ཚར་ཆེན་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོའི་རྣམ་ཐར།

༄༅།།རྒྱལ་ཁམས་ཕྱོགས་མེད་ཡངས་པའི་སྨན་ལྗོངས་སུ།།

ཤེས་ལྡན་གཟུར་གནས་ནམ་མཁའི་མཐའ་ཀླས་པར།།

ཀུན་སྤངས་ཆོས་རྗེའི་ཕྲིན་ལས་སྐྱོང་བའི་དཔལ།།

བློ་གསལ་རྒྱ་མཚོའི་ཞབས་ལ་གསོལ་བ་འདེབས།།

༄༅།།དེ་རིང་ནི་ཚར་ཆེན་རྡོ་རྗེ་འཆང་བློ་གསལ་རྒྱལ་མཚོ་དགོངས་པ་ཆོས་དབྱིངས་སུ་ཐིམ་ནས་མི་ལོ་ཧྲིལ་པོ་༤༥༢འཁོར་བའི་རྗེས་དྲན་གྱི་ཉིན་མོ་བཟང་པོ་ཡིན་པས་ཚང་མས་འདད་པ་སྒྲུབ་རྒྱུ་ཐུགས་ལ་འཇོག་རོགས་གནོངས།     ༧-༡༥ཉིན

ཚར་ཆེན་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོའི་རྣམ་ཐར།

འཁྲུངས་ཡུལ།  རྨུ་གཤོངདགེ་བའི་ཚལ།

འཁྲུངས་དུས།  བོད་རྒྱལ་ལོ་༡༦༢༩ལོ་སྟེ་ཕྱི་ལོ་1502ལོ་རབ་བྱུང་བརྒྱད་པའི་ཆུ་ཕོ་ཁྱིའི་ལོ།

ཡབ་ཡུམ།  ཡབ་ཆོས་རྒྱལ་རིན་ཅེན་དཔལ་བཟང་།ཡུམ་བོན་པོ་དབེན་རྩ་ཁ་པའི་སྲས་མོ་བཀྲ་ཤིས་ཨ་མཚོ།

རབ་ཏུ་བྱུང་དུས།  དགུང་ལོ་སོ་གཅིག་བཞེས་པ་རབ་བྱུང་དགུ་བའི་ཆུ་ཕོ་འབྲུག་གི་ལོ།

དགེ་ཚུལ་མཁན་པོ།  ཐམས་ཅད་མཁྱེན་པ་དགེ་འདུན་རྒྱ་མཚོ།

དགེ་སློང་མཁན་པོ།  བསྟན་པའི་མངའ་བདག་གྲགས་པ་རྒྱལ་མཚན་དཔལ་བཟང་པོ།

གདན་ས།  མང་མཁར་ཐུབ་བསྟན་དགེ་འཕེལ།  འདར་གྲོང་མོ་ཆེ་དགོན། མཁས་གྲུབ་དུ་མའི་བསྟི་གནས་འཕན་པོ་ནཱ་ལེནྡྲའི་དགོན་པ།  ཞ་ལུ་གསེར་བཀང་གི་ཆོས་གྲྭ་སོགས།

བཤེས་གཉེན་གཙོ་བོ།  རྡོ་རིང་ཀུན་སྤངས་ཀུན་བཟང་ཆོས་ཀྱི་ཉི་མ།  ངོར་ཆེན་དཀོན་མཆོག་ལྷུན་གྲུབ།  སྒོ་རུམ་པ་ཆེན་པོ་སོགས་བཤེས་དྲུག་ཅུ་རྩ་བཞི་མཉེས་པར་བྱས།

སློབ་མ་གཙོ་བོ།  འཇམདབྱངས་མཁྱེན་བརྩེའི་དབང་ཕྱུག །མཻ་ཏྲི་བྱམས་པ་དོན་འགྲུབ་རྒྱལ་མཚན།རྡོ་རྗེ་འཆང་དབང་ཕྱུག་རབ་བརྟན་སོགས།

འདས་ལོ།  བོད་རྒྱལ་ལོ་༡༦༩༤ལོ་སྟེ་ཕྱི་ལོ་1567ལོ་རབ་བྱུང་བཅུ་པའི་མེ་མོ་ཡོས་ལོའི་ཧོར་ཟླ་བདུན་པའི་ཚེས་བཅོ་ལྔར་ཞི་བར་གཤེགས།

