ཆ༽ ལོ་ཙཱ་སློབ་གཉེར་བའི་ཆ་རྐྱེན་ལྔ་དང་། བརྟག་ཐབས་རྣམ་པ་ལྔ།
༡) བཙན་པོ་ཁྲི་སྲོང་ལྡེ་བཙན་གྱིས་ལོ་ཙཱ་བ་སློབ་མཁན་བསྡུ་བསྐོང་གནང་སྐབས་དགོས་ངེས་ཀྱི་ཆ་རྐྱེན་ལྔ་ཡོད་པ་འདི་ལྟར། ༡ གཟུགས་ཁམས་བདེ་ཐང་ཡིན་པ། ༢ དབང་པོ་ལྔ་ལ་སྐྱོན་མེད་པ། ༣ རིག་པ་གསལ་ལ་རྣོ་བ། ༤ དྲན་ཤེས་བརྟན་པ། ༥ སྙིང་རུས་ཆེ་བ་བཅས་ཡིན་ཚུལ་པདྨ་བཀའ་ཐང་ལས། དེ་ནས་མངའ་བདག་རྒྱལ་པོའི་ཐུགས་དགོངས་ལ། །དཔོན་སློབ་གཉིས་ཀྱིས་ལུང་གྲངས་མང་གསུངས་པས། །དེ་དག་ཐམས་ཅད་བོད་དུ་ལེན་དགོས་བསམ། །བློ་རྣོ་སྙིང་རུས་ཆེ་བའི་མཆོག་གྱུར་པ། །ལོ་ཙཱ་བརྒྱ་དང་རྩ་བརྒྱད་ཚོལ་དགོས་སྙམ། །མངའ་འོག་བོད་ཡུལ་རུ་བཞི་ཐམས་ཅད་ཀྱི། །ལོ་བརྒྱད་ཡན་ཆད་བཅོ་བརྒྱད་མན་ཆད་ཀྱི། །ལུས་ལ་སྐྱོན་མེད་སེམས་ལ་ཐུག་མ་ཞུགས། །བློ་གསལ་གཡེལ་ཞིང་དྲན་པ་གཞུང་མང་བསྡུས། །ཞེས་གསུངས་པ་ལྟར། མཁས་དབང་དུང་དཀར་བློ་བཟང་འཕྲིན་ལས་[1]ཀྱིས་ཀྱང་། ལོ་ཙཱ་སློབ་མཁན་ཞིག་ལ་མཚོན་ན། ༡ ཤེས་རིག་གསལ་ཞིང་དྲན་ཤེས་བརྟན་པ་དང་། ༢ སྨྲ་བརྗོད་དག་ཅིང་བརྡ་སྤྲོད་ཚུལ་ལ་མཁས་པ། ༣ དཀའ་ངལ་ལ་བཟོད་བསྲན་ཆེ་ཞིང་། ༤ གང་བརྩམས་མཐར་འདོན་པའི་སྙིང་རུས་ཆེ་བ་བཅས་ཀྱི་ཆ་རྐྱེན་དེ་འདྲ་ཚང་བའི་མི་ཞིག་གིས་མ་གཏོགས། ཆ་རྐྱེན་དེ་ཚོའི་ནང་ནས་གཅིག་མ་ཚང་ནའང་ལོ་ཙཱ་བའི་ལས་དོན་སྒྲུབ་ཀྱི་མེད་ཅེས་གསུངས།
