མཁས་གྲུབ་ཀྱིས་བརྩམས།
དང་པོ། ཐིག་ཕྱི་དགོན།
རྩེ་ཐང་ནས་ལམ་ཐག་སྤྱི་ལེ་ ༡༣༧ ཙམ་བསྐྱོད་ན་ཐིག་ཕྱི་དགོན་པར་སླེབས་ཤིང་། མཐོ་ཚད་རྒྱ་ཚོའི་ངོས་ལས་རྨིད་ ༣༧༠༠ ཡོད། ཐོག་མར་དགོན་པ་གནས་ས་དེ་མཚོ་ཡིན་པ་དང་། དེ་ནས་གནས་དེའི་ཡུལ་གྱི་ཁ་ར་ཐོད་ཅེས་པས་མཚོ་དེ་བརྟོལ། དེ་རྗེས་མཚོ་མིག་ཏུ་ཀླུ་གདོལ་པ་ནག་པོ་ཞེས་པ་གདུག་པ་ཅན་ཞིག་གནས་ཏེ་སྐྱེ་འགྲོར་གནོད་པ་ཆེན་པོ་བསྐྱལ་བས་དེའི་ཁ་གནོན་དུ་གྲུབ་ཐོབ་ལས་ཀྱི་རྡོ་རྗེའམ་ལྷོ་བྲག་ནམ་མཁའ་རྒྱལ་མཚན་གྱི་འཁྲུངས་རབས་ནང་ཚན་ཤུལ་བུ་ཟླ་བ་རྒྱལ་མཚན་གྱིས་མཚོ་གནས་དེར་དགོན་པ་ཞིག་འདེབས་དགོས་ཐུགས་ལ་འཁྲུངས་ཏེ་ཐིག་བསྐྱོན་པ་ལ་མཚན་མོ་ལྷ་འདྲེས་ཕྱིས་པས་ཐིག་ཕྱི་ཞེས་པའི་མཚན་ཐོགས། དེ་ལྟར་ལྷ་འདྲེས་ཀོ་ལོང་ཕྲག་དོག་བྱས་པའི་རུ་གནོན་དུ་ཕྱོགས་བཞི་དང་དབུས་བཅས་པར་མཆོད་རྟེན་ལྔ་བཞེངས། དེ་ནས་ཐིག་ཕྱི་གཙུག་ལག་ཁང་བཞེངས།
དགོན་པ་དེའི་རྒྱབ་རི་ནི་ཕྱི་གླང་ཆེན་གྱི་གཟུགས་འདྲ་བ་ལ་ནང་བྱ་ཁྱུང་གི་རང་བྱོན་དང་། དེའི་ལྟོ་བའི་ཐད་དུ་རྡོ་རྗེ་འཇིགས་བྱེད་ཀྱི་ལྷ་ཁང་དང་། གླང་ཆེན་གྱི་མཆུ་སྟེང་དུའང་དགོན་པ་ཞིག་ཡོད་པ་དེ་གཉིས་ལ་ཁྱུང་ཚང་ཞེས་དང་། འཇིགས་བྱེད་ལྷ་ཁང་ལ་དགོན་པ་མཐིལ་ཞེས་གཞི་རྒྱ་ཤིན་ཏུ་ཆེ་བ་ལྟ་བས་ཆོག་མི་ཤིས་པ་ཞིག་ཡོད་སྐད།
གནས་འདི་ན་ནམ་མཁའ་རྒྱལ་མཚན་གྱིས་འབྲུག་པ་བཀའ་བརྒྱུད་ཀྱི་ཆོས་འཁོར་ཤིན་ཏུ་རྒྱས་པ་བསྐོར་ཏེ་དགེ་འདུན་ཡང་ཞལ་གྲངས་ཆིག་སྟོང་ལྔ་བརྒྱ་ཙམ་བྱུང་བའི་ནང་གྲགས་ཅན་གྱི་མཁས་པ་རྗེ་ཙོང་ཁ་པ་དང་། ནམ་མཁའ་ལྷུན་རྒྱལ། ནམ་མཁའ་ལྷུན་གྲུབ་སོགས་བྱུང་། དགོན་པའི་རྟེན་གཙོ་ནམ་མཁའ་རྒྱལ་མཚན་གྱི་ཕྱག་བཟོ་སྐུ་ང་འདྲ་མ་མཐོང་བ་དོན་གྲོལ་དང་། ཤིང་རྩ་རིན་པོ་ཆེའི་ཕྱག་བཟོ་གུ་རུའི་སྐུ། ནམ་མཁའ་རྒྱལ་མཚན་སྐུ་གོང་མའི་སྐུ་ཤ་བྱིན་ཅན་ཕྲན་བུ་བཞུགས་པའི་གདུང་རྟེན་སོགས་མཇལ་རྒྱུ་ཡོད།
