བདག་གི་སློབ་གྲྭ།
ཐེ་གོར་གྱི་བཀའ་སློབ།
ང་རང་ལོ་ངོ་བཞི་བཅུར་སླེབས་ཉེའི་སྐབས་བངྒལ་དུ་སློབ་གྲྭ་ཞིག་བཙུགས་པ་ཡིན། མི་ཚེའི་དུས་ཚོད་ཕལ་ཆེ་བ་རྩོམ་རིག་ཐད་བཏང་ཞིང་ལྷག་པར་དུ་སྙན་ངག་འབྲི་རྒྱུར་དགའ་བའི་ང་རང་ལ་མཚོན་ན་སློབ་གྲྭ་གཉེར་རྒྱུ་ནི་ངའི་འདུན་པ་ཞིག་མ་རེད། དེར་བརྟེན་མི་རྣམས་ཀྱི་སེམས་ལ་ཡང་རང་བཞིན་གྱིས་སློབ་གྲྭ་འདི་ལེགས་པོ་ཞིག་ཡོང་རྒྱུ་མ་རེད་སྙམ་བཞིན་ཡོད་ལ། དེ་ནི་ཆེས་ཉེན་ཚབས་ཆེ་བའི་གནད་དོན་གསར་པ་ཞིག་སྟེ། ཉམས་མྱོང་མེད་པའི་ཐོན་སྐྱེད་ཅིག་ལ་ངོས་འཛིན་བྱེད་ཀྱིན་ཡོད།
རྒྱུ་མཚན་འདི་ལ་བརྟེན་ནས་ངས་སློབ་གྲྭ་འདི་ཅིའི་ཕྱིར་བཙུགས་པ་ཡིན་ནམ་སྙམ་ནས་རང་གིས་རང་ལ་དྲི་བ་ཡང་ཡང་དྲིས་མྱོང༌། དྲི་བ་འདི་ནི་ཧ་ཅང་ཁ་སྐྱེངས་དགོས་པ་ཞིག་རེད། གང་ཡིན་ཞེ་ན་རྒྱུན་གཏན་མི་རྣམས་ཀྱིས་རྒྱུ་རྐྱེན་ཅི་ཞིག་ལ་བརྟེན་ནས་སློབ་གྲྭ་འདི་བཙུགས་པའི་སྐོར་སྐད་ཆ་འདྲི་སྐབས། ཁོ་ཚོར་འདོད་པ་ཁེངས་པའི་རྒྱུ་མཚན་ལེགས་པོ་ཞིག་ང་ལ་ཤོད་རྒྱུ་མེད། གང་ལྟར་ཡང༌། ངས་ག་དུས་ཡིན་ཡང་གནས་ཚུལ་ངོ་མ་བརྗོད་འདོད་དང་བདེན་པ་བདེན་ཐུབ་བརྗོད་པར་གཙོ་འདོན་བྱེད་ཀྱི་ཡོད།
དེས་ན་ངས་ཆེས་ཐོག་མར་སློབ་གྲྭ་འདི་གཉེར་བའི་བསམ་ཚུལ་ཞིབ་ཕྲ་འདི་འདྲ་ཞིག་རེད་ཅེས་བརྗོད་ཐབས་བྲལ་བར་དགོངས་སེལ་ཞུ་རྒྱུ་ཡིན། བསམ་བློའི་ལྟ་ཚུལ་ཞེས་པ་ནི་རྩིག་རྨང་གཏན་ཁེལ་ཞིག་གི་ཐོག་ཁང་པ་བརྩིགས་པ་ལྟ་བུ་མིན། དེ་ནི་ས་བོན་ལྟ་བུ་ཞིག་ཡིན་ཞིང༌། སྡོང་པོར་གྱུར་སྐབས་ས་བོན་འདི་རེད་ཅེས་དབྱེ་འབྱེད་བྱེད་པ་དང་ལོགས་སུ་དགར་རྒྱུ་མེད། དེ་ལྟར་བསམ་གཞིགས་བྱེད་སྐབས་ངས་སློབ་གྲྭ་གཉེར་བའི་ལྟ་ཚུལ་འདིའི་འབྱུང་རྐྱེན་རགས་པ་ཞིག་ཕལ་ཆེར་འཆར་ཡོང་གི་འདུག དེ་ནི་སློབ་གསོའི་ལྟ་གྲུབ་གསར་པ་ཞིག་ལས་གྲུབ་པ་མ་ཡིན་པར། བདག་སློབ་གྲྭ་བའི་གནས་སྐབས་ཀྱི་དྲན་འཆར་ལས་བྱུང་བ་ཞིག་ཡིན། སྐབས་དེ་ནི་ང་རང་ལ་མཚོན་ན་ཧ་ཅང་མ་སྐྱིད་པའི་དུས་སྐབས་ཤིག་ཡིན་ཞིང༌། ངའི་ཐུན་མོང་མ་ཡིན་པའི་གཤིས་སྤྱོད་ལ་ལོངས་སུ་སྤྱོད་རྒྱུ་མེད་ལ། ང་རང་འགྲོ་སའི་སློབ་གྲྭ་དེའི་སྐྱོན་ཆ་གང་ཞིག་མཐོང་ཡང་གསལ་བཤད་བྱ་ས་ཡེ་ནས་མེད། ཅི་སྟེ་སྐབས་དེར་ངས་གོ་མེད་ཚོར་མེད་ངང་བསྡད་ཚེ་ཕལ་ཆེར་ག་ལེར་ག་ལེར་གནོན་ཤུགས་དེ་བཟོད་ཐུབ་ཡོད་ངེས་རེད་ལ། གཙུག་ལག་སློབ་གྲྭ་ཆེན་མོ་བའི་ལག་འཁྱེར་ཞིག་ཀྱང་ཐོབ་ཡོད་ངེས་རེད། འོན་ཀྱང་སློབ་གྲྭ་ནི་སློབ་གྲྭ་རང་རེད། མཐུན་རྐྱེན་མི་འདྲ་བ་ཙམ་མ་གཏོགས་ཕལ་ཆེར་གཅིག་མཚུངས་རེད།
མཐུན་རྐྱེན་ཁོ་ན་ཙམ་ཡིན་ན་དེ་ནི་བྱིས་པ་ཚོར་ཡང་རང་གི་ཨ་མའི་ནུ་ཞོ་འཐུང་ནས་ཐོབ་ཀྱི་ཡོད་ལ། ཨ་མ་དང་བྱིས་པ་གཉིས་ཀ་དུས་མཉམ་དུ་ཁ་ཟས་ལ་རོལ་ཐུབ་ཀྱི་ཡོད་པར་མ་ཟད། དེ་ནི་ལུས་སེམས་གཉིས་ཀའི་རྒྱགས་ཕྱེ་ཞིག་ཀྱང་རེད། བྱིས་པ་ཞིག་ལ་མཚོན་ན་གནས་སྐབས་དེ་ནི་མི་དང་འཇིག་རྟེན་དབར་ལ་དོན་དངོས་ཀྱི་འབྲེལ་ལམ་གང་འདྲ་ཞིག་ཡོད་པའི་སྐོར་ངོ་སྤྲོད་བྱུང་བ་ཐོག་དང་པོ་དེ་རེད། དེ་ནི་མི་དང་མིའི་བར་གྱི་བརྩེ་དུང་ལས་བྱུང་བ་ལས་ཕྱི་དངོས་པོའི་གཏན་སྲོལ་ཞིག་ལས་བྱུང་བ་གཏན་ནས་མིན་ནོ། །
དེ་ལྟར་ན་ངེད་ཅག་གི་བུ་རབས་ཚོའི་སྐོམ་པ་ཚད་མེད་པ་དེ་ལ་ཡང་མི་ཚེའི་རིན་ཐང་ཡོངས་སུ་གཞལ་བའི་ཆབ་རྒྱུན་འདྲེན་དགོས་ངེས་རེད་ལ། གསར་སྐྱེས་ཀྱི་བསམ་བློ་དེ་ཚོར་འཛམ་གླིང་འདིའི་ལྷིང་འཇགས་ཀྱི་ལྟ་ཚུལ་བཟང་པོ་རྣམས་ཀྱིས་རེ་འདོད་སྐོང་དགོས། དེང་སྐབས་ང་ཚོའི་སློབ་གྲྭ་ཁག་གི་ནང་བློ་གྲོས་ཁྱད་དུ་འཕགས་པའི་རླུང་ཁམས་བསྐྲུན་རྒྱུར་དོ་སྣང་མི་བྱེད་པར་མ་ཟད། ད་དུང་བཟོད་དཀའ་བ་དང་ཁྱད་གསོད་ཆེ་བའི་ཁོར་ཡུག་ཅིག་སྐྲུན་བཞིན་ཡོད། འདིས་ང་ཚོའི་བུ་ཕྲུག་རྣམས་ལ་དཀོན་མཆོག་གིས་གནང་བའི་ངོ་མཚར་ཅན་གྱི་ལག་རྩལ་དང་། རང་གི་རྣམ་དཔྱོད་ཀྱི་རྩལ་ལས་ཐོན་པའི་རང་གཤིས་དེ་ཧམ་ཤེད་ཀྱིས་འཕྲོག་གི་ཡོད། དེ་ནི་མི་བུ་སྒེར་གྱི་འདོད་ཚུལ་ལ་ཁྱད་གསོད་བྱེད་པའི་སྒྲིག་གཞི་ཙམ་ཞིག་ལས་མ་འདས་ཤིང༌། ཐོན་སྐྱེད་གཅིག་ཁོ་ན་བསྐྲུན་པའི་བཟོ་གྲྭ་ལྟ་བུ་ཞིག་ཡིན། སློབ་གྲྭས་ང་ཚོར་བསྐྲུན་པ་ནི་ཡིད་ཀྱི་འཆར་སྒོའི་སྤྱི་སྙོམ་གྱི་ཐིག་སྲོང་པོ་ཞིག་ཡིན་ཞིང༌། ཐིག་དེ་བརྒྱུད་ནས་སློབ་གསོའི་ཡུར་བུ་ཞིག་འབྲུ་དགོས་ཀྱི་ཡོད། འོན་ཀྱང་མི་ཚེའི་ལམ་བུ་ནི་དེ་འདྲ་བའི་ཐིག་སྲོང་པོ་ཞིག་མིན་ཏེ། ཐིག་དེ་ཡོད་ཀྱང་ང་ཚོ་ནི་དཔྱངས་ཐག་ལ་རྩེད་རྒྱུར་དགའ་ཞིང་སློབ་གྲྭས་ཁ་རྡུང་གཏོང་སའི་བྱིས་པ་ཤ་སྟག་ཡིན། སློབ་གྲྭ་ལ་མཚོན་ན་དུས་སྐབས་བཟང་ཤོས་ནི་ཧ་ཅང་ཁུ་སིམ་མེར་འཆི་བ་ལྟ་བུར་གནས་པ་དང༌། ཆ་སྙོམས་ལ་མཛེས་ཤིང་སྟབས་བདེ་པོར་གནས་ན་འཐུས་པ་ཡིན། ང་རང་ཉིད་ལ་མཚོན་ན་འདི་ནི་སློབ་གྲྭར་འགྲོ་སྐབས་ཡིད་ཧ་ཅང་སུན་དགོས་པའི་རྒྱུ་རྐྱེན་ཞིག་ཡིན། ཡུད་ཙམ་ཞིག་ལ་ང་རང་གི་འཇིག་རྟེན་ངའི་གཡས་གཡོན་ནས་ཡལ་འགྲོ་བ་ཚོར་ཞིང༌། ང་ཚོར་ཐོབ་པའི་འཇིག་རྟེན་ནི་ཤིང་གི་རྐུབ་སྟེགས་ཡིན་ལ། ངའི་ངོ་གདོང་ན་ལོང་བའི་ཅེར་སྟངས་འདྲ་བའི་ཧ་ཅང་སྲོང་བའི་གྱང་གིས་ཅེར་འདུག
ཁོ་ཚོས་སྐྱོར་བའི་གཏམ་དཔེ་ནི་མཁས་པ་སློབ་པའི་དུས་ན་སྡུག ། བདེ་བར་འདོད་ལ་མཁས་མི་སྲིད། ། ཅེས་པ་དེ་ཡིན། རྒྱུ་མཚན་འདིའི་དབང་གིས་ཕྲུ་གུ་རྣམས་ལ་སྒྲིག་ཆས་བསྐོན་ནས་ཡ་རབས་བཟང་སྤྱོད་ལྡན་པ་ཞིག་ཡོང་ཐབས་བྱས་ཏེ། རང་ཉིད་ལ་དབང་བའི་ལྷ་ཡུལ་དེ་དང་འཕྲད་ནས་དམྱལ་བའི་ཡུལ་དུ་འདྲེན་པ་རེད། དེར་བརྟེན་ངའི་བསམ་བློས་ཀྱང་ཧ་ཅང་དམ་པའི་སློབ་གྲྭའི་ཕྱི་ཐུམ་དེ་མི་གོན་ཐབས་མེད་བྱུང་ཞིང༌། དེ་ནི་དཔོན་རིགས་བུ་མོ་ཞིག་གི་འཇུར་རྟ་བདག་གི་རྐང་པར་གཡོགས་པ་ལྟར་སྣང་སྟེ། དུས་རྟག་ཏུ་ཕྱོགས་ཀུན་ནས་ཤ་གཅུས་བརྒྱབ་པ་དང་བརྡར་བཤུད་བྱེད་ཀྱི་འདུག འོན་ཀྱང་སྟབས་ལེགས་པ་ཞིག་ལ་དེ་འདྲའི་བག་ཆགས་དེ་ངའི་རྒྱུད་ལ་མ་འཇགས་གོང་ང་རང་གནས་སྟངས་དེ་ལས་བྲོས་ཐར་བྱུང་བ་རེད།
ངས་ནི་ང་དང་འདྲ་བའི་མི་རྣམས་ཀྱིས་རང་ཉིད་ཤེས་རིག་ལྡན་པའི་སྤྱི་ཚོགས་ཤིག་ནང་ཞུགས་རྒྱུའི་ཆེད་མྱངས་པའི་ཉེས་ཆད་ཚང་མ་འཁུར་དགོས་བྱུང་མེད། འོན་ཀྱང་བཙན་གནོན་དེ་དག་ལས་ང་རང་རྦད་དེ་མ་ཐར་བ་དེ་ཡང་ཕྱོགས་གཅིག་ནས་དགའ་འོས་པ་ཞིག་རེད། གང་ཡིན་ཞེ་ན་བཙན་གནོན་དེས་མིའི་རིགས་ཀྱི་བུ་ཕྲུག་ཚོས་ནོར་འཁྲུལ་འདིའི་འོག་ཏུ་དཀའ་སྡུག་ཅི་འདྲ་མྱོང་བཞིན་པར་གོ་རྟོགས་སྐྱེ་རུ་འཇུག་གི་འདུག
དེ་ལྟར་ཡོང་དགོས་པའི་རྒྱུ་རྐྱེན་ནི་མི་ཚོས་བྱིས་པར་སློབ་གསོ་སྤྲོད་སྟངས་དེ་དཀོན་མཆོག་གི་འདུན་པ་དང་རྒྱབ་འགལ་དུ་སོང་བས་རེད། ཚོང་ལས་གཉེར་བ་ནི་ང་ཚོ་རང་ཉིད་ཀྱི་ཁེ་ཕན་ཆེད་དུ་ཡིན་པས་གཞུང་ལས་ཁང་ནས་ཀྱང་རང་གི་དགོས་མཁོ་སྒྲུབ་ཆེད་དེ་དང་འཚམ་པའི་འཆར་གཞི་རེ་འདིང་གི་ཡོད། འོན་ཀྱང་གཞུང་ལས་ཁང་གི་བཀོད་སྒྲིག་དང་འཆར་གཞི་དེ་དཀོན་མཆོག་གི་དགོངས་པ་དང་འཚམ་པོ་ཡེ་ནས་མེད། མ་ཟད་བྱིས་པ་རྣམས་ནི་དཀོན་མཆོག་གི་བུ་ཕྲུག་ཤ་སྟག་གོ །
ང་ཚོ་འཇིག་རྟེན་འདིར་གནད་དོན་འདི་ཁས་ལེན་བྱེད་དུ་སྐྱེས་པ་ལས་གནས་ཚུལ་འདི་ཤེས་པའི་ཆེད་དུ་སྐྱེས་པ་མིན། ཤེས་ཡོན་སྦྱངས་ནས་ང་ཚོ་སྟོབས་ཤུགས་ཆེན་པོ་ཆགས་ངེས་ཡིན་ཡང་ང་ཚོར་ངེས་པར་བྱམས་བརྩེའི་བསམ་བློ་ཚད་མཐོ་པོ་ཞིག་དགོས་པ་ཡིན། ཤེས་ཡོན་གྱི་ཚད་མཐོ་ཤོས་ནི་གནས་ཚུལ་ཤེས་རྟོགས་ཐུབ་རྒྱུ་ཙམ་མིན་པར་རྒྱུན་གཏན་འགྲོ་བ་ཡོངས་དང་ལྷན་དུ་བདེ་འཇགས་ངང་འཚོ་ཐུབ་པ་བྱ་རྒྱུ་དེ་རེད། འོན་ཀྱང་ཚོར་འདུ་ཡོད་པའི་སློབ་གསོ་འདི་འཆར་གཞི་ལྡན་པའི་ངང་ཉམས་དམས་སུ་བཏང་བར་མ་ཟད་དེ་དང་ཁ་གཏད་དུ་ལང་བཞིན་ཡོད། ང་ཚོ་འཇིག་རྟེན་འདིར་སྐྱེས་པ་ནས་བཟུང་གོམས་གཤིས་དེ་འཇགས་སུ་བཅུག་ཅིང༌། ང་ཚོར་རང་བྱུང་ཁམས་དང་ཁ་ཐག་རིང་བའི་ཤེས་ཡོན་ཞིག་སློབ་པར་མ་ཟད། ང་ཚོའི་བསམ་བློ་དང་འཛམ་གླིང་གཉིས་འགལ་སྤྲོད་ཏག་ཏག་ལ་སྐྲུན་གྱི་ཡོད། དེས་ན་ང་ཚོར་མཁོ་བའི་སློབ་གསོའི་རྩ་དོན་ངོ་མ་དེ་སྣང་མེད་དུ་བཏང་ནས། དེའི་ཚབ་ལ་གནས་ཚུལ་མི་ཉུང་བ་ཞིག་མཁོ་འདོན་བྱས་ཏེ་ང་ཚོ་རང་ཉིད་ལ་དབང་བའི་འཇིག་རྟེན་དེ་བོར་དུ་འཇུག་གི་ཡོད། ང་ཚོས་བྱིས་པ་ཚོའི་འཇིག་རྟེན་བཅོམ་འཕྲོག་བྱས་ཏེ་དེའི་ཚབ་ལ་ས་ཁམས་རིག་པ་སློབ་པ་དང་ཁོ་ཚོའི་སྐད་ཡིག་ཕྲོགས་ཏེ་དེའི་ཚབ་ལ་བརྡ་སྤྲོད་སློབ་ཀྱི་ཡོད། ཁོ་ཚོས་ཉན་འདོད་པ་ནི་གཏམ་རྒྱུད་ཡིན་ཡང་དེའི་ཚབ་ཏུ་ལོ་ཚིགས་མང་བའི་ལོ་རྒྱུས་འཁྲིད་ཀྱི་ཡོད། ཁོ་ཚོ་ནི་མིའི་རིགས་སུ་སྐྱེས་ཀྱང་མིའི་རིགས་ཀྱི་འཚོ་བར་རོལ་དུ་མ་བཅུག་པར། ཉོན་མོངས་ཀྱི་འཁོར་བར་སྐྱེ་བའི་སྡིག་པ་གསོག་པར་ཉེས་ཆད་འགེལ་གྱི་ཡོད། བྱིས་པའི་རང་གཤིས་ཀྱིས་དཀའ་སྤྱད་འབད་བརྩོན་ངང་བར་ཆད་དེར་གདོང་ལེན་བྱས་ཀྱང་མཐར་ཁོ་ཚོར་ཉེས་རྡུང་དང་ཆད་པ་བཅད་ནས་ཁུ་སིམ་མེར་འདུལ་གྱི་ཡོད།
ངེད་ཅག་ཚང་མས་ཤེས་གསལ་བཞིན་བྱིས་པ་ནི་ཐལ་རྩེད་ལ་དགའ་བ་དང༌། ཁོ་ཚོས་མེ་ཏོག་ལ་དགའ་སྣང་བྱེད་པ་བཞིན་ཉི་མའི་འོད་ཟེར་དང་རླུང་བུ་སོགས་ལ་དེ་བཞིན་དུ་དགའ་སྣང་བྱེད་པ་ཡིན། ཁོ་ཚོ་དུས་ནམ་ཡང་འཇིག་རྟེན་ཁམས་དང་ཐད་ཀར་འབྲེལ་གྲོགས་བྱེད་པར་ཉོབ་སྣང་སྐྱེ་གི་མེད། ཡིད་ཕངས་པ་ཞིག་ལ་ཕ་མ་ཚོས་སྤྱི་ཚོགས་ཀྱི་ལུགས་སྲོལ་དང་རང་གི་གོ་མིང་ལ་བསམ་སྟེ་ཡིད་སྐྱོ་བའི་གོམས་གཤིས་འདིའི་འོག་ཏུ་འཚོ་བཞིན་ཡོད། འདི་འདྲའི་གནས་སྟངས་མང་པོ་ཞིག་ནི་བཅོས་ཐབས་ཧ་ཅང་དཀའ་བ་རེད། གང་ཡིན་ཞེ་ན་མི་ཕལ་མོ་ཆེས་ནི་གནས་སྟངས་ཁོ་ན་ལ་བལྟས་ནས་བསྡད་པ་དང་སྤྱི་ཚོགས་ཀྱི་ལུགས་སྲོལ་ཧ་ཅང་གཙིགས་ཆེར་འཛིན་གྱི་ཡོད་པས་རེད། འོན་ཀྱང་བྱིས་པའི་དུས་སྐབས་ནི་རང་དབང་མང་ཙམ་ཡོད་པ་དང་རང་དབང་མང་ཙམ་དགོས་པའི་དུས་སྐབས་ཤིག་ཡིན་ཞིང༌། རང་དབང་དེ་ནི་གུ་དོག་པའི་སྤྱི་ཚོགས་ཀྱི་མཐའ་མཚམས་དང་འཇིག་རྟེན་གྱི་ལམ་ལུགས་ལས་ཐར་བ་ཞིག་དགོས།
ངས་གནས་ཚུལ་ཞིག་གསལ་པོར་དྲན་པར། ཐེངས་ཤིག་ངའི་སློབ་མ་ཞིག་གིས་རང་སྦྱོང་བྱེད་ཆེད་རང་ཉིད་ཤིང་སྡོང་སྟེང་ འཛེགས་ནས་དེའི་ཐོག་གི་ཡལ་ག་མང་ས་ཞིག་ཏུ་བསྡད་པས། གནས་ཚུལ་དེ་ཉམས་མྱོང་མང་པོ་ཡོད་པ་དང་སྒྲིག་འཛུགས་ཧ་ཅང་ཡག་པོ་ཡོད་པར་གྲགས་པའི་དགེ་རྒན་ཆེན་མོ་ཞིག་གིས་མཐོང་སྟེ་ཧང་སངས་པ་དང་ཡིད་མི་བདེ་བ་ཆགས་སོང༌། སྐབས་དེར་ངས་“ཅི་སྟེ་ཤེས་དཔལ་རྒྱས་པའི་མི་ཞིག་ཡིན་ན་མི་ཚེའི་ནང་ཤིང་སྡོང་དང་རྐུབ་སྟེགས་གདམ་ག་བྱེད་རྒྱུ་ཡོད་པ་ནི་བྱིས་པའི་དུས་སྐབས་ཁོ་ན་ཡིན། ང་ཚོ་མི་རྒན་པ་རྣམས་ལ་གདམ་ག་དེ་མེད་པ་ལྟར་བུ་ཆུང་འདིའང་ཤིང་སྡོང་ནས་མར་འབབ་ཏུ་འཇུག་དགོས་སམ།”ཞེས་སྐད་ཆ་མ་དྲིས་ཐབས་མེད་བྱུང༌། ཧང་སངས་པ་ཞིག་ལ་དགེ་རྒན་ཆེན་མོས་སློབ་ཕྲུག་དེས་རྩི་ཤིང་རིག་པ་སློབ་སྦྱོང་བྱེད་པའི་རྒྱུ་མཚན་ལ་བརྟེན་ནས་ཤིང་སྡོང་ཐོག་སྡོད་ཆོག་པར་མོས་མཐུན་བྱས་སོང༌། ཁོང་གིས་མིའི་ཉམས་མྱོང་དང་འབྲེལ་མེད་ཀྱི་ཤིང་སྡོང་ཞིག་ལ་སློབ་སྦྱོང་བྱེད་པ་དང་དེ་ཡང་ཚན་རིག་སྦྱོང་གི་ཡོད་པའི་རྒྱུ་མཚན་ཞིག་མཐོང་བ་མ་གཏོགས། མི་རང་ཉིད་ཀྱི་ཉམས་མྱོང་དེ་སློབ་སྦྱོང་བརྩི་གི་མེད། ཉམས་མྱོང་འདི་ལ་བརྟེན་ནས་བག་ཆགས་ཤིག་སྐྱེ་གི་ཡོད་ཅིང་དེ་ནི་རང་བྱུང་ཁམས་ཀྱིས་ང་ཚོར་ངོ་སྤྲོད་བྱས་པའི་ཐབས་ལམ་གྱི་འབྲས་བུ་ཞིག་ཡིན། བདག་གི་སློབ་ཕྲུག་ཚོར་མཚོན་ན་ཤིང་སྡོང་བརྟགས་པའི་སློབ་སྦྱོང་གང་འཚམ་ཞིག་ཐོབ་ཡོད། ཁོ་ཚོས་ཤིང་སྡོང་ལ་རེག་པ་ཙམ་གྱིས་སྡོང་པོ་གང་ཞིག་གི་ཐོག་ཏུ་རྐང་པ་བཞག་ན་འོས་པ་དང༌། ཡལ་ག་ཅི་ཙམ་ཞིག་གི་སྟེང་གུ་ཡངས་བྱེད་ན་འཚམ་པ། ལྕུག་ཕྲན་གང་ཙམ་ཞིག་གིས་གཟུགས་པོའི་ལྗིད་ཤུགས་ཅི་ཙམ་ཁྱོག་པ་སོགས་ཀྱི་གནས་སྟངས་གསལ་པོར་ཤེས་ཀྱི་ཡོད། ངའི་སློབ་མ་ཚོས་སྡོང་པོ་ལས་སིལ་ཏོག་ལེགས་པར་འཐུ་ཤེས་པ་དང༌། སྡོང་པོའི་སྟེང་དུ་ངལ་གསོ་བྱེད་པ་དང་ཉེན་ཁའི་སྐབས་སུ་སྡོང་གསེབ་ཏུ་ཡིབ་སྟངས་སོགས་ཤེས་ཀྱི་ཡོད། ང་རང་ཉིད་ལ་མཚོན་ན་ཤེས་རིག་ལྡན་པའི་གྲོང་རྡལ་གྱི་ཁྱིམ་ཚང་ཞིག་ཏུ་འཚར་ལོངས་བྱུང་རུང༌། ང་རང་གི་གོམས་གཤིས་རྣམས་རིམ་པས་འགྱུར་རྗེས་རྩི་ཤིང་གང་ཡང་མེད་པའི་འཇིག་རྟེན་ཞིག་ཏུ་སྐྱེས་པ་ལྟ་བུའི་འཚོ་བར་རོལ་དགོས་བྱུང༌། རྒྱུ་མཚན་དེར་བརྟེན་ངས་རང་གི་བུ་སློབ་ཚོ་ཤིང་སྡོང་དང་མཉམ་དུ་འགྲོགས་རྒྱུ་ནི་ཤེས་ཡོན་གྱི་ཆ་ཤས་གལ་ཆེན་ཞིག་ཏུ་རྩི་བཞིན་ཡོད་ལ། ང་ཚོའི་འཚོ་བ་ནི་ཤིང་སྡོང་དང་ཁ་འབྲལ་ཐབས་མེད་པ་ཞིག་ཡིན་པར་ངེས་ཤེས་རྙེད་ཐབས་བྱེད་ཀྱི་ཡོད། དེ་བཞིན་ཤིང་སྡོང་གིས་ལྗང་རྫས་དང་ཀར་བོན་སྤྱད་ནས་སྲོག་རླུང་ཐོན་སྐྱེད་བྱས་པ་ཙམ་མིན་པར། ཤིང་སྡོང་ནི་སྲོག་དང་ལྡན་པ་ཞིག་ཡིན་པར་ར་འཕྲོད་ཐུབ་པ་བྱེད་ཀྱི་ཡོད།
དོན་དམ་དུ་ང་ཚོའི་རྐང་མཐིལ་གཉིས་ནི་སའི་གོ་ལ་འདིའི་ཐོག་ལངས་ནུས་པ་དང་གོམ་པ་སྤོ་ཐུབ་པའི་ལག་ཆ་ཡག་ཤོས་ཤིག་རེད། འོན་ཀྱང་ང་ཚོས་ལྷམ་གྱོན་པའི་ཉིན་ཐོག་མ་དེ་ནས་བཟུང་ང་ཚོའི་རྐང་མཐིལ་གྱི་བེད་སྤྱོད་ཉུང་དུ་སོང་ཡོད། རྐང་མཐིལ་གྱི་འོས་འགན་ཉུང་དུ་སོང་བ་དང་ལྷན་དུ་དེའི་ཆེ་མཐོང་ཡང་རིམ་བཞིན་བརླགས་ཏེ། ད་ཆ་ང་ཚོས་རིན་གོང་དང་དབྱིབས། ཆ་ཚད་འདྲ་མིན་གྱི་རྐང་ཤུབས་དང་བསིལ་ལྷམ། འཇུར་རྟ་སོགས་ལ་བརྟེན་དགོས་ཀྱི་ཡོད་པས། དཀོན་མཆོག་གིས་ང་ཚོར་ཚོར་ཤེས་ལྡན་པའི་རྐང་མཐིལ་གྱི་ཚབ་ཏུ་རྨིག་པ་ཞིག་མ་གནང་བར་འཁང་ར་དྲག་པོ་བྱེད་པའི་དུས་ལ་སླེབས་ཡོད།
མིའི་རིགས་ཀྱིས་ལྷམ་རྩ་བ་ནས་བེད་སྤྱོད་མི་བྱེད་པར་ངས་རེ་བ་འཆང་གི་མེད། འོན་ཀྱང་ང་ཚོའི་བྱིས་པ་རྣམས་ཀྱིས་རང་ཉིད་ལ་རང་བྱུང་གིས་རིན་མེད་དུ་གནང་བའི་རྐང་མཐིལ་དེ་བེད་སྤྱད་མི་ཆོག་པར་ངས་བློ་རྩེ་བརྟན་པོས་ཁ་གཏད་གཅོག་ངེས་ཡིན། དོན་དངོས་སུ་ང་ཚོའི་རྐང་ལག་གི་རེག་བྱ་ནི་སའི་གོ་ལ་དང་ཆེས་བློ་ཐག་ཉེ་ཤོས་དང་གོམས་འདྲིས་ལྡན་པ་ཞིག་ཡིན། སའི་གོ་ལར་རང་ཉིད་ཀྱི་འབུར་ཀོང་ལ་སྒྲ་དབྱངས་དཀྲོལ་མཁན་གྱི་ཆེས་དགའ་ས་དང་འོ་བྱེད་མཁན་གཅིག་རང་ཡོད་པ་ནི་རྐང་པ་ཡིན།