༢) རྒྱུ་མཚན་དེ་ལྟར་ལ་བརྟེན་ནས་བསྟན་པ་སྔ་དར་དང་ཕྱི་དར་གྱི་སྐབས་སུ་བོད་ཀྱི་བཙན་པོ་རིམ་བྱོན་རྣམས་ཀྱིས་ལོ་ཙཱ་སློབ་མཁན་གྱི་བོད་ཕྲུག་འདེམས་སྒྲུག་སྐབས་བྱིས་པར་བརྟག་དཔྱད་བྱ་ཐབས་ལྔ་ཡོད་པ་ནི། ༡ དྲི་བ་དང་ལན་འདེབས་ཀྱི་དུས་ཚོད་ཆུ་ཚོད་སྐར་ཆ་མང་ཉུང་གཅིག་མཚུངས་ཡིན་དགོས་པ་དང་། ༢ བྱིས་པའི་ལོ་ཚད་ ༡༠ ནས་ ༢༠ བར་ཡིན་དགོས་པ། ༣ དུས་ཚོད་གཅིག་མཚུངས་ནང་ཚིག་བློ་ལ་ཟིན་པའི་མྱུར་ཚད་དང་གྲངས་འབོར། ༤ དུས་ཚོད་གཅིག་མཚུངས་ནང་དྲི་ལན་ལ་བསམ་བློ་བཏང་བའི་མྱུར་ཚད་དང་སྤུས་ཚད། ༥ དུས་ཚོད་གཅིག་མཚུངས་ནང་གནད་དོན་ལ་དབྱེ་ཞིབ་བྱས་པའི་མྱུར་ཚད་དང་སྤུས་ཚད་བཅས་ཡིན་པ་མྱང་ཉི་མ་འོད་ཟེར་གྱི་ཆོས་འབྱུང་ལས་གསུངས་པ་ལྟར། སློབ་ཕྲུག་འདེམས་སྐབས་ཆུ་ཚོད་སྐར་ཆ་གཅིག་མཚུངས་ཀྱི་ནང་དུ་དྲི་བ་འདྲ་མིན་ལ་ལན་འཕྲལ་དུ་འདེབས་ཐུབ་མིན་དང་། སྐད་སྒྲའི་སྒྲ་གསལ་དག་ཡོད་མེད་སོགས་བརྟག་དཔྱད་ཞིབ་འཇུག་གཟབ་ནན་གནང་སྟེ་འོས་ཆོས་ཚང་བ་རྣམས་འདེམས་སྲོལ་ཡོད་པས། ལོ་ཙཱ་བ་སློབ་མཁན་ལ་དགོས་པའི་ཆ་རྐྱེན་ཚད་གཞི་ཧ་ཅང་མཐོན་པོ་ཡིན།
དཔྱིད་ཀྱི་རྒྱལ་མོའི་གླུ་དབྱངས་ལས[2]། དེའི་རྗེས་སུ་ (བསམ་ཡས་བཞེངས་རྗེས་) བློ་གསལ་ཞིང་ཡིད་གཞུངས་པའི་ལས་ལྡན་གྱི་སྐྱེས་བུ་དུ་མ་རབ་ཏུ་བྱུང་ཞིང་། ཤེས་རབ་ཀྱི་རྩལ་དང་ལྡན་པ་དག་ལ་ལོ་ཙཱ་བསླབས་པས། བྱཱ་ཀ་ར་ཎའི་གནད་མཐའ་དག་སྒྲོ་འདོགས་ཆོད་ཅིང་། གཞུང་ལུགས་ཀྱི་དོན་ཁོང་དུ་ཆུད་པའི་འཇིག་རྟེན་གྱི་མིག་གཅིག་པུ་སྐད་གཉིས་སྨྲ་བའི་མང་དུ་བྱོན། །ཞེས་གསུངས་པ་ལྟར་རོ།།
