༄༅། །དག་ཡིག་བློ་གསར་གཞོན་ནུ་དགའ་བྱེད་ཅེས་བྱ་བ་བཞུགས་སོ།།
ཅོ་ནེ་གྲགས་པ་བཤད་སྒྲུབ། (༡༦༧༥-༡༧༤༩)
༄༅། །ན་མོ་མཉྫུ་ཤྲཱི་ཡེ། དངོས་གྲུབ་འབྱུང་གནས་རྗེ་བཙུན་འཕགས་མ་སྒྲོལ། །འཆི་མེད་ཚེ་ཡི་དཔལ་སྟེར་རྣམ་པར་རྒྱལ། །ཚིག་གི་མཆོག་སྦྱིན་དབྱངས་ཅན་ལྷ་མོའི་ཞབས། །དུས་གནས་བྱང་ཆུབ་བར་དུ་གཙུག་གིས་བསྟེན། །ཡིག་སྡེབ་རྒྱས་པ་གཞན་དུ་བཤད་ཟིན་ཀྱང༌། །འདིར་ཡང་དོན་གཉེར་ཅན་གྱིས་བསྐུལ་བའི་ངོར། །གསར་བུ་དག་ལ་གོ་སླའི་ཚུལ་གྱིས་དང༌། །ཅུང་ཟད་རྟོགས་དཀའ་ཐོར་བུ་བསྡུས་ཏེ་བཤད། །བ་བཀར་ལོགས་བཀར་ད་དཀར་ཁ་དོག་དཀར། །ར་རྐ་ཆུའི་རྐ་ད་དཀའ་མི་ནུས་དཀའ། །བ་བཀའ་བཀའ་ལུང་རོ་བསྐ་བ་སའི་བསྐ། །བ་བཀལ་ཁལ་བཀལ་ཁྲལ་བཀལ་སྐུད་པ་བཀལ། ། ས་སྐལ་ཐོབ་སྐལ་བསྐལ་པ་བ་སའི་བསྐལ། །ར་རྐན་རྐན་ཕུག་བ་བཀན་གྱེན་དུ་བཀན། །བ་སའི་བསྐོས་ནི་དཔོན་དུ་བསྐོས་པ་སྟེ། །བ་རའི་བརྐོས་ནི་ས་སོགས་བརྐོས་པའི་མིང༌། །ས་སྐུར་སྐུར་འདེབས་ནོར་བསྐུར་བ་སའི་བསྐུར། །བ་སའི་བསྐུས་ནི་ཚོན་སོགས་བསྐུས་པའི་མིང༌། །བ་འོག་ར་བརྐུ་མ་བྱིན་ལེན་པའོ། །ད་དཀྲོལ་རོལ་མོ་བརྡུང་བའི་མིང་ཡིན་ཏེ། །བ་བཀྲོལ་བཅིངས་པ་བཀྲོལ་བའི་མིང་དུ་འདོད། །ས་སྐུག་གབ་པ་ལ་ལྐུག་སྨྲ་མི་ཤེས། །ད་དཀུ་སྟ་ཟུར་ས་སྐུ་བླ་མའི་སྐུ། །ར་རྐུ་རྐུན་པོ་བརྐུས་ཟིན་བ་རའི་བརྐུས། །བ་བཀུམ་བསད་པ་ལག་བསྐུམ་བ་སའི་བསྐུམ། །བ་བཀང་སྣོད་བཀང་ཐུགས་བསྐང་བ་སའི་བསྐང༌། །བ་རའི་བརྐྱངས་ནི་རྐང་པ་སོགས་བརྐྱང་བ། །བ་སའི་བསྐྱངས་ནི་དྲིན་གྱིས་བསྐྱངས་པའོ། །བ་བཀོན་གནོད་ལན་ད་དཀོན་རྙེད་དཀའ་དཀོན། །བ་སའི་བསྐོན་ནི་གོས་སོགས་བསྐོན་པའི་མིང༌། །བ་བཀྲ་མདོག་སོགས་བཀྲ་དང་བཀྲ་ཤིས་ཏེ། །ས་བཏགས་སྐྲ་ནི་མགོ་ཡི་སྐྲ་ཡིན་ནོ། །བ་བཀྲག་འོད་ཆེ་ས་སྐྲག་འཇིགས་པའི་མིང༌། །ད་དཀྱིལ་དབུས་ཡིན་ས་སྐྱིལ་ཆུ་སྐྱིལ་སོགས། །བ་བཀྲེན་ནོར་མེད་ས་སྐྲན་ནད་ཀྱི་མིང༌། །བ་བཀའི་བཀྱོན་ནི་བཀའ་བཀྱོན་གནང་བ་སྟེ། །བ་སའི་བསྐྱོན་ནི་རྟ་ལ་བསྐྱོན་པའོ། །མ་མཁུར་མཁུར་ཚོས་འ་འཁུར་ཁུར་པོ་འཁུར། །ད་དགའ་སེམས་དགའ་ར་རྒ་ན་ཚོད་རྒ། །ས་སྒ་རྟ་སྒ་སྨན་ལྒ་ལ་བཏགས་ལྒ། །ད་དགོ་རི་དྭགས་ས་སྒོ་ཁང་པའི་སྒོ། །བ་བགོ་གོས་གོན་བཀའ་བསྒོ་བ་སའི་བསྒོ། །འ་འགོ་ནད་འགོ་ཐོག་མའི་འགོ་པ་སྟེ། །མ་མགོ་ལུས་ཀྱི་མགོ་སོགས་རྩེ་མོའི་དོན། །བ་བགྲོ་བགྲོ་གླེང་ས་སྒྲོ་བྱ་སོགས་སྒྲོ། །བ་བགོས་བགོས་སྐལ་ས་སྒོས་སྒོས་སུ་བཀར། །བ་འོག་ས་བསྒོས་བག་ཆགས་བསྒོས་པའོ། ། ས་སྒར་དམག་སྒར་ད་དགར་ཟུར་དུ་དགར། །ད་དགང་སྣོད་དགང་བ་འོག་ས་བཏགས་བསྒང༌། །བྱ་བའི་གཞུང་སྟེ་ས་སྒང་མཐོ་བའི་མིང༌། །བ་བགམ་ཚོད་ལེན་ས་སྒམ་ཤིང་སྒམ་ཟབ། །ར་རྒྱུ་རྒྱུ་རྐྱེན་ནང་ཁྲོལ་རྒྱུ་མ་སྟེ། །ས་སྒྱུ་སྒྱུ་མ་མཁན་དང་གཡོ་སྒྱུའི་སྒྱུ། །ར་རྒྱབ་ལུས་རྒྱབ་རྒྱོབ་ཅིག་ཅེས་པ་སྟེ། །བ་རའི་བརྒྱབ་ནི་དབྱུག་པས་བརྒྱབ་ཟིན་མིང༌། །ས་སྒྱུག་སྒྱུག་མོ་ར་རྒྱུགས་མགྱོགས་པར་འགྲོ། །བ་བགག་ལམ་བཀག་མནའ་བསྒག་བ་སའི་བསྒག །ད་དགྲོལ་མདུད་ལྷོད་ས་སྒྲོལ་འཇིགས་ལས་སྒྲོལ། །བ་བགྲེས་རྒས་པ་རིགས་བསྒྲེ་བ་སའི་བསྒྲེས། །ར་རྒོང་ཕྱི་དྲོའམ་ཡང་ན་ད་ཡི་དགོངས། །ཕྱི་དྲོའམ་ཤེས་པའི་ཞེ་སར་འདོད་པ་ཡིན། །མ་མགུལ་མགྲིན་པ་འ་འགུལ་གཡོ་ཞིང་འགུལ། །མ་མངའ་ཡོད་པ་ས་སྔ་དུས་ཀྱི་སྔ། །ལ་ལྔ་གྲངས་དང་ར་རྔ་བརྡུང་བྱའི་རྔ། །ས་སྔོ་ཁ་དོག་ར་རྔོ་ནད་ཡིན་ཏེ། །ད་དངོ་གྲི་སོ་བསྔོ་བྱ་བ་སའི་བསྔོ། །མ་མངར་རོ་མངར་ད་དངར་ཚར་དུ་དངར། །ད་དངུལ་རིན་ཆེན་ར་རྔུལ་ལུས་ཀྱི་ཆུ། །ས་སྔགས་གསང་སྔགས་མ་མངགས་ཕོ་ཉ་བཏང༌། །བ་བཅལ་རིན་བཅལ་གཅལ་བཀྲམ་ག་ཡི་གཅལ། །ག་གཅི་རྟུག་པ་ལ་ལྕི་ལྗིད་ལྕི་བ། །མ་མཆུ་ཁ་མཆུ་འ་འཆུ་ཆུ་སོགས་འཆུ། །མ་མཆོར་མཛེས་པ་འ་འཆོར་བྱ་བ་འཆོར། །ག་གཉེན་ཉེ་དུ་མ་མཉེན་རེག་བྱ་འཇམ། །བ་སའི་བསྙེན་ནི་ཉེ་བའི་དོན་དུ་འདོད། །ག་གཉན་ས་བདག་མ་མཉན་ཉན་བྱའི་སྒྲ། །ས་སྙན་སྙན་པ་གཟུགས་བརྙན་བ་རའི་བརྙན། །ས་སྙམ་ཡིད་བསམ་མ་མཉམ་མཚུངས་པའི་མཉམ། །ས་སྙེད་མང་པོ་ར་རྙེད་གསར་དུ་རྙེད། །མ་མཉེད་ཀོ་བ་ལ་སོགས་མཉེད་པའི་མིང༌། །ས་སྙེས་སྔས་ལ་སྙེས་པའོ་བ་རའི་བརྙེས། །གོ་འཕང་ཐོབ་པ་སོགས་ཀྱི་མིང་ཡིན་ནོ། །ག་གཉུག་དབེན་པ་ས་སྙུག་ཤིང་གི་སྙུག །ར་རྙིང་རྙིང་པ་ས་སྙིང་ནང་ཁྲོལ་སྙིང༌། །ར་རྙི་འཛིན་བྱེད་ས་སྙི་སྲ་མིན་སྙི༑ ༑ས་སྙད་སྙད་འདོགས་བཤད་པ་བ་སའི་བསྙད། །ག་གཏར་ཁྲག་གཏར་བྱི་དོར་བ་སའི་བསྟར། །ག་གཏན་རྒྱུན་དུ་ས་སྟན་གདན་གྱི་མིང༌། །བ་འོག་ས་བསྟན་ཆོས་བསྟན་རྒྱལ་བའི་བསྟན། །བླ་མ་བསྟེན་དང་བ་འོག་ར་བརྟན་ནི། །མི་འགྱུར་བརྟན་པ་ཉིད་དུ་འདོད་པ་ཡིན། །ར་རྟེན་མཆོད་རྟེན་ལ་སོགས་རྟེན་གྱི་མིང༌། །བ་འོག་ར་བརྟེན་དེ་ལ་བརྟེན་པའོ། །ག་གཏོགས་དེར་གཏོགས་བ་བཏོགས་སྤུ་བཏོགས་པ། །ར་རྟོགས་དོན་རྟོགས་ལ་ལྟོགས་བཀྲེས་པའི་མིང༌། །ཡང་ན་ར་རྟོག་རྣམ་རྟོག་རྟོག་པའོ། །ག་གཏམ་ཚིག་ཡིན་ཡང་ན་གང་བའི་གཏམས། །བ་ལའི་བལྟམས་ནི་སྐུ་གཟུགས་བལྟམས་པར་འདོད། །ར་རྟག་མི་འཇིག་ས་སྟག་གཅན་གཟན་ཏེ། །བ་བཏགས་ཐགས་བཏགས་བརྟག་དཔྱད་བ་རའི་བརྟག །ལ་ལྟག་གཉའ་ལྟག་ར་རྟོད་ཕུར་བུ་རྟོད། །ས་སྟོད་ལུས་སྟོད་བསྟོད་བསྔགས་བ་སའི་བསྟོད། །བ་བཏོད་སྲོལ་བཏོད་ག་གཏོད་དམིགས་པ་གཏོད། །གོ་གཏུན་གཏུན་བུ་ཐུགས་བསྟུན་བ་སའི་བསྟུན། །ག་གཏེར་མཛོད་ཡིན་ས་སྟེར་གཞན་ལ་སྟེར། །བ་བཏུད་ཞབས་བཏུད་ག་གཏུབས་དུམ་བུར་གཏུབས། །ས་སྟེའུ་མཚོན་ཆ་ར་རྟེའུ་རྟ་ཡི་བུ། །ར་རྟ་དུད་འགྲོ་ལྟ་བྱེད་ལ་ལྟའོ། །མིག་གིས་བལྟས་པ་གཞན་ལ་རག་ལས་བལྟོས། །བས་འཕུལ་ཡིན་ཏེ་ལྟོས་ཤིག་བས་འཕུལ་མེད། །ག་གཏོས་ཁྱོན་ཡིན་རྒྱས་པ་བ་རའི་བརྟས། །ལ་ལྟས་སྔ་རྟགས་སྟེས་དབང་ས་སྟེས་ཡིན། །གཏོལ་མེད་ག་གཏོལ་རྣག་བརྟོལ་བ་རའི་བརྟོལ། །ར་རྟིང་རྟིང་པ་ག་གཏིང་ཆུ་ཡི་གཏིང༌། །བ་བཏགས་ཕྱེ་བཏགས་མིང་བཏགས་སྒྲོ་བཏགས་སོ། །ར་རྟགས་མཚོན་བྱེད་སྒྲུབ་བྱེད་རྟགས་ཀྱང་ཡིན། །ག་གཏོང་སྦྱིན་གཏོང་ས་སྟོང་གྲངས་ཀྱི་མིང༌། །ལ་ལྟོང་མདའི་ལྟོང་བ་བཏུལ་དགྲ་སོགས་བཏུལ། །ག་གཏུལ་སྤོས་གཏུལ་དུད་པ་གཏུལ་བའོ། །ར་རྟབ་ཙབ་ཙབ་བྱིན་པ་བ་སའི་བལྟབས། ། ས་སྟོབས་མཐུ་ཡིན་བ་བཏབ་ས་བོན་བཏབ། །བ་ལའི་བལྟབ་ནི་གོས་སོགས་བལྟབ་པའོ། །ཏོག་རྐྱང་རྩེ་མོ་ག་གཏོག་སེ་གོལ་གཏོག །མ་མཐུ་ནུས་པ་འ་འཐུ་མེ་ཏོག་འཐུ། །འ་འཐུར་འཐུར་དུ་མ་མཐུར་མཐུར་མདའི་མིང༌། །ག་གདའ་ཡོད་པ་བ་བདའ་ཁ་ཟས་ཞིམ། །བ་འོག་ར་བརྡ་ལག་པའི་བརྡ་སོགས་བྱེད། །བ་བདུག་སྤོས་ཡིན་ས་སྡུག་ཡིད་དུ་འོང༌། །ག་གདུག་གནོད་བྱེད་འབུབས་པའི་གདུགས་ཀྱང་ཡིན། །ར་རྡུག་ཐབས་རྡུག་སྡུག་བསྔལ་ས་སྡུག་ཡིན། །ག་གདབ་གསོལ་གདབ་ས་བོན་གདབ་པ་སྟེ། །བ་རའི་བརྡབ་ནི་ས་ལ་བརྡབས་པའོ། །ར་རྡེག་བ་འོག་བརྡེག་ནི་རིམ་བཞིན་དུ། །རྡེག་པར་བྱེད་དང་བརྡེག་པར་བྱས་པའོ། །བ་བཏེགས་གྱེན་བཏེག་ས་སྟེགས་སྟེགས་བུའི་སྟེགས། །ག་གདུང་གདུང་མ་ར་རྡུང་རྔ་སོགས་རྡུང༌། །བ་བདུང་གཞུ་བདུང་ས་སྡོད་མི་འགུལ་སྡོད། །བ་བདེ་བདེ་ལེགས་ས་སྡེ་སྡེ་པའོ། །ར་རྡོ་རྡོ་ཉིད་ས་སྡོ་དོ་སྡོ་བ། །བ་བདོ་རྒྱས་པའམ་དར་བའི་མིང་དུ་འདོད། །ར་རྡུལ་རྡུལ་ཕྲན་ག་གདུལ་གདུལ་བྱའི་མིང༌། །འ་འདུད་གུས་པ་མ་མདུད་མདུད་པའོ། །འ་འདུན་བསམ་པ་མ་མདུན་ལུས་ཀྱི་མདུན། །འ་འདོན་ཆོས་འདོན་ཕྱི་རུ་འདོན་པ་སྟེ། །ག་གདོན་གནོད་བྱེད་ལ་ལྡོན་ལན་སྨྲ་བ། །འ་འདབ་ཉེ་འདབས་ལོ་འདབ་པད་འདབ་སོགས། །ལ་ལྡབ་བསྐྱར་ལྡབ་ར་རྡོབ་ཕེག་རྡོབ་ཡིན། །མ་མདོངས་བྱ་སྒྲོ་ལ་ལྡོངས་ལོང་བ་སྟེ། །འ་འདོང་འགྲོ་བ་འ་འདུར་འདུར་རྒྱུག་བྱེད། །ལ་ཡི་ལྡུར་ནི་ལྡུར་ལྡུར་བྱེད་པའོ། །ག་གདན་སྟན་ཡིན་ལ་ལྡན་ཡོད་པའི་མིང༌། །ས་སྣོད་སྣོད་སྤྱད་ག་གནོད་མི་ཕན་གནོད། །ག་གནག་མདོག་གནག་ར་རྣག་ཁྲག་རུལ་མིང༌། །བ་རའི་བརྣག་ནི་སེམས་ལ་བསམས་པའི་དོན། །ག་གནང་བྱིན་པ་ས་སྣང་བློ་ལ་སྣང༌། །མ་མནན་འོག་མནན་མང་བཏང་བ་སའི་བསྣན