གཡག་སྟོན་སངས་རྒྱས་དཔལ་གྱི་རྣམ་ཐར་མདོར་བསྡུས།
དཔལ་ས་སྐྱའི་གངས་ཅན་མཛེས་པར་བྱེད་པའི་རྒྱན་དགུའི་བྱེ་བྲག་མདོ་ལ་མཁས་པ་གཡག་རོང་གཞོན་གསུམ་ལས་བྱམས་མགོན་རྣམ་འཕྲུལ་གཡག་ཕྲུག་སངས་རྒྱས་དཔལ་ནི། རོང་སྟོན་ཤེས་བྱ་ཀུན་རིག་གིས་མཛད་པའི་ཀུན་མཁྱེན་གཡག་སྟོན་ཆེན་པོ་སངས་རྒྱས་དཔལ་ལ་རྣམ་ཐར་དང་མཐུན་པའི་བསྟོད་པ་ལས། སྔོན་ཚེ་མ་ག་དྷ་ཡི་གཙུག་ལག་ཏུ། །ལྔ་རིག་པཎ་ཆེན་བཅུ་ཡི་མཆོག་གྱུར་ཅིང་། །ཕྱོགས་བཞིའི་མུ་སྟེགས་སྟོན་པ་ཕམ་མཛད་ནས། །གངས་རིའི་ཁྲོད་འདིར་འཁྲུངས་ལ་ཕྱག་འཚལ་ལོ། །ཞེས་དང་། པཎ་ཆེན་ཤཱཀ་མཆོག་པའི་རྣམ་ཐར་ལས། ཉང་སྟོད་རབ་འབྱམས་པ་ལྷུན་གྲུབ་དཔལ་བཟང་པོའི་དགོངས་ཉམས་ལས། བདག་ཉིད་ཆེན་པོ་འདི་ནི་དབྱིག་གཉེན། ཆོས་གྲགས། རིན་ཆེན་འབྱུང་གནས་ཞི་བ་སྟེ་ཡོངས་སུ་གྲགས་པའི་ཤནྟི་བ་རྣམས་ཀྱི་སྐུའི་སྐྱེ་བར་དགོངས་ཤིང་བཀའ་སྩལ་དུ་བྱོན་པ་ལ་ཡང་ཀླན་ཀའི་གནས་མེད་པའོ། །
