ཐོན་མིའི་འཁྲུངས་ཡུལ་ལྷོ་ཁ་སྙེ་མོ་གང་ལ་ཡིན་མིན་མཐའ་དཔྱོད།

ཐོན་མིའི་འཁྲུངས་ཡུལ་ལྷོ་ཁ་སྙེ་མོ་གང་ལ་ཡིན་མིན་མཐའ་དཔྱོད།

རྩོམ་པ་པོ། སྙེ་ལྕེ་བཙན་ཕྲུག

 

 

ལོ་ཙཱ་བ་ཐོན་མི་སམ་བྷོ་ཊ། 618-

དེའང་ཐོན་མི་སམ་བྷོ་ཊའི་འཁྲུངས་ཡུལ་ལྷོ་ཁ་དང་སྙེ་མོ་གང་ཞིག་ལ་ཡིན་མིན་གྱི་ཞིབ་འཇུག་གི་གནད་དོན་དེ་ཉིད་གལ་ཆེན་རང་བཞིན་ཅན་ཞིག་ཡིན་ཏེ། གངས་ཅན་བོད་ཀྱི་ཡི་གེའི་བྱེད་པོ་ཐོན་མི་སམ་བྷོ་ཊ་མཆོག་ནི་འཛམ་གླིང་གང་སར་ཁྱབ་པའི་བོད་སྤོས་གསར་གཏོད་གནང་མཁན། སྒང་པ་བོད་ཀྱི་ཡུལ་སྐད་དང་མཐུན་པར་དབྱངས་གསལ་བདག་ཉིད་ཅན་གྱི་བོད་ཡིག་གི་གཟུགས་གསར་གཏོད་གནང་མཁན།

རྒྱལ་ཆེན་སྲོང་བཙན་སྒམ་པོའི་སྐུ་མདུན་དུ་མདོ་ཟ་མ་ཏོག་ལ་སོགས་པའི་མི་རིགས་གཞན་གྱི་རིག་གཞུང་ཀློག་མཁན་གྱི་ལོ་ཙཱ་བ་ཐོག་མ། ཕྱི་ཕྱོགས་ནས་སློབ་གཉེར་མཐར་ཕྱིན་ཏེ་བོད་དུ་གསར་གཏོད་ལས་འགུལ་ཐོག་མར་སྤེལ་མཁན་ལ་སོགས་པའི་བོད་པ་ཚང་གི་ལོ་རྒྱུས་མི་སྣ་ཤིན་ཏུ་ནས་གལ་ཆེན་འགངས་ཆེན་ཞིག་ལགས། དེ་འདྲ་ཡིན་དུས། བློན་ཆེན་ཐོན་མི་སམ་བྷོ་ཊ་འཁྲུངས་ཡུལ་ངོ་མ་དེ་བོད་ཡུལ་གྱི་ས་ཆ་གང་ཞིག་ཡིན་མིན་ལ་མཐའ་དཔྱོད་དགོས་རྒྱུ་དེའང་། བོད་ཀྱི་ཞིབ་འཇུག་གལ་ཆེན་དང་བོད་ཀྱི་ཉམས་ཞིབ་གནད་ཆེ་བའི་རིགས་སུ་གནས་པ་དེ་ཡིན་པས་ན། ད་གཟོད་བློན་ཆེན་ཐོན་མི་སམ་བྷོ་ཊའི་འཁྲུངས་ཡུལ་དངོས་དེ་ལྷོ་ཁ་ལ་ཡིན་ནམ། ཡང་ན་སྙེ་མོ་ལ་ཡིན་ཞེས་པར་མཐའ་དཔྱོད་རང་བཞིན་ཅན་གྱིས་ཞིབ་འཇུག་གི་ལམ་ནས་དཔྱད་རྩོམ་སོགས་སྤེལ་དགོས་ངེས་ཡིན་པ་དེ། སྙེ་མོའི་མི་སྣ་དང་ལྷ་ཁའི་མི་སྣ་ཙམ་གྱིས་ལས་འགན་མིན་པར་བོད་སྤྱི་ཁྱབ་ཀྱི་གལ་འགངས་ཆེས་ཆེ་བའི་འོས་འགན་ཉག་གཅིག་དེ་ལགས། དེ་འདྲ་ཡིན་དུས་བློན་ཆེན་ཐོན་མི་སམ་བྷོ་ཊ་ནི་མི་གཅིག་ཡིན་པས་ཁོང་གིས་འཁྲུངས་ཡུལ་ལྷོ་ཁར་ཡིན་ན་སྙེ་མོར་མ་ཡིན་དགོས་པ་དང་། ཁོང་གི་འཁྲུངས་ཡུལ་སྙེ་མོར་ཡིན་ན་ལྷོ་ཁར་ཡིན་མི་སྲིད་པས་དེ་དོན་ལ་མཐའ་དཔྱོད་ངེས་པར་དུ་དགོས་ངེས་རེད།

ལྷག་པར་དུ་ཐོན་མི་སམ་བྷོ་ཊའི་འཁྲུངས་ཡུལ་དངོས་དེ་ཕྱོགས་ཡོངས་ནས་གཏན་འཁེལ་བ་ཞིག་བྱ་མ་ཐུབ་ཚེ། བོད་ཀྱི་གསར་གཏོད་སྙིང་སྟོབས་དང་། སྒང་པ་བོད་ཀྱི་དབྱངས་གསལ་བོད་ཡིག །བོད་སྤོས་དྭངས་གཙང་སོགས་ཀྱི་ཐོག་མའི་འབྱུང་ཁུངས་དེ་ལོ་བརྒྱ་ཕྲག་མང་པོའི་རྗེས་སུ་བོར་གཏོར་ཤོར་དོགས་ཡོད་ལ། དེ་ལྟར་མུ་འཐུད་མ་དག་རྒྱུན་འབྱམས་སུ་སོང་ཚེ། བོད་ཡིག་གསར་གཏོད་དང་བོད་སྤོས་གསར་གཏོད་ལ་སོགས་པའི་ཐོན་མིའི་སྙིང་སྟོབས་ལ། ད་ལྟའི་བོད་ཀྱི་ན་གཞོན་ཚོས་གུས་ཞབས་མ་བྱས་པར་འགྲོ་བ་ཡིན། དེར་སྣང་ཆེན་དང་མཐོང་ཆེན་བརྩི་བཀུར་སོགས་ཀྱང་བྱས་མེད་པར་འགྲོ་བ་ཡིན་གཤིས། དེས་ན། སྔོན་ཐོན་བོད་མིའི་གསར་གཏོད་སྙིང་སྟོབས་ལ་མིག་དཔེར་ལྟ་བ། གངས་ཅན་ཐོན་མིའི་ཞུམ་མེད་དཔའ་སྤོབས་ལ་རྗེས་སུ་ཡི་རང་བྱེད་པ། འོ་སྐོལ་གྱིས་རང་གི་མེས་པོའི་ཤུལ་བཞག་རིན་ཆེན་ལ་སྣང་ཆེན་མཐོང་ཆེན་གཙིགས་ཆེན་དུ་བྱེད་འདོད་ཚེ། ཆེས་ཐོག་མར་དྲིན་ཆེན་སློབ་དཔོན་རིན་པོ་ཆེ་ཁོང་གི་འཁྲུངས་ཡུལ་དངོས་ལ་སོགས་པ་གཏན་འབེབས་བྱེད་པ་ནས་འགོ་འཛུགས་དགོས་སོ། །

དེ་ཡང་། བློན་ཆེན་ཐོན་མི་སམ་བྷོ་ཊའི་འཁྲུངས་ཡུལ་སྙེ་མོར་ཡིན་ཚུལ་སྨྲ་བ་དེ་དང་། ཡང་ལྷོ་ཁར་ཡིན་ཚུལ་མི་འདྲ་བ་གཉིས་བྱུང་ཡོད་པ་ནི། བོད་ཀྱི་ལོ་རྒྱུས་དེབ་ཐེར་རྙིང་པ་ཁག་ལ་བརྟེན་ནས་བྱུང་བ་ཞིག་རེད། དེ་གཉིས་དྲན་རྒྱུ་དགོས་པོ་སུ་དང་གང་ཞིག་གིས་ཉེ་དུས་རྟོག་བཟོ་རང་བཟོ་ལྟ་བུས་དེ་ལྟར་བཤད་ཡམས་བྱས་པ་ལྟ་བུ་མ་རེད། འོ་ན། བོད་པའི་དེབ་ཐེར་གང་འདྲ་ཞིག་ལས་ཐོན་མི་སྙེ་མོར་འཁྲུངས་ཚུལ་འཁོད་ཡོད་དམ། དེ་ལས་གཞན་བོད་ཀྱི་དེབ་ཐེར་ཅི་འདྲ་ཞིག་ལས་ཐོན་མི་མཆོག་ལྷོ་ཁར་འཁྲུངས་ཚུལ་བསྟན་ཡོད་དམ། ཞེ་ན། དྲི་བ་དེ་གཉིས་ལ་ལན་འདེབས་ཀྱིས་ཐོག་ནས་ཐོན་མི་སམ་བྷོ་ཊའི་འཁྲུངས་ཡུལ་ལྷོ་ཁ་དང་སྙེ་མོ་གང་ཞིག་ལ་ཡིན་མིན་གྱི་མཐའ་དཔྱོད་ཕལ་ཆེ་བ་ལེགས་གྲུབ་ཡོང་བར་བྱེད་རྒྱུ་ཡིན།

