ལྕང་ཅན་གྱི་ལོ་རྒྱུས།

ལྕང་ཅན་གྱི་ལོ་རྒྱུས་དུང་དཀར་ཚིག་མཛོད་ལས་ཅུང་ཟད་དྲངས།

ལྕང་ལོ་ཅན་བསོད་ནམས་རྒྱལ་པོ་ནི་བོད་རབ་བྱུང་བཅོ་ལྔ་པའི་མེ་མོ་བྱ(༡༨༩༧)ལོར་བོད་ཀྱི་མི་དྲག་ཁོངས་སུ་གཏོགས་པའི་སྐུ་དྲག་གི་ཁྱིམ་ཚང་ལྕང་ལོ་ཅན་དུ་འཁྲུངས། ཡབ་ལྕང་ཅན་གུང་རྣམ་རྒྱལ་ཚེ་བརྟན་དང་། ཡུམ་རྡོ་རྗེ་དབྱངས་སྐྱིད། གཅེན་པོ་རྣམ་རྒྱལ་ཚེ་དབང་། གཅེན་མོ་བདེ་སྐྱོང་བཅས་ཞུ་བ་རེད། གང་དེ་ལ་ཡབ་ཡུམ་གཉིས་ཀྱིས་ཧ་ཅང་བརྩི་མཐོང་ཆེན་པོས་རིག་གནས་སློབ་སྦྱོང་དང་། རྒྱུན་སྲོལ་ལྟ་སྤྱོད། མི་རབས་གོང་མའི་ཡ་རབས་རྣམ་ཐར་གྱི་རྗེས་སུ་གཞོལ་བ་སོགས་ཀྱི་སློབ་གསོ་གནང་རྒྱུར་དོ་གལ་ཆེན་པོ་མཛད་དེ་དགུང་ལོ་དྲུག་ནས་ཡི་གེ་འབྲི་ཀློག་གནང་འགོ་ཚུགས་ཏེ་ལྷ་སའི་དགའ་ལྡན་ཤར་སློབ་གྲྭར་བསྐྱལ་གནང་བ་དང་། སློབ་གྲྭར་བཞུགས་རིང་ཡིག་རྩིས་ཀྱི་སྦྱང་འབྲས་རྟག་ཏུ་ཨང་གནས་དང་པོའི་གྲས་སུ་སོན་ཞིང་། བྱིས་པའི་དུས་ནས་རྩོམ་འབྲི་གནང་རྒྱུར་མཉེས་པའི་རིག་སྟོབས་ལྡན་པས། དགུང་ལོ་དགུ་ལ་སོན་དུས་རང་གི་ཡུམ་ལ་གནང་བའི་ཕྱག་བྲིས་ཤིག་གི་ནང་དུ།

རྡོ་རྗེ་རྒྱལ་པོས་ང་བརྡུང་བྱུང་། །བརྡུངས་པའི་ལན་ནི་ངས་མ་འཕྲོད། །

ང་ལ་ཨ་མ་མེད་པའི་ལན། །བུ་ཆུང་ང་ཡི་སྐྱོ་བ་ལ། །

ཞེས་བྲིས་གནང་ཡོད། དགུང་ལོ་བཅུ་དྲུག་ཙམ་ལ་སོན་སྐབས་ཡབ་ཀྱིས་ཁོང་གཞུང་ལས་ཀྱི་སྤྱན་ལྟོས་གོམས་འདྲིས་ཡོང་ཁྱད་ལ་དགོངས་ཏེ། རྟག་ཏུ་ཞོལ་སྤང་ལྡིང་དང་དངུལ་དཔར་གྱི་དོན་དུ་འབྲི་གུང་ནང་ཕེབས་དགོས་སོགས་ཀྱི་ཕྱག་རོགས་སུ་འཁྲིད་གནང་ཐོག་གཞུང་ཡིག་འབྲི་སྦྱོང་མཛད། དགུང་ལོ་ཉི་ཤུ་རྩ་གཅིག་ཙམ་ལ་གུང་རྒྱུད་འཛིན་ཞབས་ཞུ་གནང་རྒྱུར་བོད་ས་གནས་སྲིད་གཞུང་གི་ཆོག་མཆན་ཐོབ་སྟེ་གུང་གི་གོ་ཐོབ་རྒྱུད་འཛིན་གནང་བ་དང་ཆབས་ཅིག་ཇ་ཚྭ་དོ་དམ་གྱི་ལས་འགན་བཞེས་ནས་སྐབས་དེའི་རིང་འགན་བབས་གཞུང་ལས་བྱེད་སྒོ་རྣམས་སྒྲུབ་གནང་ཐོག་ཁྱིམ་དུ་དགེ་བཤེས་ཤེས་རབ་རྒྱ་མཚོ་སློབ་དཔོན་དུ་བསྟེན་ནས་སྙན་སུམ་སོགས་ལ་ཟབ་སྦྱོང་གནང་བ་མ་ཟད། ད་དུང་སྐབས་ཤིག་རིང་ལྷ་སའི་ཉེ་འདབས་དགོན་པ་གསར་དུ་རྒྱུན་བཞུགས་ཀྱིས་འཇམ་དབྱངས་དཀར་པོའི་བསྙེན་སྒྲུབ་སོགས་ཆོས་ཕྱོགས་ཀྱི་གནང་སྒོ་ཡང་ཕྱག་ལེན་གནང་། མདོར་ན་ལོ་ཤས་རིང་ལུང་རིག་གི་མཁྱེན་རྩལ་རྒྱས་པའི་སློབ་དཔོན་གྱིས་སློབ་སྟོན་མཛད་པ་དང་སློབ་མའི་འབད་པ་གཉིས་འཛོམས་པའི་མཐུ་ལས་གང་དེའི་སྙན་རྩོམ་གྱི་ཚིག་རྣོ་དོན་ཟབ་དང་དཔེ་དོན་འབྲེལ་ཆགས་ཀྱི་སྦྱངས་འབྲས་གཟེངས་སུ་ཐོན་པས། སློབ་དཔོན་ཡང་ཐུགས་ཤིན་ཏུ་དགྱེས་ནས་མ་ལས་ཆེ་བའི་བུ་གཅིག་ཡོད་ཅེས་བསྔགས་བརྗོད་ཡང་ཡང་གནང་འདུག དགུང་ལོ་ཉི་ཤུ་རྩ་ལྔར་ཕེབས་སྐབས་བོད་ས་གནས་སྲིད་གཞུང་གིས་རྒྱལ་རྩེ་དབྱིན་ཇིའི་དམག་སྒར་དུ་དམག་སྦྱོང་བྱེད་མཁན་ཁོངས་སུ་བཏང་བ་ལྟར་ལོ་གསུམ་གྱི་རིང་དམག་སྦྱོང་མཇུག་འགྲིལ་ནས་ལྷ་སར་ཕྱིར་ལོག་གནང་མ་ཐག་བཀའ་ཤག་དང་དམག་སྤྱི་ཁང་གིས་རྒྱ་གར་ཁུལ་དུ་བོད་དམག་གི་མཚོན་ཆ་མཁོ་སྒྲུབ་བྱེད་དུ་མངགས། དེའི་སྐབས་སུ་བོད་ས་གནས་སྲིད་གཞུང་ནང་གི་ཞི་དྲག་དཔོན་རིགས་དབར་གྱི་འགལ་ཟླ་ཇེ་ཆེར་སོང་སྟེ། མཐར་ཏཱ་ལའི་བླ་མ་སྐུ་ཕྲེང་བཅུ་གསུམ་པ་ནས་སྤྱི་ཁྱབ་མདའ་དཔོན་ཚ་རོང་ཟླ་བཟང་དགྲ་འདུལ་གྱིས་གཙོས་དྲག་དཔོན་ཕལ་ཆེ་བ་གནས་དབྱུང་གི་ཆད་པ་བཅད་པས་གང་དེའི་གུང་གི་མཚན་གནས་ཀྱང་ཕྱིར་འཐེན་ནས་ལོ་ཤས་ལས་ཚན་མེད་པར་སྲས་རྣམ་པ་སྤྱི་བྱིངས་ཀྱི་གྲས་སུ་བཞུགས། རབ་བྱུང་བཅུ་དྲྭག་པའི་ཆུ་བྱ(༡༩༣༣)ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པ་དགོངས་པ་རྫོགས་རྗེས་སུ་བོད་ཀྱི་རྒྱལ་ཚབ་བསྐོ་གཞག་བྱེད་མིན་གྱི་གནད་དོན་ཐད་གཞུང་ཞབས་སེར་སྐྱ་ཚོའི་ནང་དུ་རྩོད་པ་དྲག་པོ་བྱུང་ཞིང་། སྐབས་དེར་རྩིས་དཔོན་ལུང་ཤར་རྡོ་རྗེ་ཚེ་རྒྱལ་གཙོར་བྱས་པའི་སྐྱིད་ཕྱོགས་ཀུན་མཐུན་ཞེས་པའི་ཚོགས་པའི་ཁོངས་མི་གཙོ་གྲས་རེ་ཟུང་གིས་གསང་བ་ཕྱི་གྱར་བྱས