ཚར་པ་ཆོས་རྗེའི་རྣམ་ཐར་གསོལ་འདེབས་བཀྲ་ཤིས་མཚན་བཟང་མ།།

༄༅། །ཨོཾ་སྭསྟི། རྒྱལ་ཁམས་ཕྱོགས་མེད་ཡངས་པའི་སྨན་ལྗོངས་སུ། །ཤེས་ལྡན་གཟུར་གནས་ནམ་མཁའི་མཐའ་ཀླས་པར། །ཀུན་སྤངས་ཆོས་རྗེའི་ཕྲིན་ལས་སྐྱོང་བའི་དཔལ། །བློ༵་གས༵ལ་རྒྱ༵་མཚོ༵འི་ཞབས་ལ་གསོལ་བ་འདེབས། ༈ བཀྲ་ཤིས་མཚན་བཟང་ཡིད་ལ་དྲན་ཙམ་གྱི། །ཕུན་ཚོགས་སྲིད་ཞིའི་དགེ་ལེགས་ཀུན་བསྟེར་བ། །རབ་འབྱམས་རྒྱལ་བ་ཀུན་དངོས་ཚར་པ་རྗེ། །སྙིང་ནས་དྲན་ནོ་ཐུགས་རྗེའི་ལྕགས་ཀྱུས་ཟུངས། །མགོན་ཁྱོད་གདོད་མའི་དབྱིངས་ནས་སངས་རྒྱས་ཀྱང༌། །གྲངས་མེད་གདུལ་བྱའི་ཁམས་དང་བསམ་པ་བཞིན། །ངོ་མཚར་སྐྱེས་པའི་ཟློས་གར་བཅུ་གསུམ་གྱིས། །ཕན་བདེའི་དགའ་སྟོན་སྤེལ་ལ་གསོལ་བ་འདེབས། །བདག་སོགས་རྨུ་རྒོད་འགྲོ་ལ་བརྩེར་དགོངས་ནས། །ལྗོངས་འདིར་འཆི་མེད་རིགས་ཀྱི་ཐིག་ལེ་ལས། །བསམ་བཞིན་རྡོ་རྗེ་ཐེག་པའི་པད་ཚལ་གྱིས། །བོད་ཡུལ་འགྲོ་བའི་གཉེན་དེར་གསོལ་བ་འདེབས།གཞོན་ནུའི་དུས་ནས་རང་ལུས་ལྷ་སྐུར་གཟིགས། །དམ་ཅན་སྲུང་མས་དངོས་སུ་གཏོར་མ་བླང༌། །ཀློག་དང་ཡི་གེ་མ་བསླབས་ཐུགས་སུ་ཆུད། །བྱིས་པའི་སྤྱོད་ལས་འདས་ལ་གསོལ་བ་འདེབས། །འཁོར་བའི་ཕུན་ཚོགས་འབར་བའི་མེ་འོབ་ལྟར། །གཟིགས་ནས་ངེས་འབྱུང་ཚུལ་ཁྲིམས་དཔལ་གྱིས་འཁྱུད། །བཅས་དང་རང་བཞིན་ཉེས་པ་རིང་དུ་སྤངས། །དགྲ་བཅོམ་ཆེན་པོའི་ཞབས་ལ་གསོལ་བ་འདེབས། །དྲུག་བཅུ་རྩ་གསུམ་གདམས་པའི་ཡོངས་འཛིན་བསྟེན། །མདོ་སྔགས་གསར་རྙིང་དམ་ཆོས་ཇི་རྙེད་པ། །ཐོས་བསམ་བསྒོམས་པས་འཁྲུལ་མེད་ཐུགས་སུ་ཆུད། །རྩོད་དུས་ཀུན་མཁྱེན་གཉིས་པར་གསོལ་བ་འདེབས། །བསྐལ་བཟང་དང་པོའི་སངས་རྒྱས་རྡོ་རིང་པས། །རྗེས་བཟུང་ས་སྐྱའི་བླ་ཆེན་ཐུགས་ཀྱི་བཅུད། །སྙན་བརྒྱུད་སློབ་བཤད་ཆོས་ཀྱི་འཁོར་ལོ་སྒྱུར། །སྐལ་བཟང་གདུལ་བྱའི་གཉེན་དེར་གསོལ་བ་འདེབས། །བརྗོད་བྲལ་བདེ་ཆེན་གནས་ལུགས་མངོན་གྱུར་ཀྱང༌། །རིམ་གཉིས་བཟླས་པ་བཅས་པའི་རྣལ་འབྱོར་ལ། །ནམ་ཡང་གཡེང་མེད་སྒྲུབ་པ་ལྷུར་ལེན་པའི། །གྲུབ་པའི་གཙུག་རྒྱན་མཆོག་ལ་གསོལ་བ་འདེབས། །ཨོ་རྒྱན་པངྨ་དུས་དགྲ་མ་ཧེའི་ཞལ། །རྡོ་རྗེ་བཙུན