དེ་ཡང་སྔོན་ལ་ང་ཚོས་སྒང་པ་བོད་ཀྱི་ལོ་རྒྱུས་དེབ་ཐེར་འགའ་ཞིག་ལས་བློན་ཆེན་ཐོན་མི་མཆོག་སྙེ་མོར་འཁྲུངས་ཚུལ་སྐོར་འཁོད་པ་བྱུང་སྔ་བའི་རིགས་ལ་མཉམ་དུ་གཟིགས་མོར་རོལ་ཚེ། དེའང་ས་སྐྱ་པ་བསོད་ནམས་རྒྱལ་མཚན་གྱིས་བསམ་ཡས་གཙུག་ལག་ཁང་དུ་བརྩམས་པའི་རྒྱལ་རབས་རྣམས་ཀྱི་བྱུང་ཚུལ་གསལ་བའི་མེ་ལོང་ཞེས་བྱ་བར་འདི་ལྟར་གསུངས་ཡོད་དེ། ཐོན་མི་སམྦྷོ་ཊ། [ཐོད་ལུར(ཐོན་ལུང་)ར་ག་བ།]མགར་སྲང་བཙན་ཡུལ་བཟུང་། [སྟོད་ལུང་རམ་པ་བ།]འབྲི་སེ་རུ་གོང་སྟོན། [འབྲི་གུང་བ།]མགར་སྲང་བཙན་ཡུལ་བཟུང་། [ཉང་སེར་བ།]ཡང་སྟོན་ལ་སོགས་པ་བློན་པོ་བརྒྱ་ཐམ་པས་བར་གྱི་ཁོད་སྙོམས། ཞེས་སོགས་གསུངས་ཡོད་པ་དེ་རེད། དེ་ནི་བོད་ཀྱི་ལོ་རྒྱུས་ཀྱི་ཡིག་ཆ་གྲགས་ཅན་ཞིག་ཏུ་ངོས་འཛིན་བྱེད་བཞིན་ཡོད་ལ། རྒྱལ་རབས་འདིའི་རྩོམ་པ་པོ་ནི་སྤྱི་ལོ་༡༣༡༢ལོར་ཞ་ལུ་ཁང་གསར་དུ་སྐུ་འཁྲུངས་ཤིང་འདས་ལོ་ནི་༡༣༧༥ལོར་ཡིན་ནོ། །

དེ་རྗེས་གུ་གེ་པཎ་ཆེན་གྲགས་པ་རྒྱལ་མཚན་གྱི་ཉི་མའི་རིགས་ཀྱི་རྒྱལ་རབས་ཞེས་པ་ལས། ཐོན་ལུག་ར་ཁའི་མི་ཨ་ནུ་ཞེས་བྱ། ཞེས་སོགས་བཀོད་ཡོད། ཁོང་གི་འཁྲུངས་འདས་དུས་ཚོད་ནི་༡༤༡༥-༡༤༩༨འདི་ཡིན། ལྷག་པར་དུ་བོད་ཀྱི་ལོ་རྒྱུས་སྐད་གྲགས་ཆེ་ཤོས་ཏེ། རྗེ་བཙུན་དཔའ་བོ་གཙུག་ལག་ཕྲེང་བས་མཛད་པའི་དེབ་ཐེར་ཆེན་མོ་མཁས་པའི་དགའ་སྟོན་ལས་ཀྱང་འདི་ལྟར་གསུངས་ཡོད་དེ། ཐོན་གྱི་ལུག་ར་ཁ་ནས་ཐོན་མི་ཨ་ནུ་ར་ག་ཏའི་བུ་ཐོན་མི་སམྦྷོ་ཊ་བྱ་བའི་མི་ཆུང་བློ་གསལ་ཞིག་ལ། ཞེས་ལ་སོགས་པ་གསལ་པོར་བྱུང་ཡོད། གོང་ལ་ཁུངས་ལུང་དྲངས་པ་དེ་དག་ལས། ཐོད་ལུར(ཐོན་ལུང་)ར་ག་བ།] ཞེས་དང་། ཐོན་ལུག་ར་ཁའི་མི་ཨ་ནུ་ཞེས་བྱ་ཞུ་བ་དེ་དང་། ཐོན་གྱི་ལུག་ར་ཁ་ནས་ཐོན་མི་ཨ་ནུ་ར་ག་ཏའི་བུ་ཞེས། གཅིག་གྱུར་གྱིས་ཐོན་ལུག་ར་ཁ་ནས་ཞེས་གསུངས་པ་དེ་དག་ལས་ད་གཟོད་བློན་ཆེན་ཐོན་མི་སམ་བྷོ་ཊའི་འཁྲུངས་ཡུལ་སྙེ་མོར་ཡོད་པའི་ཐོན་ལུག་ར་ཁ་ཞེས་པ་དེ་གསལ་གསལ་ཐིང་ཐིང་གིས་ངང་ནས་བསྟན་པ་དེ་རེད། རྒྱུ་མཚན་དེར་བརྟེན་ནས་སྙེ་མོ་ཐོན་གྱི་མི་ཡིན་པས་ན། ཐོན་མི་ཞེས་པའི་མིང་ཚིག་དེ་ལྟར་དུ་བྱུང་བ་ལགས་སོ། །

དོན་དེ་ཉིད་དེབ་ཐེར་རྙིང་པ་དང་བོད་ཀྱི་ཡུལ་མིའི་མི་རབས་ནས་མི་རབས་བརྒྱུད་དེ་ཡོང་བའི་སྔ་མོའི་གཏམ་རྒྱུད་གཉིས་དང་སྦྱར་ཚེའང་གསལ་དུ་འགྲོ་རྒྱུ་ཡོད་དེ། ཉང་ཉི་མ་འོད་ཟེར་༡༡༣༦-༡༢༠༤གྱིས་མཛད་པའི་ཆོས་འབྱུང་མི་ཏོག་སྙིང་པོའི་སྦྲང་རྩིའི་བཅུད་ལས། དེ་ནས་ཐོན་མི་བསམ་བུ་ཞེས་པ་བློ་གསལ་ལ་ཡིད་གཞུངས་པས་མི་ཆུང་སམ་བྷོ་ཌ་ཞེས་པ་ལོ་བཅུ་གཅིག་ལོན་པ་ལ། ཞེས་སོགས་བྱུང་བ་དེ་ནས་བསམ་བུ་ཞེས་པའི་ཐོན་མིའི་བྱིས་དུས་ཀྱི་མིང་དེ་དང་གཏམ་རྒྱུད་འདི་རྦད་དེ་མཐུན་ཡོད་དེ། དེ་ཡང་སྔོན་ཐོན་མི་མཆོག་དགུང་ལོ་གསུམ་ལ་བཞེས་ཤིང་བུ་ཆུང་ཞིང་ཁའི་གྲུར་བསྙལ་ཏེ། ཡབ་ཆེན་རང་ཉིད་ཀྱིས་ཞིང་རྨོ་སྐབས་རྒྱལ་པོ་སྲོང་བཙན་སྒམ་པོ་བོད་ཕྲུག་རིག་པ་རྣོ་བའི་རིགས་འཚོལ་དུས་དང་འཕྲད་ནས་གནས་ཚུལ་འདི་འདྲ་ཞིག་བྱུང་འདུག་སྟེ། ང་བོད་བཙན་པོའི་རྒྱལ་པོ་ཡིན། ང་ལ་དྲི་བ་ཞིག་ཡོད། ཁྱོད་ཀྱིས་ལན་ཐེབས་ན་བྱ་དགའ་དང་མ་ཐེབས་ན་ཆད་པ་གཅོད་རྒྱུ་ཡིན། ཁྱོད་ཀྱིས་ཞིང་ཁ་ག་དུས་ནས་རྨོས་སམ། ཕ་སྣང་གྲགས་ཀྱིས་ད་ནངས་ཞོགས་པ་ནས་རྨོས་པ་ཡིན་ལགས་ཞུས། འོ་ན་ཁྱོད་ཀྱིས་ད་ནངས་ནས་ཞིང་ཁ་ལ་རྨོན་རོལ་རྐང་གྲངས་ག་ཚོད་བརྒྱབས་ཡོད། གྲངས་ཀ་ཤོད་དགོས་ཞེས་གསུངས་པ་དེར་ཕ་སྣང་གྲགས་ཀྱིས་གྲངས་ཀ་ཞུ་རྒྱུ་མ་བྱུང་བས་སྐྲག་སྟེ། མགོ་ཕུར། ལྕེ་བསྣར། རྔུལ་ཆུའང་འཛགས་ལ་ཉེ་སྐབས། ཞིང་ཁའི་སློག་རུལ་ནང་དུ་ཉལ་ཡོད་པའི་བུ་ཆུང་ལོ་གསུམ་ཅན་གྱིས་ཡར་ལངས་ཏེ་རྒྱལ་པོ་ཡིན་ཟེར་བའི་མི་དེར་གསོལ་བ། ཨ་ཙི་རྫིག་པ་ལ། རྟ་ཆད་སྦང་བ་གཏོང་ས་དང་། མི་ཆད་ཡ་ལ་བཞག་ས་ངའི་ཨ་ཕ་ཨེ་རེད། དེ་འདྲ་ཡིན་ན། རྒྱལ་པོ་ཁྱོད་ཀྱིས་ད་ནངས་གནས་ཚང་ནས་འདིར་ཕེབས་པའི་བར་རྟའི་རྨིག་རྗེས་ས་སྟེང་ལ་ཅི་ཙམ་བཞག་ཡོད་དམ། དེའི་གྲངས་ཀ་གསུངས་ན། ངའི་ཨ་ཕས་ཞིང་ལ་རྨོན་རོལ་བརྒྱབས་པའི་གྲངས་ཀ་ངས་ཕུལ་ཆོག་གསུངས་པས། རྒྱལ་པོ་ཡིན་ཟེར་བའི་མི་དེའི་ཐུགས་ཧ་ཅང་མཉེས་ནས་རྟ་མཆོག་ངང་དཀར་ལས་བབས་ཏེ། ང་ལ་འཇམ་དཔལ་དབྱངས་ཀྱིས་ལུང་བསྟན་པའི་བུ་དེ་ད་རེས་རྙེད་བྱུང་། གནས་འདི་ནས་ངའི་བསམ་དོན་འགྲུབ་སོང་། ད་ནས་བཟུང་གནས་འདི་ལ་བསམ་འགྲུབ་སྒང་ཞེས་ཟེར་དགོས། བུ་འདིའི་མིང་ལའང་བསམ་པའི་བུ་ཞེས་ཐོགས་ཤིག་ཅེས་ལ་སོགས་པའི་གཏམ་རྒྱུད་བྱུང་ཡོད།

དེ་ལྟར་བྱུང་བ་ལྟར་ཏུ་ད་ལྟའང་སྙེ་མོ་ཐོན་ལ་དྲི་བ་ཆེན་མོའི་ཞིང་ཁ་ཞེས་པའི་ས་མིང་དང་ཞིང་ཁ་གཉིས་ད་ལྟའང་ལྷག་ཡོད་ལ། ཁྱད་པར་དུ་དངོས་པོའི་དཔང་རྟགས་ལ་བསམ་འགྲུབ་སྒང་དང་ཐག་ཉེར་གནའ་ཤུལ་ཤིན་ཏུ་ནས་རྒྱ་ཆེར་ཆགས་པའི་ཤུལ་མང་མང་ཞིག་ད་ལྟའང་ང་ཚོའི་མཐོང་ཆོས་སུ་གྱུར་ཡོད། རྒྱུ་མཚན་དེ་རྣམས་ཀྱིས་ཕྱིར་ན། མི་རྗེ་སྲོང་བཙན་སྒམ་པོས་བུ་འདིའི་མིང་ལའང་བསམ་པའི་བུ་ཞེས་པ་ཐོགས་ཤིག་ཅེས་གསུངས་པ་དེར་ཚིག་བསྡུས་ལ་ཉང་ཉི་མ་འོད་ཟེར་གྱིས་གོང་དུ་དེབ་ཐེར་མི་ཏོག་སྙིང་པོའི་སྦྲང་རྩིའི་བཅུད་ལས། བསམ་བུ་ཞེས་གསུངས་པ་དེ་ད་གཟོད་དོན་གྱི་རྩ་བར་སྒོ་ཀུན་ནས་འབྱོར་ཡོད་པ་མཁྱེན་སོང་ངམ་ལགས། དེར་མ་ཟད་གོང་གི་གཏམ་རྒྱུད་དེ་བཤད་སྲོལ་ཟེར་སྲོལ་ཙམ་མིན་པར་དེར་ལོ་རྒྱུས་དེབ་ཐེར་ལས་ཁུང་ལུངས་དྲངས་ཟིན་པ་དེ་ལའང་བསམ་གཞིགས་བྱ་འོས་སོ། །

དེ་ལྟར་གོང་དུ་ལུང་འདྲེན་བྱས་པ་དེ་རྣམས་ནི་སྙེ་མོ་ཐོན་པའི་ཡུལ་དངོས་གང་ཡིན་དང་མཐུན་པ་མ་ཟད། ལྷག་པར་རྗེ་དཔའ་བོ་གཙུག་ལག་ཕྲེང་བའི་མཁས་པའི་དགའ་སྟོན་ལས། ཐོན་གྱི་ལུག་ར་ཁ་ནས་ཐོན་མི་ཨ་ནུ་ར་ག་ཏའི་བུ་ཐོན་མི་སམྦྷོ་ཊ་བྱ་བའི་མི་ཆུང་བློ་གསལ་ཞིག་ལ་ཞེས་གསུངས་པ་དེ་ཉིད་ཁོ་ནར་ཚད་མར་བཟུང་འོས་ཏེ། བོད་ཀྱི་ལོ་རྒྱུས་སྔ་ཕྱི་མང་པོ་བྱུང་བ་ལས། ཞིབ་ཚགས་ཤོས། སྤུས་དག་ཤོས། ཁྱབ་ཆེ་ཤོས། རྒྱལ་སྤྱིའི་བོད་རིག་པ་སོགས་ཀྱིས་ཀྱང་ཡང་ཡང་བསྟོད་ཅིང་བསྔགས་པའི་ལོ་རྒྱུས་ཤིག་ཡིན་པས་རེད། དེ་ཡང་ཕྱི་ཕྱོགས་བོད་རིག་པའི་སྡེ་ཁག་གི་མཁས་པ་སྐད་གསུམ་སྨྲ་བ་འདའ་དང་ཕང་ཞེས་པའི་རྩོམ་པ་པོ་གྲགས་ཅན་མཁར་རྨེའུ་བསམ་གཏན་རྒྱ་མཚོས་འདི་ལྟར་གསུངས་ཡོད་དེ། ལོ་རྒྱུས་སྨྲ་བའི་ཁྱུ་མཆོག་དཔའ་བོ་གཙུག་ལག་ཕྲེང་བས༼1504-1566༽སྤྱི་ལོ1564ལོར་བྲིས་པའི«ལྷོ་བྲག་ཆོས་འབྱུང»ངམ«མཁས་པའི་དགའ་སྟོན»ཞེས་གྲགས་པ་དེ་ནི་དེང་སང་འཛམ་གླིང་ཐོག་བོད་ཀྱི་ལོ་རྒྱུས་མཁན་ཚང་མས་མགྲིན་གཅིག་ཏུ་ཚད་གཞིར་འཇོག་པའི་ཡིག་ཆ་ཞིག་ཏུ་ངོས་འཛིན་བྱེད་ཀྱིན་ཡོད། དེའི་རྒྱུ་མཚན་ནི་རྩོམ་པ་པོས་སྔོན་ཡོད་ཆོས་འབྱུང་རྣམས་སུ་བྲིས་པའི་གཏམ་རྒྱུད་དང་ལོ་རྒྱུས་འདྲེས་མར་ཡོད་པ་རྣམས་ཧ་ཅང་སྐྱར་ཟློས་མ་བྱས་པར་གནའ་རབས་ལོ་རྒྱུས་སྐོར་རྡོ་རིང་དངོས་སུ་མཇལ་ནས་ཇི་མ་ཇི་བཞིན་དུ་བཤུས་པ་དང་། བསམ་ཡས་སུ་ཕེབས་ནས་དེར་ཡོད་དཔེ་མཛོད་རྙིང་པའི་གྲས་ནས་བྱུང་བའི་བཀའ་གཙིགས་རྣམས་དངོས་སུ་མཇལ་ནས་དཔྱད་གཞིར་མཛད་ཡོད་ཅེས་གསུངས་འདུག། དེས་ན། མཁར་རྨེའུ་མཆོག་གི་གསུང་དྲངས་མ་ཐག་པ་དེར་ང་ཚོས་སྔོན་ལ་བསམ་གཞིགས་གཟབ་གཟབ་ནན་ནན་ཞིག་བྱས་ཏེ། དེ་ནས་བསྟན་པ་བཞིན་བློན་ཆེན་ནམ་སློབ་དཔོན་ཆེན་མོ་ཐོན་མི་སམ་བྷོ་ཊའི་འཁྲུངས་ཡུལ་སྙེ་མོ་ཐོན་ལ་ཡིན་པར་གཏན་འབེབས་བྱ་དགོས་སོ། །

ཡང་ངེས་དགོས་པ་ཞིག་ལ་སྔོན་དུས་སུ་སྙེ་མོ་ཞེས་པ་དེ་གཙང་གི་ཁུངས་ཡིན་པ་དང་དེང་སང་ལྷ་སའི་ཁུངས་གཏོགས་ཡིན། རྒྱལ་ཕྲན་བསིལ་མ་བཅུ་གཉིས་སྐབས་ངས་པོ་འཕན་པོར་བཏགས་ཡོད་པ་དེའི་ས་ཁོངས་ཡིན་ཚུལ་ཏུན་ཧོང་གཏེར་ཡིག་ལས་གསལ། ལོ་ངོ་དགུ་བརྒྱ་ལྷག་གི་སྔོན་ནས་ཐོན་མིའི་འཁྲུངས་ཡུལ་གྱི་ད་ལྟའི་རྫོང་འདིར་སྙེ་མོ་ཞེས་ཟེར་བའི་ཡིག་རྙིང་གི་ཁུངས་ལ། གྱ་པ་གངས་པའི་ཐུགས་དམ་རྟེན་ཡིན་པའི་ཤེར་ཕྱིན་འབུམ་རྙིང་ཁྱུང་པོ་གཡུ་བྲིས་ཀྱི་ཡིག་གཟུགས་ཅན་ཞིག་སྙེ་མོའི་སྟོད་ལེབ་དགོན་པར་ད་ལྟའང་བཞུགས་པའི་མཛད་བྱང་དེར་གསལ་འདུག་ཅིང་། དེའི་སྔོན་ལ་ཡུལ་ལུང་དེར་སྣེ་མོ་ཞེས་ཟེར་ཞིང་སྣེ་མོའི་སྒྲ་ཟུར་ཉམས་ཏེ་སྙེ་མོ་ཞེས་ཟེར་མཁན་ཡང་འདུག་པས་དེ་བདེན་མིན་མི་ཤེས། ཐོན་མིའི་སྐབས་སུ་ད་ལྟའི་རྫོང་འདིར་སྙེ་མོ་ཟེར་བའི་ཁུངས་ངས་རྙེད་མ་སོང་མོད། ཐོན་མིའི་འཁྲུངས་ཡུལ་ལ་ཐོན་ལུག་ར་ཁ་ཞེས་པ་ནི་ཐོན་མིའི་སྙན་གྲགས་ཆེན་མོར་ཁྱབ་སྟོབས་ཀྱིས་བཙན་པོ་སྲོང་བཙན་སྒམ་པོའི་དུས་ནས་ད་བར་མིང་དེ་གཉིས་མ་ཉམས་པར་ད་ལྟའང་གནས་ཡོད་ལ། ཁྲི་སྲོང་ལྡེའུ་བཙན་སྐབས་ལའང་ཡུལ་འདིར་སྙེ་མོ་ཞེས་ཐོགས་ཡོད་ཚུལ་མཁས་པའི་དགའ་སྟོན་ལས་གསལ་ཡོད།

