༸མི་རྗེ་ཟུར་ཁང་ས་དབང་ཆེན་མོ་གླེང་བ།

ངས་པོ་རྒྱལ་མཚན།

༦༽ བླ་ན་མེད་པའི་རྣམ་དཔྱོད་དང་མཛད་རྗེས།

རྒྱ་དམར་ཇག་པས་བོད་ལ་བཙན་འཛུལ་སྐབས། སྤྱི་ ལོ་ ༡༩༥༩ ལོར་རྒྱ་དམར་གྱིས་གཡོ་ཐབས་གང་ཡོད་སྤྱད་ནས་༸གོང་ས་མཆོག་སྐུ་བཀྲོང་རྒྱུའམ་རྒྱ་ནག་ཏུ་བཙན་ཁྲིད་བྱ་རྒྱུའི་ངན་ཇུས་གང་ནུས་འདོན་བཞིན་པའི་སྐབས་སུ། མི་མང་གིས་ཞུ་འབོད་ལྟར་༸གོང་ས་མཆོག་རྒྱའི་དམག་སྒར་ལ་ཕེབས་རྒྱུ་མིན་པའི་བཀའ་ཕེབས་པ་བཞིན།” བཀའ་བློན་ཁྲི་པ་ཟུར་ཁང་དབང་ཆེན་དགེ་ལེགས་མཆོག་གིས་མི་དམངས་འགོ་འཁྲིད་ཚོར་བཀའ་བགུགས་ཀྱིས།