བདག་གིས་སླར་ཡང་བཟོད་གསོལ་ཞུ་དགོས་པ་ཞིག་ལ། ང་ནི་ཆུང་དུས་ནས་རྐང་པ་དམར་རྗེན་མ་ཐལ་རྡུལ་དང་རེག་མི་བཅུག་ཅིང་ཁྱིམ་གྱི་འཚོ་བ་ཁོ་ནའི་འོག་ནར་སོན་པ་ཞིག་ཡིན། ངས་རང་གི་སློབ་བུ་ཚོས་རྐང་རྗེན་མར་ས་ཐོག་ཏུ་བསྐྱོད་པ་དང་འགྲན་ཟླ་བྱེད་དུས། ངའི་རྐང་པ་དང་ས་གཞིའི་དབར་ཆེས་མཐུག་པའི་སྟོང་ཆ་ཞིག་ཡོད་པ་ཡིད་གདུང་དྲག་པོས་ངེས་ཤེས་རྙེད་བྱུང༌། ངས་རྐང་བཙུགས་ནས་ཚེར་མའི་ཐོག་བསྐྱོད་ཅིང་དེའི་ཐོག་ནས་དགའ་བདེའི་ཚོར་སྣང་ཞིག་རྙེད་ཐབས་བྱས། འོན་ཀྱང་བདག་གི་རྐང་པར་བཟོད་བསྲན་ཕྲ་མོ་ཙམ་ཞིག་ཀྱང་བཟོད་ཐུབ་པའི་ནུས་པ་མི་འདུག ཆེས་ས་ཁོད་སྙོམས་པའི་སའི་གོ་ལའི་ངོ་གདོང་རེ་རེ་ནའང་དེའུ་འབུར་དང་ལུང་གཤོང་གི་མཛེས་རྐོང་རེ་ཡོད་པ་ནི་སློབ་གསོ་ཐོབ་པའི་རྐང་པའི་རྣམ་དཔྱོད་ཁོ་ནས་རྟོགས་ཐུབ། དུས་རྒྱུན་ངས་ཁོད་སྙོམས་པའི་ཞིང་ཐང་དུའང་དོན་མེད་གྱ་གྱུ་མང་བའི་རྐང་ལམ་ཆགས་པར་ཡ་མཚན་ཡང་ཡང་སྐྱེ་གི་ཡོད། དེ་བས་རྐང་ལམ་དེ་དག་ནི་མི་སྒེར་ཞིག་གི་གློ་བུར་གྱི་བསམ་བློ་ལས་བྱུང་བ་ཞིག་མིན་པ་ཤེས་དུས་ལྷག་པར་མགོ་འཐོམས་ཀྱི་འདུག ཅི་སྟེ་ལམ་འགྲུལ་བ་དེ་དག་ལ་གཅིག་གྱུར་གྱི་སྤྱོད་ཚུལ་ཡ་མ་ཟུང་ཞིག་མེད་ཚེ་རྐང་ལམ་གཏན་ཁེལ་དེ་འདྲ་ཞིག་ཆགས་མི་སྲིད་པ་གཏན་ཁེལ་རེད། འོན་ཀྱང་རྒྱུ་རྐྱེན་ངོ་མ་ནི་སའི་གོ་ལས་འུ་ཅག་གི་ཚོར་འདུ་བྲལ་བའི་རྐང་པའི་འདེགས་འཇོག་ལ་བརྡ་སྟོན་བྱས་པ་ཞིག་ཡིན། སའི་གོ་ལ་དང་མིའི་དབར་གྱི་འབྲེལ་ལམ་མ་བརླགས་པའི་མི་ཞིག་ལ་མཚོན་ན་རང་ཉིད་ཀྱི་རྐང་པའི་ཤ་གནད་ཀྱིས་ཆེས་མྱུར་མོར་གོམས་འདྲིས་བྱེད་ཐུབ་ལ་མ་མཐར་ཡང་བརྡ་ཞིག་སྟོན་ཐུབ། དེ་ལྟ་བུའི་རྐང་པས་ཚེར་མའི་ན་ཟུག་སོགས་ལས་གཡོལ་ཐུབ་ལ། ཅི་སྟེ་ཚེར་མ་དང་ལམ་འབར་འབུར་ཐོག་གོམ་པ་སྤོས་ཀྱང་མི་བདེ་བའི་ཚོར་སྣང་ཧ་ཅང་ཉུང། ལག་ལེན་གྱི་ཐོག་ནས་ང་ཚོའི་རྐང་པར་ལྷམ་གྱོན་དགོས་པ་དང༌། སྣུམ་ནག་གི་གཞུང་ལམ་བསྐྲུན་པ། རླངས་འཁོར་སོགས་དགོས་ཀྱི་ཡོད་པ་ངས་གསལ་པོར་ཤེས་ཀྱི་ཡོད། འོན་ཀྱང་བྱིས་པ་ཚོས་ཤེས་ཡོན་སྦྱོང་བའི་གནས་སྐབས་སུ་འཇིག་རྟེན་འདི་རི་མོ་འབྲི་སའི་འཛིན་ཁང་ལྟ་བུ་ཞིག་མིན་པ་དང༌། རང་གི་མཛེས་སྡུག་ལྡན་པའི་རྐང་པ་དེར་ལོངས་སུ་སྤྱོད་བྱེད་ཀྱི་རང་བྱུང་ཁམས་ཤིག་ཡོད་པའི་ར་སྤྲོད་བྱས་ན་མ་འགྲིགས་པ་ག་རེ་ཡོད།
བདག་གི་སློབ་གྲྭར་འཚོ་བར་རྒྱས་སྤྲོས་མི་བྱེད་པར་སྟབས་བདེ་བྱེད་དགོས་པའི་འདོད་ཚུལ་འཛིན་བཞིན་ཡོད་པས། མི་མང་པོས་དུས་རབས་བར་མའི་དབུལ་ཕོངས་ཀྱི་འཚོ་བའི་གནས་སྟངས་ལ་ཕུགས་བསམ་གྱི་ལྟ་ཚུལ་འཛིན་བཞིན་འདུག་ཅེས་བརྗོད་ཀྱི་འདུག སློབ་གསོ་རིག་པའི་ངོས་ནས་བརྗོད་ན་དབུལ་ཕོངས་ངོས་འཛིན་བྱེད་སའི་གནས་དམ་པ་དེ་སློབ་གྲྭ་མ་ཡིན་ནམ། གང་ཡིན་ཞེ་ན་མི་ཞིག་གི་སློབ་ཚན་ཐོག་མ་དང་སྦྱོང་བརྡར་ཐོག་མ་ཐོབ་ས་ནི་སློབ་གྲྭ་རེད། སྒོར་མོ་ས་ཡ་མང་པོ་ཡོད་པའི་ཕྱུག་པོའི་བུ་ཕྲུག་ཡིན་ཡང་ཐོག་མར་སྐྱེས་དུས་གང་ཡང་མི་ཤེས་པའི་དབུལ་ཕོངས་ཏེ། མི་ཚེའི་སློབ་ཚན་ཐོག་མ་ནས་འགོ་འཛུགས་དགོས་ཀྱི་ཡོད། ཁོ་པར་རྐང་པར་བརྟེན་མི་དགོས་པའི་རྒྱུ་ནོར་ཡོད་ཀྱང་ཆེས་དབུལ་ཕོངས་ཀྱི་བུ་ ཕྲུག་ལྟར་གོམ་པ་རྒྱག་སྟངས་སྦྱོང་དགོས་ཀྱི་ཡོད། དབུལ་ཕོངས་ཀྱི་འཚོ་བ་དངོས་དང་འཇིག་རྟེན་གྱི་གནས་ལུགས་ངོ་མ་རྟོགས་ཤིང༌། རྒྱས་སྤྲོས་ཀྱིས་དོན་དངོས་དང་མི་འཚམ་པའི་འཚོ་བ་ཞིག་སྐྱེལ་དགོས་ཀྱི་ཡོད། འཚོ་བ་རྒྱས་སྤྲོས་བྱེད་ན་རང་ཉིད་ཀྱི་སྤྲོ་སྣང་དང་སྤོབས་པར་དགེ་མཚན་ཡོད་ངེས་ཀྱང་ཤེས་ཡོན་སྦྱོང་བར་དགེ་མཚན་མེད། རྒྱུ་ནོར་ནི་གསེར་གྱི་ལྕགས་ཁྲའམ་བྱེའུ་གཟེབ་ལྟ་བུ་སྟེ། དེའི་ནང་ཕྱུག་པོའི་བུ་ཕྲུག་རྣམས་ལྷན་སྐྱེས་ཀྱི་གསོན་ཤུགས་བསྐྱེད་པར་གསོ་སྐྱོང་བྱ་ཐུབ་ཀྱི་མེད། རྒྱུ་མཚན་འདིའི་དབང་གིས་འཚོ་བ་རྒྱས་སྤྲོས་ལ་ཞེན་ཆགས་ཆུང་བའི་བདག་གི་སློབ་གྲྭའི་ནང་ཕྱི་དངོས་པོའི་མཐུན་རྐྱེན་ཉུང་ཙམ་སྤྱོད་དུ་བཅུག་ནས། ངོ་མཚར་ཆེ་བའི་དགེ་རྒན་བཟང་པོ་འདི་དང་འཕྲད་དུ་བཅུག་གི་ཡོད། དེ་ནི་ངེད་ཅག་ཕོངས་དྲགས་ནས་མིན་པར་མི་སྒེར་སོ་སོར་འཇིག་རྟེན་གྱི་ཉམས་མྱོང་རེ་ཐོབ་པའི་ཆེད་དུ་ཡིན་ནོ། །
ང་རང་སློབ་ཕྲུག་ཡིན་པའི་སྐབས་ལུས་སེམས་ལ་དཀའ་སྡུག་ཆེན་པོ་ཡོད་པ་གཅིག་ནི་སློབ་གྲྭའི་ནང་ཆ་ཚང་བའི་འཇིག་རྟེན་ཞིག་མེད་པ་དེ་རེད། དེ་ནི་སློབ་ཚན་ཁོ་ན་ཙམ་སློབ་པར་ཆེད་དུ་བཀོད་སྒྲིག་བྱས་པ་ལྟ་བུ་ཞིག་རེད། ལོ་ན་རྒན་པའི་མི་རྣམས་ལ་མཚོན་ན་གནས་སྟངས་དེ་རན་པོ་ཡོད་ངེས། གང་ཡིན་ཞེ་ན་ཁོ་ཚོས་དེ་ལྟ་བུའི་སློབ་གྲྭ་ཞིག་དགོས་པར་བསམ་ཤེས་ཐུབ་ངེས་རེད་ལ། མི་ཚེ་དང་ཡ་བྲལ་བའི་སློབ་གཞི་དེ་འདྲ་ཞིག་དང་དུ་ལེན་འདོད་ཀྱང་ཡོད་ངེས་རེད། འོན་ཀྱང་བྱིས་པ་ཚོ་ནི་རང་གི་འཚོ་བར་དགའ་ཞིང་དེ་ནི་ཁོ་ཚོའི་ཆེས་ཐོག་མའི་བརྩེ་དུང་ཡིན། འཚོ་བའི་ཁ་དོག་རེ་རེ་དང་འགུལ་སྐྱོད་རེ་རེས་ཁོ་ཚོའི་ཡིད་སེམས་ཡོངས་སུ་འཕྲོག་གི་ཡོད། ང་ཚོ་སུ་ཞིག་ལ་བརྩེ་དུང་རྣལ་མ་འདི་དབུགས་སུབ་གཏོང་བར་ཡིད་འཕེར་བའི་རྣམ་དཔྱོད་ཚད་ལྡན་ཞིག་ཡོད་དམ། བྱིས་པ་ནི་དགོན་པའི་འདུལ་ཁྲིམས་ལྟ་བུའི་ཤེས་ཡོན་ཐོབ་ཆེད་ཚངས་སྤྱོད་ པ་བྱེད་པར་སྐྱེས་པ་མ་རེད། ཐོག་མར་ཁོ་ཚོ་རང་ཉིད་ཀྱི་མི་ཚེར་བཅངས་པའི་བརྩེ་དུངས་ལས་ཤེས་ཡོན་འཇགས་ཐབས་ བྱེད་དགོས་པ་དང༌། དེ་རྗེས་ཤེས་ཡོན་ཐོབ་པའི་ཆེད་དུ་ཁོ་ཚོ་རང་ཉིད་ཀྱི་མི་ཚེ་བློས་གཏོང་བྱེད་ངེས། ཤེས་ཡོན་གྱི་འབྲས་བུ་གང་འཚམ་ཞིག་ཐོབ་རྗེས་ཁོ་ཚོ་སླར་ཡང་རང་གི་འཚོ་བ་དངོས་ནང་ཕྱིར་ཡོང་ངེས་ཡིན།
འོན་ཀྱང་སྤྱི་ཚོགས་ཀྱིས་སྒྲོམ་གཞི་བྱེ་བྲག་པ་ཞིག་བཟོས་ཏེ་གཡོ་བྱུས་ཀྱི་ལམ་ནས་མི་སེམས་འགུག་ཐབས་བྱེད་ཀྱི་ཡོད། དེ་འདྲའི་སྒྲོམ་གཞི་དེ་ནི་ཆེས་ཚགས་དམ་པ་དང་རང་བྱུང་ཁམས་དང་ཁ་ཐག་ཉེ་པོ་བྱེད་པར་བཀག་རྒྱ་ཡོད་པ་ཞིག་ཡིན། གལ་ཏེ་སྐྱེ་བོ་སུ་ཞིག་གིས་སྒྲོམ་གཞི་དེ་དང་བྲལ་ནས་གུ་ཡངས་ཕྲན་ཙམ་ཐོབ་ཐབས་བྱས་ན་དེ་ལ་དཔགས་པའི་ཉེས་ཆད་གོ་རིམ་བསྒྲིགས་ནས་ཡོད་ལ། ཐ་ན་རང་གི་ཚེ་སྲོག་སྲུང་སྐྱོབ་བྱེད་པར་ཡང་སྒྲོམ་གཞི་དེ་དང་བསྟུན་དགོས་པ་ཡིན། རྒྱུ་མཚན་དེས་ཕྱོགས་གཅིག་ནས་བདེན་པ་ར་སྤྲོད་བྱེད་པ་དང་གཉིས་ནས་ང་ཚོ་དང་ཡོངས་སུ་འགལ་སྤྲོད་དུ་གནས་པའི་ལུགས་སྲོལ་དེ་དག་ལག་བསྟར་བྱེད་ཀྱི་ཡོད། རྒྱུ་མཚན་འདི་ལ་བརྟེན་ནས་ངས་རང་ཉིད་ཀྱི་བུ་ལའང་ཤེས་ཡོན་སྤྲོད་སྐབས་དཀའ་ངལ་དུ་མ་འཕྲད་ཀྱིན་འདུག གང་ཡིན་ཞེ་ན་དོན་དངོས་ལག་ལེན་ལ་འགེལ་ཐུབ་པའི་ཐབས་ལམ་ཞིག་ཧ་ཅང་རྙེད་ཁག་པོ་འདུག དེར་བརྟེན་ངས་ཆེས་ཐོག་མར་བདག་གི་བུ་ཆུང་འཁྲིད་དེ་གྲོང་རྡལ་ནས་གྲོང་གསེབ་ཀྱི་ཕྱོགས་སུ་ལྟ་སྐོར་བྱེད་བཅུག་པ་དང༌། དེང་གི་དུས་སྐབས་སུ་རང་བྱུང་ཁོར་ཡུག་གི་དཔལ་ཡོན་ཅི་ཙམ་ལྷག་ཡོད་པ་དེར་གང་དགའ་ཅི་འདོད་ཀྱིས་རང་དབང་གི་དཔལ་ལ་ལོངས་སུ་སྤྱོད་དུ་བཅུག ཁོས་ཉེན་ཁ་དང་རྒན་རབས་ཚོའི་བཀག་རྒྱ་གང་ལའང་མི་ལྟ་བར་གཙང་ཆུར་རྐྱལ་རྩེད་ བྱེད་པ་དང༌། ཞིང་ཁ་དང་བྱེ་ཐང་ཐོག་རྩེད་མོ་ཡུན་རིང་རྩེད་དེ། ཕྱི་པོ་ཆགས་སྐབས་གཞི་ནས་ཁྱིམ་དུ་ལོག་སྟེ་དྲི་བ་ཙམ་ཡང་མེད་པར་དགོང་ཟས་ཟ་རུ་འོང༌། སྤྱི་ཚོགས་ཀྱི་ལུགས་སྲོལ་གྱིས་དེ་འདྲའི་འདོད་ཡོན་ལ་ལོངས་སུ་སྤྱོད་དབང་མེད་པར་མ་ཟད། ཁོ་དང་འདྲ་བའི་བྱིས་པ་རྣམས་ཀྱིས་ངེས་པར་དུ་བྱེད་སྟངས་དེ་ཚོ་འཛེམ་ཆར་འཛིན་དགོས་ཀྱི་ཡོད། དེ་འདྲའི་སྤྱོད་ཚུལ་ཞིག་མཐོང་ན་བུ་ཕྲུག་དེར་ཡ་ང་བར་མ་ཟད་ཁོའི་ཕ་མ་གཉིས་ལ་སྤྱི་ཚོགས་ཀྱི་སྒྲིག་གཞིས་ཡོངས་སུ་བཅུན་པའི་མི་རྣམས་ཀྱིས་ལེ་འདེད་བྱེད་ངེས་ཡིན། འོན་ཀྱང་བྱིས་པ་རྣམས་ལ་འདོད་ཡོན་དེ་དག་ནི་རྡོག་ཁྲེས་ལྕི་མོ་ཞིག་རེད། རྡོག་ཁྲེས་དེ་དག་ནི་མི་གཞན་དག་གི་གོམས་གཤིས་དང༌། ཁོ་ཚོའི་ཕ་མ་རྣམས་ཀྱིས་ཆེ་མཐོང་དང་སྤྲོ་སྣང་བྱ་སའི་རྡོག་ཁྲེས་ཤིག་རེད།