ཡང་ད་ལྟ་སྙེ་མོའི་ཐོན་མ་ཎི་སྒང་ཞེས་པའི་གནའ་ཤུལ་ཆེན་མོ་འདིའང་སློབ་དཔོན་ཐོན་མི་མཆོག་སྐུ་ཚེའི་སྨད་ལ་བོད་བཙན་པོས་གནང་བའི་ཕོ་བྲང་ངམ་གཞི་ཀ་ཆེན་མོ་དེ་འདྲ་ཞིག་རིམ་བཞིན་ཆེན་མོར་གྱུར་ཏེ། བོད་ཀྱི་བཙན་པོའི་རྒྱལ་རབས་ལ་བཀའ་དྲིན་བླ་ལྷག་ཆེ་བའི་ཁྱིམ་བརྒྱུད་ཆེས་ཆེ་བ་ཞིག་ལའང་གྱུར་བའི་གནའ་ཤུལ་ཞིག་རེད་སྙམ། དེ་རྣམས་ནི་ཞོར་འཕྲོས་ཡིན་ནོ། །ཡང་། གོང་གླེང་དེ་ཙམ་གྱིས་ཆོག་ཤེས་མི་བྱེད་པར་ཐོན་མི་མཆོག་སྙེ་མོ་ནས་ཡིན་པར་ཐག་ཆོད་པ་ལ་འགའ་ཞིག་གིས་བློན་ཆེན་ཐོན་མི་མཆོག་ནི་ལྷོ་ཁ་ནས་ཡིན་ཞེས་པར། དགག་སྒྲུབ། དབྱེ་འབྱེད། གསལ་བཤད། མ་དག་རྒྱུན་འབྱམས་སུ་ཕྱིན་པ་ལ་གཙང་སེལ་ལ་སོགས་པ་བྱེད་དགོས་ངེས་ལགས་པས་ན། དེ་དོན་གྱི་ལས་ལ་སྐབས་བབས་འཇུག་པར་བྱ་འདོད་དེ། དེ་ཡང་། སློབ་དཔོན་ཐོན་མི་མཆོག་ལྷོ་ཁའི་གཉལ་ལ་འཁྲུངས་པ་རེད་ཟེར་མཁན་ཐོག་མ་ནི་སྐྱོགས་སྟོན་རིན་ཆེན་བཀྲ་ཤིས་ཞེས་པ་དེ་རེད། དེས་མཛད་པའི་བརྡ་གསར་རྙིང་གི་རྣམ་གཞག་ལི་ཤིའི་གུར་ཁང་ཞེས་པ་ལས། ལྷོ་གཉལ་གྱི་ཐུ་མི་སྣང་གྲགས་ཀྱི་བུ་ཨ་ནུ་སྟེ། སམྦྷོཊ་དང་། སམྦྷ་དྲ་སོགས་རྒྱ་སྐད་དུ་བཞེད་པ་བྱུང་ཡང་། འདི་གཉལ་ན་ཡོད་པ་ས་འབུར་བོ་ཞིག་འདུག་པས། ས་འབོ་ར་ཡིན་པ་འདྲ། ཞེས་གསུངས་པ་དེ་རེད།

གསུང་དུམ་དེར་དཔྱད་པ་མ་བཏང་བའི་སྔོན་ལ་རྩོམ་པ་པོ་ཁོང་གིས་འཁྲུངས་འདས་ག་དུས་ཡིན་མིན་ལ་ཅུང་ཙམ་བསམ་ཚེ། དེ་འང་དུང་དཀར་རིན་པོ་ཆེའི་ཞལ་ནས། བོད་ཀྱི་སྐད་ལས་གསར་རྙིང་གི་བརྡའི་ཁྱད་པར་སྟོན་པ་ལེགས་པར་བཤད་པ་ལི་ཤིའི་གུར་ཁང་ཞེས་པ་དུས་རབས་བཅོ་ལྔ་པར་སྐྱོགས་སྟོན་སྨོན་གྲུབ་ལོ་ཙཱ་བས་མཛད་པ། འདིར་བརྡ་གསར་རྙིང་གི་ཐ་སྙད་ཆིག་སྟོང་ལྷག་ཙམ་ཡོད་པ་ཚང་མ་སྐད་གསར་བཅད་གོང་གི་གསུང་རབ་ཁ་གཅིག་ལས་བསྡུས་ཞེས་གསུངས་པ་ལས་སྐྱོགས་སྟོན་རིན་ཆེན་བཀྲ་ཤིས་ཁོང་དུས་རབས་བཅོ་ལྔའི་ནང་གི་མི་ཡིན་ཚུལ་བསྟན་འདུག། ༡༤༤༡-༡༥༢༧ འཁྲུངས་འདས་འདི་ནི་སྐྱོགས་སྟོན་རིན་ཆེན་བཀྲ་ཤིས་ཁོང་གི་དགེ་རྒན་ཞ་ལུ་ལོ་ཆེན་ཆོས་སྐྱོང་བཟང་པོའི་འཁྲུངས་འདས་དུང་དཀར་རིན་པོ་ཆེས་བཤད་པ་དེ་ཡིན། འཁྲུངས་འདས་འདི་བན་ཤུལ་དཔལ་མཁར་རྒྱལ་གྱིས་སྐྱོགས་སྟོན་རིན་ཆེན་བཀྲ་ཤིས་ཀྱི་འཁྲུངས་འདས་ལ་བཤད་པ་ནི་ནོར་བ་ཡིན་ཞིང་། དེས་ན་སྐྱོགས་སྟོན་རིན་ཆེན་བཀྲ་ཤིས་ཀྱིས་སློབ་དཔོན་ཐོན་མི་མཆོག་ལྷོ་ཁའི་གཉལ་ལ་འཁྲུངས་པ་རེད་ཟེར་བ་དེ་ཉིད་དུས་རབས་བཅོ་ལྔའི་ནང་དུ་གསུངས་པ་ཡིན་པ་དང་། གོང་དུ་རྒྱལ་རབས་གསལ་མེ་༡༣༡༢-༡༣༧༥ལོ་དུས་འདིའི་ནང་བརྩམས་པའི་དུས་དང་། གུ་གེ་པཎ་ཆེན་གྲགས་པ་རྒྱལ་མཚན་༡༤༡༥-༡༤༩༨ལོའི་ནང་ལ་བརྩམས་པ་དེ་གཉིས་པོའི་སྔ་མ་ལས་བློན་ཆེན་ཐོན་མི་སམ་བྷོ་ཊ་ཐོན་ལུག་ར་ཁར་འཁྲུངས་ཚུལ་བསྟན་པ་དེ་ཉིད་ལོ་བརྒྱ་ཕྲག་གཉིས་ལྷག་གིས་རིང་བ་ཡོད་པ་དེ་གནས་ལུགས་ཤིག་རེད། སྐབས་བབས་གོང་དུ་སྐྱོགས་སྟོན་རིན་ཆེན་བཀྲ་ཤིས་ཀྱི་གསུང་དུམ་དེར་དཔྱད་ཚེ། དེའང་ལྷོ་གཉལ་གྱི་ཐུ་མི་སྣང་གྲགས་ཀྱི་བུ་ཨ་ནུ་སྟེ། ཞེས་པ་ནི་བློན་ཆེན་ཐོན་མིའི་ཡབ་ཀྱི་འཁྲུངས་ཡུལ་ལྷོ་གའི་གཉལ་ཞེས་པ་དེ་ཡིན།

ཐོན་མིའི་ཡབ་ཀྱི་འཁྲུངས་ཡུལ་ལ་བསམ་ནས་ཐོན་མི་སམ་བྷོ་ཊའི་འཁྲུངས་ཡུལ་ཡང་ལྷོ་ཁ་གཉལ་ལ་རེད་ཅེས་པའི་མ་དག་རྒྱུན་འབྱམས་འདི་བྱུང་བ་ལགས། ཡང་སྐྱོགས་སྟོན་ལགས་ཀྱིས་སམྦྷོཊ་དང་། སམྦྷ་དྲ་སོགས་རྒྱ་སྐད་དུ་བཞེད་པ་བྱུང་མཁན་ཧ་གོ་བཞིན་དུ་སམྦྷོཊ་དང་སམྦྷ་དྲ་ཞེས་པ་དེ་ཉིད། ས་འབོ་རའམ་གཉལ་ན་ཡོད་པ་ས་འབུར་བོ་ཞིག་ལ་འགྲེལ་བཤད་བྱས་པ་ནི་བློ་དང་ལྡན་པ་སུའང་གད་མོ་ཤོར་ཆེད་ཅིག་རང་ཡིན་པ་ལས་དེར་རྒྱུ་མཚན་མེད་ཅིང་དེ་ལས་ལོག་སྟེ་གནོད་བྱེད་ཡོད་དེ། འོ་ན། ལྷོ་ཁ་གཉལ་ན་ཐོན་མི་སམྦྷོཊ་སྟོང་ཕྲག་འགའ་ཤས་ཤིག་འཁྲུངས་པ་ཡིན་པ་ཐལ། ལྷོ་ག་གཉལ་ན་ས་འབུར་བོ་སྟོང་ཕྲག་ལྷག་ཡོད་པའི་ཕྱིར། གལ་ཏེ་སམྦྷོཊ་དང་སམྦྷ་དྲ་ཞེས་པ་དེ་ས་འབུར་བོའི་དོན་ཡིན་པས་དེར་ཐོན་མི་འཁྲུངས་པས་ཐོན་མིའི་མཚན་ལའང་སམྦྷོཊ་ཟེར་བ་ཡིན་ན་སྙེ་མོ་ཐོན་ལའང་ས་འབུར་བོ་གང་མང་ཞིག་ཡོད་པས་སོ། །དངོས་སྟོབས་རིག་པའི་དབང་དུ་བྱས་ནའང་། ཐོན་མིའི་འཁྲུངས་ཡུལ་ནི་ཁིམ་ཚང་ངམ་སྦྲ་གུར་ལ་སོགས་པའི་ནང་ལ་ཡིན་པ་ལས། རི་བོང་ཕྲུ་གུ་དང་། ཞིམ་ཕྲུག། ཨབ་ཕྲུག། ལུག་གུ་ལ་སོགས་པ་ཁ་ཅིག། ས་འབུར་བོ་ཡོད་སར་སྐྱེ་བ་ནང་བཞིན་ལར་ནས་མ་ཡིན་ནོ། །

ལྷག་པར་སྐྱོགས་སྟོན་གྱིས་ཐོན་མིའིི་འཁྲུངས་ཡུལ་ཀྱོག་པོར་སྟོན་པ་དེར་ལྐུག་པ་ཨུ་ཚུགས་འཛིན་མི་རིགས་ཏེ། སྐྱོགས་སྟོན་ཁོང་རང་གིས་ཀྱང་འདི་གཉལ་ན་ཡོད་པ་ས་འབུར་བོ་ཞིག་འདུག་པས། ས་འབོ་ར་ཡིན་པ་འདྲ་པོ་འདུག་ཅེས་ཐེ་ཚོམ་དང་བཅས་པའི་སྒོ་ནས་དེ་ལྟར་བཤད་པ་ཙམ་ལས་འདི་གཉལ་ན་ཡོད་པ་ས་འབུར་བོ་ཞིག་འདུག་པས། ས་འབོ་ར་དངོས་གནས་རང་དེ་རེད་ཅེས་ཐག་བཅས་ཏེ་བཤད་མེད་པས་སོ། །ཡང་གོང་དེར་ཐོན་མིའི་ཡབ་སྣང་གྲགས་མཆོག་ལྷོ་ཁ་ལྷུན་རྩེ་གཉལ་ལས་འཁྲུངས་པ་ཡིན་ཚུལ་ལ་ལོ་རྒྱུས་དེབ་ཐེར་གསལ་བར་འཁོད་པ་དེ་འདྲ་ཞིག་ནི་ངས་མ་རྙེད་ཀྱང་། ཀིརྟི་སྐྱབས་མགོན་གྱིས་མཛད་པའི་སྲིད་དོན་ལོ་རྒྱུས་དྭངས་གསལ་མེ་ལོང་ཞེས་པར། ཐོན་མིའི་ལོ་རྒྱུས་ངག་རྒྱུན་རྣམས་ཡི་གེར་བཀོད་པ་ལས་འདི་ལྟར་གསལ་ཡོད་དེ། ཐོན་མིའི་ཡབ་སྣང་གྲགས་སྙེ་མོར་ཡུལ་གྱར་ལ་ཡོང་ཚུལ་ནི། གནམ་རི་སྲོང་བཙན་གྱི་ནང་བློན། ལྷོ་གཉལ་ནང་གི་ཁྱིམ་ཚང་ཕྱུག་པོ་ཞིག་ལ་བུ་སྤུན་གསུམ་ཡོད་པའི་རྒན་པ་དཀར་ཡོལ་བཟོ་བར་མཁས་པ། འབྲིང་བ་བོན་ཆོས་གཏོ་ཐབས་ལ་མཁས་པ། ཆུང་བ་དབང་པོ་བརྟུལ་བས་ཕ་མ་གཉིས་ཀྱིས་རྒྱུན་དུ་གཤེ་གཤེ་བཏང་བ་སོགས་ཀྱིས་ཡུལ་གྱར་ཏེ་སྙེ་མོ་ཐོན་ལུག་རྭ་བསམ་འགྲུབ་སྒང་དུ་ཕེབས་པ། དེ་རྗེས་ཁོང་གནུབས་བཟའ་གཡང་ཅན་ལྷ་མོ་དང་རིམ་བཞིན་གྲོགས་རྗེས་སུ་ཁོང་གཉིས་ལ་ཁྱེའུ་ངོ་མཚར་ཅན་ལུས་ལ་བཀྲ་ཤིས་པའི་མཚན་མ་བརྒྱད་ཀར་ཚང་བ་ཞིག་འཁྲུངས་ཚུལ་ལ་སོགས་པ་བཀོད་འདུག། དེས་ན། ཐོན་མི་སམ་བྷོ་ཊའི་ཡབ་ཀྱི་ཆུང་མིང་ལ་ཨ་ནུ་དང་མིང་དངོས་ལ་སྣང་གྲགས་ཞེས་ཟེར་བ་འདྲ་ལ། དེ་ལྟར་ཡིན་པའི་དབང་དུ་བཏང་ན་ཡབ་ཀྱི་འཁྲུངས་གཞིས་ལྷོ་ཁ་གཉལ་ལ་བསམ་ནས་ཐོན་མི་འང་ལྷོ་ཁ་གཉལ་ལ་རེད་སྙམ་པའི་དོགས་པ་དེའང་བྱུང་སྲིད་པ་ཞིག་གོ།

དེ་བཞིན་དེབ་ཐེར་ཁག་ལས་ཨ་ནུའི་བུ་ཞེས་འཁོད་ཡོད་པ་ལ་བསམ་ན། ཐོན་མིའི་ཡབ་ཆེན་མི་ཚང་གཅིག་གི་བུ་ཆུང་བ་ཡིན་ཞིང་བུ་ཆུང་བའི་བྱིས་དུས་ཀྱི་མིང་ལ་ལྷོ་ཁ་བས་ཨ་ནུ་ཞེས་ཟེར་བ་རེད་ཅེས་པ་ལའང་རྒྱུ་མཚན་ཅུང་འདུག་སྙམ། ཡང་ལྷོ་གཉལ་གྱི་ཕ་སྣང་གྲགས་མཆོག་སྙེ་མོར་དེ་ལྟར་སྔོན་དུས་སུ་ཡོང་གི་མ་རེད་ཨང་སྙམ་ཚེ་དེའང་མི་འཐད་དེ། སྔོན་གྱི་བོད་མི་རྣམས་བོད་ཡུལ་ནང་ཁུལ་ལ་དེ་ལྟར་ཕར་འགྲོ་ཚུར་འོང་བྱེད་པ་མ་ཟད། རིང་ས་རྒྱ་དཀར་རྒྱ་ནག་ལའང་བོད་མི་ཚོ་འགྲོ་བ་ཡིན་པས་སོ། །དེ་འདྲ་ཡིན་དུས་ཐོན་མིའི་ཡབ་ཆེན་ལྷོ་ཁ་གཉལ་ལ་འཁྲུངས་པ་ཡིན་ཟེར་བར་འགལ་བ་ཆེ་བ་གང་ཡང་མི་འདུག་མོད། ཡིན་ན་ཡང་ཐོན་མིའི་ཞལ་ལུང་ལས་ཨ་ནུ་ཞེས་པའི་དོན་ལ་འདི་ལྟར་འགྲེལ་བཤད་བྱས་ཡོད་དེ། མཁས་པ་འགའ་ཤས་ཀྱིས་ཀྱང་རྒྱ་གར་སྐད་ཀྱིས་ཨ་ནུ་ཞེས་པ་མིའུ་ཆུང་གི་མིང་ཡིན་པས་ཐོན་མི་ཨ་ནུ་ནི་ཐོན་མི་མིའུ་ཆུང་ཞེས་པའི་དོན་དང་། སམྦྷོ་ཊ་བོད་དང་ཡང་དག་པ་སྟེ་བོད་དངོས་མ་ཞིག་རེད་ཅེས་པའི་སྐད་དོོད་ཡིན་ཞེས་བཞེད་མཁན་ཡང་བྱུང་ངོ་། །ཞེས་གསུངས་འདུག་པ་ལ་ནི་བསམ་གཞིགས་གཟབ་གཟབ་ནན་ནན་ཞིག་ལྷོ་ཁ་བ་ཚོས་མ་བཏང་རང་བཏང་ཆགས་པ་མ་རེད་དམ། འོ་ན། ཐོན་མི་དང་ཐུ་མི་ཞེས་པའི་འབྲི་སྟངས་མི་གཅིག་པ་དེའི་དོན་གང་ཡིན་ནམ་ཞེ་ན། ཐོན་མི་ཞེས་པའི་ཚིག་འགྲེལ་འདི་ལྟ་སྟེ། བོད་ཀྱི་སྔོན་ཐོ༵ན་གྱི་མི༵། སྙེ་མོ་ཐོ༵ན་པའི་མི༵། བོད་ཀྱི་ཐུ༵་ཞེས་པའི་མི༵འི་རུས་བརྒྱུད་ཀྱི་ཐུ་མི་ཞེས་པ་དེ་དང་། བོད་ཀྱི་སྔོན་ཐོ༵ན་གྱི་མི༵་སྣ་ཞེས་པའི་ཐོན་མིའི་ཚིག་གཉིས་པོ་མཉམ་དུ་བསྡུས་ནས་ཐོན་མི་ཞེས་བྱུང་ཡིན་ནམ་སྙམ། ཐུ་མི་ཞེས་འབྲི་མཁན་ཚོས་ནི་ཚིག་དེར་འགྲེལ་བཤད་འདི་ལྟར་བྱས་ཡོད་དེ། གོང་དཀར་རྡོ་གདན་གྱི་ལོ་རྒྱུས་ལས། ཐུ་ཞེས་པ་རུས་ཡིན་ཚུལ་བསྟན་ཡོད་ཅིང་དེ་དང་མཐུན་པར་སྟོང་སྐོར་ཟླ་བ་རྒྱལ་མཚན་གྱི་རྣམ་ཐར་ལས་ཀྱང་། ཐུ་ཞེས་པ་ནི་བོད་ཀྱི་གཡོར་པོ་ལུང་དགུའི་བྱེ་བྲག་གི་རུས་ཤིག་ཡིན་ཚུལ་བསྟན་པ་བཞིན་ཐུ་ནི་རུས་བརྒྱུད་ཀྱི་མིང་ཡིན་པ་འདྲའོ། །

