༄༅། །ཕ་མའི་དྲིན་ལན་བསབས་པའི་སྙིང་བོ་བསྡུས་པ་བཞུགས་སོ།།
བིས་པ་ངག་དབང་མི་ཕམ་ཟླ་བས་མཛད།
ན་མོ། དུས་གསུམ་སངས་རྒྱས་ཐམས་ཅད་ཀྱི། །མཁྱེན་བརྩེ་ནུས་པའི་རང་གཟུགས་སྤྱན་རས་གཟིགས། །བླ་མ་སྐལ་ལྡན་རྒྱ་མཚོ་ཐུགས་རྗེ་ཅན། །བདག་གི་དྲིན་ཅན་ཕ་མ་ཐུགས་རྗེས་སྐྱོངས། །
བླ་མ་ཁྱེད་ལས་ལྷག་པའི་སྐྱབས་གནས་མེད། །ཕ་མ་འདི་བས་ལྷག་པའི་དྲིན་ཅན་མེད། །ད་རེས་མིན་པ་དྲིན་ངོ་ཇི་ལྟར་ཤེས། །དྲིན་ལན་མྱུར་དུ་བསབ་པར་ཅིས་ཀྱང་འདོད། །འདོད་པ་ཇི་བཞིན་འགྲུབ་པར་བྱིན་གྱིས་རློབས། །ཐུགས་རྗེ་མ་ཆུང་བླ་མ་སྤྱན་རས་གཟིགས། །ཀྱེ་མ་བདག་དང་ཕ་མ་རིགས་དྲུག་རྣམས། །མཐའ་མེད་འཁོར་བའི་འཇིགས་ལས་བསྐྱབ་ཏུ་གསོལ། །འཁོར་བ་འདི་ལ་ཐོག་མཐའ་མ་མཆིས་པས། །སྐྱེ་བ་འདི་ལ་གྲངས་ཤིག་ག་ལ་ཡོད། །ལུས་རྟེན་འདི་འདྲ་མ་བླངས་བྱ་བ་དང་། །ཡུལ་ཕྱོགས་འདི་རུ་མ་སྐྱེས་བྱ་བ་མེད། །བདག་ནི་འཁོར་བ་ཁམས་གསུམ་གར་སྐྱེས་ཀྱང་། །སྐྱེ་གནས་བཞི་བོ་གང་ཡང་རུང་བར་སྐྱེས། །དེ་ལས་མངལ་དང་སྒོང་སྐྱེས་ཐམས་ཅད་ནི། །དྲིན་ཅན་ཕ་མ་དག་ལ་བརྟེན་ནས་སྐྱེས། །སྐྱེ་བ་ཐོག་མ་མེད་ནས་ཡང་ཡང་དུ། །ཕ་མར་གྱུར་ནས་དྲིན་གྱིས་བསྐྱངས་པ་ཡི། །དྲིན་ཅན་ཕ་མ་འདི་དག་སྙིང་རེ་རྗེ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །སྐྱེ་བ་སྔོན་གྱི་ལས་དང་སྨོན་ལམ་མཐུས། །ཚེ་འདིའི་ཕ་མ་བུ་ཚར་གྱུར་པ་ལས། །བརྩེ་གདུང་ལྷག་པར་ཆེ་བའི་དྲིན་ཅན་མ། །བླ་མ་སྤྱན་གཟིགས་ཀྱིས་ཐུགས་རྗེས་ཟུངས། །ལྷ་བས་ལྷག་པའི་རྙེད་དཀའི་དོན་ཆེ་བ། །ཆོས་བའི་མི་ལུས་ཡིད་བཞིན་ནོར་བུ་འདི། །ད་ལྟ་གང་ལས་རྙེད་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ཨ་མ་དྲིན་ཅན་ལུས་ཀྱི་སྒྲོམ་བུ་ནས། །ཤ་ཁྲག་གདོས་བཅས་ཕུང་བོ་གཅེས་སྤྲས་ཀྱིས། །ཟླ་ངོ་བཅུ་ལ་འཁུར་བའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ཐུར་སེལ་རླུང་གིས་འབྱུང་བ་གཡོས་པའི་ཚེ། །ཤ་རུས་ཁ་ཁར་འདྲལ་བའི་སྡུག་མྱོང་ཡང་། །སེམས་ལ་མི་དགའ་མེད་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །མཇལ་ནས་ཁྲག་དང་ཆུ་སེར་ལྷན་ཅིག་ལུས། །བཙས་མ་ཐག་ཏུ་གཙང་མའི་ཆབ་ཀྱིས་བཀྲུས། །བྱི་དོར་གང་ལེགས་བགྱིས་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ཤ་རུས་ཉོར་ཉོར་ལེན་སྣ་མེད་པའི་དུས། །ལག་པས་འཇམ་པོར་བླངས་ནས་པང་དུ་བཟུང་། །ཁ་སྣ་ལྕེ་ཡིས་ལྡག་པའི་དྲིན་ཅན་མ། །བླ་མ་སྤྱན་གཟིགས་ཀྱིས་ཐུགས་རྗེས་ཟུངས། །རང་ལུས་རང་གིས་སྐྱོབ་པའི་ནུས་པ་མེད། །ཉི་ལྷགས་ཆར་གྱི་གདུང་བ་མྱུར་དུ་བསྐྱབས། །གོམ་པ་ཙོག་པོར་འཇོག་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ཁ་ཡིས་ཟས་སྙོད་མི་གཙང་ལག་པས་ཕྱིས། །སྣབས་ལུད་དྲི་མ་ཁ་རུ་སོང་ན་ཡང་། །སྣང་བ་ཞེན་པ་མ་ལོག་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །བྲང་ལ་ནུ་འབར་རྒྱས་པའི་འོ་འཛིན་ལས། །བྱམས་པའི་ཤུགས་ཀྱི་ཟག་པའི་ནུ་ཞོའི་རྒྱུན། །ནམ་འདོད་ཁ་རུ་བསྣུན་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ཉིན་མཚན་མེད་པར་རུམ་ཕུག་དྲོ་བར་བཅུག།།མཚན་མོ་གཏུ་མིག་གཉིད་ཀྱིས་ནོན་པའི་ཚེ། །གསོད་དོགས་ནུབ་གཉིད་ཆགས་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །འགྲང་དུས་འཛུམ་ཞིང་བགད་ན་སྤྲོ་བ་སྐྱེས། །ལྟོགས་དུས་གཡོ་ཞིང་ངུ་བ་སྐད་ཅིག་ཀྱང་། །མི་བཟོད་ནུ་མ་བསྣུན་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །རྐང་བཞི་དུད་འགྲོ་ལྟ་བུར་འགྲོ་བའི་དུས། །ལག་མགོས་འཐེན་ནས་རྐང་གཉིས་འདེགས་འཇོག་གི །གམ་ཙེ་གོམ་ཙེ་སློབ་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །དང་པོ་གླེན་པ་ལུག་ལྟར་ལྐུགས་པ་ཞིག།།ད་ལྟ་ཐམས་ཅད་སྨྲ་ཞིང་དོན་གོ་བའི། །མི་སྐད་འདི་ཙམ་བསླབས་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ལོ་གསུམ་དུས་སུ་གར་འགྲོ་མིག་གིས་འཚོ། །ལོ་བཞི་ལ་སོགས་གང་ལོན་གཟུགས་ཚོད་ཀྱི། །ཞྭ་གོས་ལྷམ་སོགས་བསྒྲུབས་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །ལོ་བཅུ་ལོན་ནས་རང་མགོ་ཐོན་པའི་ཚེ། །སེམས་ཀྱི་ཁོ་ཐག་ཆོད་པའི་དགའ་སྐྱིད་དང་། །རྟག་ཏུ་སྡོད་སྙམ་འགྲོགས་པའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །སྐྱེས་ཙམ་ཉིད་ནས་ཇི་སྲིད་འགྲོགས་པའི་བར། །བྱམས་པས་བལྟ་ཞིང་སྙན་པའི་ཚིག་གིས་འབོད། །བརྩེ་བའི་སེམས་ཀྱིས་སྐྱོང་སྐྱོང་བའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །བླ་མ་སངས་རྒྱས་གསུང་གིས་དྲན་གསོས་ནས། །ཨ་མ་ཁྱོད་ཀྱི་སྐུ་དྲིན་ཡང་ཡང་དུ། །བསམས་ན་ཡིད་རབ་གཡོ་བའི་དྲིན་ཅན་མ། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །བདག་གིས་སངས་རྒྱས་གོ་འཕང་ཐོབ་འདོད་ན་ཡང་། །ཨ་མ་ཁྱོད་དྲིན་སྙིང་ནས་མ་བསམས་ཤིང་། །གཅེས་པར་མ་བཟུང་ལམ་སྣ་ཟིན་ཐབས་མེད། །སངས་རྒྱས་ཁྱོད་ལ་རག་ལས་དྲིན་ཅན་མ། །ལམ་བཟང་མ་ནོར་སྟོན་པའི་བླ་མ་དང་། །ལམ་དེ་གང་ལ་དམིགས་པའི་དྲིན་ཅན་མ། །ལམ་མཆོག་བསྒྲུབ་ལ་དགོས་པ་ཁྱེད་མེད་ན། །སྔོན་ཆད་དེ་ལྟར་མ་ཤེས་ཤིན་ཏུ་ནོངས། །ཨ་མ་ཁྱོད་དྲིན་མ་བསམ་བློ་རེ་འགྱོད། །དྲིན་ཅན་ཡལ་བར་དོར་བ་སྙིང་ནས་འགྱོད། །མ་གུས་བརྙེས་སྨོད་བགྱིས་པ་མཐོལ་ལོ་བཤགས། །ཁ་ལན་ངག་ལན་བགྱིས་པ་མཐོལ་ལོ་བཤགས། །སེམས་དཀྲུགས་ཐུགས་དང་འགལ་བ་མཐོལ་ལོ་བཤགས། །ངག་བཅག་གསུང་དང་འགལ་བ་མཐོལ་ལོ་བཤགས། །མགོ་བསྐོར་རྫུན་གྱིས་བསླུས་པ་མཐོལ་ལོ་བཤགས། །བསྙེན་བཀུར་ཚུལ་བཞིན་མ་བྱས་མཐོལ་ལོ་བཤགས། །ཕ་དང་མ་ལ་གནོད་པའི་ལས་བྱས་པའི། །སྡིག་ཅན་དེ་དག་སུས་ཀྱང་སྐྱོབ་ཐབས་དཀའ། །སྔོན་ཚེ་སྟོན་པ་མཛའ་བོའི་བུ་མོ་རུ། །འཁྲུངས་པའི་གཏམ་རྒྱུད་སོགས་ཀྱིས་ཡིད་ཆེས་སྐྱེ། །སྐྱེ་བ་འདི་ལ་དྲིན་ཅན་ཕ་མ་ཡིས། །ཆོས་ལྡན་མི་ལུས་བསྐྱེད་པའི་དོན་པོ་ལ། །ཆོས་ཤིག་བྱུང་ན་རང་སྐྱིད་གཞན་སྐྱིད་དེ། །ཆོས་མཐུན་བསམ་པར་འགྲུབ་པར་བྱིན་གྱིས་རློབས། །འཆི་བར་ངེས་ཤིང་ནམ་འཆི་ཆ་མེད་ལ། །འཆི་ཚེ་ཆོས་མིན་གཞན་གྱིས་ཕན་པ་མེད། །ཤི་ནས་མེད་དུ་མི་འགྲོ་སྐྱེ་ངེས་ཤིང་། །སྐྱེ་བའང་ངན་འགྲོ་བདེ་འགྲོ་གཉིས་ལས་མེད། །གར་ལས་ཀྱི་གཞན་དབང་མ་གཏོགས་པ། །ད་ལྟ་རང་ལ་རང་དབང་ཅི་ཡང་མེད། །སྡིག་ཅན་བཟོད་པར་དཀའ་བའི་ངན་འགྲོ་དང་། །དགེ་བ་གང་བྱས་བདེ་ནས་བདེ་བར་འགྲོ། །ངན་སོང་འཇིགས་ལས་སྐྱོབ་ནུས་དཀོན་མཆོག་གསུམ། །སྐྱོབ་ཐབས་རང་གིས་མ་བྱས་སྐྱོབ་མ་ནུས། །བྱ་རྒྱུ་ཆོས་ལས་མེད་པར་བློ་ཐག་ཆོད། །ཆོས་ཞེས་བྱ་བ་སྡིག་སྤོང་དགེ་སྒྲུབ་ཡིན། །སྐྱེས་པའི་ཐ་མ་ངེས་པར་འཆི་བ་ལ། །ཁ་དྲག་ཅན་ཡང་ཅུང་ཟད་འདུག་དབང་མེད། །གཅིག་ཏུ་འགྲོ་ལ་ཕན་པ་དམ་པའི་ཆོས། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །བསགས་པའི་ཐ་མ་ངེས་པར་འཛད་པ་ལ། །སེར་སྣ་ཅན་ཡང་ཅུང་ཟད་འཁྱེར་དབང་མེད། །གཅིག་ཏུ་འགྲོ་ལ་ཕན་པ་དམ་པའི་ཆོས། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །མཐོན་པའི་ཐ་མ་ངེས་པར་རྒུད་པ་ལ། །ང་རྒྱལ་ཅན་ཡང་ཅུང་ཟད་འགྱིང་དབང་མེད། །གཅིག་ཏུ་འགྲོ་ལ་ཕན་པ་དམ་པའི་ཆོས། །བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས། །མ་ཁྱོད་འདི་ནས་གཅིག་པུར་འགྲོ་བའི་ཚེ། །ང་དང་ཁྱོད་དང་སྤྱན་གཟིགས་མགོན་གསུམ། །མཇལ་བའི་སྨོན་ལམ་འཚལ་ལོ་དྲིན་ཅན་མ། །ཚེ་འདིར་ཡུན་རིང་འགྲོགས་པའི་དུས་ཀྱི་མཐར། །མནར་སྤྱོད་སྡུག་བསྔལ་མེད་པར་དགའ་བཞིན་དུ། །ཞིང་མཆོག་བདེ་བ་ཅན་དེར་སྐྱེ་བར་ཤོག།།སྐྱེས་ནས་བླ་མ་སངས་རྒྱས་མཇལ་བར་ཤོག།།མཇལ་ནས་བྱང་ཆུབ་ལུང་བསྟན་ཐོབ་པར་ཤོག།།བླ་མ་སྤྱན་རས་གཟིགས་དབང་ཐུགས་རྗེ་ཅན། །སྨོན་ལམ་ཐམས་ཅད་འགྲུབ་པར་བྱིན་གྱིས་རློབས། །
དེར་སྨྲས་པ། དམ་པའི་གསུང་ལ་བཅོས་སླད་མི་འོས་ཀྱང་། །ཕལ་བའི་ངག་སྒྲོས་བྱི་དོར་བགྱིས་པ་འདི། །མི་ཕམ་དབྱངས་ཅན་དགའ་བའི་བློ་གྲོས་ཀྱིས། །མི་ཕམ་དཀོན་མཆོག་ཅེས་བྱའི་འདོད་ངོར་སྨྲས། །དད་མེད་རྣམས་ལ་དོན་དུ་མི་འགྱུར་ཡང་། །དད་པ་ཅན་ལ་ཅི་ཡང་ཕན་པར་སྲིད། །རྡོ་ཐོག་མྱུ་གུའི་རེ་བ་མ་མཆིས་ཀྱང་། །ཞིང་ལ་ས་བོན་གང་བཏབ་སྐྱེ་ལ་ལྟོས། །བསོད་ནམས་གསེར་གྱི་ཐུར་མ་རིང་བོ་དེས། །རང་གཞན་ཀུན་གྱི་བློ་གྲོས་མིག་ཕྱེ་ནས། །སྟོང་ཉིད་སྙིང་རྗེའི་སྙིང་བོ་ཅན་གྱི་ཡུམ། །རང་ཞལ་རྗེན་པར་མཐོང་བའི་སྐལ་བཟང་ཤོག། །