གང་ལྟར་ཡང་ཐོན་ཁུངས་ཉུང་བའི་མི་སྒེར་རང་ཉིད་ལ་མཚོན་ན། ང་རང་སྒེར་གྱི་འཆར་གཞིར་དཔགས་པའི་ཤེས་ཡོན་སྤྲོད་ཐབས་ཤིག་བེད་སྤྱད་པ་ཡིན། ངའི་བུ་ཆུང་ལ་འགུལ་སྐྱོད་ཀྱི་རང་དབང་ཅུང་ཟད་ཡོད་པས། ཁོས་རང་ཉིད་དང་རང་བྱུང་ཁོར་ཡུག་དབར་འབྲེལ་ལམ་ཅི་ཞིག་ཡོད་པ་ཚོར་ཐུབ་པར་མ་ཟད། ང་ལས་ཆེས་ལྷག་པར་འཇིག་རྟེན་ཁམས་ལ་གོམས་འདྲིས་ཐོབ་ཡོད། དེས་ངའི་སེམས་ལ་ཡང་གཞན་དང་མི་འདྲ་བའི་སྦྱོང་བརྡར་ཞིག་ཐོབ་བྱུང༌།
ཤེས་ཡོན་སློབ་པའི་དགོས་པ་ནི་མི་རྣམས་ལ་དོན་དམ་པའི་བདེན་པ་རྙེད་པར་བྱ་རྒྱུ་དེ་ཡིན། ཆེས་གདོད་མའི་དུས་སྐབས་སུ་འཚོ་བ་སྟབས་བདེ་ཡིན་པས་མི་རྣམས་ཀྱི་འབྱུང་ཁམས་ནི་ཞི་བདེའི་ངང་གནས་ཡོད། འོན་ཀྱང་དབང་པོ་དང་ཤེས་པ་གཉིས་ལོགས་སུ་འབྱེད་པའི་དུས་སྐབས་བྱུང་མཚམས། སློབ་གྲྭའི་སློབ་གསོས་ཡིད་ཤེས་ཀྱི་ནུས་སྟོབས་གཅིག་པུ་གཙོ་ཆེར་བཟུང་ནས་དབང་ཤེས་ཀྱི་ནུས་སྟོབས་ལ་སྣང་མེད་བཏང་བ་རེད། ང་ཚོས་བྱིས་པར་གནས་ཚུལ་མཁོ་འདོན་བྱེད་རྒྱུ་ཁོ་ན་གཙིགས་ཆེར་བཟུང་ནས། དབང་པོ་དང་ཡིད་ཤེས་ཀྱི་ནུས་སྟོབས་དབར་ཧེ་བག་ཆེན་པོ་ཞིག་བཟོས་ཡོད་པར་དོ་སྣང་བྱུང་མེད།
ངས་ནི་འཛམ་གླིང་འདི་དང་དམ་པོར་འབྲེལ་བའི་དོན་དམ་གྱི་འཇིག་རྟེན་ཞིག་ལ་ཡིད་ཆེས་བྱེད་ཀྱིན་ཡོད་ཅིང་དེ་ནི་དོན་དམ་གྱི་བདེན་པ་ཡིན་པར་སེམས་བཞིན་ཡོད། ང་ཚོས་དབུགས་རྔུབ་ཐེངས་རེར་ང་ཚོ་རང་ཉིད་དཀོན་མཆོག་ཡིན་པའི་བདེན་པ་དེ་ཚོར་དགོས་པ་གལ་ཆེར་མཐོང༌། འུ་ཅག་རྣམས་ངོ་མཚར་དང་སྒྱུ་འཕྲུལ་མང་བའི་འཇིག་རྟེན་འདིའི་ཐོག་སྐྱེས་ཟིན་པས། ང་ཚོའི་མི་ཚེ་འདི་གློ་བུར་གྱི་གོ་སྐབས་ཤིག་ལས་བྱུང་བ་མིན་པར་ཁས་ལེན་བྱེད་དགོས་ཤིང༌། ད་ལྟའི་གནས་སྟངས་འདི་བརྒྱུད་མཐའ་མེད་པའི་གནས་ཤིག་ལ་འཕྱོ་གཡེང་བྱེད་མི་རུང༌། འུ་ཅག་གི་མི་ཚེ་འདི་ནམ་ཡང་གཉིད་ལས་སད་རྒྱུ་མེད་པའི་རྨི་ལམ་གཏོང་མཁན་གྱི་རྨི་ལམ་ལྟ་བུར་ངོས་འཛིན་བྱེད་མི་འོས། ང་ཚོ་ལ་ཐུན་མོང་མ་ཡིན་པའི་རང་གཤིས་རེ་ཡོད་ཅིང། མཐའ་མེད་པའི་གཤིས་ཀ་དེ་དབང་པོའི་ཤེས་སྟོབས་ལ་མ་ལྟོས་ན་དངོས་པོ་དང་ནུས་ཤུགས་སོགས་ལ་སྤྱོད་མཁོ་གང་ཡང་མེད། དེ་ལྟ་བུའི་གཤིས་ཀ་དེ་ནི་མིའི་བརྩེ་དུང་ལས་བྱུང་བ་ཞིག་དང༌། དེ་ནི་མིའི་བླ་སྲོག་གིས་མཛེས་སྡུག་ལྡན་པའི་རང་བྱུང་ཁོར་ཡུག་ནང་བློས་གཏོང་དང་སྐྱེད་སྲིང་བྱས་པའི་འབྲས་བུ་བཟང་ཤོས་ཤིག་ཡིན་ལ། དེ་ནི་དངོས་པོའི་གནས་ལུགས་ཁོ་ན་ཙམ་མིན་པར་ནང་སེམས་ཀྱི་འདུ་ཤེས་ཕྱིར་མངོན་པ་ཞིག་ཀྱང་རེད་དོ། །
འུ་ཅག་གིས་བྱིས་དུས་ནས་སྣང་མེད་ངང་བོར་བརླག་ཏུ་སོང་བའི་དོན་དམ་གྱི་འཇིག་རྟེན་འདི། ང་ཚོའི་བུ་ཕྲུག་རྣམས་འཇིག་རྟེན་འདིའི་ནང་ཡོངས་སུ་ཞུགས་བཅུག་ནས་ཕྱིར་རྙེད་ཐབས་བྱེད་དགོས་པ་ལས། ཆོ་ག་ཕྱག་ལེན་གྱི་ངོ་སྤྲོད་ཅིག་གི་འོག་ནས་འཇིག་རྟེན་འདི་རྙེད་མི་ཐུབ། འོན་ཀྱང་དེ་ཇི་ལྟར་བྱས་ནས་སྒྲུབ་པར་བྱེད་དམ་ཞེ་ན་ཐབས་ཤེས་དེ་ནི་དེང་གི་དུས་ རབས་ནང་ཧ་ཅང་དཀའ་ངལ་ཅན་ཞིག་རེད། གང་ཡིན་ཞེ་ན་དེང་སྐབས་མི་རྣམས་ངལ་གསོ་དུས་ཚོད་ཙམ་ཡང་མེད་པའི་གནས་སྟངས་འོག་ཏུ་འཚོ་བཞིན་ཡོད་ལ། ཁོ་ཚོའི་བྱ་བ་གང་ལའང་འགུལ་སྐྱོད་ཀྱི་རྣམ་པ་ཡོད་པ་མ་གཏོགས་དྲང་བདེན་མེད་པས། དོན་ངོ་མར་ཁོ་ཚོའི་བླ་སྲོག་གིས་དོན་དམ་གྱི་འཇིག་རྟེན་ཞིག་རྙེད་ཐུབ་མེད།
རྒྱ་གར་ནང་ང་ཚོས་ད་དུང་ཡང་ནགས་གསེབ་ཏུ་འཚོ་སྡོད་བྱེད་པའི་བཀའ་དྲིན་ཅན་གྱི་སློབ་དཔོན་ཚོའི་ལུགས་སྲོལ་ལ་བརྩི་བཀུར་དང་ངོས་ལེན་བྱེད་ཀྱི་ཡོད། དེང་རབས་ཀྱི་ལྟ་ཚུལ་ངོས་ནས་བཤད་ན་གནས་དེ་ཚོ་ནི་སློབ་གྲྭ་དང་དགོན་པ་གང་ཡང་མ་རེད། ཁོ་ཚོས་རང་གི་ཕ་མ་བུ་ཕྲུག་དང་ལྷན་དུ་ཁྱིམ་བཅོས་ཤིང་ཁོ་ཚོའི་འདུན་པ་ནི་དཀོན་མཆོག་མཇལ་རྒྱུ་དང་ཁོ་ཚོ་རང་ཉིད་དཀོན་མཆོག་གི་དགོངས་པ་བཞིན་འཚོ་སྡོད་བྱེད་རྒྱུ་དེ་རེད། ཁོ་ཚོ་སྤྱི་ཚོགས་ཀྱི་ཕྱི་ལོགས་སུ་འཚོ་སྡོད་བྱེད་པའི་མི་སྡེ་ཞིག་ཡིན་ཀྱང༌། དོན་དངོས་སུ་ཉི་མ་ནི་རྒྱུ་སྐར་གྱི་དབུས་སུ་གནས་ཤིང་དེ་ལས་འོད་ཟེར་དང་ཚེ་སྲོག་བྱུང་བ་བཞིན་མིའི་སྤྱི་ཚོགས་ཀྱི་ལྟེ་བ་ནི་ཁོ་ཚོ་ཡིན། གནས་འདི་རུ་བྱིས་པ་རྣམས་ཁྱིམ་གྱི་བདག་པོར་མ་གྱུར་གོང་ཐོག་མཐའ་མ་མཆིས་པའི་མི་ཚེའི་དོན་སྙིང་དངོས་དེ་རྟོགས་ཀྱིན་དུ་འཚར་ལོངས་བྱེད་ཀྱི་ཡོད།
གནའ་སྔ་མོའི་དུས་སུ་རྒྱ་གར་ནང་སློབ་གྲྭ་གང་དུ་ཡོད་ས་དེར་འཚོ་བ་ཡོད་པ་དང༌། སློབ་གྲྭ་དེ་ཚོའི་ནང་བྱིས་པ་རྣམས་འབྲི་ཀློག་གི་ཁོར་ཡུག་གམ་དགོན་པ་ལྟར་དབེན་གནས་ཀྱི་ཁོར་ཡུག་ཅིག་གི་འོག་ཏུ་འཚར་ལོངས་མི་བྱེད་པར། ཁོ་ཚོ་འཚོ་བ་དངོས་ཀྱི་ཁོར་ཡུག་ཅིག་ཏུ་ནར་སོན་ཞིང་། ཁོ་ཚོས་སྤང་ཐང་དུ་སྒོ་ཕྱུགས་འཚོ་བ་དང༌། མེ་ཤིང་འཐུ་བ། ཤིང་ཏོག་འཐུ་བ། སྲོག་ཆགས་རྣམས་ལ་བྱམས་ཤིང་བརྩེ་བ་སོགས་བྱས་ཏེ། རང་གི་དགེ་རྒན་གྱི་སྙིང་སྟོབས་འཚར་ལོངས་བྱེད་སྟངས་ལ་ལྟ་བཞིན་རང་ཉིད་ཀྱི་སྙིང་སྟོབས་འོག་ཏུ་འཚར་ལོངས་བྱེད་ཀྱི་ཡོད། གནས་དེ་རུ་འཚར་ལོངས་དེ་ལྟར་བྱེད་ཐུབ་པའི་རྒྱུ་མཚན་ནི་ཁོ་ཚོའི་དམིགས་ཡུལ་སློབ་ཁྲིད་བྱེད་རྒྱུ་མ་ཡིན་པར་དཀོན་མཆོག་གི་དགོངས་པ་བཞིན་འཚོ་བའི་མི་རྣམས་ལ་སྐྱབས་གནས་སྤྲོད་རྒྱུ་དེ་རེད།
