དགའ་ལྡན་ཁྲི་ཆེན་གོ་དྲུག་པ་ཧ་གདོང་རྗེ་དྲུང་ཐུབ་བསྟན་ཀུན་དགའ།

དགའ་ལྡན་ཁྲི་རབས་གོ་དྲུག་པ་རྗེ་དྲུང་ཐུབ་བསྟན་ཀུན་དགའ་མཆོག་ནི། གངས་བོད་ཀྱི་རྒྱལ་ས་ལྷ་སའི་ཉེ་འཁོར་དུ་སྐུ་འཁྲུངས་ཤིང་། སྐུ་ན་ཆུང་དུས་ནས་སེར་བྱེས་གྲྭ་ཚང་དུ་ཆོས་ཞུགས་མཛད། ཁྲི་ཆེན་ལྷུན་གྲུབ་བརྩོན་འགྲུས་དགེ་བའི་བཤེས་གཉེན་དུ་བསྟེན་ནས་གཞུང་ཆེན་བཀའ་པོད་ལྔར་གསན་བསམ་མཐར་ཕྱིན་པ་མཛད། སེ་ར་ཐེག་ཆེན་གླིང་གི་ཚོགས་ཆེན་དུ་ཚོགས་ལངས་དང་། ལྷ་ལྡན་ཆོ་འཕྲུལ་སྨོན་ལམ་ཆེན་མོར་དགེ་འདུན་ཕྲག་དུ་མའི་དབུས་སུ་གྲྭ་སྐོར་དམ་འཇོག་མཛད། དེ་ནས་གསང་ཆེན་བསྟན་པའི་འབྱུང་གནས་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ཏེ་རྒྱུད་སྡེ་ཁག་ལ་གསན་བསམ་དཔྱིས་ཕྱིན་པར་མཛད།

རིམ་བཞིན་རྒྱུད་པའི་དགེ་བསྐོས་དང་། བླ་མ་དབུ་མཛད། མཁན་པོ། བྱང་རྩེ་ཆོས་རྗེ་བཅས་སུ་རིམ་པར་ཕེབས། སྐྱབས་རྗེ་ཁྲི་བྱང་རིན་པོ་ཆེ་ལས་སྔ་ཕྱིར་ཡི་དམ་གསང་བདེ་འཇིགས་གསུམ་གྱི་དབང་ཆེན་དང༌། སྔགས་བཏུས་རྗེས་གནང༌སོགས་དབང་རྗེས་གནང་ལུང་ཁྲིད་མན་ངག་གང་མང་ཞུས། ༸གོང་ས་༸སྐྱབས་མགོན་ཆེན་པོ་མཆོག་གི་ཞབས་དྲུང་ནས་ཀྱང་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་སོགས་ཆོས་བཀའ་མང་དུ་གསན། ཕྱི་ལོ་ ༡༩༥༤ ལོར་དཔལ་མཉམ་མེད་རི་བོ་དགེ་ལྡན་པའི་འཇམ་མགོན་རྒྱལ་བའི་རྒྱལ་ཚབ་ཀྱི་དགའ་ལྡན་གསེར་ཁྲིར་ཕེབས། ལོ་དེའི་བོད་ཟླ་དང་པོའི་ཚེས་བཅོ་ལྔའི་ཉིན་༸གོང་ས་༸རྒྱལ་དབང་ཐམས་ཅད་མཁྱེན་གཟིགས་ཆེན་པོ་མཆོག་ལ་ལྷ་ལྡན་སྤྲུལ་པའི་གཙུག་ལག་ཁང་གི་ཇོ་བོ་ཤཱཀྱ་མུ་ནེའི་སྐུ་མདུན་དུ་ཡོངས་འཛིན་གླིང་རིན་པོ་ཆེས་མཁན་སློབ་སྦྲགས་མ་གནང་ནས་བསྙེན་རྫོགས་དགེ་སློང་གི་བསླབ་སྡོམ་འབུལ་སྐབས་ཁྲི་ཆེན་འདི་ཉིད་ཀྱིས་དུས་གོ་བ་མཛད། ཕྱི་ལོ་ ༡༩༥༦ ལོར་སེར་བྱེས་མཁན་པོ་བློ་བཟང་དབང་ཕྱུག་གིས་གྲྭ་ཚང་གི་ཚོགས་གདན་དང་མཆོད་རྫས་ཟད་རྙིང་རྣམས་གསར་བརྗེ་ལེགས་གྲུབ་ཟིན་པ་དང་། བོད་ཟླ་ལྔ་པར་༸གོང་ས་༸སྐྱབས་མགོན་ཆེན་པོ་མཆོག་དང༌། ཁྲི་ཆེན་རིན་པོ་ཆེ་འདི་ཉིད། སྐྱབས་རྗེ་ཡོངས་འཛིན་རྣམ་གཉིས། མཁན་ལས་ཟུར་བཅས་དབུ་བཞུགས་ཐོག་རབ་གནས་གནང༌། ལོ་དེར་བོད་དུ་རྒྱ་མིས་ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཞེས་པ་གསར་དུ་འཛུགས་སྐབས་ཚོགས་གཙོ་དང་། དགའ་ལྡན་ཁྲི་པའི་མཚན་བཞེས་ཆབས་ཅིག་ཏུ་མཛད་དེ། ས་ཕག་ཕྱི་ལོ་ ༡༩༥༩ ལོར་དུས་འགྱུར་མ་བྱུང་བར་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་དབུར་ཕེབས་པ་དང༌། རྨེ་རུ་བྱང་ཆུབ་ལམ་རིམ་ཆེན་མོའི་བཀའ་ཆོས་གནང་རྒྱུས་མཚོན་དགའ་ལྡན་ཁྲི་པའི་གནང་སྒོ་ཁག་འཐུས་ཚང་གནང༌། ཕྱི་ལོ་ ༡༩༦༠ ལོར་རྒྱ་མིས་བོད་དུ་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དོ་དམ་ཨུ་ཡོན་ལྷན་ཁང་ཞེས་པའི་ཨུ་ཡོན་དུ་འདེམས་བསྐོ་བྱུང་བ་དང་། སྨོན་ལམ་དངོས་གཞི་ཚོགས་པའི་རིང་དགའ་ལྡན་ཁྲི་ཆེན་འདི་ཉིད་ཀྱིས་ཉིན་ལྟར་སྔ་དྲོར་གསུང་ཆོས་ར་བ་དང༌། ཉིན་གུང་སྐམ་ཚོགས་སུ་ཕེབས་ཏེ་གསུང་ཆོས་དང་བསྔོ་སྨོན་སོགས་ཁྲི་པའི་གནང་སྒོ་ཁག་སྒོ་ཀུན་ནས་འཐུས་ཚང་གནང༌། སྔ་ཕྱིར་མི་ལོ་བཅུ་གཅིག་བར་དགའ་ལྡན་གསེར་ཁྲི་བསྐྱངས་མུས་སུ་ལོ་དེའི་བོད་ཟླ་ ༡༠ ཚེས་ ༢༤ ཉིན་དགོངས་པ་ཆོས་དབྱིངས་སུ་གཤེགས་པ་བཅས་ཀྱི་རྣམ་ཐར་མདོར་བསྡུས་སོ།།