིས་འཕགས་ཡུལ་དུ་བཞུགས་པའི་བཀའ་དང་བསྟན་བཅོས་རྣམས་ཀྱི་ཚིག་དོན་ཡོངས་སུ་རྫོགས་པ་བོད་སྐད་དུ་བསྒྱུར་བའི་ཆེད་བོད་ཀྱི་བརྡ་སྤྲོད་པའི་བསྟན་བཅོས་བརྒྱད་བརྩམས་པར་གྲགས་པ་དོན་གནས་ལ། དེ་ཡང་མཉམ་མེད་ཇོ་བོ་རྗེས་བྱང་ཆུབ་ལམ་གྱི་སྒྲོན་མ་རྒྱ་གར་སྐད་དུ་བརྩམས་ནས་འཕགས་ཡུལ་དུ་གནས་བརྟན་རཏྣ་ཨ་ཀ་ར་སོགས་ལ་ལམ་སྒྲོན་ཇོ་བོས་ཕྱག་བྲིས་ངོ་མ་གཟིགས་སུ་ཕུལ་ནས་སླར་ཡང་བོད་སྐད་དུ་བསྒྱུར་བ་ལྟར། སློབ་དཔོན་འདིས་ཀྱང་འཕགས་ཡུལ་གྱི་བཀའ་བསྟན་རྣམས་ཇི་བཞིན་བསྒྱུར་དུ་བཏུབ་མིན་ཚོད་ལྟའི་ཆེད་གཙོ་བོ་སུམ་ཅུ་པ་དང་། རྟགས་ཀྱི་འཇུག་པ་གཉིས་སཾ་སྐད་དུ་བརྩམས་ནས་སྐད་གཉིས་ཤན་སྦྱར་དང་། འགྱུར་མཐར་ཕྱིན་པའི་ཕྱག་ཀྱང་མཛད་ནས་བོད་སྐད་དུ་བསྒྱུར་བར་མཛད་པས། འདི་གཉིས་ཀྱི་སྲོལ་ཡང་ཐུ་མི་རང་ཉིད་ཀྱིས་ཕྱེ་བ་ཡིན་ནོ། །འགྱུར་ཕྱག་འདི་ལ་བོད་སྔ་མ་རྣམས་ལོ་ཙཱ་བ་ཀ་ཅོག་ཞང་གསུམ་སོགས་ཀྱིས་དུས་འདུལ་བའི་ཀླད་དུ་ཐམས་ཅད་མཁྱེན་པ་དང་། མདོ་སྡེ་ལ་སངས་རྒྱས་བྱང་སེམས་དང་། མངོན་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཞེས་སྨོས་པ་ནི་སྡེ་སྣོད་གསུམ་ངོས་འཛིན་གྱི་ཕྱག་ཡིན་པར་གསུངས་ལ། བོད་ཕྱི་རབས་པ་རྣམས་ཀྱིས་མ་ངེས་པའི་རྒྱུ་མཚན་དུ་མ་བཤད་ནས་ལོ་ཙཱ་བ་རང་གི་དད་པའི་ལྷ་ལ་ཕྱག་བྱས་པར་འཆད་མོད་ཕྱིས་མ་ངེས་ཀྱང་། དང་པོའི་ཆོས་རྒྱལ་རྣམས་ཀྱིས་བཀས་བཅད་པ་ཡིན་པར་གསུངས། །ཞེས་སོ།།

སྔགས་ཀྱི་གཞུང་ལུགས་ཁག་ཏུ་འགྱུར་ཕྱག་ལ་རྡོ་རྗེ་སེམས་དཔའ་ལ་ཕྱག་འཚལ་བ་སྟེ། མགོན་པོ་ཀླུ་སྒྲུབ་ཀྱིས་མཛད་ཅིང་རྒྱུད་ཀྱི་ཁོངས་སུ་བཞུགས་པའི་བྱང་ཆུབ་སེམས་འགྲེལ་གྱི་འགྱུར་ཕྱག་ཏུ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་འབྱུང་ངོ་།།