ལོ་ཙཱ་བ་སློབ་མཁན་དེ་དག་ཐོག་མར་འདེམས་སྒྲུག་གནང་སྐབས་བཙན་པོ་སྐུ་དངོས་བྱིས་པ་སོ་སོའི་ཕ་མའི་ཁྱིམ་དུ་ཕེབས་ནས་ཚིག་འཛིན། དོན་བསམ། ལན་འདེབས། དབྱེ་ཞིབ་བཅས་བཞིའི་སྒོ་ནས་བརྟག་དཔྱད་མཛད་དེ་ཕ་མར་སློང་བ་དང་། བསླུ་རིན་འདོད་པ་ཁེངས་ངེས་གསོལ་སྩལ་གནང་བ། ཆ་རྐྱེན་ཞན་པའི་ཕ་མ་ཆ་རྐྱེན་བཟང་སར་གནས་སྤོས་ཆོག་པ། དཔྱ་ཁྲལ་འཇལ་སྤྲོད་མི་དགོས་པ་བཅས་ཀྱི་དམིགས་བསལ་གནང་ཡོད།
དེ་ཡང་བོད་བཙན་པོའི་རྒྱལ་རབས་ལས[3]། བཻ་རོ་ཙ་ན་ཞེས་པ། བོད་སྐད་དུ་བསྒྱུར་ན། རྣམ་པར་སྣང་མཛད་ཟེར། ཁོང་གི་ཡབ་པ་གོར་ཧེ་འདོད་དང་། ཡུམ་བྲམ་ཟེ་དཀར་སྐྱིད་བྱ་བ་གཉིས་ཀྱི་སྲས་སུ། དུས་རབས་བརྒྱད་པའི་དཀྱིལ་ཙམ་དུ་འཁྲུངས་ཤིང་། ཆུང་དུས་ཀྱི་མཚན་ལ་གན་ཇག་ཐང་ཏ་ཞེས་བཏགས། བྱིས་པའི་དུས་ནས་བློ་རིག་རྣོ་ཞིང་། སྐྱེ་སྟོབས་ཀྱི་ཤེས་རིག་ལྡན་པས་མཚན་སྙན་ཡུལ་གྲུ་གང་སར་ཁྱབ། ཆོས་རྒྱལ་ཁྲི་སྲོང་ལྡེ་བཙན་གྱིས་བསམ་ཡས་གཙུག་ལག་ཁང་། སྒྲ་སྒྱུར་གྱི་སློབ་གྲྭ་བཙུགས་སྐབས། བཙན་པོ་སྐུ་ངོ་མས་བོད་ཀྱི་ས་ཕྱོགས་ཀུན་ཏུ་ཕེབས་ནས། བློ་རིག་བཀྲ་བའི་བོད་ཕྲུག་དུ་མ་བསྐོང་དུས། སྙེ་མོ་བྱེ་མཁར་ན་གན་ཇག་ཐང་ཏ། ཞེས་བྱ་བའི་བྱིས་པ་ལོ་བརྒྱད་ལས་མ་སོན་ཀྱང་། བློ་རིག་ལྡན་པ་ཞིག་ཡོད་པ་གཟིགས་ནས་རྒྱལ་པོ་སྐུ་ངོ་མས། བློན་འབངས་རྟ་པ་དུ་མ་དང་བཅས་པ་སྙེ་མོ་བྱེ་མཁར་དུ་ཕེབས་ནས། བཻ་རོ་ཙ་ན་གདན་དྲངས་ཤིང་། ཕ་མ་རྒན་རྒོན་གཉིས་ཀྱང་ཡུལ་ཡར་ལུང་རིག་པ་ཙ་ན་བཞག །ཅེས་གསུངས་པ་ལྟར་རོ།།
[1] དུང་དཀར་རིན་པོ་ཆེའི་གསུང་འབུམ། (ཇ) ༢༠༠༤ ཤོག་གྲངས། ༣༠༠
[2] སྐུ་བཅར་རྣམ་རྒྱལ་གྲྭ་ཚང་། ༢༠༡༤ གསུང་འབུམ་པོད་ (ཛ) ཤོག་གྲངས། ༥༦
[3] བོད་བཙན་པོའི་རྒྱལ་རབས། འབྲི་གུང་སྐྱབས་མགོན་ཆེ་ཚང་། ༢༠༡༠ ཤོག་གྲངས། ༤༦༣