གཉིས་པ། རྒྱ་རི་དགོན།
མཚན་ཆ་ཚང་ལ་ཨེ་སྟོད་རྒྱ་རི་དགོན་ཞེས་ཟེར། རྩེད་ཐང་ནས་སྤྱི་ལེ་༥༠ཙམ་བསྐྱོད་ན་དགོན་པ་དེར་སླེབས། དགོན་པ་དེ་ནི་རྒྱལ་བ་རིས་མེད་པས་ཐོག་མར་དགོན་དེའི་ལྟག་ཏུ་ཡོད་པའི་ཞོལ་མོ་ཞེས་པའི་ས་ཆར་དགོན་ཆུང་ཞིག་བཏབ། དེ་རྗེས་ཐེངས་ཤིག་དགོན་ཆུང་དེ་ནས་མར་གཟིགས་པས་ད་ལྟའི་དགོན་པ་ཆགས་ཡུལ་དུ་ཉིན་མོ་དུ་བ་འཐུལ་བ་དང་། མཚན་མོ་མེ་འབར་བ་གཟིགས་པས་ཡ་མཚན་སྐྱེད་དེ་སློབ་མ་ཚོར་ས་ཆ་མ་གིར་ཡང་སྙིང་གང་ཞིག་འདུག་ལྟོས་ཤིག་ཅེས་གསུངས་པ་ལྟར་སློབ་མ་ཚོ་ཕྱོགས་དེར་སོང་ནས་ཞིབ་ཅིང་ཕྲ་བ་བལྟས་པ་ན་གཞན་དམིགས་བསལ་གང་ཡང་མེད་པ་རྩྭ་རྒྱའུ་ཞིག་ཡོད་པ་མཐོང་བ་དེ་དོན་བླ་མར་ཞུས་པས་བླ་མས་རྟེན་འབྲེལ་བཟང་། ད་ངའི་དགོན་པ་ས་ཆ་དེར་བཏབ་ན་བཟང་ཞེས་གསུངས་ནས་ད་ལྟའི་དགོན་པ་དེ་བཏབ་གནང་མཛད་པས་དགོན་པའི་མིང་ལའང་རྒྱ་རི་དགོན་ཞེས་ཐོགས།
ཐོག་མར་ཆོས་ལུགས་བཀའ་བརྒྱུད་པ་ཡིན་ནའང་རྗེས་སུ་དགེ་ལུགས་པར་བསྒྱུར་ཞིང་། དགེ་འདུན་ཞལ་གྲངས་བདུན་ཅུ་བསྐོར་ཟིན། དགོན་པའི་རྟེན་གཙོ་འགྲན་མེད་རྣམ་གསུམ་ཞེས་དབུས་སུ་ཇོ་བོ་དང་། གཡས་སུ་ཇོ་བོ་རྗེ། གཡོན་དུ་ཙོང་ཁ་པ་བཅས་ཡོད།
དགོན་པ་དེ་ནས་ཤར་ལྷོའི་མཚམས་ཀྱི་རི་ལྡེབས་སུ་རྐང་ཐང་མར་ཆུ་ཚོད་གཅིག་ཙམ་བསྐྱོད་ན་ཨེ་སྟོད་ཆུ་ཚན་ཞེས་པ་དེ་ཡོད། ཆུ་ཚོན་དེ་ནི་སྔར་སྐྱེས་བུ་ཡེ་ཤེས་རྡོ་རྗེས་འོལ་ཁ་ནས་གཟིགས་སྐབས་ཨེ་སྟོད་ལུང་ཤུར་གྱི་ཆུའི་ནང་ཆུ་འགྲོ་བ་འདྲེན་པ་ཡོད་པ་གཟིགས་པས་ཨེ་སྟོད་རོང་ཕུ་ནས་ཆུ་དེད་དེ་ཕེབས་པས་ད་ལྟ་ཀློག་ཅེས་ཟེར་བའི་གྲོང་ཚོར་ཕེབས་སྐབས་ལུང་ཤུར་གཉིས་ནས་ཆུ་བབས་ཀྱི་ཡོད་པས་ཆུ་འགྲོ་བ་འདྲེན་པ་བརླགས་པས་བརླགས་ཞེས་པའི་སྒྲ་ཉམས་ཏེ་ཕྱིས་གྲོང་ཚོའི་མིང་ལའང་ཀློག་ཅེས་ཟེར།
དེ་ནས་སྐྱེས་བུ་ཡེ་ཤེས་རྡོ་རྗེ་ཁོང་མར་ལོག་ཕེབས་སྐབས་སྐུ་ཐང་མཉེས་ཞིང་། ལྷག་པར་ཞབས་བསྙུན་ཏེ་སྐྱོ་མོ་ཞེས་པའི་ས་ཆར་སྐུ་ངལ་གསོ་བ་དང་སྦྲགས་གསུར་བཏང་གནང་ནས་བཞུགས་སྐབས་བྱ་རོག་གཅིག་གིས་གཏོར་ཆས་ཁྱེར་སོང་བ་དེའི་རྗེས་བསྙེགས་ནས་ཕེབས་པས་ད་ལྟའི་ཕོ་རོག་ཆུ་ཚན་ཞེས་པར་ཕོ་རོག་དེའི་རྐང་པ་སྦང་ནས་བསྡད་ཡོད་སྟབས་དེ་ཆུ་ཚན་ཡིན་པ་མཁྱེན་ནས་དེར་ཆུ་ཚན་བསྐྱོན་པས་ཞབས་ལམ་སེང་སེང་དྲག་བྱུང་བ་དང་། དེ་ནས་བཟུང་ཨེ་སྟོད་ཆུ་ཚན་ནམ་ཕོ་རོག་ཆུ་ཚན་གྱི་སྙན་གྲགས་གང་སར་ཁྱབ།
གསུམ་པ། དགོན་པ་རྩེ་དགོན།
རྩེ་ཐང་ནས་ལྷུན་རྩེ་རྫོང་བརྒྱུད་མཚོ་སྣའི་ཕྱོགས་སུ་སྤྱི་ལེ་༡༨༠ཙམ་བསྐྱོད་ན་དགོན་ཁྲོད་གྲོང་གི་རི་སྟེང་དུ་ཡོད་པའི་དགོན་པ་རྩེར་སླེབས་ཤིང་། དགོན་པའི་མཚན་ཆ་ཚང་ལ་མཚོ་སྣ་དགོན་པ་རྩེ་དགའ་ལྡན་རབ་རྒྱས་གླིང་ཞུ། དགོན་པ་དེ་ནི་ཐོག་མར་མངའ་བདག་ཉང་རལ་བཟང་པོས་བྲག་ཕུག་ཅིག་ཡོད་པ་དེའི་ནང་ཡུན་རིང་སྒྲུབ་པ་མཛད་པ་དང་། དེ་ནས་རིམ་བཞིན་དགོན་པ་ཆགས་ཤིང་། དགོན་པའི་ཤར་ངོས་སུ་ཡོད་པའི་བླ་མ་ཆུ་རྐ་ཞེས་པའི་ཆུ་དེའང་མངའ་བདག་ཉང་རལ་དཔལ་བཟང་པོས་བཏོན་པའི་གཏེར་ཆུ་ཡིན།
དེ་རྗེས་ཀུན་མཁྱེན་མཚོ་སྣ་བས་བཀའ་གདམས་པ་ཕྱག་བཞེས་མཛད་པ་དང་། ཕྱིས་རིམ་བཞིན་དགེ་ལྡན་པར་གྱུར། དེའང་ཀུན་མཁྱེན་མཚོ་སྣ་བ་ནི་ཡོངས་སུ་གྲགས་པའི་མཁས་ཆེན་ཞིག་ཡིན་ཞིང་། ཁོང་ཆུང་དུས་བ་རྫི་གནང་དུས་ནས་ཐུན་མིན་ངོ་མཚར་ཅན་གྱི་མཛད་འཕྲུལ་མང་པོ་ཞིག་ཡོད་པ་དང་། ཕྱིས་མཚོ་སྣ་ལྡིང་དཔོན་གྱིས་གསོལ་བ་བཏབ་པ་དང་ཆ་རྐྱེན་བསྐྲུན་ནས་ཟངས་ཆེན་པ་ལས་རབ་བྱུང་གི་སྡོམ་པ་བཞེས།
ཁྱད་དུ་འཕགས་པའི་ཐུགས་རིག་གི་མཐུས་རིང་མིན་སྐུ་ཡོན་ཤིན་ཏུ་ཆེ་བར་གྱུར་ཏེ་དགུང་ལོ་ཉེར་གཅིག་ནས་བཟུང་《འདུལ་བ་མདོ་རྩའི་འགྲེལ་པ་ལེགས་བཤད་ཉི་མའི་འོད་ཟེར》བརྩམས་གནང་བ་བྲ་འོར་དུ་རླུང་གིས་ཁྱེར་ཏེ་ཐིམ་པའི་གཟིགས་སྣང་བྱུང་སྟབས་ལྟས་བཟང་དུ་མཁྱེན་ནས་འཇམ་དཔལ་མཚན་བརྗོད་གསུང་བཞིན་དུ་བྲ་འོར་དུ་ཕེབས་པས་རྒྱལ་སྒོའི་སྟེང་ཞབས་གཡས་པ་བཅག་པ་དང་དུས་མཚུངས་འཇམ་དཔལ་མཚན་བརྗོད་ནང་གི་ཚིག་རྐང་གཅིག་སྟེ་ཆོས་ཀྱི་རྒྱལ་མཚན་ལེགས་པར་འཛུགས་ཞེས་པ་སྟབས་འཁེལ། དེ་ནས་མི་དཀར་པོ་ཞིག་གིས་ཁྱེད་འདིར་ཕེབས་པ་རྟེན་འབྲེལ་གྱི་སྒོ་བཟང་པོ་ཞིག་འགྲིག་པས་བསྟན་པ་དང་འགྲོ་བའི་དོན་དུ་འདིར་བཞུགས་པར་མཛོད་ཅིག་ཞེས་ཞུས་པ་ལས་ལུང་བསྟན་ལྟར་མཚོ་སྣ་ཁུལ་དང་། དེ་བཞིན་གནས་ངེས་མེད་དུ་མདོ་སྔགས་ཀྱི་བསྟན་པ་རྒྱ་ཆེར་སྤེལ།
ཁྱད་པར་དུ་མཚོ་སྣ་བ་འདི་ཉིད་དུ་འདུལ་བའི་གཞུང་ལ་གཞན་དྲིང་མི་འཇོག་པའི་སྤོབས་པ་ཐོབ་པ་ཞིག་ཡིན་པས་གངས་ཅན་མཁས་དབང་འབུམ་གྱི་སྤྱི་བོར་ཞབས་རྟེན་འཆའ་བའི་རྗེ་ཙོང་ཁ་པས་ཀྱང་འདུལ་བ་འབུམ་སྡེའི་མངའ་བདག་མཚོ་སྣ་བ་ཞེས་རྒྱ་ཆེར་བསྔགས།
དགོན་པ་རྩེའི་འདུ་ཁང་ནང་རྟེན་གཙོ་རྒྱལ་བ་བྱམས་པ་ཐོག་བརྩེག་ཉིས་ལྡན་སོགས་ཡོད་ལ། ད་ལྟ་ཀུན་མཁྱེན་མཚོ་སྣ་བའི་སྤྲོ་ཁང་ནང་ཀུན་མཁྱེན་གྱི་བཞུགས་ཁྲི་དང་། དབུ་ཞྭ། སྐུ་བེར། རྒྱལ་བ་བྱམས་པའི་སྐུ་བརྙན་རྙིང་པའི་ཕྱག་མཛུབ་སོགས་མཇལ་རྒྱུ་ཡོད།
དགོན་པ་དེ་ནས་རྐང་ཐང་དུ་ཉིན་གཅིག་ཙམ་བསྐྱོད་པའི་ས་ན་དོམ་ཚང་ཞེས་པའི་རི་ཁྲོད་དང་། ཤའུ་གཙུག་ལག་ཁང་། དཀར་པོ་བཟང་སོགས་དགོན་དེའི་དགོན་ལག་ཁག་མཇལ་རྒྱུ་ཡོད།
བཞི་པ། ལྷ་ལུང་དགོན།
རྩེད་ཐང་ནས་སྤྱི་ལེ་ ༣༢༠ བསྐྱོད་ན་ལྷ་ལུང་དགོན་དུ་སླེབས་ཤིང་མཐོ་ཚད་རྒྱ་མཚོའི་ངོས་ལས་རྨིད་༤༡༣༠ཡོད། དགོན་པ་དེ་ནི་ཐོག་མར་རྒྱ་བཟའ་ཀོང་ཇོས་གནས་འདིར་ཁ་གཏད་ཀྱི་ལྷ་ཁང་ཞིག་ཆགས་པ་ཤོག་ཅེས་ཐུགས་སྨོན་གནང་བའི་བདེན་ཚིག་ལས། ཤར་མཁར་དུང་གི་ལྷ་ཁང་ཞེས་གཞུ་སྤུངས་བཟོ་དབྱིབས་ཀྱི་ལྷ་ཁང་ཞིག་ཆགས། དེ་ནས་བཟུང་སངས་རྒྱས་གསུང་རབ་བདུན་གནས་དེར་འཕུར་ཕེབས་ནས་ལྷ་ཁང་དེར་བཞུགས་སུ་གསོལ་བས་ཡུལ་དེར་རྟེན་ཆགས་གཞུང་ཞེས་ཀྱང་ཟེར།
དེ་རྗེས་ཆོས་རྒྱལ་མངལ་བདག་ཁྲི་རལ་གྱི་བྲེ་སྤུངས་དབྱིབས་ཅན་གྱི་གཙང་ཁང་སྦུག་པར་རྒྱ་ལུགས་ཀྱི་དུས་གསུམ་སངས་རྒྱས་ཀྱི་སྐུ་བརྙན་བཞེངས་གནང་མཛད། དེ་ནས་རྗེ་འབངས་ཉེར་ལྔའི་ནང་ཚན་ལྷ་ལུང་དཔལ་གྱི་རྡོ་རྗེས་རྒྱ་བསྐྱེད་གནང་། ལྷ་ལུང་དཔལ་རྡོར་འཁྲུངས་སའང་ཡུལ་དེའི་བྱང་ཤར་གྱི་ལྷ་ལུང་ཕུ་ཞེས་པར་ཡོད། ལྷ་ལུང་དཔལ་རྡོར་གྱིས་རྒྱལ་པོ་གླང་དར་བཀྲོངས་ཏེ་མདོ་ཁམས་སུ་བྲོས་བྱོལ་ཕེབས་པའི་རིང་དགོན་པ་དེ་ཉམས་ཆགས་སུ་སོང་། དེ་ནས་ཕག་གྲུའི་དུས་རབས་སུ་དཔའ་བོ་གཙུག་ལག་ཕྲེང་བས་ལྷོ་བྲག་སྲས་མཁར་དགུ་ཐོག་རྒྱ་བསྐྱེད་གནང་བ་དང་དུས་མཚུངས་ཆོས་ལུགས་བཀའ་བརྒྱུད་པར་སྒྱུར།
དེ་རྗེས་རྒྱལ་དབང་ལྔ་པའི་སྐབས་གླིང་བཅུ་གསུམ་ཞེས་པའི་ཁོངས་སུ་རྙིང་དགོན་དུ་སྒྱུར། བྱང་གཏེར་རྡོ་རྗེ་གླིང་སྟེ་ཡུལ་རབ་དགོན་གསར། དབུས་གཏེར་སངས་རྒྱས་གླིང་སྟེ་རྩེད་ཐང་བན་ཚང་དགོན། ལྷོ་གཏེར་པད་མ་གླིང་པ་བཅས་གཏེར་ཆེན་ལྔ་ལས་དགོན་པ་དེ་ནི་ལྷོ་གཏེར་པད་མ་གླིང་དུ་གྲགས། པད་མ་གླིང་པའི་སྐུ་སྐྱེ་ཀུན་བཟང་རང་གྲོལ་བར་སྐུ་ཐོག་བཅུ་གཅིག་བྱུང་།
དགོན་པ་འདིའི་ནང་པད་མ་གླིང་པ་དང་། མངའ་བདག་ཉང་རལ་པ། སྨྲ་བོ་ལྕོག གུ་རུ་ཆོས་དབང་སོགས་ཀྱི་སྐུ་བརྙན་དང་། ཉང་ཆོས་གླིང་གསུམ་གྱི་མཛད་རྣམ་འཁོད་པའི་ལྡེབས་རིས་རྙིང་པ་ངོ་མཚར་ཅན་སོགས་མཇལ་རྒྱུ་ཡོད།
ད་དུང་དགོན་པ་དེ་ནས་ནུབ་ངོས་སུ་རྐ`ང་ཐང་མར་ཆུ་ཚོད་གཉིས་ཙམ་སོང་ན་རྫར་ལ་ཡག་པ་གྲོང་ཞེས་པའི་ཡུལ་དུ་གུ་རུ་ཆོས་དབང་གི་འཁྲུངས་ཡུལ་དང་། གདན་ས་སོགས་ཀྱི་ཤུལ་ཡོད།
ལྔ་པ། སྤྱན་གཡས་དགོན་པ།