་མོ་ཡང་གསང་ཁྲོས་པ་སོགས། །ལྷ་མཆོག་དུ་མས་དངོས་སུ་ཞལ་གཟིགས་ཏེ། །ལུང་བསྟན་སྣང་བ་ཐོབ་ལ་གསོལ་བ་འདེབས། །གུར་གྱི་མགོན་པོ་དཔལ་བོ་བྲམ་ཟེའི་གཟུགས། །འཆི་བདག་དབང་ཕྱུག་གིང་ལྔ་གཟའ་གདོང་སོགས། །དམ་ཅན་རྒྱ་མཚོ་དངོས་སུ་བྲན་དུ་འཁོལ། །མཐུ་སྟོབས་ནུས་པའི་གཏེར་ལ་གསོལ་བ་འདེབས། །བགྲང་ཡས་གདུལ་བྱའི་ཁམས་དང་བསམ་པ་བཞིན། །ཉིད་ཀྱི་ཇི་ལྟར་གཟིགས་པའི་ལམ་བསྟན་ནས། །བཀའ་བཞིན་མཁའ་དང་གྲུབ་པའི་སར་བཀོད་དེ། །འཁྲུལ་མེད་ལམ་སྟོན་ཁྱེད་ལ་གསོལ་བ་འདེབས། །ཞིང་འདིའི་མཛད་པ་ལེགས་པར་མཐར་ཕྱིན་ཏེ། །ཀུན་སྤངས་ཆེན་པོ་བྱོན་ཞེས་བསྐུལ་བའི་ཚེ། །བགྲང་ཡས་ངོ་མཚར་ལྟས་དང་ལྷན་གཅིག་ཏུ། །མཁའ་སྤྱོད་གནས་སུ་གཤེགས་ལ་གསོལ་བ་འདེབས། །ཆོས་དབྱིངས་ངང་ལས་སྒྱུ་མའི་སྐུར་བཞེངས་ཏེ། །གུས་ལྡན་སློབ་མའི་རྨི་ལམ་སྣང་བ་ལ། །ཞལ་བསྟན་དབུགས་འབྱུང་ལྟོས་པ་བཅས་པ་ཀུན། །རྗེས་འཛིན་ལུང་བསྟན་མཛད་ལ་གསོལ་བ་འདེབས། །བློ་གསལ་གདུལ་བྱའི་རྒྱ་མཚོ་ཀུན་གྱི་གཉེན། །གྲགས་སྙན་རྒྱུད་བསྟན་པའི་རྒྱལ་མཚན་འཛིན། །དོན་གཉིས་དཔལ་འབྱོར་བཟང་པོ་ཚར་པ་རྗེའི། །ཉིན་མཚན་རྣམ་ཐར་དྲན་ཞིང་གསོལ་བ་འདེབས། །གུས་པས་ཕྱག་འཚལ་རབ་འབྱམས་མཆོད་སྤྲིན་འབུལ། །ཉེས་པ་ཀུན་བཤགས་དགེ་ལ་རྗེས་ཡི་རང༌། །ཆོས་འཁོར་བསྐོར་ཞིང་བཞུགས་པར་གསོལ་བ་འདེབས། །དགེ་དེས་འགྲོ་ཀུན་བླ་མས་རྗེས་འཛིན་ཤོག །དེ་ལྟར་ཁྱོད་ལ་གུས་པས་གསོལ་བཏབ་པས། །དུས་འདི་ནས་བཟུང་བྱང་ཆུབ་སྙིང་པོའི་བར། །འབྲལ་མེད་ཐུགས་རྗེའི་ལྕགས་ཀྱུས་རྗེས་བཟུང་ནས། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །གང་གི་ཞབས་སེན་ཡིད་ལ་དྲན་ཙམ་གྱིས། །ཕྱི་ནང་བདུད་ལས་རྒྱལ་བའི་དཔལ་ཡོན་ཅན། །རྡོ་རྗེ་འཆང་དབང་ཚར་པ་ཆོས་ཀྱི་རྗེའི། །བསྟན་པ་ཕྱོགས་བཅུར་རྒྱས་པའི་བཀྲ་ཤིས་ཤོག །ཅེས་མཁྱེན་བརྩེ་དབང་ཕྱུག་གི་གསུང་འཁྲུལ་མེད་དགེའོ། །གང་བློ༵་རབ་ཏུ་གས༵ལ་བའི་ནོར་འཛིན་ཁྱོན། །སྙན་བརྒྱུད་རྒྱ༵་མཚོ༵་འཁྱིལ་བའི་ཀློང་ཡངས་ནས། །དངོས་གྲུབ་ནོར་བུའི་དཔལ་སྟེར་རིན་ཆེན་རྗེ། །ཚར་པ་ཆོས་རྗེའི་ཞབས་ལ་གསོལ་བ་འདེབས། །