Tag: features

ས་བཅད་བརྒྱད་པ། མཚོ་ཆེན་རྫོང་། ལེ་ཚན་དང་པོ། རྫོང་གི་མིང་དང་ས་བབ་ཆགས་ཚུལ། དང་པོ། མཚོ་ཆེན་རྫོང་གི་མིང་ཐོགས་ཚུལ།   ད་ལྟའི་མཚོ་ཆེན་རྫོང་ཁུལ་གྱི་ས་སྡེ་ཕལ་མོ་ཆེ་(ད་ལྟའི་མཚོ་ཆེན་རྫོང་ཁོངས་སུ་དེ་སྔའི་འབྲོང་པ་ཚོ་དགུའི་རྐྱང་རང་དང་། བྱང་མ། ཉ་ག  ཉི་གཞུང་།[1] ནག་ཚང་གི་དུད་མ་བཅས་ཚུད་ཡོད།)ནི། དེ་སྔ་ཕྱོགས་བཅུ་ཚོ་པའི་ས་སྡེ་ཡིན། ཕྱོགས་བཅུ་ཞེས་པ་ནི་ཕྱོགས་བཅུ་ནས་བསྡུས་པའི་སྡེ་ཡིན་པས་དེ་ལྟར་བརྗོད་ཅིང་། ཕྱིས་བོད་ཤར་ཕྱོགས་ཁམས་ཁུལ་ནས་སྟོད་གངས་རིན་པོ་ཆེ་ལ་མཆོད་མཇལ་ཡོང་མཁན་མང་དག་ཅིག  རང་ཡུལ་དུ་མ་ལོག་པའམ་ལོག་མ་ཐུབ་པར་དེ་ཁུལ་དུ་གནས་སྡོད་བྱས་པས་ཚོ་པ་གཞི་རྒྱ་ཆེ་རུ་ཕྱིན་པར་གྲགས།[2] མཚོ་ཆེན་ཞེས་པ་ནི་རྫོང་གནས་ཡུལ་གྱི་ཤར་ཕྱོགས་སྤྱི་ལེ་ ༡༠ ལྷག་གི་སར་ཚྭ་ཆུའི་མཚེའུ་ཆེན་པོ་བཀྲ་རི་གནམ་མཚོ་ཆགས་ཡོད་པས། མཚོ་དེའི་མིང་ཡུལ་ལ་ཐོགས་པ་ཞིག་ཡིན།