དེས་ན་སྲོལ་རྒྱུན་གྱི་དགེ་སློབ་དབར་གྱི་འབྲེལ་ལམ་དེ་ནི་དེང་སྐབས་ཀྱི་ཤེས་ཡོན་སྲིད་ཇུས་ཀྱིས་ལག་བསྟར་བྱེད་ཀྱིན་པའི་བཅོས་མའི་ཞེན་ཆགས་ལྟ་བུ་ཞིག་མིན། ལེགས་སྦྱར་སྐད་དུ་ཆཱཏུསྤཱདིས྄་ཞེས་པའི་གཙུག་ལག་སློབ་གྲྭ་དེ་དག་ནང་དེང་སྐབས་ཀྱི་སློབ་གྲྭའི་རྣམ་པ་ཞིག་མེད། སློབ་ཕྲུག་རྣམས་དགེ་རྒན་གྱི་ཁྱིམ་དུ་གནས་བཅས་ཤིང་ཁོ་ཚོ་ནི་ཁྱིམ་ཚང་དེའི་བུ་ཕྲུག་ལྟར་སྐྱོང་ལ། གནས་མལ་དང་ཟས་གོས་སློབ་ཡོན་སོགས་ལ་སྐར་གཅིག་ཀྱང་སྤྲོད་དགོས་ཀྱི་མེད། དགེ་རྒན་གྱིས་རང་ཉིད་ཀྱི་ཤེས་ཡོན་རྒྱུན་སྐྱོང་བྱེད་པ་དང་འཚོ་བ་སྟབས་བདེ་ཞིག་བསྐྱལ་ཞིང༌། སློབ་མར་རོགས་སྐྱོར་བྱེད་པ་ནི་རང་གི་མི་ཚེའི་ཆ་ཤས་ཤིག་ཏུ་བརྩི་བ་ལས་ལས་ཀའི་ངོ་བོ་ཞིག་ལ་བརྩི་གི་མེད། རང་གི་མི་ཚེ་དགེ་རྒན་དང་མཉམ་དུ་སྐྱེལ་བའི་སློབ་གསོའི་ཕུགས་བསམ་འདི་བདག་གི་བསམ་བློའི་རེ་སྙེག་ཏུ་གྱུར། རྒྱལ་ཁབ་གཞན་དག་མང་པོའི་ནང་ཡར་རྒྱས་ཆེན་པོ་ཡོང་བར་འདུན་པ་དྲག་པོ་འཆང་མཁན་ཚོས་དེ་ལ་དཔགས་པའི་སློབ་གསོའི་དམིགས་ཡུལ་ཞིག་བཟུང་ཡོད། འོན་ཀྱང་ང་ཚོ་རང་ཉིད་ཀྱིས་རང་ཉིད་ལ་ཆེ་མཐོང་དང་ང་ཚོའི་བྱེད་པོར་གུས་བརྩི་བྱེད་ཆེད། ཤེས་ཡོན་སྦྱོང་བའི་དགོས་པ་ནི་རང་གི་བསམ་བློར་རང་དབང་འཐོབ་རྒྱུ་དང་། ཕྱོགས་ཡོངས་ནས་ཡར་རྒྱས་ཡོང་བར་དམིགས་ཡུལ་མི་དམན་པ་ཞིག་འཛིན་རྒྱུ་ཧ་ཅང་གལ་ཆེན་པོ་ཡིན་པ་ལས། འཚོ་ཐབས་ངན་ངོན་ཞིག་ལ་འཐབ་རྩོད་བྱེད་པ་ནི་སྙིང་རྗེ་སྐྱེ་དགོས་པ་ཞིག་ཡིན། འུ་ཅག་རྣམས་ལ་སྲོག་འཚོ་ཐུབ་ཙམ་དང་དཀའ་ངལ་མི་འཕྲད་ཙམ་གྱི་ལྟོ་གོས་ཤིག་བྱུང་ན། ཐལ་རྡུལ་གྱི་ཁྲོད་དུ་ཞུགས་ནས་རང་རང་གི་དཀོན་མཆོག་འཚོལ་བ་དང༌། དོན་དམ་གྱི་འཚོ་བའི་ཁྲོད་ནས་རྒྱུ་ནོར་དངོས་དེ་འཚོལ་དགོས་ཏེ། དེ་ནི་ཕྱི་དངོས་པོ་ལས་མི་འབྱུང་བར་ནང་སེམས་ཀྱི་འོད་སྣང་ལས་བྱུང་བ་དང༌། དེ་ནི་དབང་ཆ་ལས་མིན་ཏེ་བརྩེ་དུང་ལས་བྱུང་བ་ཤེས་དགོས། བསམ་བློའི་སྙིང་སྟོབས་དེ་ཇི་ལྟར་སྐྱེས་མིན་ནི་ང་ཚོ་རང་ཉིད་ཀྱི་ཕ་ཡུལ་ཏུ་ཡོད་པའི་འཚོ་བ་དབུལ་བའི་ཤེས་ཡོན་པ་རྣམས་ཀྱིས་ར་སྤྲོད་བྱེད་ངེས། ང་ཚོས་ཤེས་ཡོན་སྦྱོང་བའི་དགོས་པ་ནི་རང་རང་གི་མི་ཚེར་དོན་དམ་པའི་ཕན་ཐོགས་ཡོད་པ་ཞིག་དགོས་རྒྱུ་དང༌། དུས་ཚོད་ཀྱི་དགོས་མཁོ་བྱུང་ཚེ་འཛམ་གླིང་འདིའི་འགྲོ་བ་མི་གཞན་དག་གི་བདེ་དོན་གྱི་ཆེད་དུ་ལེགས་སྐྱེས་སུ་འབུལ་དགོས་པ་ཡིན།
བདག་གི་སེམས་པ་ན་ཟུག་གིས་མནར་དུས་རྩོམ་རིག་གི་བྱ་གཞག་ཁྲོད་དུ་ཞུགས་དགོས་བྱུང༌། གློ་བུར་དུ་འདྲེ་གནོན་གྱི་དབུགས་བཀག་འོག་ཏུ་ང་རང་འཁུན་སྒྲ་འབྱིན་གྱིན་པའི་སྣང་བ་ཞིག་འཆར། དེ་ནི་བདག་གི་རྣམ་ཤེས་ཁོ་ན་ཙམ་མིན་པར་བདག་གི་ཚེ་སྲོག་དང་ལྷན་དུ་འཐབ་རྩོད་བྱེད་ཀྱིན་པའི་མི་རིགས་ཤིག་གི་རྣམ་ཤེས་ཀྱང་རེད། ངས་གསལ་པོར་ཤེས་པར་དོན་དངོས་སུ་ང་ཚོར་དགོས་པ་ནི་རྒྱུ་ནོར་དང་སྟོབས་ཤུགས་མིན་པར་བསམ་བློར་རང་དབང་ཐོབ་དགོས་པ་དང༌། ང་ཚོས་འགྲན་རྩོད་བྱེད་ས་ནི་དཔལ་འབྱོར་མཁོ་སྒྲུབ་བྱེད་མཁན་ཚོ་མིན་པར། དཀོན་མཆོག་གི་དགོངས་པ་བཞིན་འཚོ་བར་དགྲ་ཟླ་མེད་པ་དང༌། མཐོང་ཆུང་ཁྱད་གསོད་ཀྱི་འོག་ནས་ཐར་ཐབས་བྱ་རྒྱུ་དེ་རེད།
སྟབས་ལེགས་པ་ཞིག་ལ་ང་རང་ལ་རང་ཉིད་ཀྱི་ལས་དོན་བསྒྲུབ་སའི་ས་ཆ་ཞིག་ཡོད། ངའི་པ་ལགས་ཀྱིས་འགྲུལ་བཞུད་མང་པོ་བྱས་རྗེས། མཐར་དཀོན་མཆོག་དང་འགྲོགས་འདྲིས་ལེགས་པོ་བྱེད་ཐུབ་པའི་ཁེར་རྐྱང་གི་གནས་འདི་རྙེད་པ་རེད། གནས་འདི་ནི་ཞི་བདེ་དང་དབེན་གནས་ལ་དགའ་བའི་མི་རྣམས་ལ་སྒོམ་སྒྲུབ་དང་ཞལ་འདོན་གནང་སར་པ་ལགས་ཀྱིས་ལེགས་སྐྱེས་སུ་གནང་བ་རེད། ང་རང་གནས་འདིར་ཡོང་དུས་བྱིས་པ་བཅུ་ཙམ་ཞིག་མཉམ་དུ་ཁྲིད་ཡོད་ལ། སྔོན་ཆད་ཉམས་མྱོང་གང་ཡང་མེད་པའི་འཚོ་བ་གསར་པ་ཞིག་དངོས་སུ་འགོ་བཙུགས་པ་ཡིན།
ཁོ་བོ་ཅག་གི་ཨཱཤ་རཱམ་དེ་ནི་རྒྱ་ཆེ་བའི་ལྗོངས་ཤིག་ཡིན་ཞིང༌། གྲོག་མཁར་དང་འགྲན་པའི་ཏ་ལའི་ཤིང་དང་ཚེར་མའི་ལྡོམ་བུ་ཐར་ཐོར་འགའ་སྐྱེས་པ་མ་གཏོགས་གཞན་དམར་ཐིང་ངེར་ཡིན། ཞིང་ཐང་གི་ས་ཁོད་ལས་ཀྱང་དམའ་ས་ན་ཤག་མ་དམར་པོ་དང་ཁ་དོག་འདྲ་མིན་གྱི་དེའུ་འབུར་དང་རི་ཆུང་གྲངས་ཀྱིས་མི་ལངས་པ་ཡོད་ཅིང༌། དེ་དག་གི་དབར་ན་ཆར་ཆུ་རྒྱུག་སའི་ཆུ་ཡུར་གྱིས་འབྲེལ་ནས་ཡོད། ལྷོ་ངོས་སུ་གྲོང་གསེབ་དང་ཅུང་ཉེ་ས་ཞིག་ན་ཏ་ལའི་ལྗོན་ཤིང་གི་ས་གཤོངས་སུ་སྔོ་ཐིང་ཐིང་གི་འཁྱིལ་ཆུ་དྭངས་མ་ཞིག་ཡོད། ཁུ་སིམ་པའི་ཞིང་ཐང་ཐོག་གྲོང་གསེབ་པ་ཚོས་གྲོང་རྡལ་དུ་ཉོ་ཚོང་བྱེད་ཆེད་དུ་བསྐྱོད་སའི་རྐང་ལམ་ཕྲ་མོ་ཞིག་ཡོད་ཅིང་། དེ་ནི་ཚ་ཟེར་ཅན་གྱིས་ཡུན་རིང་བསྲེགས་ནས་དམར་ཐིང་ངེར་གྱུར་ཡོད། རྐང་ལམ་འདི་བརྒྱུད་ནས་ཡོང་མཁན་གྱི་འགྲུལ་པ་ཚོས་རྒྱང་རིང་པོ་ནས་ཞིང་ཐང་ག་གེ་གུག་གེའི་མཐོ་ས་ན་གཏོར་གཟུགས་ཅན་གྱི་ལྷ་ཁང་འདི་དང༌། ཁང་པའི་ཡང་སྟེང་ན་ཞི་གནས་ཁང་ཤཱན་ཏི་ནིཀེ་ཏན་ཨཱཤ་རཱམ་དེ་ཨཉ་མཱ་ལཱ་ཀིདང་། སཱལ་གྱི་ལྗོན་པ་ཐར་ཐོར་གྱི་དབུས་སུ་ཆགས་ཡོད་པ་མཐོང་ཐུབ།
ལོ་ངོ་བཅོ་ལྔ་ཙམ་རིང་དཀའ་སྡུག་དང་འགྱུར་ལྡོག་མང་པོའི་ཁྲོད་སློབ་གྲྭ་འདི་གནས་དེ་རུ་འཚར་ལོངས་བྱུང༌། སྙན་ངག་པ་ཞིག་གི་གྲགས་པ་ངན་པ་ཡོད་པའི་རྒྱུ་མཚན་གྱིས་དཀའ་ངལ་དུ་མ་ཞིག་གི་འོག་ནས་ཕ་ཡུལ་གྱི་མི་རྣམས་ཀྱིས་ཡིད་ཆེས་རྙེད་པ་བྱུང་ཞིང༌། དཔོན་དབང་རིང་ལུགས་པའི་དོགས་འཆར་ལས་གཡོལ་ཐུབ་པ་བྱུང༌། བདག་གི་ཐོན་ཁུངས་ནི་ཤིན་ཏུ་ཉུང་ཞིང་ཅུང་ཟད་ཡོད་པ་དེ་དག་ཀྱང་བུ་ལོན་གྱི་མནན་ནས་ཡོད། འོན་ཏེ་ཕོངས་པ་འདི་འདྲ་ཞིག་གི་འོག་ཏུའང་བདག་གིས་རང་དབང་གི་སྟོབས་ཤུགས་ཤིག་རྙེད་པ་ནི་བདེན་དོན་ལས་ཕྱིའི་དངོས་པོར་བརྟེན་གྱི་མིན་པ་དེའོ། །
འོན་ཀྱང༌། བདག་གིས་རང་ཉིད་ཀྱི་ཕུགས་བསམ་འདི་སློབ་གྲྭ་འདིའི་ནང་རྙེད་ཐབས་བྱེད་ཀྱི་ཡོད་དམ་ཞེས་དྲིས་ན། ཁོ་བོས་ང་ཚོའི་ཆེས་ཟབ་ཤོས་ཀྱི་ཕུགས་བསམ་མངོན་འགྱུར་བྱུང་མིན་ནི་ཕྱིའི་གནས་སྟངས་ཀྱིས་ཚད་གཞལ་དཀའ་བ་ཞིག་རེད་ཅེས་ལན་འདེབས་བྱེད་ངེས་ཡིན། ཕུགས་བསམ་མངོན་འགྱུར་བྱུང་མིན་ནི་གནས་སྐབས་ཀྱི་གྲུབ་འབྲས་ལ་བལྟས་ནས་ཚོད་རྩིས་བྱས་ན་མི་འགྲིགས། ངེད་ཅག་གི་ཨཱཤ་རཱམ་དེའི་ནང་མིའི་རིགས་ཀྱི་སྣེ་མང་རང་བཞིན་ཅན་གྱི་སྤྱོད་ཚུལ་འདུས་ཡོད། གོམས་གཤིས་མི་འདྲ་བ་དང་སྦྱོང་བརྡར་མི་འདྲ་བའི་ང་ཚོའི་ཁོངས་མི་ཚོར་རང་ཉིད་ཀྱི་ཐུན་མིན་གྱི་གོམས་གཤིས་དོར་དུ་བཅུག་ནས་གཅིག་གྱུར་གྱི་གྲུབ་འབྲས་ཤིག་ཐོན་པར་ང་ཚོས་རེ་བ་ནམ་ཡང་བཅངས་མེད། ལ་ལ་ནི་བྲམ་ཟེའི་ཆོ་རིགས་འཛིན་མཁན་དང་ལ་ལ་ནི་ཧིན་དྷུའི་ཆོས་ལུགས་གཞན་དག་ལ་དད་ཞེན་བྱེད་ཀྱི་ཡོད། ཡང་ལ་ལ་ནི་ཡེ་ཤུའི་ཆོས་ལུགས་ལ་དད་མོས་བྱེད་ཀྱི་ཡོད། ང་ཚོས་ཆོས་ལུགས་དང་གྲུབ་མཐའ་གང་ཞིག་ལའང་འཐེན་འཁྱེར་དང་ཚོད་འཛིན་མི་བྱེད་པས། སྣ་མང་རང་བཞིན་ཅན་གྱི་ཆོས་ལུགས་ལ་དད་ཞེན་བྱེད་པ་དེས་ང་ཚོར་འགོག་རྐྱེན་ཅི་ཡང་མེད།
རྒྱ་གར་གྱི་མི་རིགས་ཕུད་མི་རིགས་གཞན་པ་རྣམས་ལ་ནགས་གསེབ་ཀྱི་གནས་ཆེན་ཨཱཤ་རཱམ་གྱི་ངོ་མཚར་རྣམས་ངོ་འཕྲོད་ཁག་པོ་རེད། གང་ཡིན་ཞེ་ན་དེ་ནི་ཉི་མའི་འོད་ཟེར་དང་སྐར་མའི་བཀྲག་མདངས་འོག་ཏུ་གནས་དེ་རུ་ཆུ་སྐྱེས་བཞིན་དུ་འཚར་ལོངས་བྱུང་བས་སོ། །རྒྱ་གར་གྱི་གནམ་གཤིས་ཀྱིས་ང་ཚོར་གུ་ཡངས་པའི་རླུང་ཞིག་གནང་བ་དང༌། མ་ཡུམ་གྱི་སྟོབས་ཤུགས་ཆེ་བའི་སྐད་ཡིག་གི་གཙང་པོས་ཡང་དག་པའི་ཆོ་ག་གདངས་སུ་གྱེར་ཞིང༌། མུ་མཐའ་མེད་པའི་ཞིང་ཐང་གིས་ང་ཚོའི་ཁང་ཁྱིམ་གྱི་མཐའ་ནས་བསྐོར་ཡོད། གནས་དེ་རུ་ཉི་མ་ནི་སྔོ་ལྗང་གི་འཇིག་རྟེན་ནས་གསེར་མདོག་གི་མར་བཞིན་མཆེད་དེ། རྨོངས་པ་རྣམས་ལ་བསྐལ་བ་གྲངས་མེད་ཀྱི་སྟག་པའི་སྒྲོན་མེ་ལྟར་གསལ་བར་བྱེད་པ་དང༌། དགོང་དྲོར་སླེབས་ཚེ་རང་བྱུང་ཁམས་ཀྱིས་ཚེ་རབས་ཕྱི་མར་མཆོར་ཉམས་ཀྱི་གུས་འདུད་བྱེད་པ་བཞིན་ནུབ་ཕྱོགས་སུ་བཞུད། གནས་དེ་རུ་ལྗོན་པའི་གྲིབ་བསིལ་ཡང་གནས་སུ་བཅའ་འོས་པ་དང༌། ས་གཞིའི་རྡུལ་རྣམས་ཀྱིས་རང་གི་ལག་ངར་སྨུག་པོ་ངེད་ཅག་གི་ཕྱོགས་སུ་རྐྱོང་ཞིང༌། རླུང་བུས་བརྩེ་ཞེན་གྱི་གོས་བཟང་གཡོགས་ནས་རང་ཅག་རྣམས་ལ་དྲོད་ཁོལ་སྦྱིན་པར་བྱེད། འགྱུར་མེད་ཀྱི་བདེན་དོན་འདི་དག་གིས་ང་ཚོའི་སེམས་ལ་དྲན་སྐུལ་རེ་བྱེད་ཀྱིན་ཡོད་པས། ཆེས་བླ་ན་མེད་པའི་བླ་སྲོག་ནི་འགྲོ་བ་མིའི་བླ་སྲོག་དང་རང་བྱུང་ཁམས་ཀྱི་བླ་སྲོག་གཉིས་ཟུང་དུ་འབྲེལ་བ་ལས་བྱུང་བར་ངེས་ཤེས་རྙེད་པར་བྱ་རྒྱུ་ནི་རྒྱ་གར་གྱི་དགོས་དོན་གལ་ཆེན་ཞིག་ཡིན། དགོས་དོན་འདི་ནི་གནའ་བོའི་དུས་སུ་ནགས་ཀྱི་སློབ་གྲྭའི་ནང་རང་བཞིན་ངང་གནས་ཡོད་པ་དང༌། དེས་ད་ལྟ་ད་དུང་ཡང་ཁོ་བོ་ཅག་ལ་འཛད་མཐའ་མེད་པའི་མིའི་རིགས་ཀྱི་བརྩེ་སེམས་དང་འབྲེལ་བའི་སྣོད་བཅུད་འདྲ་མིན་ཏེ། ང་ཚོས་རྔུབ་བཞིན་པའི་རླུང་བུའི་ཁྲོད་ནས་འདུ་ཤེས་མྱོང་བ་དང༌། ང་ཚོའི་མིག་གིས་མཐོང་བའི་འོད་སྣང་ནས་འདུ་ཤེས་སྐྱེས་པ། གཟུགས་པོ་འཁྲུད་སའི་ཆུ་ནང་ནས་འདུ་ཤེས་སྐྱེས་པ། ང་ཚོ་འཚོ་ས་དང་འཆི་སའི་ས་གཞི་ནས་འདུ་ཤེས་སྐྱེ་ཐབས་བྱེད་པ་སོགས་ལ་ནན་སྐུལ་བྱེད་ཀྱི་ཡོད། ངས་རྟོགས་པ་དང༌། རང་ཉིད་ཀྱི་ཉམས་མྱོང་ལས་ཤེས་པར་ཨཱཤ་རཱམ་འདིའི་ནང་འཚོ་བའི་དགེ་རྒན་དང་སློབ་མ་རྣམས་ནི་ཉིན་ལྟར་སྐྱེ་བ་ཐོག་མ་མེད་པའི་རྣམ་ཤེས་དེར་རང་དབང་ཐོབ་པར་འཚར་ལོངས་བྱེད་བཞིན་ཡོད་ཅིང༌། དེ་ནི་སློབ་ཁྲིད་ཀྱི་བརྒྱུད་རིམ་ཞིག་དང་ཕྱི་རོལ་གྱི་སྒྲིག་འཛུགས་ཤིག་ལ་བརྟེན་ནས་བྱུང་བ་མིན་པར། མཐའ་སྐོར་དུ་ཡོད་པའི་ཁོར་ཡུག་གི་མི་མངོན་པའི་སྟོབས་ཤུགས་དང་དཀོན་མཆོག་དང་གྲོགས་འདྲིས་བྱས་པའི་དད་གུས་ཅན་གྱི་བསམ་བློའི་དྲན་འཆར་ལས་བྱུང་བ་ཞིག་ཡིན།
སློབ་གྲྭ་འདིའི་ནང་སློབ་ཁྲིད་ཀྱི་ཐབས་ལམ་ནི་ང་རང་ཉིད་ཀྱི་བྱིས་དུས་ཀྱི་ཉམས་མྱོང་ལ་གཞིར་བཅོལ་བའི་རྣམ་གཞག་ཅིག་ལག་བསྟར་བྱེད་ཀྱིན་ཡོད། གོང་དུ་འགྲེལ་བརྗོད་བྱས་པ་ལྟར་བྱིས་པ་ཚོར་ཤེས་རིག་གི་འདུ་ཤེས་ལས་ལྷག་པའི་སེམས་བྱུང་གཞན་མང་པོ་ཞིག་པར་ངོས་འཛིན་བྱེད་ཀྱི་ཡོད། དེས་ན་ང་ཚོའི་སློབ་ཚན་རྒྱ་ཆེ་ས་ནི་དོན་གནད་འདིར་གཞིར་བཞག་ནས་སློབ་ཀྱི་ཡོད། ང་ཚོའི་གཤིས་ཀའི་ནང་མི་རབས་མང་པོའི་ཉམས་མྱོང་འདུས་ཡོད་ལ། དེ་དག་གིས་ང་ཚོར་ངལ་དུབ་མི་སྤྲད་པར་མ་ཟད་སྤྲོ་སྣང་ཚད་མེད་སྦྱིན་གྱི་འདུག ཡོན་ཏན་སྦྱོང་འདོད་ཀྱི་སེམས་བྱུང་དེ་ནི་ང་ཚོ་རང་ཉིད་ཀྱི་མི་ཚེ་རུ་ཡོད་ཅིང༌། དེ་ནི་ཕྱི་ངོས་ནས་མེ་སྦར་བ་དང་ཤུགས་ཇེ་ཆེར་གཏོང་ཆོག་པའི་སྒྲོན་མེ་ལྟ་བུ་ཞིག་མིན་ཏེ། མི་ཚེའི་བརྒྱུད་རིམ་གྱི་ཁྲོད་དུ་མེ་རང་འབར་དུ་འབྱུང་བའི་འོད་ཟེར་ཞིག་ལ་ངོས་འཛིན་དགོས།
སྟབས་ལེགས་པ་ཞིག་ལ་བདག་ནི་རྩོམ་རིག་དང་རོལ་དབྱངས། སྒྱུ་རྩལ་གྱི་ལྟ་ཚུལ་སོགས་ལ་ལྷན་སྐྱེས་ཀྱི་དགའ་སྣང་ཡོད་པའི་ཁྱིམ་ཚང་ཞིག་ལས་འཚར་ལོངས་བྱུང༌། བདག་གི་ཕུ་ནུ་དང་མིང་སྲིང་རྣམས་ལ་བསམ་བློའི་རང་དབང་ཡོད་པ་དང༌། ཁོ་ཚོ་མང་ཆེ་བ་ལྷན་སྐྱེས་ཀྱི་རིག་རྩལ་ལ་དུངས་ཞེན་ཆེན་པོ་ཡོད། ཁོར་ཡུག་འདི་འདྲ་ཞིག་གི་འོག་ཏུ་འཚར་ལོངས་བྱུང་བས། ང་རང་ཆུང་དུས་ནས་བསམ་བློ་གཏོང་རྒྱུར་དགའ་བ་དང་རེ་སྨོན་བཅངས་པ་སོགས་བྱས་ཏེ། རང་གི་བསམ་བློ་ལུས་ངག་གི་རྣམ་འགྱུར་ནས་མངོན་པ་ཡིན། ཆོས་ལུགས་དང་སྤྱི་ཚོགས་ཀྱི་ཕུགས་བསམ་ལྟ་ཚུལ་འཛིན་སྟངས་ཐད་བདག་གི་ཁྱིམ་ཚང་ནི་རང་དབང་ཡོད་པ་ཞིག་སྟེ། ལྟ་བ་རྙིང་པ་དང་ལུགས་སྲོལ་རྙིང་པ་ལས་ཁ་བྲལ་དུ་སོང་བའི་རྒྱུ་མཚན་གྱིས་སྤྱི་ཚོགས་ཀྱིས་མཐའ་རུ་ཕུད་པའི་ཁྱིམ་ཚང་ཞིག་ཡིན། རྒྱུ་མཚན་འདིས་ང་ཚོའི་བསམ་བློའི་རང་དབང་གི་འཇིགས་སྣང་སེལ་བས་མི་ཚེའི་གནས་སྟངས་འདྲ་མིན་ལ་ཚོད་ལྟ་བྱེད་ཆོག་གི་ཡོད། འདི་ནི་བདག་གི་བྱིས་དུས་སུ་ཐོབ་པའི་ཤེས་ཡོན་ཡིན་ཞིང༌། རང་གི་བསམ་བློ་དང་སྒྱུ་རྩལ་གྱི་ནུས་ཤུགས་ལ་སྦྱོང་བརྡར་བྱེད་པའི་རང་དབང་དང་སྤྲོ་སྣང་ཡིན། རྒྱུ་མཚན་འདིས་ངའི་སེམས་པ་རྟག་ཏུ་རང་བྱུང་ཁམས་ཀྱི་གསོ་སྐྱོང་འོག་འཚར་ལོངས་བྱེད་འདོད་ཅིང༌། སྒྲིག་གཞི་དམ་པའི་སློབ་གྲྭའི་ལམ་ལུགས་ལ་བཟོད་བསྲན་མི་ཐུབ་པར་གྱུར།
བདག་གིས་སློབ་གྲྭ་འདི་ཐོག་མར་གཉེར་སྐབས་ང་ལ་ཆུང་དུས་ཀྱི་ཉམས་མྱོང་འདི་ཁོ་ན་ལས་ཉམས་མྱོང་གཞན་གང་ཡང་མེད། ཁོ་བོས་ངོས་འཛིན་གསལ་པོ་ཐུབ་པར་ང་ཚོར་དགོས་པ་ནི་རིག་གཞུང་གི་བྲོ་བ་རོ་མྱོང་བྱེད་རྒྱུ་ལས་ལུགས་སྲོལ་ཅན་གྱི་སློབ་ཁྲིད་ཐབས་ལམ་ཞིག་རྒྱུན་བསྐྱང་རྒྱུ་དེ་མ་རེད། སྟབས་ལེགས་པ་ཞིག་ལ་སྐབས་དེར་མཐོ་རིམ་རབ་འབྱམས་པའི་ལག་འཁྱེར་ཐོབ་ལ་ཉེ་བའི་འདུན་པ་ཅན་གྱི་སློབ་བུ་སཱཏིཤི་ཙནདྲ་རྱོ་བདག་གི་སློབ་གྲྭ་འདི་སྣང་བར་སོང་བས། རང་ཉིད་ཀྱི་མི་ཚེ་གང་པོ་བདག་གི་བསམ་བློའི་མཇུག་སྐྱོང་བྱེད་པར་ལེགས་སྐྱེས་སུ་འབུལ་རྒྱུའི་དམ་བཅའ་བཞག་པ་རེད། ཁོང་ནི་ལོ་ངོ་བཅུ་དགུ་ཙམ་གྱི་ན་གཞོན་ཞིག་ཡིན་ཡང་རང་ཉིད་ལ་ཁྱད་དུ་འཕགས་པའི་བསམ་བློ་ཞིག་ཡོད། རྒྱུན་གཏན་བསམ་བློའི་འཆར་སྒོ་མང་བའི་འཇིག་རྟེན་དུ་འཚོ་ཞིང་རང་བྱུང་ཁམས་དང་འགྲོ་བ་མིའི་མཛེས་སྡུག་ཡོད་ཚད་ལ་ཚོར་འདུ་མྱོང་བར་འདུ་ཤེས་སྐྱེན་པོ་ཡོད་མཁན་ཞིག་རེད། སཱཏིཤི་ནི་སྙན་ངག་པ་ཞིག་ཡིན་ཞིང༌། གལ་ཏེ་སྐུ་འཚོ་བཞུགས་ཡོད་ན་འཛམ་གླིང་གི་རྩོམ་རིགས་སྡིངས་ཆའི་ཁྲོད་ཁོང་ལ་འགྱུར་མེད་ཀྱི་གོ་གནས་ཤིག་ཐོབ་འོས་པ་ཡིན། འོན་ཀྱང་ལོ་ངོ་ཉི་ཤུར་ཕེབས་སྐབས་ཁོང་འཇིག་རྟེན་འདི་ནས་ཞལ་གྱེས་ཤིང༌། སློབ་གྲྭ་འདིར་ལོ་ངོ་གཅིག་ལས་ཞབས་ཞུ་སྒྲུབ་ཁོམ་བྱུང་མེད། ཁོང་ཡོད་དུས་སློབ་ཕྲུག་ཚོས་འཛིན་གྲྭའི་སློབ་ཁྲིད་ཁོ་ན་ཙམ་ལ་ཚད་བཀག་མི་བྱས་པར་ཕྱོགས་ཀུན་ཏུ་འགྲོ་ལམ་རེ་ཡོད་པ་ཚོར་བཞིན་ཡོད། དཔྱིད་དུས་སུ་སཱལ་གྱི་སྡོང་པོ་རྣམས་ལ་མེ་ཏོག་རྣམ་པར་བཞད་དུས་ཁོང་གིས་སློབ་ཕྲུག་ཚོ་ཁྲིད་དེ་ནགས་གསེབ་ཏུ་འགྲོ་བ་དང༌། ལྗོན་པའི་འོག་ཏུ་སྙན་ངག་གྱེར་འདོན་བྱས་ཏེ་སྤྲོ་སྣང་གི་སེམས་པ་རབ་ཏུ་གཡོ་བར་བྱེད། ཁོང་གིས་སྙན་ངག་མཁན་པོ་ཤེག་སེ་ཕེར་དང་རང་ཉིད་ཀྱིས་ཆེས་དགའ་མོས་བྱེད་སའི་བྷརཽན་གྱི་སྙན་ངག་གྱེར་འདོན་བྱས་ཏེ། བྱང་ཆུབ་པའི་བྷང་གྷལ་གྱི་སྐད་ཐོག་ནས་སློབ་ཕྲུག་རྣམས་ལ་འགྲེལ་བཤད་རྒྱག་གི་ཡོད། ཁོང་གིས་རང་ཉིད་ཀྱི་དགའ་མོས་བྱེད་སའི་བརྗོད་གཞི་གང་ཞིག་མཐོང་བ་དེ་སློབ་ ཕྲུག་ཚོར་བཤད་ཀློག་བྱེད་པ་དང༌། རང་ཉིད་ཀྱིས་གང་བཤད་པ་དེ་དག་སློབ་མ་རྣམས་ཀྱིས་གོ་བ་ལེན་མི་ཐུབ་སྙམ་པའི་སེམས་ཁྲལ་དེ་འདྲ་གང་ཡང་མེད། ཁོང་གིས་གང་བཤད་ཀློག་བྱས་པ་དེ་དག་སློབ་ཕྲུག་ཚོས་ཚིག་ཇི་བཞིན་དང་གོ་བ་མཐིལ་ཕྱིན་པ་ཞིག་རྟོགས་རྒྱུར་དེ་ཙམ་དགེ་མཚན་མཐོང་གི་མེད་ཅིང༌། སློབ་ཕྲུག་ཚོའི་སེམས་པར་གཡོ་འགུལ་ཐེབས་པར་གཙོ་འདོན་བྱེད་ཀྱི་ཡོད། རྒྱུ་མཚན་འདིའི་དབང་གིས་ཁོང་གི་ཐབས་ལམ་དེར་སློབ་མ་རྣམས་ཀྱིས་རྟག་ཏུ་སྤྲོ་སྣང་ཆེན་པོ་བྱེད། སཱཏིཤི་ནི་སློབ་དེབ་ཀྱི་ཁ་ལོ་སྒྱུར་མཁན་དགེ་རྒན་གཞན་དག་དང་གཏན་ནས་མི་འདྲ། ཁོང་གིས་སློབ་ཁྲིད་གང་གནང་བ་དེ་མི་ཚེ་དང་འབྲེལ་ཞིང༌། སློབ་ཁྲིད་ཀྱི་ལུང་རིགས་འདྲེན་ས་ནི་ཁོང་རང་ཉིད་ཡིན། དེར་བརྟེན་སློབ་གསོ་ནི་མི་ཚེའི་རྒྱུ་ཆ་ཞིག་ཏུ་བསྐྲུན་པ་དང༌། ཁྲིད་གཞི་དེ་ལས་སླ་པོའི་ངང་འགྲོ་བ་མིའི་རང་བཞིན་དང་མཉམ་བསྲེས་བྱེད་ཐུབ་ཀྱི་ཡོད། ཐབས་ལམ་དེ་དག་གྲུབ་འབྲས་ལྡན་པ་ཞིག་ཡོང་དོན་ནི་ཁོང་གིས་རང་ཉིད་ཀྱི་མི་ཚེར་སྤྲོ་སྣང་བྱེད་པ་དང༌། རང་གི་བསམ་བློར་ཡིད་ཆེས་བྱེད་པ། རང་གི་ཉེ་འཁོར་དུ་ཡོད་པའི་བྱ་དངོས་ལ་དོ་སྣང་ཆེ་བ། རྒྱུན་གཏན་སློབ་ཕྲུག་རྣམས་དང་འབྲེལ་ལམ་བཟང་བ་བཅས་ཀྱི་ཐོག་ནས་བྱུང་བ་ཡིན། ཁོང་གི་སེམས་སྐུལ་དེ་ནི་དཔེ་དེབ་ཀྱི་ཐབས་ལམ་ལས་བྱུང་བ་མིན་པར་ཚོར་འདུ་སྐྱེན་པའི་རང་གི་བསམ་བློ་དང་འཇིག་རྟེན་ཁམས་གཉིས་དབར་ཐད་ཀར་འབྲེལ་གྲོགས་བཟང་པོ་བྱས་པ་ལས་བྱུང་བ་ཞིག་ཡིན། དུས་བཞིའི་འགྱུར་ལྡོག་གིས་སའི་གོ་ལར་ཤུགས་རྐྱེན་ཅི་ཙམ་སྤྲོད་པ་ལྟར་ཁོང་ལ་ཤུགས་རྐྱེན་དེ་ལྟར་ཐེབས་ཀྱི་ཡོད། རྟག་ཏུ་བར་སྣང་ཁམས་སུ་རྒྱུ་བ་དང༌། རླུང་གསེབ་ཏུ་འཕྱོ་ལྡིང་བྱེད་པ་ན་མཁའ་དབྱིངས་སུ་འོད་ལམ་ལམ་དུ་འཚེར་བ། ས་གཤིན་གྱི་འོག་ཏུ་གཞིས་བཅས་པའི་རྩྭ་དང་རྩི་ཤིང་གི་རྩ་བར་སྦིར་ཞིང་སྦྲིད་པའི་རང་བྱུང་ཁམས་ཀྱི་བརྡ་འཕྲིན་མི་མངོན་པ་དེ་དག་རང་གི་ཟུངས་ཁྲག་གི་ནང་དུ་རྒྱུ་བཞིན་པ་ཚོར་གྱིན་ཡོད། ཁོང་གིས་སྦྱངས་བརྩོན་བྱས་པའི་རྩོམ་རིག་དེ་དག་ལ་དཔེ་མཛོད་ཁང་གི་དྲི་ཙམ་ཡང་འགོས་མེད། ཁོང་ལ་རྣམ་པ་ཐ་དད་དང་ཤིན་ཏུ་ཕྲ་བའི་རྟོག་དཔྱོད་ཀྱི་ནུས་པ་ཆེན་པོ་ལྡན་པས། རང་ཉིད་ཀྱི་གྲོགས་པོ་གསལ་པོར་མཐོང་བ་ལྟར་རང་གི་བསམ་བློ་གསལ་པོར་མཐོང་བའི་ནུས་པ་ཆེན་པོ་ཡོད།
དེ་ལྟར་ན་བདག་གི་སློབ་གྲྭའི་སློབ་མ་ཚོས་སློབ་དེབ་ལས་ཤེས་ཡོན་མི་སྦྱང་བར། གསོན་ཉམས་ལྡན་པའི་དགེ་རྒན་འདི་འདྲ་ཞིག་གི་འོག་ནས་སློབ་སྟོན་ཞུ་རྒྱུ་བྱུང་བ་ནི་སྐལ་བ་བཟང་པོ་ཞིག་རེད། སློབ་གྲྭའི་ནང་དགོས་ངེས་ཀྱི་ཆ་རྐྱེན་དཔེ་དེབ་སོགས་ང་ཚོ་དང་འཇིག་རྟེན་ཁམས་ཀྱི་བར་ན་མེད་པ་རེད་དམ། ངེད་ཅག་གི་བསམ་བློའི་སྒེའུ་ཁུང་དཔེ་དེབ་ཀྱི་ཤོག་བུའི་ཡོལ་བས་བསྒྲིབས་པ་དང༌། ཀླད་རྩའི་སྐྱི་ཤུན་རེ་རེ་ན་ཤོག་བུའི་ཚིག་ཚོགས་ཀྱི་སྦྱིལ་མོ་བྱུགས་ཏེ་བདེན་དོན་དང་ཐད་ཀར་རེག་ཐུག་བྱེད་པར་འགྲོ་ལམ་མེད་པ་བཟོས་ཡོད། དཔེ་དེབ་ཁོ་ན་ལས་རྙེད་པའི་བདེན་དོན་གྱི་འཇིག་རྟེན་དེས་ང་ཚོ་གནས་བཅའ་སའི་གྱང་གི་གས་སྲུབས་རེ་རེའི་གསེབ་ཏུ་རང་ཉིད་ཀྱི་མཁར་རྫོང་ཞིག་བསྐྲུན་ཏེ། དཀོན་མཆོག་གི་ཞིང་ཁམས་དང་འབྲེལ་གྲོགས་མི་བྱེད་པའི་ཉེན་ཁ་ལས་གཡོལ་ཏེ་གནས་ཡོད། ལོས་ཡིན། དཔེ་དེབ་ལ་དགེ་མཚན་ཡེ་ནས་མེད་པའི་འདོད་ཚུལ་བཟུང་ན་ག་ནས་འགྲིག འོན་ཀྱང་ངེད་ཅག་གིས་ངེས་པར་དུ་ཤེས་དགོས་པ་ཞིག་ལ་དཔེ་དེབ་ལ་དེ་དང་འདྲ་བའི་ཞན་ཆ་དང་འཇིགས་སྣང་བྱེད་དགོས་པའི་གནད་དོན་ཞིག་ཡོད། དེས་ན་ང་ཚོས་ཐབས་ཤེས་གང་དྲགས་ཀྱིས་བྱིས་པའི་སློབ་གསོ་ནི་རང་བཞིན་གྱི་རྣམ་པའི་ཐོག་ནས་བདེན་དོན་ལ་ཁེལ་བ་བྱེད་དགོས་པ་དང༌། དེ་ཡང་མི་དང་རང་བྱུང་ཁམས་གཉིས་དབར་ཐད་ཀར་རེག་ཐུག་བྱས་ཏེ་ཤེས་པར་བྱེད་དགོས་སོ། །
རྒྱུ་མཚན་འདི་གཞིར་བཞག་ནས་ངས་ཨཱཤ་རཱམ་ནང་ཁོར་ཡུག་འདི་འདྲ་ཞིག་བསྐྲུན་པའི་ཆེད་དུ་རྒྱུ་ཆ་འཚོལ་སྒྲུབ་བྱས་པ་ཡིན། ཁོ་བོས་གླུ་གཞས་བརྩམས་ཤིང༌། དེའང་ལང་ཚོ་མ་རྒྱས་པའི་བྱིས་པའི་བསམ་བློ་ཁོ་ནར་བལྟས་ནས་བརྩམས་མེད། མང་པོ་ཞིག་ནི་སྙན་ངག་པ་ཞིག་གིས་སོ་སོའི་སྤྲོ་སྣང་གི་ཆེད་དུ་བརྩམས་པ་ཡིན། <<གླུ་ཐལ་སྦྱར་མ>>ཡི་གླུ་གཞས་མང་ཆེ་བ་ཡང་གནས་འདི་རུ་བརྩམས་པ་ཡིན། བདག་གིས་གླུ་གཞས་གསར་པ་རེ་གསར་རྩོམ་བྱས་རྗེས་བྱིས་པ་ཚོར་དེ་དག་དབྱངས་སུ་ ལེན་གྱི་ཡོད་པས། ཁོང་རྣམས་དགའ་སྤྲོས་མྱོས་ཏེ་དེ་དག་ཤེས་ཐབས་བྱེད་པར་འབད་བརྩོན་བྱེད་ཀྱི་ཡོད། ནམ་ཟླ་དྭངས་པའི་ཟླ་བའི་འོད་སྣང་གི་འོག་དང་དབྱར་ཟླ་བདུན་པའི་ཆར་ཞོད་ཀྱི་ཁྲོད་དུ་ཁོ་ཚོ་མཉམ་དུ་འཛོམས་ནས་བག་ཡངས་ཀྱིས་གླུ་དབྱངས་ལེན། བདག་གི་མི་ཚེའི་མཇུག་མཐའི་ཟློས་གར་ཕལ་ཆེ་བ་གནས་འདིར་བརྩམས་ཤིང་སློབ་བུ་ཚོས་དེ་དག་འཁྲབ་སྟོན་བྱེད་པར་ཆ་ཤས་ལེན་ཀྱི་ཡོད། ནམ་དུས་སོ་སོའི་དུས་ཆེན་གྱི་ཆེད་དུ་གཞས་མ་གཏམ་གྱི་ཟློས་གར་འདྲ་མིན་བརྩམས་ཤིང༌། དུས་རྒྱུན་ངས་གསར་དུ་བརྩམས་པའི་སྙན་ངག་དང་རྩོམ་ཡིག་གང་ཞིག་དགེ་རྒན་ཚོར་འཆད་ཁྲིད་བྱེད་དུས། བརྗོད་གཞི་གང་ཡིན་ལ་མ་ལྟོས་པར་སློབ་བུ་ཚོས་སྤྲོ་སྣང་ངང་དེ་དག་ཉན་པར་ཡོང་ངོ༌། ། ཁོ་ཚོས་བག་ཕེབས་ངང་རྩོམ་ཡིག་དེ་དག་ལ་སྦྱངས་བརྩོན་བྱེད་པ་དང༌། ཅི་སྟེ་བདག་གི་སློབ་ཁྲིད་སྐབས་ཁོ་ཚོ་སྐད་མ་བཏང་ཚེ་ཉོབ་སྣང་ཆེན་པོ་བྱེད་ཀྱི་ཡོད། ང་རང་ཨ་རིར་མ་ཡོང་བའི་བདུན་ཕྲག་འགའ་ཤས་གོང་བྷརཽན་གྱི་གཏམ་བརྗོད་<<ལུ་རི་ཡ>>ཞེས་པ་དེ་བངྒལ་སྐད་ཡིག་ཐོག་ཕབ་སྒྱུར་བྱེད་ཀྱིན་སློབ་ཕྲུག་ཚོར་འཆད་ཁྲིད་བྱས་པ་ཡིན། གཏམ་བརྗོད་ཆ་ཚང་འཆད་ཁྲིད་བྱེད་པར་ཉིན་རྒྱབ་གཉིས་ཀྱི་དུས་ཚོད་ལས་མ་འགོར་ཞིང༌། ཉིན་རྒྱབ་ཕྱི་མ་དེའང་ཉིན་སྔ་མ་ལྟར་དུས་ཚོད་མང་ཉུང་གཅིག་པ་བེད་སྤྱད་པ་ཡིན། སྐབས་དེར་ངའི་སློབ་བུ་ཚོས་འཁྲབ་སྟོན་བྱས་པའི་གཏམ་བརྗོད་དེར་ལོངས་སུ་སྤྱོད་མཁན་གཟིགས་མོ་བ་ཚོའི་ཡིད་སེམས་རབ་ཏུ་འཕྲོགས་ཤིང༌། སྒྱུ་རྩལ་ལ་བྱང་ཆ་དོད་པའི་གར་མཁན་མཁས་པ་ལྟར་གྱི་རྣམ་དཔྱོད་ལ་གདེང་འཇོག་མཐོ་པོ་བྱས་སོང༌། གང་ཡིན་ཞེ་ན་ཁོ་ཚོ་ནི་ལོ་ངོ་མང་པོར་གཏམ་བརྗོད་འཁྲབ་པར་སྦྱོང་བརྡར་བྱས་པ་དེ་འདྲ་མིན་ལ། དུས་རྒྱུན་སློབ་གྲྭ་ཁག་ནང་འཁྲབ་སྟོན་བྱེད་པའི་བྱིས་པའི་ཟློས་གར་ཚོགས་པ་དེ་འདྲ་མིན་ཡང༌། ཁོ་ཚོས་རང་ཉིད་ཀྱི་འཁྲབ་རྒྱུའི་གཏམ་བརྗོད་ནང་ལུས་ངག་ཡིད་གསུམ་གྱི་སྒྱུ་རྩལ་ཡོངས་སུ་བཏོན་པས་རེད། ཁོ་ཚོར་འཁྲབ་བྱའི་ནང་དོན་དང་འཁྲབ་སྟོན་བྱེད་པའི་འདུན་པ་ཡོད་པ་ཙམ་གྱིས་ཆོག ཟློས་གར་རྩོམ་པ་པོས་རང་ཉིད་ཀྱི་ཟློས་གར་དེ་བྱིས་པ་ཚོས་འཁྲབ་སྟོན་དེ་ལྟར་བྱེད་པར་སེམས་ཁྲལ་དང་སྐྱོན་བརྗོད་ཇི་ལྟར་བྱས་ཀྱང། ངས་སློབ་བུ་ཚོར་མི་དགའ་བ་ཡེ་ནས་བྱེད་མྱོང་མེད་ལ། དགེ་རྒན་རྣམ་པས་ཁོ་ཚོའི་འཁྲབ་སྟོན་ལ་ཐེ་གཏོགས་བྱེད་པར་བཀག་འགོག་བྱས་ཏེ། སློབ་ཕྲུག་ཚོས་མི་སྣ་གང་འདྲ་ཞིག་གི་ཆ་ཤས་ལེན་འདོད་ཀྱང་དེ་ལྟར་བྱེད་ཆོག་པར་འབད་བརྩོན་བྱེད་ཀྱི་ཡོད། དུས་ཚོད་ནམ་ཡིན་ལ་ཁོ་ཚོ་རང་ཉིད་ཀྱིས་ཟློས་གར་བརྩམས་པ་དང་འཁྲབ་སྟོན་བྱས་ཏེ་ངེད་ཅག་ལྟད་མོར་མགྲོན་འབོད་བྱེད་ཀྱི་ཡོད། ཁོ་ཚོས་རྩོམ་རིགས་ཀྱི་འདུ་འཛོམས་ཡང་ཡང་སྐོང་འཚོགས་བྱེད་པ་དང༌། སྡེ་ཚན་མི་འདྲ་བ་གསུམ་ནས་རང་རང་གི་མུ་འབྲེལ་དུས་དེབ་རེ་འདོན་སྤེལ་བྱེད་ཅིང༌། དེ་དག་ནས་ཆེས་དགའ་མོས་བྱེད་ས་ནི་བྱིས་པའི་སྡེ་ཚན་གྱི་དུས་དེབ་ཡིན། བདག་གི་སློབ་བུ་མང་པོར་རི་མོ་དང་ཚོན་བྲིས་ལ་དགའ་ཞེན་དང་རྣམ་དཔྱོད་ཧ་ཅང་ལེགས་པོ་ཡོད་ཅིང༌། དེའང་སྲོལ་རྒྱུན་གྱི་ཐབས་ལམ་དཔེ་བཤུས་མི་བྱ་བར་རང་ཉིད་ཀྱི་རྣམ་དཔྱོད་ལ་བརྟེན་པ་དང༌། ཕྱི་ལོགས་ནས་ཡོང་བའི་མཁས་དབང་ཚོས་རང་གི་མི་ཚེའི་ཉམས་མྱོང་དང་འབྲེལ་བའི་ལམ་སྟོན་གནང་བ་དག་ལ་བརྟེན་གྱི་ཡོད།
