༸རྒྱལ་དབང་ཐམས་ཅད་མཁྱེན་པའི་རྣམ་ཐར་མགུར་མའི་ཚུལ།[1]
༼མཛད་པ་པོ། ཨ་ཁྱུང་ངག་དབང་མཁྱེན་རབ་ཀྱི་གསུང་། (དུས་རབས་18པ།)༽
བོད་གངས་ཅན་ལྷ་གཅིག་སྤྱན་རས་གཟིགས། །ཁྲིམས་སྡོམ་བརྩོན་རྒྱལ་བའི་ཚུལ་འཆང་བ། །མགོན་ཀུན་གཟིགས་ལྔ་པ་ཆེན་མོ་ཞེས། །མཚན་ཉི་ཟླ་ལྟ་བུར་གྲགས་པ་དེ། །ཡུལ་གཡང་ཆགས་ཡར་ཀླུང་ནུབ་ཀྱི་ཆ། །རྫོང་ཕྱིང་བ་སྟག་རྩེའི་ཕོ་བྲང་དུ། །ཡབ་ཟ་ཧོར་བདུད་འདུལ་རབ་བརྟན་དང་། །ཡུམ་ཁྲི་ལྕམ་ཀུན་དགའ་ལྷ་མཛེས་ལས། །ལོ་མེ་སྦྲུལ་ཧོར་ཟླ་དགུ་པ་ཡི། །ཚེས་ཉེར་གསུམ་སྤེན་རྒྱལ་འཛོམས་པའི་ཉིན། །མདོག་རབ་མཛེས་སྐུ་ཡི་མེ་ཏོག་བཞད། །
ཁོང་རྗེ་བཙུན་ཏཱ་ར་ནཱ་ཐ་ཡིས། །མིང་ཀུན་དགའ་མི་འགྱུར་སྟོབས་རྒྱལ་བཏགས། །ཆེས་ན་ཚོད་ཕྲ་བ་ལོ་ལྔའི་དུས། །གནས་འབྲས་སྤུངས་དགའ་ལྡན་ཕོ་བྲང་དུ། །དཔལ་སངས་རྒྱས་སྣང་བ་མཐའ་ཡས་དངོས། །མགོན་པཎ་ཆེན་བློ་བཟང་ཆོས་རྒྱུན་དྲུང་། །ཁྲིམས་ཡོངས་རྫོགས་དགེ་བསྙེན་སྡོམ་པ་དང་། །ལོ་བརྒྱད་དུ་སླེབས་ཚེ་དགེ་ཚུལ་བཞེས། །མཚན་ངག་དབང་བློ་བཟང་རྒྱ་མཚོར་གསོལ། །དུས་རིང་མིན་དགུང་ལོ་བཅུ་གཅིག་ནས། །ཁྲི་དཀོན་མཆོག་ཆོས་འཕེལ་ཞབས་བསྟེན་ཏེ། །ཆེས་ཕྲ་ཞིབ་བསྡུས་གྲྭ་རྣམ་འགྲེལ་དང་། །གཞུང་དབུ་མ་ཕར་ཕྱིན་འདུལ་མངོན་ཏེ། །དཔལ་རྒྱན་དྲུག་མཚོག་གཉིས་ལེགས་བཤད་ལ། །བརྩོན་ཤུགས་དྲག་ཆུ་བོའི་རྒྱུན་ལྟར་སྦྱངས། །ལོ་ཉེར་གཉིས་བཞེས་སྐབས་མཁན་པོའི་དྲུང་། །ཁྲིམས་ཚངས་སྤྱོད་ཀྱི་གཙོ་བོ་བསྙེན་པར་རྫོགས། །འཁོན་དཔལ་འབྱོར་ལྷུན་གྲུབ་ཞབས་དྲུང་དུ། །དབང་ཕྱག་ལེན་མན་ངག་མང་གསན་ནས། །རྗེ་བླ་མའི་བསྟན་དགྲ་སྡེ་བཅས་དཔུང་། །ལས་མངོན་སྤྱོད་དྲག་པོས་ཕྱེ་མར་འཐག །གུར་དཀར་པོའི་བདག་པོ་གུ་ཤྲི་དཔོན། །ལྷ་གསང་བདག་གི་རྣམ་འཕྲུལ་ཡིན་གསུངས་ནས། །མཚན་བསྟན་འཛིན་ཆོས་ཀྱི་རྒྱལ་པོ་ཞེས། །ལུང་ལས་ཀས་གཟེངས་བསྟོད་གྲོགས་སུ་སྦྲན། །སྟོད་མངའ་རིས་ཁྱུང་རྫོང་དཀར་མོ་ནས། །རྒྱ་མཆོད་རྟེན་དཀར་པོ་ཡན་ཆད་བླངས། །རི་ཡ་མཚན་ཅན་གྱི་པོ་ཏ་ལར། །ལྷ་འཕགས་མཆོག་ལོ་ཀེ་ཤྭ་ར་སོགས། །རྟེན་བརྟེན་པའི་ངོ་མཚར་སྣང་བརྙན་གྱིས། །གནས་བོད་ཡུལ་འོག་མིན་ལྟ་བུར་བྱས། །རྗེ་བླ་མ་དཀོན་ཅོག་ཆོས་འཕེལ་དྲུང་། །དཔལ་བྱང་ཆུབ་ལམ་རིམ་ཆེན་མོ་དང་། །འགྲེལ་བཞི་སྦྲགས་རིམ་ལྔ་གསལ་སྒྲོན་སོགས། །གནད་འཁྲུལ་མེད་རྒྱལ་དབང་ཙོང་ཁ་པའི། །ལུང་ཇི་བཞིན་ཞིབ་མོར་གཏན་ལ་ཕབ། །རྗེ་མགོན་པོ་བསོད་ནམས་མཆོག་ལྡན