སྤྱིར་ནོར་བུར་ལེགས་སྦྱར་སྐད་དུ་མཎི་ཞེས་བྱ་ལ།ནོར་བུ་ནི་རྡོའི་རིགས་ཀྱི་རིན་ཆེན་སྤྱིའི་མིང་དུ་འཇུག་ཅིང༌།ནོར་བུ་ལའང༌།ནོར་བུ་དཀར་པོ་སྟེ་ཆུ་ཤེལ་དང༌།ནོར་བུ་སྐར་མདོགནོར་བུ་དགའ་འཁྱིལ།ནོར་བུ་དགོས་འདོད་དཔུང་འཇོམས།ནོར་བུ་ལྗང་གུ་སྟེ་མརྒད།ནོར་བུ་ཆ་བདུན།ནོར་བུ་དབང་སྔོན་ཏེ་ཨིནྡྲནཱིལ།ནོར་བུ་མེ་འབར།ནོར་བུ་ཛྷཻ་ཀྵིམ།ནོར་བུ་བསམ་འཕེལ།ཡིད་བཞིན་གྱི་ནོར་བུ།ནོར་བུའི་མཆོག་ཏེ་ཕ་ལམ་སོགས་མང་དུ་མཆིས་སོ།།
དེ་དག་ལས་ནོར་བུ་ཆ་བདུན་ནི།རྒྱལ་པོའི་རྣ་ཆ་དང༌།བླུན་པོའི་རྣ་ཆ།བཙུན་མོའི་རྣ་ཆ་དང༌།བསེ་རུའི་རྭ།བྱུ་རུའི་སྡོང་པོ།གླང་ཆེན་མཆེ་བ།ནོར་བུ་མིག་གསུམ་སྟེ་མདུན་དུ་བགྲངས་ཀྱང༌།དེ་དག་རི་མོར་བཀོད་ན་མི་མཛེས་པས་ལྷའི་ནོར་བུ་འབར་བ་དང༌།མིའི་ནོར་བུ་མིག་གསུམ།ཀླུའི་ནོར་བུ་མིག་གཅིག་བཅས་ནོར་བུ་རིགས་གསུམ་དགའ་བ་འཁྱིལ་བའམ།ཡང་གོང་དུ་ལྷའི་ནོར་བུ་མེ་འབར་བ།གཡས་སུ་མིའི་ནོར་བུ།གཡོན་དུ་ཀླུའི་ནོར་བུ་བཅས་བརྩེགས་མར་འབྲི།ཁ་དོག་ལ་ལྷའི་ནོར་བུ་ནི་ནོར་བུ་ཀུན་གྱི་རྒྱལ་པོ་སྟེ་བཻཌཱུརྱའི་མདོག་ཏུ་བཤད་ཅིང༌།ཚོན་སྡེབ་དང་ཆ་ལྡན་ལ་མཛེས་ཆེད་མདོག་སྣ་ཚོགས་པ་འབྱུང་ཡང་མཚོན་དོན་ལ་འགྱུར་བ་མ་མཆིས་སོ།།
དེ་ཡང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བཤེས་པའི་སྤྲིང་ཡིག་ལས།ཇི་སྐད་དུ།
དད་དང་ཚུལ་ཁྲིམས་གཏོང་དང་ཐོས་པ་དང༌།།
དྲི་མེད་ངོ་ཚ་ཤེས་དང་ཁྲེལ་ཡོད་དང༌།།
ཤེས་རབ་ནོར་བདུན་ལགས་པར་ཐུབ་པས་གསུངས།།
ནོར་གཞན་ཕལ་པ་དོན་མ་མཆིས་རྟོགས་མཛོད།།
ཅེས་གསུངས་པ་ལྟར་དད་པ་དང༌།ཚུལ་ཁྲིམས།ཐོས་པ།གཏོང་བ༑ཤེས་རབ།ངོ་ཚ་ཤེས་པ།ཁྲེལ་ཡོད་པ་བཅས་ནི་འཕགས་པའི་ནོར་བདུན་ཡིན་ལ།དེ་དག་ནི་ནོར་གཞན་ཕལ་པ་དག་ལས་ཁྱད་དུ་འཕགས་པས་ན་འཕགས་པའི་ནོར་བདུན་ཞེས་བྱ་སྟེ།ནོར་ཕལ་པ་ནི་སྡུག་བསྔལ་གྱི་རྒྱུ་ཡིན་ལ།འདི་ནི་བདེ་བ་དང་ཡོན་ཏན་མཐའ་ཡས་པའི་རྒྱུ་ཡིན་པའི་ཕྱིར་ཏེ༑ཕྱི་ཡི་རྒྱུ་ནོར་ལོངས་སྤྱོད་སོགས་རིན་ཆེན་རིན་ཐང་ཇི་ཙམ་ཆེ་ཡང༌།དེ་དག་གིས་རང་གི་འདོད་བློ་ཚིམ་མི་ཐུབ་ལ།དཀའ་སྡུག་སེལ་བའི་ཚབ་ཏུ་སྡུག་བསྔལ་གྱི་སྣ་འདྲེན་བྱེད་ཅིང༌།ཕྲག་དོག་བྱེད་མི་དང་དགྲ་ཡ་མང་དུ་སོང་བ།མ་སྐྱིད་པ་མང་དུ་འགྲོ་བ་ལས་བདེ་སྐྱིད་འབྱིན་ཤིན་ཏུ་དཀའ་བས་ན།ནོར་བུའི་རིགས་གསོག་ཐབས་མི་བྱེད་པར་འགྲན་ཟླ་མེད་པའི་འཕགས་པའི་ནོར་བདུན་གྱི་ཁྱད་ཡོན་ལྡན་ཐབས་ལ་བརྩོན་གལ་ཆེའོ།།
