རྩོད་པའི་ཕྱག་རྒྱ་དང་། དེ་དག་གི་མཚོན་དོན།
རྩོད་པའི་སྐབས་མགོ་ཅུང་ཟད་ནང་དུ་བསྒུར་བས། བསྐལ་པ་བྱེ་བའི་བར་དུ་མཚན་ཙམ་ཡང་ཐོབ་པར་དཀའ་བའི་ཟབ་པ་དང་རྒྱ་ཆེ་བའི་དམ་པའི་ཆོས་རིན་པོ་ཆེ་ལ་ཅི་དགར་ལོངས་སུ་སྤྱོད་རྒྱུ་བྱུང་བ་འདི་བླ་མའི་བཀའ་དྲིན་དུ་ངོ་ཤེས་པ་དང༌། ཕྲེང་བ་ཉིས་ཁུག་བྱས་ཏེ་ཕྱག་གཡོན་པའི་མཐེ་བོང་དང་བཅས་པའི་སྐེར་བསྐོན་པས། བདག་དང་བཅས་པའི་སེམས་ཅན་ཐམས་ཅད་འཁོར་བ་གཅོང་རོང་གི་གནས་སུ་བདག་འཛིན་གྱིས་བཅིངས་པ་དང༌། མཐེ་བོང་གིས་ཕྲེང་བ་ཡར་འཕངས་པས། རང་གིས་ཚུལ་ཁྲིམས་རྣམ་པར་དག་པ་བསྲུངས་ཤིང་དགེ་བའི་བཤེས་གཉེན་གཙུག་ཏུ་བཀུར་ནས་ཐོས་བསམ་སྒོམ་གསུམ་སོགས་དགེ་སྒྲུབ་ཅི་ནུས་བྱས་པའི་མཐུས་མ་རྒན་སེམས་ཅན་ཐམས་ཅད་འཁོར་བར་འཆིང་བྱེད་ཀྱི་བདག་འཛིན་ལས་གྲོལ་སོང་བ་དང༌།
ཐལ་མོ་ཐུགས་ཀར་བརྡབས་པས། འགྲོ་བ་སེམས་ཅན་ཐམས་ཅད་ལ་ཁྱོད་རང་རྣམས་མ་གཡེངས་པར་ཉོན་དང་ངས་ཐར་ལམ་སྟོན་པར་བྱའོ་ཞེས་བརྡ་བརྒྱབ་པ་མཚོན། ཀ་ཡེ་ཇི་ལྟར་ཆོས་འཆད་ཅེས་རྣམ་དབྱེ་བརྒྱད་པའི་སྒྲ་སྦྱར་བས། ཕྱི་རྒོལ་ཆོས་ཟླར་འབོད་པའམ་ཉན་པར་བསྐུལ་བ་དང༌། ཇི་ལྟར་ཆོས་འཆད་ཅེས་པས་ཐར་པ་དང་ཐམས་ཅད་མཁྱེན་པ་ཐོབ་ཚུལ་ལམ་ཐོབ་བྱེད་ཕྱིན་ཅི་མ་ལོག་པར་འདི་ལྟར་འཆད་དོ་ཞེས་བསྐུལ་བ་མཚོན། དྷཱིཿཞེས་མི་ཤེས་པ་དང་མ་རིག་པའི་གཉེན་པོ་བཞིན་ལག་གི་རྣམ་པར་ཤར་བ་རྗེ་བཙུན་འཇམ་པའི་དབྱངས་ཀྱི་སྙིང་པོ་བརྗོད་པས། རང་རྒྱུད་ལ་བྱིན་རླབས་འཇུག་པའོ།།