བདག་གིས་སློབ་གྲྭ་འདི་ཐོག་མར་འགོ་འཛུགས་སྐབས་སློབ་བུ་ཚོར་རོལ་དབྱངས་ལ་སྤྲོ་སྣང་ཡོད་པའི་རྣམ་པ་དེ་ཙམ་མེད། དེར་བརྟེན་བདག་གིས་རོལ་མོའི་དགེ་རྒན་འཚོལ་སྒྲུབ་བྱས་མེད་ལ་སློབ་ཕྲུག་ཚོར་ཡང་རོལ་མོའི་སློབ་ཚན་ངེས་པར་དུ་ལེན་དགོས་པར་སྐུལ་འདེད་བྱས་མེད། རོལ་དབྱངས་ལ་སྤྲོ་སྣང་ཡོད་མཁན་ཁོ་ནའི་ཆེད་གོ་སྐབས་བསྐྲུན་ཏེ་རོལ་མོའི་རིག་གཞུང་ལ་སྦྱངས་བརྩོན་བྱེད་དུ་བཅུག་གི་ཡོད། གོ་སྐབས་དེས་རོལ་དབྱངས་ལ་སྤྲོ་སྣང་མེད་པའི་སློབ་མ་གཞན་དག་གི་རྣ་བར་ཡང་བག་ཆགས་ཤིག་བསྐྲུན་ཏེ་རིམ་པས་རོལ་དབྱངས་ལ་དགའ་ཞེན་བྱེད་པ་དང༌། སློབ་ཚན་གཞན་དག་ལས་རོལ་མོའི་སློབ་ཚན་ལ་སྤྲོ་སྣང་ཆེ་བར་འཛིན་པའི་སྣང་བ་འཆར་བས་གཞི་ནས་ངས་རོལ་མོའི་དགེ་རྒན་ཞིག་གདན་ཞུ་བྱས་པ་ཡིན།
བདག་གི་སློབ་གྲྭའི་སློབ་བུ་ཚོ་ཞོགས་པ་སྔ་པོ་ནས་ལངས་ཤིང་སྐབས་འགར་སྐྱ་མདའ་མ་ཤར་གོང་ལངས་ཀྱི་ཡོད། ཁོ་ཚོས་ཆུ་འགྲམ་དུ་སོང་ནས་གཟུགས་པོ་འཁྲུད་པ་དང༌། རང་ཉིད་ཀྱི་ཉལ་ཆས་བསྡུ་བ་སོགས་བྱས་ཏེ་རང་གིས་རང་ལ་སྐུལ་ལྕག་བྱེད་པའི་བསམ་བློའི་སྟོབས་ཤུགས་རྒྱས་པར་བྱེད་དོ། །
སྔ་དགོང་གཉིས་ལ་སྒོམ་རྒྱག་པའི་ཆེད་དུ་སྐར་མ་བཅོ་ལྔ་རེ་ཟུར་འདོན་བྱས་ཡོད། སྒོམ་རྒྱག་པའི་དུས་ཚོད་འདི་ནི་ཁོ་ཚོར་ཟོག་རྫུ་བྱེད་རྒྱུ་དང་མཉམ་གཞག་ཏུ་སྡོད་རྒྱུའི་ཆེད་དུ་བཀོད་སྒྲིག་བྱས་པ་མ་ཡིན་ཞིང༌། ཁོ་ཚོས་དཀོན་མཆོག་སྒོམ་མི་ཐུབ་རུང་ནགས་གསེབ་ཏུ་རྒྱུ་བའི་ཐང་ལིའི་རྒྱུགས་སྟངས་སོགས་ལ་དམིགས་གཏད་བྱེད་བཅུག་སྟེ། དུས་ཚོད་འདིར་ཁུ་སིམ་སིམ་དུ་གནས་ཏེ་རང་སེམས་ཞི་བར་གནས་ཐབས་བྱེད།
སློབ་གྲྭ་འདི་འདྲའི་སྐོར་འགྲེལ་བརྗོད་ཆ་ཚང་ཞིག་བྱ་རྒྱུ་ཁག་པོ་རེད་མོད། དགོས་ངེས་ཀྱི་ཆ་རྐྱེན་གལ་ཆེ་ཤོས་ཤིག་ནི་སློབ་གྲྭའི་ཁོར་ཡུག་ཡིན་པ་དང༌། གཞན་ཡང་སློབ་ཕྲུག་ཚོར་བཙན་དབང་གི་སྒྲིག་འཛུགས་ཀྱིས་མི་གཅུན་པ་བྱེད་རྒྱུ་ནི་གནད་དམ་པ་ཡིན། བདག་གིས་དུས་རྟག་ཏུ་སློབ་མ་ཚོའི་སེམས་པར་གལ་ཆེར་འཛིན་པ་དང༌། ཁོ་ཚོར་རང་ཉིད་ཀྱི་འཇིག་རྟེན་ནང་རང་དབང་ངང་ཕྱོགས་ཡོངས་ནས་འཚར་ལོངས་ཡོང་བར་གཞོགས་འདེགས་བྱེད་ཀྱི་ཡོད། སློབ་གྲྭའི་འཛིན་སྐྱོང་བྱེད་སྟངས་ལའང་ཁོ་ཚོས་ཐེ་གཏོགས་གང་མང་བྱེད་ཆོག་ལ། ཉེས་ཆད་གཏོང་དགོས་པའི་དོན་རྐྱེན་བྱུང་ཚེ་དེ་ནི་ཁོ་ཚོ་རང་ཉིད་ཀྱི་ངོས་ལེན་ དང་བཟང་སྤྱོད་དང་འབྲེལ་ནས་ཐག་གཅོད་བྱེད་ཀྱི་ཡོད།
མདོར་བསྡུས་ནས་ཞུས་ན། ཁྱེད་རྣམས་ཀྱིས་ཁོ་བོ་ཅག་གི་ཨཱཤ་རཱམ་གྱི་སྣང་ཚུལ་རྣམས་གོ་བ་ལོག་སྒྲུབ་བྱས་ནས་མི་གསན་པར་ངས་གསལ་འདེབས་ཞུ་རྒྱུ་ཡིན། བསམ་ཚུལ་གང་ཞིག་ཤོག་ངོས་སུ་ཡི་གེར་ཕབ་དུས་དེ་ནི་སྟབས་བདེ་ལ་ཆ་ཚང་བའི་རང་བཞིན་ཞིག་ཏུ་སྣང་ཡང༌། དོན་དངོས་སུ་ཁོ་ཚོའི་རྣམ་དཔྱོད་རྣམས་ཕྱི་དངོས་པོའི་ཐོག་ནས་འགྲེལ་བརྗོད་བྱེད་པ་དང༌། དེ་ཡང་སྣེ་མང་རང་བཞིན་ཅན་དང་འགྱུར་ལྡོག་མང་བའི་གནས་ཚུལ་ཞིག་ཡིན་དུས་ཆ་ཚང་བ་དང་ཁ་གསལ་བའི་འགྲེལ་བརྗོད་ཅིག་བྱེད་ཐུབ་རྒྱུ་ནི་ཤིན་ཏུ་ཁག་པོ་རེད། རང་ཅག་རྣམས་ལ་འགྲོ་བ་མིའི་རང་བཞིན་ལྷན་སྐྱེས་ཀྱི་དཀའ་ངལ་དུ་མ་ཡོད་ལ་ཕྱིའི་རྒྱུ་རྐྱེན་གྱི་ཆ་ནས་ཀྱང་དཀའ་ངལ་དུ་མ་ཞིག་ཡོད། ངེད་ཅག་འགའ་ཞིག་གི་སེམས་སུ་སློབ་བུ་འདི་ཚོའི་བསམ་བློར་ཡིད་ཆེས་ཧ་ཅང་ཉུང་ངུ་ལས་མེད་ཅིང༌། ཡང་འགའ་ཞིག་ལ་དེ་ལས་ལྡོག་སྟེ་ཡིད་ཆེས་ཆེན་པོ་ཡོད་ངེས། ཕྱོགས་གཅིག་ནས་སློབ་བུ་འདི་ཚོར་ནུས་པ་འདྲ་མིན་སྣ་ཚོགས་ཡོད་ཅིང༌། གཡོལ་ཐབས་བྲལ་བའི་ལས་དོན་མ་འགྲུབ་པའང་མང་པོ་ཡོང་གི་ཡོད། ལས་དོན་འཐུས་ཤོར་སོང་བ་དེ་ཚོས་ཁོ་ཚོའི་སྣང་བརྙན་ལ་དོ་ཕོག་ཆེན་པོ་འབྱུང་ངེས་ལ། འུ་ཅག་གི་ཕུགས་བསམ་མངོན་འགྱུར་ཡོང་བར་ཡང་དོགས་པ་སྣ་ཚོགས་ཤར་ངེས་རེད། ངེད་ཅག་གིས་ཐེ་ཚོམ་དང་སྐྱོན་བརྗོད་ཀྱི་ལོ་ཟླ་མང་པོ་བརྒྱུད་ནས་ཡོང་བ་ཡིན། འོན་ཀྱང་འཐབ་རྩོད་དང་སོམ་ཉི་འདི་དག་ནི་དོན་དངོས་ཀྱི་གནས་ལུགས་ཤིག་ཡིན་པར་ངོས་འཛིན་གྱི་ཡོད། གསོན་ཉམས་ལྡན་པའི་ཕུགས་བསམ་ནི་དུས་ཚོད་ཚད་བཀག་གི་བྱ་བར་ངོས་འཛིན་མི་རུང་ཞིང༌། སྐར་ཆ་རེ་རེ་འགྲོ་དུས་དེའི་གྲུབ་འབྲས་གསལ་པོར་སྟོན་ཐུབ་རྒྱུ་ནི་ཡོང་མི་སྲིད་པའི་གནད་དོན་ཞིག་ཡིན། རང་གི་བསམ་བློར་ཡིད་ཆེས་ཡོད་མཁན་ཞིག་ཡིན་ན་དཀའ་ངལ་དང་ཞེ་འཁོན་འདི་དག་མི་ཚེའི་ལམ་བུར་ངེས་པར་དུ་འཕྲད་སྲིད་པའི་ངོས་འཛིན་གྱིས་བདེན་དོན་འཚོལ་སྒྲུབ་བྱེད་དགོས། ང་རང་མི་སྒེར་ཞིག་ལ་མཚོན་ན་མི་ཚེའི་ལྟ་གྲུབ་ནི་མི་ཞིག་གི་བླ་སྲོག་ལྟར་ཐབས་ལམ་ལས་ཀྱང་ཆེས་གལ་ཆེ་བར་ངོས་འཛིན་གྱི་ཡོད། བདག་གི་བསམ་པར་སློབ་གསོའི་དམིགས་ཡུལ་ནི་མིའི་སེམས་པར་རང་དབང་འཐོབ་པར་བྱེད་རྒྱུ་ཡིན་ཞིང༌། མི་ཚེར་ཉེན་ཁ་དང་འོས་འགན་ཅི་ཙམ་ཡོད་པ་བཞིན་རང་དབང་ལ་དེ་བཞིན་དུ་ཉེན་ཁ་དང་འོས་འགན་ཡོད་ཀྱང༌། རང་དབང་ནི་རང་དབང་གི་ལམ་བུ་ཞིག་ལས་རྙེད་དགོས་པ་ཡིན་ནོ། ། སྐྱེ་བོ་མང་ཆེ་བས་བྱིས་པ་རྣམས་ལ་ཆེ་མཐོང་བྱེད་རྒྱུ་བརྗེད་འགྲོ་གི་ཡོད་མོད། བདག་གི་བསམ་ཚུལ་ལྟར་ན་ཁོ་ཚོ་ནི་མི་རྒན་པ་རྣམས་ལས་ཀྱང་གསོན་ཉམས་ལྡན་ཞིང༌། ཁོ་ཚོས་རང་ཉིད་ལ་དབང་བའི་གོམས་གཤིས་ཀྱི་ཕྱི་སྒྲོམ་ཞིག་ཀྱང་སྐྲུན་གྱི་ཡོད། རྒྱུ་མཚན་དེ་ལྟར་ན་ཁོ་ཚོར་སློབ་ཚན་སློབ་པའི་ཆེད་དུ་སློབ་གྲྭ་འཛུགས་རྒྱུ་ཙམ་མ་ཡིན་པར་གཙོ་ཆེར་སེམས་ཀྱི་བདེ་སྡུག་ལ་གལ་ཆེན་འཛིན་པ་དང༌། མིའི་བརྩེ་དུང་གི་འདུ་ཤེས་ལ་གཙིགས་ཆེན་འཛིན་སའི་འཇིག་རྟེན་ཞིག་བསྐྲུན་རྒྱུ་གལ་ཆེན་པོ་ཡིན། དེས་ན་ཨཱཤ་རཱམ་འདི་ནི་སྐྱེ་བོ་ཐམས་ཅད་ཞི་བདེའི་ངང་མི་ཚེའི་དོན་སྙིང་ཆེད་དུ་འཚོ་སའི་གནས་ཤིག་ཡིན་པ་དང༌། རང་གི་མི་ཚེ་དེ་ཡང་དུས་རྟག་ཏུ་མཉམ་པར་འཇོག་རྒྱུ་ཁོ་ན་མ་ཡིན་པར་ལས་དོན་དུ་མ་གཉེར་བར་གསོན་ཤུགས་ཡོད་མཁན་ཤ་སྟག་རེད། གནས་འདིའི་བུ་སློབ་རྣམས་ཀྱི་སེམས་པ་རྒྱལ་ཁབ་ཀྱི་འཛུགས་སྐྲུན་ཁོ་ནའི་ཆེད་དུས་རྟག་ཏུ་སྐུལ་འདེད་བྱེད་པ་དང༌། དེའང་ཆེས་མཐར་ཐུག་གི་ཕུགས་བསམ་ཞིག་ཡིན་པར་ངོས་འཛིན་ཏེ། ཨུ་ཚུགས་ཀྱིས་ཁོ་ཚོར་ངེས་པར་དུ་ལྟ་ཚུལ་འདི་འཛིན་དུ་མ་བཅུག་པར། ངེད་ཅག་འཚོ་སྡོད་བྱེད་སའི་གནས་འདི་ནི་དཀོན་མཆོག་གི་ཕོ་བྲང་ཡིན་པར་ངེས་ཤེས་རྙེད་པར་བྱེད་ས་ཞིག་ཡིན། གནས་འདིའི་མི་རྣམས་ཀྱིས་དཀོན་མཆོག་གི་བུ་ཕྲུག་རྣམས་ལ་རེ་སྨོན་ཡོད་པ་དང༌། ཉི་མའི་འཆར་ནུབ་དང་རྒྱུ་སྐར་གྱི་མཛེས་སྡུག་ལ་བཏང་སྙོམས་སུ་མི་འཛིན་པར། རང་བྱུང་ཁམས་ཀྱི་ལེགས་སྐྱེས་ཏེ་མེ་ཏོག་དང་ཤིང་ཏོག་སོགས་ལ་མིའི་རིགས་ཀྱིས་དུངས་ཞེན་བྱེད་ས་ཞིག་ཡིན། རྒན་རྒོན་དང་ལོ་གཞོན། དགེ་རྒན་དང་སློབ་མ། ཡོད་ཚད་མདུན་ཅོག་གཅིག་གི་སྟེང་དུ་མཉམ་དུ་འདུས་ནས་ཉིན་རེའི་བཟའ་བཏུང་ལ་རོལ་བ་དང་མི་ཚེའི་མཐར་ཐུག་གི་ཁ་ཟས་ལ་རོལ་སའི་གནས་མཆོག་ཅིག་ཡིན་ནོ།། །།
