དབུས་གཙང་ལོ་རྒྱུས་ཆེན་མོ་ལས། ལྷོ་བྲག་རྫོང་གི་རྫོང་གཞིས་འགྲོ་སྟངས་དང་ཁྲལ་འུ་ཁྲིམས་གནོན།
ལེ་ཚན་གཉིས་པ། རྫོང་གཞིས་འགྲོ་སྟངས་དང་ཁྲལ་འུ་ཁྲིམས་གནོན། གཅིག རྫོང་གཞིས་འགྲོ་སྟངས། བོད་གཞུང་དགའ་ལྡན་ཕོ་བྲང་གི་སྐབས་ད་ལྟའི་ལྷོ་བྲག་རྫོང་ཁོངས་སུ་དོ་བོ་རྫོང་དང་། སེང་རྫོང་། དར་མ། ལྷ་ཁང་རྫོང་།[1] བཅས་ལས། གནའ་བོའི་དོལ་པ་རྫོང་གི་སྲིད་གཞུང་གི་ལྟེ་གནས་ནི་དེང་གི་ལྷོ་བྲག་རྫོང་གི་ཤར་ལྷོའི་མཚམས་གཡང་གཟར་བྲག་རི་སྟེ་མདོ་མཁར་རི་བོའི་རྩེར་བཏབ་ཡོད་པར།[2] དེང་སྔ་མོའི་དོ་རྫོང་(མདོ་རྫོང་)ངམ་མདོ་མཁར་རྫོང་གི་གྱང་རོའི་ཤུལ་ལུས་ཙམ་མཇལ་དུ་ཡོད་ལ།