༄༅། །དབུས་པ་བློ་གསལ་གྱི་རྟགས་འཇུག་གི་འགྲེལ་པ་བཞུགས་སོ།།

༄༅༅། །རྟགས་ཀྱི་འཇུག་པའི་འགྲེལ་པ་བཞུགས་སོ།།

མཛད་པ་པོ། དབུས་པ་བློ་གསལ།

༄༅༅། །རྒྱ་གར་སྐད་དུ། ལིང་གཱ་བ་ཏཱ་ར་བྲི་ཏི། བོད་སྐད་དུ། རྟགས་ཀྱི་འཇུག་པའི་འགྲེལ་པ། སྨྲ་བའི་དབང་ཕྱུག་ལ་ཕྱག་འཚལ་ལོ། །བསྟན་བཅོས་མཛད་པའི་སློབ་དཔོན་གྱིས་མིང་གཞིའི་ཡི་གེ་རྣམས་ཐ་དད་པར་ཤེས་པར་བྱ་བའི་ཕྱིར།སུམ་ཅུ་པའི་ཡན་ལག་གི་བསྟན་བཅོས་རྟགས་ཀྱི་འཇུག་པ་མཛད་པ་ནི་གང་བཤད་པར་བྱ་བའི་ཆོས་ཡིན་ནོ། །དེ་འཆད་པ་ན།བརྡ་སྤྲོད་པའི་གཙུག་དག་ལས་ཀ་ལ་སོགས་པ་གསལ་བྱེད་རྣམས་ནི་ཕོ་དང༌།ཨ་ལ་སོགས་པ་དབྱངས་ཡིག་རྣམས་ནི་མོ་དང༌།རྀ་རཱྀ་ལྀ་ལཱྀ་རྣམས་ནི་མ་ནིང་དུ་བཤད་ལ།འདིར་ཡི་གེ་སུམ་ཅུ་པོ་སྡེ་པ་ཕྱེད་དང་བརྒྱད་དུ་གནས་པའང་འབྱུང་གནས་ཀྱི་སྟོབས་ཀྱིས་སྡེ་པ་ལྔར་བསྡུས་པའོ།།

དེ་ལ་ཀ་ཅ་ཏ་པ་ཙ་ལྔ་ནི་ཕོའོ། །ཁ་ཆ་ཐ་ཕ་ཚ་ལྔ་ནི་མ་ནིང་ངོ༌། །ག་ཇ་ད་བ་ཛ་ང་ཉ་ན་མ་ཝ་ཞ་ཟ་འ་ཡ་ར་ལ་ཤ་ས་ཧ་ཨ་ཉི་ཤུ་ནི་མོའོ། །གཞུང་འདི་དང་སུམ་ཅུ་པ་ལས།ཨ་གསལ་བྱེད་དུ་བཤད་པ་ལྟར་ན་ཕོར་བཤད་པའང་རུང་ངོ༌། །མོའི་ནང་ནས་བཅུ་ནི་རྗེས་སུ་འཇུག་ཅིང༌།རྗེས་འཇུག་གི་ནང་ནས་ལྔ་ནི་སྔོན་དུའང་འཇུག་ལ།ལྔ་པོ་དག་ལའང་བཞིར་ཕྱེ་བའི་བ་ནི་ཕོའོ། །ག་ད་གཉིས་ནི་མ་ནིང་ངོ༌། །འ་ནི་མོའོ། །མ་ནི་ཤིན་ཏུ་མོའོ། །རྗེས་འཇུག་ལ་གསུམ་དུ་ཕྱེ་བ་ད་བ་ས་རྣམས་ནི་ཕོའོ། །འ་ར་གཉིས་ནི་མོའོ། །ག་ང་ན་མ་ལ་རྣམས་ནི་མ་ནིང་ངོ༌། །འདི་དག་ལ་ཡང་ཕོ་གསུམ་མོ་གཉིས་མ་ནིང་གསུམ་དུ་ཕྱེའོ། །དེས་ན་གཞུང་འདི་ནས་ཡི་གེ་སུམ་ཅུ་ལ་གསུམ་དུ་ཕྱེ་བ་དང་མོ་ལ་མོ་དང་ཤིན་ཏུ་མོའི་དབྱེ་བས་སྡེ་པ་བཞི་ལ་བཞི་བཞིར་ཕྱེ་བ་དང༌།ལྷག་མ་བཅུ་བཞི་ལ་བཞིར་ཕྱེ་བ་ནི་སྤྱིར་ཕོ་བཞིར་བྱས་པ་ལ་ཡིན་ནོ། །སྔོན་འཇུག་ལྔ་ལ་བཞིར་ཕྱེ་བ་དང༌།རྗེས་འཇུག་བཅུ་ལ་གསུམ་དུ་ཕྱེ་བ་དང༌།དེ་ལ་ཡང་བརྒྱད་དུ་ཕྱེ་བ་ནི་བྱེ་བྲག་ཏུ་མོ་བཞིར་བྱས་པ་ལ་ཡིན་ནོ་ཞེས་ཤེས་པར་བྱའོ། །ཚུལ་འདིས་དེ་དག་ལ་གང་གིས་ཇི་ལྟར་ཅིའི་ཕྱིར་འཇུག་པ་རྣམས་བདེ་བླག་ཏུ་རྟོག་པར་འགྱུར་རོ། །ཞེས་དག་གི་དོན་བཀོད་པ་ཡིན་ནོ། །ད་ནི་སྐབས་སུ་བབས་པ་བསྟན་འཆོས་བཤད་པ་ལ་འཇུག་པ་བསྟན་པ།སྨྲ་བའི་སྐྱེལ་མཆོག་སྨྲ་བའི་རྒྱལ། །ཐམས་ཅད་མཁྱེན་ལ་ཕྱག་འཚལ་ལོ། །འདིས་ནི་གང་གི་ཆེ་དུ་ཕྱག་འཚལ་ན།ཆོས་གཉིས་དང་ལྡན་པའི་ཐམས་ཅད་མཁྱེན་པ་དེའི་ཆེད་དུ་འོ་ཞེས་མཆོད་པར་བརྗོད་པ་བསྟན་ཏེ།འདི་ནི་ཕྱིས་གཞན་གྱིས་བཅུག་པའོ། །བཤད་པ་ཉེ་བར་དགོངས་ལ་མདོར་བསྟན་པ། ཡི་གེ་སུམ་ཅུ་ཐམ་པ་ལ། ཕོ་མོ་མ་ནིང་གསུམ་དུ་དབྱེ། ཡི་གེ་ནི། ཀ་ཁ་ག་ང༌།ཅ་ཆ་ཇ་ཉ།ཏ་ཐ་ད་ན།པ་ཕ་བ་མ།ཙ་ཚ་ཛ་ཝ།ཞ་ཟ་འ་ཡ།ར་ལ་ཤ་ས་ཧ་ཨ་གཉིས་སྡེ་བ་ཕྱེད་དུ་གནས་པ་དང་སུམ་ཅུའོ། །དེ་ལ་ང་རོ་དྲག་པ་དང་ཞན་པ་དང་བར་མའི་བྱེ་བྲག་གིས་ཕོ་དང་མོ་དང་མ་ནིང་གསུམ་དུའོ། །ཇི་སྐད་དུ་སྨྲ་བའི་སྒོ་ལས། དང་པོ་རང་གནས་དྲག་པ་སྟེ། གཉིས་པ་འབྲིང་དང་སྤྱི་བོའི་ཆ། །གསུམ་པ་རྣམས་ནི་ཞན་པ་སྟེ། །ཞེས་འབྱུང་བ་བཞིན་ནོ། །རྒྱས་པར་བཤད་པ་ལ།ཕོ་ཡི་གི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང༌། །སྡེ་པ་ལྔ་རུ་དྲིལ་བྱས་ལ། །ཕོ་ནི་མིང་གཞིའི་ཡི་གེ་ཉིད་ཡིན་གྱི།དེ་ལ་གསུམ་དུ་ཕྱེ་བའི་ཕོ་ནི་མ་ནིང་ཡིན་ནོ། །སྡེ་པ་ནི་འཆི་མེད་མཛོད་ཀྱི་འགྲེལ་པ་ལས། མཚུངས་པ་རྣམས་འདུས་པའི་ཕྱིར་ན་སྡེ་ཚན་ཏེ། རིགས་དང་ཡོན་དང་བྱ་བ་དང་ངོ་བོ་རྣམས་མཚུངས་པའི་ཕྱིར་རོ། །ཞེས་འབྱུང་བ་འདི་ཡིན་ནོ། །ཕྱེད་དང་བརྒྱད་ནི་ཀ་སྡེ་ནས་ཧ་སྡེའི་བར་ཏེ་བཤད་ཟིན་ཏོ། །འང་གི་སྒྲ་ནི་མི་མཐུན་པ་བསྡུད་པའོ། །སྡེ་པ་ལྔ་ནི་ཀ་ཁ་ག་ང་ཧ་ཨ་རྣམས་ནི་མགྲིན་པ་ནས་འབྱུང་བའི་སྡེའོ། །ཅ་ཆ་ཇ་ཉ་ཙ་ཚ་ཛ་རྣམས་ནི་ལྕེ་དབུས་ནས་འབྱུང་བའི་སྡེའོ། །ཏ་ཐ་ད་ན་ལ་རྣམས་ནི་ལྕེའི་རྩེ་ནས་འབྱུང་བའི་སྡེའོ། །པ་ཕ་བ་མ་ཝ་རྣམས་ནི་མཆུ་ལས་འབྱུང་བའི་སྡེའོ། །ཞ་ཟ་འ་ཡ་ར་ཤ་ས་རྣམས་ནི་ལྕེའི་དབུས་དང་མགྲིན་པ་ནས་འབྱུང་བའི་སྡེའོ། །འདི་དག་ལ་རྐན་དང་སོ་དང་སྤྱི་བོ་ལ་སོགས་པ་གནས་གཞན་ལས་ཤས་ཆར་འབྱུང་བའང་ཡོད་དོ། །དེ་དག་ལ།ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། །སྡེ་པ་ནི་ཕྱེད་དང་བརྒྱད་ཀྱི་དབང་དུ་བྱས་པའོ། །དེ་ལ་སྡེ་བ་རྣམས་ཀྱི་དང་པོ་ཀ་ཅ་ཏ་པ་རྣམས་ནི་ཕོའོ། །གཉིས་པ་ཁ་ཆ་ཐ་ཕ་རྣམས་ནི་མ་ནིང་ངོ༌། །གསུམ་པ་ག་ཇ་ད་བ་རྣམས་ནི་མོའོ། །བཞི་པ་ང་ཉ་ན་མ་རྣམས་ནི་ཤིན་ཏུ་མོའོ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་ནི་ཙ་ནས་ཨའི་བར་རོ། །དེ་ལ་ཙ་ཅ་དང་སྦྱར་བ་ནི། །ཕོའི་ཐ་ཚིག་གོ །སོགས་པས་བསྡུས་པ་ཚ་ཆ་དང་སྦྱར་བ་དང༌།ཛ་ཇ་དང་སྦྱར་བ་ནི་དེ་གཉིས་མ་ནིང་དང་མོའི་ཞེས་པའི་ཞེས་པའི་དོན་ནོ། །དེ་བཞིན་དུ་ཝ་དང་སྦྱར་བའང་མོ་ཡིན་ནོ། །ལྷག་མ་དྲུག་ནི་མོ་རུ་སྦྱ། །ར་ལ་ཧ་ནི་མོ་ཤམ་སྟེ། །མ་ནིང་མཚན་མེད་ཅེས་ཀྱང་བྱ། །ཞ་ཟ་འ་ཡ་ཤ་ས་དྲུག་ནི་མོའོ། །ར་ལ་ཧ་གསུམ་ནི་མོ་ཤམ་མོ། །མ་ནིང་དང་ཟ་མ་དང་མཚན་མེད་ནི་མོ་ཤམ་གྱི་རྣམས་གྲངས་ཡིན་ལ་མོ་ཤམ་ནི་མོའི་བྱེ་བྲག་གོ །ཨ་ནི་སྔར་བཤད་པ་ལྟར་རོ། །ཡང་ན་སུམ་ཅུ་པོ་ཐམས་ཅད་ཀྱི་སྲོག་ཏུ་བསྟན་པའོ། །ཞེས་པ་བཞིན་ནོ། །འཇུག་པའི་ཡི་གེ་བཤད་པ།མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །རྡོ་རྗེ་མཁའ་འགྲོའི་རྒྱུད་ཀྱི་འགྲེལ་པར།འདིར་ཨ་ནི་ཐམས་ཅད་ཀྱིས་ཁོང་ནས་གནས་པར་བལྟན་པའོ། །ཞེས་གསུགས་པ་ལྟར་རོ། །ཡང་ན་སུམ་ཅུ་པོ་ཐམས་ཅད་ཀྱི་སྲོག་ཏུ་བསྟན་པའོ། །ཞེས་པ་བཞིན་ནོ། །འཇུག་པའི་ཡི་གེ་བཤད་པ།མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །མོ་ཡིག་ཉི་ཤུའི་ནས་ག་ང་ད་ན་བ་མ་འ་ར་ལ་ས་རྣམས་ནི་རྗེས་སུ་འཇུག་པའི་ཡི་གེའོ། །ནས་ནི་ལྔ་པ་འབྱུང་ཁུངས་ཀྱི་སྒྲའོ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །རྗེས་འཇུག་བཅུའི་ནང་ནས་ག་ད་བ་མ་འ་རྣམས་ནི་སྔོན་འཇུག་དུའང་འཇུག་པའོ། །སྔོན་འཇུག་ལྔ་རྟགས་ཐ་དད་པར་བསྟན་པ།སྔོན་འཇུག་ཡི་གེ་ལྔ་པོ་ལ།ཕོ་དང་མ་ནི་མོ་དང་ནི། །ཤིན་ཏུ་མོ་དང་བཞི་རུ་དབྱེ། །སྔོན་འཇུག་གི་ཕོ་ནི་བའོ། །མ་ནིང་ནི་ག་ད་གཉིས་སོ། །མོ་ནི་འ་འོ། །ཤིན་ཏུ་མོ་ནི་མའོ། །དེ་དག་གི་བྱེད་པ་བསྟན་པ།དེ་དག་རེ་རེའང་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །སྔོན་འཇུག་དེ་དག་རེ་རེའང་ལས་བཞི་བྱེད་དེ། །འདི་ལྟར་ཡུལ་གང་ལ་དང༌། །ངོ་བོ་གང་གིས་དང༌།ཚུལ་ཇི་ལྟར་དང༌།སྒྲུབ་བྱ་ཅིའི་ཕྱིར་འཇུག་པར་བྱེད་པའོ། །དེ་ད་བཤད་པ།ཕོ་ནི་ཕོ་དང་མོ་ལ་འཇུག །སྔོན་འཇུག་གི་ཕོ་བ་ནི་མིང་གཞིའི་ཕོ་ཀ་ཅ་ཏ་ཙ་བཞི་དང་མོ་ག་ད་ཞ་ཟ་ཤ་ས་དྲུག་སྟེ་ཡུལ་བཅུ་ལ་འཇུག་པ་ནི།དཔེར་ན་བཀའ་ཞེས་པ་ལ་སོགས་པའོ། །ཁ་ཅིག་བ་ཇའི་སྔོན་དུ་འཇུག་པ་དང༌།ལ་ལ་ཉའི་སྔོན་དུ་འཇུག་པར་འདོད་པ་ནི། །སྔོན་གྱི་མཁན་པོ་དང་མི་མཐུན་ནོ། །མོ་ནི་མོ་དང་མ་ནིང་ལའོ། །སྔོན་འཇུག་གི་མོ་འ་ནི་མིང་བཞིའི་མོ་ག་ཇ་ད་བ་ཛ་ལྔ་དང་མ་ནིང་ཁ་ཆ་ཐ་ཕ་ཚ་ལྔ་སྟེ་ཡུལ་བཅུ་ལ་འཇུག་པ་ནི་དཔེར་ན་འགའ་ཞེས་པ་ལ་སོགས་པའོ། །མ་ནིང་ཡང་ནི་ཕོ་མོ་ལའོ། །ངོ་བོ་སྔོན་འཇུག་གི་མ་ནིང་གཉིས་ཀྱི་དང་པོ། ག་ནི་མིང་གཞིའི་ཕོ་ཅ་ཏ་ཙ་གསུམ་དང་མོ་ད་ཞ་ཟ་ཡ་ཤ་ས་དྲུག་དང༌།ཤིན་ཏུ་མོ་ཉ་ན་གཉིས་ཏེ།ཡུལ་བཅུ་གཅིག་ལ་འཇུག་པ་ནི།དཔེ་ན་གཅའ་ཞེས་པ་ལ་སོགས་པའོ། །གཉིས་པ་ད་ནི་མིང་གཞིའི་ཕོ་ཀ་པ་གཉིས་དང༌།མོ་བ་ག་གཉིས་དང༌།ཤིན་ཏུ་མོ་ང་མ་གཉིས་ཏེ་ཡུལ་དྲུག་ལ་འཇུག་པ་ནི་དཀའ་ཞེས་པ་ལ་སོགས་པའོ། །ཤིན་ཏུ་མོ་ནི་མ་ནིང་དང༌། །མོ་དང་ཤིན་ཏུ་མོ་ཉིད་ལའོ། །ངོ་བོ་སྔོན་འཇུག་གི་ཤིན་ཏུ་མོ་མ་ནི་མིང་གཞིའི་མ་ནིང་ཁ་ཆ་ཐ་ཚ་བཞི་དང༌།མོ་ག་ཇ་ད་ཛ་བཞི་དང་ཤིན་ཏུ་མོ་ང་ཉ་གསུམ་སྟེ་ཡུལ་བཅུ་གཅིག་ལ་འཇུག་པ་ནི་དཔེར་ན་མཁའ་ཞེས་པ་ལ་སོགས་པའོ། །མི་འཇུག་པ་བསྟན་པ།མི་འཇུག་པ་ནི་འདི་དག་སྟེ།ཕོ་ནི་མ་ནིང་ལ་མི་འཇུག །མོ་ནི་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག །སྔོན་འཇུག་གི་ཕོ་བ་ནི་མིང་གཞིའི་མ་ནིང་ཁ་ཆ་ཐ་ཕ་ཚ་རྣམས་ལ་མི་འཇུག་གོ །སྔོན་འཇུག་གི་མོ་འ་ནི་མིང་གཞིའི་ཕོ་ཀ་ཅ་ཏ་པ་རྣམས་ལ་མི་འཇུག །མིང་གཞིའི་མ་ནིང་རང་ཁ་ཆ་ཐ་ཕ་ཚ་རྣམས་ལྔ་སྔོན་འཇུག་གི་མ་ནིང་ག་ད་གཉིས་མི་འཇུག་གོ །རང་གི་སྡེ་དང་འཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །བཞི་ཚན་དུ་གནས་པ་རང་གི་སྡེ་པ་ནང་ཕྲད་ན་འཇུག་པར་མི་འགྱུར་བ་ནི་སྔོན་འཇུག་གི་ཕོ་བ་ནི་རང་གི་སྡེ་པ་མིང་གཞིའི་མོ་བ་དང་ཤིན་ཏུ་མོ་མ་ལ་མི་འཇུག་གོ །དེ་བཞིན་དུ་མིང་གཞིའི་ཕོ་པ་དང༌། །མ་ནིང་ཕ་ལ་ཡང་མི་འཇུག་གོ །མ་ནིང་ཡང་དེ་བཞིན་ནོ། །ཞེས་པ་ནི་སྔོན་འཇུག་གི་མ་ནིང་གཉིས་ཀྱི་དང་པོ་ག་ནི་རང་གི་སྡེ་པ་མིང་གཞིའི་ཕོ་ཀ་དང༌། མོ་ག་དང༌། ཤིན་ཏུ་མོ་ང་ལ་མི་འཇུག་གོ །གཉིས་པ་ད་ནི་རང་གི་སྡེ་པ་མིང་གཞིའི་ཕོ་ཏ་དང་མོ་དང་ཤིན་ཏུ་མོ་ན་ལ་མི་འཇུག་གོ །ལོ་ཡང་དེ་བཞིན་ནོ་ཞེས་པ་ནི།སྔོན་འཇུག་གི་མོ་འ་ནི་རང་གི་སྡེ་པ་མིང་གཞིའི་མོ་ཞ་ཟ་ཡ་རྣམས་ལ་མི་འཇུག་གོ །སྔོན་འཇུག་གི་ཤིན་ཏུ་མོ་མ་ནི་རང་གི་སྡེ་པ་མིང་གཞིའི་ཕོ་པ་དང༌།མོ་མ་དང༌།མ་ནིང་ཕ་དང༌།ཤིན་ཏུ་མོ་མ་ལ་མི་འཇུག་གོ །འདི་དག་ཀྱང་མཚོན་པ་སྟེ།གཞན་དུ་ཕོ་ནི་ཕོ་དང་མོ་ལ་འཇུག །ཅེས་པ་ནས།མོ་དང་ཤིན་ཏུ་མོ་ཉིད་ལའོ། །ཞེས་པའི་བར་དུ་བཤད་པ་མ་གཏོགས་པ་མིང་གཞི་ཐམས་ཅད་ལ་ལྔ་པོ་མི་འཇུག་གོ །ཞེས་ཤེས་པར་བྱའོ། །མ་ནིང་རང་ལ་རང་མི་འཇུག་ན།མ་ནིང་ཡང་ནི་ཞེས་པའི་སྐབས་སུ་ག་ད་ཕན་ཚུན་འཇུག་པ་ཇི་ལྟར་ཞེ་ན།དེར་ནི་ག་ད་གཉིས་མིང་གཞིའི་མོའི་དབང་དུ་བྱས་ལ།འདིར་མིང་གཞིའི་མ་ནིང་ལ་སྔོན་འཇུག་གི་མ་ནིང་མི་འཇུག་པས་སྐྱོན་མེད་དོ། །གང་ཡང་གག་དང༌།ཅེས་པ་དེར་ཡང་ཁག་ཁད་ཅེས་པ་ལ་སོགས་པ་དང་མཚུངས་ལ།དེ་བཞིན་དུ་གལ་དལ་བལ་ཁལ་མལ་འམ་ཞེས་པ་ནི།ཁལ་ངལ་ཅལ་ཆལ་ཞེས་པ་ལ་སོགས་པ་དང་མཚུངས་པས། །སྔོན་འཇག་ཏུ་མི་བསམ་མོ། །འཇུག་པའི་ཚུལ་བསྟན་པ།ཇི་ལྟར་འཇུག་པར་བྱེད་ཅེ་ན།ཕོ་ནི་དྲག་པའི་ཚུལ་གྱི་ཏེ། །མ་ནིང་རན་པར་འཇུག་པ་ཡིན།མོ་ནི་ཞན་པའི་ཚུལ་གྱིས་འཇུག །ཤིན་ཏུ་མོ་ནི་མཉམ་པས་སོ། །སྔོན་འཇུག་ལྔ་ཚུལ་ཇི་ལྟར་འཇུག་པར་བྱེད་ཅེ་ན།འདི་ལྟར་སྔོན་འཇུག་གི་ཕོ་བ་སྔོན་དུ་འཇུག་པ་ནི་བརྗོད་པ་དྲག་པའི་ཚུལ་གྱིས་དང༌།དེ་བཞིན་དུ་མ་ནིང་ག་ད་གཉིས་ནི་བར་མ་དང༌།མོ་འ་ནི་ཞན་པའི་དང༌།ཤིན་ཏུ་མོ་ནི་མཉམ་ཕྱིར་རོ། །ཡང་སྔོན་འཇུག་ལྔ་འབྲས་བུ་ཅིའི་ཕྱིར་འཇུག་པར་བྱེད་ཅེ་ན། སྔོན་འཇུག་གི་ཕོ་བ་ནི་དུས་འདས་པ་དང༌།དངོས་པོ་གཞན་དང༌།མ་ནིང་ག་ད་གཉིསམ་དངོས་པོ་བདག་གཞན་གཉིས་ཀ་དང༌། དུས་ད་ལྟ་བ་དང༌། མོ་འ་ནི་དངོས་པོ་བདག་དང༌། དུས་མ་འོངས་པ་དང༌།ཤིན་ཏུ་མོ་ལ་ནི།དུས་དང་དངོས་པོ་ཐམས་ཅད་ཀྱི་ཆེད་དུ་མཉམ་པར་འཇུག་གོ་ཞེས་བྱ་བ་ཡིན་ནོ། །ད་ནི་རྗེས་འཇུག་བཤད་པ་ལ།རྗེས་འཇུག་བཅུ་རྟགས་ཐ་དད་པར་བསྟན་པ།རྗེས་འཇུག་ཡི་གེ་བཅུ་པོ་ལ།ཕོ་མོ་མ་ནིང་གསུམ་དུ་དབྱེ། །རྗེས་འཇུག་གི་ཕོ་ད་བ་ས་རྣམས་སོ། །མོ་ནི་ར་འ་གཉིས་སོ། །མ་ནིང་ནི་ག་ང་ན་མ་ལ་རྣམས་སོ། །ཕོ་ལ་སྐྱེས་བུ་རབ་འབྲིང་གསུམ།མོ་ལ་མོ་དང་ཤིན་ཏུ་མོ། །མ་ནིང་འགྱུར་དང་མཚན་གཉིས་དང༌།  །མཚན་མེད་དག་དང་གསུམ་དུ་འདོད། །པ་བ་ད་རྣམས་ནི་རྗེས་འཇུག་གི་ཕོའི་སྐྱེས་བུ་རབ་འབྲིང་གསུམ་མོ། །འ་ར་གཉིས་ནི་རྗེས་འཇུག་ཡི་མོའི་མོ་དང་ཤིན་ཏུ་མོ་གཉིས་སོ། །ག་ང་ན་རྣམས་ནི་མ་ནིང་འགྱུར་བའོ། །མ་ནི་མ་ནིང་མཚན་གཉིས་པའོ། །ལ་ནི་མ་ནིང་མཚན་མེད་དོ། །རྗེས་འཇུག་གི་མ་ནིང་རབ་འབྲིང་གསུམ་མོ་དག་གི་བྱེད་པ་བསྟན་པ།དེ་དག་གི་དབྱེ་བ་བསྟན་པ།དེ་ཡང་བྱེད་པ་བཞི་བཞི་སྟེ། །གང་ལ་འཇུག་བྱེད་གང་གིས་བྱེད། །ཇི་ལྟར་བྱེད་དང་ཅིའི་ཕྱིར་བྱེད། །རྗེས་འཇུག་དེ་དག་ཀྱང་བྱེད་པ་བཞི་བཞི་བྱེད་དེ།འདི་ལྟར་ཡུལ་གང་ལ་དང༌།བྱེད་པ་པོ་གང་གིས་དང༌།ཚུལ་ཇི་ལྟར་དང༌།སྒྲུབ་བྱ་ཅིའི་ཕྱིར་འཇུག་པར་བྱེད་པའོ། །དེ་ཉིད་བཤད་པ།གང་ལ་ཡི་གེ་ཐམས་ཅད་ལ། །གང་གིས་བཅུ་པོ་དེ་དག་གིས། །འདིའི་ནི་དང་པོ་གཉིས་བསྟན་ཏེ། །ཡུལ་གང་ལ་ན་མིང་གཞིའི་ཡི་གེ་སུམ་ཅུ་པོ་ཐམས་ཅད་ལའོ། །བྱེད་པ་སོགས་གང་གིས་ན་རྗེས་འཇུག་བཅུ་པོ་དག་གིས་སོ། །ཇི་ལྟར་རྣམ་པ་གཉིས་ཡིན་ཏེ།སྒྲ་ཡི་འཇུག་ཚུལ་དོན་གྱི་ཚུལ། །འདིས་ནི་གསུམ་པ་བསྟན་ཏོ། །ཇི་ལྟར་འཇུག་པའི་ཚུལ་ནི་རྣམ་པ་གཉིས་ཏེ། སྒྲ་དང་དོན་ཏོ། །སྒྲའི་འཇུག་པ་བསྟན་པ། ཕོ་གསུམ་མོ་གཉིས་མ་ནིང་གསུམ། །དྲག་ཞན་བར་མ་གསུམ་དུ་འཇུག །རྗེས་འཇུག་གི་ཕོ་ད་བ་ས་གསུམ་ནི་བརྗོད་པ་དྲག་པའི་ཚུལ་གྱིས་དང༌། མོ་འ་ར་གཉིས་ནི་ཞན་པའི་ཚུལ་གྱིས་དང༌། མ་ནིང་ག་ང་ན་མ་ལ་རྣམས་ནི་བར་མའི་ཚུལ་གྱིས་འཇུག་པའོ། །དྲག་པ་གསུམ་ཉིད་ནང་ཕྲད་དམ། །གལ་ཏེ་ཞན་པ་ནང་ཕྲད་ན། །དེ་ལའང་ནང་གི་ཆ་ཤས་ཀྱིས། །དེ་ཡང་དྲག་གཞན་གཉིས་སུ་དབྱེ། །དྲག་པ་ནི་རྗེས་འཇུག་གི་ཕོ་ད་བ་ས་གསུམ་མོ། །དེ་དག་ཉིད་ནང་ཕྲག་པ་ནི་ཚོགས་པའོ། །དེ་ལ་ནང་གི་ཆ་ཤས་བ་དང་སྔོན་དུ་ཞུགས་པའི་བྱེ་བྲག་གིས་ཚོགས་པ་དེ་ཡང༌། དྲག་པ་དང་ཞན་པ་གཉིས་སུ་དབྱེ་སྟེ།དཔེར་ན་བསད་ཅེས་པ་དང་དབས་ཞེས་པ་ལྟ་བུའོ། །དེ་ཡང་སྔོན་འཇུག་གི་ཕོ་དང་མ་ནིང་གི་ཁྱད་པར་ནི་སྐྱེས་བུ་འབྲིང་དང་ཐ་མའི་ཁྱད་པར་གྱིས་ཡིན་པར་སེམས་སོ། །གལ་ཏ་ཞན་པ་རྗེས་འཇུག་གི་མོ་འ་ར་གཉིས་ནང་ཕྲད་ན་དེ་ལ་ཡང་ནང་གི་ཆ་ཤས་མོ་དང་ཤིན་ཏུ་མོ་སྔོན་དུ་ཞུགས་པའི་བྱེ་བྲག་གིས་དེ་ཡང་དྲག་ཞན་གཉིས་སུ་དབྱེ་སྟེ། དཔེར་ན་འ་ར་དང་ཞེས་པ་དང་རའི་ཞེས་པ་ལྟ་བུའོ། །དེ་ནི་སྡུད་པའོ། །མ་ནིང་གསུམ་དུ་གང་གཏོགས་པ།དྲག་དང་ཕྲད་ན་དྲག་པར་འགྱུར། །ཞན་དང་ཕྲད་ན་ཞན་པར་འགྱུར། །ག་ང་ན་གསུམ་ནི་མ་ནིང་འགྱུར་པའོ། །མ་ནི་མཚན་གཉིས་སོ། །ལ་ནི་མཚན་མེད་དོ། །གསུམ་པོ་དེ་དག་དྲག་པ་ད་བ་ས་རྣམས་དང་ཕྲད་ན་དྲག་པར་གྱུར་ཏེ། དཔེར་ན་དག་བག་སག་ཅེས་པའམ། གད་ངད་ངས་གས་གབ་མ་ཞེས་པ་ལ་སོགས་པ་ལྟ་བུའོ། །ཡང་དེ་དག་ཞན་པ་འ་ར་གཉིས་དང་ཕྲད་ན་ཞན་པར་འགྱུར་ཏེ།དཔེར་ན་གའི་ངའི་ཞེས་པ་ལ་སོགས་པ་དང༌།གར་ངར་ཞེས་པ་ནས་ལར་ཞེས་པའི་བར་ལྟ་བུའོ། །གཉིས་ཀ་དང་ནི་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །མ་ནིང་དེ་དག་དྲག་ཞན་གཉིས་ཀ་དང་ཕྲད་ན་དྲག་ཞན་གཉིས་ཀ་ཅན་དུ་འགྱུར་ཏེ། དཔེར་ན་དགའ་འབལ་གསར་ཞེས་པ་ལ་སོགས་པ་ལྟ་བུའོ། །གཉིས་ཀ་ཅན་འབྲུ་མང་པོ་པའི་བསྡུ་བའོ། །གཉིས་ཀ་དག་དང་མ་ཕྲད་ན། །གང་དུ་ཡང་ནི་མི་འགྱུར་རོ། །མ་ནིང་དེ་དྲག་ཞན་གཉིས་ཀ་དང་མ་ཕྲད་ན་སྒྲ་དྲག་ཞན་གང་དུ་ཡང་མི་འགྱུར་རོ། །ཞེས་བྱ་བའི་དོན་ཏོ། །ཡང་ན་དྲག་དང་ཞེས་པ་རྐང་པ་གཉིས་ཀྱི་མ་ནིང་འགྱུར་བ་བསྟན་ཅིང༌།གཉིས་ཀ་ཞེས་པ་རྐང་པ་གཉིས་ཀྱིས་མཚན་གཉིས་དང༌།གཉིས་ཀ་དག་དང་ཞེས་པ་རྐང་པ་གཉིས་ཀྱིས་མཚན་མེད་བསྟན་པར་བལྟའོ། །དེས་ན་འགྱུར་དང་མཚན་གཉིས་དང༌། །མཚན་མེད་མ་ནིང་གསུམ་དུ་འདོད། །སྔར་བཤད་པའི་ཚུལ་དེས་ན་མ་ནིང་འགྱུར་བ་དྲག་པ་དང༌། །མཚན་གཉིས་ནི་ཞན་པ་དང༌། མཚན་མེད་ནི་གཉིས་ཀ་མ་ཡིན་པ་དང་གསུམ་དུ་འདོད་ཅེས་པའོ། །དེ་ནི་སྒྲ་ཡི་འཇུག་ཚུལ་ལོ། འདི་ནི་སྤྱིའི་དོན་བསྡུད་པའོ། །དོན་གྱི་འཇུག་པ་བསྟན་པ། །དོན་ནི་རྣམ་པ་གཉིས་ཡིན་ཏེ། །སྔ་མ་གང་ལྟར་གྱུར་པ་དང༌། །ཕྱི་མ་གང་ལྟར་འགྱུར་བའོ། །དོན་གྱིས་འཇུག་པ་ནི་རྣམ་པ་གཉིས་ཏེ། །སྔ་མ་དང་ཕྱི་མ་དག་གོ །དེ་ཉིད་བཤད་པ། སྔ་མ་སྔོན་འཇུག་སྔོན་བཞིན་སྦྱར། གྱུར་པའི་སྒྲས་འདས་པའི་དོན་སྟོན་པས་དུས་དང་དངོས་པོ་གཉིས་ཀ་སྔ་མ་གང་ལྟར་གྱུར་པ་ནི་སྔོན་འཇུག་སྔར་སྦྱར་བ་དེ་ལྟར་ཕོ་རྣམས་དྲག་པ་དང༌།མོ་རྣམས་ཞན་པ་དང༌།མ་ནིང་རྣམས་བར་མའི་ཚུལ་གྱིས་འཇུག་པ་སྟེ།དཔེར་ན་བཀག་ཅེས་པ་ལ་སོགས་པ་བཞིན་ནོ། །ཕྱི་མ་དག་གི་འདྲེན་ཚུལ་ནི། །ཕོ་ཡིས་ཕོ་ཡིས་མིང་མཐའ་དྲངས། །འགྱུར་བའི་སྒྲས་མ་འོངས་པའི་དོན་སྟོན་པས་ཡུལ་དང་དངོས་པོ་གཉིས་ཀ་ཕྱི་མ་གང་ལྟར་འགྱུར་བ་ནི།འདི་ལྟར་རྗེས་འཇུག་གི་ཕོ་ད་བ་ས་རྣམས་རྗེས་སུ་ཞུགས་པའི་མཐུས་ཕོའི་མིང་མཐའ་མིང་གཞིའི་ཀ་འདྲེན་ནོ། །དེ་རྣམ་དབྱེ་དྲུག་པར་འགྱུར་བ་ནི། །དཔེར་ན་ད་བ་ས་ཀྱི་ཞེས་པའོ། །དེ་ལ་རྗེས་འཇུག་བཅུ་པ་སྦྱར་ན་རྣམ་དབྱེ་གསུམ་པར་ཡང་འགྱུར་བས་དེ་དག་འདྲེན་ནོ། །དེ་བཞིན་དུ་ལ་དང་མཐུན་པ་དང༌། ཅིག་དང་ཅེས་དང་ཅེ་ན་དང་ཤེ་ན་དང་ཀྱང་ལ་སོགས་པ་ཡང་འདྲེན་ནོ། །མོ་ཡི་མོ་ཡི་མིང་མཐའ་དྲང༌། །རྗེེས་འཇུག་གི་འ་ར་གཉིས་རྗེས་སུ་ཞུགས་པའི་མཐུས་མོའི་མིང་མཐའ་མིང་གཞིའིམ་འདྲེན་པ་ནི།དཔེར་ན་དགའ་མ་ཁྱེད་ཀྱི་མིག་གཉིས་ནི། །ཟར་མའི་མེ་ཏོག་རྒྱས་པ་བཞིན། །ཞེས་པ་ལྟ་བུའོ། །དེ་བཞིན་དུ་འདི་་དང་གྱི་དང་ཞིག་དང་ཞེ་དང་ཞེ་ན་དང་ཡང་ལ་སོགས་པ་མང་པོ་འདྲེན་ནོ། །མ་ནིང་གིས་ནི་མ་ནིང་ངོ༌། །རྗེས་འཇུག་གི་མ་ནིང་ག་ང་ན་མ་ལ་རྣམས་རྗེས་སུ་ཞུགས་པའི་མཐུས་སྔོན་འཇུག་དང་རྗེས་འཇུག་གི་མ་ནིང་ག་འདྲེན་པ་ནི་དཔེར་ན་བདག་གི་དྲུང་གིས་ལྷས་བྱིན་སྒོམ་གྱི་དཔལ་གྱི་ཞེས་པ་རྣམ་དབྱེ་དྲུག་པ་རྣམས་དང༌།དེ་དག་ལས་སྦྱར་ན་བྱེད་པ་པོར་ཡང་འགྱུར་བས་དེ་དག་འདྲེན་ནོ། །སྨྲ་བའི་སྒོར་བ་མ་ནིང་དུ་བཤད་པའི་དབང་དུ་བྱས་ནས་བ་འདྲེན་པར་ཆད་ན་དེར་ཡུལ་དུས་ངེས་པར་མ་བཟུང་བ་དག་འདིར་ངེས་པར་འཆད་པ་འགལ་བ་ཡིན་ནོ། །ཚིག་གིས་འདྲེན་ཚུལ་བཤད་པ།མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའོ། །སྒྲ་ཡང་རང་ཞེས་སྦྱར་རོ། །གང་གིས་ཞེ་ན། ཕོས་ཕོ་དང༌། མོས་མོ་དང༌། མ་ནིང་གིས་མ་ནིང་འདྲེན་མིང་མཐའ་དེ་དག་ཉིད་ཀྱིས་སོ། །ཇི་ལྟར་ཞེ་ན་དེ་དག་ཉིད་ཀྱིས་རང་གི་མིང་མཐའི་སྒྲ་དང་མཐུན་པའི་ཚུལ་གྱིས་སོ། །དངོས་པོ་གང་ཞེ་ན།རྣམ་དབྱེ་བརྒྱད་འདྲེན་པའི་ཚུལ་བཤད་པ།ཆོས་དངོས་ལས་དང་བྱེད་དང༌། །སྦྱིན་དང་འབྱུང་ཁུངས་འབྲེལ་པ་དང༌། །གནས་དང་བོད་པའི་སྒྲ་ཡང་དྲང༌། །ཆོས་ཀྱི་དངོས་པོ་གང་ཡང་རུང་བ་དང༌།གཉིས་པ་ལས་སུ་བྱ་བ་དང༌། །གསུམ་པ་བྱེད་པ་པོ་དང་བཞི་པ་གང་ཕྱིར་སྦྱིན་པ་དང༌། ལྔ་པ་འབྱུང་ཁུངས་དང༌། དྲུག་པ་འབྲེལ་པ་དང༌།བདུན་པ་གནས་གཞི་དང༌།བརྒྱད་པ་བོད་པ་རྣམས་དྲང་ཞེས་པའོ། །དཔེར་ན་ནགས་ན་ཤིང་ཡོད། ཤིང་ལ་གཅོད། ཤིང་གིས་བསྒྱེལ། ཤིང་ལ་ཆུ་འདྲེན།ཤིང་ལས་མེ་ཏོག །ཤིང་གི་འབྲས་བུ་ཤིང་ལ་གནས། ཀྱེ་ཤིང་ཞེས་པ་ལྟ་བུའོ། །ཡང་གི་སྒྲ་ནི། སླར་བསྡུད་པ་ལ་སོགས་པ་འདྲེན་པ་བསྡུད་པའོ། །ཚིག་ཕྲད་གཞན་གྱི་འདྲེན་ཚུལ་བཤད་པ། གཞན་ཡང་སླར་བསྡུ་ལྷག་བཅས་དང༌། འབྱེད་དང་སྡུད་བརྣན་བདག་པོ་དང༌། དགག་སྒྲུབ་རྒྱན་དང་དུས་ལ་འཇུག །གཞན་ཡང་འཇུག་ཅེས་སྦྱར་རོ། །གང་ལ་ན་སླར་བསྡུ་ལ་སོགས་པ་ལའོ། །གང་གིས་ན་འདྲེན་བྱེད་རྣམས་ཀྱིས་སོ། །ཇི་ལྟར་ན་འཆད་པར་འགྱུར་རོ། །དེ་ལ་སླར་བསྡུ་བ་ནི་རྗེ་འཇུག་བཅུ་ལ་ཨོ་སྦྱར་བ་གོ་ཞེས་པ་ལ་སོགས་པ་བཅུ་དང༌། ད་དྲག་གིས་དྲངས་པའི་ལྟོ་དང་བཅུ་གཅིག་གོ །ལྷག་བཅས་ནི་སྟེ་ཏེ་དེ་རྣམས་སོ། །འབྱེད་བསྡུད་ནི་རྗེས་འཇུག་བཅུ་ལ་མ་སྦྱར་བ། འབྱེད་སྡུད་ད་དྲག་ཅན་ལ་ཏེ། ཞེས་པའོ། །བརྣན་པ་ནི་ཡང་ཞེས་བྱ་བའང་མིན་ཞེས་པ་དང༌། ནི་ནི་དགར་དང་ལྡན་པའི་ཚིག །ཅེས་པའོ། །བདག་པོ་ནི་པའམ། ཅན་ནི་བདག་པོའམ་ལྡན་པའི་དོན་དུ་སྦྱར་བར་བྱ། ཞེས་པའོ། །དགག་པ་ནི། མིང་གང་གི་ནི་མ་མཐའ་ན། །སྟྲི་ལིང་གཱ་ཡི་སྒྲ་མེད་པ། །དེ་ལ་སྟྲི་ལིང་ག་སྦྱར་ན། །དགག་པའི་གནས་སུ་ཤེས་པར་བྱ། །ཞེས་པའོ། །སྒྲུབ་པ་ནི། ཀྱང་དང་ཡང་ནི་བསྡུད་པའི་ཚིག །མི་མཐུན་མཐུན་པར་སྟོན་པའང་ཡིན། །ཞེས་པའོ། །རྒྱན་ནི་ཡང་དག་ཡོངས་སུ་ཀུན་ཏུ་སོགས། །སྒྲ་བཞིན་དང་ནི་གྲད་དུའོ། །ཞེས་པའོ། །དུས་ནི་ཉི་མ་ཤར་བ་དང༌། །ཞེས་དང༌། དུས་གཅིག་ན། ཞེས་པ་དང༌། དེ་ཡི་སྐབ་ལ། ཞེས་པ་ལྟ་བུའོ། །ལ་འཇུག་ཅེས་པ་ནི་བཤད་ཟིན་ཏོ། །ཡང་ན་ཀུན་ལ་དགོས་པའི་མཐར་གནས་བསྡུ་བ་ཞེས་པའི་དོན་ཏོ། །ཚུལ་ཇི་ལྟར་ཞེས་ན། དེ་དག་ལྔ་ཤུགས་འདྲེན་པ་འབྱུང༌། །སྔར་བཤད་པ་དེ་དག་ཚིག་སྔ་མའི་རྗེས་འཇུག་རང་རང་གི་ནུས་པས་འབྱུང་བ་ནི་དགའ་མཐུན་པ་སྟེ། དཔེར་ན་འདུག་གོ །ཞེས་པ་ནས་གྱུར་རོ། །ཞེས་པའི་བར་དང༌། ད་དྲག་པ་ན་ར་ལ་ཏེ། ད་དེ་རྐྱང་པ་འདོགས་ཅན་དང༌། ག་ང་བ་མ་འ་རྣམས་ཏེ། ཞེས་པ་དང་འདུག་གམ་ཞེས་པ་ནས། གྱུར་ཏམ་ཞེས་པ་དང༌། ག་ད་བ་སའི་རྗེས་སུ་ཀྱང༌། ན་མ་ར་ལ་ང་དང་འ་འདོགས་ཅན་རྐྱང་པ་རྣམས་ལ་ཡང༌། རྐྱང་པ་མཐའ་བརྟེན་མེད་ལའང༌། རྐང་ལྡན་ཡི་གེ་ཉུང་བ་ཡང༌། ཞེས་པ་ལ་སོགས་པ་བཞིན་ནོ། །འདི་དག་རྒྱས་པར་བདག་གིས་ཁོ་བོས་སྨྲས་པའི་སྨྲ་བའི་སྒོ་དང་སུམ་ཅུ་པ་དང་ཕྲད་ཀྱི་གནད་རྣམས་སུ་བཤད་པ་བཞིན་ཤེས་པར་བྱའོ། །དེ་དག་ནང་གསེས་གང་འཇུག་པ། མཐར་སྦྱར་འོག་མའི་མིང་དོན་ལས། རྣམ་དབྱེ་དང་ཚིག་གི་ཕྲད་དེ་དག་ནང་གི་དབྱེ་བས་གང་དང་གང་ལ་འཇུག་པ་དེ་དང་དེ་ནི། ཐ་མར་སྦྱར་བའི་ཚིག་གམ་མིང་དོན་ལས་ཤེས་པར་བྱ་སྟེ། དཔེར་ན་དེ་དག་སྔ་ཤུགས་ཞེས་པའི་ སྐབས་སུ་བཤད་པ་བཞིན་ནོ། །དེ་དག་ཉིད་ཡང་བཤད་པ། སྤྱིར་འཇུག་ཡོད་དམ་བྱེད་པ་ཡོད། །དེ་བཞིན་ཆེད་བྱེད་རྟེན་བྱེད་དང༌། །ལས་བྱ་བླང་བྱ་སྒྲུབ་པར་བྱ། །སྔོན་དུ་འོས་པ་གནས་པའམ། །འདི་ལྟར་ཆོས་ཀྱི་དངོས་པོ་སྤྱི་ལ་འཇུག་པ་ཡོད་ན་རྣམ་དབྱེ་དང༌། དེ་བཞིན་དུ་བྱེད་པ་ཡོད་ན་གསུམ་པ་དང༌། ཆེད་དུ་བྱ་བ་ཡོད་ན་བཞི་པ་དང༌། རྟེན་བྱེད་ཡོད་ན་བདུན་པ་དང༌། ལས་བྱེད་ཡོད་ན་གཉིས་པ་དང། བླང་བྱ་ཡོད་ན་ལྔ་པ་དང༌། སྒྲུབ་བྱ་ཡོད་ན་དྲུག་པ་དང༌། སྔོན་དུ་འོས་པ་གནས་པ་ཡོད་ན་བརྒྱད་པ་སྦྱར་བར་བྱ་སྟེ། དཔེར་ན་སྔར་རྣམ་དབྱེ་བརྒྱད་ཀྱི་སྐབས་སུ་དཔེར་བརྗོད་པ་བཞིན་ནོ། །འམ་གྱི་སྒྲ་ནི་རྣམ་དབྱེ་ལས་གཞན་ཡང་ཚིག་ཕྲད་ལ་ནང་གི་དབྱེ་བ་བསྡུད་པའོ། །དེ་ཉིད་བཤད་པ། གཞན་ཡང་ཚིག་དོན་འོག་མ་ལས། བསྡུ་རྒྱུ་ཡོད་དང་མེད་པ་དང༌། །གོང་མ་ལས་ཀྱང་དེ་བཞིན་ཏེ། །ཚིག་དོན་འོག་མ་ལས་གོང་མས་བསྡུ་བར་བྱ་བའི་ཆོས་འབྱུང་བ་ཡོད་ན་གཟུགས་ནས་ཞེས་པ་དང༌། མིག་ལ་སོགས་པ་ཞེས་པ་ལ་སོགས་པ་སྡུད་ཚིག་དང༌། གལ་ཏེ་མེད་ན། ཞེས་པ་དང༌། མིག་གོ་ཞེས་པ་ལ་སོགས་པ་སླར་བསྡུ་བའམ། གཟུགས་དང་ཚོར་བ་དང་ཞེས་པ་ལ་སོགས་པ་དང༌། མིག་དང་རྣ་བ་དང་ཞེས་པ་ལ་སོགས་པའི་འབྱེད་པའི་ཚིག་སྦྱར་རོ། །ཚིག་དོན་གོང་མ་ལས་ཀྱང་འོག་མ་ཇི་ལྟ་བ་བཞིན་དུ་སྦྱར་ཏེ། དཔེར་ན་ཅིའི་ཕྱིར་དང༌། ཇི་སྙེད་སུ་དག་ལ་སོགས་པ་བཞིན་ནོ། །རྣམས་གྲངས་དག་ནི་བཀོད་པ་ལས། །བསྐྱར་བ་ཡོད་དང་མེད་པ་དང༌། །མིང་གི་རྣམས་གྲངས་དག་བཀོད་པ་ལས་བསྐྱར་བའི་སྒྲ་ཡོད་ན་ཟློས་པ་སྟེ། དཔེར་ན་ཟླ་བ་ཟླ་བ་ནི་གང༌། ཅི་ཟླ་བ་ཟླ་ནི་ཟླ་བའོ་ཞེས་པ་དང༌། གལ་ཏེ་སྐྱར་བ་མེད་ན་ནི། །ཟླ་བ་ནི་རི་བོང་འཛིན་པ་དང༌། །རྒྱུ་སྐར་དབང་པོ་དང༌། མཚན་མོའི་བདག་པོ་ཞེས་དགར་བ་དང་འབྱེད་པའི་སྒྲ་སྦྱར་རོ། །ཕོ་སྒྲ་དང་ནི་མོ་སྒྲ་དག །མིང་གི་མཐའ་ལ་ཡོད་མེད་དང༌། །རྟ་དང་གསེར་ལ་སོགས་པ་མིང་གང་གི་མཐའ་ན་ཕོའི་སྒྲ་པ་དང་ཅན་ལ་སོགས་པ་ཡོད་ན་བདག་པོ་འདྲེན་པར་བྱེད་དེ། དཔེར་ན་རྟ་པ་དང་གསེར་པ་ལ་སོགས་པ་བཞིན་ནོ། །གལ་ཏེ་ཕོའི་སྒྲ་མེད་ན་ནི་མ་ཡིན་ནོ། །འདོད་ཆགས་དང་ཞེ་སྡང་མེད་པ་ལ་སོགས་པ་མིང་གང་གི་མཐའ་ན། མེད་དང་མ་ལ་སོགས་པ་མོའི་སྒྲ་ཡོད་ན་དགག་པ་འདྲེན་པར་བྱེད་དེ། དཔེར་ན་འདོད་ཆགས་མེད་པ་དང༌། ཞེ་སྡང་མེད་པ་ལ་སོགས་པ་བཞིན་ནོ། །རྒྱ་གར་ལ་དགག་སྒྲ་གོང་དུ་སྦྱོར་བ་ལས་གཞན་མེད་དོ། །ཞེས་ཁོ་བོའི་བླ་མ་ལོ་ཙྪ་བ་གསུང་ངོ༌། །གལ་ཏེ་མོའི་སྒྲ་མེད་ན་འདིར་མ་ཡིན་ནོ། །རྒྱན་དུ་འགྱུར་བ་རྣམས་ལ་ཡང༌། །དོན་ལ་སྙེག་པ་ཡོད་མེད་དང༌། ཚིག་གི་རྒྱན་དུ་གྱུར་པ་ཀྱང་དང༌། ཡང་དང༌། ཡང་དག་དང༌། ཡོངས་སུ་ལ་སོགས་པ་རྣམས་ལ་ཡང༌། དོན་ལ་དོན་སྙེག་པ་ཡོད་ན་རྒྱན་དང་བསྡུད་པ་གང་ལས་འགྱུར་ཏེ། དཔེར་ན་བསུང་ལྡན་རྣམས་ཀྱང་དངོས་སུ་རྒྱས། བུང་བ་ཡང་ནི་དགའ་བ་འཕེལ། །ཞེས་པ་ལྟ་བུ་རྒྱན་བསྡུད་གཉིས་ཀ་མཐུན་པ་དང༌། ཆུ་གཏེར་རྒྱས་ཀྱང་པདྨ་ཟུམ། །ཉི་མ་གསལ་ཀྱང་ཀུ་མུད་མིན། །ཞེས་པ་ལྟ་བུ་གཉིས་ཀ་མི་མཐུན་པའོ། །གལ་ཏེ་དོན་ལ་སྙེད་པ་མེད་ན་རྒྱན་ཙམ་དུ་འགྱུར་རོ། །བསྟན་བྱ་ལྷག་མ་ཡོད་མེད་དང༌། ཚིག་དོན་རྫོགས་དང་མ་རྫོགས་ཀྱིས། །བསྟན་བྱའི་དོན་ལྷག་མ་ཡོད་ན་འདི་ལྟ་སྟེ་ཞེས་པ་ལྷག་མ་ཅན་དང༌། གལ་ཏེ་མེད་ན་དེ་ཙམ་ཞེས་པ་སླར་བསྡུ་བ་སྦྱར་རོ། །དང་གི་དོན་རྫོགས་ན་བཤད་ཟིན་ཏོ་ཞེས་པ་སླར་བསྡུ་བ་དང༌། གལ་ཏེ་མ་རྫོགས་ན་བཤད་པར་བྱ་ཏེ། ཞེས་པ་ལྷག་མ་ཅན་གྱི་སྒྲ་སྦྱར་རོ། །ཀྱིས་ནི་བྱེད་པ་པོ་སྟེ་ཀུན་ལ་དགོས་པའི་མཐར་གནས་སོ། །དེ་དག་ནང་གསེས་རྣམ་པར་དབྱེ། འདིར་ནི་སྔ་མ་གང་ལྟར་གྱུར་པ་དང༌། །ཕྱི་མ་གང་ལྟར་འགྱུར་བ་དེ་དག་ན། །ནང་ གསེས་ཀྱིས་དབྱེ་བའི་ སྒོ་ནས་མདོར་བསྡུས་པ་བསྟན་ཏོ། །བསྒྲུབ་བྱ་བཤད་པ། ཅིའི་ཕྱིར་འཇུག་པར་བྱེད་ཅེ་ན། ཡི་གེའི་ཁོངས་ནས་མིང་དབྱུང་སྟེ། མིང་གི་ཁོང་ནས་ཚིག་ཕྱུང་ནས། ཚིག་གི་དོན་རྣམས་སྟོན་བྱེད་པའོ། །འདིས་ནི་བཞི་པ་བསྟན་ཏོ། །སྔར་བཤད་པའི་ཡི་གེ་དེ་དག་འབྲས་བུ་ཅིའི་ཕྱིར་འཇུག་པར་བྱེད་ཅེ་ན། ཀ་ལ་སོགས་པ་ཡི་གེའི་ཁོང་ནས་མིང་དབྱུང་བ་ནི་ཡི་གེ་འདུས་ནས་ཀ་པ་ལ་སོགས་པ་དོན་གྱི་ངོ་བོ་སྟོན་པའི་མིང་འགྲུབ་པའོ། །མིང་གི་ཁོང་ནས་ཚིག་ཕྱུང་བ་ནི་མིང་འདུས་ནས་ཙན་དན་གྱི་ཀ་བ་ལ་སོགས་པ་དོན་གྱི་ཁྱད་པར་སྟོན་པའི་ཚིག་འགྲུབ་པའོ། །ཚིག་འདུས་པས་ནི་བརྗོད་བྱའི་དོན་རྣམས་འཇུག་ལྡོག་གི་ཡུལ་དུ་སྟོན་པའི་ངག་འགྲུབ་པའོ། །ངག་འདུས་པས་ནི་འཇུག་ལྡོག་གི་ཡུལ་དུ་མ་རྟོགས་པའི་རབ་བྱེད་འགྲུབ་པའོ། །རབ་ཏུ་བྱེད་པ་འདུས་པས་ནི་ཆོས་ཀྱི་ཕུང་པོའམ་བསྟན་བཅོས་ཆེན་པོའི་བར་དུ་འགྲུབ་པས་འཆད་པ་དང་རྩོམ་པ་དང་རྩོད་པ་ལ་སོགས་པ་མཆོག་ཏུ་མཁས་པའི་བྱ་བ་རྣམས་བདེ་བླག་ཏུ་རྟོགས་པའི་ཆེད་དུ་མིན་ནོ་ཞེས་བྱ་བ་ཡིན་ནོ། །ཇི་སྐད་དུ་སྨྲ་བའི་སྒོ་ལས། སྐྱེས་བུ་སྨྲ་བར་འདོད་པ་ཡིས། །གཞི་མཐའི་ཡི་གེའི་བྱེ་བྲག་དག །ལེགས་པར་ཁོང་དུ་ཆུད་པ་ན། །དེ་འདུས་མིང་དང་དེ་བཞིན་ཚིག །ཤོ་ལོ་ཀ་དང་རབ་བྱེད་སོགས། །མིང་ཚིག་ཡི་གེ་མཚུངས་པའི་ཕྱིར། །ཚིག་སྦྱོར་འབདཔ་མེད་པར་འགྱུར། །ཞེས་གསུངས་པ་དང་རྗེས་སུ་མཐུན་པའོ། །བཟློག་པའི་སྒོ་ནས་བསྟན་པ། །མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་མེད་པར་འགྱུར། །མོའི་ཡི་གེ་འ་ལ་སོགས་པ་མེད་ན་ཕོའི་ཡི་གེ་ཀ་ལ་སོགས་པ་འདུས་པ་ཙམ་གྱིས་བརྗོད་བྱའི་སྟོན་པར་མི་འགྱུར་ལ། ཕོ་ཡིག་དེ་དག་རྣམས་ལ་ཡང༌། འཇུག་པར་བཅས་པ་མེད་པ་ནི། །མིང་དང་ཚིག་ཀྱང་གསལ་མི་ནུས། །ཕོའི་ཡི་གེ་ཀ་ལ་སོགས་པ་དེ་དག་རྣམས་ལ་ཡང་སྔོན་འཇུག་དང་རྗེས་འཇུག་དག་དང་འབྲེལ་བ་མེད་ན་མིང་དང་ཚིག་དག་ཀྱང་གསལ་བར་བྱེད་མི་ནུས་སོ། །ཞེས་པའོ། །མིང་ཚིག་གསལ་བ་མེད་ནི། །དོན་རྣམས་བརྗོད་པར་མི་འགྱུར་རོ། །མིང་དང་ཚིག་གསལ་