༸གོང་ས་མཆོག་སྐུ་འཁོར་དང་བཅས་ལྷོ་ཁ་བརྒྱུད་བཙན་བྱོལ་དུ་ཕེབས་ཤིང་། གཡུལ་རྒྱལ་ལྷུན་རྩེར་ཕེབས་འབྱོར་བྱུང་བ་དང་། སྤྱི་ལོ་ ༡༩༥༩ ཟླ་ ༣ ཚེས་ ༢༠ ཉིན་༸གོང་ས་མཆོག་དབུ་བཞུགས་དང་བཀའ་བློན་རྣམ་པ་དང་། ཆོལ་གསུམ་མི་མང་ཚང་འཛོམས་ཐོག “བཀའ་བློན་ཁྲི་པ་ཟུར་ཁང་དབང་ཆེན་དགེ་ལེགས་མཆོག་གིས་ཉེ་ཆར་རྒྱ་དམར་གྱིས་རྒྱལ་ས་ལྷ་སར་སྔར་མ་གྲགས་གྱིས་གདུག་རྩུབ་དང་བཙན་གནོན་ཇི་བྱས་སྐོར་དང་། དེ་རིང་ལྷོ་ཁུལ་གཡུལ་རྒྱལ་ལྷུན་པོ་རྩེའི་ཕོ་བྲང་དུ་གནས་སྐབས་ཀྱི་བོད་གཞུང་གནས་སྤོས་གསར་འཛུགས་གནང་བའི་ཁྱབ་བསྒྲགས་དང་། བྱེད་སྒོའི་རྩ་ཚིག་སྒྲོག་སྦྱང་གནང་ཞིང་། རྒྱ་ཁྱབ་རྫོང་གཞིས་སོ་སོར་རྩ་ཚིག་ཞལ་བཤུས་རེ་དང་། རྒྱབ་སྣོན་བཀོད་རྒྱ་རེ་བཅས་གཏོང་བར་།”(9) ༼མཛད་རྣམ་རྒྱ་ཆེན་སྙིང་རྗེའི་རོལ་མཚོ། དེབ་ཕྲེང་ལྔ་པ།༽ གནང་། ཉེ་དུས་“ཟླ་བ་དེའི་ཚེས་ ༢༠ ཉིན་བོད་ལ་དྲག་གནོན་བྱས་འདུག དེ་རྗེས་ཉིན་གཉིས་གསུམ་གྱི་ནང་པེ་ཅིང་དུ་རྒྱ་ནག་གཞུང་གིས་བོད་ས་གནས་སྲིད་གཞུང་མེད་པ་བཟོས་པ་ཡིན། ཞེས་ཐག་གཅོད་བྱས་འདུག དེར་བརྟེན་ང་ཚོས་གསར་འགྱུར་ནང་སྐད་ཆ་འདི་གོ་ནས་ལྷོ་ཁ་གཉན་གཡུལ་རྒྱལ་ལྷུན་པོ་རྩེ་ཞེས་པར་ཆེད་མངགས་ཕྱིན་ནས་དེར་ང་ཚོས་བོད་གཞུང་བསྐྱར་དུ་བཙུགས་པ་ཡིན་ཞེས་གཡུལ་རྒྱལ་ལྷུན་པོ་རྩེ་རྫོང་གི་སྐས་འཛེགས་གསུམ་པའི་ཐོག་ནས་ཟུར་ཁང་ས་དབང་ཆེན་མོས་སྐད་ཆེན་པོས་ལྷ་སར་བོད་གཞུང་མེད་པ་བཟོས་པ་ཡིན་ཟེར་གྱི་ཡོད། ང་ཚོས་འདིར་གཡུལ་རྒྱལ་ལྷུན་རྩེ་རྫོང་དུ་བོད་གཞུང་གསར་དུ་བཙུགས་པ་ཡིན་ཞེས་བསྒྲགས་གནང།” (10) ༼སྤྱི་ལོ་༢༠༡༣ ༸གོང་ས་མཆོག་གིས་ལ་དྭགས་སུ་བསོད་ནམས་གཞིས་ཆགས་སུ་སྩལ་བའི་བཀའ་སློབ།༽ པའི་སྐབས་དེ་དུས་ཆོལ་གསུམ་ཆུ་སྒང་དྭངས་བླངས་དམག་མི་སོགས་ཆོལ་གསུམ་བོད་མི་ཁྲི་ཕྲག་ཁ་ཤས་གནས་འདིར་༸གོང་ས་མཆོག་གི་སྐུ་བཅར་གྱི་ཆེད་དུ་འཛོམས་ཡོད། སྐབས་དེ་དུས་ཀྱང་མཁྱེན་རླབས་ཀྱི་རྣམ་དཔྱོད་བསྒྲུན་དུ་མེད་པའི་མི་རྗེ་སྐུ་ངོ་ཟུར་ཁང་ས་དབང་ཆེ་མོ་མཆོག་འཆར་གཞི་གང་ལེགས་བཀོད་ཡོད། སྨྲ་བོ་ལྕོག་བསྟན་འཛིན་རྒྱ་མཚོས་རྣམ་དཔྱོད་ཅན་གྱི་“ཟུར་ཁང་མལ་ནང་ཙོག་པུར་བསྡད་དེ་ཡང་ལཱ་བདུན་སྤར་ནས་ཡི་གེ་འབྲི་གི་འདུག་དུས་ངས་སྐུ་བསིལ་ཡོང་ཞེས་ཞུས་པ་དང་བཀའ་ཟུར་ཟུར་ཁང་གིས་ང་ལ་གསུངས་དོན་ང་ཚོས་ཧིན་རྡུར་ཕེབས་འཐུས་ཆོག་པ་ཞུ་མི་སྐྱ་སེར་གཉིས་སྔོན་ལ་བཏང་ཡོད་པས་ཉིན་གཉིས་ཙམ་ལས་མི་འགོར་བར་ཧིན་རྡུར་འབྱོར་རྒྱུར་རེད། འབུམ་དེ་ལ་བབས་ནས་ཧིན་རྡུའི་ས་སྣེ་དང་པོའི་རྫོང་ཏི་སི་སྦུག་ཟེར་བ་དེར་ཕེབས་རྒྱུ་དང་། རྒྱལ་བ་རིན་པོ་ཆེ་ནས་གསལ་བསྒྲགས་ཤིག་གནང་དགོས་པའི་དེའི་གསུང་བཤད་ཟིན་བྲིས་ཡིན་ཞེས་འགོ་བརྗོད་དུ་རྒྱ་མི་དང་བོད་མི་གཉིས་རྩ་བ་ནས་མི་འདྲ་ཞིང་ཞེས་མགོ་བརྗོད་དུ་འཁོད་པའི་ཤོག་གྲངས་བཅུ་གསུམ་ལྷག་བྲིས་འདུག” (11) ༼བོད་ཀྱི་རིག་གནས་ལོ་རྒྱུས་རྒྱུ་ཆ་བདམས་བསྒྲིགས། སྤྱིའི་འདོན་ཐེངས། ༡༧ ཤོག་གྲངས་ ༢༨༢ ནས ༢༨༣ བར་གསལ།༽ ༸གོང་ས་མཆོག་རྒྱ་གར་དུ་ཕེབས་འབྱོར་བྱུང་མ་ཐག བོད་རང་བཙན་གྱི་རྒྱལ་ཁབ་ཡིན་ནའང་ད་ཆ་རྒྱ་དམར་གྱིས་དྲག་པོའི་བཙན་འཛུན་བྱས་པའི་སྐོར་དང་། བཙན་ཤེད་འོག་བཞག་ཏུ་བཅུག་པའི་ཆིངས་ཡིག་གྲོས་མཐུན་བཅུ་བདུན་ཐོག་ལ་དང་པོ་རྒྱ་དམར་གྱིས་རྩིས་མེད་བཏང་བར་བརྟེན། ངེད་ཚོས་ཀྱང་ད་ཆ་རྕིས་མེད་བཏང་བ་ཡིན་ཞེས་འཁོད་པའི་གསར་འགོད་གསལ་བསྒྲགས་གྲགས་ཅན་དེའི་སྒྲོམ་གཞི་ལྟ་བུ་དེ་ཡིན་འདུག།