ཞང་ཞུང་གི་རྒྱལ་སྲས་གཞོན་ནུ་དོན་གྲུབ།

ཞང་ཞུང་གི་རྒྱལ་སྲས་གཞོན་ནུ་དོན་གྲུབ།

ཁེར་འགྲོ།

གཅིག

ལོ་ངོ་ཁ་ཤས་གོང་དུ། མངའ་རིས་རྒྱལ་རབས། ཞེས་པའི་དེབ་ཐེར་དེ་དཔེ་བསྡུར་བྱེད་པའི་སྐབས་སུ། ལྷ་བླ་མ་ཡེ་ཤེས་འོད་ཀྱི་ཐུན་མོང་མ་ཡིན་པའི་མཛད་པ་དག་ལ་ཐོག་མར་དོ་སྣང་བྱུང་ཞིང་། ཕྱིས་སུ་ལྷ་བླ་མ་ཡེ་ཤེས་འོད་ཀྱི་རྣམ་ཐར་དང་། རྒྱལ་རབས་ཟླ་རིགས་མ་སོགས་ལ་ཞིབ་ཏུ་མཇལ་དུས་ཇེ་ཞིབ་ཇེ་གསལ་དུ་སོང་།

ཉེ་ལམ་དུས་རབས་ ༡༠ ནས་ ༡༣ བར་གྱི་གུ་གེའི་རྒྱལ་རབས་ཀྱི་སྲིད་རབས་ལོ་རྒྱུས་ཉམས་ཞིབ། ཅེས་པའི་རྒྱ་ཡིག་ཐོག་བྲིས་པའི་ཆེད་དེབ་དེ་ཀློག་པའི་ཚེ་ན། ཁོ་བོའི་ལག་ཏུ་ཆེ་ཤེལ་ཞིག་སྤྲད་པ་དང་འདྲ་བར་གསལ་ལྷང་ངེར་འདྲེན་བྱེད་དབང་པོར་འཆར་བར་གྱུར། གལ་ཏེ། ཁ་བ་གངས་ཅན་ལྗོངས་སུ་འཁྲུངས་པའི་མེས་པོ་གཡུ་རལ་ཅན་དག་ཚོམས་ཆེན་གཅིག་ཏུ་འཛོམས་ནས་བཞུགས་གྲལ་དུ་འཁོད་པའི་དབང་དུ་བཏང་ཚེ། ལྷ་བླ་མ་ཡེ་ཤེས་འོད་ཅེས་གྲགས་པའི་སྐྱེས་མཆོག་དེ་ནི་གྲལ་འགོར་བཞུགས་མཁན་ཞིག་ཡིན་པ་ལས། གྲལ་མཇུག་ཏུ་སྡོད་མཁན་ཞིག་ཡིན་མི་སྲིད་ཅེས་བདག་གིས་ཞུའོ།།
དེ་ལྟ་ཡིན་མོད་ཀྱི། སྐད་ཆ་དེ་ཁྱེད་ཀྱི་ཐུགས་སུ་མ་ཆུན་ཚེ། དེ་ནི་རྒྱུན་ལྡན་གྱི་རྒྱུན་ལྡན་ཞིག་ལས་མ་འདས་ཏེ། ལོ་རྒྱུས་ཀྱི་མི་སྣ་གྲགས་ཆེན་ཞིག་ལ་ཉམས་ཞིབ་བྱེད་པའི་ཚེ་ན། དྲང་ལྡོག་གི་ལྟ་ཚུལ་ཐ་དད་ཡོང་བ་ནི་རང་བྱུང་གི་ཆོས་ཉིད་ཡིན་པར་མ་ཟད། ཡོང་དགོས་ངེས་ཤིག་ཀྱང་རེད། རྣམ་ཀུན་གང་ཟག་ཅིག་གི་སྐུ་ཚེའི་ལོ་རྒྱུས་ལ་གདེང་འཇོག་བྱེད་དུས། གཅིག་ནས་ད་ལྟའི་ཐིག་ཤིང་ཁྱེར་ནས་དེའི་རིང་ཚད་འཇལ་རྒྱུ་མ་ཡིན་པར། དུས་སྐབས་དེའི་ལོ་རྒྱུས་རྒྱབ་ལྗོངས་ཀྱི་རྒྱ་མའི་ཐོག་བཞག་ནས་ལྗིད་ཚད་འདེགས་རྒྱུ་དེ་གནད་འགག་ཅིག་ཡིན་པ་དང་། གཉིས་ནས་བྱེ་བྲག་གི་གནས་ཚུལ་ལ་བྱེ་བྲག་ཏུ་དབྱེ་ཞིབ་བྱས་ནས་བསྡོམས་ཚིག་བཀོད་རྒྱུ་དེ་རྩ་དོན་གལ་ཆེན་གཉིས་ཡིན་ནོ། །དེ་འདྲའི་བྱུང་བ་རིག་པའི་མཛུབ་སྟོན་འོག་ཏུ། གུས་པས་ནི་ལྷ་བླ་མ་ཡེ་ཤེས་འོད་ཀྱིས་བསྟན་པའི་མེ་རོ་སྟོད་ནས་གསོས་ཏེ་དར་ཞིང་རྒྱས་པར་མཛད་པའི་ངོས་དེ་དང་། ཡང་སྟོད་མངའ་རིས་སུ་བོན་ཀྱི་བསྟན་པ་བསྣུབས་ནས་མིང་གི་ལྷག་མར་བཏང་བའི་ཟུར་དེ་གཉིས་གླེང་རྒྱུ་མ་ཡིན་པར། རྒྱལ་པོའི་ལམ་ལུགས་ཀྱི་སྲིད་ལུགས་ལ་དངོས་ཡོད་གནས་ཚུལ་དང་འཚམ་པའི་བསྒྱུར་བཅོས་གནང་སྟེ། མངའ་ཐང་གཅིག་གྱུར་ཡོང་བར་བཞག་པའི་མཛད་པ་དེ་དག་དྲན་པར་འདོད་དོ།།

