རང་རེའི་སྤྱན་སྔར་རྟག་ཏུ་རིག་རྒྱུ་མང་བའི་ནམ་མཁའི་འཇའ་ཚོན་ནི། ཚན་རིག་གི་གཞུང་སོགས་ལས་ཚོན་མདོག་སྣ་ཁ་བདུན་ལས་གྲུབ་པར་གསུངས་རུང༌། རང་ཅག་བོད་ལུགས་ཀྱི་སྲོལ་ལ་འཇའ་ནི་ཚོན་མདོག་སྣ་ལྔ་ལས་གྲུབ་པར་ངོས་འཛིན་བྱེད་ཀྱི་ཡོད། རྒྱུ་མཚན་གང་ལགས་ཤེ་ན། དེའང་བོད་བརྒྱུད་ནང་བསྟན་དང་འབྲེལ་བ་གཏིང་ཟབ་ཡོད་པར་བསམ། བོད་མིས་དད་གུས་ཆེན་པོ་བྱེད་པའི་ཤར་རྡོ་རྗེ་རིགས་ཀྱི་མཁའ་འགྲོ་མ་དང༌། ལྷོ་རིན་ཆེན་རིགས་ཀྱི་མཁའ་འགྲོ། ནུབ་པདྨ་རིགས་ཀྱི་མཁའ་འགྲོ། བྱང་ལས་ཀྱི་རིགས་ཀྱི་མཁའ་འགྲོ། དབུས་སངས་རྒྱས་མཁའ་འགྲོ་བཅས་མཁའ་འགྲོ་སྡེ་ལྔ་དེ་འཇའ་ཡི་ཚོན་མདོག་སྣ་ལྔ་ལས་མཚོན་པར་བྱེད་སྲོལ་ཡོད། དོན་དམ་དུ་དེ་ཡང་རྩ་བའི་ཚོན་མདོག་དང་འབྲེལ་བ་ཡོད་ངེས་ཡིན་པས་ཚང་མས་དཔྱད་པར་ཞུ།
ཚེ་དཔག་མེད་འཆི་མེད་ལྷ་ལྔའི་བརྟན་བཞུགས་ལས། ཤར་ནས་རྡོ་རྗེ་མཁའ་འགྲོ་མ། ། དཀར་མོ་འབུམ་གྱིས་དར་ཐག་བསྡུད། ། ལྷོ་ནས་རིན་ཆེན་མཁའ་འགྲོ་མ། ། སེར་མོ་འབུམ་གྱིས་དར་ཐག་བསྡུད། ། ནུབ་ནས་པདྨ་མཁའ་འགྲོ་མ། ། དམར་མོ་འབུམ་གྱིས་དར་ཐག་བསྡུད། ། བྱང་ནས་ལས་ཀྱི་མཁའ་འགྲོ་མ། ། ལྗང་མོ་འབུམ་གྱིས་དར་ཐག་བསྡུད། ། དབུས་ནས་བུདྡྷ་མཁའ་འགྲོ་མ། ། སྣ་ཚོགས་མཁའ་འགྲོས་དར་ཐག་བསྡུད། ། ཅེས་སོགས་དང༌། མཁའ་འགྲོའི་གར་ཆས་སྤྲས་པའི་བསུན་མའི་དཔུང་ལྷ་གྲངས་བཞིན་དཀར་སེར་སྔོ་དམར་ལྗང་དང་ལྔ་པོ་རིམ་བཞིན་འོངས་བ་དང༌། ཁྱབ་གདལ་ཆོས་སྐུའི་ཞིང་ནས་འོངས། ། ལྷུན་གྲུབ་ལོངས་སྐུའི་ཞིང་ནས་འོངས། །
འཇའ་ཟེར་འོད་ལྔའི་ཀློང་ནས་འོངས། ། ཉི་ཤུ་རྩ་བཞིའི་གནས་ནས་འོངས། །
ཞེས་སོགས་སྙན་པའི་དབྱངས་དང་བཅས་ཏེ་མཁའ་འགྲོ་མ་དཀར་མོ་སོགས་ཀྱིས་རིམ་བཞིན་བསྐུལ་བཞིན་པ་ལགས་ན། འཇའ་ཚོན་ལྔ་པོ་དག་གིས་མཁའ་འགྲོ་ལྔ་པོ་མཚོན་པར་བྱེད་པ་ཡིན། མིང་གི་རྣམ་གྲངས་སུ་རླུང་གི་རྒྱལ་མཚན་ཞེས་བརྗོད། དེ་ཡང༌། ས་གཞིའི་དྲོད་དང་མཁའ་དབུགས་ཕྲད་ནས་བྱུང་བ་དང༌། ཚོས་གཞི་སྣ་ཚོགས་རྒྱལ་མཚན་གྱི་ཤམ་བུ་བརྩེགས་པ་ལྟར་ཡོད་པས་མིང་དེ་ལྟར་བཏགས་པ་བཅས་སོ།།