གཞན་ཡང་། ཡང་གོང་གླེང་ལས་འཕྲོས་ཏེ། འོ་ན། ཁྱོད་ཀྱིས་ཡོངས་གྲགས་ཐོན་མིའི་མཚན་ཟུར་ལ་སམྦྷོཊ་ཞེས་པར་འགྲེལ་བཤད་ཇི་ལྟར་ཡོད་དམ་ཞེ་ན། དེ་དོན་ནི་གོང་གླེང་བྱས་ཟིན་ལྟར་སམྦྷོཊ་ཞེས་པ་ནི་བསམ་པའི་བུའི་བསྡུས་ཚིག་ལ་བསམ་བུ་ཞེས་པའི་ཐ་སྙད་དེ་རང་ཡིན་ལ། བློན་ཆེན་ཐོན་མི་མཆོག་འཕགས་ཡུལ་ལ་ཕེབས་སྐབས་ཁོང་གིས་རང་ཉིད་ཀྱི་མིང་ལ་བོད་མི་བསམ་བུ་ཞེས་ཟེར་བ་དེ་ཉིད་འཕགས་ཡུལ་དུ་ཁྱབ་ཅིང་། དེར་རྒྱ་གར་མིས་ཀྱང་། ཐོན་མིའི་ཆུང་མིང་དང་། ཐོན་མིའི་མི་གཤིས་ཤིན་ཏུ་ནས་བཟང་བ་སོགས་ལ་རྒྱུ་མཚན་རགས་རིམ་ཙམ་བྱས་ཏེ། བློན་ཆེན་ཐོན་མི་མཆོག་ལ་སམ་བྷོ་ཊ་ཞེས་པའི་མཚན་དེ་ད་གཟོད་བཏགས་པ་རེད་སྙམ། དེ་དོན་ཡང་ངས་གང་དྲན་བཤད་པ་ཙམ་མིན་པར་འབྲེལ་ཡོད་ཡིག་ཆ་རྣམས་ལས་དེ་བཞིན་གསལ་བར་ཡོད་དེ། གོང་དཀར་རྡོར་གདན་གྱི་ལོ་རྒྱུས་ལས། མཚན་དངོས་ལ་སཾ་བྷ་ཏྲ་ཟེར་བ་ཡོད། དེའི་སྐད་དོད་ཀུན་ཏུ་བཟང་པོ་ཡིན་ཞེས་གསུངས་ཡོད།

དེ་དང་མཐུན་པར་གུ་གེ་པཎ་ཆེན་གྲཊ་རྒྱལ་གྱི་ཉི་མའི་རིགས་ཀྱི་རྒྱལ་རབས་ལས་ཀྱང་འདི་ལྟར་འགྲེལ་ཡོད་དེ། ཐོན་མི་མི་གཤིས་ཤིན་ཏུ་བཟང་བས་རྒྱ་གར་ཁ་ཆེ་བ་རྣམས་ཀྱིས་སམྦྷོ་ཊ་ཟེར་བ་བཏགས་ཏེ། བོད་ཡང་དག་པ་ཞེས་བྱའོ་ཞེས་བྲིས་འདུག་པ་དེ་གཉིས་དོན་ལ་ཤིན་ཏུ་ནས་འབྱོར་བ་ཞིག་ཡིན་ཏེ། སྒྲ་བ་ནམ་བཟང་གི་སུམ་ཅུ་བའི་འགྲེལ་བ་བསྟན་པའི་སྒྲོན་མེ་ལས། འགའ་ཞིག་གིས་རྒྱ་གར་ན་འགྲེལ་བ་སངས་རྒྱས་བསྐྱངས་དང་། འགྲེལ་བ་ཆོས་མཆོག་ཅེས་མཛད་པ་པོའི་མཚན་བསྟན་བཅོས་ལ་འདོགས་པའི་སྲོལ་ཡོད་པ་བཞིན་དུ། འདིར་ཡང་སཾ་བྷ་དྲའམ་ས་མནྟ་བྷ་དྲ་སྟེ་ཀུན་ཏུ་བཟང་པོ་ནི་སློབ་དཔོན་ཐུ་མིའི་མཚན་ཡིན་པ་ལ་ཁུངས་ཚད་ལྡན་ཡོད་དེ། སུམ་ཅུ་པའི་རྩ་བའི་མཇུག་ཏུ་བྱཱ་ཀ་ར་ཎའི་རྩ་བ་བརྒྱད་པ་ལས་ཀུན་ཏུ་བཟང་པོའི་བྱཱ་ཀ་ར་ཎ་དང་པོའི་སྐབས་ཏེ་ལྔ་བའོ་ཞེས་གསུངས་འདུག། དེས་ན་ཀུན་ཏུ་བཟང་པོ་ཞེས་པ་སློབ་དཔོན་རང་ཉིད་ཀྱི་མཚན་གྱི་བྱེ་བྲག་ཅིག་ཡིན་པའང་ཧ་ཅང་གསལ་ལོ། །

དེ་བཞིན་དུ་སྨོན་འགྲོ་པཎ་ཆེན་གྱིས་ཀྱང་འདི་ལྟར་གསུངས་ཡོད་དེ། མཚན་ཡང་སམྦྷོ་ཊ་སྟེ་བྷོ་ཊ་བོད་དང་སཾ་ཡང་དག་པ་དང་། སཾ་བྷ་དྲའམ་ས་མནྟ་བྷ་ཊ་སྟེ་ཀུན་ཏུ་བཟང་པོ་དང་། སཾ་བསྔགས་པ་དང་བྷོ་ཊ་བོད་དེ་བོད་བསྔགས་པ་ཞེས་འདོད་ཅེས་གསུངས་འདུག། ལྷག་པར་དུ་གངས་ལྗོངས་སྒྲ་འགྱུར་གྱི་རྒྱལ་པོ་མར་པ་ལོ་ཙཱ་བས་ཀྱང་ཡུལ་མ་གྷ་དྷའི་སྐད་དུ་མཛད་པའི་བསྟན་བཅོས་ལས་བྷོ་ཊ་བོད་ཅེས་པར་བསྒྱུར། མ་ཧཱ་བྷོ་ཊའང་བོད་ཆེན་མོ་ཞེས་པར་བསྒྱུར་ཡོད་གཤིས། མ་གྷ་དྷའི་སྐད་དང་ཡང་མཐུན་ཞེས་ཟེར། ཡང་བསམ་དགོས་པ་ཞིག་ལ། བུ་སྟོན་ཆོས་འབྱུང་ལས། བོད་ལ་ཡི་གེ་མེད་པས་ཐོན་མི་ཨ་ནུའི་བུ་ལ་འཁོར་དྲུག་དང་བཅས་ཏེ་ཡི་གེ་སློབ་ཏུ་བཏང་བས། ཞེས་སོགས་བྱུང་བ་དེ་དང་། མཁས་པའི་དགའ་སྟོན་ལས་ཀྱང་། ཐོན་གྱི་ལུག་ར་ཁ་ནས་ཐོན་མི་ཨ་ནུ་ར་ག་ཏའི་བུ་ཐོན་མི་སམྦྷོ་ཊ་བྱ་བའི་མི་ཆུང་བློ་གསལ་ཞིག་ལ། ཞེས་པ་དེ་གཉིས་ལས་གསལ་བ་ལྟར་ན་ཕའི་ཆུང་དུས་ཀྱི་མིང་དེ་བུ་ལ་ཐོགས་པ་ཞིག་ཀྱང་ཡིན་པ་འདྲ་པོ་འདུག་གོ།

ད་ནི་འདི་ནས་ཐོན་མིའི་འཁྲུངས་ཡུལ་ལྷོ་ཁ་དང་སྙེ་མོ་གང་ཞིག་ཡིན་མིན་ལ་མཐའ་དཔྱོད་པའི་དགག་སྒྲུབ་འདི་ནས་རེ་ཞིག་བཞག་སྟེ། བདག་ཅག་བོད་འབངས་ཡོང་ལ་བཀའ་དྲིན་ནམ་ཡང་ཟད་མཐའ་མེད་པའི་སློབ་དཔོན་ཐུགས་རྗེ་ཅན་ཐོན་མིའི་སམ་བྷོ་ཊའི་མཚན་གྱི་རྣམས་གྲངས་ག་ཙམ་ཞིག་ཡོད་ཚུལ་དང་། བློན་ཆེན་མོ་ཐོན་མི་མཆོག་དང་འབྲེལ་ཡོད་གནའ་རྫས་ཤིག་སྙེ་མོར་ཉེ་བའི་ལོའི་ནང་ལ་ཇི་ལྟར་རྙེད་ཚུལ་སྐོར་ལ་ཅུང་ཟད་མཇལ་བར་འགྲོ། དེ་ཡང་། ལྡེའུ་ཆོས་འབྱུང་ལས། རྒྱའི་མཁས་པ་ལི་བྱིན་ལ་བོད་ཀྱི་ཐོན་མི་འབྲོང་སྟོ་རེ་ཨ་ནུས་ཡི་གེ་བསླབས་ནས། ཞེས་སོགས་བྱུང་། དབའ་བཞེད་ལས། རྒྱ་གར་གྱི་ཆོས་དང་ཡི་གེ་དཔེ་ལེན་པར་འཐོན་མི་གསམ་པོ་ར་ལ་བཀའ་བསྩལ་ཏེ་བཏང་ནས། ཞེས་སོགས་བྱུང་།

རྒྱལ་རབས་གསལ་མེ་ལས། ཐོན་མི་སམྦྷོ་ཊ་ཞེས་སོགས་བྱུང་། གུ་གེ་པཎ་ཆེན་གྲགས་པ་རྒྱལ་མཚན་གྱི་ཉི་མའི་རིགས་ཀྱི་རྒྱལ་རབས་ལས། ཐོན་ལུག་ར་ཁའི་མི་ཨ་ནུ་ཞེས་བྱ། ཞེས་སོགས་བྱུང་། དེབ་ཐེར་ཆེན་མོ་མཁས་པའི་དགའ་སྟོན་ལས། ཐོན་གྱི་ལུག་ར་ཁ་ནས་ཐོན་མི་ཨ་ནུ་ར་ག་ཏའི་བུ་ཐོན་མི་སམྦྷོ་ཊ་བྱ་བའི་མི་ཆུང་བློ་གསལ་ཞིག་ལ། ཞེས་སོགས་བྱུང་། སྒྲ་བ་ནམ་བཟང་གི་བསྟན་པའི་སྒྲོན་མེ་ལས། འདིར་ཡང་སཾ་བྷ་དྲའམ་ས་མནྟ་བྷ་དྲ་སྟེ་ཀུན་ཏུ་བཟང་པོ་ནི་སློབ་དཔོན་ཐུ་མིའི་མཚན་ཡིན་པ་ལ་ཁུངས་ཚད་ལྡན་ཡོད། ཞེས་སོགས་བྱུང་། མི་ཏོག་སྙིང་པོའི་སྦྲང་རྩིའི་བཅུད་ལས། དེ་ནས་ཐོན་མི་བསམ་བུ་ཞེས་པ་བློ་གསལ་ལ་ཡིད་གཞུངས་པས་མི་ཆུང་སམ་བྷོ་ཌ་ཞེས་པ། ཞེས་སོགས་བྱུང་བས་ན། ཐོན་མི་འབྲོང་སྟོ་རེ་ཨ་ནུ། འཐོན་མི་གསམ་པོ་ར། ཐོན་མི་སམྦྷོ་ཊ། ཐོན་ལུག་ར་ཁའི་མི་ཨ་ནུ། ཐོན་མི་ཨ་ནུ་ར་ག་ཏའི་བུ་ཐོན་མི་སམྦྷོ་ཊ། སཾ་བྷ་དྲའམ་ས་མནྟ་བྷ་དྲ། ཐོན་མི་བསམ་བུ། ཞེས་པ་དེ་རྣམས་ཡིན་པས་མཚན་གྱི་རྣམ་གྲངས་འགའ་ཤས་བྱུང་བ་དེ་ཙམ་ཞིག་ལས་མ་ངེས་ནའང་དེ་དག་སྙེ་མོ་བ་ཚོས་བློར་གསལ་པོར་ངེས་དགོས་སོ། །

ལྷག་པར་བློན་ཆེན་མོ་ཐོན་མི་མཆོག་དང་འབྲེལ་ཡོད་གནའ་རྫས་ཤིག་སྙེ་མོར་ཉེ་བའི་ལོའི་ནང་ལ་ཇི་ལྟར་རྙེད་པ་རེད་དམ་ཞེ་ན། ལོ་འགའ་ཤས་སྔོན་ལ་བོད་ལྗོངས་ནས་བསྒྲགས་པའི་གསར་འགྱུར་ཞིག་དྲྭ་ཐོག་ཏུ་ཁྱབ་སྤེལ་ཆེན་མོར་ཕྱིན་པ་ལས་འདི་ལྟར་གསལ་ཡོད་དེ། ཉེ་ཆར། སྤྱི་ལོའི་དུས་རབས་༧པའི་ནང་དུ་བོད་ཡིག་གསར་གཏོད་མཛད་མཁན་སློབ་དཔོན་ཐོན་མི་སམ་བྷོོ་ཊའི་བཞུགས་གནས་རྙིང་བ་སྟེ། བོད་རང་སྐྱོང་ལྗོངས་སྙེ་མོ་རྫོང་ཐོན་པ་ཡུལ་ཚོའི་ཐོན་པ་སྡེ་བ་ནས་གསར་རྙེད་བྱུང་། ཟླ་བ་འགའ་ཤས་ཀྱི་ཡར་སྔོན་དུ། ཐོན་པ་སྡེ་པའི་སྡེ་མི་པདྨ་བསམ་འགྲུབ་ཀྱིས་སྡོད་ཁང་གཙང་སྦྲ་བྱེད་སྐབས། དཀྱིལ་དབུས་ཀྱི་ཁང་མིག་དེའི་གྱང་ལྡེབས་ངོས་སུ་སྦྱར་བའི་ཚགས་པར་ཆ་ཚང་བཀོག་པ་མ་ཟད། སྔོན་ཆད་གྱང་ངོས་སུ་བྱུག་པའི་ཚོན་རྩི་དཀར་པོ་དེའང་གཙང་སེལ་བྱས་རྗེས། ཡ་མཚན་པ་ཞིག་ལ་གྱང་ངོས་སུ་ཚོན་མདོག་སྣ་ལྔའི་ལྡེབས་རིས་ཡོད་པ་གསར་རྙེད་བྱུང་།

པདྨ་བསམ་འགྲུབ་ཀྱི་ཡིད་ལའང་ཤར་མེད་པ་ནི། ཁོང་རང་ལོ་སུམ་ཅུ་ལྷག་ཏུ་བསྡད་པའི་ཁང་མིག་དེ་ནི། བོད་ཡིག་གསར་གཏོད་མཁན་སློབ་དཔོན་ཐོན་མི་སམ་བྷོ་ཊའི་བཞུགས་གནས་རྙིང་བ་ཡིན་པ་རེད། གནས་ཚུལ་ཤེས་རྟོགས་བྱུང་རྗེས་ཡུལ་ཚོའི་སྲིད་གཞུང་གིས་དེ་མ་ཐག་ཏུ་ངོ་མཚར་ལྡེབས་རིས་ཀྱིས་ཕྱུག་པའི་ཁང་མིག་དེ་སྲུང་སྐྱོབ་བྱས་པ་རེད། ཚེས་༡༥ཉིན། གསར་འགོད་པ་བོད་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་དབུ་ཁྲིད་དང་ཆེད་མཁས་པ་རྣམས་དང་མཉམ་དུ་ཐོན་པ་སྡེ་བར་སོང་སྟེ། བོད་ཀྱི་ལོ་རྒྱུས་ཐོག་བྱས་རྗེས་བླ་ལྷག་ཆེ་བའི་མི་སྣ་སློབ་དཔོན་ཐོན་མིའི་བཞུགས་གནས་རྙིང་བར་ལྟ་སྐོར་བྱས། གྱང་ངོས་ཀྱི་ལྡེབས་རིས་ཐོག་ཏུ་བྲིས་པའི་སློབ་དཔོན་ཐོན་མིའི་བཞུགས་གནས་རྙིང་བ་དང་ད་ལྟའི་ཞིང་ཁྱིམ་ར་བ་གཉིས་ཀྱི་བཅའ་བཀོད་ཕལ་ཆེར་གཅིག་འདྲ་ཡིན་པ་རེད། ཐོན་པ་སྡེ་བ་ནི་ལྷ་ས་གྲོང་ཁྱེར་དང་བར་ཐག་སྤྱི་ལེ་ ༡༤༠ ལྷག་གི་སར་ཡོད། བོད་ཀྱི་ལོ་རྒྱུས་ཐོག་ཏུ་སྔ་མོ་ནས་ས་གནས་དེ་ནི་ཐོན་མི་སམ་བྷོ་ཊའི་འཁྲུངས་ཡུལ་ཡིན་ཞེས་བཤད་རྒྱུན་བར་མ་ཆད་པ་ཡོད་མོད། ཡིན་ནའང་ཁོང་རང་གི་བཞུགས་གནས་ངོ་མ་འདི་གའི་ས་གནས་གང་དུ་ཡིན་ཚུལ་ད་བར་ཤེས་རྟོགས་ཐུབ་མེད།