སྤྱན་གཡས་དགོན་པ་ནི་ལྷོ་ཁ་ས་ཁུལ་འཕྱོངས་རྒྱས་རྫོང་རྒྱས་སྨན་ཤང་གི་ཁོངས་སུ་གནས་ཡོད་ཅིང་། རྩེ་ཐང་ནས་ལམ་ཐག་སྤྱི་ལེ་༤༥ཡོད་པ་དང་། མཐོ་ཚད་རྒྱ་མཚོའི་ངོས་ལས་རྨིད་ ༣༧༨༠ ཡོད། དགོན་པ་དེ་གཏེར་སྟོན་གྲྭ་པ་མངོན་ཤེས་ཀྱིས་སྤྱི་ལོའི་དུས་རབས་བཅུ་གཉིས་ནང་ཕྱག་བཏབ། དགོན་པ་འདིའི་མིང་ལ་སྤྱན་གཡས་ཞེས་ཟེར་དོན་ནི། སངས་རྒྱས་ཤྰཀྱ་ཐུབ་པའི་དངོས་སློབ་ཀྱི་ནང་ནས་ཤེས་རབ་ཕུལ་དུ་བྱུང་བ་ཤྰ་རིའི་བུའི་སྤྱན་གཡས་པ་དགོན་པ་དེའི་ནང་རྟེན་གྱི་གཙོ་བོར་བཞུགས་ཡོད་པས་དགོན་པའི་མིང་ལའང་དེ་སྐད་ཅེས་ཟེར། སྤྱན་གཡས་དགོན་པ་གནས་སའི་ལུང་པ་དེར་རྒྱལ་སྨན་ཟེར་དོན་ནི། གནའ་བོའི་དུས་སུ་བོད་རྒྱལ་ག་གེ་མོ་ཞིག་(པུ་དེ་གུང་རྒྱལ་ཡིན་ཟེར)ནད་ཀྱིས་མནར་ནས་ཐབས་ཤེས་ཇི་འདྲ་ཞིག་བཏང་ཡང་དྲག་སྐྱེད་མ་བྱུང་བར་ཉེན་ཁའི་གནས་ལ་གྱར་བའི་ཚེ། ཉམས་མྱོང་ཅན་གྱི་ལུག་རྫི་རྒན་པོ་ཞིག་གིས་རྩྭ་སྨན་ཞིག་ཕུལ་བ་བཞེས་མ་ཐག་རྒྱལ་པོའི་ནད་གཞི་སེང་དྲག་བྱུང་། རྩྭ་སྨན་དེ་ལུང་པ་དེའི་ནང་ནས་བཏོག་པ་ཞིག་ཡིན་པས་ཕྱིས་ལུང་པའི་མིང་ལའང་རྒྱལ་པོའི་སྨན་ཐོག་ས་སྟེ་རྒྱལ་སྨན་ཞེས་ཡོངས་སུ་གྲགས།
སྤྱན་གཡས་དགོན་པའི་ནང་ཐུགས་ཀར་སྤྱན་རས་གཟིགས་རང་བྱོན་དུ་ཡོད་པའི་ལི་མའི་ཇོ་བོ་དང་། རྩ་ཆེའི་ཞལ་ཐང་རྙིང་མ། ཆོས་སྲུང་མགོན་པོ་གྲི་གུག་དང་། ཞང་བློན། ཆོས་སྐྱོང་ར་མགོ་ཅན་གྱི་སྐུ་སོགས་ཡོད་པ་མ་ཟད། ལྷག་པར་དུ་སྐུ་རྒྱུ་ཛཻ་ཀྴིམ་ལས་གྲུབ་པའི་སངས་རྒྱས་རིན་ཆེན་ཟླ་བའི་སྐུ་བརྙན་རྩ་ཆེན་དེ་ལ་ངོ་མཚར་ཅན་གྱི་གཏམ་རྒྱུད་སྙན་པོ་ཞིག་ཤོད་རྒྱུ་ཡོད་པ་སྟེ། གནའ་སྔ་མོ་ཞིག་འཕྱོངས་རྒྱས་རྒྱལ་སྨན་སྔོ་ཐོག་ཁང་གསར་ཞེས་པའི་ཁྱིམ་ཚང་དེའི་ལུག་རྫི་ན་གཞོན་ཞིག་འཕྱོངས་རྒྱས་ཕུའི་རྩྭ་ཁ་རི་མ་ཀླུང་གི་ངོས་སུ་ལུག་འཚོ་བར་འགྲོ་དུས་དུས