བར་གསལ་བར་བྱེད་པའི་ཡི་གེ་རྣམས་མེད་ན་ནི་དོན་རྣམས་འཇུག་ལྡོག་གི་ཡུལ་དུ་སྟོན་པའི་ངག་འཇུག་པར་ཡང་མི་འགྱུར་ཏེ། །དང་པོའི་རྒྱུ་མེད་པའི་ཕྱིར་རོ། །དེ་ལྟར་གྱུར་ན་འཇིག་དོན་མཚོན་བརྗོད་པ་ཀུན་ཀྱང་མེད། རིག་བྱེད་སྨྲ་བའང་ཡོད་མི་འགྱུར། །ཉན་ཐོས་རང་རྒྱས་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །གཞུང་ཁ་ཅིག་ལས། ཉན་ཐོས་རང་རྒྱལ་སངས་རྒྱས་དང༌། །བསླབ་པ་རྣམས་ཀྱང་མེད་པར་འགྱུར། །ཞེས་འབྱུང་ངོ༌། །དེ་ལྟར་གྱུར་ན་འཇིག་རྟེན་ན་དོན་བརྗོད་བྱར་མཚོན་ནས་སྟོན་པ་མིང་གི་རྣམ་པ་ཅན་གྱི་སྒྲ་ཀུན་དང༌། སྙན་དངགས་དང་སྲིད་སྲུང་དང་ངེས་བརྗོད་ལ་སོགས་པ་ཕྱི་རོལ་བའི་རིག་བྱེད་སྨྲ་བ་དང༌། སངས་རྒྱས་དང་ཉན་ཐོས་རང་སངས་རྒྱས་དང་སངས་རྒྱས་ཀྱི་ས་ལ་བསླབ་པར་བྱ་བའི་གནས་ཀུན་ཀྱང་མེད་པར་འགྱུར་ན་དེ་ལྟ་ཡང་མིན་པའི་ཕྱིར། ཡི་གེ་དང་མིང་དང་ཚིག་དང་ངག་རབ་ཏུ་བྱེད་པ་ལ་སོགས་པ་ནི་ཡོད་པ་ཉིད་དོ། །འོ་ན་དེ་དག་བསྟན་པར་མི་བྱའོ། །དཔེ་བསྟན་པ། ཇི་ལྟར་འཇིག་རྟེན་སེམས་ཅན་དག །ཕུང་པོ་ཁམས་དང་སྐྱེ་མཆེད་དང༌། །གྲུབ་མཐའ་གཞན་ཡང་ཡོད་མོད་ཀྱི། །རང་ཉིད་ཀྱིས་ནི་མི་ཤེས་བཞིན། །དཔེར་ན་འཇིག་རྟེན་ན་སེམས་ཅན་གྱི་ཕུང་པོ་དང་ཁམས་དང༌། སྐྱེ་མཆེད་དང༌། གྲུབ་མཐའ་གཞན་གྱི་རྟེན་འབྲེལ་དང་ལས་དང་ཉོན་མོངས་པ་དང་རྣམ་པར་བྱང་བ་ལ་སོགས་པའམ། ཡང་ཕྱི་རོལ་པ་དང༌། ནང་པ་དང༌། ནང་པ་ལའང་གྲུབ་མཐའ་བཞིའམ་ཐེག་པ་གསུམ་ལ་སོགས་པ་ཡོད་ཀྱང༌། དེ་དག་གི་མཚན་ཉིད་མི་ཤེས་པ་རྣམས་ལ་སངས་རྒྱས་ལ་སོགས་པ་དེ་དག་བསྟན་ཏོ། །གྲུབ་མཐའ་གཞན་ཡང་ཡོད་མིན་ན། ཞེས་འབྱུང་བ་ལྟར་ན་སངས་རྒྱས་པའི་ལས་གཞིན་གྱི་དོན་དང་མཐུན་པར་ཡོད་པ་མིན་པས་ཤེས་ཞེས་སྦྱར་རོ། །དོན་ལ་སྦྱར་ན། དེ་བཞིན་ཡི་གེའི་འཇུག་ཚུལ་རྣམས། སྨྲ་བ་ཀུན་ལ་གནས་གྱུར་ཀྱང༌། །རང་ཚུལ་དེ་ཉིད་མི་ཤེས་པས། །དོན་ལ་སྦྱོར་བ་ག་ལ་ཤེས། །དེ་བཞིན་དུ་ཡི་གེ་ལ་ཡང་དབྱངས་དང༌། །གསལ་བྱེད་དང༌། དྲག་པོ་དང༌། བསྒྲེངས་པ་དང༌། བཀུག་པ་དང༌། སྨད་པ་དང༌། བསྒྲིམས་པ་དང༌། གློད་པ་དང༌། སྣ་དང་ལྡན་པ་དང༌། རྣམ་པར་གཅད་པ་དང༌། ཐུང་ངུ་དང༌། རིང་པོ་དང༌། ཤིན་ཏུ་རིང་པོ་དང༌། ཕོ་དང༌། མོ་དང༌། མ་ནིང་དང༌། ཤིན་ཏུ་མོ་དང༌། ཕོ་ལ་ཡང་སྐྱེས་བུ་རབ་འབྲིང་གསུམ་ལ་སོགས་པ་དང༌། རྐྱང་པ་དང༌། སྔོན་འཇུག་དང༌། རྗེས་འཇུག་དང༌། བརྩེགས་པ་དང༌། བརྩེགས་འཕུལ་ལ་སོགས་པ་དང༌། སྐྱེད་པར་བྱེད་པའི་རྒྱུ་དང༌། འབྱུང་བའི་གནས་དང༌། འབྱིན་པའི་རྐྱེན་དང༌། ང་རོ་དྲག་པ་དང༌། བར་མ་དང༌། གཞན་པ་ལ་སོགས་པའི་འཇུག་ཚུལ་རྣམས་དང༌། ཡི་གེ་འདུས་པ་ལས་མིང་དང༌། མིང་གི་མཚན་ཉིད་དང༌། རབ་ཏུ་དབྱེ་བ་དང༌། རྣམས་གྲངས་ལ་སོགས་པ་དང༌། མིང་འདུས་པ་ལས་ཚིག་དང༌། ཚིག་གི་མཚན་ཉིད་དང༌། རབ་ཏུ་དབྱེ་བ་དང༌། ཚིག་འཇུག་པ་ལ་སོགས་པའི་མཚན་ཉིད་རྣམ་དག་སྨྲ་བའི་གང་ལ་ཀུན་ལ་ཡོད་ཀྱང༌། རང་ཉིད་ཀྱིས་དེ་དག་གི་མཚན་ཉིད་མི་ཤེས་ན། དོན་ལ་སྦྱོར་བ་ལྟ་ག་ལ་ཤེས། དེའི་ཕྱིར་དེ་དག་ལ་བསྟན་དགོས་པས་སྐྱོན་མེད་ཅེས་བྱ་བ་ཡིན་ནོ། །བཤད་པ་མཐར་ཕྱིན་པའི་བྱ་བ་བསྟན་པ།དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས་འདི་ཀུན་རྟོགས་གྱུར་ཅིག །མི་ཤེས་པ་རྣམས་ལ་བསྟན་དགོས་པ་དེའི་ཕྱིར་སྨྲ་བའི་དབང་ཕྱུག་བྱཱ་ཀཱ་ར་ཎའི་མཁན་པོ་སྔོན་གྱི་མཁས་པ་རྣམས་ཀྱི་རྗེས་སུ་ཡང་དག་པར་སྨྲས་པའི་དགེ་བ་འདིས་ནི་སྐྱེ་བོ་ཀུན་གྱིས་བྱཱ་ཀཱ་ར་ཎའི་གནས་ཀུན་རྟོགས་པར་གྱུར་ཅིག་ཅེས་གཞན་དོན་དུ་ཡོངས་སུ་སྔོ་བ་བསྟན་ཏོ། །རྐང་པ་གཉིས་པོ་འདིའང་ཕྱིས་གཞན་གྱིས་བཅུག་པའོ། །རྟགས་ཀྱི་འཇུག་པའི་འགྲེལ་པ་དབུས་པ་བློ་གསལ་གྱིས་སློབ་མ་ལ་ཕན་པའི་དོན་དུ་ཤིན་ཏུ་གསལ་བར་སྦྱར་བ་རྫོགས་སོ། །དགེའོ།།  །།