དྲུང་། །ཆེས་ཡང་ཟབ་གསུང་ངག་སློབ་བཤད་སོགས། །དཔལ་ས་སྐྱའི་བླ་ཆེན་གདམས་པའི་བཅུད། །མགོན་ཚར་པའི་ལུགས་བཞིན་ཞིབ་ཏུ་གསན། །དོན་གནས་ལྔའི་པཎ་ཆེན་སྨོན་འགྲོ་བ། །མཚན་འཇམ་དབྱངས་དབང་རྒྱལ་རྡོ་རྗེ་ལས། །སྒྲ་ཀ་ཙན་སྙན་ངག་མེ་ལོང་མ། །རྩིས་དཀར་ནག་དབྱངས་འཆར་སྡེབ་སྦྱོར་སོགས། །ཡོངས་ཤེས་བྱ་རྒྱ་མཚོའི་ཕ་རོལ་སོན། །དགུང་སོ་དྲུག་བཞེས་པའི་ཆུ་འབྲུག་ལོ། །ཤར་རྒྱ་ནག་རྒྱལ་པོའི་ཕོ་བྲང་དུ། །ལྷ་འཇམ་དབྱངས་གཞོན་ནུའི་སྤྲུལ་པའི་གར། །གོང་གནམ་སའི་དབང་ཕྱུག་ཤུན་ཙི་ཡིས། །སྤྱན་དྲངས་ནས་ཉི་མ་ནུབ་ཕྱོགས་ཀྱི། །མགོན་སངས་རྒྱས་བསྟན་པའི་བདག་པོ་རུ། །མཚན་ཏཱ་ལའི་བླ་མ་ཏི་ཤྲཱི་ཞེས། །ལུང་གསེར་ཐམ་མངའ་ཐང་དཔལ་འབྱོར་ཕུལ། །ཡུལ་མདོ་སྟོད་མདོ་སྨད་ཕྱོགས་ཀུན་ཏུ། །བསྟན་གཞི་རྩ་སྡོམ་རྒྱུན་གསར་རྙིང་གིས། །དགེ་ཚུལ་སློང་ཁྲི་ཚོ་དྲུག་ལྷག་བསྒྲུབས། །གཞུང་མདོ་སྔགས་པོ་ཏི་སོ་གསུམ་བརྩམས། །དགོན་ཆོས་སྡེ་ལྔ་བཅུ་ལྷག་ཙམ་བཏབ། །སྤྱིར་ས་དགེ་རྙིང་གསུམ་བསྟན་པ་དང་། །སྒོས་གསེར་ཞུན་ཅོད་པན་འཆང་བའི་ལུགས། །ནུབ་ཛ་ལན་དྷ་ར་ནས་བཟུང་སྟེ། །ཤར་རྒྱ་མཚོའི་མཐའ་ལ་ཐུག་གི་བར། །ཐབས་ཞི་དྲག་དུ་མས་ཁྱབ་པར་མཛད། །ས་ཁམས་གསུམ་གནས་པའི་དྲེགས་ལྡན་རྣམས། །དཔེ་ཉི་ཟེར་གྱི་རྡུལ་འཁྲིགས་བཞིན་དུ་འདུ། །གནམ་ཀ་བ་མེད་པའི་འོག་རོལ་ན། །སེང་སྲབ་མེད་འཕྱོ་བའི་རྣམ་ཐར་དེ། །མགོན་ཁྱོད་ཉིད་གཅིག་པུས་བདག་གིར་མཛད། །ལོ་རེ་དྲུག་བཞེས་པའི་ཆུ་ཁྱི་ཡི། །དབོ་ཟླ་བའི་དམར་ཕྱོགས་ཉེར་ལྔའི་ཉིན། །བསྟན་ཆོས་སྲིད་གདུགས་དཀར་ཡུ་བ་དེ། །ཐུགས་ཉེ་བའི་སྲས་ཆེན་མི་དབང་མཆོག །མཚན་ཡོངས་གྲགས་སངས་རྒྱས་རྒྱ་མཚོ་ལ། །གཏད་ཟིན་ནས་མཁའ་སྤྱོད་ཞིང་དུ་ཕེབས། །མགོན་ཀུན་གཟིགས་ལྔ་པར་གསོལ་བ་འདེབས། །བདག་འགྲོ་ཀུན་དེང་ནས་ཚེ་རབས་ཀུན། །རྗེ་ཁྱོད་ཀྱིས་དགེ་བའི་བཤེས་མཛད་ནས། །གསུང་བདུད་རྩིའི་དཔལ་ལ་རྟག་རོལ་ཅིང་། །དཔལ་རྡོ་རྗེ་འཆང་དབང་མྱུར་ཐོབ་ཤོག།
ཅེས་ཐམས་ཅད་མཁྱེན་གཟིགས་༸རྒྱལ་དབང་ལྔ་པ་ཆེན་མོའི་རྣམ་ཐར་མདོར་བསྡུས་མགུར་མའི་ཚུལ་དུ་བསྒྲིགས་པ་འདི་ལྟ་བུ་ཞིག་དགོས་ཞེས་དགེ་ཚུལ་ངག་དབང་བསམ་འགྲུབ་ཀྱིས་བསྐུལ་བའི་ངོར་མཁྱེན་རབ་མིང་ཅན་གྱིས་འཕྲལ་དུ་བྲིས།། །།
[1] རྩོམ་ཡིག་གསེར་གྱི་སྦྲམ་བུ། སྨད་ཆ། མཚོ་སྔོན་མི་རིགས་དཔེ་སྐྲུན་ཁང་། ༡༩༨༩ ལོ། ཤོག་གྲངས་ ༡༦༡༦