་རྒྱུན་རང་གིས་གཅེས་པར་བྱེད་པའི་ར་མོ་དཀར་པོ་ཞིག་ཡོད་པ་དེ་བར་ལམ་ཉིན་ཤས་རིང་ཉིན་མོ་ལུག་ཁྱུའི་ཁྲོད་དུ་མཐོང་རྒྱུ་མེད་ནའང་དགོང་དྲོ་ནང་ལ་ལོག་དུས་ལུག་ཁྱུའི་ནང་སླེབས་ཀྱི་ཡོད་པས་ཁོ་ཡ་མཚན་སྐྱེས་ནས་ཉིན་ཞིག་ཆེད་མངགས་ར་མོ་དཀར་པོ་གང་འགྲོའི་ས་ལ་འཇབ་བལྟ་བྱས་པས། ར་དེ་གཡང་སའི་རྩེ་མོར་གནས་པའི་གནའ་བོའི་གྱང་རོང་ཞིག་ནང་འཛུལ་ནས་ལྷ་སྐུ་གསུམ་ལ་འོ་མ་འབུལ་བཞིན་ཡོད་པ་མཐོང་།
ལུག་རྫི་མཐོང་མ་ཐག་ལྷ་སྐུ་གསུམ་པོས་གནམ་ལ་འཕུར་རྩིས་གནང་ཡང་ལུག་རྫིས་མགྱོགས་མྱུར་ལྷ་སྐུའི་འགྲམ་དུ་བཅར་ནས་ཕྱག་འབུལ་ཞུས་པས་མི་གྲིབ་ཕོག་སྟེ་འཕུར་མ་ཐུབ་བར་མི་ཡུལ་དུ་ལུས། ལུག་རྫིས་བདག་གིས་ཉེས་པ་བསགས་སོང་ཞེས་ཁ་གཉིས་མེད་ཀྱིས་བཤགས་པ་ཕུལ་བས་ལྷ་སྐུ་གསུམ་གྱིས་ཁྱེད་ཀྱིས་ང་ཚོར་བཤགས་པ་འབུལ་མི་དགོས། ང་ཚོ་ལྷ་ཡུལ་དུ་འཕུར་མི་ཐུབ་པ་དེ་ནི་འགྲོ་དོན་མི་ཡུལ་དུ་ཡོད་པའི་རྟགས་རེད། དེས་ན་ཁྱེད་ཀྱིས་ང་ཚོ་རང་རང་སོ་སོ་གང་འདོད་ཀྱིས་ས་ལ་སྐྱོལ་ཅིག་ཅེས་གསུངས་མ་ཐག་ལུག་རྫིས་གུས་གུས་ཞུམ་ཞུམ་ངང་ཁས་ལེན་ཞུས། ལྷ་སྐུ་གཅིག་གིས་ང་འཕྱོངས་རྒྱས་རོལ་ཁང་ཞེས་པར་སྐྱེལ་རོགས་གསུངས་པ་ལྟར་གདན་འདྲེན་ཞུས་པ་དེ་ནི་རོལ་ཁང་སྟོང་པ་མཚན་ལེགས་ཞུ་བའི་རྟེན་གཙོ་དེ་ཡིན་པ་དང་། གཅིག་གིས་ང་ཡར་ཀླུང་ལྷ་རི་ཞེས་པར་སྐྱེལ་རོགས་ཞེས་གསུངས་པ་ལྟར་གདན་འདྲེན་ཞུས་པ་དེ་ནི་ལྷ་རི་སྨན་པའི་རྒྱལ་པོ་ཞེས་པའི་རྟེན་གཙོ་དེ་ཡིན་ཡང་གཅིག་གིས་ང་སྤྱན་གཡས་ཞེས་པར་སྐྱེལ་རོགས་ཞེས་གསུངས་པ་ལྟར་གདན་འདྲེན་ཞུས་པ་དེ་ནི་སྤྱན་གཡས་རིན་ཆེན་ཟླ་བ་ཞེས་པའི་རྟེན་གཙོ་དེ་ཡིན་ཞེས་ཕ་གཏམ་བུ་འཇགས་སུ་གྱུར་རོ།།
དྲུག་པ། གསང་སྔགས་གཟིམ་སྤྱིལ