གཉིས།

འགྲོ་བ་མིའི་སྲིད་ཀྱི་ཆུ་རྒྱུན་རིང་མོ་གཞུང་རྒྱུད་དུ་དེད་དེ་སོང་ཚེ། སྔར་སྲིད་པ་ཆགས་པ་ནས་བཟུང་སྟེ། གོས་སུ་ལྕང་ལོ་གྱོན་ཞིང་ཟས་སུ་མ་རྨོས་ལོ་ཏོག་ཟ་བའི་བསྐལ་པ་ཡ་ཐོག་དུས་སྐབས་དང་། མངའ་མཛད་ཀྱི་དུས་སྐབས། བཀའ་བཀོད་རྒྱུད་འཛིན་གྱི་དུས་སྐབས། མ་རྩ་རིང་ལུགས་ཀྱི་དུས་སྐབས། དེ་བཞིན་སྤྱི་ཚོགས་རིང་ལུགས་སོགས་སྲིད་ཀྱི་རྣམ་པ་ཅི་རིགས་རླབས་ཀྱི་ཟེགས་མ་ཇི་བཞིན་གཅིག་འཇགས་གཅིག་ལངས་ཚུལ་དུ་བྱུང་ཡོད་མོད། དེང་དུས་ཀྱི་འགྲོ་བ་མི་བྱུང་ནས་མི་ལོ་འབུམ་ 1.5 ལྷག་སོང་བའི་ཆུ་རྒྱུན་རིང་མོ་དང་བསྡུར་ཚེ། སྲིད་ཀྱི་རྣམ་པའི་འགྱུར་བག་ནི་ཤིན་ཏུ་ནས་དལ་བའི་རང་བཞིན་ཅན་ཞིག་ཡིན། དེ་འདྲའི་དལ་ཞིང་རིང་བའི་འགྱུར་ལྡོག་ཁྲོད་ཏུ། ཕ་ཤུལ་བུ་འཛིན་གྱི་རྒྱལ་པོའི་ལམ་ལུགས་དེ་ས་གནས་འདི་གའི་དོན་དངོས་གནས་ཚུལ་དང་སྦྱར་ནས་འཐུས་ཚང་ཅན་དང་། ཚད་ལྡན་ཅན། རྒྱུན་མཐུད་ཅན། ལམ་ལུགས་ཅན་དུ་གཏོང་བར་མཛད་རྗེས་རླབས་པོ་ཆེ་འཇོག་གནང་མཛད་པའི་མི་བུ་ཞིག་ཡོད་པར་དེར་ལྷ་བླ་མ་ཡེ་ཤེས་འོད་ཅེས་འབོད་ལ། ལྷ་ནི་རྒྱལ་པོ་དང་། བླ་མ་ནི་ཆོས་བྱེད་ཀྱི་སློབ་དཔོན། ཡེ་ཤེས་འོད་ནི་རབ་ཏུ་བྱུང་བའི་མཚན་ཡིན་པས། མདོར་བསྡུས་ནས་རྒྱལ་པོ་བླ་མ་ཡེ་ཤེས་འོད་ཅེས་པའི་དོན་ཡིན། ཁོང་ནི་མངའ་རིས་ཀྱི་རྒྱལ་པོ་བཀྲ་ཤིས་མགོན་གྱི་སྲས་ཆེ་ཆུང་གཉིས་ལས་ཆུང་བ་ཡིན། ཐོག་མར་ཆུང་དུས་ཀྱི་མཚན་ལ་སྲོང་ངེ་ཟེར། རྗེས་སུ་རྒྱལ་པོ་བྱས་པའི་མཚན་ལ་ཁྲི་ལྡེ་སྲོང་གཙུག་བཙན་ཟེར། རྗེ་འདི་ཉིད་སྤྱི་ལོ་947ལོར་སྐུ་འཁྲུངས་ཤིང་། སྐུ་ཚེའི་སྟོད་ལ་བཙུན་མོ་སེང་དཀར་མ་ཁབ་ཏུ་བཞེས་ཏེ་སྲས་ཆེ་བ་ཁྲི་ལྡེ་མགོན་བཙན་དང་། ཆུང་བ་ལྷ་འཁོར་བཙན་འཁྲུངས་པ་དང་། བཙུན་མོ་གཅིག་ཤོས་ལ་སྲས་མོ་ལྷའི་མེ་ཏོག་བྱ་བ་འཁྲུངས་སོ།།

