༄༅། །དགའ་ལྡན་བྱང་རྩེ་གྲྭ་ཚང་གི་མཁན་ཟུར་རིན་པོ་ཆེའི་ལོ་རྒྱུས་མདོར་བསྡུས།།
མཁན་ཟུར་རིན་པོ་ཆེ་བསོད་ནམས་ཆོས་འཕེལ་མཆོག་ནི་ ༡༩༣༨ ལོར་མལ་གྲོ་གུང་དཀར་ཆོས་འཁོར་སྒང་ཟུར་ཁང་ཞེས་པའི་ཁྱིམ་དུ་ཡབ་བྱམས་པ་རིག་འཛིན་དང་། ཡུམ་བསམ་གཏན་མཚོ་མོ་གཉིས་ཀྱི་སྲས་སུ་འཁྲུངས། དགུང་ལོ་དྲུག་བདུན་ཙམ་དུ་ཕེབས་པ་ན་ཀ་ཚལ་གྲོང་ཚོར་ཡི་གེ་འབྲི་ཀློག་སོགས་ལ་སློབ་འགོ་ཚུགས། དེ་ལྟར་དགུང་ལོ་བཅུ་ཙམ་ལ་དགའ་ལྡན་བྱང་རྩེ་གྲྭ་ཚང་དུ་ཆོས་སྒོར་བཞུགས་ནས་དབུ་ཆོས་སྤྱོད་སོགས་བློ་འཛིན་གྱིས་མཚོན་སློབ་གཉེར་གནང་འགོ་བརྩམས། ༡༩༥༩ ལོ་སྟེ་དགུང་ལོ་ཉི་ཤུ་ལ་ལྷོ་ཁ་བརྒྱུད་ནས་རྒྱ་གར་དུབཙན་བྱོལ་དུ་ཕེབས་ནས་སྦག་ས་ཆོས་སྒར་དུ་མུ་མཐུད་གཞུང་ཆེན་ལ་སློབ་གཉེར་གནང་། ལོ་དེ་གའི་ལོ་མཇུག་ཏུ་གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོའི་དྲུང་ནས་བསྙེན་རྫོགས་ཀྱི་སྡོམ་པ་ཞུས།
དེ་ལྟར་ལོ་ངོ་དུ་མའི་རིང་གཞུང་ཆེན་བཀའ་པོད་ལྔ་དང་བཅས་པར་ཐོས་བསམ་སློབ་གཉེར་གང་ཐུབ་གནང་མཐར་ ༡༩༨༧ ལོར་དགེ་བཤེས་ལྷ་རམས་པའི་དམ་བཅའ་ལེགས་པར་གྲུབ་རྗེས་དཔལ་ལྡན་རྒྱུད་སྨད་དུ་སྔགས་ཕྱོགས་ལ་གསན་བསམ་སློབ་གཉེར་གྱིས་དགེ་བཤེས་སྔགས་རམས་པའི་ཕྱག་ཁྱེར་ཐོབ།
དེ་རྗེས་དགེ་བཤེས་ཐོན་རྗེས་གྲྭ་ཚང་དང་སློབ་གྲྭར་དཔེ་ཁྲིད་དགེ་རྒན་ཡུན་རིང་གནང་། ལྷག་པར་གྲྭ་ཚང་གི་ཁྲིམས་བདག་དགེ་བསྐོས་ཀྱི་ལས་ཡུན་ཐེངས་གཉིས་གནང་། ༢༠༠༨ ལོར་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་པས་ཡེ་ཤེས་དབྱིངས་དཔྱད་ཀྱིས་གྲྭ་ཚང་གི་མཁན་རིན་པོ་ཆེའི་ཕྱག་རྟགས་ཕེབས་པ་བཞིན་ ༢༠༡༢ ཀྱི་ལོ་དཀྱིལ་བར་མཁན་པོའི་ལས་འགན་བཞེས་པ་དང་། ལོ་དེའི་ལོ་མཇུག་ནས་མཁན་ཟུར་གྱི་གནས་བབ་ཐོག་བཞུགས་མུས་བཅས་ཀྱི་ལོ་རྒྱུས་མདོར་བསྡུས་ཙམ་དུ་ཕུལ།།
ཡོང་ཁུངས། དབུར་སྟོད་སྲོང་བཙན་སྐྱིད་སྡུག་གི་ངོ་དེབ།