རྩེད་ཐང་གྲོང་ཚོའི་ཤར་གླིང་ཁ་པའི་སྟེང་གི་མགོན་པོ་རི་ངོགས་སུ་གསང་སྔགས་གཟིམ་སྤྱིལ་ཞེས་པའི་བཙུན་མའི་དགོན་པ་ཞིག་ཡོད་པ་འདི་ནི་ཆུ་ལྷོ་རྒྱུད་ཀྱི་དགེ་ལུགས་པའི་མོ་དགོན་དང་པོ་དེ་ཡིན། དེ་ཡང་གཟིམ་སྤྱིལ་དེའི་ནང་ཐོག་མར་ཆོས་རྒྱལ་སྲོང་བཙན་སྒམ་པོས་སྐུ་མཚམས་སུ་བཞུགས་མྱོང་བས་ཐོག་མའི་མཚན་གསང་སྔགས་གཟིམ་སྤྱིལ་ཞེས་པ་དགོན་མིང་དུ་གྱུར།
གནས་འདིར་ས་སྐྱའི་བླ་མ་བསོད་ནམས་རྒྱལ་མཚན་བཞུགས་ནས་ས་ལུགས་ཕྱག་བཞེས་གནང་བ་དང་། དེ་རྗེས་ཁམས་ནང་ཆེན་ནས་རྗེ་ཚོང་ཁ་པའི་དངོས་སློབ་བླ་མ་མཁྱེན་རབ་ངག་དབང་གྲགས་པ་ཕེབས་ནས་དགེ་ལུགས་ཕྱག་བཞེས་གནང་བས་དེ་ནས་བཟུང་དགེ་ལུགས་པའི་བཙུན་དགོན་དུ་གྱུར།
མ་དགོན་ནི་དགའ་ལྡན་ཆོས་འཁོར་གླིང་ཡིན་ཞེང་། དེང་ཆར་འཚོ་བཞུགས་ངག་དབང་བསྟན་འཛིན་ཚུལ་ཁྲིམས་བར་བླ་ཐོག་སྐུ་ཕྲེང་བརྒྱད་བྱུང་།
གསང་སྔགས་གཟིམ་སྤྱིལ་དགོན་གྱི་རྟེན་གཙོ་སྤྱན་རས་གཟིགས་ཕྱག་སྟོང་སྤྱན་སྟོང་དེ་ནི་སྔོན་སྲོང་བཙན་སྒམ་པོའི་སྐབས་མགོན་པོ་རིའི་ཕྱོགས་བཞིར་སྤྱན་རས་གཟིགས་ཕྱག་སྟོང་སྤྱན་སྟོང་བཞི་ཡོད་པའི་ནང་ནས་ད་ལྟ་བཞུགས་པ་གཅིག་པུ་དེ་རང་ཡིན་པས་རིག་དངོས་དང་ལོ་རྒྱུས་ཀྱི་རིན་ཐང་ཤིན་ཏུ་ཆེ། གསང་སྔགས་གཟིམ་སྤྱིལ་དགོན་པའི་རྒྱབ་ནས་ཤར་རྒྱག་མགོན་པོ་རི་རྩེར་ཡོད་པའི་སྤྲེའུ་བྲག་ཕུག་ལ་འགྲོ་ལམ་ཆུང་ཆུང་ཞིག་ཡོད།
དེ་ནི་སྤྲེའུ་བྲག་ཕུག་ལ་བསྐྱོད་པའི་མགྱོགས་ལམ་ཡིན་པ་དང་། ལམ་གཙོ་བོ་ནི་མགོན་པོ་རིར་རི་བསྐོར་དུ་བསྐྱོད་དུས་ཞོར་དུ་བསྐྱོད་ས་ཡོད་པ་དེ་ཡིན།
གཞན་ཡང་གསང་སྔགས་གཟིམ་སྤྱིལ་གྱི་གཡས་གཡོན་གཉིས་སུ་ཆུ་མིག་ཤར་དང་། ཆུ་མིག་ནུབ་ཅེས་གཉིས་ཡོད་པའི་ཆུ་དེས་ནད་རིགས་མང་པོ་ཞིག་ལ་ཕན་གྱི་ཡོད་པས་དེང་ཁྲུས་བྱེད་པར་ཡོང་མཁན་འཚང་ཁ་ཤིག་ཤིག་ཡོད་པ་མ་ཟད་ཐག་རིང་ནས་ཀྱང་ཆེད་མངགས་ཆུ་དེ་ལེན་པར་ཡོང་མཁན་ཧ་ཅང་མང་པོ་ཡོད།
ཡོང་ཁུངས། ཡར་ཀླུང་སྤྲིན་ཆར།