གསུམ།

གནམ་གྱི་ནི་དབུས། ས་ཡི་ནི་དཀྱིལ། གླིང་གི་ནི་སྙིང་པོ། གངས་ཀྱི་ནི་ར་བ། ཆུ་བོ་ཀུན་གྱི་མགོ་བོ། རི་མཐོ། ས་གཙང་། མི་མཛངས་ཤིང་དཔའ་རུ་སྐྱེས། ཆོས་བཟང་དུ་བྱེད། རྟ་མགྱོགས་སུ་འཕེལ་བའི་གནས། ཞེས་བསྔགས་པའི་གངས་ཅན་ལྗོངས་ཀྱི་བྱུང་རབས་ལོ་རྒྱུས་ལ་བལྟས་ན། པུར་རྒྱལ་གྱི་གདུང་རྒྱུད་ལས་དབང་ཟིལ་ཆེ་བ་ཞིག་དང་སྲིད་ཀྱི་འཁོར་ལོ་སྐོར་ཡུན་རིང་བ་ཞིག་མེད་དེ། པུར་རྒྱལ་ཀྱི་དུས་སྐབས་དང་བཙན་པོའི་རྒྱལ་རབས་ཁོ་ན་བརྩིས་ནའང་ལོ་ངོ་ 1000 ལྷག་ཙམ་རིང་ཆབ་སྲིད་བསྐྱངས་ཤིང་། སྨད་སིལ་ཆད་ཀྱི་དུས་སྐབས་དག་བརྩིས་ན་དེ་ལས་ཀྱང་རིང་བ་ཡོད། འདི་འདྲ་ནི་འཛམ་བུ་གླིང་ན་མཐོང་དཀོན་པ་ཞིག་ཏུ་གདའོ། །
འོ་ན་རྒྱུ་རྐྱེན་རྟེན་འབྲེལ་གང་ཞིག་གིས་པུར་རྒྱལ་གྱི་གདུང་རྒྱུད་དག་གི་ཆབ་སྲིད་གནམ་ལས་མཐོ་ཞིང་། དབུ་རྨོག་རི་རབ་ལས་བཙན་པའི་གཟི་དཔལ་བྱུང་ངམ་ཞེ་ན། སྤྱིར་ན་ཕྱི་ནང་གི་རྟེན་འབྲེལ་སྣ་ཚོགས་མ་འགྲིག་ལྷུན་གྱིས་གྲུབ་པ་དང་འབྲེལ་བ་ཞེས་བརྗོད་སྲིད་མོད། དེའི་ནང་ནས་ཆེས་གལ་འགངས་ཆེ་བ་ཞིག་ནི། བཙན་པོའི་མི་རྒྱུད་ནི་གནམ་རིམ་པ་བཅུ་གསུམ་གྱི་སྟེང་ནས་མར་མི་ཡུལ་དུ་མགོ་ནག་མིའི་རྗེ་བོ་བྱེད་པར་ཕེབས་པའི་གཏམ་རྒྱུད་དེ་ཀུན་ལ་རླུང་ལྟར་གྲགས་ཤིང་། འབངས་ཀྱི་དད་པའི་ངོ་བོར་འདྲེས་པའི་འཇིག་རྟེན་ལྟ་ཚུལ་ཏུ་གྱུར་པ་དང་འབྲེལ་བ་ཡོད་ལ། གནམ་ལྷ་བབས་ཀྱི་རྒྱལ་པོ། ས་ལྷུན་གྲུབ་ཀྱི་མངའ་མཛད། མྱི་རྗེ་ལྷའི་སྤྲུལ་པ། གནམ་གྱི་ལྷ་ལས་འགྲེང་མྱིའི་རྗེ་དང་། དུད་རྔོག་ཆགས་ཀྱི་རྐྱེན་དུ་བསྐྱོད་པའི་སྤུ་རྒྱལ་གྱི་ལྷ་བཙན་པོ། ཞེས་པའི་གཏམ་དེ་རྡོ་རིང་དང་། བཀའ་གཙིགས། རྒྱལ་རབས་སོགས་བརྒྱུད་ནས་བོད་ཡུལ་སྟོད་སྨད་བར་གསུམ་དྲིལ་ཞིང་བསྒྲགས་པས། རྗེ་བོ་ནི་ནམ་ནམ་ཞར་ཞར་རྗེ་བོ་དང་། འབངས་ནི་ཚེ་ཚེ་རབས་རབས་འབངས་སུ་ཡིན་ཤག་ཤག་བྱེད་པ་ལས། ས་སྟེང་གི་མགོ་ནག་མི་སུ་ལའང་བཙན་པོའི་མི་རྒྱུད་ལ་འགྲན་འཛུགས་པའི་སྤོབས་པ་མེད་ཅིང་། བཙུགས་པའི་དབང་དུ་བཏང་ཡང་འབངས་གཞན་གྱིས་ཁས་ལེན་མི་སྲིད་པའི་ཚད་དུ་གྱུར། དེས་ན། གལ་སྲིད་སྤུར་རྒྱལ་བཙན་པོའི་ཐོབ་ཐང་ལ་རྙོག་གྲ་ཡོང་ན། ཕྱི་ནས་མི་ཡོང་བར་ནང་ནས་ཡོང་གི་ཡོད། དེ་ཡང་རྒྱལ་སྲས་མང་པོ་ཡོད་པ་དང་། ལྷག་པར་དུ་དེ་དག་གི་མ་རྒྱུད་མི་འདྲ་བ་ཡིན་དུས། རྒྱལ་སྲིད་འཕྲོག་རྩོད་ཀྱི་རྙོག་གྲ་ཡོང་ཞིང་། སིལ་བུར་ཐོར་བའི་ཉེན་ཁ་མེད་པ་མིན་སྟབས། གནད་དོན་དེར་དམིགས་ཏེ། རྒྱལ་སྲས་ལས་འོས་པ་ཞིག་ཁྲི་ལ་བསྐོས་རྗེས། གཞན་རྣམས་ཐང་མཚམས་སུ་ཕབ་པའི་སྲོལ་བཏོད་ཡོད། ཐང་མཚམས་སུ་ཕབ་ཅེས་པ་ནི་འབངས་ཀྱི་གྲལ་དུ་ཕབ་པ་ཞེས། དུང་དཀར་ཚིག་མཛོད་དུ་གསུངས་ཤིང་། ཕྱིས་ཀྱི་རྒྱལ་རབས་འགའ་ཤས་མངའ་མཛད་བསྙུང་བའི་ཐབས་ཞེས་བཀོད་འདུག་ལ། ཞིབ་ཕྲ་ཇི་འདྲ་ཡིན་ད་དུང་དཔྱད་པའི་གནས་སོ།།

བཞི།