ཨ་ལག་ཚེ་ཏན་ཞབས་དྲུང་མཆོག་གིས[2]། སྤྱིར་བོད་དུ་གཞུང་བསྒྱུར་བ་རྣམས་ལ་རྒྱ་གར་སྐད་དང་། འགྱུར་ཕྱག་དང་ཤླཽ་ཀ་དང་བམ་པོའི་གྲངས་ཚད་དང་། འགྱུར་བྱང་འགོད་པ་སོགས་ཀྱི་སྲོལ་ནི་སྲོང་བཙན་རྗེས་ཀྱི་རྒྱལ་རབས་ལྔ་པ་ཁྲི་སྲོང་ལྡེ་བཙན་རིང་གི་ལོ་ཙཱ་བ་སྐ་ཅོག་ཞང་གསུམ་གྱི་དུས་སུ་རྒྱལ་བའི་གསུང་རབ་རྒྱ་ཆེར་བསྒྱུར་བའི་ཚེ་བཀས་བཅད་པ་ལ་བརྟེན་ནས་བྱུང་བས་ན། ཐོན་མིའི་དུས་སུ་དེ་དག་ཅི་ནས་ཀྱང་ཡོད་པའི་བཀས་བཅད་ཀྱི་ངེས་པ་མ་མཛད་དོ། །རྒྱ་ནག་གི་བཀའ་བསྟན་རྣམས་ལ་འགྱུར་བྱང་གི་དོད་དུ་ལོ་ཙཱ་བའི་མཚན་ཙམ་འགོད་པ་ལས། རྒྱ་གར་སྐད་དང་། འགྱུར་ཕྱག་དང་། བམ་གྲངས་འགོད་པ་སོགས་ནི་བོད་ཀྱི་ཐུན་མོང་མ་ཡིན་པའི་ཆོས་སུ་སྣང་ངོ་། །དེ་བཞིན་དུ་རྒྱ་ནག་གི་འགྱུར་བྱང་གཞུང་གི་མཇུག་ཏུ་མི་འགོད་པར་དབུར་འགོད་པ་ནི་རྒྱ་ནག་གི་ཐུན་མོང་མ་ཡིན་པའི་ཆོས་སོ། །ཞེས་གསུངས་པ་ལྟར་རོ།།

ཇ) (༧) མཉམ་མེད་ཇོ་བོ་ཆེན་པོས་མཛད་པའི་དབུ་མའི་མན་ངག་གི་འབུམ་ལས[3]། སྔོན་གྱི་རྒྱལ་བློན་ཆེན་པོ་རྣམས་དང་ལོ་ཙཱ་བ་ཆེན་པོ་རྣམས་བཀའ་བགྲོས་ནས། དགོས་པ་ཆེན་པོ་གསུམ་ཐུགས་ལ་བཞག་ནས་རྒྱ་གར་སྐད་ཀླད་ལ་བྲིས་པ་ཡིན། དེ་ལ་དགོས་པ་གསུམ་ནི་རྒྱ་གར་ལ་བྱས་པ་ཤེས་ཤིང་བྱས་དྲིན་དུ་གཟོ་བའི་དགོས་པ་དང་། ཁུངས་བཙུན་པའི་དགོས་པ་དང་། བོད་སྐད་ཅིག་ཀྱང་དོད་དུ་བྲིས་པ་དེ་སྐད་ལྡོབ་པ་ལ་ཕན་པའི་དོན་དུ་ཡིན། དེ་ལ་དང་པོ་ནི་བོད་ཐམས་ཅད་ཆོས་མ་བྱུང་གི་གོང་རོལ་དུ་མུན་རུམ་དང་འདྲ་ཞིང་དུད་འགྲོ་དང་ལག་ལེན་ཁྱད་མེད་པར་འདུག་པ་ལས། ཤེས་རབ་ཀྱི་སྣང་བ་ཅུང་ཟད་བྱེད་ཤེས་པ་འདི་ཆོས་ཀྱི་དྲིན་ཡིན་ལ་བདེན་པ་འདོད་པ་དེ་ཙམ་དུ་བདེན་པ་ཞེས་བྱའི་རྣལ་མར་ན་དེ་ཉིད་རིག་པས་དཔྱད་ན་སྐྱེ་བ་མེད་པའི་རང་བཞིན་ཡེ་ནས་གནས་པའི་ཆོས་ཉིད་དོན་དམ་པའི་བདེན་པ་དང་གཉིས་ཡིན། ཞེས་གསུངས་ལ། མཉམ་མེད་ཇོ་བོ་ཆེན་པོས་མཛད་པའི་དབུ་མའི་མན་ངག་གི་འབུམ་ལས[4]། ལོ་ཙཱ་བའི་ཕྱག་འཚལ་བ་ནི། རྒྱ་གར་ཉིད་དུ་བསྒྱུར་བས་བཀས་བཅད་རྒྱུས་མེད་པའི་རང་དགའ་ཡིན་ལ། དགོས་པ་ནི་བར་ཆད་བཟློག་ཅིང་བརྩམས་པ་མཐར་ཕྱིན་པར་གྱུར་བ་དང་། ཡ་རབས་དང་མཐུན་པ་གཉིས་ཡིན་ཏེ། ལོ་ཙཱ་བའི་དགོས་པ་གྲུབ་ཟིན། ཞེས་འབྱུང་ངོ་།།

[1] འབྲས་སྤུངས་ཁྲི་པ་བསྟན་པ་བསྟན་འཛིན། འབྲས་སྤུངས་སྒོ་མང་དཔེ་མཛོད། ༢༠༡༢ ཤོག་གྲངས། ༤

[2] ཐོན་མིའི་ཞལ་ལུང་། ཀན་སུའུ་མི་རིགས་དཔེ་སྐྲུན་ཁང་། ༡༩༩༧ ཤོག་གྲངས། ༣༥

[3] ཇོ་བོ་རྗེ་དཔལ་ལྡན་ཨ་ཏི་ཤའི་གསུང་འབུམ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༦ ལོ། ཤོག་ ༦༤༣

[4] ཇོ་བོ་རྗེ་དཔལ་ལྡན་ཨ་ཏི་ཤའི་གསུང་འབུམ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༦ ལོ། ཤོག་ ༦༤༤