་པར་བརྟེན། རྩིས་དཔོན་ལུང་ཤར་འཛིན་བཟུང་བྱས་པ་དང་། འབྲེལ་ཡོད་ཁོངས་མི་གཙོ་གྲས་རྣམས་ཁག་བགོས་ཀྱིས་དོ་དམ་བྱས་པའི་ཁོངས་སུ་ཚུད་ཐོག་དྲུང་རྩིས་ཐུན་མོང་གིས་ཞིབ་དཔྱད་བྱས་མཐར་ཀོང་པོ་རྩེ་སྒང་རྫོང་དུ་ཕྱིར་མི་ལྡོག་པའི་ས་འཛིན་རྒྱང་འབུད་དུ་བཏང་། ཀོང་པོར་བཞུགས་རིང་ཁུལ་དེའི་གཞོན་དུ་འགར་བོད་ཡིག་གི་སློབ་འཁྲིད་གནང་བ་དང་ལྷ་བཞུགས་སྤུན་ཉེ་གྲོགས་པོ་ཚོའི་བར་ཡིག་འགྲུལ་གྱི་ལམ་ནས་བཀའ་རྩོམ་སྣ་ཚོགས་གནང་ཡོད། དེ་སྐབས་ཀོང་པོར་རྒྱང་འབུད་དུ་སྔོན་བཏང་སྐུ་བཅར་ཀུན་འཕེལ་ལགས་དང་ངོ་འཕྲད་བྱུང་ཞིང་། གཅིག་མཐུན་གྱི་ལས་དབང་དེ་ལས་ཁོང་གཉིས་ཕན་ཚུན་དབར་གདུང་སེམས་མཉམ་བསྐྱེད་ཀྱིས་འབྲེལ་འདྲིས་དམ་ཟབ་བྱུང་། རྗེས་སུ་ལུང་ཤར་ལས་འགུལ་ནང་དུ་ནག་ཉེས་གཅིག་མཚུངས་ཀྱིས་རྒྱང་འབུད་དུ་བཏང་བའི་མི་ལ་ལ་ལྷ་སར་ཕྱིར་ལོག་ཐུབ་པ་དང་ཞབས་སྡོད་སྐྱར་ཞུ་ཆོག་པ་བྱུང་ནའང་། གང་དེ་དང་སྐུ་བཅར་གཉིས་ཕྱིར་ལོག་ཆོག་པའི་ཁ་གུ་ཙམ་ཡང་མེད་པར་བདག་མེད་དུ་ལུས་པས། དེ་ལྟ་བུའི་ཁྲིམས་ལུགས་འདྲ་དྲང་དུ་མི་སྤྱོད་པའི་ཚུལ་ལ་ཤིན་ཏུ་ཐུགས་ཕམ་དང་ཞེ་གཏིང་ནས་ལོག་སྟེ་མཐར་མེ་བྱི(༡༩༣༦)ལོར་ཁོང་གཉིས་གསང་གྲོས་ཀྱིས་གནས་སྐོར་ལ་བསྙད་བཏགས་ནས་རྒྱ་གར་ཡུལ་དུ་སྲིད་པའི་ཡ་མཚན་གྱི་གཟིགས་མོར་བྱོན། རྒྱ་གར་ཁུལ་དུ་ལོ་བཅུ་ཙམ་བཞུགས་རིང་ཀ་སྦུག་(འབྲུག་པ་)དྲག་ཤོས་ཀྱི་སྲས་སྲོས་ཚོར་བོད་ཡིག་སློབ་འཁྲིད་གནང་བ་དང་། མཁས་དབང་དགེ་འདུན་ཆོས་འཕེལ་དང་ཁུ་ནུ་མཐར་ཕྱིན་སྦ་བུ་སོགས་དང་མཉམ་འཛོམས་ཀྱིས་མཐའ་ཀླས་གངས་ཅན་རྩོམ་རིག་གི་མཁའ་དབྱིངས་སུ་རྣམ་པར་རྩེན་ནས་སྔ་རྗེས་སུ{{རྒན་བྱིས་གསུམ་གྱི་འབེལ་གཏམ་སྣང་བ་རབ་གསལ}}ཞེས་པ་དང་། {{ཡིག་བསྐུར་རྣམ་གཞག}} {{ཀ་བཤད}} དེ་མིན་སྙན་ཚིག་ཁག་ཅིག་བཅས་རྩོམ་འབྲི་གནང་ཡོད། ཀ་སྦུག་(འབྲུག་གི་)དྲག་ཤོས་ཀྱི་རཱ་ནི་ཆོས་(དབྱིངས་)དབང་མོ་དང་ལྷན་དུ་འབྲས་སྤྱི་བློན་ཆེན་སར་སྦི་སིས་བརྩམས་པའི་དེབ་ཆུང་ཞིག་དབྱིན་ཡིག་ནས་བོད་ཡིག་ནསཏུ་ཕབ་བསྒྱུར་མཛད། མེ་ཕག(༡༩༤༧)ལོར་བོད་ས་གནས་སྲིད་གཞུང་ནས་སླད་ཕྱིན་ལྕང་ལོ་ཅན་བསོད་ནམས་རྒྱལ་པོས་སྲིད་དོན་ལ་ཐེ་ཇུས་མ་བྱས་ཚེ་ཕྱིར་ལོག་ཆོག་པའི་བཀའ་འཁྲོལ་བ་ལྟར་གང་དེས་ཡུན་རིང་སྐོམ་པ་ཆུ་འདོད་བཞིན་བཅངས་པའི་རང་ཡུལ་ལ་ཕྱིར་ལོག་ཡོང་རྒྱུའི་འདུན་པ་མངོན་དུ་གྱུར་ནས་ལྷ་སར་གཞིས་མ་བུ་ཕྲུག་དང་མཉམ་འཛོམས་གནང་བའི་སྐལ་བ་ཐོབ།

སྔར་བོད་ས་གནས་སྲིད་གཞུང་གི་སྐབས་གུང་དང་། སྲས་རྣམ་པ། ཐའི་ཇི་སོགས་ཀྱི་གོ་གནས་བཞེས་མྱོང་བ་དང་། རྗེས་སུ་ལྷ་ས་སློབ་ཆུང་ཨང་དང་པོའི་སློབ་སྟོན་ཀྲུའུ་རེན་དང་། སློབ་སྤྱི་གཞོན་པ། ལས་བྱེད་སློབ་གྲྭའི་དགེ་རྒན། ཚ་སྤྲུལ་རིན་པོ་ཆེ་དང་ལྷན་ཏུ{{གསར་འགྱུར་མདོར་བསྡུས}}ཞེས་པའི་བོད་ཡིག་ཚགས་པར་རྩོམ་སྒྲིག་འགན་བཞེས་པ། སྐབས་དེའི་སློབ་གྲྭ་འབྲིང་ཆུང་ཁག་གི་བོད་ཡིག་སློབ་ཚན་དང་། {{བོད་རྒྱ་ཚིག་མཛོད་ཆེན་པོའི}}རྩོམ་སྒྲིག་ཞུས་དག གནའ་རྫས་བདག་གཉེར། དམངས་ཁྲོད་ལྷ་མོ་ཚོགས་པ་སོགས་ལ་ཐུགས་འཁུར་ཟབ་བཞེས་གནང་བ་སོགས་བོད་ཀྱི་སྤྱི་ཚོགས་ཡར་ཐོན་ཡོང་བ་དང་བོད་མི་རིགས་རྗེས་ལུས་ཀྱི་གནས་ལས་འགྲོལ་ཐབས་ཀྱི་དོན་དུ་རང་ནུས་གང་ཡོད་ཀྱི་ལེགས་སྐྱེས་གནང་ཡོད། (རྒྱ་མི་དམར་པོའི་)རིག་གནས་གསར་བརྗེ་ཟེར་བའི་ལོ་བཅུའི་ཟང་ཟིང་ནང་རྒྱལ་ཁབ་དང་། མི་དམངས་བཅས་ལ་གོད་ཆག་ཚབས་ཆེན་བྱུང་བ་དང་དུས་མཚུངས་གང་དེ་ཡང་སྲིད་དབང་སྒེར་འཛིན་ཅེས་པ་ལས་ཐར་ཐབས་མེད་པར་རྡུང་རྡེག་ཕོག་ཀྱང་ཏང་དང་མི་དམངས་ལ་ཡིད་ཆེས་བརྟན་པོ་གནང་ཞིང་། ཟང་ཟིང་གང་མགྱོགས་མཇུག་འགྲིལ་ཏེ་མུན་པའི་ཁྲོད་ནས་ཤར་ཕྱོགས་ཀྱི་སྐྱ་རེངས་མཐོང་རེ་གནང་མུས་ཀྱི་དུས་སུ་དགུང་གྲངས་དོན་ལྔར་ཕེབས་པ་ཆུ་བྱི(༡༩༧༢)ལོའི་ཟླ་གསུམ་པའི་ཚེས་བཅུ་གསུམ་ཉིན་ས་སྲོས་མཚམས་ལ་སྐུ་སྙིང་གི་བསྙུན་གཞི་གློ་བུར་དུ་འཕར་ནས་དགོངས་པ་རྫོགས་སོ། །