༡༩༥༩ ལོར་ཞིང་ཁྱིམ་དབུལ་པོ་གསུམ་ལ་སྲིད་གཞུང་གིས་ལྟ་རྟོགས་བྱས་ཏེ་ཁང་ཁྱིམ་ར་བ་ཆེན་པོ་ཞིག་གི་ནང་དུ་སྡོད་དུ་བཅུག། ར་སྐོར་དེའི་དཀྱིལ་དབུས་ཀྱི་ཁང་མིག་ཆེན་པོ་དེ་ནི་རྗེས་མར་འབྲུ་མཛོད་བྱས་པ་རེད། ཅེས་ལ་སོགས་པ་འཁོད་འདུག་པ་དེ་རེད་དོའོ། །གོང་གླེང་དེ་རྣམས་ཀྱིས་ཕྱིར། འདི་ནས་མདོར་བསྡུས་ཕྱོགས་སྡོམ་ཞིག་བྱས་ཏེ་མཇུག་རྫོགས་པའི་ལས་ལ་བཞུགས་ཚེ། བོད་སྤོས་བཟོ་སྟངས་ཀྱི་ལག་རྩལ་ཐུན་མོང་མ་ཡིན་པ་ཞིག་སྙེ་མོ་ཐོན་པའི་ཁྱིམ་ཚང་རྣམས་ལ་ཡོད། བོད་སྤོས་ནི་བོད་ཡོངས་རྫོགས་དང་ད་ཆ་རྒྱལ་སྤྱི་རྒྱལ་ནང་གང་སར་ཁྱབ་སྤེལ་ཕྱིན་པའི་བོད་རང་གི་ཐོན་རྫས་ཤིག་རེད། དེ་ལྟ་བུའི་ལག་རྩལ་སྤུས་ལེགས་ཤིག་ལོ་ངོ་སྟོང་ཕྲག་སྔོན་ནས་ལུང་པ་ཁུག་ཀྱོག་ཞིག་ལས་རང་བྱུང་ལྷུན་གྲུབ་བམ་རང་འགར་འབྱུང་མི་སྲིད་པས། ཡུལ་དེ་ནས་འཁྲུངས་བའི་བུ་རྒོད་གཅིག་ལ་བོད་བཙན་པོའི་རྒྱབ་སྐྱོར་ཐོབ་ཅིང་དེས་ཐག་རིང་གི་མི་རིགས་གཞན་གྱི་ལེགས་ཆ་བླངས། དེར་རང་གི་བློ་གྲོས་རྩལ་སྟོབས་ལས་བོད་སྤོས་གསར་གཏོད་བྱས་པའི་དངོས་པོའི་དཔང་རྟགས་གསོན་པོ་དེས་ཀྱང་ཐོན་མི་སམ་བྷོ་ཊ་སྙེ་མོ་ཐོན་ལ་འཁྲུངས་ཚུལ་ར་སྤྲོད་ཐུབ་བོ། །

ལྷག་པར་སྙེ་མོ་ཐོན་ལུག་ར་ཁ་ལ་གཟུགས་མེད་གྲིབ་གཟུགས་བྱུང་མི་སྲིད་པ་དང་། ལུང་ཁུག་རྣལ་མའི་མིས་སྒང་པ་བོད་ཆེན་མོར་བཀའ་དྲིན་རྫོགས་མཐའ་བྲལ་བའི་སློབ་དཔོན་ཆེན་མོ་རང་ཡུལ་ལ་འཁྲུངས་ཡོད་ཚུལ་གྱི་རྟོག་བཟོ་རང་བཟོ་བྱེད་མི་ཤེས་ལ། བྱས་པའི་དབང་དུ་བཏང་ཡང་ཐོན་ལུག་ར་སྒང་ལ་ཐོན་མི་འཁྲུངས་ཚུལ་བོད་དུ་ཡོངས་གྲགས་ཡིན་པ་མཁས་པ་ཕལ་མོ་ཆེས་ངོས་འཛིན་གནང་མི་སྲིད་པ་ཞིག་གོ། དེས་ན། དངོས་ཡོད་བདེན་སྟོབས་ནི་སྙེ་མོ་ཐོན་ལུག་ར་ཁ་ནས་བློན་ཆེན་ཐོན་མི་བསམ་པའི་བུ་འཁྲུངས་ཡོད་པས་ན། ད་གཟོད་གཟུགས་ལ་བརྟེན་ནས་གྲིབ་གཟུགས་བྱུང་ཞིང་། ལུང་ཁུག་རྣལ་མའི་མིས་ཐུགས་རྗེ་ཅན་གྱི་སློབ་དཔོན་ཆེན་མོ་རང་ཡུལ་ལ་འཁྲུངས་ཡོད་ཚུལ་བཤད་པ་དེ་རྟོག་བཟོ་མིན་པར་དངོས་བདེན་ལ་ར་སྤྲད་པ་རེད་ལ། བདེན་དོན་དྲང་པོའི་ཤུགས་དེ་ཡིས་ཐོན་ལུག་ར་ཁ་ལ་ཐོན་མི་བསམ་བུ་འཁྲུངས་ཚུལ་གྱི་སྙན་པའི་བ་དན་ཡུག་གཅིག་དེ་ཉིད་ཀྱང་བོད་ཡུལ་ཀུན་ལ་ཡོངས་སུ་གྲགས་པར་གྱུར་བ་ལགས་སོ། །

གཞན་ཡང་། མ་འོངས་པར་བློན་ཆེན་ཐོན་མི་མཆོག་ལྷོ་ག་དང་སྙེ་མོ་གང་ལ་འཁྲུངས་པ་ཡིན་མིན་གྱི་གནད་དོན་ལ། བགྲོ་གླེང་། འགྱུར་བ། བདེན་ཁ་ལ་སོགས་པ་གང་འདྲ་བྱས་ཏེ་ཡོང་གི་རེད་དམ་ཞེ་ན། ད་ནས་བཟུང་ལྷོ་ཁ་བ་ཚོ་དང་སྙེ་མོ་བ་ཚོས་བོད་ཡིག་དང་དེ་འབྲེལ་ཀྱི་ཐད་ལ་མཛད་རྗེས་ཆེ་བ་ཡུན་རིང་བོར་སུས་བཞག་ཚེ། ཐོན་མི་མཆོག་ཀྱང་དེར་འཁྲུངས་པ་ཡིན་པ་དལ་གྱིེས་ར་སྤྲོད་ཐུབ་ཡོང་བ་ཡིན་གཤིས། དེ་བས་ན། སྙེ་མོ་བ་ཚོས་ཕྱི་མཛེས་ནང་སྟོང་གི་ཁང་སྟོང་གསར་སྐྲུན་ཤ་སྟག་ལ་བུང་ཕྲུག་ལབ་དོང་རྙེད་པ་བཞིན་དབུ་འཁོར་ནས་མི་སྡོད་པར་བོད་ཡིག་གི་ཕྱོགས་ལ་སྔོན་མ་ཇི་བཞིན་མཛད་རྗེས་ཞོགས་དགོས་སོ། །མཇུག་ཏུ་ཞུ་རྒྱུར་གོང་བཤད་དེ་རྣམས་ནི་གུས་པ་རང་གིས་མཐོང་ཐོས་བྱུང་བའི་ཐོན་མིའི་ལོ་རྒྱུས་དཔྱད་གཞིའི་རྒྱུ་ཆ་རྣམས་ལ་བརྟེན་ནས་མཐའ་དཔྱོད་བྱས་པ་ཞིག་ཡིན་ལ། ཁོ་བོས་མ་མཐོང་བ་དང་མ་ཐོས་པའི་ཐོན་མིའི་ལོ་རྒྱུས་དཔྱད་གཞི་རྙིང་པ་སོགས་ཀྱང་ཡོད་སྲིད་པས། དེ་འདྲའི་ཁུངས་ལུང་ཡོད་ན་ནི་རྩོམ་ཡིག་འདིར་དགག་སྒྲུབ་གནང་ཤོག་དང་། ཁོ་བོས་ཀྱང་སྒུག་ནས་བསྡད་ཆོག་ཅེས་ཞུའོ།། །།

༢༠༢༣/༨/༢༧ སྙེ་ལྕེ་བཙན་ཕྲུག་གིས་གུས་ཕུལ།

མཆན། གོང་གླེང་གི་དཔྱད་གཞིའི་ཡིག་ཆ་རྣམས་ཀྱི་མིང་དང་། དཔེ་སྐྲུན་ཁང་། ཤོག་ངོས་སོགས་ཀྱི་ཞབས་མཆན་རེ་རེ་བཞིན་འདིར་བཀོད་ཚེ་ཡི་གེ་མང་དྲགས་པས་དེ་དག་བཀོད་མེད་པར་དགོངས་ཡངས་མཛོད་ཅིག །