། །བ་རའི་བརྣན་ནི་ངེས་བཟུང་ནན་ཏན་མིང༌། །ས་སྣ་དྲི་འཛིན་ར་རྣ་སྒྲ་འཛིན་ཏེ། །ག་གནའ་ཐོག་མ་མནའ་བྱས་མ་ཡི་མནའ། །མ་མནོ་ཡིད་སེམས་ར་རྣོ་རྩེ་མོ་རྣོ། །ག་གནད་གནད་དོན་ལུས་བསྣད་བ་སའི་བསྣད། །མ་མནབས་གོས་གྱོན་ཁ་ཅིག་བ་བནབས་ཟེར། །ས་སྣབས་སྣ་ཡི་སྣབས་དང་ངར་སྣབས་སོ། །ར་རྣམས་མང་པོ་ག་གནམ་ནམ་མཁའི་མིང༌། །བ་འོག་ས་བསྣམས་ཕྱག་ཏུ་བསྣམས་པའོ། །ག་གནངས་སང་ཡིན་གནང་སྦྱིན་ཉིད་ཀྱང་སྟེ། །བ་རའི་བརྣངས་ནི་ཟས་ཀྱིས་བརྣངས་པའོ། །མ་མནར་སྡུག་བསྔལ་ཐག་སྣར་བ་སའི་བསྣར། །ད་དཔའ་དཔའ་བོ་ས་སྤ་མཛེས་པའི་མིང༌། །པད་རྐྱང་པད་པ་རི་སྤང་ས་ཡི་སྤང༌། །ད་དཔང་དཔང་པོ་པར་རྐྱང་སྐུ་གཟུགས་པར། །ས་བཏགས་སྤར་ནི་གནས་སྤར་གོང་དུ་སྤར། །ད་དཔངས་གྱེན་དཔངས་ས་སྤངས་དོར་བའི་མིང༌། །ར་སྦ་ཆུ་འཁྲུགས་ས་སྦ་མི་མངོན་སྦ། །ལ་ལྦ་མགུལ་ལྦ་འབུབས་སྦྲ་ས་བཏགས་སྦྲ། །འ་འབྱེད་སྒོ་འབྱེད་ག་འགྱེད་ཁྲལ་སོགས་འགྱེད། །ད་དམིག་བུ་ག་ར་རྨིག་དུད་འགྲོའི་ལྷམ། །ད་དམོད་དམོད་པ་ས་སྨོད་སྐྱོན་ནས་སྨོད། །ར་རྨ་ལུས་རྨ་ད་དམའ་ས་ཕྱོགས་དམའ། །ད་དམིགས་ཡོད་པ་ར་རྨི་རྨི་ལམ་རྨི། །ད་དམར་ཁ་དོག་ས་སྨར་མང་བའི་དོན། །ས་སྨག་མུན་པ་ད་དམག་གཡུལ་གྱི་མིང༌། །ར་རྨོས་ཞིང་རྨོ་ས་སྨོན་སྨོན་ལམ་འདེབས། །ས་སྨན་འཚོ་བྱེད་ད་དམན་ངན་པའོ། །ས་སྨེ་མི་གཙང་ད་དམེ་དམེ་པོ་སྟེ། ། ར་རྨེད་སྒ་རྨེད་ས་སྨེད་དྲི་བ་དྲིས། །ར་རྩེ་རྩེ་མོ་ག་གཙེ་གནོད་པ་བྱེད། །བ་རའི་བརྩེ་ནི་སྙིང་རྗེས་བརྩེ་བའོ། །ག་གཙིགས་མཆེ་གཙིགས་བ་འོག་ར་བརྩིགས་ནི། །རྩིག་པ་ལ་སོགས་བརྩིགས་པའི་མིང་དུ་འདོད། །ག་གཙག་གཙག་བུ་བ་བཙགས་ཚགས་ཀྱིས་བཙགས། །བ་བཙོན་བཙོན་ཁང་བརྩོན་འགྲུས་བ་རའི་བརྩོན། །ར་རྩལ་སྟོབས་རྩལ་བ་བཙལ་ནོར་སོགས་བཙལ། །ར་རྩྭ་རྩྭ་སྔོན་བ་བཙའ་ལྕགས་ཀྱི་བཙའ། །ར་རྩང་ས་བདག་ག་གཙང་དྲི་མ་བྲལ། །ཙོང་ཙོང་དབྱིབས་ཏེ་བ་བཙོང་སྒོག་པའི་ཕྱོགས། །ར་རྩུབ་རེག་བྱ་ག་གཙུབ་གཙུབ་ཤིང་མིང༌། །བ་བཙམས་གནོད་བྱས་བརྩམ་བྱ་བ་རའི་བརྩམ། །ར་རྩི་རྩི་ཐོག་བ་བརྩི་བརྩི་བར་བྱ། །བ་བཙོད་ཚོས་ཡིན་ར་རྩོད་རྒོལ་བར་བྱེད། །ག་གཙོ་གཙོ་བོ་བ་བཙོ་གསེར་བཙོ་མ། །མ་མཚོ་རྒྱ་མཚོ་འ་འཚོ་སྲོག་འཚོ་བ། །མ་མཚར་མཛེས་པ་འ་འཚར་བྱ་བ་འཚར། །མ་མཚལ་ཚོན་ཡིན་འ་འཚལ་ཤེས་པའོ། །འ་འཚེར་འོད་འཚེར་མ་མཚེར་ལས་ལ་མཚེར། །འ་འཛའ་ཆུད་འཛའ་མ་མཛའ་མཛའ་མཐུན་མིང༌། །འ་འཛད་ནོར་འཛད་མ་མཛད་མཛད་པ་མཛད། །འ་འཛད་ཟད་པ་མ་མཛངས་ཡ་རབས་མཛེས། །ག་གཞེས་བཞུགས་པ་བ་བཞེས་ཇ་སོགས་བཞེས། །ག་གཞོན་ན་ཚོད་བ་བཞོན་བཞོན་པའི་རྟ། །ག་གཞོག་སྦོ་གཞོག་བ་བཞོག་ཤིང་ལས་བཞོག །ག་གཞའ་གཞའ་ཚོན་བ་བཞའ་རློན་གྱི་བཞའ། །ག་གཞི་གཞི་མ་བ་བཞི་གྲངས་ཀྱི་མིང༌། །ག་གཞུ་གཞུ་ཡིན་བ་བཞུ་མར་བཞུ་བ། །ག་གཞག་མཉམ་གཞག་བ་བཞག་ས་ལ་བཞག །ག་གཞིབས་བསྒྲིགས་པ་བ་བཞིབས་འཇིབས་པའི་མིང༌། ། ག་གཟའ་གཟའ་སྐར་བ་བཟའ་ཟས་བཟའ་བ། །བ་བཟས་ཟོས་ཟིན་ག་གཟས་མདའ་སོགས་གཟས། །ག་གཟུང་གཟུང་བྱ་བ་བཟུང་བཟུང་ཟིན་མིང༌། །ག་གཟི་ནོར་བུ་བ་བཟི་ཆང་གིས་བཟི། །ག་གཟོ་དྲིན་གཟོ་བ་བཟོ་གོས་སོགས་བཟོ། །ག་གཟོད་དང་པོ་བ་བཟོད་བཟོད་པའི་མིང༌། །ར་རྐྱང་དུད་འགྲོ་རྭ་ནི་མགོ་ཡི་རྭ༑ ༑ག་གཤོག་འདབ་གཤོག་འདིར་ཤོག་ཤ་རྐྱང་ཤོག །ག་གཤགས་ཤིང་གཤགས་བ་བཤགས་སྡིག་པ་བཤགས། །ག་གཤོལ་ཐོང་གཤོལ་བ་བཤོལ་བྱ་བ་བཤོལ། །བ་བཤར་བྲེ་དང་འཕྲང་ལ་བཤར་བའི་མིང༌། ། ཤིག་རྐྱང་ལུས་ཤིག་བཤིག་པ་བ་བཤིག་གོ། །བ་བཤོས་ཟས་མིང་ག་གཤོས་ཆུ་གཤོས་པ། །ག་གཤིས་གཤིས་ལུགས་གནས་ཚུལ་སྡོད་ལུགས་ཡིན། །ཤུལ་ནི་རྗེས་ཤུལ་བ་བཤུལ་ལམ་གྱི་མིང༌། །སད་ནི་གཉིད་སད་བ་བསད་སྲོག་དང་བྲལ། །སོག་ནི་སོག་པ་ག་གསོག་རྫུན་གྱི་གསོག །སང་ནི་ཐོ་རེངས་སངས་པ་སྒྲིབ་སོགས་སངས། །ག་གསང་སྦས་པ་བ་བསངས་ལྷ་ཡི་བསངས། །སེར་རྐྱང་ཁ་དོག་ག་གསེར་རིན་པོ་ཆེ༑ ༑ག་གསིལ་དུམ་བུར་བ་བསིལ་གྲང་ནས་བསིལ། །སོང་ནི་ཕར་སོང་ག་གསོང་སྦེད་པའི་མིང༌། །ག་གསལ་འོད་གསལ་བ་བསལ་སྐྱོན་སོགས་བསལ། །ག་གསུང་དམ་ཆོས་བ་བསུང་དྲི་ཡི་མིང༌། །བ་བླ་གོང་དང་ཚེ་བླ་རུང་ཆོག་སོགས། །ས་སླ་ལས་སླ་གར་བ་མིན་པའི་སླ། །ག་གླ་རི་དྭགས་རྔན་པའི་གླ་རྣམས་ཡིན། །བ་འོག་ར་བརླ་བརླ་ཤ་ཡ་མ་བརླ། །ཀ་ཀླུ་ཀླུ་ཡིན་ག་གླུ་སྐད་ཀྱི་གླུ། །བ་བླུ་རིན་བྱིན་ས་སླུ་གཞན་གྱིས་སླུ། །བ་སའི་བསླུས་ནི་བསླུས་ཟིན་ཞེས་པའི་ཚིག །ཀ་ཀླུང་མཚོ་སོགས་ར་རླུང་གཡོ་བའི་རླུང༌། །ར་རླངས་དྲོད་རླངས་བ་བླངས་ཁས་བླངས་སོགས། །བ་འོག་བསླངས་པ་གྱེན་བསླངས་སློང་མོ་བསླངས། ། ཀ་ཀློང་དབུས་ཡིན་བ་བློང་ཡིད་བློང་བློང༌། །ས་སློང་ནོར་སློང་སྐྱོན་བརློང་བ་རའི་བརློང༌། །ག་གླང་དུད་འགྲོ་ཚིག་རྩུབ་བ་རའི་བརླང༌། །ཀ་ཀློག་ཆོས་འདོན་ག་གློག་ནམ་མཁའི་གློག །ཟ་ཟློག་ཕྱིར་ཟློག་ས་སློག་ཕྱི་ནང་སློག །པགས་པའི་གོས་ཏེ་ར་རློག་མེད་པར་བྱེད། །ཀ་ཀླད་ཀླད་པ་བ་བླད་སོ་ཡིས་བླད། །ས་སླད་རྗེས་མ་སྐྱོན་བསླད་བ་སའི་བསླད། །བ་བློ་ཤེས་པ་ག་གློ་གློ་བ་དང༌། །སྒ་ཡི་གློ་དང་ལུས་ཀྱི་གཡས་གཡོན་སོགས། །བ་བླུད་ཇ་བླུད་ག་གླུད་འདྲེ་ལ་གཏོང༌། །ག་གླན་ལྷན་པ་གླན་དང་ར་རླན་རློན། །བ་འོག་ས་བསླན་ཕྱོགས་སུ་གཏོགས་པའི་བསླན། །བ་འོག་ར་བརླན་རླན་གྱེས་བརླན་པར་བྱས། །ས་སླེབ་གནས་ཕྱིན་ག་གླེབས་ལེབ་མོ་གླེབས། །ར་རླབས་ཆུ་རླབས་བྱིན་རླབས་བྱིན་རློབས་ཤིག །བ་རའི་བརླབས་ནི་བྱིན་གྱིས་བརླབས་པར་བྱས། །བ་སའི་བསླབ་ནི་བསླབ་བྱ་བསླབས་ཟིན་སོགས། །ག་གླིང་གླིང་བཞི་བརྟན་བརླིང་བ་རའི་བརླིང༌། །ག་གླག་བྱ་གླག་བ་བླགས་རྣ་བ་གཏོད། །བ་འོག་ཀ་བཀླག་དམ་ཆོས་བཀླག་པའི་མིང༌། །བ་འོག་ར་བརླག་ཐལ་བར་བརླག་པའོ། །ར་རླུབས་ཁུང་བུ་ཀ་ཀླུབས་གོས་བཟང་གྱོན། །ཟ་ལ་ལ་བཏགས་ཟླ་གྲོགས་ནམ་མཁའི་ཟླ། །མ་མདའ་སྒྲོ་ལྡན་འ་འདའ་མྱ་ངན་འདའ། །ཟ་ཟློས་བསྐྱར་བ་མ་མདོས་བོན་གྱི་མདོས། །བ་བཀྲི་ཁྲིད་པ་ཞོ་སྤྲི་ས་པའི་སྤྲི། །སྐྲོད་ནི་ཕྱིར་འདེད་སྤྲོད་ནི་འཐབ་མོ་སྤྲོད། ། བ་སའི་བསྐྲད་ནི་གནས་ནས་ཕྱུང་བའོ། །ད་ཀའི་དཀྲུགས་ནི་ཆུ་སོགས་དཀྲུགས་པ་སྟེ། །ས་པའི་སྤྲུག་ནི་གོས་སོགས་སྤྲུག་པའོ། །བ་ཀའི་བཀྲལ་ནི་སོ་སོར་བཀྲལ་བ་སྟེ། །དས་འཕུལ་དཔྲལ་ནི་ཐོད་ཀྱི་དཔྲལ་བའོ། །ཁ་ཁྲག་ཁོང་ཁྲག་ཁྲག་ཁྲིག་ལ་སོགས་ཏེ། །ཕ་ཕྲག་བཅུ་ཕྲག་བརྒྱ་ཕྲག་སྟོང་ཕྲག་སོགས། །ཁ་འཁྲུལ་ཕྱིན་ལོག་ཕ་འཕྲུལ་རྣམ་པར་འཕྲུལ། །ཁ་ཁྲ་བྱ་ཡིན་ཕ་ཕྲ་རྟོགས་པར་དཀའ། །ཁ་ཁྲུ་ལག་ཁྲུ་ཕ་ཕྲུ་རྫ་ཡི་ཕྲུ། །ཁ་ཁྲལ་དཔོན་ཁྲལ་ཕ་ཕྲལ་སོ་སོར་ཕྲལ། །ག་གྲོ་འབྲུ་ཡིན་ད་དྲོ་དྲོད་ཀྱི་མིང༌། །བ་བྲོ་མནའ་དང་གར་གྱི་བྱེ་བྲག་མིང༌། །ག་གྲང་བསིལ་བ་ད་དྲང་དྲང་པོའི་དྲང༌། །བ་བྲང་ལུས་མདུན་ད་དྲངས་ཟས་དྲངས་ཟིན། །ག་གྲངས་ད་དྲངས་ས་མཐའ་ཅན་དག་ནི། །གཅིག་སོགས་གྲངས་དང་གྱེན་ནམ་ཡར་དྲངས་ཟིན། །ད་དྲག་དྲག་པོ་བ་བྲག་རི་ཡི་བྲག །ག་གྲགས་སྒྲ་གྲགས་ད་དྲགས་བྱ་བ་ཐལ། །བ་བྲེགས་བཅད་པ་ད་དྲེགས་ཁེངས་པའི་མིང༌། །ད་དྲིལ་གཅིག་དྲིལ་ག་གྲིལ་གོས་ཀྱིས་གྲིལ། །ད་དྲོས་མེས་དྲོས་བ་བྲོས་གཞན་དུ་བྲོས། །ག་གྲོངས་ཤི་བ་ད་དྲོངས་གྱེན་དུ་དྲོངས། །ག་གྲོད་གྲོད་པ་ད་དྲོད་འོད་ཀྱི་དྲོད། ། བ་བྲོད་བྱ་བའི་ལས་ལ་སྤྲོ་བའོ། །ག་གྲུབ་དོན་གྲུབ་ད་དྲུབ་གོས་དྲུབ་པ། །ག་གྲི་མཚོན་ཆ་ད་དྲི་སྣ་ཡི་ཡུལ། །བ་བྲི་ཁ་བྲི་ཡི་གེ་བྲི་བའི་མིང༌། །དོང་བྲུས་བ་བྲུས་བཞོན་དྲུས་ད་ཡི་དྲུས། །ག་གྲོགས་གྲོགས་མཆེད་ངམ་གྲོག་ས་མཐའ་མེད། །ག་འགྲུབ་དོན་འགྲུབ་ད་འདྲུབ་ཆོས་གོས་འདྲུབ། །བ་བྲུབ་ཆུ་འཁྲུགས་དོང་དུ་སྦས་པའང་ཡིན། །ག་འགྲེ་རིགས་འགྲེ་ད་འདྲེ་གནོད་པའི་འདྲེ། །ད་དྲེད་དུད་འགྲོ་བ་བྲེད་འཇིགས་པའི་མིང༌། །ག་འགྲངས་ལྟོ་འགྲངས་བ་འབྲངས་རྗེས་སུ་འབྲངས། །ག་འགྲུལ་མགྲོན་པོ་ད་འདྲུལ་རུལ་བའི་མིང༌། །ད་འདྲི་གཏམ་འདྲི་བ་འབྲི་ཡི་གེ་འབྲི། །ད་དྲིས་གཏམ་དྲིས་བ་བྲིས་ཡི་གེ་བྲིས།། ག་འགྲེལ་དོན་འགྲེལ་བ་འབྲེལ་རག་ལས་འབྲེལ། །བ་འབྲོས་འཇིགས་འབྲོས་ག་འགྲོས་རྟ་ཡི་འགྲོས། ། བ་འབྲས་འབྲུ་ཡིན་ག་འགྲས་ཞེ་འགྲས་པ། །ག་འགྲིལ་འཐུར་འགྲིལ་ད་འདྲིལ་གཅིག་ཏུ་འདྲིལ། །ད་དགྲ་གནོད་བྱེད་ས་སྒྲ་མཉན་བྱའི་སྒྲ། །ས་བཏགས་ག་སྒྲོན་སྒྲོན་མེའམ་སྟེང་དུ་སྒྲོན། །ས་བཏགས་བ་སྦྲོན་ར་མདའ་བྱེད་པར་སྦྲོན། །ག་སྒྲིབ་སྒྲིབ་པ་བ་སྦྲིད་ལུས་སྦྲིད་པ། །བ་སའི་བསྒྲགས་ནི་སྒྲ་བསྒྲགས་བྱས་པའི་མིང༌། །ས་བཏགས་བ་སྦྲགས་ཉིས་སྦྲགས་སུམ་སྦྲགས་སོགས། །ག་གཅུགས་མཛའ་བ་བ་བཅུག་ནང་དུ་བཅུག །ག་གཅོད་ཤིང་གཅོད་སྒྲོ་འདོགས་ལ་སོགས་གཅོད། །ད་འོག་པ་དཔྱོད་གང་ཡིན་དཔྱོད་པ་སྟེ། །ས་བཏགས་སྤྱོད་པ་བྱ་བ་སྤྱོད་པའོ། །བ་བཅད་ཤིང་བཅད་ད་དཔྱད་རྟོགས་པའི་དོན། །ས་བཏགས་སྤྱད་པ་བྱ་བ་བྱས་པའི་མིང༌། །ག་གཅིན་བཤང་བ་འབྱར་བྱེད་ས་བཏགས་སྤྱིན། །ཆན་ནི་འབྲས་ཆན་མ་མཆན་ཡི་གེའི་མཆན། །འ་འཆི་སྲོག་འགག་མ་མཆི་འགྲོ་བའི་མིང༌། །ཉ་ཉོས་ནོར་ཉོས་མ་མྱོས་ཆང་གིས་མྱོས། །ག་ཡི་གཡར་ནི་གཡར་པོ་བྱས་པ་སྟེ། །ད་འོག་དབྱར་ནི་དུས་ཀྱི་དབྱར་ཡིན་ནོ། །ག་གཡང་འབོད་པ་དཔལ་གྱི་གཡང་ཡིན་ཏེ། །ད་དབྱངས་ཡན་ལག་དྲུག་ཅུ་གསུང་གི་དབྱངས། །དེས་མཚོན་གཞན་དག་དཔྱད་དེ་ཤེས་པར་བྱ།། །།ཞེས་དག་ཡིག་བློ་གསར་གཞོན་ནུ་དགའ་བྱེད་ཅེས་བྱ་བ་འདི་ནི་དོན་གཉེར་ཅན་འགའ་ཞིག་གིས་བསྐུལ་བའི་ངོར་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་སྦྱར་བའི་ཡི་གེ་པ་ནི་ཀུན་དགའ་ནོར་བུའོ། ། བཀྲ་ཤིས།
མཆན། དག་ཡིག་འདི་ནི་སེར་སྨད་དཔེ་མཛོད་ཀྱིས་ཤིང་པར་དཔེ་གཟུགས་ལྟར་ཡོད་པ་གཞིར་བཞག་སྟེ་བསྒྲིགས་པ་ཡིན།
རྩོམ་པ་པོའི་ལོ་རྒྱུས་མདོར་བསྡུས།
༄༅། །ཅོ་ནེ་གྲགས་པ་བཤད་སྒྲུབ་ནི། མདོ་སྨད་ཅོ་ནེ་དཔོན་གྱི་མངའ་འོག་ཐུའུ་ཇུའི་ཡུལ་གྱི་བྱེ་བྲག་གཡོ་སའམ་རབ་སོ་ཞེས་པར་ཡབ་གཟུངས་འབུམ་སྐྱབས་དང་ཡུམ་སྐལ་བཟང་སྨན་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ཤིང་ཡོས་ཕྱི་ལོ་༡༦༧༥ ལོར་འཁྲུངས། དགུང་ལོ་བདུན་པ་ནས་ཡབ་ཀྱི་རྗེས་སུ་འབྲངས་ཏེ་ཡི་གེའི་འབྲི་ཀློག་དང་འདོན་ཆ་ལ་སྦྱངས། དགུང་ལོ་དགུ་པར་ཅོ་ནེ་དགོན་ཆེན་ཏིང་འཛིན་དར་རྒྱས་གླིང་དུ་ཁྲི་ཆེན་དགེ་འདུན་གྲགས་པའི་དྲུང་ནས་རབ་ཏུ་བྱུང༌། དེ་ནས་ལོ་འགའི་རིང་ཆོས་སྤྱོད་སོགས་བློ་འཛིན་མཛད། སྨན་པ་སྟག་རིས་དགེ་སློང་གི་དྲུང་ནས་སྨན་དཔེ་གསན་སྦྱོང་གིས་ནད་བཅོས་ཀྱི་བྱ་བ་ཅུང་ཟད་སྒྲུབ། དགུང་ལོ་ཉེར་གཅིག་ལ་དབུས་ཕྱོགས་སུ་ཕེབས། དགུང་ལོ་ཉེར་གཉིས་ལོར་སེ་ར་སྨད་ཐོས་བསམ་གླིང་གྲྭ་ཚང་དུ་ཆོས་ཞུགས་མཛད། རྗེ་བཀྲ་ཤིས་དཔལ་བཟང་དགེ་རྒན་དུ་བསྟེན་ནས་གཞུང་ཆེན་བཀའ་པོད་ལྔར་གསན་བསམ་གནང༌།
དགུང་ལོ་སོ་གཅིག་ལ་ལྷ་ལྡན་སྨོན་ལམ་ཆེན་མོར་གྲྭ་སྐོར་གྱིས་མིང་བཏགས་བཞེས་རྩིས་ཀྱང་དབུས་སུ་དུས་འཁྲུག་བྱུང་བས་སྡེ་སྲིད་སྐུ་གཤེགས། ལོ་དེའི་ཟླ་བ་བརྒྱད་པར་གྲུབ་མཐའ་རིས་མེད་ཀྱི་འདུས་སྡེ་ཉིས་ཁྲི་ལྷག་ཙམ་འཚོགས་ཏེ་སྨོན་ལམ་འཕར་མའི་སར་སློབ་དཔོན་ཚུལ་ཁྲིམས་རིན་ཆེན་གྱི་བཀའ་བཞིན་མཚན་བཏགས་བཞེས། རྗེ་ཉིད་གཙང་བཀྲ་ཤིས་ལྷུན་པོར་ཕེབས་ནས་པཎ་ཆེན་བློ་བཟང་ཡེ་ཤེས་ཀྱི་དྲུང་དུ་བསྙེན་རྫོགས་ཀྱི་སྡོམ་པ་བཞེས། དབུས་སུ་ཕེབས་ནས་དགའ་ལྡན་དང་འབྲས་སྤུངས་བཅས་སུ་དམ་བཅའ་བཞག་པས་ཚང་མ་ངོ་མཚར་བ་བྱུང་ཞིང༌། དགུང་ལོ་སོ་གཉིས་ལ་ཕེབས་སྐབས་མདོ་སྨད་ཅོ་ནེ་དགོན་དུ་ཕྱིར་ཕེབས། སྐབས་དེར་ཅོ་ནེ་བསྟན་པའི་མངའ་བདག་གོ་ཤྲི་ནང་སོ་ཡིས་དེ་ཉིད་ཕོ་བྲང་དུ་གོང་མ་མཇལ་བའི་སྐབས་ཀྱི་བཀའ་མངགས་ལྟར་ནང་སོས་ཤིང་རྟ་ལོར་དགོན་པ་དེར་མཚན་ཉིད་གྲྭ་ཚང་ཞིག་གསར་དུ་བཙུགས།
རྗེ་ཉིད་དགུང་ལོ་བཞི་བཅུ་ལ་ཕེབས་སྐབས་དགོན་དེའི་བླ་མ་མཛད། དགུང་ལོ་ཞེ་དྲུག་ལོར་གྲྭ་ཚང་བླ་མ་དགོངས་ཞུ་གནང་ནས་ལོ་བདུན་ཙམ་རིང་ལམ་གཙོ་གསུམ་སོགས་བསྟན་བཅོས་མང་དག་བཀའ་རྩོམ་མཛད། རྗེ་འདི་ཉིད་ཀྱིས་མདོ་སྔགས་ཆོས་རྒྱུད་ཀྱི་བླ་རབས་དང༌། སྔགས་རིམ་གྱི་སྙིང་པོ་བསྡུས་པ། གསང་བདེ་འཇིགས་གསུམ་གྱི་བླ་མའི་རྣལ་འབྱོར། ཀུན་རིག་ཕྱོགས་བསྒྲིགས་མ། སྣོད་བཅུད་ཀྱི་རྣམ་གཞག བྱང་ཆུབ་ལམ་རིམ་གྱི་དམར་ཁྲིད་ཅུང་ཟད་རྒྱས་པ། གྲུབ་མཐའ་བཞིའི་ལུགས་ཀྱི་ལྟ་བའི་རྣམ་གཞག དེའི་ཊཱིཀྐ་ཡོངས་རྫོགས་ཏེ་གསང་བ་འདུས་པའི་བདག་བསྐྱེད་བསྒྲིགས་མ། བདེ་མཆོག་རྩ་རྒྱུད་ཀྱི་ཊཱིཀྐ། ཆོས་མངོན་པ་མཛོད་ཀྱི་ཊཱིཀྐ་དགོངས་པ་རབ་གསལ། དབུ་མ་རྩ་བ་ཤེས་རབ་ཀྱི་ཊཱིཀྐ་རྣམ་བཤད་རིགས་པའི་རྒྱ་མཚོར་འཇུག་པའི་གྲུ་གཟིངས་སོགས་གསུང་རྩོམ་པོད་བཅུ་གཅིག་དང་གླེགས་བམ་༢༧༩ ཚང་མ་[ཅོ་ནེ་གྲགས་པ་བཤད་སྒྲུབ་ཀྱི་གསུམ་རྩོམ་ཕྱོགས་བསྒྲིགས་]ནང་འདུའོ། །དེ་ལས་ད་དུང་རྗེ་འདི་ཉིད་ཀྱིས་[བསྟན་འགྱུར་དཀར་ཆག་]ཁ་ཤས་ཤིག་ལེགས་སྒྲིག་མཛད་ཡོད་པ་ད་ལྟ་པེ་ཅིན་རྒྱལ་ཁབ་མི་རིགས་དཔེ་མཛོད་ཁང་དུ་ཉར་ཚགས་བྱས་ཡོད་འདུག དགུང་ལོ་ང་བདུན་ལ་ཕེབས་པ་རབ་བྱུང་བཅུ་གཉིས་པའི་ལྕགས་ཕག་ཕྱི་ལོ་༡༧༣༡ ལོར་སླར་ཡང་དགོན་དེའི་ཁྲི་ལ་ཕེབས།
དགུང་ལོ་ང་བརྒྱད་ལོར་རྒྱུད་པ་གྲྭ་ཚང་བཙུགས་ཏེ་བླ་མ་དང་སློབ་དཔོན་ཟུང་འབྲེལ་དུ་མཛད། དགུང་ལོ་རེ་གཉིས་བར་འཆད་རྩོད་རྩོམ་གསུམ་གྱིས་དུས་འདའ་བར་མཛད། མཐར་དགུང་ལོ་དོན་ལྔ་པ་རབ་བྱུང་བཅུ་གསུམ་པའི་ས་སྦྲུལ་ཕྱི་ལོ་༡༧༤༩ ལོར་སྐུ་མྱ་ངན་ལས་འདས་པ་བཅས་སོ། །
